1. Yaˬhoˉvaˬ nawˬ awˬ pon aˬ htoꞈ ma te laˇ ve le?

 Nawˬ Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe te hpehꞈ la gʼa ve le? Nawˬ pa nawˬ e geh, kanˉ te kuiˬ lo awˬ chawˇ geh, liꞈ henˇ kuiˬ lo awˬ chawˇ geh, maˇ heˆ leh nawˬ ve yehˬ lo “ha lehˬ ve bon hkawˇ” hto toˇ la ve htaꞈ gʼa kaˇ ve yoˬ hehˉ. (Maˍkuˆ 13:10) Peuˬ hkʼawꞈ nawˉ shu nawˬ geh Liꞈ hpu maˍ laˇ ve yoˬ. Nawˬ htaꞈ ga laˇ tuˬ yawˇ awˬ yanˇ yehˇ leh gʼa coˇ caˇ jaˇ. Nawˬ henˇ htaˇ, Yaˬhoˉvaˬ nawˬ htaꞈ haꞈ jaˇ leh nawˬ kaꞈ yawˇ htaꞈ haꞈ˗oˬ ve tehꞈ shiˍ ve yoˬ. Nawˬ awˬ tehˬ ve htaꞈ shiˍ tuˬ, Yaˬhoˉvaˬ gʼawˬ veu laˇ ve leh chi teˇ hkui nawˬ kaꞈ Yeˍsuˆ ve awˬ laꞈ gʼawˇ hpehꞈ˗oˬ ve yoˬ. Co Co taiˍ taiˍ ve a shaꞈ gʼa tuˬ nawˬ kaꞈ dawˇ law kuiˬ cawˬ ve yoˬ. (Yoˇhanˬ 6:44) Shu nawˬ htaꞈ awˬ tehˬ ve maˍ laˇ ve leh nawˬ Gʼuiˬ sha ve kanˉ te ve chaw hpehꞈ ve nawˬ Yaˬhoˉvaˬ htaꞈ awˬ bon uiˍ jaˇ tuˬ yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Chi teˇ hkui ngaˬ hui awˬ tehˬ ve htaꞈ shiˍ˗oˬ. Shu kaꞈ co co taiˍ taiˍ ve a shaꞈ gʼa tuˬ yaꞈ kʼaw hkʼoˆ kʼai gʼa tuˬ, ngaˬ hui ga piˇ ve daꞈ jaˇ ve awˬ vuiˬ gʼa ve yoˬ. Nawˬ teˇ yehˬ peuˬ teˇ yehˬ hto toˇ˗e gaˇ ve yoˬ hehˉ. Nawˬ shu Liꞈ hpu henˇ la tuˬ jehˬ piˇ leh maˍ piˇ ve kʼo, hkʼaˬ hkʼe dawˇ tuˬ le? Haˍ jaˇ tehꞈ nawˬ dawˇ ve kʼo, awˬ lawn chi ve hkʼaw beˆ maˍ laˇ taˍ ve nawˬ htaꞈ ga laˇ gʼa tuˬ yoˬ. Shu awˬ laꞈ gʼawˇ hpehꞈ la tuˬ ngaˬ hui ga piˇ gaˇ tuˬ, aˬ htoꞈ ma te laˇ ve leh ngaˬ hui geh Liꞈ hpu henˇ ve chaw maˇ cawˬ tuˬ tawˍ laˇ tsuhˇ laˇ ve htaꞈ hkʼaˬ hkʼe te gʼaˇ tuˬ, awˬ lawn chi ve hkʼaw teˇ geh henˇ tuˬ yoˬ. Ngaˬ hui hto toˇ ve ceh tiˉ maˇ heˆ, shu htaꞈ kaꞈ gʼa maˍ piˇ ve awˉ lawˉ henˇ tuˬ yoˬ.

3. Aˬ htoꞈ ma te ngaˬ hui hto toˇ˗e cawˇ ve le?

³ Yeˍsuˆ miˬ guiˬ hkʼoˆ chehˇ htaˇ, yawˇ ve awˬ laꞈ gʼawˇ 2 ceuˬ htaꞈ te tuˬ kʼoˆ piˇ ve yoˬ. Awˉ lawˉ teˇ ceuˬ, Gʼuiˬ sha ve mvuhˇ miˬ daꞈ ve  awˬ lawn sha tanˇ bon maˍ leh hkʼaˬ hkʼe te maˍ tuˬ awˬ hkʼaˇ kaꞈ yawˇ maˍ piˇ ve yoˬ. (Maꞈhtehˍ 10:7; Luˉkaꞈ 8:1) Tawˇ pa haˉ te kʼo, daˬ ve awˬ lawn sha tanˇ htaꞈ shu na ve, maˇ heˆ leh maˇ na ve htawˇ, yawˇ hui hkʼaˬ hkʼe gʼa te tuˬ Yeˍsuˆ kʼoˆ maˍ piˇ ve yoˬ. (Luˉkaꞈ 9:2-5) Yawˇ hui bon maˍ˗e tuˬ ve hkʼaˬ hkʼe taw gʼa kʼai tuˬ ve kaꞈ, Yeˍsuˆ awˬ gʼuˇ suhˍ htaˇ kaꞈ kʼoˆ piˇ taˍ ve yoˬ. Leh “chaw ceuˬ hkʼa peu˗eˬ awˬ pon shaˉ hkiˆ hpehꞈ tuˬ” ha lehˬ ve bon hkawˇ ca maˍ piˇ˗oˆ tehꞈ kʼoˆ piˇ ve yoˬ. (Maꞈhtehˍ 24:14; Tcuh yaˇ 1:8) Chaw yaˇ na ve leh maˇ na ve htawˇ, awˬ laꞈ gʼawˇ teˇ hpaˍ Gʼuiˬ sha ve mvuhˇ miˬ daꞈ ve awˬ lawn sha tanˇ gʼa maˍ cawˇ leh mvuhˇ miˬ chi ve aˬ htoꞈ ma te tuˬ ve kaꞈ gʼa kʼoˆ piˇ ve yoˬ.

4. Maꞈhtehˍ liꞈ 28:18-20 hkʼaw kʼoˆ taˍ ve hkʼe, Gʼuiˬ sha ve mvuhˇ miˬ daꞈ ve awˬ lawn sha tanˇ maˍ ve awˬ hkʼoˆ kaꞈ ngaˬ hui aˬ htoꞈ ma gʼa te cawˇ sheˍ ve le?

⁴ Nyiˇ ceuˬ teˇ ceuˬ, Yeˍsuˆ yawˇ ve awˬ laꞈ gʼawˇ htaꞈ aˬ htoꞈ ma te tuˬ kʼoˆ piˇ ve le? Yeˍsuˆ yawˇ kʼoˆ ve awˬ ceuˬ htaꞈ awˬ nu ve chaw gʼaꞈ te tuˬ yawˇ hui maˍ piˇ˗oˆ tehꞈ kʼoˆ piˇ ve yoˬ. Chaw teˇ hpaˍ kʼoˆ ve, Yeˍsuˆ bon maˍ˗oꞈ tehꞈ kʼoˆ laˇ ve lehˬ awˉ lawˉ peuˇ ve Hkriꞈ yaˇ ve awˬ vuiˬ ceh tiˉ hpehꞈ ve tehꞈ kʼoˆ ve yoˬ. Yaꞈ hkʼaˇ, chi hkʼe hpehꞈ˗aw laˇ? Maˇ hpehꞈ. Yeˍsuˆ kʼoˆ ve, kanˉ chi ve lehˬ “miˬ guiˬ chi awˬ yanˇ leh htaˇ hkʼa gaˬ” gʼa te cawˇ ve tehꞈ kʼoˆ ve yoˬ. Chi ve lehˬ ngaˬ hui ve awˬ co˗e htaˇ hkʼa gaˬ yoˬ. (Maꞈhtehˍ 28:18-20 gʼaw sheˍ.) Awˬ lawn chi ve lehˬ Yeˍsuˆ awˬ laꞈ gʼawˇ 500 gʼaˇ hpaˆ htaꞈ yawˇ awˬ to maw piˇ htaˇ kʼoˆ piˇ ve yoˬ hehˉ. (1 Kawˇrenˍhtuˆ 15:6) Peuˬ hkʼawꞈ nawˉ, Yeˍsuˆ Yoˇhanˬ htaꞈ awˬ heˆ mawˬ tcuh ve hkʼaw yawˇ ve awˬ laꞈ gʼawˇ teˇ gʼaˇ le le Yaˬhoˉvaˬ htaꞈ caˉ daꞈ ve shu htaꞈ gʼa maˍ piˇ ve tehꞈ hkʼa tawˍ lehˆ kʼoˆ piˇ ve yoˬ.—Hpeuꞈ maˍ ve 22:17.

5. 1 Kawˇrenˍhtuˆ liꞈ 3:6-9 hkʼaw kʼoˆ taˍ ve hkʼe, bon maˍ ve leh Liꞈ hpu maˍ ve gʼa cawˬ cawˇ ve tehꞈ Pawˇluꞈ aˬ htoꞈ ma ve htaꞈ tehˆ maˍ ve le?

⁵ Shu awˬ laꞈ gʼawˇ hpehꞈ la tuˬ maˍ piˇ ve leh awˬ yawˇ ti ve htaꞈ tcuh yaˇ Pawˇluꞈ tehˆ daꞈ ve yoˬ. Ngaˬ hui ti ve ceh tiˉ maˇ heˆ tehꞈ chi shiˍ tuˬ ga laˇ ve yoˬ. Yawˇ Kawˇrenˍhtuˆ Hkriꞈ yaˇ htaꞈ kʼoˆ piˇ ve, ‘ngaˬ ti leh Aˍpawˇluꞈ iˉ kaˆ pfuhˍ piˇ ve yoˬ. Nawˬ hui lehˬ, Gʼuiˬ sha ve ti mi hpehꞈ ve yoˬ.’ (1 Kawˇrenˍhtuˆ 3:6-9 gʼaw sheˍ.) Ngaˬ hui lehˬ “Gʼuiˬ sha ve ti mi” hkʼaw kanˉ te shehˍ hpaˇ hpehꞈ ve yoˬ. Ngaˬ hui ti ve ceh maˇ heˆ. Chi ve lehˬ ngaˬ hui gʼa hto toˇ ve yoˬ. Yaꞈ hkʼaˇ, ngaˬ hui maˍ ve lehˬ iˉ kaˆ pfuhˍ ve htaꞈ shuˍ leh awˬ yeˬ oˇ ve hkʼaˬ hkʼe kʼai ve ngaˬ hui nyi chehˇ ve yoˬ. (Yoˇhanˬ 4:35) Chi hkʼoˆ kaꞈ, Gʼuiˬ sha lehˬ uiˍ la yeˬ la piˇ shehˍ hpaˇ hpehꞈ ve tehꞈ ngaˬ hui maˇ leunˇ cawˇ.

6. Liꞈ hpu maˍ ve lehˬ aˬ htoꞈ ma htaꞈ caˉ daꞈ ve le?

⁶ “Co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui lehˬ yonˍ la” tuˬ ngaˬ hui ca chehˇ ve yoˬ. (Tcuh yaˇ 13:48) Chaw chi teˇ hpaˍ awˬ laꞈ gʼawˇ hpehꞈ la tuˬ ga piˇ ve, yawˇ hui (1) na gʼa tuˬ, (2) haꞈ yuˬ tuˬ, leh (3) Liꞈ hpu hkʼaw gʼa henˇ taˍ ve htaꞈ yuˬ yehˇ tuˬ, ngaˬ hui gʼa ga piˇ cawˇ ve yoˬ. (Yoˇhanˬ 17:3; Kawˇlawˇsehˇ 2:6, 7; 1 Hteˇsaˍlawˇniˆ 2:13) Hkriꞈ yaˇ awˬ moˍ hkʼaw ve chaw teˇ gʼaˇ le le Liꞈ hpu henˇ ve chaw htaꞈ ga piˇ gʼa ve lehˬ, yawˇ htaꞈ haꞈ piˇ ve leh hpawnˬ daꞈ la htaˇ haꞈ yuˬ piˇ ve yoˬ. (Yoˇhanˬ 13:35) Chi hkʼoˆ kaꞈ, Liꞈ hpu henˇ ve chaw yawˇ ve yonˍ hkʼaˇ awˬ piˍ htaꞈ baˬ taˉ tuˬ leh yawˇ te jaw ve awˬ ceuˬ htaꞈ maˇ kʼawꞈ te tuˬ, Liꞈ hpu maˍ ve chaw yawˇ htaꞈ ga piˇ tuˬ gʼa coˇ caˇ jaˇ. (2 Kawˇrenˍhtuˆ 10:4, 5) Yawˇ te hkʼaˇ dawˇ hkʼaˇ pa leh uiˍ la mvuh la leh Baˆtiˆsaˬ haꞈ yuˬ htaˇ hkʼa gaˬ ga piˇ tuˬ, ngaˬ hui awˬ yanˇ laiˉ ha pa gʼa yehˇ ve yoˬ. Chi lehˬ awˬ hpfuhˇ hkʼaˆ jaˇ.

7. Ngaˬ hui hto toˇ leh shu awˬ laꞈ gʼawˇ hpehꞈ la tuˬ maˍ piˇ gaˇ tuˬ aˬ htoꞈ ma te laˇ ve le?

⁷ Aˬ htoꞈ ma te ngaˬ hui hto toˇ˗e leh shu awˬ laꞈ gʼawˇ hpehꞈ la tuˬ te ve le? Awˉ lawˉ teˇ ceuˬ lehˬ, ngaˬ hui Yaˬhoˉvaˬ htaꞈ haꞈ ve pa taw yoˬ. Hto toˇ leh shu awˬ laꞈ gʼawˇ hpehꞈ la tuˬ te˗o kʼoˆ laˇ ve htaꞈ nawˬ coˇ caˇ leh gʼaꞈ te ve kʼo, nawˬ Yaˬhoˉvaˬ htaꞈ haꞈ ve tehꞈ hpeuꞈ maw piˇ chehˇ ve yoˬ. (1 Yoˇhanˬ 5:3) Dawˇ nyi sheˍ, nawˬ Yaˬhoˉvaˬ htaꞈ haꞈ ve pa  taw hto toˇ˗e gaˇ ve yoˬ. Awˬ lawn chi hkʼe ve haˍ ve htawˇ nawˬ te ve yoˬ. Nawˬ awˉ lawˉ teˇ pawˆ hto toˇ˗e htaˇ kawˆ˗aˬ laˇ? Kawˆ ve yoˬ hehˉ. Yaꞈ hkʼaˇ, Yeˍsuˆ te˗o kʼoˆ laˇ ve htaꞈ nawˬ shiˍ leh te ve yoˬ. Awˬ yanˇ ponˬ kʼai htaˇ hto toˇ ve sha ve yoˬ. Hkʼe te leh, nawˬ Liꞈ hpu gʼa maˍ piˇ htaˇ kawˆ˗aˬ laˇ? Kawˆ ve yoˬ hehˉ. Yaꞈ hkʼaˇ, nawˬ te gʼa ve yoˬ. Yaˬhoˉvaˬ ga laˇ tuˬ nawˬ lawˬ ve kʼo, shu Liꞈ hpu henˇ la tuˬ nawˬ jehˬ haˆ leh awˬ laꞈ gʼawˇ hpehꞈ la tuˬ maˍ piˇ gaˇ ve yoˬ.

8. Maˍkuˆ liꞈ 6:34 hkʼaw kʼoˆ taˍ ve hkʼe, ngaˬ hui shu htaꞈ Liꞈ hpu maˍ piˇ gaˇ tuˬ aˬ htoꞈ ma te laˇ sheˍ ve le?

⁸ Nyiˇ hkʼaˇ teˇ hkʼaˇ lehˬ, ngaˬ hui awˬ nu ve chaw htaꞈ haꞈ ve pa taw yoˬ. Hkʼe te leh ngaˬ hui yawˇ hui htaꞈ awˬ tehˬ ve maˍ piˇ gaˇ ve yoˬ. Teˇ pawˆ htaˇ, Yeˍsuˆ leh awˬ laꞈ gʼawˇ hui bon maˍ peuˬ hkʼawꞈ nawˉ, heuˬ jaˇ leh gʼaˇ jehˇ gaˇ ve yoˬ. Yaꞈ hkʼaˇ, chaw awˬ moˍ lonˉ yawˇ hui htaꞈ law taˍ piˇ ve yoˬ. Yeˍsuˆ yawˇ hui htaꞈ ha kʼaˉ jaˇ ve pa taw, “awˬ lawn laiˉ ceuˬ” maˍ piˇ ve yoˬ. (Maˍkuˆ 6:34 gʼaw sheˍ.) Yeˍsuˆ heuˬ jaˇ ve htawˇ, yawˇ hui htaꞈ maˍ piˇ sheˍ ve yoˬ. Aˬ htoꞈ ma pa taw le? Chaw oˇ teˇ moˍ hkʼaw hkʼaˬ hkʼe dawˇ ve htaꞈ Yeˍsuˆ na gʼa ve, yawˇ hui tuꞈ hkanˍ ve leh, dawˇ law kuiˬ maˇ cawˬ ve htaꞈ Yeˍsuˆ gʼa mawˬ leh, yawˇ yawˇ hui htaꞈ ga piˇ gaˇ ve yoˬ. Chi beuꞈ teˇ co˗e ve chaw kaꞈ hkʼa shuˍ shuˍ awˬ htaꞈ hpawˇ nyi˗a kʼo ha lehˬ ve htawˇ, yawˇ hui yawˬ hawˉ paˍ maˇ cawˬ ve hkʼe hpehꞈ leh yawˇ hui awˬ to htaꞈ ga maˇ gʼa. Tcuh yaˇ Pawˇluꞈ kʼoˆ ve, chi hkʼe ve chaw lehˬ Gʼuiˬ sha htaꞈ maˇ shiˍ leh dawˇ law kuiˬ kaꞈ maˇ cawˬ. (Eˇfeˇsuꞈ 2:12) Yawˇ hui lehˬ, “luˬ kuiˬ lo kʼai ve yaꞈ kʼaw” hkʼoˆ lo chehˇ taˍ ve yoˬ! (Maꞈhtehˍ 7:13) Hto toˇ kuiˬ awˬ ti lo ve chaw htaꞈ ngaˬ hui ha kʼaˉ jaˇ ve tehꞈ dawˇ ve kʼo, yawˇ Gʼuiˬ sha htaꞈ gʼa shiˍ cawˇ ve yoˬ. Haꞈ pehnˇ ve leh ha kʼaˉ ve htaꞈ pa taw, ngaˬ hui yawˇ hui htaꞈ ga piˇ gaˇ tuˬ te laˇ ve yoˬ. Leh daꞈ jaˇ ve lehˬ yawˇ hui Liꞈ hpu henˇ la tuˬ jehˬ piˇ sheˍ.

9. Hpiˇliˇpiˆ liꞈ 2:13 hkʼaw kʼoˆ taˍ ve hkʼe, Yaˬhoˉvaˬ nawˬ htaꞈ hkʼaˬ hkʼe ga laˇ tuˬ le?

⁹ Liꞈ hpu henˇ ve chaw cawˬ ve kʼo, awˬ yanˇ gʼa yehˇ jaˇ ve tehꞈ shiˍ ve pa taw, Liꞈ hpu henˇ la tuˬ jehˬ piˇ maˇ haˆ ve yoˬ hehˉ. Nawˬ chi hkʼe dawˇ ve kʼo, Yaˬhoˉvaˬ htaꞈ kʼoˆ piˇ leh Liꞈ hpu henˇ ve chaw cawˬ tuˬ yawˇ geh lawˬ sheˍ. (Hpiˇliˇpiˆ 2:13 gʼaw sheˍ.) Tcuh yaˇ Yoˇhanˬ ngaˬ hui htaꞈ htawˆ hkanˍ laˇ ve ngaˬ hui bon lawˬ ve Gʼuiˬ sha ve a loˍ cawˇ ve kʼo, yawˇ ngaˬ hui ve bon lawˬ hkawˇ htaꞈ awˬ tehˬ hkʼawꞈ laˇ tuˬ yoˬ. (1 Yoˇhanˬ 5:14, 15) Hkʼe te leh, nawˬ shu awˬ laꞈ gʼawˇ hpehꞈ la tuˬ maˍ piˇ gaˇ tuˬ Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ.

10-11. Nawˬ chaw teˇ gʼaˇ htaꞈ Liꞈ hpu maˇ maˍ haˆ tuˬ aˬ htoꞈ ma te laˇ ve le?

¹⁰ Liꞈ hpu maˍ ve haˍ jaˇ ve awˬ lawn hpehꞈ ve tehꞈ ngaˬ hui shiˍ ve yoˬ. Yaꞈ hkʼaˇ, ngaˬ hui dawˇ teh taˍ ve htaꞈ te maˇ gʼa tuˬ tawˍ ve tsuhˇ ve teˇ ceuˬ ceuˬ cawˬ ve yoˬ hehˉ. Tawˍ ve tsuhˇ ve chi teˇ hpaˍ aˬ htoꞈ ma cawˬ ve le, leh chi ve htaꞈ ngaˬ hui hkʼaˬ hkʼe te gʼaˇ tuˬ teˇ geh henˇ tuˬ yoˬ.

¹¹ Ngaˬ hui maˇ chehˇ sha ve pa taw, dawˇ teh taˍ ve htaꞈ te gaˇ ve hkʼe te maˇ gʼa. Tawˇ pa haˉ te kʼo, nawˬ maˇ chehˇ sha ve maˇ heˆ leh a shaꞈ maˇ˗oˬ ve laˇ? Yoˬ kʼo, a naˍ 19 cawˬ htaˇ ve htaꞈ dawˇ nyi sheˍ. Tawˇ yaw tuˬ awˬ hkʼeun yehˇ ve maˇ heˆ leh awn˗laiˉ hkʼaw ngaˬ hui aˉ hkʼaw chehˇ leh Liꞈ hpu maˍ piˇ gʼa ve yoˬ. Chi sha leh daꞈ ve kaꞈ cawˬ ve yoˬ. Chaw teˇ hpaˍ Liꞈ hpu henˇ gaˇ jaˇ ve yoˬ. Teˇ hpaˍ kʼo, mvuhˇ shawˉ maˇ heˆ leh mvuhˇ hpeuꞈ htaˇ Liꞈ hpu henˇ gaˇ ve yoˬ. Chi teˇ hkui nawˬ aˉ hkʼaw chehˇ˗aˬ leh maˍ piˇ gʼa ve yoˬ. Yawˇ henˇ gaˇ ve awˬ yanˇ htaꞈ nawˬ maˍ piˇ gʼa ve yoˬ. Niˆkawˇdeˍ mvuhˇ hpeuꞈ htaˇ henˇ gaˇ leh Yeˍsuˆ oˇ hkʼe htaˇ maˍ piˇ ve yoˬ.—Yoˇhanˬ 3:1, 2.

12. Ngaˬ hui Liꞈ hpu maˍ gʼa tuˬ yoˬ tehꞈ yonˍ gʼa tuˬ aˬ htoꞈ ma ga laˇ ve le?

¹² Ngaˬ hui Liꞈ hpu maˍ tuˬ maˇ cheuˬ tehꞈ dawˇ ve. Liꞈ hpu maˍ gʼa tuˬ ngaˬ hui chi aꞈ kehˉ gʼa shiˍ cawˇ ve, gʼa cheuˬ cawˇ ve tehꞈ, teˇ pawˆ pawˆ dawˇ ve yoˬ. Nawˬ chi hkʼe dawˇ ve kʼo, nawˬ yonˍ gʼa tuˬ ga laˇ gʼa ve 3 ceuˬ cawˬ ve yoˬ. Awˉ lawˉ teˇ ceuˬ, nawˬ  awˬ nu ve chaw htaꞈ maˍ piˇ gʼa ve tehꞈ Yaˬhoˉvaˬ mawˬ ve yoˬ. (2 Kawˇrenˍhtuˆ 3:5) Nyiˇ ceuˬ lehˬ, nawˬ htaꞈ Liꞈ hpu ca maˍ˗e kʼoˆ laˇ ve chaw lehˬ “mvuhˇ naw ma hkʼoˆ leh miˬ guiˬ hkʼoˆ ve kanˇ paˆ hkʼa peu˗eˬ” cawˬ shehˍ hpaˇ Yeˍsuˆ yoˬ. (Maꞈhtehˍ 28:18) Shehˆ ceuˬ lehˬ, awˬ nu ve chaw ga laˇ tuˬ nawˬ lawˬ gʼa ve yoˬ. Yeˍsuˆ lehˬ Yaˬhoˉvaˬ maˍ piˇ ve hkʼe kʼoˆ leh nawˬ kaꞈ Yeˍsuˆ hkʼa shuˍ gʼaꞈ te gʼa ve yoˬ. (Yoˇhanˬ 8:28; 12:49) Chi hkʼoˆ kaꞈ, hto toˇ ve awˬ moˍ ehˉ hkʼaw nyi haꞈ shaˉ paˍ, gʼuˇ suhˍ peuˍ ve chaw, maˇ heˆ leh awˬ viˉ awˬ nyi hpehꞈ laˬ jaw ve awˬ lawn cawˬ ve chaw, leh yawˇ hui ga laˇ tuˬ nawˬ lawˬ gʼa ve yoˬ. Nawˬ yawˇ geh teˇ geh Liꞈ hpu ca maˍ˗e tuˬ lawˬ gʼa ve yoˬ.

13. Aˬ htoꞈ ma te ngaˬ hui pa cawˇ ve le?

¹³ Ngaˬ hui awˬ hkʼaˇ awˬ suhˉ leh laꞈ caˉ awˬ suhˉ htaꞈ yehˇ tuˬ haˍ ve tehꞈ dawˇ ve. Chi teˇ hkui ngaˬ hui Liꞈ hpu maˍ ve awˬ hkʼaˇ awˬ suhˉ cawˬ ve yoˬ. Nawˬ ve a shaꞈ co co taiˍ taiˍ ha lehˬ gʼa ve! tehꞈ kʼoˆ ve liꞈ kʼoˆ ngaˬ hui Liꞈ hpu maˍ htaˇ yehˇ ve yoˬ. Gu ve leh Liꞈ hpu maˍ ve kaꞈ awˉ lawˉ htaˇ ve htaꞈ maˇ shuˍ daꞈ. Awˬ lawn awˬ tanˇ htaꞈ hkʼe taw maˇ gʼaw maˇ leh Liꞈ hpu henˇ ve chaw geh tawˇ hkʼa dehꞈ yaw daꞈ ve yoˬ. Chi hkʼoˆ kaꞈ, VDO leh awˬ nu ve laꞈ caˉ htaꞈ yehˇ maˇ ve yoˬ. Tawˇ pa haˉ te kʼo, JW Laiˉbaˍliˍ laꞈ caˉ awˬ suhˉ chi ve nawˬ maˇ yehˇ puiˉ tehꞈ dawˇ ve kʼo, awˬ nu ve chaw ga laˇ tuˬ lawˬ gʼa ve yoˬ. Ngaˬ hui te jaw ve awˬ ceuˬ htaꞈ dawˇ cawˇ leh awˬ suhˉ awˬ suhˉ pa htaˇ haˍ ve tehꞈ dawˇ ve yoˬ. Yaꞈ hkʼaˇ, Yaˬhoˉvaˬ leh awˬ nu ve chaw nawˬ htaꞈ ga laˇ tcuh ve kʼo, pa ve awˬ ceuˬ sha ve tehꞈ dawˇ tuˬ yoˬ. Leh maˍ ve awˬ hkʼaˇ awˬ suhˉ htaꞈ nawˬ kaꞈ dawˇ cawˇ tuˬ yoˬ. Gʼuˇ suhˍ peuˍ ve chaw teˇ gʼaˇ kʼoˆ ve, maˍ ve awˬ hkʼaˇ awˬ suhˉ chi “Liꞈ hpu maˍ ve chaw leh Liꞈ hpu henˇ ve chaw pyawˍ jaˇ.”

14. Ngaˬ hui Liꞈ hpu henˇ ve chaw ca gʼa tuˬ haˍ jaˇ ve awˬ ti lo chehˇ ve kʼo, aˬ htoꞈ ma htaꞈ tawnˇ taˍ cawˇ ve le? Leh 1 Kawˇrenˍhtuˆ liꞈ 3:6, 7 hkʼaw ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

¹⁴ Ngaˬ hui Liꞈ hpu henˇ ve chaw ca gʼa tuˬ haˍ jaˇ ve awˬ ti lo chehˇ ve. Laiˉ gʼaˇ maˇ na leh ngaˬ hui htaꞈ tawˍ laˇ ve yoˬ. Ngaˬ hui daꞈ ve hpawˇ dawˇ tuˬ aˬ htoꞈ ma ga laˇ ve le? Miˬ guiˬ chi hkʼoˆ shoꞈ shaꞈ ve cawˬ maˇ jaˇ leh, chaw yaˇ ve a shaꞈ teꞈ hkʼaˇ kaꞈ pa kʼai vaiˇ jaˇ ve tehꞈ ngaˬ hui tawnˇ taˍ cawˇ ve yoˬ. Awˉ lawˉ htaˇ Gʼuiˬ sha ve hkawˇ maˇ na gaˇ ve chaw kaꞈ, chi teˇ hkui Gʼuiˬ sha htaꞈ gʼa shiˍ cawˇ ve tehꞈ tanˬ dawˇ la ve yoˬ. (Maꞈhtehˍ 5:3) Ngaˬ hui ve liꞈ kʼoˆ maˇ heuˆ gaˇ ve chaw kaꞈ, hkʼawꞈ nawˉ htaˇ Liꞈ hpu henˇ gaˇ la ve yoˬ hehˉ. Chi hkʼoˆ kaꞈ, Yaˬhoˉvaˬ lehˬ ti mi shehˍ hpaˇ hpehꞈ ve tehꞈ ngaˬ hui shiˍ ve yoˬ. (Maꞈhtehˍ 9:38) Gʼuiˬ sha lehˬ ngaˬ hui htaꞈ ti leh iˉ kaˆ pfuhˍ tcuh gaˇ ve yoˬ. Yaꞈ hkʼaˇ, Gʼuiˬ sha teˇ gʼaˇ ceh tiˉ yeˬ la uiˍ la piˇ shehˍ hpaˇ hpehꞈ ve yoˬ. (1 Kawˇrenˍhtuˆ 3:6, 7) Chi teˇ hkui ngaˬ hui geh Liꞈ hpu henˇ ve chaw maˇ cawˬ ve htawˇ, awˬ gʼaˇ gʼa jaˇ. Ngaˬ hui te gʼa maˇ ve htaꞈ cawˬ ve maˇ heˆ. Ngaˬ hui coˇ caˇ ve htaꞈ Yaˬhoˉvaˬ laꞈ shawnˍ peꞈ laˇ tuˬ yoˬ! *

15. Chaw teˇ gʼaˇ Liꞈ hpu henˇ leh henˇ taˍ ve awˬ ceuˬ htaꞈ yuˬ yehˇ ve kʼo, Yaˬhoˉvaˬ hkʼaˬ hkʼe dawˇ tuˬ ve le?

¹⁵ Chaw teˇ gʼaˇ Liꞈ hpu hkʼaw awˬ tehˬ ve htaꞈ haꞈ yuˬ leh awˬ tehˬ ve chi shu htaꞈ kʼoˆ piˇ htaˇ, Yaˬhoˉvaˬ ha lehˬ jaˇ ve yoˬ. (Tawˇ naˉ ve 23:15, 16) Chi beuꞈ teˇ co˗e Yaˬhoˉvaˬ ve chaw kaiˬ ve hkʼaw hto toˇ leh Liꞈ hpu maˍ ve htaꞈ yawˇ gʼa mawˬ htaˇ, yawˇ hkʼaˬ hkʼe taw ha lehˬ ve htaꞈ dawˇ nyi sheˍ. Tawˇ pa haˉ te kʼo, ponˬ laˬ ve 2020 hkʼawꞈ htaˇ Gʼuiˬ sha ve kanˉ te ve a naˍ cawˬ ve htawˇ, Liꞈ hpu henˇ ve chaw 7,705,765 gʼaˇ cawˬ ve yoˬ. 241,994 gʼaˇ Yaˬhoˉvaˬ htaꞈ awˬ to chiˇ aꞈ leh Baˆtiˆsaˬ haꞈ yuˬ ve yoˬ. Chaw chi teˇ hpaˍ awˬ nu ve chaw htaꞈ Liꞈ hpu maˍ piˇ leh laiˉ gʼaˇ awˬ laꞈ gʼawˇ hpehꞈ la tuˬ ga piˇ ve yoˬ. (Luˉkaꞈ 6:40) Shu awˬ laꞈ gʼawˇ hpehꞈ la tuˬ ngaˬ hui ga piˇ ve kʼo, Yaˬhoˉvaˬ ha lehˬ jaˇ ve tehꞈ yonˍ gʼa ve yoˬ.

16. Ngaˬ hui aˬ htoꞈ ma dawˇ teh taˍ gʼa ve le?

 ¹⁶ Shu awˬ laꞈ gʼawˇ hpehꞈ la tuˬ maˍ piˇ ve sha ve maˇ heˆ. Shu Yaˬhoˉvaˬ htaꞈ haꞈ tuˬ ngaˬ hui maˍ piˇ ve yawˇ ga laˇ gʼa tuˬ yoˬ. Nawˬ Liꞈ hpu henˇ ve chaw teˇ gʼaˇ cawˬ tuˬ dawˇ teh taˍ gʼa˗aw laˇ? Ngaˬ hui awˬ yanˇ cawˬ ve teˇ pawˆ le le teˇ gʼaˇ le le Liꞈ hpu henˇ la tuˬ jehˬ piˇ gʼa ve yoˬ. Liꞈ hpu henˇ gaˇ ve chaw htaꞈ ngaˬ hui mawˬ tuˬ yoˬ hehˉ. Ngaˬ hui coˇ caˇ ve htaꞈ Yaˬhoˉvaˬ awˬ bon naꞈ laˇ tuˬ yoˬ tehꞈ yonˍ gʼa ve yoˬ.

17. Liꞈ hpu henˇ ve chaw cawˬ htaˇ ngaˬ hui hkʼaˬ hkʼe dawˇ tuˬ le?

¹⁷ Hto toˇ ve leh shu htaꞈ Liꞈ hpu maˍ piˇ ve daꞈ jaˇ ve awˬ vuiˬ hpehꞈ ve yoˬ. Kanˉ chi ve lehˬ ngaˬ hui ha lehˬ jaˇ tuˬ te laˇ ve yoˬ. Tcuh yaˇ Pawˇluꞈ Hteˇsaˍlawˇniˆ chaw laiˉ gʼaˇ awˬ laꞈ gʼawˇ hpehꞈ la tuˬ ga piˇ ve yoˬ. Pawˇluꞈ yawˇ hui ve dawˇ hkʼaˇ htaꞈ kʼoˆ ve, “ngaˬ hui ve Jawˇmawˇ Yeˍsuˆ Hkriꞈ kʼawꞈ yaꞈ la ve teˇ yanˇ, yawˇ mehˆ gʼuˇ suhˍ ngaˬ hui ve dawˇ law kuiˬ, ha lehˬ kuiˬ leh awˬ meꞈ awˬ hponˇ cawˬ ve shi uˉ tcuhˍ aˬ htoꞈ ma le? Nawˬ hui yoˬ maˇ heˆ laˇ? Awˬ lawn kʼo, nawˬ hui lehˬ ngaˬ hui ve awˬ meꞈ awˬ hponˇ leh ngaˬ hui ve ha lehˬ kuiˬ hpehꞈ ve yoˬ.” (1 Hteˇsaˍlawˇniˆ 2:19, 20; Tcuh yaˇ 17:1-4) Chi beuꞈ teˇ co˗e ve chaw laiˉ gʼaˇ kaꞈ chi hkʼe dawˇ ve yoˬ. Sa˗teh˗fa˗niˇ leh yawˇ ve awˬ hpawˇ laiˉ gʼaˇ uiˍ la mvuh la leh Baˆtiˆsaˬ haꞈ yuˬ htaˇ hkʼa gaˬ ga piˇ ve yoˬ. Yawˇ kʼoˆ ve, “shu Yaˬhoˉvaˬ htaꞈ awˬ to chiˇ aꞈ tuˬ ga piˇ ve aꞈ kehˉ ha lehˬ ve maˇ cawˬ.”