Nawˬ hui teˇ gʼaˇ leh teˇ gʼaˇ haꞈ daꞈ leh dawˇ sha gawˬ lehˍ ve hkʼaw teˇ geh chehˇ tehꞈ Yeˍsuˆ maˍ piˇ ve yoˬ. Yaꞈ hkʼaˇ, teˇ pawˆ htaˇ Yeˍsuˆ tcuh yaˇ hui htaꞈ kʼoˆ piˇ ve, “miˬ guiˬ hkʼoˆ lo cawˇ daꞈ hui daꞈ te tuˬ awˬ pon ngaˬ laˬ ve tehꞈ taˇ dawˇ. Cawˇ daꞈ hui daꞈ te tuˬ awˬ pon ngaˬ laˬ ve maˇ heˆ. Aˉ htaw htaꞈ ngaˬ yuˬ laˬ ve yoˬ. Awˬ lawn kʼo, yaˇ paˍ leh yawˇ ve awˬ pa, yaˇ miˇ leh yawˇ ve awˬ e, awˬ hkuiˇ ma leh yawˇ ve awˬ pi, teˇ gʼaˇ leh teˇ gʼaˇ maˇ cawˇ maˇ hawˍ daꞈ tuˬ ngaˬ laˬ ve yoˬ.” (Maꞈhtehˍ 10:34, 35) Chi Yeˍsuˆ hkʼaˬ hkʼe kʼoˆ gaˇ ve le?

Yeˍsuˆ lehˬ yehˬ kʼa hkʼaw maˇ cawˇ maˇ hawˍ daꞈ ve maˇ cawˬ tcuh gaˇ. Yawˇ maˍ ve tawˇ hkawˇ htaꞈ pa taw yehˬ kʼa teˇ hpaˍ kʼo, yehˬ kʼa hkʼaw maˇ cawˇ maˇ hawˍ daꞈ tuˬ te piˇ la ve tehꞈ yawˇ shiˍ ve yoˬ. Yeˍsuˆ ve awˬ laꞈ gʼawˇ hpehꞈ leh Baˆtiˆsaˬ haꞈ yuˬ gaˇ ve chaw lehˬ, yehˬ kʼa hkʼaw ve chaw maˇ dawˇ cawˇ ve tehꞈ gʼa shiˍ cawˇ ve yoˬ. Leh awˬ hpawˇ, awˬ miˇ ma, maˇ heˆ leh yehˬ kʼa hkʼaw ve chaw yawˇ htaꞈ tawˍ piˇ ve yoˬ hehˉ. Chi hkʼe hpehꞈ ve kʼo yawˇ Yeˍsuˆ maˍ ve tawˇ hkawˇ htaꞈ gʼaꞈ te tuˬ maˇ sha.

Liꞈ hpu hkʼaw Hkriꞈ yaˇ htaꞈ kʼoˆ piˇ ve, “chaw hkʼa peu˗eˬ ve htaꞈ cawˇ daꞈ hui daꞈ te chehˇ˗oˆ.” (Roˉmaꞈ 12:18) Yaꞈ hkʼaˇ, Yeˍsuˆ maˍ ve tawˇ hkawˇ lehˬ teˇ yehˬ kʼa kʼa awˬ pon kʼo “aˉ htaw” hkʼe hpehꞈ ve yoˬ. Yehˬ kʼa chi ve teˇ hpaˍ hkʼaw ve chaw Yeˍsuˆ maˍ ve tawˇ hkawˇ htaꞈ gʼaꞈ te ve kʼo, awˬ nu ve chaw maˇ dawˇ cawˇ leh tawˍ piˇ ve yoˬ. Chi hkʼe hpehꞈ ve kʼo, maˇ dawˇ cawˇ leh tawˍ ve chaw lehˬ awˬ tehˬ ve htaꞈ henˇ ve chaw ve “canˇ paˍ” hpehꞈ ve yoˬ.—Maꞈhtehˍ 10:36.

Chi hkʼoˆ kaꞈ, teˇ pawˆ pawˆ kʼo Yeˍsuˆ ve awˬ laꞈ gʼawˇ kaꞈ teˇ yehˬ kʼa hkʼaw tiˉ chehˇ ve htawˇ bon liˇ maˇ shuˍ daꞈ ve pa taw, yehˬ kʼa hkʼaw ve chaw leh awˬ viˉ awˬ nyi dawˇ cawˇ tuˬ te piˇ tuˬ laˇ, maˇ heˆ leh Yaˬhoˉvaˬ leh Yeˍsuˆ dawˇ cawˇ tuˬ te piˇ tuˬ laˇ, gʼa leuˆ yuˬ cawˇ ve yoˬ. Tawˇ pa haˉ te kʼo, yawˇ ve awˬ viˉ awˬ nyi lehˬ maˇ heˆ heˆ ve bon htaꞈ caˉ daꞈ ve jehˇ ve awˬ nyi te tuˬ nyiˉ piˇ ve yoˬ. Yeˍsuˆ kʼoˆ ve, “ngaˬ htaꞈ haꞈ ve aꞈ kehˉ awˬ pa awˬ e htaꞈ haꞈ ve chaw teˇ gʼaˇ lehˬ, ngaˬ htaꞈ maˇ keunˍ.” (Maꞈhtehˍ 10:37) Yeˍsuˆ ve awˬ laꞈ gʼawˇ hpehꞈ gaˇ ve chaw lehˬ awˬ pa awˬ e htaꞈ hkʼa dehꞈ maˇ gʼa haꞈ ve tehꞈ Yeˍsuˆ kʼoˆ gaˇ ve maˇ heˆ. Yaꞈ hkʼaˇ, Yeˍsuˆ kʼoˆ gaˇ ve lehˬ yawˇ hui a shaꞈ teꞈ kuiˬ hkʼaw hkʼaˬ ve teˇ ceuˬ a yeˇ uiˍ jaˇ ve htaꞈ gʼa dawˇ cheˆ ve yoˬ. Yehˬ kʼa hkʼaw ve chaw leh awˬ viˉ awˬ nyi ngaˬ hui htaꞈ tawˍ laˇ ve htawˇ, ngaˬ hui yawˇ hui htaꞈ haꞈ chehˇ sheˍ. Yaꞈ hkʼaˇ, ngaˬ hui yawˇ hui aꞈ kehˉ Yaˬhoˉvaˬ htaꞈ haꞈ jaˇ.

Yehˬ kʼa hkʼaw ve chaw ngaˬ hui htaꞈ tawˍ laˇ htaˇ nyi ma luˬ jaˇ. Yaꞈ hkʼaˇ, ngaˬ hui Yeˍsuˆ ve tawˇ hkawˇ htaꞈ tawnˇ gʼa ve yoˬ. Yawˇ kʼoˆ ve, ‘a shu yawˇ ve a loˍ htaꞈ maˇ baˬ taˉ leh ngaˬ hkʼaˇ suh maˇ laˬ ve chaw teˇ gʼaˇ lehˬ ngaˬ htaꞈ maˇ keunˍ.’ (Maꞈhtehˍ 10:38) Yeˍsuˆ ve awˬ laꞈ gʼawˇ hpehꞈ ve chaw lehˬ yehˬ kʼa hkʼaw ve chaw tawˍ piˇ tuˬ yoˬ tehꞈ ngaˬ hui shiˍ ve yoˬ. Yaꞈ hkʼaˇ, ngaˬ hui ve te hkʼaˇ dawˇ hkʼaˇ daꞈ ve kʼo yehˬ kʼa hkʼaw ve chaw leh awˬ viˉ awˬ nyi lehˬ nyi ma pa leh awˬ tehˬ ve htaꞈ henˇ la tuˬ yoˬ tehꞈ ngaˬ hui dawˇ law ve yoˬ.—1 Peˍtruˆ 3:1, 2.