Aˍmeˬriˆkaꞈ mvuhˇ miˬ lo Minˍneˍsawˉtaˍ, Sai˗hpaw venˇ lo 1954 hkʼawꞈ htaˇ ngaˬ paw ve yoˬ. Ngaˬ pa ngaˬ e yawˇ hui awˬ pon caˇ lawꞈ leh caˬ buˉ hpehꞈ ve yoˬ. Leh yaˇ hkʼa peu˗eˬ 5 gʼaˇ cawˬ leh ngaˬ 2 gʼaˇ teˇ gʼaˇ hpehꞈ ve yoˬ. Ngaˬ yaˇ ehˉ htaˇ caˬ buˉ ve liꞈ henˇ yehˬ lo henˇ leh caˬ buˉ awˬ hoˉ lonˉ bon yehˬ hkʼaw awˬ liˇ te htaˇ ngaˬ gʼa ga piˇ ve yoˬ. Yaꞈ hkʼaˇ, ngaˬ Liꞈ hpu hkʼaw ve awˬ lawn awˬ tanˇ hkʼa dehꞈ maˇ shiˍ. Hkʼa peu˗eˬ hpanˍ shehˍ hpaˇ Gʼuiˬ sha cawˬ ve tehꞈ ngaˬ yonˍ ve htawˇ, ngaˬ Gʼuiˬ sha htaꞈ oˉ kʼoˍ pui gʼa tuˬ caˬ buˉ ga laˇ gʼa ve tehꞈ ngaˬ maˇ yonˍ.

Ngaˬ mvuhˇ miˬ ve awˬ liˇ awˬ hkʼaˇ henˇ ve awˉ lawˉ teˇ hkʼawꞈ htaˇ, Yaˬhoˉvaˬ ve Shaˉhkiˆhkanˍ ve chaw ngaˬ geh ca guiˇ la ve yoˬ. Ngaˬ mawˇ tsuhˇ chehˇ ve pa taw, awˬ hpawˇ awˬ miˇ ma teˇ ca teˇ pawˆ ca kʼawꞈ guiˇ la tuˬ kʼoˆ laˇ ve yoˬ. Yawˇ hui laˬ htaˇ ngaˬ na hkawˇ nyiˇ maˬ cawˬ ve yoˬ. Yawˇ hui htaꞈ na piˇ ve, “aˬ htoꞈ ma te haiˬ ve chaw, daꞈ ve chaw aꞈ kehˉ a shaꞈ teꞈ hkʼaˇ daꞈ ve le? Chaw yaˇ awˬ tehˬ ve ha lehˬ tuˬ hkʼaˬ hkʼe te cawˬ gʼa tuˬ le?” Awˬ tehˬ ve co co taiˍ taiˍ a shaꞈ gʼa ve liꞈ kʼoˆ leh Miˬ guiˬ awˬ suhˉ yuˬ tawˆ ve Liꞈ hpu ngaˬ gʼa  leh henˇ tuˬ kʼoˆ piˇ ve yoˬ. Chi ngaˬ awˬ suhˉ awˬ suhˉ shiˍ tuˬ ga laˇ ve pa taw ha lehˬ jaˇ. Gʼuiˬ sha ve mvuhˇ miˬ miˬ guiˬ hkʼa peu˗eˬ hkʼoˆ uˉ peunˍ tuˬ ve ngaˬ gʼa henˇ ve pa taw ha lehˬ jaˇ. Chaw yaˇ uˉ peunˍ ve lehˬ naˬ ve gawˬ ve, tuꞈ ve hkanˍ ve, leh maˇ hteˇ maˇ cawˇ ve ceh tiˉ gʼa hpuˇ ve tehꞈ gʼa mawˬ ve yoˬ.

1982 hkʼawꞈ htaˇ, ngaˬ Yaˬhoˉvaˬ htaꞈ awˬ to chiˇ aꞈ piˇ ve yoˬ. Peuˬ hkʼawꞈ nawˉ, hpawnˬ daꞈ lonˉ hkʼaw ve awˬ lawn lonˉ ma lehˬ “Mvuhˇ miˬ uˉ peunˍ ve awˬ tehˬ ve” Sai˗hpaw venˇ lo hpawnˬ daꞈ leh Baˆtiˆsaˬ haꞈ yuˬ ve yoˬ. Teˇ shinˉ peuˬ hkʼawꞈ nawˉ, mvuhˇ miˬ ve awˬ liˇ awˬ hkʼaˇ hpawˇ kanˉ te gʼa tuˬ ngaˬ Sai˗hpaw venˇ lo liꞈ na tuˬ kʼai ve yoˬ. 10 Ha pa tanˬ htaˇ, ngaˬ mvuhˇ miˬ ve awˬ liˇ awˬ hkʼaˇ hpawˇ kanˉ te gʼa tuˬ liꞈ na ve gʼa ve tehꞈ shiˍ ve yoˬ.

Hpawnˬ daꞈ lonˉ hkʼaw ve awˬ lawn lonˉ ma lehˬ “Mvuhˇ miˬ uˉ peunˍ ve awˬ tehˬ ve” Beˍteˍlaˆ hkʼaw kanˉ te chehˇ ve Maiˉhkuiꞈ Riˆcha˗sha htaꞈ shiˍ daꞈ leh yawˇ ngaˬ htaꞈ kʼoˆ laˇ ve, “mvuhˇ miˬ ve awˬ liˇ awˬ hkʼaˇ hpawˇ kanˉ te kuiˬ yehˬ awˬ suhˉ cawˬ ve” tehꞈ yawˇ ngaˬ htaꞈ kʼoˆ maˍ laˇ ve yoˬ. Ehˇtaˍyoˇpiˆ chaw a maꞈ lonˉ teˇ gʼaˇ Tcuh yaˇ liꞈ 8:36 hkʼaw kʼoˆ taˍ ve htaꞈ ngaˬ tawnˇ gʼa ve yoˬ. Ngaˬ a shu yawˇ awˬ to htaꞈ na nyi ve, ‘mvuhˇ miˬ ve awˬ liˇ awˬ hkʼaˇ hpawˇ kanˉ te kuiˬ yehˬ hkʼaw ngaˬ kanˉ maˇ gʼa te tuˬ tawˍ laˇ tuˬ aˬ htoꞈ ma cawˬ le?’ Chi htaꞈ pa taw ngaˬ Beˍteˍlaˆ hkʼaw kanˉ te tuˬ liꞈ bvuhꞈ feu piˇ ve yoˬ.

Ngaˬ Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, ngaˬ pa ngaˬ e maˇ dawˇ cawˇ. Ngaˬ pa ngaˬ htaꞈ na laˇ ve, mvuhˇ miˬ ve awˬ liˇ awˬ hkʼaˇ hpawˇ kanˉ te paˍ hpehꞈ ve htawˇ, Beˍteˍlaˆ hkʼaw kanˉ te ve aˬ htoꞈ ma awˬ bon cawˬ le? Ngaˬ kʼawꞈ kʼoˆ piˇ ve, ngaˬ ha lehˬ ha kʼa ve hkʼaw kanˉ te ve yoˬ. Ngaˬ yawˇ htaꞈ kʼawꞈ kʼoˆ piˇ ve, Beˍteˍlaˆ hkʼaw awˬ nu ve chaw gʼaˇ hpfuhˇ gʼa ve hkʼa shuˍ ngaˬ kaꞈ gʼa ve yoˬ.

Ngaˬ shaˉ nanˉ lo kanˉ te tuˬ kʼoˆ piˇ˗oˬ ve pa taw, Beˍteˍlaˆ hkʼaw kanˉ te˗e maˇ gʼa. Chi htaꞈ pa taw, 1984 hkʼawꞈ htaˇ, NeuˇYawˆ venˇ Buˆlinˍ Beˍteˍlaˆ hkʼaw ngaˬ Gʼuiˬ sha ve kanˉ tanˬ te ve yoˬ. Shaˉ nanˉ hkʼaw ngaˬ kanˉ te htaˇ, gʼa shiˍ ve awˬ lawn leh awˬ gʼuˇ suhˍ hpawˇ ngaˬ htaꞈ gu taˍ laˇ ve hkʼe hpehꞈ ve yoˬ.

Jui˗she siˆ˗tin venˇ lo Awˬ han te kuiˬ Saꞈtehnˬliˇ 1983 hkʼawꞈ Ha pa 11 maˬ htaˇ vuiˬ taˍ ve yoˬ. Yehˬ lonˉ chi hkʼaw iˉ kaˆ leh aˬ miˍ gu tuˬ awˬ viˉ awˬ nyi a hkaw˗anˬ lawˬ ve yoˬ. Mvuhˇ miˬ hpawˇ kanˉ te paˍ htaꞈ ca mawˬ˗e htaˇ, Awˬ han te kuiˬ Saꞈtehnˬliˇ yehˬ lonˉ chi htaꞈ Yaˬhoˉvaˬ ve Shaˉhkiˆhkanˍ ve chaw hpawnˬ daꞈ kuiˬ yehˬ lonˉ te gaˇ ve tehꞈ awˬ viˉ awˬ nyi kʼoˆ piˇ ve yoˬ. Chi shoꞈ shaꞈ ve gʼa hpuˇ ve yoˬ. Jui˗she siˆ˗tin venˇ awˬ liˇ awˬ hkʼaˇ lehˬ yehˬ lonˉ htaꞈ hkʼaˬ hkʼe te yehˇ gʼa ve awˬ hkʼaˇ kʼoˆ piˇ ve, bon hpawˇ ve yehˬ lehˬ mvuhˇ miˬ yaˇ chehˇ kuiˬ awˬ paˇ lo ceh cawˬ cawˇ ve yoˬ. Awˬ han te kuiˬ Saꞈtehnˬliˇ Jui˗she siˆ˗tin venˇ tanˇ kaˬ  te kuiˬ lo cawˬ ve pa taw, mvuhˇ miˬ hpawˇ kanˉ te paˍ a hkaw˗anˬ maˇ piˇ. Suhˉ jehˬ cheˆ ve htaꞈ teˇ pawˆ kʼawꞈ jehˬ laˇ tuˬ lawˬ piˇ ve htawˇ, a hkaw˗anˬ maˇ piˇ.

Awˉ lawˉ teˇ shinˉ ngaˬ Beˍteˍlaˆ hkʼaw kanˉ te htaˇ, awˬ lawn chi htaꞈ caˉ daꞈ ve shaˉ nanˉ hkʼaw jehˬ daꞈ ve yoˬ. Minˍneˍsawˉtaˍ lo Sai˗hpaw venˇ lo ngaˬ shaˉ nanˉ hkʼaw kanˉ nyiˇ hkʼawꞈ te˗o ve pa taw, kanˉ chi hkʼe ve hpawˇ ngaˬ hkʼa dehꞈ shiˍ ve yoˬ. Ngaˬ hui ve mvuhˇ miˬ ve awˬ liˇ awˬ hkʼaˇ hpawˇ kanˉ te paˍ teˇ gʼaˇ kʼoˆ ve, Awˬ han te kuiˬ Saꞈtehnˬliˇ chi ve chaw guiˇ kuiˬ, awˬ han nyi kuiˬ, liꞈ hkawˇ kʼa kuiˬ te jaw ve yoˬ. Chi htaꞈ pa taw, oˇ kaˬ lo bon hpawˇ awˬ liˇ te yaꞈ ve laˇ? Suhˉ jehˬ paˍ chi ve awˬ lawn suhˉ jehˬ leh Jui˗she siˆ˗tin venˇ ngaˬ hui ve bon hpawˇ a hkaw˗anˬ gʼa cawˇ ve kaꞈ maˇ peꞈ laˇ. Chi htaꞈ pa taw, suhˉ jehˬ paˍ ngaˬ hui loˍ ve htaꞈ te tuˬ a hkaw˗anˬ peꞈ laˇ leh Yaˬhoˉvaˬ yawˇ ve kanˉ hkʼaˇ uiˍ la mvuh la tuˬ awˬ bon naꞈ piˇ chehˇ ve htaꞈ gʼa mawˬ ve yoˬ. Kanˉ chi ve hkʼaw ngaˬ kaꞈ teˇ gʼaˇ gʼa ga ve ha lehˬ jaˇ.

Awˬ viˉ awˬ nyi hpawnˬ daꞈ lonˉ te kuiˬ tanˬ gu leh teˇ hkʼawꞈ maˇ gaˬ sheˍ kaꞈ 1985 hkʼawꞈ Ha pa 9 maˬ 8 nyi htaˇ Giˉlaˆ Liꞈ henˇ yehˬ hkʼaw ve 79 pawˆ hkʼaw ve teˇ pawˆ henˇ peuˬ ve awˬ nyi hpehꞈ ve yoˬ. Gʼuiˬ sha ve mvuhˇ miˬ uiˍ la mvuh la ve mvuhˇ miˬ hpawˇ caˉ daꞈ paˍ hkʼaw ngaˬ gʼa ga ve ha lehˬ jaˇ. Mvuhˇ miˬ ve awˬ liˇ awˬ hkʼaˇ hpawˇ kanˉ te ve aꞈ kehˉ yawˇ kanˉ chi ve hpawˇ gʼa te ve ha lehˬ jaˇ. Mvuhˇ miˬ ve awˬ liˇ awˬ hkʼaˇ hpawˇ kanˉ te ve laiˉ hpawˇ lo Yaˬhoˉvaˬ ngaˬ htaꞈ yehˇ tuˬ sheˍ ve naˍ maˇ shiˍ.

1980 hkʼawꞈ htaˇ, saˍ laꞈ gʼonˍ leh ga piˇ ve chaw Yaˬhoˉvaˬ ve Shaˉhkiˆhkanˍ ve chaw awˬ suhˍ maˇ keu ve awˬ hkʼaˇ haꞈ shaˉ tuˬ htaꞈ yawˇ hui laiˉ pawˆ maˇ yawˆ yan piˇ. Suhˉ jehˬ paˍ laiˉ gʼaˇ kʼoˆ ve, yaˇ hu ma lehˬ awˬ suhˍ maˇ keu kʼoˆ tuˬ a hkaw˗anˬ maˇ cawˬ. Yawˇ hui kʼoˆ ve, awˬ e awˬ suhˍ maˇ keu ve kʼo awˬ e suh leh yaˇ awˬ e maˇ cawˬ tuˬ yoˬ.

1988 hkʼawꞈ Ha pa 12 maˬ 29 nyi htaˇ, awˬ viˉ awˬ nyi yaˇ miˇ Dehˬniˆ Niˆhko˗lon yawˇ yaˇ paˍ paw htaˇ suhˍ tawˆ maˇ jaˇ. Yawˇ ve a shaꞈ kawˆ tuˬ cawˬ ve pa taw, saˍ laꞈ gʼonˍ suhˍ keu kʼoˆ piˇ ve yoˬ. Yaꞈ hkʼaˇ, awˬ viˉ awˬ nyi Niˆhko˗lon maˇ keu kʼoˆ piˇ ve yoˬ. Mvuhˇ shawˉ naꞈ htaˇ, naˆ tsuhˇ yehˬ lo ve chaw lehˬ, awˬ viˉ awˬ nyi oˇ ve teˇ gʼaˇ htaꞈ suhˍ keu piˇ tuˬ suhˉ jehˬ shehˍ hpaˇ teˇ gʼaˇ geh a hkaw˗anˬ lawˬ ve yoˬ. Suhˉ jehˬ paˍ oˇ ve teˇ gʼaˇ awˬ viˉ awˬ nyi Niˆhko˗lon leh yawˇ ve awˬ hpawˇ yawˇ hui ve dawˇ hkʼaˇ kʼoˆ maˍ piˇ tuˬ awˬ yanˇ maˇ cawˬ leh awˬ suhˍ keu tuˬ a hkaw˗anˬ piˇ ve yoˬ.

Ha pa 12 maˬ 30 nyi shinˉ peuˬ 5 nyi htaˇ, awˬ viˉ awˬ nyi Niˆhko˗lon yawˇ ve awˬ hpawˇ leh yehˬ kʼa hkʼaw ve chaw maˇ dawˇ cawˇ htawˇ, naˆ tsuhˇ yehˬ lo ve chaw yawˇ htaꞈ suhˍ keu piˇ ve yoˬ. Oˇ ve teˇ nyi mvuhˇ hpeuꞈ la htaˇ, awˬ viˉ awˬ nyi Niˆhko˗lon htaꞈ suhˍ taˇ keu kʼoˆ piˇ ve pa taw, yehˬ kʼa ve chaw leh nyi haꞈ shaˉ paˍ 2 gʼaˇ htaꞈ ca hpeh la ve yoˬ. Shawˉ teˇ nyi gaˬ leh liꞈ sha tanˇ, TV, leh awˬ hkawˇ tawˆ kuiˬ NeuˇYawˆ venˇ leh awˬ paˇ awˬ kui lo cawˬ ve venˇ hpehꞈ la ve awˬ ceuˬ hto piˇ ve yoˬ.

 Shinˉ peuˬ teˇ nyi mvuhˇ shawˉ naꞈ htaˇ, shaˉ nanˉ lonˉ hkʼaw suhˉ jehˬ paˍ aˉ yaˇ cawˬ ve teˇ gʼaˇ Min˗htawnˇ Maw˗leˍ htaꞈ ngaˬ gʼa yaw daꞈ ve yoˬ. Hpehꞈ la ve awˬ ceuˬ htaꞈ ngaˬ kʼoˆ maˍ piˇ leh awˬ nu ve suhˉ jehˬ paˍ chaw naˬ htaꞈ maˇ na leh suhˍ keu tcuh ve awˬ lawn ngaˬ yawˇ htaꞈ kʼoˆ maˍ piˇ ve yoˬ. Suhˉ jehˬ paˍ Maw˗leˍ hpehꞈ la ve awˬ lawn htaꞈ kʼawꞈ chaˬ nyi ve pa taw oˇ ve teˇ nyi sha gʼuˇ hkʼawꞈ nawˉ yawˇ ve kanˉ te kuiˬ lo laˬ˗oꞈ kʼoˆ laˇ ve yoˬ. Ngaˬ ve nyi haꞈ shaˉ paˍ Hpiˇliˇpuˆ Ba˗leꞈ ngaˬ geh teˇ geh kʼai ve yoˬ. Naˆ tsuhˇ yehˬ ve mvuhˇ miˬ ve awˬ liˇ awˬ hkʼaˇ hpawˇ kanˉ te paˍ kaꞈ laˬ tuˬ kuˬ piˇ ve yoˬ. Tawˇ gʼawˬ daꞈ ve yoˬ. Oˇ kaˬ lo tawˇ yaw daꞈ ve awˬ lawn awˬ viˉ awˬ nyi Ba˗leꞈ yawˇ ve liꞈ kʼoˆ hkʼaw “nyi ma gawˬ lehˍ” te kʼoˆ ve bvuhꞈ keu ve yoˬ. Oˇ ve teˇ yanˇ ngaˬ nyi ma haw leh naˆ tsuhˇ yehˬ kanˉ te paˍ kʼoˆ ve maˇ cawˇ ve tehꞈ hkʼa tawˍ lehˆ hpeuꞈ maw piˇ ve yoˬ.

Teˇ naˍ liˍ peuˬ hkʼawꞈ nawˉ suhˉ jehˬ paˍ Maw˗leˍ kʼoˆ ve, gʼuˇ suhˍ teˇ nyi mvuhˇ shawˉ htaˇ awˬ lawn oˇ ve htaꞈ caˉ daꞈ ve awˉ lawˉ gʼa jehˬ daꞈ sheˍ ve yoˬ. Yawˇ ve kanˉ te kuiˬ hkʼaw ngaˬ hui tawˆ la htaˇ, suhˉ jehˬ paˍ Maw˗leˍ kʼoˆ laˇ ve, “shawˉ pawˍ ve kanˉ hkuiꞈ jaˇ.” Yawˇ kʼoˆ gaˇ ve tcuhˉ kuiˬ lehˬ naˆ tsuhˇ yehˬ lo kanˉ te paˍ awˬ viˉ awˬ nyi Niˆhko˗lon htaꞈ suhˍ keu tuˬ ve nyiˉ piˇ ve a hkaw˗anˬ cawˬ ve tehꞈ hpeuꞈ maw laˇ tuˬ maˇ sha. Oˇ ve teˇ pawˆ suhˉ jehˬ ve ngaˬ hui gʼaˇ tuˬ tehꞈ Yaˬhoˉvaˬ ngaˬ htaꞈ kʼoˆ laˇ ve hkʼe hpehꞈ ve tehꞈ dawˇ ve yoˬ. Yaˬhoˉvaˬ yawˇ ve a loˍ biˇ la tuˬ ngaˬ hui htaꞈ hkʼaˬ hkʼe yehˇ ve htaꞈ mawˬ htaˇ, ngaˬ anˇ jaˇ.

Shawˉ pawˍ mvuhˇ shawˉ hkʼaˬ hkʼe gʼa kʼoˆ tuˬ ve oˇ ve teˇ haˉ ngaˬ hui gu ve yoˬ. Shaˉ nanˉ lehˬ Buˆlinˍ Beˍteˍlaˆ paˇ lo cawˬ ve pa taw, awˬ viˉ awˬ nyi maˇ˗awˍ ve shaˉ nanˉ lo juˇ laˬ ve yoˬ. Suhˉ jehˬ paˍ 4 gʼaˇ ngaˬ hui kʼoˆ piˇ ve htaꞈ na leh suhˍ keu tuˬ nyiˉ piˇ ve a hkaw˗anˬ maˇ cawˬ tehꞈ jehˬ cheˆ piˇ ve yoˬ. Shaˉ nanˉ lonˉ hkʼaw suhˉ jehˬ cheˆ piˇ ve awˬ viˉ awˬ nyi Niˆhko˗lon gʼaˇ leh chaw naˬ htaꞈ maˇ leuˆ yuˬ tcuh ve leh chaw yaˇ ve awˬ liˇ htaꞈ yaꞈ ve tehꞈ dawˇ cheˆ piˇ ve yoˬ.

Peuˬ hkʼawꞈ nawˉ maˇ maw Neuˇyawˆ venˇ lo shaˉ nanˉ lonˉ kaꞈ awˬ viˉ awˬ nyi Niˆhko˗lon suhˍ maˇ keu leh haꞈ shaˉ tuˬ htaꞈ jehˬ cheˆ piˇ ve yoˬ. Chi lehˬ awˬ suhˍ awˬ lawn dawˇ cheˆ ve awˉ lawˉ teˇ pawˆ hpehꞈ leh sha haꞈ laˉ mvuhˇ miˬ hkʼaw teˇ kaˬ le le lo dawˇ cheˆ ve 4 ceuˬ ngaˬ gʼa kaˇ ve lehˬ daꞈ jaˇ. (Awˇ ceˍ awˇ fa “ Shaˉ nanˉ lonˉ hkʼaw suhˉ jehˬ gʼaˇ ve” htaꞈ nyi sheˍ.) Chi hkʼoˆ kaꞈ Beˍteˍlaˆ hkʼaw mvuhˇ miˬ hpawˇ kanˉ te paˍ laiˉ gʼaˇ htaꞈ ngaˬ gʼa ga piˇ leh yaˇ ehˉ hpawˇ nyi haꞈ shaˉ tuˬ, baˬ daꞈ ve, leh yehˬ lonˉ hpawˇ awˬ liˇ awˬ hkʼaˇ daꞈ ve htaꞈ caˉ daꞈ ve htaꞈ ngaˬ gʼa ga piˇ ve yoˬ.

Ngaˬ miˇ maˬ Dawn htaꞈ awˉ lawˉ teˇ pawˆ mawˬ daꞈ htaˇ, yawˇ awˬ hpawˇ baˬ aˉ piˇ leh yaˇ 3 gʼaˇ cawˬ ve yoˬ. Chi htaꞈ pa taw, yawˇ kanˉ kaꞈ te leh gʼuˇ suhˍ peuˍ ve kaꞈ te ve yoˬ. Yawˇ ve a shaꞈ teꞈ hkʼaˇ haˍ jaˇ ve htawˇ, Gʼuiˬ sha ve kanˉ coˇ caˇ leh te ve ngaˬ dawˇ cawˇ jaˇ. 1992 hkʼawꞈ htaˇ, Neuˇyawˆ venˇ hpawnˬ daꞈ lonˉ hkʼaw ve awˬ lawn lonˉ ma lehˬ “Awˬ gʼeuˆ htaꞈ gʼawˆ shehˍ hpaˇ” ngaˬ hui kʼai ve yoˬ. Oˇ kaˬ lo mawˬ daꞈ leh ngaˬ yawˇ htaꞈ hkʼa dehꞈ shiˍ daꞈ tuˬ lawˬ piˇ ve yoˬ. Teˇ hkʼawꞈ peuˬ hkʼawꞈ nawˉ, ngaˬ hui heuˆ daꞈ ve yoˬ. Ngaˬ miˇ maˬ Yaˬhoˉvaˬ htaꞈ awˉ lawˉ teh leh hkʼaˬ htaˆ kaꞈ ha lehˬ puiˉ jaˇ leh chi lehˬ Yaˬhoˉvaˬ peꞈ laˇ ve la shawnˍ hpehꞈ ve yoˬ. Dawn lehˬ ngaˬ htaꞈ daꞈ ve tiˉ te laˇ ve yoˬ.—Tawˇ naˉ ve 31:12.

Ngaˬ huiˉ maˬ heuˆ daꞈ htaˇ yaˇ ve a shaꞈ lehˬ 11, 13 leh 16 hkʼawꞈ yoˬ. Ngaˬ yawˇ hui ve daꞈ ve awˬ pa hpehꞈ gaˇ ve yoˬ. Chi htaꞈ pa taw, awˬ pa awˬ e caˉ ve awˬ lawn ngaˬ hui ve liꞈ kʼoˆ hkʼaw hkʼa dehꞈ gʼaw leh yuˬ yehˇ ve yoˬ. Peuˬ laˬ ve laiˉ hkʼawꞈ htaˇ, shoꞈ shaꞈ ve awˬ lawn cawˬ ve htawˇ, yaˇ ngaˬ htaꞈ yonˍ gʼa ve awˬ chawˇ leh daꞈ ve awˬ pa shawˍ laˇ ve ha lehˬ jaˇ. Yaˇ ve awˬ chawˇ ngaˬ hui ve aˉ hkʼaw lo laˬ htaˇ, teˇ pawˆ le le ha lehˬ ha kʼa haꞈ yuˬ piˇ ve yoˬ.

2013 hkʼawꞈ htaˇ, Dawn leh ngaˬ awˬ pa awˬ e htaꞈ nyi haꞈ shaˉ tuˬ Viˆsu˗hkaw˗sui lo ca chehˇ˗e ve yoˬ. Beˍteˍlaˆ hkʼaw ngaˬ kanˉ te chehˇ sheˍ ve anˇ jaˇ. Gʼuiˬ sha ve kanˉ hkʼaˇ hkʼaw mvuhˇ miˬ ve awˬ liˇ awˬ hkʼaˇ laiˉ ceuˬ hpawˇ caˉ leh ga tuˬ ngaˬ htaꞈ kuˬ laˇ ve yoˬ.

2018 hkʼawꞈ Ha pa 9 maˬ htaˇ, tawˇ maˇ yaw sheˍ htaˇ ngaˬ tcuhˍ ve yoˬ. Ngaˬ hui chehˇ kuiˬ lo ve saˍ laꞈ gʼonˍ ngaˬ ve a naˍ htaꞈ tehˆ maˇ gʼa. Peuˬ leh 2019 hkʼawꞈ Ha pa 2 maˬ awˬ nu ve saˍ laꞈ gʼonˍ ngaˬ htaꞈ kʼoˆ laˇ ve, ngaˬ naˬ chehˇ ve a naˍ shu tcuhˇ tcuhˬ maˇ hpehꞈ leh ngaˬ awˬ to htaꞈ awˬ meu˗eˇ meu˗eˇ heuˆ la kuiˬ cawˬ ve yoˬ.

3 nyi peuˬ hkʼawꞈ nawˉ, ngaˬ dawˇ cawˇ jaˇ ve awˬ ceuˬ leˍ guiˇ chehˇ htaˇ, ce leh laꞈ sha paˇ laꞈ shehˍ hteh ve yoˬ. Ngaˬ hkʼaˬ htaˆ kaꞈ leˍ guiˇ ve pa taw cheuˬ jaˇ. Oˇ ve teˇ yanˇ, ngaˬ naˇ naˇ te maˇ gʼa˗o tehꞈ ngaˬ dawˇ ve yoˬ. Ngaˬ naˬ chehˇ ve gʼaˇ hteꞈ kʼawꞈ naˬ ve pa taw anˇ jaˇ. Tawˇ yaw ve, naˇ naˇ te ve, caˇ ve kaꞈ haˍ jaˇ tuˬ te laˇ ve yoˬ.

Ngaˬ mvuhˇ miˬ ve awˬ liˇ awˬ hkʼaˇ hpawˇ kanˉ te leh Yaˬhoˉvaˬ ve kanˉ htaꞈ gʼa ga piˇ ve ha lehˬ jaˇ. Mvuhˇ miˬ ve awˬ liˇ awˬ hkʼaˇ hpawˇ kanˉ te paˍ, suhˉ jehˬ paˍ, leh saˍ laꞈ gʼonˍ htaꞈ liꞈ laiˉ kʼoˆ gʼa bvuhꞈ piˇ ve ha lehˬ jaˇ. Chi htaꞈ pa taw, miˬ guiˬ chi hkʼoˆ lo Yaˬhoˉvaˬ ve chaw awˬ suhˍ maˇ keu ve a hkaw˗anˬ leh awˬ nu ve awˬ hkʼaˇ haꞈ shaˉ tuˬ ngaˬ laiˉ pawˆ gʼa maˍ ve ha lehˬ jaˇ. Chi hkʼoˆ kaꞈ, Luˉkaꞈ kʼoˆ ve hkʼa shuˍ, Luˉkaꞈ liꞈ 17:10 hkʼaw kʼoˆ ve hkʼe leˇ ngaˬ kaꞈ kʼoˆ ve, ‘ngaˬ gʼa te cawˇ ve kanˉ htaꞈ ceh ngaˬ te peuˬ ve yoˬ.’