1. Aˍdanˍ leh Eˇvaꞈ venˇ baˆ te peuˬ hkʼawꞈ nawˉ Yaˬhoˉvaˬ laꞈ haˉ aˬ htoꞈ ma te ve le? (Awˬ hkuiˉ puiˍ 3:15)

 Aˍdanˍ leh Eˇvaꞈ venˇ baˆ te peuˬ hkʼawꞈ nawˉ Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe, Yaˬhoˉvaˬ lehˬ yawˇ hui ve awˬ yaˇ awˬ duˬ htaꞈ dawˇ law kuiˬ piˇ ve yoˬ.—Gʼaw sheˍ.

2. Tcuh kaˍ paˍ ve tawˇ hkawˇ chi hkʼaˬ hkʼe te daꞈ jaˇ ve le?

² Tcuh kaˍ paˍ ve tawˇ hkawˇ chi lehˬ Awˬ hkuiˉ puiˍ ve Liꞈ hpu teˇ puꞈ hkʼaw cawˬ ve yoˬ. Yaꞈ hkʼaˇ, Liꞈ hpu hkʼaw ve teˇ puꞈ le le lehˬ tcuh kaˍ paˍ ve tawˇ hkawˇ teˇ hpawˇ maˇ heˆ kʼo, teˇ hpawˇ caˉ daꞈ taˍ ve yoˬ. Liꞈ kʼoˆ lehˬ teˇ kʼoˆ leh teˇ kʼoˆ yuˬ nehˉ daꞈ ve pa taw teˇ kʼoˆ tiˉ hpehꞈ tuˬ te piˇ leh Awˬ hkuiˉ puiˍ liꞈ 3:15 kaꞈ Liꞈ hpu hkʼaw ve teˇ tawn hpehꞈ leh Liꞈ hpu hkʼaw ve awˬ lawn awˬ tanˇ teˇ lawn leh teˇ lawn caˉ daꞈ taˍ ve yoˬ. Liꞈ hpu teˇ kʼoˆ leh teˇ kʼoˆ yuˬ nehˉ daꞈ taˍ ve lehˬ Saˍtanˍ leh Saˍtanˍ hpawˇ chehˇ ve chaw htaꞈ te luˬ tuˬ Gʼuiˬ sha Yeˍsuˆ htaꞈ peu laˇ ve yoˬ. * Chi lehˬ Yaˬhoˉvaˬ htaꞈ haꞈ ve chaw ha lehˬ jaˇ tuˬ te piˇ ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Awˬ lawn chi ve hkʼaw ngaˬ hui Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ htaꞈ caˉ daꞈ ve teˇ geh henˇ tuˬ yoˬ. Chi ve teˇ tawn a shu htaꞈ kʼoˆ gaˇ ve le? Tcuh kaˍ paˍ ve tawˇ hkawˇ chi awˬ tehˬ hkʼaˬ hkʼe hpehꞈ la ve le? Leh awˬ lawn chi htaꞈ shiˍ ve awˬ bon hkʼaˬ hkʼe cawˬ ve le? Chi ve teˇ hpaˍ teˇ geh henˇ tuˬ yoˬ.

4. “Vuiˬ” a shu htaꞈ kʼoˆ gaˇ ve le? Leh ngaˬ hui hkʼaˬ hkʼe te shiˍ gʼa ve le?

⁴ “Vuiˬ” leh ‘vuiˬ ve awˬ yaˇ awˬ duˬ’ “yaˇ miˇ,” leh yaˇ miˇ ve awˬ yaˇ awˬ duˬ Awˬ hkuiˉ puiˍ liꞈ 3:14, 15 hkʼaw kʼoˆ taˍ ve yoˬ. Liꞈ hpu hkʼaw chi ve teˇ lawn leh teˇ lawn ngaˬ hui na gʼa tuˬ ga laˇ ve yoˬ. * Vuiˬ a shu htaꞈ kʼoˆ gaˇ ve teˇ geh nyi sheˍ. Chi lehˬ awˬ tehˬ awˬ na vuiˬ htaꞈ kʼoˆ gaˇ ve maˇ heˆ. Awˬ lawn kʼo, vuiˬ lehˬ to nuˇ to shaˆ hpehꞈ leh  Eˍdenˍ hko hkʼaw Yaˬhoˉvaˬ Eˇvaꞈ htaꞈ kʼoˆ piˇ ve awˬ ceuˬ yawˇ maˇ na gʼa. Chi htaꞈ pa taw, chi ve lehˬ a shaꞈ teꞈ chehˇ ve cuˇ yiˍ cawˬ ve awˬ ceuˬ hpehꞈ ve yoˬ. Hkʼe kʼo, a shu htaꞈ kʼoˆ gaˇ ve le? Hpeuꞈ maˍ ve liꞈ 12:9 hkʼaw hkʼa tawˍ lehˆ kʼoˆ laˇ ve, “vuiˬ haiˬ” chi ve lehˬ Saˍtanˍ hpehꞈ ve yoˬ. Leh vuiˬ ve awˬ yaˇ awˬ duˬ a shu htaꞈ kʼoˆ gaˇ ve le?

5. Vuiˬ ve awˬ yaˇ awˬ duˬ a shu htaꞈ kʼoˆ gaˇ ve le?

⁵ Maˇ˗awˍ ve kʼo, yaˇ lehˬ awˬ pa hkʼa shuˍ dawˇ leh te ve yoˬ. Teˇ pawˆ pawˆ kʼo, Liꞈ hpu hkʼaw “awˬ yaˇ awˬ duˬ” tehꞈ kʼoˆ ve lehˬ yawˇ ve awˬ pa hkʼa shuˍ dawˇ leh te ve htaꞈ kʼoˆ gaˇ ve yoˬ. Chi htaꞈ pa taw, vuiˬ ve awˬ yaˇ awˬ duˬ lehˬ Yaˬhoˉvaˬ leh yawˇ ve chaw htaꞈ tawˍ ve chaw hui htaꞈ kʼoˆ gaˇ ve yoˬ. Noˉaꞈ ve awˬ co˗e htaˇ mvuhˇ naw ma tcuh yaˇ yawˇ hui ve awˬ vuiˬ htaꞈ baˬ taˉ leh miˬ guiˬ hkʼoˆ yaꞈ la leh, haiˬ ve chaw lehˬ yawˇ hui awˬ pa Saˍtanˍ hkʼa shuˍ te ve chi teˇ hpaˍ htaꞈ kʼoˆ gaˇ ve yoˬ.—Awˬ hkuiˉ puiˍ 6:1, 2; Yoˇhanˬ 8:44; 1 Yoˇhanˬ 5:19; Yuˇdaꞈ 6.

6. Aˬ htoꞈ ma te “yaˇ miˇ” lehˬ Eˇvaꞈ maˇ hpehꞈ ve le?

⁶ Chi teˇ hkui “yaˇ miˇ” a shu htaꞈ kʼoˆ gaˇ ve teˇ geh nyi sheˍ. Yaˇ miˇ chi ve lehˬ Eˇvaꞈ hpehꞈ ve maˇ heˆ. Aˬ htoꞈ ma pa taw le? Awˬ hkʼaˇ teˇ hkʼaˇ htaꞈ teˇ geh nyi sheˍ. Tcuh kaˍ paˍ ve tawˇ hkawˇ chi ve hkʼaw kʼoˆ ve yaˇ miˇ ve awˬ yaˇ awˬ duˬ ‘vuiˬ ve oˉ kʼoˍ htaꞈ dawˆ ve yoˬ.’ Ngaˬ hui gʼa henˇ˗oˬ ve hkʼa shuˍ, vuiˬ lehˬ Saˍtanˍ htaꞈ kʼoˆ gaˇ ve yoˬ. Eˇvaꞈ ve awˬ yaˇ awˬ duˬ maˇ biˇ ve chaw hpehꞈ ve pa taw Saˍtanˍ ve oˉ kʼoˍ htaꞈ dawˆ maˇ gʼa. Chi hkʼe hpehꞈ ve kʼo, yaˇ miˇ a shu htaꞈ kʼoˆ gaˇ ve le?

7. Hpeuꞈ maˍ ve liꞈ 12:1, 2, 5, 10 hkʼaw leh, Awˬ hkuiˉ puiˍ liꞈ 3:15 hkʼaw kʼoˆ taˍ ve yaˇ miˇ lehˬ a shu htaꞈ kʼoˆ gaˇ ve le?

⁷ Liꞈ hpu awˬ leh meuˇ teˇ puꞈ hkʼaw yaˇ miˇ lehˬ a shu hpehꞈ ve htaꞈ shiˍ tuˬ kʼoˆ laˇ taˍ ve yoˬ. (Hpeuꞈ maˍ ve 12:1, 2, 5, 10 gʼaw sheˍ.) Yaˇ miˇ chi ve teˇ gʼaˇ lehˬ a hkʼe leˇ ve chaw hpehꞈ ve maˇ heˆ. Awˬ lawn kʼo, yawˇ lehˬ ha pa htaꞈ naˆ taˍ leh, meuꞈ keu shiˍ teˇ chi nyiˇ shiˍ cawˬ ve shi uˉ tcuhˍ htaꞈ hkʼawˆ taˍ ve yoˬ. Yawˇ daꞈ jaˇ ve yaˇ paw ve lehˬ Gʼuiˬ sha ve mvuhˇ miˬ hpehꞈ ve yoˬ. Mvuhˇ miˬ chi  lehˬ mvuhˇ naw ma hkʼoˆ cawˬ leh yawˇ mvuhˇ naw ma hkʼoˆ chehˇ ve yoˬ. Chi htaꞈ pa taw, yaˇ miˇ chi ve lehˬ mvuhˇ naw ma hkʼoˆ Gʼuiˬ sha ve kanˉ hkʼaˇ mvuhˇ naw ma tcuh yaˇ Gʼuiˬ sha htaꞈ ka tiꞈ yeˬ ve htaꞈ kʼoˆ gaˇ ve yoˬ.—Gaˍlaˍtiˆ 4:26.

8. Yaˇ miˇ ve awˬ yaˇ awˬ duˬ a yeˇ uiˍ jaˇ ve a shu htaꞈ kʼoˆ gaˇ ve le? Leh yawˇ awˬ yaˇ awˬ duˬ a yeˇ uiˍ jaˇ ve hpehꞈ la ve hkʼaˬ ve teˇ yanˇ le? (Awˬ hkuiˉ puiˍ 22:15-18)

⁸ Yaˇ miˇ ve awˬ yaˇ awˬ duˬ a yeˇ uiˍ jaˇ ve a shu hpehꞈ ve htaꞈ ngaˬ hui shiˍ tuˬ Liꞈ hpu hkʼaw ga laˇ ve yoˬ. Awˬ yaˇ awˬ duˬ chi ve lehˬ Aˍbraˍhanˍ ve awˬ ceuˬ awˬ hkʼaˇ hpehꞈ ve yoˬ. (Awˬ hkuiˉ puiˍ 22:15-18 gʼaw sheˍ.) Leh Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe, awˬ tehˬ awˬ na hpehꞈ la ve yoˬ. Yeˍsuˆ lehˬ Gʼuiˬ sha ve kanˉ ka tiꞈ yeˬ ve hkʼaw te ve Aˍbraˍhanˍ ve awˬ yaˇ awˬ duˬ hpehꞈ ve yoˬ. (Luˉkaꞈ 3:23, 34) Awˬ lawn kʼo, yawˇ lehˬ Saˍtanˍ ve oˉ kʼoˍ htaꞈ gʼa dawˆ tuˬ ve pa taw, awˬ yaˇ awˬ duˬ a yeˇ uiˍ ve chi teˇ gʼaˇ lehˬ a hkʼe leˇ ve chaw hpehꞈ ve maˇ heˆ. Chi htaꞈ pa taw, Yeˍsuˆ aˬ laˬ hkʼe 30 hkʼawꞈ htaˇ yawˇ htaꞈ daꞈ kehˬ ve awˬ ha hpu leuˆ yuˬ piˇ ve yoˬ. Yawˇ htaꞈ leuˆ yuˬ piˇ htaˇ, yawˇ lehˬ yaˇ miˇ ve awˬ yaˇ awˬ duˬ a yeˇ uiˍ jaˇ ve hpehꞈ la ve yoˬ. (Gaˍlaˍtiˆ 3:16) Yeˍsuˆ kʼawꞈ teꞈ tu la peuˬ hkʼawꞈ nawˉ Gʼuiˬ sha lehˬ Yeˍsuˆ htaꞈ “daꞈ ve awˬ meh leh awˬ meꞈ awˬ hponˇ” piˇ leh “mvuhˇ naw ma hkʼoˆ leh miˬ guiˬ hkʼoˆ ve kanˇ paˆ hkʼa peu˗eˬ ngaˬ htaꞈ peꞈ laˇ peuˬ.” Leh Gʼuiˬ sha lehˬ Yeˍsuˆ htaꞈ ‘Saˍtanˍ ve kanˉ teˇ hpaˍ htaꞈ te luˬ tuˬ’ kanˇ paˆ kaꞈ piˇ ve yoˬ.—Heˍbrehˇ 2:7; Maꞈhtehˍ 28:18; 1 Yoˇhanˬ 3:8.

9-10. (a) Awˬ yaˇ awˬ duˬ Yeˍsuˆ peuˬ kʼo, a shu le? Leh yawˇ hui yaˇ miˇ ve awˬ yaˇ awˬ duˬ hpehꞈ la ve hkʼaˬ hkʼe htaˇ le? (b) Ngaˬ hui aˬ htoꞈ ma htaꞈ kʼawꞈ henˇ tuˬ le?

⁹ Yaꞈ hkʼaˇ, Yeˍsuˆ peuˬ kʼo, awˬ yaˇ awˬ duˬ a yeˇ uiˍ ve kaꞈ cawˬ sheˍ ve yoˬ. Yawˇ hui a shu hpehꞈ ve ngaˬ hui shiˍ tuˬ tcuh yaˇ Pawˇluꞈ kʼoˆ maˍ laˇ ve yoˬ. Pawˇluꞈ Yuˇdaꞈ chaw leh leuˆ yuˬ taˍ ve buiˇ shaˆ aˉ naˆ chaw htaꞈ kʼoˆ piˇ ve, “nawˬ hui lehˬ Hkriꞈ ve chaw hpehꞈ ve kʼo, nawˬ hui Aˍbraˍhanˍ ve awˬ ceuˬ awˬ hkʼaˇ hpehꞈ leh, ka tiꞈ shaˉ caˆ cawˬ taˍ ve hkʼe, awˬ shinˉ caˇ shehˍ hpaˇ htawˇ hpehꞈ ve yoˬ.” (Gaˍlaˍtiˆ 3:28, 29) Yaˬhoˉvaˬ lehˬ Hkriꞈ yaˇ htaꞈ daꞈ kehˬ ve awˬ ha hpu leuˆ yuˬ piˇ htaˇ, yawˇ yaˇ miˇ ve awˬ yaˇ awˬ duˬ teˇ gʼaˇ hpehꞈ la ve yoˬ. Chi htaꞈ pa taw, yaˇ miˇ ve awˬ yaˇ awˬ duˬ lehˬ Yeˍsuˆ leh yawˇ geh teˇ geh uˉ peunˍ ve 144,000 gʼaˇ htaꞈ kʼoˆ gaˇ ve yoˬ. (Hpeuꞈ maˍ ve 14:1) Yawˇ hui teˇ gʼaˇ le le Yaˬhoˉvaˬ hkʼe dawˇ leh te ve yoˬ.

¹⁰ Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ a shu htaꞈ kʼoˆ gaˇ ve chi teˇ hkui ngaˬ hui na gʼa˗oˬ. Yaˬhoˉvaˬ lehˬ tcuh kaˍ paˍ ve tawˇ hkawˇ chi awˬ tehˬ hkʼaˬ hkʼe hpehꞈ la tcuh ve leh awˬ lawn chi ve ngaˬ hui aˬ htoꞈ ma awˬ bon gʼa ve teˇ geh kʼawꞈ henˇ tuˬ yoˬ.

11. Yaˇ miˇ ve awˬ yaˇ awˬ duˬ ve hkui mehˍ cu htaꞈ htawˆ ve aˬ htoꞈ ma kʼoˆ gaˇ ve le?

¹¹ Awˬ hkuiˉ puiˍ liꞈ 3:15 hkʼaw kʼoˆ ve, vuiˬ lehˬ yaˇ miˇ ve awˬ yaˇ awˬ duˬ ve “hkui mehˍ cu” htaꞈ htawˆ tuˬ yoˬ. Saˍtanˍ lehˬ Yuˇdaꞈ chaw leh Roˉmaꞈ chaw htaꞈ cuˇ leh Yeˍsuˆ htaꞈ tiˇ pehˍ piˇ tcuh htaˇ, tcuh kaˍ paˍ ve tawˇ hkawˇ chi awˬ tehˬ hpehꞈ la ve yoˬ. (Luˉkaꞈ 23:13, 20-24) Ngaˬ hui hkui mehˍ cu naˬ htaˇ, teˇ tcuhˉ teˇ yanˇ yaꞈ kʼaw juˇ maˇ gʼa ve yoˬ hehˉ. Chi ve hkʼa shuˍ shuˍ, Yeˍsuˆ kaꞈ yawˇ suh leh haˉ kʼoˍ hkʼaw 3 nyi tuˍ taˍ piˇ htaˇ teꞈ chiˉ te maˇ gʼa.—Maꞈhtehˍ 16:21.

12. Vuiˬ ve oˉ kʼoˍ htaꞈ hkʼaˬ hkʼe te dawˆ tuˬ ve le? Leh hkʼaˬ htaˆ le?

¹² Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ awˬ tehˬ hpehꞈ la htaˇ, Yeˍsuˆ lehˬ hkʼaˬ htaˆ kaꞈ suh˗e tuˬ ve maˇ heˆ. Aˬ htoꞈ ma pa taw le? Awˬ lawn kʼo, tcuh kaˍ paˍ ve tawˇ hkawˇ chi ve hkʼaw kʼoˆ taˍ ve, awˬ yaˇ awˬ duˬ a yeˇ uiˍ jaˇ ve lehˬ Saˍtanˍ ve oˉ kʼoˍ htaꞈ dawˆ tuˬ yoˬ. Chi ve lehˬ Yeˍsuˆ gʼa kʼawꞈ teꞈ tu la ve htaꞈ kʼoˆ gaˇ ve yoˬ. Leh awˬ tehˬ awˬ na chi hkʼe hpehꞈ ve yoˬ. Yeˍsuˆ suh˗e ve 3 nyi teˇ nyi gaˬ leh kʼawꞈ teꞈ tu la ve, Gʼuiˬ sha lehˬ Yeˍsuˆ htaꞈ maˇ suh puiˉ ve mvuhˇ naw ma hkʼoˆ lo chehˇ tuˬ a shaꞈ kʼawꞈ piˇ ve yoˬ. Awˬ yanˇ gaˬ la ve teˇ yanˇ, Gʼuiˬ sha lehˬ Yeˍsuˆ htaꞈ Saˍtanˍ ve oˉ kʼoˍ  htaꞈ dawˆ tcuh leh te luˬ piˇ tcuh tuˬ yoˬ. (Heˍbrehˇ 2:14) Chi hkʼoˆ kaꞈ, Yeˍsuˆ leh yawˇ geh teˇ geh uˉ peunˍ ve chaw miˬ guiˬ hkʼoˆ lo Gʼuiˬ sha ve canˇ paˍ hkʼa peu˗eˬ htaꞈ te luˬ piˇ tuˬ yoˬ. Chi ve lehˬ, vuiˬ ve awˬ yaˇ awˬ duˬ htaꞈ te luˬ tuˬ ve htaꞈ kʼoˆ gaˇ ve yoˬ.—Hpeuꞈ maˍ ve 17:14; 20:4, 10. *

13. Tcuh kaˍ paˍ ve tawˇ hkawˇ chi lehˬ chi beuꞈ teˇ co˗e ngaˬ hui awˬ pon awˬ bon hkʼaˬ hkʼe cawˬ ve le?

¹³ Nawˬ Yaˬhoˉvaˬ htaꞈ awˬ to chiˇ aꞈ leh yawˇ ve kanˉ te ve chaw hpehꞈ ve kʼo, nawˬ kaꞈ tcuh kaˍ paˍ ve tawˇ hkawˇ chi ve htaꞈ awˬ bon gʼa ve yoˬ. Yeˍsuˆ miˬ guiˬ hkʼoˆ lo chaw yaˇ hpehꞈ htaˇ, yawˇ Yaˬhoˉvaˬ hkʼa shuˍ te hkʼaˇ dawˇ hkʼaˇ cawˬ ve tehꞈ hpeuꞈ maw laˇ ve yoˬ. (Yoˇhanˬ 14:9) Yeˍsuˆ ve awˬ lawn ngaˬ hui Yaˬhoˉvaˬ htaꞈ shiˍ leh haꞈ tuˬ ga laˇ ve yoˬ. Leh chi beuꞈ teˇ co˗e yawˇ Hkriꞈ yaˇ awˬ moˍ htaꞈ beˆ maˍ piˇ ve kaꞈ ngaˬ hui awˬ bon gʼa sheˍ ve yoˬ. Gʼuiˬ sha nyi hkʼaˇ suh tuˬ ngaˬ hui hkʼaˬ hkʼe gʼa te cawˇ ve kaꞈ Yeˍsuˆ maˍ laˇ ve yoˬ. Yeˍsuˆ ve hkui mehˍ cu htaꞈ htawˆ ve lehˬ, yawˇ gʼa suh˗e leh ngaˬ hui teˇ gʼaˇ le le awˬ bon gʼa tuˬ ve htaꞈ kʼoˆ gaˇ ve yoˬ. Chi hkʼaˬ hkʼe te hpehꞈ kʼai gʼa ve le? Yeˍsuˆ suh˗e leh Yaˬhoˉvaˬ Yeˍsuˆ htaꞈ kʼawꞈ teꞈ tu la piˇ htaˇ, Yaˬhoˉvaˬ lehˬ Yeˍsuˆ ve tuˉ tanˇ tuˬ biˇ jaˇ ve htaꞈ haꞈ yuˬ ve yoˬ. Gʼuiˬ sha lehˬ tuˉ tanˇ tuˬ chi htaꞈ yehˇ leh “ngaˬ hui ve venˇ baˆ teˇ ceuˬ le le htaꞈ tsuhˇ baˬ laˇ chehˇ ve yoˬ.”—1 Yoˇhanˬ 1:7.

14. Tcuh kaˍ paˍ ve tawˇ hkawˇ Eˍdenˍ hko htaꞈ caˉ daꞈ ve Yaˬhoˉvaˬ kʼoˆ taˍ ve, oˇ ve teˇ yanˇ awˬ tehˬ maˇ hpehꞈ sheˍ ve tehꞈ ngaˬ hui hkʼaˬ hkʼe te shiˍ gʼa ve le?

¹⁴ Tcuh kaˍ paˍ ve tawˇ hkawˇ chi Eˍdenˍ hko htaꞈ caˉ daꞈ ve Yaˬhoˉvaˬ kʼoˆ taˍ ve, oˇ ve teˇ yanˇ awˬ tehˬ maˇ hpehꞈ la sheˍ ve tehꞈ ngaˬ hui shiˍ tuˬ te laˇ ve yoˬ. Tawˇ pa haˉ te kʼo, tcuh kaˍ paˍ ve tawˇ hkawˇ chi ve hkʼaw kʼoˆ ve ka tiꞈ te taˍ ve hkʼe, yaˇ miˇ lehˬ awˬ yaˇ awˬ duˬ gʼa cawˬ la tcuh ve yoˬ. Saˍtanˍ lehˬ yawˇ hpawˇ chehˇ tuˬ shaw hpoˆ leh chi ve nyiˇ moˍ canˇ paˍ hpehꞈ daꞈ tuˬ yoˬ. Chi ve hkʼa peu˗eˬ hpehꞈ tuˬ ve lehˬ awˬ yanˇ gʼa yehˇ ve yoˬ. Tcuh kaˍ paˍ ve tawˇ hkawˇ chi ngaˬ hui shiˍ ve awˬ bon gʼa ve yoˬ. Ngaˬ hui lehˬ miˬ guiˬ chi hkʼoˆ lo Saˍtanˍ uˉ peunˍ ve awˬ hawˉ lo chehˇ leh Gʼuiˬ sha ve kanˉ te ve chaw htaꞈ shu nyi bawˬ laˇ tuˬ yoˬ tehꞈ shaˍ tiꞈ peꞈ laˇ ve yoˬ. Peuˬ hkʼawꞈ nawˉ, awˬ lawn chi htaꞈ caˉ daꞈ ve Yeˍsuˆ yawˇ ve awˬ laꞈ gʼawˇ htaꞈ shaˍ tiꞈ piˇ ve yoˬ. (Maˍkuˆ 13:13; Yoˇhanˬ 17:14) 100 hkʼawꞈ peuˬ hkʼawꞈ nawˉ tcuh kaˍ paˍ ve tawˇ hkawˇ chi awˬ tehˬ hpehꞈ la ve tehꞈ ngaˬ hui gʼa shiˍ ve yoˬ. Chi awˬ tehˬ hkʼaˬ hkʼe hpehꞈ la ve teˇ geh kʼawꞈ nyi sheˍ.

15. Aˬ htoꞈ ma te miˬ guiˬ chi hkʼoˆ lo Saˍtanˍ ve chaw lehˬ Yaˬhoˉvaˬ ve chaw htaꞈ nyi bawˬ jaˇ ve le? Leh aˬ htoꞈ ma te ngaˬ hui Saˍtanˍ htaꞈ maˇ kawˆ cawˇ ve le?

¹⁵ 1914 hkʼawꞈ Yeˍsuˆ Jawˇ mawˇ te ve maˇ maw hkʼawꞈ nawˉ, Saˍtanˍ htaꞈ miˬ guiˬ hkʼoˆ lo gʼaꞈ ce leh awˬ leh meuˇ htaˇ te luˬ piˇ tuˬ yoˬ. (Hpeuꞈ maˍ ve 12:9, 12) Yaꞈ hkʼaˇ, yawˇ beuꞈ jaˇ ve pa taw, taꞈ iˉ maˇ chehˇ leh Yaˬhoˉvaˬ ve chaw htaꞈ coˇ caˇ leh te luˬ ve yoˬ. (Hpeuꞈ maˍ ve 12:13, 17) Chi ve htaꞈ pa taw, miˬ guiˬ chi hkʼoˆ lo Saˍtanˍ ve chaw lehˬ ngaˬ hui htaꞈ nyi bawˬ jaˇ ve yoˬ. Ngaˬ hui Saˍtanˍ leh yawˇ hpawˇ chehˇ ve chaw htaꞈ kaꞈ maˇ kawˆ. Ngaˬ hui Pawˇluꞈ hkʼa shuˍ yonˍ gʼa ve yoˬ. Yawˇ kʼoˆ ve, “Gʼuiˬ sha ngaˬ hui hpawˇ chehˇ ve kʼo, a shu ngaˬ hui htaꞈ tawˍ daꞈ hpehꞈ tuˬ le?” (Roˉmaꞈ 8:31) Awˬ lawn kʼo, Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ teˇ ceuˬ le le awˬ tehˬ hpehꞈ la˗oˬ ve htaꞈ ngaˬ hui gʼa mawˬ ve yoˬ.

16-18. Hkawn˗htiˆ, U˗shu˗laˆ, leh Ceh˗si˗kaˇ Awˬ hkuiˉ puiˍ liꞈ 3:15 hkʼaw na gʼa htaˇ aˬ htoꞈ ma awˬ bon gʼa ve le?

¹⁶ Ngaˬ hui shoꞈ shaꞈ ve leh tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, Awˬ hkuiˉ puiˍ liꞈ 3:15 hkʼaw Yaˬhoˉvaˬ ka tiꞈ te taˍ laˇ ve ngaˬ hui haꞈ yuˬ gʼa tuˬ ga laˇ ve yoˬ. Kan conˇ lo miˍshenˍnaˍ liˍ te ve Hkehn˗htiˇ kʼoˆ ve, “ngaˬ ve a shaꞈ teꞈ kuiˬ hkʼaw shoꞈ shaꞈ ve leh nyi ma luˬ ve laiˉ ceuˬ gʼa hpuˇ ve yoˬ. Teˇ pawˆ pawˆ kʼo, ngaˬ Yaˬhoˉvaˬ htaꞈ ka tiꞈ yeˬ tuˬ maˇ sha tehꞈ dawˇ ve yoˬ. Yaꞈ hkʼaˇ, Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ htaꞈ ngaˬ gʼaw leh dawˇ nyi htaˇ, Yaˬhoˉvaˬ htaꞈ caˉ  leh gʼaˇ va gʼa ve yoˬ.” Yaˬhoˉvaˬ lehˬ shoꞈ shaꞈ ve awˬ lawn leh tuꞈ ve hkanˍ ve maˇ cawˬ tcuh laˇ tuˬ ve awˬ nyi htaꞈ Hkehn˗htiˇ law chehˇ ve yoˬ.

¹⁷ Jaˬmaˬniˬ mvuhˇ miˬ Ba˗va˗ri˗a venˇ lo chehˇ ve U˗shu˗laˆ kʼoˆ ve, Awˬ hkuiˉ puiˍ liꞈ 3:15 hkʼaw na gʼa ve lehˬ Liꞈ hpu Yaˬhoˉvaˬ dawˇ pawnˍ piˇ leh bvuhꞈ tcuh taˍ ve tehꞈ yawˇ yonˍ tuˬ te piˇ ve yoˬ. Tcuh kaˍ paˍ ve tawˇ hkawˇ chi ve htaꞈ caˉ daꞈ ve, Liꞈ hpu hkʼaw ve tcuh kaˍ paˍ ve tawˇ hkawˇ hkʼa peu˗eˬ htaꞈ yawˇ gʼa shiˍ ve ha lehˬ jaˇ. U˗shu˗laˆ kʼoˆ ve, “Eˍdenˍ hko hkʼaw shoꞈ shaꞈ ve awˬ lawn cawˬ htaˇ Yaˬhoˉvaˬ lehˬ chaw yaˇ htaꞈ dawˇ law kuiˬ maˇ cawˬ tuˬ hpehˇ baˬ laˇ taˍ ve maˇ heˆ. Yawˇ laꞈ haˉ gu ve yoˬ. Awˬ lawn chi ngaˬ shiˍ htaˇ ngaˬ Yaˬhoˉvaˬ htaꞈ gʼaˇ hteꞈ haꞈ maˇ la ve yoˬ.”

¹⁸ Mi˗kaˬro˗neˇsaˇ venˇ lo chehˇ ve Ceh˗si˗kaˇ kʼoˆ ve, “ngaˬ awˬ tehˬ ve awˉ lawˉ teˇ pawˆ gʼa shiˍ htaˇ ngaˬ hkʼaˬ hkʼe dawˇ ve htaꞈ tawnˇ gʼa sheˍ ve yoˬ. Awˬ hkuiˉ puiˍ liꞈ 3:15 hkʼaw tcuh kaˍ paˍ ve tawˇ hkawˇ awˬ tehˬ hpehꞈ˗oˬ ve tehꞈ ngaˬ na gʼa ve yoˬ. Chi teˇ hkui ngaˬ hui gʼa hpuˇ ve maˇ daꞈ ve awˬ ceuˬ chi lehˬ Yaˬhoˉvaˬ ngaˬ hui htaꞈ hpehꞈ tcuh gaˇ ve a shaꞈ teꞈ hkʼaˇ awˬ tehˬ ve hpehꞈ ve maˇ heˆ tehꞈ ngaˬ hui tawnˇ taˍ cawˇ ve yoˬ. Yaˬhoˉvaˬ ve kanˉ te ve lehˬ a shaꞈ teꞈ kuiˬ hkʼaw daꞈ jaˇ ve awˬ ceuˬ hpehꞈ leh chi teˇ hkui ngaˬ te gʼa ve tehꞈ tcuh kaˍ paˍ ve tawˇ hkawˇ chi ngaˬ yonˍ gʼa tuˬ ga laˇ ve yoˬ. Leh awˬ gʼuˇ suhˍ hpawˇ chi teˇ hkui aꞈ kehˉ a shaꞈ teꞈ kuiˬ hkʼaw daꞈ jaˇ tuˬ yoˬ tehꞈ yonˍ gʼa ve yoˬ.”

19. Tcuh kaˍ paˍ ve tawˇ hkawˇ chi awˬ leh meuˇ teˇ tawn lo ve awˬ tehˬ hpehꞈ la tuˬ yoˬ tehꞈ aˬ htoꞈ ma te ngaˬ hui yonˍ gʼa ve le?

¹⁹ Awˬ hkuiˉ puiˍ liꞈ 3:15 hkʼaw ve awˬ tehˬ hpehꞈ la chehˇ ve tehꞈ ngaˬ hui gʼa mawˬ ve yoˬ. Yaˇ miˇ ve awˬ yaˇ awˬ duˬ leh vuiˬ ve awˬ yaˇ awˬ duˬ a shu hpehꞈ ve tehꞈ ngaˬ hui gʼa shiˍ˗oˬ leh yaˇ miˇ ve awˬ yaˇ awˬ duˬ a yeˇ uiˍ jaˇ ve hkui mehˍ cu htaꞈ htawˆ piˇ ve ngaˬ hui gʼa shiˍ ve yoˬ. Chi lehˬ Yeˍsuˆ ve hkui mehˍ cu htaꞈ hkʼaˬ htaˆ kaꞈ htawˆ piˇ gʼa tuˬ ve maˇ heˆ. Leh chi teˇ hkui lehˬ Yeˍsuˆ Jawˇ mawˇ lonˉ hpehꞈ leh maˇ suh puiˉ˗o. Yeˍsuˆ peuˬ hkʼawꞈ nawˉ ve awˬ yaˇ awˬ duˬ a yeˇ uiˍ ve leuˆ yuˬ taˍ ve chaw kaꞈ biˇ la chehˇ˗oˬ. Tcuh kaˍ paˍ ve tawˇ hkawˇ chi awˉ lawˉ teˇ tawn hkʼaw ve awˬ tehˬ hpehꞈ la ve tehꞈ ngaˬ hui gʼa mawˬ˗oˬ ve yoˬ. Vuiˬ ve oˉ kʼoˍ htaꞈ dawˆ nehˆ tuˬ yoˬ tehꞈ tcuh kaˍ paˍ ve tawˇ hkawˇ chi awˬ leh meuˇ teˇ tawn lo ve awˬ tehˬ hpehꞈ la tuˬ yoˬ tehꞈ ngaˬ hui yonˍ gʼa ve yoˬ. Saˍtanˍ htaꞈ co co taiˍ taiˍ te luˬ piˇ htaˇ, Yaˬhoˉvaˬ ve kanˉ te ve chaw ha lehˬ jaˇ tuˬ yoˬ. Yaꞈ hkʼaˇ, oˇ ve teˇ nyi maˇ gaˬ sheˍ htaˇ, ngaˬ hui awˬ gʼaˇ maˇ nuˇ leh Yaˬhoˉvaˬ htaꞈ gʼaˇ va sheˍ. Maˇ maw ve awˬ yanˇ, yaˇ miˇ ve awˬ yaˇ awˬ duˬ htaꞈ pa taw “miˬ guiˬ chaw ceuˬ hkʼa peu˗eˬ” awˬ bon gʼa tuˬ yoˬ.—Awˬ hkuiˉ puiˍ 22:18.