AWˬ LAWN 29
KʼA MUIˬ HKAWˇ 121 A shu yawˇ awˬ to htaꞈ gʼaˇ puiˉ cawˇ ve
Beˬ ve lawˇ ve awˬ hkʼaˇ suh maˇ gʼa kʼai tuˬ shaˍ tiꞈ te˗o
“Nawˬ hui beˬ ve lawˇ ve awˬ hkʼaˇ suh maˇ gʼa kʼai tuˬ bon lawˬ leh shaw taˍ˗oꞈ.”—MAꞈHTEHˍ 26:41.
A YEˇ UIˍ VE AWˬ LAWN
Ngaˬ hui venˇ baˆ maˇ te tuˬ a yeˇ uiˍ ve awˬ lawn htaꞈ na gʼa tuˬ gʼa laˇ leh, venˇ baˆ maˇ gʼa te tuˬ jaw kʼai tuˬ ve awˬ hkʼaˇ htaꞈ na gʼa tuˬ kaꞈ ga laˇ gʼa ve yoˬ.
1-2. (a) Yeˍsuˆ awˬ laꞈ gʼawˇ hui htaꞈ aˬ htoꞈ ma awˬ lawn shaˍ tiꞈ piˇ ve le? (b) Aˬ htoꞈ ma te awˬ laꞈ gʼawˇ hui Yeˍsuˆ htaꞈ baˬ taˉ ve le? (Awˬ han htaꞈ nyi sheˍ.)
“Ngaˬ hui te gaˇ ve nyi ma cawˬ htawˇ awˬ suhˍ awˬ shaˍ lehˬ, awˬ gʼaˇ nuˇ ve yoˬ.” (Maꞈhtehˍ 26:41) Tawˇ hkawˇ chi ve ngaˬ hui teˇ gʼaˇ le le maˇ biˇ ve chaw hpehꞈ leh te yaꞈ puiˉ ve tehꞈ Yeˍsuˆ na gʼa ve yoˬ. A shu yawˇ awˬ to htaꞈ gʼaˇ maˇ gʼa va jaˇ tuˬ, Yeˍsuˆ ve tawˇ hkawˇ chi ngaˬ hui htaꞈ shaˍ tiꞈ peꞈ laˇ ve yoˬ. Yeˍsuˆ maˇ suh sheˍ teˇ haˉ htaˇ, hkʼaˬ hkʼe hpehꞈ ve htawˇ yawˇ hui nawˬ htaꞈ maˇ baˬ taˉ tehꞈ Yeˍsuˆ ve awˬ laꞈ gʼawˇ hui yonˍ gʼa jaˇ ve hkʼaw kʼoˆ ve yoˬ. (Maꞈhtehˍ 26:35) Awˬ laꞈ gʼawˇ hui chi hkʼe dawˇ teh taˍ ve daꞈ jaˇ ve yoˬ. Yaꞈ hkʼaˇ, nyiˉ laˇ ve htaꞈ gʼa hpuˇ tuˬ ve yawˇ hui maˇ shiˍ. Yeˍsuˆ yawˇ hui htaꞈ kʼoˆ piˇ ve, “nawˬ hui beˬ ve lawˇ ve awˬ hkʼaˇ suh maˇ gʼa kʼai tuˬ bon lawˬ leh shaw taˍ˗oꞈ.”—Maꞈhtehˍ 26:41.
2 Yeˍsuˆ kʼoˆ piˇ ve hkʼa shuˍ, awˬ laꞈ gʼawˇ hui shaˍ tiꞈ hkʼa dehꞈ maˇ te chehˇ ve pa taw nyi ma luˬ jaˇ. Yeˍsuˆ htaꞈ shu ca hpeh la htaˇ yawˇ hui Yeˍsuˆ geh chehˇ ve laˇ? Maˇ heˆ leh yawˇ hui kawˆ jaˇ leh hpaw˗e ve laˇ? Awˬ lawn kʼo, yawˇ hui hkʼa dehꞈ maˇ shaw taˍ ve pa taw yoˬ. Chi awˬ gʼuˇ suhˍ htaˇ yawˇ hui Yeˍsuˆ htaꞈ maˇ chiˇ baˬ taˬ tehꞈ kʼoˆ ve htawˇ, yawˇ hui Yeˍsuˆ htaꞈ baˬ taˉ ve yoˬ.—Maꞈhtehˍ 26:56.
Beˬ ve lawˇ ve gʼa hpuˇ htaˇ, tawˍ daꞈ gʼaˇ tuˬ Yeˍsuˆ awˬ laꞈ gʼawˇ hui htaꞈ shaˍ tiꞈ te˗o tehꞈ kʼoˆ piˇ ve. Yaꞈ hkʼaˇ, peuˬ hkʼawꞈ nawˉ awˬ laꞈ gʼawˇ hui yawˇ htaꞈ baˬ taˉ ve (Awˬ tawn 1-2 nyi sheˍ)
3. (a) Hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ leh a shu yawˇ awˬ to htaꞈ gʼaˇ maˇ gʼa va jaˇ tuˬ, aˬ htoꞈ ma te shaˍ tiꞈ gʼa te cawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
3 Beˬ ve lawˇ ve teˇ ceuˬ le le htaꞈ ngaˬ hui tawˍ daꞈ gʼaˇ tuˬ yoˬ tehꞈ taˇ dawˇ. Yaˬhoˉvaˬ nyi ma luˬ tuˬ ngaˬ hui maˇ te piˇ taˬ tehꞈ dawˇ ve htawˇ, ngaˬ hui maˇ biˇ ve chaw hpehꞈ leh beˬ ve lawˇ ve htaꞈ te yaꞈ la ve yoˬ. (Roˉmaꞈ 5:12; 7:21-23) Ngaˬ hui maˇ dawˇ maˇ gaˇ ve hkʼaw te yaꞈ tuˬ beˬ laˇ lawˇ laˇ gʼa ve yoˬ hehˉ. Yaˬhoˉvaˬ leh Yeˍsuˆ htaꞈ ngaˬ hui ka tiꞈ yeˬ tuˬ beˬ ve lawˇ ve gʼa hpuˇ htaˇ, maˇ gʼa te yaꞈ tuˬ shaˍ tiꞈ te˗o tehꞈ Yeˍsuˆ beˆ maˍ laˇ ve tawˇ hkawˇ htaꞈ ngaˬ hui gʼa gʼaꞈ te cawˇ ve yoˬ. Ngaˬ hui chi hkʼe te gʼa tuˬ awˬ lawn chi ve hkʼaw ga laˇ gʼa ve yoˬ. Awˉ lawˉ htaˇ, ngaˬ hui aˬ htoꞈ ma ve awˬ lawn htaꞈ shaˍ tiꞈ gʼa te cawˇ ve le, peuˬ hkʼawꞈ nawˉ beˬ ve lawˇ ve gʼa hpuˇ htaˇ ngaˬ hui hkʼaˬ hkʼe te tuˬ le, leh awˬ leh meuˇ htaˇ, ngaˬ hui hkʼaˬ htaˆ kaꞈ hkʼaˬ hkʼe te shaˍ tiꞈ gʼa te cawˇ ve kaꞈ teˇ geh henˇ tuˬ yoˬ.
Aˬ HTOꞈ MA AWˬ LAWN HTAꞈ SHAˍ TIꞈ GʼA TE VE LE?
4-5. I ve awˬ ceuˬ hpehꞈ ve htawˇ aˬ htoꞈ ma te ngaˬ hui venˇ baˆ maˇ te cawˇ ve le?
4 Venˇ baˆ teˇ ceuˬ ceuˬ kʼo uiˍ jaˇ ve maˇ heˆ. Yaꞈ hkʼaˇ, chi ve ngaˬ hui Yaˬhoˉvaˬ geh meuˆ daꞈ ve htaꞈ te luˬ laˇ gʼa ve yoˬ. Leh venˇ baˆ uiˍ jaˇ ve htaꞈ kaꞈ te yaꞈ tuˬ te laˇ gʼa ve yoˬ.
5 Teˇ gʼaˇ le le venˇ baˆ te yaꞈ tuˬ beˬ laˇ gʼa ve yoˬ. Chi hkʼe hpehꞈ ve htawˇ, teˇ gʼaˇ leh teˇ gʼaˇ awˬ gʼaˇ nuˇ kuiˬ htaꞈ shaˍ tiꞈ gʼa te cawˇ ve yoˬ. Tawˇ pa haˉ te kʼo, venˇ baˆ uiˍ jaˇ ve htaꞈ te ve, maˇ daꞈ maˇ kehˬ ve awˬ ceuˬ htaꞈ te ve, maˇ heˆ leh miˬ guiˬ yaˇ hkʼe dawˇ ve yoˬ. Tawˇ pa haˉ te kʼo, teˇ gʼaˇ gʼaˇ kʼo haˉ chawˇ haˉ paˆ te yaꞈ tuˬ beˬ piˇ ve htaꞈ gʼa hpuˇ ve yoˬ. Leh teˇ gʼaˇ gʼaˇ kʼo, maˇ daꞈ maˇ kehˬ ve awˬ ceuˬ htaꞈ te tuˬ gʼa tawˍ daꞈ ve yoˬ. Tawˇ pa haˉ te kʼo, a shu yawˇ awˬ to yawˇ ga ve maˇ heˆ leh awˬ ku nyi ve awˬ han nyi ve yoˬ. Leh teˇ gʼaˇ gʼaˇ kʼo, chaw htaꞈ kawˆ ve gʼa tawˍ daꞈ ve, a shu yawˇ ve dawˇ hkʼaˇ htaꞈ tiˉ a yeˇ yuˬ ve, beuꞈ puiˉ jaˇ ve, maˇ heˆ leh awˬ nu ve awˬ lawn htaꞈ kaꞈ gʼa tawˍ daꞈ ve yoˬ. Chi ve Yaˍkoˆ kʼoˆ maˍ laˇ taˍ ve awˬ ceuˬ htaꞈ hawˍ daꞈ ve yoˬ. Choˬ kaˬ lo kʼoˆ ve, “hkʼaˬ ve chaw teˇ gʼaˇ maˇ kʼoˆ, a shu yawˇ sheˉ lai puiˉ ve nyi ma lehˬ, venˇ baˆ te tuˬ yawˇ htaꞈ heˍ yuˬ beˬ yuˬ chehˇ ve yoˬ.”—Yaˍkoˆ 1:14.
6. Ngaˬ hui aˬ htoꞈ ma awˬ lawn htaꞈ ka tiꞈ gʼa yeˬ cawˇ ve le?
6 Nawˬ beˬ ve lawˇ ve htaꞈ tawˍ daꞈ maˇ gʼaˇ tuˬ, awˬ gʼaˇ nuˇ kuiˬ aˬ htoꞈ ma cawˬ ve shiˍ˗aw laˇ? Ngaˬ hui a shu yawˇ awˬ to htaꞈ heˍ leh ngaˬ hui awˬ gʼaˇ nuˇ kuiˬ teꞈ chiˉ maˇ cawˬ tehꞈ dawˇ ve, maˇ heˆ leh ngaˬ hui yonˍ yeˬ ve tehꞈ dawˇ ve pa taw, maˇ te yaꞈ taˬ tehꞈ a shu yawˇ awˬ to htaꞈ heˍ ve awˬ bon maˇ cawˬ. (1 Yoˇhanˬ 1:8) Yawˇ shaˍ tiꞈ maˇ te ve kʼo Pawˇluꞈ kʼoˆ ve, ‘co ha hpawˇ awˬ gʼaˇ cawˬ ve chaw teˇ hpaˍ htawˇ’ beˬ ve lawˇ ve htaꞈ maˇ gʼaˇ la ve yoˬ. (Gaˍlaˍtiˆ 6:1) Ngaˬ hui a shu yawˇ awˬ to htaꞈ ka tiꞈ gʼa yeˬ leh awˬ gʼaˇ nuˇ kuiˬ aˬ htoꞈ ma cawˬ ve gʼa shiˍ cawˇ ve yoˬ.—2 Kawˇrenˍhtuˆ 13:5.
7. Ngaˬ hui aˬ htoꞈ ma awˬ lawn htaꞈ shaˍ tiꞈ hkʼa dehꞈ te cawˇ ve le? Tawˇ pa haˉ kʼoˆ maˍ laˇ sheˍ.
7 Ngaˬ hui awˬ gʼaˇ nuˇ kuiˬ aˬ htoꞈ ma cawˬ ve htaꞈ shiˍ ve kʼo, hkʼaˬ hkʼe te cawˇ ve le? Chi hkʼe ve htaꞈ ngaˬ hui gʼa tawˍ daꞈ gʼaˇ tcuh ve yoˬ. Tawˇ pa haˉ te kʼo, Liꞈ hpu ve awˬ co˗e htaˇ venˇ htaꞈ maˇ bawˆ yuˬ gʼa tuˬ venˇ taˍ meuꞈ hpeꞈ htaꞈ maꞈ yaˇ hkʼaˬ htaˆ kaꞈ gʼa shaw taˍ ve yoˬ. Chi ve hkʼa shuˍ shuˍ, ngaˬ hui ve gʼaˇ nuˇ kuiˬ aˬ htoꞈ ma cawˬ ve htaꞈ shiˍ ve kʼo, ngaˬ hui kaꞈ shaˍ tiꞈ gʼa te cawˇ ve yoˬ.—1 Kawˇrenˍhtuˆ 9:27.
NGAˬ HUI HKʼAˬ HKʼE TE SHAˍ TIꞈ TE GʼA TUˬ LE?
8-9. Tawˇ naˉ ve liꞈ kaˇ nanˉ uiˍ 7 hkʼaw kʼoˆ ve, yaˇ nehˬ venˇ baˆ uiˍ jaˇ ve htaꞈ yawˇ hkʼaˬ hkʼe te jaw kʼai gʼa tuˬ le? (Tawˇ naˉ ve 7:8, 9, 13, 14, 21)
8 Ngaˬ hui hkʼaˬ hkʼe te shaˍ tiꞈ te gʼa tuˬ le? Tawˇ naˉ ve liꞈ kaˇ nanˉ uiˍ 7 hkʼaw kʼoˆ taˍ ve, yaˇ nehˬ ve awˬ lawn ngaˬ hui htaꞈ aˬ htoꞈ ma maˍ laˇ gʼa ve kaꞈ teˇ geh henˇ tuˬ yoˬ. Yaˇ nehˬ chi ve teˇ gʼaˇ haiˬ jaˇ ve yaˇ miˇ geh pehꞈ ve tzuhˆ ve te ve yoˬ. Kaˇ nanˉ ehˉ 22 hkʼaw kʼoˆ ve, yawˇ yaˇ miˇ oˇ ve “hkʼaˇ suh gʼaꞈ kʼai” ve yoˬ. Yaꞈ hkʼaˇ, awˬ lawn chi ve hkʼaw yaˇ nehˬ chi ve teˇ gʼaˇ cuˇ yiˍ maˇ cawˬ ve hkʼaw laiˉ ceuˬ te leh venˇ baˆ te ve tehꞈ ngaˬ hui shiˍ tuˬ te laˇ ve yoˬ.
9 Yawˇ aˬ htoꞈ ma te ve le? Awˉ lawˉ teˇ ceuˬ lehˬ, mehˆ muiˉ naˆ la paˇ neˇ htaˇ, yawˇ “[pehꞈ ve tzuhˆ ve] yaˇ miˇ teˇ gʼaˇ chehˇ taˍ kuiˬ yehˬ paˇ lo hpanˍ kʼai chehˇ ve yoˬ.” Leh peuˬ hkʼawꞈ nawˉ yawˇ yaˇ miˇ ve yehˬ hkʼaw kʼai ve yoˬ. (Tawˇ naˉ ve 7:8, 9 gʼaw sheˍ.) Yawˇ yaˇ miˇ oˇ ve htaꞈ gʼa mawˬ htaˇ yawˇ maˇ hpaw˗e. Yaꞈ hkʼaˇ, yawˇ yaˇ miˇ htaꞈ boˆ nu tcuh leh yaˇ miˇ oˇ ve ca tuˉ tanˇ kʼawꞈ la ve kʼoˆ maˍ piˇ htaˇ, yawˇ hkʼa dehꞈ na taˍ ve yoˬ. Yaˇ miˇ oˇ ve teˇ gʼaˇ lehˬ yaˇ nehˬ chi ve teˇ gʼaˇ yawˇ htaꞈ daꞈ ve hpawˇ nyi tcuh gaˇ ve pa taw chi hkʼe kʼoˆ ve yoˬ. (Tawˇ naˉ ve 7:13, 14, 21 gʼaw sheˍ.) Maˇ te yaꞈ tuˬ yaˇ nehˬ chi ve teˇ gʼaˇ jaw kʼai ve kʼo, yawˇ beˬ ve lawˇ ve htaꞈ maˇ gʼa hpuˇ taˬ.
10. Tawˇ naˉ ve liꞈ kaˇ nanˉ uiˍ 7 hkʼaw kʼoˆ taˍ ve yaˇ nehˬ hkʼa shuˍ, ngaˬ hui kaꞈ hkʼaˬ hkʼe te yaꞈ la ve le?
10 Tawˇ pa haˉ chi ve Yaˬhoˉvaˬ ve Shaˉhkiˆhkanˍ ve chaw teˇ gʼaˇ le le kaꞈ gʼa hpuˇ la ve tehꞈ mawˬ tuˬ te laˇ ve yoˬ. Tawˇ pa haˉ te kʼo, Hkriꞈ yaˇ teˇ gʼaˇ venˇ baˆ uiˍ jaˇ ve htaꞈ te leh teˇ ceuˬ le le laꞈ haˉ hpehꞈ la leh maˇ dawˇ maˇ gaˇ ve hkʼaw hpehꞈ la vaiˇ jaˇ ve tehꞈ dawˇ ve yoˬ. Yaꞈ hkʼaˇ, yawˇ hkʼa dehꞈ dawˇ nyi sheˍ ve kʼo, maˇ te yaꞈ tuˬ yawˇ cuˇ yiˍ cawˬ ve hkʼaw laiˉ ceuˬ dawˇ cheˆ gʼa ve htaꞈ gʼa mawˬ ve yoˬ. Tawˇ pa haˉ te kʼo, yawˇ maˇ daꞈ ve chaw htaꞈ awˬ chawˇ te ve, maˇ daꞈ ve awˬ han nyi ve, Hkriꞈ yaˇ maˇ kʼai cawˇ kuiˬ awˬ ti lo yawˇ kʼai ve, maˇ heˆ leh in˗teu˗neꞈ hkʼaw kaꞈ nyi ve yoˬ. Teˇ pawˆ pawˆ yawˇ bon maˇ lawˬ ve, Liꞈ hpu maˇ gʼaw ve, maˇ hpawnˬ daꞈ˗e ve, maˇ heˆ leh maˇ hto toˇ˗e ve yoˬ. Tawˇ naˉ ve liꞈ hkʼaw kʼoˆ taˍ ve yaˇ nehˬ hkʼa shuˍ, yawˇ te ve awˬ ceuˬ laꞈ haˉ hpehꞈ la ve maˇ heˆ. Yaꞈ hkʼaˇ, laiˉ pawˆ yawˇ cuˇ yiˍ maˇ cawˬ ve hkʼaw dawˇ cheˆ ve htaꞈ hpehꞈ la ve yoˬ.
11. Maˇ gʼa te yaꞈ tuˬ ngaˬ hui aˬ htoꞈ ma htaꞈ shaˍ tiꞈ gʼa te cawˇ ve le?
11 Ngaˬ hui awˬ pon henˇ yuˬ tuˬ aˬ htoꞈ ma le? Ngaˬ hui maˇ te yaꞈ tuˬ htaꞈ ceh shaˍ tiꞈ gʼa te cawˇ ve maˇ heˆ. Yaꞈ hkʼaˇ, te yaꞈ tuˬ te laˇ ve awˬ ceuˬ teˇ hpaˍ htaꞈ kaꞈ ngaˬ hui shaˍ tiꞈ gʼa te cawˇ ve yoˬ. Yaˇ nehˬ oˇ ve teˇ gʼaˇ htaꞈ hpehꞈ la ve awˬ ceuˬ Sawˉlaꞈmonˍ kʼoˆ peuˬ hkʼawꞈ nawˉ, yawˇ awˬ lawn chi htaꞈ kʼawꞈ kʼoˆ ve, “yawˇ hkʼaˇ suh taˇ kʼai.” (Tawˇ naˉ ve 7:25) Leh yawˇ kʼawꞈ kʼoˆ sheˍ ve, “oˇ hkʼe ve yaˇ miˇ htaꞈ jaw kʼai˗o. Yawˇ ve yehˬ miˉ paˇ lo kaꞈ taˇ kʼai.” (Tawˇ naˉ ve 5:3, 8) Chi htaꞈ pa taw, te yaꞈ tuˬ beˬ laˇ ve awˬ ceuˬ paˇ lo ngaˬ hui maˇ kʼai ve kʼo, maˇ te yaꞈ taˬ. a Oˇ kaˬ lo Hkriꞈ yaˇ kʼai gʼa ve, teꞈ chiˉ maˇ te yaꞈ taˬ tehꞈ kaꞈ maˇ dawˇ nyi cawˇ ve yoˬ. Yaꞈ hkʼaˇ, chi ve teˇ hpaˍ ngaˬ hui te yaꞈ tuˬ beˬ laˇ ve tehꞈ dawˇ ve kʼo, maˇ kʼai cawˇ.—Maꞈhtehˍ 5:29, 30.
12. Yawˇbaˆ aˬ htoꞈ ma te tuˬ dawˇ teh taˍ ve le? Leh chi ve yawˇ beˬ ve lawˇ ve htaꞈ tawˍ daꞈ gʼaˇ tuˬ hkʼaˬ hkʼe ga piˇ ve le? (Yawˇbaˆ 31:1)
12 Te yaꞈ tuˬ te laˇ ve awˬ ceuˬ htaꞈ jaw kʼai tuˬ gʼa coˇ caˇ ve yoˬ. Chi hkʼe ve Yawˇbaˆ kaꞈ coˇ caˇ ve yoˬ. Yaˇ miˇ haˉ htaꞈ pehꞈ ve tzuhˆ ve nyi ma hkʼaw ngaˬ teˇ pawˆ kaꞈ maˇ kʼawꞈ nyi tuˬ, “ngaˬ [awˬ to htaꞈ] ka tiꞈ te taˍ peuˬ ve yoˬ.” (Yawˇbaˆ 31:1 gʼaw sheˍ.) Yawˇ chi ve teˇ hpaˍ htaꞈ maˇ te tuˬ dawˇ teh taˍ ve lehˬ, yawˇ haˉ chawˇ haˉ paˆ maˇ gʼa te yaꞈ tuˬ te piˇ ve yoˬ. Beˬ ve lawˇ ve teˇ ceuˬ le le htaꞈ ngaˬ hui maˇ tawˍ daꞈ gʼaˇ tuˬ te laˇ ve awˬ ceuˬ htaꞈ ngaˬ hui maˇ te tuˬ, dawˇ teh taˍ cawˇ ve yoˬ.
13. Aˬ htoꞈ ma te ngaˬ hui ve dawˇ hkʼaˇ htaꞈ shaˍ tiꞈ gʼa te cawˇ ve le? (Awˬ han htaꞈ nyi sheˍ.)
13 Chi hkʼoˆ kaꞈ, ngaˬ hui ve dawˇ hkʼaˇ htaꞈ kaꞈ shaˍ tiꞈ gʼa te ve yoˬ. (Tawˆ kʼai ve 20:17) Ngaˬ hui te yaꞈ tuˬ dawˇ ve htawˇ maˇ te yaꞈ ve kʼo, teꞈ chiˉ maˇ heˆ tehꞈ chaw teˇ hpaˍ kʼoˆ ve yoˬ. Yaꞈ hkʼaˇ, chi hkʼe ve dawˇ hkʼaˇ maˇ cawˇ. Te yaꞈ tuˬ ve awˬ ceuˬ htaꞈ leuˉ leh dawˇ nyi ve kʼo, te gaˇ la ve yoˬ. Chi yawˇ beˬ ve lawˇ ve htaꞈ te chehˇ leh peuˬ hkʼawꞈ nawˉ htaˇ kʼawꞈ tawˍ daꞈ˗a tehꞈ dawˇ tuˬ te piˇ ve yoˬ. Maˇ daꞈ ve dawˇ hkʼaˇ teˇ pawˆ teˇ yanˇ cawˬ la ve yoˬ. Yaꞈ hkʼaˇ, ngaˬ hui htaꞈ ga laˇ gʼa ve a yeˇ uiˍ jaˇ ve awˬ ceuˬ lehˬ, maˇ daꞈ ve dawˇ hkʼaˇ oˇ hkʼe ve laꞈ haˉ gʼa yuˬ baˬ cawˇ leh cawˇ ve dawˇ hkʼaˇ cawˬ tcuh cawˇ ve yoˬ. Ngaˬ hui chi hkʼe te htaˇ maˇ gʼa te yaꞈ tuˬ leh venˇ baˆ maˇ gʼa te tuˬ haꞈ shaˉ laˇ gʼa ve yoˬ.—Hpiˇliˇpiˆ 4:8; Kawˇlawˇsehˇ 3:2; Yaˍkoˆ 1:13-15.
Ngaˬ hui htaꞈ beˬ laˇ lawˇ laˇ ve hkʼaˬ hkʼe ve teˇ ceuˬ htawˇ maˇ kʼoˆ, gʼa jaw kʼai cawˇ ve (Awˬ tawn 13 nyi sheˍ)
14. Beˬ ve lawˇ ve htaꞈ ngaˬ hui tawˍ daꞈ gʼaˇ tuˬ aˬ htoꞈ ma gʼa te cawˇ sheˍ ve le?
14 Beˬ ve lawˇ ve htaꞈ tawˍ daꞈ gʼaˇ tuˬ, ngaˬ hui gʼa te cawˇ sheˍ ve aˬ htoꞈ ma cawˬ ve le? Yaˬhoˉvaˬ ve awˬ liˇ tawˇ hkawˇ htaꞈ na yuˬ ve lehˬ, ngaˬ hui awˬ pon awˬ bon cawˬ jaˇ ve tehꞈ gʼa yonˍ cawˇ ve yoˬ. Teˇ pawˆ pawˆ kʼo, ngaˬ hui Gʼuiˬ sha nyi hkʼaˇ suh ve te piˇ tuˬ, dawˇ ve leh te ve awˬ ceuˬ maˇ sha ve yoˬ hehˉ. Yaꞈ hkʼaˇ, ngaˬ hui coˇ caˇ leh te gʼa tcuh htaˇ, ngaˬ hui ha lehˬ ve cawˬ leh nyi ma gawˬ lehˍ ve kaꞈ cawˬ ve yoˬ.
15. Ngaˬ hui cawˇ ve awˬ ceuˬ htaꞈ te gaˇ tuˬ cawˬ tcuh ve kʼo, beˬ ve lawˇ ve htaꞈ tawˍ daꞈ gʼaˇ tuˬ hkʼaˬ hkʼe ga laˇ gʼa ve le?
15 Ngaˬ hui cawˇ ve awˬ ceuˬ htaꞈ te gaˇ ve nyi ma cawˬ tuˬ gʼa cawˬ tcuh ve yoˬ. Ngaˬ hui “haiˬ ve awˬ ceuˬ htaꞈ canˇ leh, daꞈ ve awˬ ceuˬ htaꞈ haꞈ” tuˬ te jawˬ ve kʼo, ngaˬ hui cawˇ ve awˬ ceuˬ htaꞈ leuˉ leh te gaˇ tuˬ dawˇ teh taˍ gʼa leh, yaꞈ ve awˬ ceuˬ htaꞈ kaꞈ jaw kʼai gʼa ve yoˬ. (Aˍmoˆ 5:15) Chi hkʼoˆ kaꞈ, ngaˬ hui cawˇ ve awˬ ceuˬ htaꞈ te gaˇ ve kʼo, maˇ dawˇ maˇ gaˇ ve hkʼaw beˬ ve lawˇ ve gʼa hpuˇ htaˇ, chi tawˍ daꞈ gʼaˇ tuˬ ga laˇ gʼa ve yoˬ.
16. Hkriꞈ yaˇ ve awˬ vuiˬ teˇ hpaˍ te ve lehˬ ngaˬ hui ve yonˍ hkʼaˇ htaꞈ shaˍ tiꞈ hkʼa dehꞈ te chehˇ tuˬ hkʼaˬ hkʼe ga laˇ gʼa ve le? (Awˬ han htaꞈ nyi sheˍ.)
16 Leh ngaˬ hui cawˇ ve awˬ ceuˬ htaꞈ te gaˇ tuˬ hkʼaˬ hkʼe cawˬ tcuh gʼa ve le? Ngaˬ hui Yaˬhoˉvaˬ geh hkʼa dehꞈ meuˆ daꞈ tuˬ ga laˇ gʼa ve awˬ ceuˬ lehˬ, Hkriꞈ yaˇ ve awˬ vuiˬ htaꞈ hkʼa dehꞈ dawˇ nyi leh te ve yoˬ. Ngaˬ hui hpawnˬ daꞈ˗e ve, maˇ heˆ leh hto toˇ˗e htaˇ, ngaˬ hui htaꞈ te yaꞈ tuˬ beˬ laˇ ve htaꞈ hkʼa dehꞈ maˇ gʼa hpuˇ ve yoˬ. Ngaˬ hui Yaˬhoˉvaˬ nyi hkʼaˇ suh tuˬ leuˉ leh te gaˇ ve yoˬ. (Maꞈhtehˍ 28:19, 20; Heˍbrehˇ 10:24, 25) Liꞈ hpu gʼaw ve, Liꞈ hpu henˇ ve, leh hkʼa dehꞈ dawˇ nyi ve pa taw, haiˬ ve awˬ ceuˬ htaꞈ canˇ leh daꞈ ve awˬ ceuˬ htaꞈ leuˉ leh haꞈ tuˬ te laˇ ve yoˬ. (Yawˇsuˆ 1:8; Chiˇ mvuh ve 1:2, 3; 119:97, 101) Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve, “beˬ ve lawˇ ve awˬ hkʼaˇ suh maˇ gʼa kʼai tuˬ bon lawˬ leh shaˍ tiꞈ taˍ˗oꞈ” tehꞈ kʼoˆ piˇ ve htaꞈ tawnˇ taˍ sheˍ. (Maꞈhtehˍ 26:41) Ngaˬ hui ve Awˬ pa Yaˬhoˉvaˬ geh bon lawˬ htaˇ, yawˇ nyi hkʼaˇ suh ve te piˇ tuˬ yawˇ ngaˬ hui htaꞈ ga laˇ tcuh gaˇ ve yoˬ.—Yaˍkoˆ 4:8.
Hkriꞈ yaˇ ve awˬ vuiˬ teˇ hpaˍ htaꞈ hkʼaˬ htaˆ kaꞈ gʼaꞈ te ve kʼo, ngaˬ hui yonˍ yeˬ ve cawˬ leh beˬ ve lawˇ ve htaꞈ tawˍ daꞈ gʼaˇ tuˬ ga laˇ ve (Awˬ tawn 16 nyi sheˍ) b
HKʼAˬ HTAˆ KAꞈ SHAˍ TIꞈ TE SHEˍ
17. Peˍtruˆ gʼaˇ nuˇ kuiˬ htaꞈ gʼa tawˍ daꞈ ve aˬ htoꞈ ma cawˬ sheˍ ve le?
17 Ngaˬ hui ve gʼaˇ nuˇ kuiˬ teˇ ceuˬ ceuˬ htaꞈ tawˍ daꞈ gʼaˇ˗oˬ ve htawˇ, ngaˬ hui caˉ leh gʼa tawˍ daꞈ ve teˇ ceuˬ ceuˬ cawˬ sheˍ ve yoˬ. Awˬ ceuˬ chi ve tcuh yaˇ Peˍtruˆ kaꞈ gʼa hpuˇ ve yoˬ. Yawˇ chaw htaꞈ kawˆ ve pa taw, Yeˍsuˆ htaꞈ 3 pawˆ chiˇ baˬ piˇ ve yoˬ. (Maꞈhtehˍ 26:69-75) Yaꞈ hkʼaˇ, peuˬ hkʼawꞈ nawˉ Peˍtruˆ chaw htaꞈ maˇ kawˆ˗oˬ ve htaꞈ shuˍ ve yoˬ. Awˬ lawn kʼo, yawˇ jehˬ daꞈ shehˍ hpaˇ mehˆ gʼuˇ suhˍ haꞈ hanˉ ve hkʼaw kʼoˆ ve yoˬ. (Tcuh yaˇ 5:27-29) Peuˬ hkʼawꞈ nawˉ hkʼaˬ nyiˇ hkʼawꞈ maˇ gaˬ sheˍ ve htawˇ, yawˇ chaw htaꞈ kawˆ ve pa taw, buiˇ shaˆ aˉ naˆ chaw geh awˍ maˇ caˇ ve yoˬ. Awˬ lawn kʼo, “awˬ guiˬ meuˇ shoˍ ve chaw teˇ moˍ htaꞈ yawˇ kawˆ” ve yoˬ. Chi ve teˇ moˍ lehˬ Yuˇdaꞈ chaw Hkriꞈ yaˇ hpehꞈ ve yoˬ. (Gaˍlaˍtiˆ 2:11, 12) Peˍtruˆ chaw htaꞈ kʼawꞈ kawˆ ve tehꞈ hkʼa tawˍ lehˆ gʼa mawˬ ve yoˬ. Yawˇ ve gʼaˇ nuˇ kuiˬ chi ve htaꞈ hkʼa dehꞈ tawˍ daꞈ maˇ gʼaˇ sheˍ ve yoˬ hehˉ.
18. Ngaˬ hui ve gʼaˇ nuˇ kuiˬ htaꞈ aˬ htoꞈ ma hpehꞈ la gʼa ve le?
18 Ngaˬ hui kaꞈ Peˍtruˆ htaꞈ shuˍ ve yoˬ hehˉ. Teˇ pawˆ pawˆ kʼo, ngaˬ hui ve te hkʼaˇ dawˇ hkʼaˇ maˇ heˆ leh gʼaˇ nuˇ kuiˬ teˇ ceuˬ ceuˬ maˇ cawˬ˗oˬ ve tehꞈ dawˇ ve htawˇ, kʼawꞈ cawˬ la ve yoˬ. Tawˇ pa haˉ te kʼo, awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “ngaˬ awˬ ku nyi ve awˬ han maˇ nyi ve 10 hkʼawꞈ gaˬ˗oˬ leh chi ve htaꞈ ngaˬ gʼaˇ˗oˬ ve tehꞈ dawˇ ve yoˬ. Yaꞈ hkʼaˇ, awˬ tehˬ kʼo awˬ ku nyi ve awˬ han htaꞈ nyi ve dawˇ hkʼaˇ lehˬ haiˬ ve to nuˇ to shaˆ awˬ gʼaˇ nuˇ ve to nuˇ to shaˆ htaꞈ cheꞈ caˇ tuˬ law nyi chehˇ ve hkʼe shuˍ ve yoˬ.” Awˬ viˉ awˬ nyi hawˉ hkʼaˆ chi ve teˇ gʼaˇ chi hkʼe te gʼa ve chiˇ mvuh kuiˬ cawˬ jaˇ. Yawˇ ve gʼaˇ nuˇ kuiˬ htaꞈ teˇ nyi le le gʼa tawˍ daꞈ ve tehꞈ yawˇ shiˍ leh, Saˍtanˍ ve awˬ yanˇ peuˬ htaˇ hkʼa gaˬ, yawˇ hkʼaˬ htaˆ kaꞈ chi hkʼe ve htaꞈ gʼa tawˍ daꞈ chehˇ sheˍ ve yoˬ. Nyi haꞈ shaˉ paˍ leh yawˇ ve awˬ miˇ ma kaꞈ yawˇ htaꞈ ga piˇ gʼa jaˇ. Yawˇ ve gʼaˇ nuˇ kuiˬ chi ve htaꞈ tawˍ daꞈ gʼaˇ tuˬ yawˇ awˬ to gʼa coˇ caˇ jaˇ.
19. Ngaˬ hui ve gʼaˇ nuˇ kuiˬ teˇ ceuˬ ceuˬ htaꞈ tawˍ daꞈ maˇ gʼaˇ sheˍ ve kʼo, hkʼaˬ hkʼe te cawˇ ve le?
19 Ngaˬ hui ve gʼaˇ nuˇ kuiˬ teˇ ceuˬ ceuˬ htaꞈ tawˍ daꞈ maˇ gʼaˇ sheˍ ve tehꞈ dawˇ ve kʼo, hkʼaˬ hkʼe te cawˇ ve le? Ngaˬ hui htaꞈ ga laˇ gʼa ve awˬ ceuˬ lehˬ, beˬ ve lawˇ ve htaꞈ tawˍ daꞈ gʼaˇ tuˬ, Yeˍsuˆ beˆ maˍ laˇ ve htaꞈ gʼaꞈ te cawˇ ve yoˬ. Yawˇ kʼoˆ ve, “hkʼa dehꞈ shaw taˍ˗oꞈ.” A shu yawˇ awˬ to yonˍ yeˬ chehˇ˗oˬ ve tehꞈ dawˇ ve htawˇ, nawˬ htaꞈ beˬ ve lawˇ ve te laˇ ve awˬ ceuˬ htaꞈ coˇ caˇ leh jaw kʼai cawˇ ve yoˬ. (1 Kawˇrenˍhtuˆ 10:12) Nawˬ ve gʼaˇ nuˇ kuiˬ htaꞈ tawˍ daꞈ gʼaˇ tuˬ caˉ leh te sheˍ. Tawˇ naˉ ve liꞈ 28:14 hkʼaw kʼoˆ ve, ‘Gʼuiˬ sha ve tawˇ hkawˇ htaꞈ hkʼaˬ htaˆ kaꞈ nawˬ na yuˬ ve kʼo, gʼa ha lehˬ tuˬ yoˬ.’—2 Peˍtruˆ 3:14.
SHAˍ TIꞈ TE VE CHAW AWˬ PON LAꞈ SHAWNˍ
20-21. (a) Ngaˬ hui beˬ ve lawˇ ve htaꞈ tawˍ daꞈ gʼaˇ ve kʼo, aˬ htoꞈ ma laꞈ shawnˍ gʼa tuˬ le? (b) Ngaˬ hui te cawˇ ve awˬ ceuˬ htaꞈ te ve kʼo, Yaˬhoˉvaˬ hkʼaˬ hkʼe ga laˇ tuˬ ve le? (2 Kawˇrenˍhtuˆ 4:7)
20 Ngaˬ hui beˬ ve lawˇ ve gʼa hpuˇ htaˇ, shaˍ tiꞈ te tuˬ ngaˬ hui awˬ pon daꞈ jaˇ. Ngaˬ hui venˇ baˆ te htaˇ ‘teˇ tcuhˉ teˇ yanˇ ha lehˬ chehˇ ve yoˬ.’ Yaꞈ hkʼaˇ, ngaˬ hui Yaˬhoˉvaˬ nyi hkʼaˇ suhˍ ve hkʼe gʼaꞈ te ve kʼo, ha lehˬ jaˇ tuˬ yoˬ. (Heˍbrehˇ 11:25; Chiˇ mvuh ve 19:8) Awˬ lawn kʼo, chaw yaˇ lehˬ Yaˬhoˉvaˬ loˍ ve hkʼe gʼaꞈ te tuˬ hpanˍ taˍ laˇ ve yoˬ. (Awˬ hkuiˉ puiˍ 1:27) Oˇ ve hkʼa shuˍ ngaˬ hui gʼaꞈ te ve kʼo, ngaˬ hui ve dawˇ shiˍ puiˉ ve nyi ma htaꞈ heuˆ la kuiˬ maˇ cawˬ leh, awˬ gʼuˇ suhˍ hpawˇ co co taiˍ taiˍ ve a shaꞈ gʼa tuˬ yoˬ.—1 Tiˆmoˉseˍ 6:12; 2 Tiˆmoˉseˍ 1:3; Yuˇdaꞈ 20, 21.
21 “Awˬ suhˍ awˬ shaˍ lehˬ, awˬ gʼaˇ nuˇ ve” htawˇ, chi ve lehˬ a shu yawˇ awˬ to awˬ gʼaˇ nuˇ kuiˬ htaꞈ tawˍ daꞈ maˇ gʼaˇ ve tehꞈ kʼoˆ gaˇ ve maˇ heˆ. Yaˬhoˉvaˬ ngaˬ hui htaꞈ awˬ gʼaˇ peꞈ laˇ gaˇ jaˇ ve yoˬ. (2 Kawˇrenˍhtuˆ 4:7 gʼaw sheˍ.) Yaˬhoˉvaˬ ngaˬ hui htaꞈ awˬ gʼaˇ awˬ shaˉ peꞈ laˇ ve htawˇ, beˬ ve lawˇ ve htaꞈ tawˍ daꞈ gʼaˇ tuˬ ngaˬ hui te gʼa ve htaꞈ awˉ lawˉ gʼa te cawˇ ve tehꞈ tawnˇ taˍ sheˍ. Ngaˬ hui te cawˇ ve awˬ ceuˬ htaꞈ te ve kʼo, ngaˬ hui ve bon lawˬ hkawˇ htaꞈ yawˇ hkʼawꞈ laˇ tuˬ yoˬ tehꞈ yonˍ gʼa ve yoˬ. Chi ve lehˬ ngaˬ hui htaꞈ yawˇ leuˉ leh awˬ gʼaˇ awˬ shaˉ kʼawꞈ peꞈ laˇ tuˬ yoˬ. (1 Kawˇrenˍhtuˆ 10:13) Yaˬhoˉvaˬ ngaˬ hui htaꞈ ga laˇ ve kʼo, beˬ ve lawˇ ve htaꞈ tawˍ daꞈ gʼaˇ tuˬ yoˬ.
KʼA MUIˬ HKAWˇ 47 Yaˬhoˉvaˬ geh bon teˇ nyi le le lawˬ˗oꞈ
a Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ awˬ lawn 57 awˬ tawn 1-3 hkʼaw Venˇ baˆ uiˍ jaˇ ve htaꞈ te ve chaw htaꞈ ga piˇ gʼa tuˬ awˬ lawn, leh Shaw nyi kuiˬ Taꞈ yehˬ Ha pa 11 maˬ 2020 hkʼawꞈ Liꞈ mehˆ hpfuhˇ 27-29 awˬ tawn 12-17 hkʼaw “Awˬ gʼuˇ suhˍ hteˇ lehˍ nyi peu˗o” hkʼaw nyi sheˍ.
b AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi hawˉ hkʼaˆ teˇ gʼaˇ teˇ shawˉ le le Liꞈ hpu chaˬ nyi tuˬ mvuhˇ shawˉ htaˇ gʼaw ve. Sha gʼuˇ gʼaˇ jehˇ htaˇ yawˇ Liꞈ hpu gʼaw ve. Leh mvuhˇ hpeuꞈ la htaˇ yawˇ mvuhˇ hpeuꞈ haˉ hpawnˬ daꞈ kuiˬ lo kʼai ve.
