Awˬ Lawn 31
Bon lawˬ ve htaꞈ awˬ hpfuhˇ shiˍ ve
‘Ngaˬ ve bon lawˬ hkawˇ sha hawnˉ hkʼa shuˍ Gʼuiˬ sha htaꞈ tuˉ tanˇ piˇ ve yoˬ.’—CHIˇ MVUH VE 141:2.
KʼA MUIˬ HKAWˇ 47 Yaˬhoˉvaˬ geh bon teˇ nyi le le lawˬ˗oꞈ
HENˇ TUˬ VE TEˇ HPAˍ *
1. Bon lawˬ ve htaꞈ ngaˬ hui hkʼaˬ hkʼe dawˇ nyi cawˇ ve le?
Mvuhˇ naw ma leh miˬ guiˬ htaꞈ hpanˍ shehˍ hpaˇ Yaˬhoˉvaˬ lehˬ ngaˬ hui htaꞈ daꞈ jaˇ ve laꞈ shawnˍ peꞈ laˇ ve yoˬ. Ngaˬ hui Yaˬhoˉvaˬ geh bon lawˬ htaˇ, aˬ htoꞈ ma ve chaw ceuˬ tawˇ hkawˇ yehˇ kaꞈ gʼa ve yoˬ. Awˉ lawˉ kʼoˆ piˇ tuˬ maˇ loˍ, hkʼaˬ ve teˇ yanˇ lawˬ kaꞈ gʼa ve yoˬ. Naˆ tsuhˇ yehˬ ku˗iˍ hkʼoˆ lo zuhꞈ taˍ ve maˇ heˆ leh htawnˍ hkʼaw lo chehˇ ve htawˇ, ngaˬ hui Yaˬhoˉvaˬ geh bon lawˬ gʼa ve yoˬ. Ngaˬ hui ve bon lawˬ hkawˇ htaꞈ Gʼuiˬ sha na laˇ tuˬ yoˬ tehꞈ hkʼa dehꞈ yonˍ gʼa ve yoˬ. Ngaˬ hui daꞈ jaˇ ve awˬ vuiˬ chi gʼa ve awˬ bon uiˍ jaˇ.
2. Jawˇ mawˇ Daˍviˆ lehˬ bon lawˬ ve htaꞈ awˬ hpfuhˇ shiˍ ve tehꞈ hkʼaˬ hkʼe hpeuꞈ maw laˇ ve le?
2 Daˍviˆ lehˬ bon lawˬ ve htaꞈ awˬ hpfuhˇ shiˍ jaˇ. Yawˇ Yaˬhoˉvaˬ htaꞈ kʼa muiˬ chiˇ mvuh leh kʼoˆ ve, ‘ngaˬ ve bon lawˬ hkawˇ sha hawnˉ hkʼa shuˍ Gʼuiˬ sha htaꞈ tuˉ tanˇ piˇ ve yoˬ.’ (Chiˇ mvuh ve 141:1, 2) Daˍviˆ ve awˬ co˗e htaˇ Yaˬhoˉvaˬ htaꞈ tuˉ tanˇ piˇ tuˬ paw hkuˇ lehˬ daꞈ jaˇ ve sha hawnˉ gu teh ve yoˬ. (Tawˆ kʼai ve 30:34, 35) Daˍviˆ mvuhˇ naw ma hkʼoˆ chehˇ ve Awˬ pa Gʼuiˬ sha geh bon lawˬ htaˇ, Daˍviˆ bon maˇ lawˬ sheˍ htaˇ aˬ htoꞈ ma kʼoˆ tuˬ awˉ lawˉ dawˇ nyi leh bon lawˬ ve chi lehˬ sha hawnˉ htaꞈ shuˍ ve tehꞈ hpeuꞈ maw laˇ ve yoˬ. Ngaˬ hui kaꞈ chi hkʼa shuˍ te gaˇ ve yoˬ. Ngaˬ hui ve bon lawˬ hkawˇ htaꞈ Yaˬhoˉvaˬ nyi hkʼaˇ suh tcuh gaˇ ve yoˬ.
3. Ngaˬ hui Yaˬhoˉvaˬ geh bon hkʼaˬ hkʼe lawˬ cawˇ ve le? Aˬ htoꞈ ma pa taw le?
3 Ngaˬ hui Yaˬhoˉvaˬ geh bon lawˬ htaˇ maˇ yawˆ yan ve hkʼe taˇ te. Ngaˬ hui Gʼuiˬ sha geh bon lawˬ htaˇ yawˆ yan ve hkʼaw gʼa lawˬ cawˇ ve yoˬ. Iˉsaˍyaˆ, Yeˍsaˍkeˍlaˆ, Daˍyeˍlaˆ, leh Yoˇhanˬ awˬ han hkʼaw mawˬ ve htaꞈ dawˇ nyi sheˍ. Awˬ han hkʼaw mawˬ ve awˬ lawn teˇ hpaˍ peun daꞈ ve htawˇ, teˇ lawn lawn shuˍ daꞈ ve yoˬ. Yawˇ hui teˇ gʼaˇ le le kʼoˆ ve, Yaˬhoˉvaˬ lehˬ uiˍ jaˇ mvuh jaˇ ve Jawˇ mawˇ hpehꞈ leh yawˆ yan keunˍ ve yoˬ. Tawˇ pa haˉ te kʼo, Iˉsaˍyaˆ lehˬ ‘Yaˬhoˉvaˬ awˬ meꞈ awˬ hponˇ cawˬ ve kʼaw jaw hkʼoˆ mui taˍ’ ve htaꞈ gʼa mawˬ ve yoˬ. (Iˉsaˍyaˆ 6:1-3) Yaˬhoˉvaˬ lehˬ gaˉ yaw lonˉ hkʼoˆ muiˬ leh ‘aˉ laˇ miˬ shiˉ jaw hkʼaw cawˬ ve awˬ gʼeuˆ htaꞈ shuˍ ve yoˬ. Awˬ gʼeuˆ oˇ ve hkʼaw lo Gʼuiˬ sha chehˇ taˍ ve htaꞈ’ Yeˍsaˍkeˍlaˆ gʼa mawˬ ve yoˬ. (Yeˍsaˍkeˍlaˆ 1:26-28) “Co co taiˍ taiˍ teꞈ chehˇ ve awˬ shehˍ hpaˇ” veuꞈ kʼaˇ hpuˉ˗ehˍ veuꞈ taˍ leh yawˇ ve kʼaw jaw lo aˬ miˍ tawˆ la chehˇ ve htaꞈ Daˍyeˍlaˆ gʼa mawˬ ve yoˬ. (Daˍyeˍlaˆ 7:9, 10) Yaˬhoˉvaˬ lehˬ kʼaw jaw hkʼoˆ mui leh aˉ laˇ miˬ shiˉ jaw lehˬ kʼaw jaw oˇ ve htaꞈ hkʼa caw zuhˇ cawˬ taˍ ve Yoˇhanˬ gʼa mawˬ ve yoˬ. (Hpeuꞈ maˍ ve 4:2-4) Daꞈ jaˇ ve chi hkʼe ve miˬ guiˬ hkʼoˆ lo cawˬ ve htaꞈ ngaˬ hui dawˇ nyi htaˇ, ngaˬ hui Yaˬhoˉvaˬ geh bon lawˬ gʼa ve lehˬ daꞈ jaˇ ve awˬ ceuˬ hpehꞈ ve tehꞈ ngaˬ hui gʼa dawˇ nyi cawˇ ve yoˬ. Leh ngaˬ hui bon lawˬ htaˇ kaꞈ yawˆ yan ve hkʼaw lawˬ cawˇ ve yoˬ. Hkʼe kʼo, ngaˬ hui aˬ htoꞈ ma ve awˬ lawn bon lawˬ gʼa ve le?
“NAWˬ HUI BON CHI HKʼE LAWˬ˗Oꞈ”
4. Maꞈhtehˍ liꞈ 6:9, 10 Yeˍsuˆ ve bon lawˬ hkawˇ awˉ lawˉ teˇ tawn hkʼaw ngaˬ hui htaꞈ hkʼaˬ hkʼe maˍ laˇ gʼa ve le?
4 Maꞈhtehˍ liꞈ 6:9, 10 gʼaw sheˍ. Hkʼaw pui hkʼoˆ lo Yeˍsuˆ bon maˍ ve hkʼaw awˬ laꞈ gʼawˇ hui Gʼuiˬ sha nyi hkʼaˇ suh tuˬ bon lawˬ tuˬ awˬ hkʼaˇ maˍ piˇ ve yoˬ. “Nawˬ hui bon chi hkʼe lawˬ˗oꞈ” tehꞈ Yeˍsuˆ kʼoˆ peuˬ hkʼawꞈ nawˉ, Yaˬhoˉvaˬ loˍ ve awˬ ceuˬ a yeˇ uiˍ jaˇ ve htaꞈ yawˇ awˉ lawˉ kʼoˆ maˍ piˇ ve yoˬ. Tawˇ pa haˉ te kʼo, nawˬ ve awˬ meh htaꞈ yawˆ yan te piˇ lawˬ˗oꞈ. Gʼuiˬ sha ve mvuhˇ miˬ gaˬ la piˇ˗oˆ. Mvuhˇ miˬ chi ve lehˬ Gʼuiˬ sha htaꞈ tawˍ ve chaw hkʼa peu˗eˬ htaꞈ te luˬ piˇ tuˬ yoˬ. Gʼuiˬ sha lehˬ chaw yaˇ leh awˬ gʼuˇ suhˍ hpawˇ awˬ pon daꞈ ve awˬ ceuˬ te laˇ piˇ lawˬ˗oꞈ. Ngaˬ hui Yaˬhoˉvaˬ geh bon lawˬ leh awˬ lawn chi ve kʼoˆ piˇ htaˇ, Yaˬhoˉvaˬ loˍ ve awˬ ceuˬ ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve tehꞈ te piˇ chehˇ ve htaꞈ yawˇ mawˬ tuˬ yoˬ.
5. Ngaˬ hui a shu yawˇ awˬ pon bon lawˬ hpehꞈ˗aw laˇ?
5 Yeˍsuˆ ve bon lawˬ hkawˇ hkʼaw ve awˬ lawn ngaˬ hui a shu yawˇ awˬ pon bon lawˬ gʼa ve tehꞈ yawˇ te maˍ laˇ ve yoˬ. Tawˇ pa haˉ te kʼo, yaꞈ nyi ngaˬ hui loˍ ve caˇ tuˬ peꞈ laˇ tuˬ, ngaˬ hui htaꞈ venˇ baˆ hpehˇ laˇ tuˬ, haiˬ ve Saˍtanˍ ngaˬ hui htaꞈ maˇ gʼa shoꞈ shaꞈ laˇ tuˬ, beˬ ve lawˇ ve htaꞈ tawˍ daꞈ gʼaˇ tuˬ, chi ve teˇ hpaˍ ngaˬ hui lawˬ gʼa ve yoˬ. (Maꞈhtehˍ 6:11-13) Chi hkʼe lawˬ ve lehˬ Yaˬhoˉvaˬ ngaˬ hui htaꞈ ga laˇ tcuh gaˇ ve tehꞈ hpeuꞈ maw piˇ leh yawˇ nyi hkʼaˇ suh tuˬ kaꞈ ngaˬ hui te piˇ gaˇ ve yoˬ.
Awˬ hpawˇ awˬ miˇ ma aˬ htoꞈ ma awˬ lawn bon lawˬ gʼa ve le? (Awˬ tawn 6 nyi sheˍ) *
6. Yeˍsuˆ ve bon lawˬ hkawˇ hkʼaw ve awˬ lawn lawˬ ve awˬ hkʼoˆ kaꞈ ngaˬ hui awˬ nu ve awˬ lawn kaꞈ bon lawˬ gʼa˗aw laˇ? Kʼoˆ maˍ laˇ sheˍ.
6 Yeˍsuˆ lehˬ awˬ laꞈ gʼawˇ hui htaꞈ yawˇ ve bon lawˬ hkawˇ hkʼaw ve hkʼa shuˍ teˇ lawn le le htaꞈ maˇ lawˬ tcuh gaˇ. Yeˍsuˆ bon lawˬ ve teˇ pawˆ le le yawˇ oˇ teˇ hkui gʼa hpuˇ ve leh awˬ nu ve awˬ lawn kaꞈ bon lawˬ ve yoˬ. (Maꞈhtehˍ 26:39, 42; Yoˇhanˬ 17:1-26) Ngaˬ hui dawˇ haˍ dawˇ hkiˉ ve aˬ htoꞈ ma ve awˬ lawn htawˇ maˇ kʼoˆ, bon lawˬ gʼa ve yoˬ. Tawˇ pa haˉ te kʼo, ngaˬ hui a yeˇ uiˍ ve awˬ lawn gʼa dawˇ cheˆ htaˇ, ngaˬ hui Yaˬhoˉvaˬ geh cuˇ yiˍ leh na gʼa tuˬ bon lawˬ gʼa ve yoˬ. (Chiˇ mvuh ve 119:33, 34) Haˍ jaˇ ve awˬ vuiˬ gʼa htaˇ, ngaˬ hui kanˉ te ve awˬ hkʼaˇ shiˍ tuˬ Yaˬhoˉvaˬ geh bon lawˬ gʼa ve yoˬ. (Tawˇ naˉ ve 2:6) Awˬ pa awˬ e lehˬ yaˇ awˬ pon bon lawˬ piˇ gʼa ve, yaˇ kaꞈ awˬ pa awˬ e awˬ pon bon lawˬ piˇ gʼa ve yoˬ. Ngaˬ hui teˇ gʼaˇ le le Liꞈ hpu henˇ ve chaw leh ngaˬ hui hto maˍ piˇ ve chaw awˬ pon kaꞈ bon lawˬ piˇ gʼa ve yoˬ. Leh ngaˬ hui chi hkʼe te cawˇ ve yoˬ. Yaꞈ hkʼaˇ, ngaˬ hui bon lawˬ htaˇ loˍ ve awˬ ceuˬ ceh tiˉ lawˬ ve maˇ te cawˇ.
Ngaˬ hui Yaˬhoˉvaˬ htaꞈ chiˇ mvuh leh awˬ bon uiˍ jaˇ tehꞈ kʼoˆ piˇ gʼa ve aˬ htoꞈ ma ve awˬ lawn cawˬ ve le? (Awˬ tawn 7-9 nyi sheˍ) *
7. Ngaˬ hui bon lawˬ htaˇ aˬ htoꞈ ma te Yaˬhoˉvaˬ htaꞈ chiˇ mvuh cawˇ ve le?
7 Ngaˬ hui bon lawˬ htaˇ Yaˬhoˉvaˬ htaꞈ chiˇ mvuh ve kaꞈ maˇ leunˇ cawˇ ve yoˬ. Yaˬhoˉvaˬ hkʼe taw chiˇ mvuh ve htaꞈ gʼa keunˍ ve teˇ gʼaˇ˗ehˬ kaꞈ maˇ cawˬ. ‘Yawˇ lehˬ venˇ baˆ hpehˇ piˇ puiˉ leh daꞈ ve awˬ bon naꞈ piˇ puiˉ ve yoˬ.’ Chi hkʼoˆ kaꞈ, “Gʼuiˬ sha˗oˬ, nawˬ lehˬ ha kʼaˉ puiˉ leh haꞈ pehnˇ uiˍ ve Gʼuiˬ sha hpehꞈ ve yoˬ. Nawˬ lehˬ yeunˇ hkanˍ puiˉ ve, ha kʼaˉ puiˉ ve leh, ka tiꞈ yeˬ ve Gʼuiˬ sha hpehꞈ ve yoˬ.” (Chiˇ mvuh ve 86:5, 15) Ngaˬ hui Yaˬhoˉvaˬ htaꞈ chiˇ mvuh tuˬ awˬ hkʼaˇ laiˉ hkʼaˇ cawˬ ve yoˬ. Awˬ lawn kʼo, yawˇ lehˬ daꞈ jaˇ ve Gʼuiˬ sha hpehꞈ leh daꞈ ve awˬ ceuˬ laiˉ ceuˬ te ve yoˬ.
8. Ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gʼa ve aˬ htoꞈ ma awˬ lawn cawˬ sheˍ ve le? (Chiˇ mvuh ve 104:12-15, 24)
8 Ngaˬ hui bon lawˬ htaˇ Yaˬhoˉvaˬ htaꞈ chiˇ mvuh cawˇ ve awˬ hkʼoˆ kaꞈ awˬ bon uiˍ jaˇ tehꞈ kaꞈ kʼoˆ piˇ cawˇ ve yoˬ. Tawˇ pa haˉ te kʼo, suhˉ veˆ daꞈ jaˇ ve awˬ sheuˉ laiˉ ceuˬ cawˬ ve Yaˬhoˉvaˬ ngaˬ hui htaꞈ peꞈ laˇ ve pa taw, bon lawˬ htaˇ yawˇ htaꞈ awˬ bon uiˍ jaˇ tehꞈ kʼoˆ piˇ cawˇ ve yoˬ. Yawˇ ngaˬ hui htaꞈ mehˬ jaˇ ve caˇ tuˬ laiˉ ceuˬ peꞈ laˇ leh ngaˬ hui haꞈ ve awˬ chawˇ geh kaꞈ gʼa chehˇ ve pa taw, ngaˬ hui Gʼuiˬ sha htaꞈ awˬ bon uiˍ jaˇ tehꞈ kʼoˆ piˇ gʼa ve yoˬ. Yaˬhoˉvaˬ ngaˬ hui htaꞈ ha lehˬ tcuh gaˇ ve pa taw, chi ve teˇ hpaˍ ngaˬ hui htaꞈ peꞈ laˇ leh awˬ nu ve laiˉ ceuˬ kaꞈ peꞈ laˇ sheˍ ve yoˬ. (Chiˇ mvuh ve 104:12-15, 24 gʼaw sheˍ.) Chi aꞈ kehˉ ngaˬ hui Yaˬhoˉvaˬ htaꞈ awˬ bon uiˍ jaˇ kʼoˆ piˇ gaˇ ve lehˬ, yawˇ ngaˬ hui htaꞈ cuˇ yiˍ peꞈ laˇ leh ngaˬ hui ve yonˍ hkʼaˇ yonˍ yeˬ maˇ la tuˬ daꞈ jaˇ ve beˆ maˍ laˇ hkawˇ kaꞈ peꞈ laˇ ve yoˬ. Gʼuiˬ sha lehˬ ngaˬ hui htaꞈ awˬ gʼuˇ suhˍ hpawˇ daꞈ jaˇ ve dawˇ law kuiˬ kaꞈ peꞈ laˇ ve yoˬ.
9. Ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ cawˇ ve maˇ leunˇ tuˬ aˬ htoꞈ ma ga laˇ ve le? (1 Hteˇsaˍlawˇniˆ 5:17, 18)
9 Yaˬhoˉvaˬ ngaˬ hui htaꞈ daꞈ ve awˬ ceuˬ laiˉ ceuˬ peꞈ laˇ ve awˬ pon awˬ bon uiˍ jaˇ tehꞈ kʼoˆ piˇ tuˬ leunˇ˗e la ve yoˬ. Ngaˬ hui chi hkʼe maˇ leunˇ tuˬ aˬ htoꞈ ma ga laˇ gʼa ve le? Ngaˬ hui Yaˬhoˉvaˬ geh bon lawˬ htaˇ aˬ htoꞈ ma ve awˬ lawn lawˬ jaw ve bvuhꞈ nyi sheˍ. Ngaˬ hui ve bon lawˬ hkawˇ htaꞈ Yaˬhoˉvaˬ hkʼaˬ hkʼe hkʼawꞈ laˇ ve maˇ maw maˇ maw kʼo, teˇ pawˆ kʼawꞈ dawˇ nyi sheˍ. Leh peuˬ hkʼawꞈ nawˉ kʼo, ngaˬ hui Yaˬhoˉvaˬ geh bon lawˬ ve hkʼaw awˬ bon uiˍ jaˇ tehꞈ kʼoˆ piˇ sheˍ. (1 Hteˇsaˍlawˇniˆ 5:17, 18 gʼaw sheˍ.) Chi hkʼe dawˇ nyi sheˍ, shu ngaˬ hui htaꞈ awˬ bon uiˍ jaˇ tehꞈ kʼoˆ laˇ leh awˬ hpfuhˇ shiˍ ve tehꞈ kʼoˆ laˇ htaˇ ha lehˬ jaˇ ve maˇ heˆ laˇ? Chi hkʼa shuˍ shuˍ, Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ ve awˬ bon uiˍ jaˇ tehꞈ kʼoˆ piˇ ve maˇ leunˇ ve kʼo, ngaˬ hui kaꞈ Yaˬhoˉvaˬ htaꞈ ha lehˬ tuˬ te piˇ chehˇ ve yoˬ. (Kawˇlawˇsehˇ 3:15) Ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ cawˇ ve a yeˇ uiˍ jaˇ ve awˬ nu ve teˇ hkʼaˇ cawˬ sheˍ ve yoˬ. Chi ve lehˬ aˬ htoꞈ ma ve le?
YAˬHOˉVAˬ HAꞈ JAˇ VE YAˇ PAˍ PEU LAˇ VE AWˬ BON UIˍ JAˇ
10. 1 Peˍtruˆ liꞈ 2:21 hkʼaw kʼoˆ taˍ ve hkʼe, Yaˬhoˉvaˬ lehˬ Yeˍsuˆ htaꞈ miˬ guiˬ hkʼoˆ lo peu laˇ ve aˬ htoꞈ ma te ngaˬ hui awˬ bon uiˍ jaˇ tehꞈ kʼoˆ piˇ cawˇ ve le?
10 1 Peˍtruˆ liꞈ 2:21 gʼaw sheˍ. Yaˬhoˉvaˬ ngaˬ hui htaꞈ maˍ laˇ tuˬ awˬ pon Yeˍsuˆ htaꞈ miˬ guiˬ hkʼoˆ lo peu laˇ ve awˬ bon uiˍ jaˇ tehꞈ kʼoˆ piˇ cawˇ ve yoˬ. Yeˍsuˆ ve a shaꞈ teꞈ hkʼaˇ htaꞈ caˉ daꞈ ve ngaˬ hui gʼa henˇ htaˇ, ngaˬ hui Yaˬhoˉvaˬ htaꞈ haꞈ maˇ la leh Yaˬhoˉvaˬ ngaˬ hui htaꞈ haꞈ laˇ tuˬ hkʼaˬ hkʼe gʼa te cawˇ ve kaꞈ gʼa shiˍ ve yoˬ. Leh Yeˍsuˆ htaiˍ hkʼawꞈ laˇ ve htaꞈ ngaˬ hui yonˍ ve tehꞈ hpeuꞈ maw piˇ htaˇ, ngaˬ hui Yaˬhoˉvaˬ geh gʼaˇ hteꞈ kʼawꞈ meuˆ daꞈ ve yoˬ.—Roˉmaꞈ 5:1.
11. Aˬ htoꞈ ma te ngaˬ hui Yeˍsuˆ ve awˬ meh htaꞈ cuˇ leh bon lawˬ cawˇ ve le?
11 Yeˍsuˆ lehˬ ngaˬ hui Yaˬhoˉvaˬ geh bon lawˬ gʼa tuˬ awˬ hkʼaˇ te maˍ laˇ ve pa taw, ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Ngaˬ hui Yeˍsuˆ ve awˬ meh htaꞈ cuˇ leh bon lawˬ ve kʼo, ngaˬ hui ve bon lawˬ hkawˇ htaꞈ Yaˬhoˉvaˬ na leh hkʼawꞈ laˇ tuˬ yoˬ. Ngaˬ hui lawˬ ve hkʼe, Yaˬhoˉvaˬ lehˬ Yeˍsuˆ htaꞈ cuˇ leh te tcuh ve yoˬ. Awˬ lawn chi htaꞈ Yeˍsuˆ kʼoˆ maˍ laˇ ve, “Awˬ pa lehˬ Yaˇ hpu htaꞈ pa taw awˬ meꞈ awˬ hponˇ gʼa tuˬ, ngaˬ ve awˬ meh awˬ hkʼaw lo nawˬ hui hkʼa lawˬ ve teˇ hpaˍ htaꞈ ngaˬ te tuˬ yoˬ.”—Yoˇhanˬ 14:13, 14.
12. Yaˬhoˉvaˬ ve Yaˇ paˍ htaꞈ pa taw, ngaˬ hui yawˇ htaꞈ awˬ bon uiˍ jaˇ tehꞈ kʼoˆ piˇ cawˇ ve awˬ nu ve teˇ hkʼaˇ lehˬ aˬ htoꞈ ma le?
12 Yeˍsuˆ htaiˍ hkʼawꞈ laˇ ve htaꞈ pa taw, Yaˬhoˉvaˬ ngaˬ hui htaꞈ venˇ baˆ hpehˇ laˇ ve yoˬ. Liꞈ hpu hkʼaw Yeˍsuˆ lehˬ “Paw hkuˇ lonˉ teˇ gʼaˇ ngaˬ hui cawˬ ve yoˬ. Yawˇ lehˬ, mvuhˇ naw ma lo chehˇ ve kanˇ paˆ uiˍ shehˍ hpaˇ ve kʼaw jaw laꞈ sha paˇ lo mui taˍ” ve yoˬ. (Heˍbrehˇ 8:1) Leh Yeˍsuˆ htaꞈ kʼawꞈ kʼoˆ sheˍ ve, “ga laˇ shehˍ hpaˇ teˇ gʼaˇ lehˬ Awˬ pa geh chehˇ taˍ ve yoˬ.” (1 Yoˇhanˬ 2:1) Ngaˬ hui gʼaˇ nuˇ kuiˬ htaꞈ ha kʼaˉ puiˉ jaˇ ve Paw hkuˇ lonˉ teˇ gʼaˇ Yaˬhoˉvaˬ ngaˬ hui htaꞈ peꞈ laˇ ve pa taw, yawˇ htaꞈ awˬ bon uiˍ jaˇ tehꞈ kʼoˆ piˇ gaˇ leh yawˇ lehˬ “ngaˬ hui awˬ pon lawˬ hkawˉ chehˇ ve” htaꞈ ngaˬ hui Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. (Roˉmaꞈ 8:34; Heˍbrehˇ 4:15) Ngaˬ hui lehˬ maˇ biˇ ve chaw hpehꞈ ve pa taw, Yeˍsuˆ htaiˍ hkʼawꞈ laˇ ve maˇ cawˬ ve kʼo, ngaˬ hui Yaˬhoˉvaˬ geh bon lawˬ maˇ gʼa taˬ. Yaˬhoˉvaˬ lehˬ ngaˬ hui htaꞈ daꞈ jaˇ ve laꞈ shawnˍ peꞈ laˇ ve htaꞈ awˬ bon uiˍ jaˇ tehꞈ kʼoˆ piˇ tuˬ, awˬ hkʼaˇ ca maˇ mawˬ ve tehꞈ nawˬ kaꞈ dawˇ ve yoˬ hehˉ. Chi ve lehˬ yawˇ haꞈ jaˇ ve Yaˇ paˍ teˇ gʼaˇ tiˉ hpehꞈ ve yoˬ.
NAWˬ VE AWˬ VIˉ AWˬ NYI AWˬ PON BON LAWˬ PIˇ VE
13. Yeˍsuˆ maˇ suh sheˍ teˇ haˉ htaˇ yawˇ awˬ laꞈ gʼawˇ htaꞈ haꞈ jaˇ ve tehꞈ hkʼaˬ hkʼe hpeuꞈ maw piˇ ve le?
13 Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, awˬ laꞈ gʼawˇ awˬ pon yawˇ bon lawˬ ve yoˬ. Yeˍsuˆ yawˇ ve Awˬ pa geh yawˇ hui htaꞈ ‘haiˬ ve awˬ ceuˬ ponˬ piˇ tuˬ bon lawˬ ve yoˬ.’ (Yoˇhanˬ 17:15) Oˇ ve teˇ hkui Yeˍsuˆ lehˬ tuꞈ jaˇ hkanˍ jaˇ ve htaꞈ gʼa hpuˇ˗a tehꞈ te chehˇ ve teˇ yanˇ, yawˇ ve awˬ laꞈ gʼawˇ htaꞈ dawˇ haˍ jaˇ ve yoˬ. Awˬ lawn kʼo, Yeˍsuˆ yawˇ hui htaꞈ haꞈ jaˇ ve yoˬ.
Ngaˬ hui awˬ viˉ awˬ nyi awˬ pon aˬ htoꞈ ma awˬ lawn bon lawˬ piˇ gʼa ve le? (Awˬ tawn 14-16 nyi sheˍ) *
14. Ngaˬ hui awˬ viˉ awˬ nyi htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa tuˬ le?
14 Ngaˬ hui a shu yawˇ awˬ pon ceh tiˉ maˇ gʼa dawˇ nyi tuˬ, Yeˍsuˆ htaꞈ henˇ yuˬ cawˇ ve yoˬ. Yaꞈ hkʼaˇ, awˬ viˉ awˬ nyi awˬ pon dawˇ nyi leh yawˇ hui htaꞈ hkʼaˬ htaˆ kaꞈ bon lawˬ piˇ cawˇ ve yoˬ. Ngaˬ hui chi hkʼe te ve kʼo, Yeˍsuˆ haꞈ daꞈ tehꞈ kʼoˆ laˇ ve tawˇ htaꞈ ngaˬ hui gʼaꞈ te chehˇ ve yoˬ. (Yoˇhanˬ 13:34) Awˬ viˉ awˬ nyi awˬ pon bon lawˬ piˇ ve lehˬ awˬ yanˇ shonˇ ve tehꞈ taˇ dawˇ. Yaꞈ hkʼaˇ, chi lehˬ yawˇ hui htaꞈ ga piˇ gʼa jaˇ. Awˬ lawn kʼo, Liꞈ hpu hkʼaw kʼoˆ ve, “hteˇ ve cawˇ ve chaw bon lawˬ ve lehˬ, kanˇ paˆ cawˬ jaˇ ve yoˬ.”—Yaˍkoˆ 5:16.
15. Aˬ htoꞈ ma te ngaˬ hui awˬ viˉ awˬ nyi awˬ pon bon lawˬ piˇ cawˇ ve le?
15 Awˬ viˉ awˬ nyi lehˬ shoꞈ shaꞈ ve laiˉ ceuˬ gʼa hpuˇ ve pa taw, ngaˬ hui yawˇ hui awˬ pon bon lawˬ laˇ tcuh gaˇ ve yoˬ. Tawˇ pa haˉ te kʼo, awˬ viˉ awˬ nyi naˬ chehˇ ve, mvuhˇ yeˬ mvuhˇ haw hpawˇ gʼa hpuˇ chehˇ ve, maꞈ te daꞈ ve hkʼaw gʼa chehˇ taˍ ve, teˇ hpaˍ kʼo fawˉ mehˍ piˇ ve htaꞈ gʼa hpuˇ chehˇ ve, maˇ heˆ leh tuꞈ ve hkanˍ ve awˬ nu ve awˬ ceuˬ gʼa hpuˇ ve yoˬ hehˉ. Yawˇ hui yeunˇ hkanˍ gʼaˇ tuˬ ngaˬ hui Yaˬhoˉvaˬ geh bon lawˬ piˇ leh awˬ viˉ awˬ nyi oˇ ve teˇ hpaˍ htaꞈ ga piˇ ve chaw awˬ pon kaꞈ bon lawˬ piˇ gʼa ve yoˬ. Awˬ viˉ awˬ nyi teˇ hpaˍ hpaˍ chi hkʼe ve gʼa hpuˇ chehˇ ve htaꞈ nawˬ shiˍ ve kʼo, aˬ htoꞈ ma te nawˬ bon lawˬ htaˇ yawˇ hui ve awˬ meh htaꞈ kuˬ leh maˇ lawˬ ve le? Yawˇ hui yeunˇ hkanˍ gʼaˇ tuˬ awˬ pon nawˬ Yaˬhoˉvaˬ geh bon lawˬ piˇ ve kʼo, ngaˬ hui ve awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve yoˬ.
16. Aˬ htoꞈ ma te ngaˬ hui Hkriꞈ yaˇ awˬ moˍ hkʼaw sheh kʼai shehˍ hpaˇ awˬ pon bon lawˬ piˇ cawˇ ve le?
16 Hkriꞈ yaˇ awˬ moˍ hkʼaw sheh kʼai shehˍ hpaˇ awˬ pon ngaˬ hui bon lawˬ piˇ ve kʼo, yawˇ hui awˬ bon uiˍ jaˇ leh yawˇ hui htaꞈ ga laˇ gʼa jaˇ tehꞈ dawˇ ve yoˬ. Pawˇluꞈ kaꞈ chi hkʼe dawˇ ve yoˬ. Leh yawˇ kʼoˆ ve, “ha lehˬ ve bon hkawˇ htaꞈ caˉ daꞈ ve faˉ taˍ ve awˬ ceuˬ htaꞈ nyi ma haꞈ hanˉ ve awˬ hkʼaw lo ngaˬ hkʼa tawˍ lehˆ kʼaoˍ maˍ piˇ hpehꞈ tuˬ, ngaˬ awˬ pon htawˇ bon lawˬ˗oꞈ.” (Eˇfeˇsuꞈ 6:19) Chi beuꞈ teˇ co˗e Hkriꞈ yaˇ awˬ moˍ hkʼaw sheh kʼai shehˍ hpaˇ laiˉ gʼaˇ ngaˬ hui awˬ pon kanˉ te hkeuꞈ jaˇ ve yoˬ. Yaˬhoˉvaˬ yawˇ hui htaꞈ ga piˇ tuˬ ngaˬ hui bon lawˬ piˇ ve kʼo, yawˇ hui htaꞈ haꞈ ve tehꞈ hpeuꞈ maw piˇ ve yoˬ.
NGAˬ HUI SHU AWˬ TAN TE LTH BON LAWˬ PIˇ HTAˇ
17-18. Ngaˬ hui bon lawˬ tuˬ lawˬ laˇ ve hkʼaˬ hkʼe htaˇ le? Leh ngaˬ hui hkʼaˬ htaˆ kaꞈ aˬ htoꞈ ma htaꞈ tawnˇ taˍ cawˇ ve le?
17 Teˇ pawˆ pawˆ kʼo, ngaˬ hui bon lawˬ tuˬ awˬ nu ve chaw lawˬ laˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ geh Liꞈ hpu henˇ ve chaw geh maˍ piˇ htaˇ, teˇ geh kʼai ve awˬ viˉ awˬ nyi yaˇ miˇ htaꞈ bon lawˬ laˇ tuˬ lawˬ piˇ ve yoˬ hehˉ. Yaꞈ hkʼaˇ, yawˇ geh teˇ geh kʼai ve awˬ viˉ awˬ nyi yaˇ miˇ lehˬ Liꞈ hpu henˇ chehˇ ve chaw htaꞈ hkʼa dehꞈ maˇ shiˍ daꞈ ve pa taw, awˬ viˉ awˬ nyi yaˇ miˇ teˇ geh kʼai ve chaw Liꞈ hpu maˍ hpehˇ htaˇ bon lawˬ tcuh ve kʼo, daꞈ ve yoˬ. Awˬ lawn kʼo, yawˇ Liꞈ hpu henˇ ve chaw htaꞈ shiˍ daꞈ la˗oˬ ve pa taw yoˬ. Hkʼe te leh, Liꞈ hpu henˇ ve chaw awˬ pon bon hkʼaˬ hkʼe lawˬ piˇ tuˬ yawˇ shiˍ ve yoˬ.
18 Awˬ viˉ awˬ nyi hawˉ hkʼaˆ lehˬ, Hkriꞈ yaˇ awˬ moˍ hto toˇ˗e tuˬ awˬ pon hpawnˬ daꞈ htaˇ leh Hkriꞈ yaˇ awˬ moˍ hkʼaw hpawnˬ daꞈ htaˇ bon gʼa lawˬ cawˇ ve yoˬ. Awˬ viˉ awˬ nyi awˬ vuiˬ chi hkʼe gʼa ve chaw lehˬ, hpawnˬ daꞈ htaˇ aˬ htoꞈ ma ve awˬ vuiˬ gʼa te cawˇ ve awˬ hkʼaˇ htaꞈ yawˇ hui gʼa shiˍ cawˇ ve yoˬ. Chi hkʼe te htaˇ, beˆ maˍ piˇ tuˬ awˬ pon, maˇ heˆ leh shiˍ piˇ kaˇ piˇ tuˬ awˬ pon bon maˇ lawˬ. Hkriꞈ yaˇ awˬ moˍ hkʼaw hpawnˬ daꞈ ve awˉ lawˉ tanˬ htaˇ, kʼa muiˬ hkawˇ kʼa leh bon lawˬ ve awˬ pon awˬ yanˇ 5 miꞈ niꞈ ceh tiˉ yehˇ ve yoˬ. Chi htaꞈ pa taw, awˬ viˉ awˬ nyi hpawnˬ daꞈ ve tanˬ htaˇ bon chi maw maw maˇ lawˬ tuˬ shaˍ tiꞈ gʼa te cawˇ ve yoˬ.—Maꞈhtehˍ 6:7.
NAWˬ A SHAꞈ TEꞈ KUIˬ HKʼAW BON LAWˬ VE A YEˇ UIˍ JAˇ TEHꞈ SHAWˍ SHEˍ
19. Yaˬhoˉvaˬ suhˉ jehˬ ve awˬ nyi gaˬ la htaˇ ngaˬ hui gu hehnˇ taˍ gʼa tuˬ aˬ htoꞈ ma ga laˇ gʼa ve le?
19 Ngaˬ hui a shaꞈ teꞈ kuiˬ hkʼaw bon lawˬ ve lehˬ a yeˇ uiˍ jaˇ tehꞈ gʼa shawˍ cawˇ ve yoˬ. Awˬ lawn kʼo, Yaˬhoˉvaˬ ve suhˉ jehˬ tuˬ ve awˬ nyi gaˬ la chehˇ˗oˬ. Yeˍsuˆ kʼoˆ ve, ‘hpehꞈ la tuˬ ve awˬ ceuˬ oˇ ve hkʼa peu˗eˬ awˬ hkʼaw lo nawˬ hui gʼa ponˬ tuˬ hkʼaˬ htaˆ kaꞈ bon lawˬ leh shaw taˍ˗oꞈ.’ (Luˉkaꞈ 21:36) Ngaˬ hui hkʼaˬ htaˆ kaꞈ bon lawˬ chehˇ ve kʼo, ngaˬ hui yonˍ hkʼaˇ yonˍ yeˬ tuˬ ga laˇ ve yoˬ. Yaˬhoˉvaˬ ve suhˉ jehˬ ve awˬ nyi hkʼaˬ htaˆ gaˬ la ve htawˇ maˇ kʼoˆ, ngaˬ hui gu hehnˇ taˍ˗oˬ ve yoˬ.
20. Ngaˬ hui ve bon lawˬ hkawˇ sha hawnˉ hawnˉ jaˇ ve hkʼe hkʼaˬ hkʼe te hpehꞈ gʼa tuˬ le?
20 Ngaˬ hui Yaˬhoˉvaˬ geh bon lawˬ gʼa ve lehˬ daꞈ jaˇ ve awˬ vuiˬ hpehꞈ ve tehꞈ chi ve teˇ lawn hkʼaw ngaˬ hui gʼa henˇ˗oˬ. Ngaˬ hui ve bon lawˬ hkawˇ hkʼaw a yeˇ uiˍ jaˇ ve awˬ ceuˬ kʼoˆ gʼa ve lehˬ, Yaˬhoˉvaˬ loˍ ve awˬ ceuˬ htaꞈ caˉ daꞈ ve yoˬ. Yaˬhoˉvaˬ ve Yaˇ paˍ peu laˇ ve leh yawˇ ve mvuhˇ miˬ awˬ pon kaꞈ ngaˬ hui yawˇ htaꞈ awˬ bon uiˍ jaˇ tehꞈ kʼoˆ piˇ gʼa ve yoˬ. Leh awˬ nu ve awˬ viˉ awˬ nyi awˬ pon kaꞈ ngaˬ hui bon lawˬ piˇ gʼa ve yoˬ. Chi hkʼoˆ kaꞈ, ngaˬ hui a shaꞈ teꞈ kuiˬ hkʼaw teˇ nyi le le loˍ ve awˬ ceuˬ kaꞈ bon lawˬ gʼa leh ngaˬ hui ve yonˍ hkʼaˇ yonˍ yeˬ maˇ la tuˬ kaꞈ bon lawˬ gʼa ve yoˬ. Ngaˬ hui bon maˇ lawˬ sheˍ htaˇ, aˬ htoꞈ ma kʼoˆ tuˬ hkʼa dehꞈ dawˇ nyi ve kʼo, bon lawˬ ve lehˬ ngaˬ hui awˬ pon a yeˇ uiˍ jaˇ ve awˬ ceuˬ hpehꞈ ve tehꞈ hpeuꞈ maw piˇ ve yoˬ. Ngaˬ hui ve bon lawˬ hkawˇ sha hawnˉ hawnˉ jaˇ ve htaꞈ shuˍ leh ngaˬ hui ‘bon lawˬ ve htaꞈ Yaˬhoˉvaˬ nyi ma cawˇ ve yoˬ.’—Tawˇ naˉ ve 15:8.
KʼA MUIˬ HKAWˇ 45 Ngaˬ ve nyi ma hkʼaw cawˬ ve teˇ hpaˍ
^ Ngaˬ hui Yaˬhoˉvaˬ geh bon gʼa lawˬ ve htaꞈ awˬ hpfuhˇ shiˍ jaˇ. Ngaˬ hui ve bon lawˬ hkawˇ lehˬ Yaˬhoˉvaˬ dawˇ cawˇ ve sha hawnˉ hkʼa shuˍ hpehꞈ gaˇ ve yoˬ. Ngaˬ hui aˬ htoꞈ ma ve awˬ lawn bon lawˬ gʼa ve le? Ngaˬ hui shu awˬ tan te leh bon lawˬ htaˇ, hkʼaˬ hkʼe te cawˇ ve teˇ hpaˍ awˬ lawn chi ve hkʼaw teˇ geh henˇ tuˬ yoˬ.
^ AWˬ HAN HTAꞈ KʼOˆ MAˍ TAˍ VE: Yawˇ hui ve yaˇ liꞈ henˇ kuiˬ lo Yaˬhoˉvaˬ nyi haꞈ shaˉ piˇ tuˬ awˬ hpawˇ awˬ miˇ ma teˇ ca teˇ geh bon lawˬ ve. Awˬ pa naˬ chehˇ ve awˬ pon yawˇ hui bon lawˬ ve. Liꞈ hpu henˇ chehˇ ve chaw uiˍ la mvuh la chehˇ ve awˬ pon yawˇ hui bon lawˬ ve.
^ AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi yaˇ nehˬ lehˬ, Yeˍsuˆ htaiˍ hkʼawꞈ laˇ ve, daꞈ jaˇ ve miˬ guiˬ, awˬ bon cawˬ ve caˇ tuˬ, chi ve teˇ hpaˍ awˬ pon Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ ve.
^ AWˬ HAN HTAꞈ KʼOˆ MAˍ TAˍ VE: Yaˬhoˉvaˬ ve daꞈ kehˬ ve awˬ ha hpu Uˉ peunˍ ve Kawˍmiˍtiˍ htaꞈ ga piˇ tuˬ leh awˬ viˉ awˬ nyi mvuhˇ yeˬ mvuhˇ haw hpawˇ gʼa hpuˇ chehˇ ve leh fawˉ ve mehˍ ve gʼa hpuˇ chehˇ ve awˬ pon awˬ viˉ awˬ nyi yaˇ miˇ bon lawˬ ve.