Yaˬhoˉvaˬ chaw nyiˇ gʼaˇ htaꞈ heuˆ daꞈ tcuh leh ha lehˬ tcuh gaˇ leh teˇ suhˍ teˇ shaˍ tiˉ hpehꞈ tcuh gaˇ ve yoˬ. (Maꞈhtehˍ 19:4-6) Nawˬ heuˆ daꞈ gaˇ ve kʼo, daꞈ ve awˬ ca hkʼaˬ hkʼe te ca gʼa tuˬ le? Yaˬhoˉvaˬ ngaˬ hui htaꞈ hpanˍ shehˍ hpaˇ hpehꞈ ve pa taw, chaw haˉ yaˇ miˇ haˉ te daꞈ htaˇ leh heuˆ daꞈ˗oˬ htaˇ, ngaˬ hui hkʼaˬ hkʼe te ha lehˬ gʼa tuˬ Yaˬhoˉvaˬ shiˍ ve yoˬ. Nawˬ Gʼuiˬ sha ve awˬ liˇ awˬ hkʼaˇ htaꞈ yuˬ yehˇ ve kʼo, nawˬ daꞈ jaˇ ve awˬ ceuˬ gʼa leh ha lehˬ tuˬ yoˬ. Awˬ liˇ awˬ hkʼaˇ teˇ lawn lawn htaꞈ teˇ geh nyi sheˍ.

Awˉ lawˉ teˇ ceuˬ lehˬ, “chaw yaˇ ve nyi ma lehˬ, awˬ kaˍ awˬ nu awˬ ceuˬ teˇ hpaˍ aꞈ kehˉ heˍ puiˉ jaˇ ve” tehꞈ, a shu yawˇ awˬ to htaꞈ caˉ daꞈ ve gʼa haꞈ yuˬ cawˇ ve yoˬ. (Yeˍraˍmiˆ 17:9) Chaw teˇ gʼaˇ heuˆ daꞈ gaˇ leh yawˇ dawˇ cawˇ ve chaw htaꞈ mawˬ htaˇ, oˇ ve teˇ gʼaˇ htaꞈ haꞈ jaˇ leh hkʼa dehꞈ maˇ dawˇ nyi ve yoˬ. Yawˇ ve dawˇ hkʼaˇ htaꞈ cuˇ leh dawˇ cheˆ ve pa taw, heuˆ la kuiˬ cawˬ ve yoˬ. (Tawˇ naˉ ve 28:26) Chaw nyiˇ gʼaˇ tanˬ mawˬ daꞈ htaˇ kaꞈ haꞈ˗aˬ kʼoˆ daꞈ ve lehˬ, cuˇ yiˍ maˇ cawˬ ve maˇ heˆ leh teˇ gʼaˇ leh teˇ gʼaˇ hkʼa dehꞈ maˇ shiˍ daꞈ htaˇ kaꞈ ka tiꞈ te daꞈ ve lehˬ cuˇ yiˍ maˇ cawˬ.

Tawˇ naˉ ve liꞈ 22:3 hkʼaw kʼoˆ ve, “dawˇ nyi puiˉ ve chaw lehˬ kawˆ tuˬ dawˇ haˍ tuˬ gaˬ la chehˇ ve htaꞈ mawˬ leh, jaw kʼai puiˉ ve yoˬ. Maˇ dawˇ nyi puiˉ ve chaw lehˬ gʼuˇ suhˍ kʼai leh dawˇ haˍ tuˬ htaꞈ gʼa hpuˇ ve yoˬ.” Vehˆsaiˉ hkʼaw awˬ ca ca ve kawˆ tuˬ hkʼaˬ hkʼe cawˬ ve le? Chaw teˇ hpaˍ kʼo, maˇ mawˬ daꞈ jaw ve chaw htaꞈ vehˆsaiˉ hkʼaw shiˍ daꞈ leh maˆ daꞈ ve yoˬ. Leh heˍ laˇ ve tehꞈ hkʼawꞈ nawˉ htaˇ shiˍ la ve yoˬ. Chi hkʼoˆ kaꞈ, chaw teˇ hpaˍ shu geh hpu heˍ yuˬ tuˬ awˬ lawn maˇ heˆ heˆ ve keu ve yoˬ. Teˇ pawˆ pawˆ chaw chi teˇ hpaˍ Shaˉhkiˆhkanˍ ve chaw hpehꞈ ve tehꞈ kʼoˆ leh heˍ ve yoˬ.

Awˬ nu ve kawˆ tuˬ kaꞈ cawˬ sheˍ. Vehˆsaiˉ teˇ hpaˍ hpaˍ hkʼaw kʼo, keunˍ daꞈ ve awˬ ca yuˬ ku piˇ ve yoˬ. Awˬ hkʼaˇ chi ve daꞈ jaˇ ve awˬ ca gʼa tuˬ tehꞈ maˇ gʼa htawˆ hkanˍ laˇ? A yeˇ uiˍ jaˇ ve heuˆ daꞈ ve awˬ lawn htaꞈ dawˇ cheˆ tuˬ hkaw hpi˗u teuˇ hkʼaw chaw yaˇ te keu taˍ ve vehˆsaiˉ htaꞈ yonˍ ve nawˬ dawˇ kʼo, cuˇ yiˍ cawˬ˗aw laˇ? Liꞈ hpu hkʼaw ve awˬ liˇ awˬ hkʼaˇ aꞈ kehˉ hkaw hpi˗u teuˇ hkʼaw ve vehˆ saiˉ htaꞈ yonˍ gʼa˗aw laˇ?—Tawˇ naˉ ve 1:7; 3:5-7.

Tawˇ naˉ ve liꞈ 14:15 hkʼaw awˬ liˇ awˬ hkʼaˇ teˇ maˬ cawˬ ve yoˬ. Oˇ kaˬ lo kʼoˆ ve, “chaw luˬ paˍ lehˬ hkʼa peu˗eˬ ve htaꞈ yonˍ puiˉ ve yoˬ. Shaˍ tiꞈ cawˬ ve chaw lehˬ a shu yawˇ ve hkui piˍ htaꞈ nyi taˍ puiˉ ve yoˬ.” Chaw teˇ gʼaˇ htaꞈ heuˆ daꞈ tuˬ maˇ dawˇ cheˆ sheˍ htaˇ, nawˬ oˇ ve teˇ gʼaˇ htaꞈ hkʼa dehꞈ shiˍ daꞈ gaˇ ve yoˬ. Yaꞈ hkʼaˇ, nawˬ awn˗laiˉ hkʼaw  ceh tiˉ oˇ ve teˇ gʼaˇ geh yaw daꞈ ve kʼo, hkʼa dehꞈ shiˍ daꞈ tuˬ haˍ jaˇ. Nawˬ vehˆsaiˉ hkʼaw yawˇ ve awˬ lawn mawˬ ve maˇ heˆ leh, liꞈ teˇ hkui teˇ hkui bvuhꞈ feu daꞈ ve htawˇ nawˬ yawˇ htaꞈ awˬ tehˬ shiˍ daꞈ ve tehꞈ yonˍ gʼa˗aw laˇ? Awˉ lawˉ htaˇ awˬ tehˬ haꞈ tuˬ ve tehꞈ dawˇ ve htawˇ, oˇ ve teˇ gʼaˇ htaꞈ awˬ tehˬ mawˬ daꞈ htaˇ cheˆ˗ehꞈ kʼai ve yoˬ.

Chiˇ mvuh ve liꞈ bvuhꞈ paˍ kʼoˆ ve, “teꞈ chiˉ awˬ bon maˇ cawˬ ve chaw leh, heˍ puiˉ ve chaw htaꞈ ngaˬ awˬ chawˇ te tuˬ ve maˇ heˆ.” (Chiˇ mvuh ve 26:4) Yawˇ hui ve awˬ to hkʼaˬ hkʼe hpehꞈ ve shu maˇ shiˍ tuˬ ehˆ hkʼaw yawˇ ve awˬ han awˬ tehˬ maˇ heˆ heˆ ve keu ve lehˬ, a hkʼe leˇ hpehꞈ ve tehꞈ laiˉ gʼaˇ dawˇ ve yoˬ. Chi lehˬ nyi sha tuˬ ceh te ve yoˬ. Chaw teˇ hpaˍ kʼo, Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ kʼoˆ ve yoˬ. Awˬ tehˬ kʼo, yawˇ Baˆtiˆsaˬ haꞈ yuˬ˗oˬ ve laˇ? Yawˇ Hkriꞈ yaˇ yonˍ hkʼaˇ yonˍ yeˬ ve chaw hpehꞈ˗aw laˇ? Yawˇ Yaˬhoˉvaˬ geh meuˆ daꞈ˗aw laˇ? Yawˇ Hkriꞈ yaˇ awˬ moˍ hkʼaw daꞈ ve henˇ yuˬ tuˬ hpehꞈ˗aw laˇ? Yawˇ “haiˬ ve chaw” hpehꞈ leh awˬ chawˇ maˇ te cawˇ ve laˇ? (1 Kawˇrenˍhtuˆ 15:33; 2 Tiˆmoˉseˍ 2:20, 21) Yawˇ Liꞈ hpu hkʼaw awˬ liˇ awˬ hkʼaˇ cawˇ ve hkʼe heuˆ daꞈ˗aw laˇ? Awˬ lawn chi teˇ hpaˍ nawˬ gʼa shiˍ cawˇ ve yoˬ. Yaꞈ hkʼaˇ, yawˇ htaꞈ shiˍ daꞈ ve awˬ viˉ awˬ nyi geh nawˬ tawˇ hkʼa dehꞈ maˇ gʼa yaw daꞈ sheˍ ve kʼo, yawˇ hkʼaˬ hkʼe ve chaw hpehꞈ ve nawˬ maˇ shiˍ gʼa taˬ. (Tawˇ naˉ ve 15:22) Leh a yeˇ uiˍ jaˇ ve Yaˬhoˉvaˬ ve kanˉ te ve chaw lehˬ, maˇ yonˍ ve chaw htaꞈ “caˉ daꞈ” tuˬ maˇ dawˇ leh heuˆ tuˬ kaꞈ maˇ dawˇ.—2 Kawˇrenˍhtuˆ 6:14; 1 Kawˇrenˍhtuˆ 7:39.

Ngaˬ hui gʼa henˇ peuˬ˗oˬ ve vehˆsaiˉ hkʼaw awˬ ku ca ve lehˬ, kawˆ tuˬ laiˉ ceuˬ cawˬ ve tehꞈ gʼa mawˬ ve yoˬ. Yaꞈ hkʼaˇ, chi aꞈ kehˉ daꞈ ve lehˬ, daꞈ ve awˬ ca htaꞈ mawˬ tuˬ ga laˇ leh awˬ ca geh ha lehˬ gʼa ve yoˬ. Hkʼe kʼo, nawˬ daꞈ ve awˬ ca htaꞈ hkʼaˬ hkʼe te ca gʼa tuˬ le? Awˬ tehˬ kʼo, Yaˬhoˉvaˬ ve Shaˉhkiˆhkanˍ ve chaw lehˬ mawˬ daꞈ leh, Hkriꞈ yaˇ awˬ moˍ hpawnˬ daꞈ kuiˬ, hpawnˬ daꞈ lonˉ, maˇ heˆ leh awˬ nu ve awˬ yanˇ htaˇ shiˍ daꞈ tuˬ te gʼa ve yoˬ.

Tawˇ pa haˉ te kʼo, a naˍ 19 cawˬ ve pa taw, nawˬ awˬ nu ve awˬ viˉ awˬ nyi htaꞈ mawˬ daꞈ maˇ gʼa ve kʼo, awn˗laiˉ hkʼaw hpawnˬ daꞈ htaˇ awˬ ca maˇ cawˬ sheˍ ve chaw htaꞈ mawˬ daꞈ leh shiˍ daꞈ tuˬ tawˇ yaw daꞈ gʼa ve yoˬ. Hpawnˬ daꞈ ve hkʼaw awˬ vuiˬ te htaˇ nawˬ dawˇ cawˇ ve chaw htaꞈ mawˬ leh laꞈ sheh chiˇ leh hkʼawꞈ htaˇ yawˇ ve yonˍ hkʼaˇ hkʼaˬ hkʼe hpehꞈ ve htaꞈ kaꞈ mawˬ tuˬ yoˬ. (1 Tiˆmoˉseˍ 6:11, 12) Hpawnˬ daꞈ peuˬ hkʼawꞈ nawˉ gu teh taˍ laˇ ve awn˗laiˉ awˬ bawehˇ ehˉ hkʼaw yaw daꞈ gʼa ve yoˬ. Chi hkʼoˆ kaꞈ, awn˗laiˉ hkʼaw awˍ caˇ leh tawˇ yaw daꞈ tuˬ awˬ viˉ awˬ nyi gu teh taˍ laˇ ve yoˬ. Oˇ ve teˇ yanˇ nawˬ dawˇ cawˇ ve chaw awˬ nu ve chaw htaꞈ tawˇ hkʼaˬ hkʼe yaw piˇ ve nawˬ mawˬ tuˬ yoˬ. Leh awˬ tehˬ kʼo, yawˇ hkʼaˬ hkʼe ve chaw hpehꞈ ve htaꞈ kaꞈ nawˬ shiˍ tuˬ yoˬ. (1 Peˍtruˆ 3:4) Ponˬ kʼai ve awˬ yanˇ nawˬ oˇ ve teˇ gʼaˇ htaꞈ hkʼa dehꞈ shiˍ daꞈ tuˬ yoˬ. Dawˇ teh taˍ ve shuˍ daꞈ˗aw laˇ, leh dawˇ hkʼaˇ shuˍ daꞈ˗aw laˇ? tehꞈ nawˬ mawˬ tuˬ yoˬ.

Awˬ ca maˇ cawˬ ve chaw Liꞈ hpu hkʼaw ve awˬ liˇ awˬ hkʼaˇ htaꞈ cuˇ leh awˬ ca ca ve kʼo, yawˇ awˬ ca geh ha lehˬ jaˇ tuˬ yoˬ. Tawˇ naˉ ve liꞈ hkʼaw kʼoˆ ve hkʼe, “awˬ miˇ ma maˇ heˆ leh [awˬ hpawˇ daꞈ ve] ca gʼa ve chaw lehˬ yawˇ [maˇ heˆ leh nawˬ] Yaˬhoˉvaˬ geh gʼa ve daꞈ jaˇ ve laꞈ shawnˍ hpehꞈ ve yoˬ.”—Tawˇ naˉ ve 18:22.