AWˬ LAWN 28
KʼA MUIˬ HKAWˇ 123 Ka tiꞈ yeˬ ve hkʼaw Gʼuiˬ sha awˬ hawˉ lo chehˇ ve
Hkʼaˬ ve awˬ tehˬ hpehꞈ ve tehꞈ nawˬ nyi mawˬ˗aw laˇ?
‘Hteˇ ve cawˇ ve teˇ ceuˬ nawˬ hui ve cawꞈ cehˍ nyi htaꞈ tsuhꞈ taˍ˗oꞈ.’—EˇFEˇSUꞈ 6:14.
A YEˇ UIˍ VE AWˬ LAWN
Saˍtanˍ heˍ ve leh Yaˬhoˉvaˬ htaꞈ tawˍ taˍ ve chaw yawˇ htaꞈ caˉ daꞈ ve awˬ lawn heˍ ve, hteˇ ve cawˇ ve htaꞈ fuiˍ daꞈ gʼa tuˬ a shu yawˇ awˬ to gʼa te jawˬ ve yoˬ.
1. Hteˇ ve cawˇ ve htaꞈ nawˬ hkʼaˬ hkʼe dawˇ ve le?
Yaˬhoˉvaˬ ve chaw lehˬ, Liꞈ hpu hkʼaw awˬ tehˬ ve gʼa henˇ ve htaꞈ haꞈ ve yoˬ. Leh ngaˬ hui ve yonˍ hkʼaˇ awˬ lawn lonˉ ma kaꞈ Liꞈ hpu hkʼaw cawˬ ve yoˬ. (Roˉmaꞈ 10:17) Yaˬhoˉvaˬ lehˬ Hkriꞈ yaˇ awˬ moˍ teh shehˍ hpaˇ “hteˇ ve cawˇ ve awˬ ceuˬ awˬ pon, awˬ hkuiˉ daw leh awˬ hkuiˉ puiˍ hpehꞈ ve” tehꞈ ngaˬ hui yonˍ gʼa ve yoˬ. (1 Tiˆmoˉseˍ 3:15) Ngaˬ hui awˬ moˍ hkʼaw “awˬ hoˉ teˇ hpaˍ” ve hkawˇ hkʼa dehꞈ na yuˬ˗oꞈ. Yawˇ hui Liꞈ hpu hkʼaw hteˇ ve cawˇ ve htaꞈ hkʼa dehꞈ kʼoˆ maˍ laˇ gʼa leh, Gʼuiˬ sha ve a loˍ htaꞈ hawˍ daꞈ ve kaꞈ beˆ maˍ laˇ gʼa ve yoˬ.—Heˍbrehˇ 13:17.
2. Yaˍkoˆ liꞈ 5:19 hkʼaw kʼoˆ taˍ ve hkʼe, ngaˬ hui hteˇ ve cawˇ ve htaꞈ gʼa henˇ peuˬ hkʼawꞈ nawˉ hkʼaˬ hkʼe hpehꞈ la gʼa ve le?
2 Liꞈ hpu hkʼaw hteˇ ve cawˇ ve htaꞈ ngaˬ hui haꞈ yuˬ leh Gʼuiˬ sha ve kanˉ hkʼaˇ hkʼaw beˆ maˍ laˇ ve htaꞈ kaꞈ ngaˬ hui haꞈ yuˬ ve htawˇ, ngaˬ hui hteˇ ve cawˇ ve htaꞈ maˇ gʼaꞈ te tuˬ hpfuhˆ kʼai la ve yoˬ hehˉ. (Yaˍkoˆ 5:19 gʼaw sheˍ.) Saˍtanˍ loˍ jaˇ ve awˬ ceuˬ lehˬ, ngaˬ hui Liꞈ hpu hkʼaw ve awˬ ceuˬ htaꞈ maˇ yonˍ tcuh gaˇ leh, Gʼuiˬ sha ve kanˉ hkʼaˇ beˆ maˍ laˇ ve htaꞈ kaꞈ maˇ yonˍ tcuh gaˇ ve yoˬ.—Eˇfeˇsuꞈ 4:14.
3. Aˬ htoꞈ ma te ngaˬ hui awˬ tehˬ ve htaꞈ yonˍ yeˬ cawˇ ve le? (Eˇfeˇsuꞈ 6:13, 14)
3 Eˇfeˇsuꞈ liꞈ 6:13, 14 gʼaw sheˍ. Maˇ maw ve awˬ yanˇ hkʼaw, nyi˗a kʼo awˬ tehˬ ve htaꞈ shuˍ ve Saˍtanˍ yehˇ leh, chi hkʼe hpehꞈ htaˇ mvuhˇ miˬ teˇ hpaˍ htaꞈ Saˍtanˍ cuˇ leh Yaˬhoˉvaˬ htaꞈ tawˍ daꞈ tcuh tuˬ yoˬ. (Hpeuꞈ maˍ ve 16:13, 14) Leh Saˍtanˍ lehˬ Yaˬhoˉvaˬ ve chaw yawˇ ve hkawˇ maˇ na tuˬ coˇ caˇ leh beˬ piˇ tuˬ yoˬ. (Hpeuꞈ maˍ ve 12:9) Chi htaꞈ pa taw, awˬ tehˬ ve awˬ lawn leh heˍ ve awˬ lawn htaꞈ hkʼa dehꞈ nyi mawˬ tuˬ, leh Liꞈ hpu hkʼaw awˬ tehˬ ve awˬ lawn htaꞈ hkʼa dehꞈ na yuˬ tuˬ, chi teˇ hkui kaꞈ ngaˬ hui te jawˬ tuˬ a yeˇ uiˍ jaˇ ve yoˬ. (Roˉmaꞈ 6:17; 1 Peˍtruˆ 1:22) Tuꞈ jaˇ hkanˍ jaˇ ve awˬ yanˇ htaˇ, ngaˬ hui gʼa ponˬ tuˬ, maˇ gʼa ponˬ tuˬ, chi hkʼe te ve htaꞈ cawˬ ve yoˬ.
4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
4 Awˬ tehˬ ve awˬ lawn Liꞈ hpu hkʼaw laˬ ve htaꞈ ngaˬ hui nyi mawˬ tuˬ ga laˇ gʼa leh, Yaˬhoˉvaˬ ve kanˉ hkʼaˇ hkʼaw laˬ ve awˬ ceuˬ htaꞈ ngaˬ hui haꞈ yuˬ cawˇ ve, awˬ lawn chi ve hkʼaw te hkʼaˇ dawˇ hkʼaˇ chi ve 2 ceuˬ htaꞈ teˇ geh henˇ tuˬ yoˬ. Peuˬ hkʼawꞈ nawˉ ngaˬ hui awˬ tehˬ ve htaꞈ hkʼa dehꞈ yonˍ yeˬ gʼa tuˬ ga laˇ gʼa ve 3 ceuˬ htaꞈ teˇ geh henˇ tuˬ yoˬ.
HKʼAˬ VE AWˬ TEHˬ HPEHꞈ VE TEHꞈ NYI MAWˬ TUˬ NGAˬ HUI GʼA CAWˬ CAWˇ VE TE HKʼAˇ DAWˇ HKʼAˇ
5. Yaˬhoˉvaˬ htaꞈ kawˆ leh yawˆ yan ve lehˬ ngaˬ hui awˬ tehˬ ve htaꞈ shiˍ tuˬ hkʼaˬ hkʼe ga laˇ gʼa ve le?
5 Yaˬhoˉvaˬ htaꞈ kawˆ leh yawˆ yan ve. Ngaˬ hui Yaˬhoˉvaˬ htaꞈ kawˆ leh yawˆ yan htaˇ, ngaˬ hui yawˇ htaꞈ haꞈ jaˇ leh nyi ma luˬ tuˬ maˇ te piˇ gaˇ ve yoˬ. Aˬ htoꞈ ma cawˇ ve maˇ cawˇ ve htaꞈ ngaˬ hui hkʼa dehꞈ nyi mawˬ tuˬ henˇ leh, aˬ htoꞈ ma ve awˬ lawn awˬ tehˬ ve, leh aˬ htoꞈ ma ve awˬ lawn heˍ ve ngaˬ hui gʼa shiˍ cawˇ ve yoˬ. Awˬ lawn kʼo, chi ve ngaˬ hui Yaˬhoˉvaˬ nyi hkʼaˇ suh tuˬ te piˇ ve tehꞈ shiˍ ve yoˬ. (Tawˇ naˉ ve 2:3-6; Heˍbrehˇ 5:14) Ngaˬ hui chaw htaꞈ kawˆ ve Yaˬhoˉvaˬ htaꞈ maˇ haꞈ tuˬ taˇ te laˇ tcuh. Awˬ lawn kʼo, chaw yaˇ dawˇ cawˇ ve awˬ ceuˬ ngaˬ hui Yaˬhoˉvaˬ nyi hkʼaˇ maˇ suh tuˬ te piˇ la ve yoˬ.
6. Chaw htaꞈ kawˆ ve lehˬ Iˉsaˍreˍlaˆ chaw awˬ hoˉ 10 gʼaˇ awˬ tehˬ maˇ heˆ ve awˬ lawn htaꞈ hkʼaˬ hkʼe kʼoˆ ve le?
6 Ngaˬ hui Yaˬhoˉvaˬ aꞈ kehˉ chaw htaꞈ kawˆ ve kʼo, maˇ heˆ heˆ ve awˬ ceuˬ htaꞈ ngaˬ hui yonˍ la ve yoˬ hehˉ. Yaˬhoˉvaˬ ka tiꞈ te taˍ piˇ ve mvuhˇ miˬ hkʼaw ca jaˆ nyi˗e ve Iˉsaˍreˍlaˆ chaw awˬ hoˉ 12 gʼaˇ ve awˬ lawn htaꞈ teˇ geh nyi sheˍ. Chaw jaˆ 10 gʼaˇ lehˬ Yaˬhoˉvaˬ htaꞈ haꞈ ve aꞈ kehˉ Hkaˍnanˍ chaw htaꞈ kawˆ jaˇ ve yoˬ. Hkʼe te leh, yawˇ hui Iˉsaˍreˍlaˆ chaw htaꞈ kʼoˆ piˇ ve, ‘ngaˬ hui ca bawˆ maˇ hpehꞈ taˬ. Oˇ kaˬ lo chehˇ taˍ ve chaw teˇ hpaˍ lehˬ, ngaˬ hui aꞈ kehˉ awˬ gʼaˇ uiˍ jaˇ ve yoˬ.’ (Heh puiˉ hkʼaw 13:27-31) Chaw yaˇ nyi ve kʼo Hkaˍnanˍ chaw lehˬ Iˉsaˍreˍlaˆ chaw aꞈ kehˉ awˬ gʼaˇ uiˍ ve yoˬ. Yaꞈ hkʼaˇ, Iˉsaˍreˍlaˆ chaw Hkaˍnanˍ chaw htaꞈ bawˆ maˇ gʼaˇ taˬ kʼoˆ ve lehˬ, yawˇ hui Yaˬhoˉvaˬ htaꞈ gʼaˇ maˇ va ve tehꞈ hpeuꞈ maw laˇ ve yoˬ. Yawˇ hui Yaˬhoˉvaˬ loˍ ve awˬ ceuˬ htaꞈ awˉ lawˉ dawˇ nyi cawˇ leh Yaˬhoˉvaˬ yawˇ hui htaꞈ hkʼaˬ hkʼe ga laˇ jaw˗oˬ ve htaꞈ kaꞈ dawˇ nyi cawˇ ve yoˬ. Chi hkʼe te ve kʼo, Hkaˍnanˍ chaw awˬ gʼaˇ hkʼaˬ hkʼe taw hehnˇ ve htawˇ, Yaˬhoˉvaˬ htaꞈ maˇ gʼaˇ taˬ tehꞈ yawˇ hui yonˍ gʼa ve yoˬ. Yaꞈ hkʼaˇ, Yawˇsuˆ leh Kaˍlehˆ chaw jaˆ 10 gʼaˇ oˇ ve htaꞈ maˇ shuˍ. Yawˇ huiˉ maˬ Yaˬhoˉvaˬ nyi hkʼaˇ suh ve awˬ ceuˬ htaꞈ te gaˇ ve yoˬ. Hkʼe te leh, yawˇ huiˉ maˬ Iˉsaˍreˍlaˆ chaw htaꞈ kʼoˆ piˇ ve, “Gʼuiˬ sha a loˍ cawˇ ve kʼo, yawˇ ngaˬ hui htaꞈ shiˍ kʼai laˇ leh, mvuhˇ miˬ oˇ ve ngaˬ hui htaꞈ peꞈ laˇ tuˬ yoˬ.”—Heh puiˉ hkʼaw 14:6-9.
7. Ngaˬ hui hkʼaˬ hkʼe te leh Yaˬhoˉvaˬ htaꞈ kawˆ leh yawˆ yan tuˬ le? (Awˬ han htaꞈ nyi sheˍ.)
7 Ngaˬ hui Yaˬhoˉvaˬ htaꞈ kawˆ ve leh yawˆ yan ve cawˬ maˇ la tuˬ, teˇ pawˆ le le dawˇ cheˆ htaˇ Yaˬhoˉvaˬ nyi hkʼaˇ suh ve te piˇ tuˬ hkʼaˬ hkʼe gʼa te cawˇ ve htaꞈ gʼa dawˇ nyi ve yoˬ. (Chiˇ mvuh ve 16:8) Liꞈ hpu hkʼaw ve awˬ lawn htaꞈ nawˬ gʼaw htaˇ, a shu yawˇ awˬ to htaꞈ na nyi cawˇ ve, ‘ngaˬ oˇ hkʼe ve hkʼaw chehˇ ve kʼo ngaˬ hkʼaˬ hkʼe dawˇ cheˆ tuˬ ve le?’ Tawˇ pa haˉ te kʼo, Iˉsaˍreˍlaˆ chaw awˬ hoˉ 10 gʼaˇ maˇ daꞈ ve awˬ lawn htaꞈ kʼoˆ ve nawˬ na chehˇ ve kʼo, hkʼaˬ hkʼe hpehꞈ ve htaꞈ dawˇ nyi sheˍ. Nawˬ yawˇ hui hkawˇ na leh, yawˇ hui hkʼe kawˆ˗aw laˇ? Maˇ heˆ leh nawˬ Yaˬhoˉvaˬ htaꞈ haꞈ jaˇ leh, yawˇ nyi hkʼaˇ suh ve te piˇ tuˬ dawˇ teh taˍ ve laˇ? Iˉsaˍreˍlaˆ chaw oˇ ve teˇ toˆ Yawˇsuˆ leh Kaˍlehˆ awˬ tehˬ kʼoˆ ve awˬ ceuˬ htaꞈ yawˇ hui maˇ nyi mawˬ ve yoˬ. Chi htaꞈ pa taw, yawˇ hui Gʼuiˬ sha ka tiꞈ te taˍ piˇ ve mvuhˇ miˬ hkʼaw maˇ gʼa loꞈ˗e ve yoˬ.—Heh puiˉ hkʼaw 14:10, 22, 23.
Nawˬ a shu htaꞈ yonˍ tuˬ le? (Awˬ tawn 7 nyi sheˍ)
8. Ngaˬ hui coˇ caˇ leh te hkʼaˇ dawˇ hkʼaˇ hkʼaˬ hkʼe ve cawˬ tcuh cawˇ ve le? Leh aˬ htoꞈ ma pa taw le?
8 Nyi ma nuˇ nehˬ ve. Yaˬhoˉvaˬ awˬ tehˬ ve awˬ lawn nyi ma nuˇ nehˬ ve chaw htaꞈ hpeuꞈ maˍ piˇ ve yoˬ. (Maꞈhtehˍ 11:25) Awˬ tehˬ ve ngaˬ hui gʼa henˇ˗oˬ ve htaꞈ shiˍ tuˬ, ngaˬ hui nyi ma nuˇ nehˬ te leh gʼa ga laˇ tcuh ve yoˬ. (Tcuh yaˇ 8:30, 31) Chi hkʼe hpehꞈ ve htawˇ, ngaˬ hui uiˍ muiˬ caˆ muiˬ ve chaw maˇ gʼa hpehꞈ tuˬ shaˍ tiꞈ gʼa te cawˇ ve yoˬ. Uiˍ muiˬ caˆ muiˬ ve chaw lehˬ yawˇ ve dawˇ hkʼaˇ Liꞈ hpu hkʼaw ve awˬ liˇ awˬ hkʼaˇ hkʼe taw a yeˇ uiˍ ve tehꞈ dawˇ tuˬ te piˇ la leh, Yaˬhoˉvaˬ ve kanˉ hkʼaˇ hkʼaw beˆ maˍ laˇ ve kaꞈ yawˇ ve dawˇ hkʼaˇ hkʼe taw a yeˇ uiˍ ve tehꞈ shawˍ tuˬ te piˇ la ve yoˬ.
9. Ngaˬ hui hkʼaˬ hkʼe te hkʼaˬ htaˆ kaꞈ nyi ma nuˇ nehˬ ve chaw hpehꞈ gʼa tuˬ le?
9 Ngaˬ hui hkʼaˬ htaˆ kaꞈ nyi ma nuˇ nehˬ ve chaw hpehꞈ tuˬ, ngaˬ hui awˬ to Yaˬhoˉvaˬ htaꞈ tehˆ ve kʼo, hkʼaˬ hkʼe taw i jaˇ ve htaꞈ tawnˇ taˍ cawˇ ve yoˬ. (Chiˇ mvuh ve 8:3, 4) Ngaˬ hui nyi ma nuˇ nehˬ ve chaw hpehꞈ leh Yaˬhoˉvaˬ maˍ laˇ ve htaꞈ haꞈ yuˬ gʼa tuˬ, yawˇ ga laˇ tuˬ bon lawˬ sheˍ. Liꞈ hpu hkʼaw ve awˬ lawn leh Yaˬhoˉvaˬ ve kanˉ hkʼaˇ geh laˬ ve htaꞈ yawˇ hkʼaˬ hkʼe dawˇ ve ngaˬ hui gʼa henˇ leh, Yaˬhoˉvaˬ ve dawˇ hkʼaˇ ngaˬ hui ve dawˇ hkʼaˇ aꞈ kehˉ a yeˇ uiˍ jaˇ ve tehꞈ, shawˍ tuˬ yawˇ ga laˇ gʼa ve yoˬ. Nawˬ Liꞈ hpu gʼaw htaˇ, Yaˬhoˉvaˬ nyi ma nuˇ nehˬ ve chaw htaꞈ haꞈ leh, uiˍ muiˬ caˆ muiˬ ve chaw htaꞈ yawˇ hkʼaˬ hkʼe dawˇ ve htaꞈ chaˬ nyi sheˍ. Chi hkʼoˆ kaꞈ, nawˬ kanˇ paˆ cawˬ tuˬ te laˇ ve awˬ vuiˬ gʼa ve, maˇ heˆ leh nawˬ Gʼuiˬ sha ve kanˉ hkʼaˇ hkʼaw awˬ vuiˬ kʼawꞈ gʼa maˇ htaˇ, nawˬ nyi ma nuˇ nehˬ ve chaw hpehꞈ tuˬ coˇ caˇ sheˍ.
NGAˬ HUI AWˬ TEHˬ VE HTAꞈ YONˍ YEˬ GʼA VE
10. Yaˬhoˉvaˬ yawˇ ve chaw htaꞈ beˆ maˍ piˇ tuˬ a shu htaꞈ yehˇ ve le?
10 Yaˬhoˉvaˬ ve kanˉ hkʼaˇ beˆ maˍ laˇ ve htaꞈ yonˍ ve. Iˉsaˍreˍlaˆ chaw ve awˬ co˗e htaˇ, Yaˬhoˉvaˬ ve awˬ liˇ tawˇ hkawˇ Iˉsaˍreˍlaˆ chaw htaꞈ kʼoˆ piˇ tuˬ yawˇ Moˉseˍ htaꞈ cuˇ leh, peuˬ hkʼawꞈ nawˉ Yawˇsuˆ htaꞈ cuˇ ve yoˬ. (Yawˇsuˆ 1:16, 17) Iˉsaˍreˍlaˆ chaw lehˬ, chaw chi 2 gʼaˇ Gʼuiˬ sha ve awˬ tan te shehˍ hpaˇ hpehꞈ ve tehꞈ shawˍ ve kʼo, yawˇ hui awˬ bon maˇ maˇ gʼa tuˬ yoˬ. Peuˬ hkʼawꞈ nawˉ laiˉ ha hkʼawꞈ Hkriꞈ yaˇ awˬ moˍ cawˬ˗oˬ htaˇ, Hkriꞈ yaˇ awˬ moˍ teˇ hpaˍ htaꞈ beˆ maˍ piˇ tuˬ Yaˬhoˉvaˬ lehˬ tcuh yaˇ 12 gʼaˇ htaꞈ yehˇ ve yoˬ. (Tcuh yaˇ 8:14, 15) Leh peuˬ hkʼawꞈ nawˉ Yeˍruˆsaˍlehnˍ venˇ lo ve awˬ hoˉ chaw mawˇ teˇ hpaˍ htaꞈ kaꞈ yehˇ ve yoˬ. Awˬ viˉ awˬ nyi lehˬ yawˇ hui beˆ maˍ piˇ ve htaꞈ gʼaꞈ te htaˇ, “Hkriꞈ yaˇ awˬ moˍ teˇ hpaˍ yonˍ ve awˬ hkʼaw lo awˬ gʼaˇ uiˍ la leh, teˇ nyi le le chaw maˇ la ve yoˬ.” (Tcuh yaˇ 16:4, 5) Chi beuꞈ teˇ co˗e, Yaˬhoˉvaˬ ve kanˉ hkʼaˇ beˆ maˍ laˇ ve htaꞈ ngaˬ hui gʼaꞈ te htaˇ, awˬ bon gʼa ve yoˬ. Gʼuiˬ sha ve kanˉ hkʼaw sheh kʼai paˍ beˆ maˍ laˇ ve htaꞈ ngaˬ hui maˇ haꞈ yuˬ ve kʼo, yawˇ hkʼaˬ hkʼe dawˇ tuˬ ve le? Na hkawˇ chi ve teˇ hpaˍ htaꞈ hkʼawꞈ laˇ gʼa tuˬ, Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw loꞈ˗e te chehˇ htaˇ ve awˬ lawn htaꞈ dawˇ nyi sheˍ.
11. Iˉsaˍreˍlaˆ chaw lehˬ, Yaˬhoˉvaˬ Moˉseˍ htaꞈ piˇ taˍ ve aˉ yaˇ htaꞈ maˇ yawˆ yan ve pa taw, yawˇ hui htaꞈ aˬ htoꞈ ma hpehꞈ la ve le? (Awˬ han htaꞈ nyi sheˍ.)
11 Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ lo kʼai chehˇ htaˇ, Iˉsaˍreˍlaˆ chaw awˬ ceuˬ awˬ hkʼaˇ hkʼaw ve awˬ hoˉ Moˉseˍ htaꞈ tawˍ daꞈ leh Gʼuiˬ sha Moˉseˍ htaꞈ piˇ taˍ ve aˉ yaˇ htaꞈ kaꞈ maˇ yawˆ yan ve yoˬ. Yawˇ hui kʼoˆ ve, “ngaˬ hui hkʼa peu˗eˬ Gʼuiˬ sha ve chaw hpehꞈ leh [Moˉseˍ ceh tiˉ maˇ heˆ.] Gʼuiˬsha lehˬ ngaˬ hui hkʼa peu˗eˬ geh chehˇ taˍ ve yoˬ.” (Heh puiˉ hkʼaw 16:1-3) Yaˬhoˉvaˬ awˬ pon kʼo, ‘Iˉsaˍreˍlaˆ chaw hkʼa peu˗eˬ yawˇ ve chaw hpehꞈ ve yoˬ.’ Yaꞈ hkʼaˇ, Yaˬhoˉvaˬ lehˬ Moˉseˍ htaꞈ leuˆ yuˬ leh yawˇ ve chaw htaꞈ sheh kʼai tcuh ve yoˬ. (Heh puiˉ hkʼaw 16:28) Yawˇ hui Moˉseˍ htaꞈ nyi cha ve kʼo, Yaˬhoˉvaˬ htaꞈ kaꞈ nyi cha chehˇ ve yoˬ. Yawˇ hui lehˬ Yaˬhoˉvaˬ loˍ ve awˬ ceuˬ htaꞈ a yeˇ maˇ yuˬ ve yoˬ. Yaꞈ hkʼaˇ, yawˇ hui loˍ ve htaꞈ ceh tiˉ a yeˇ yuˬ ve yoˬ. Chi hkʼe te ve lehˬ, yawˇ hui kanˇ paˆ leh awˬ meh bvuhˬ ve htaꞈ gʼa gaˇ ve yoˬ. Hkʼe te leh, Yaˬhoˉvaˬ lehˬ yawˇ htaꞈ hpfuhˆ ve awˬ hoˉ leh yawˇ hui hpawˇ chehˇ ve laiˉ meunˍ gʼaˇ htaꞈ tiˇ pehˍ piˇ ve yoˬ. (Heh puiˉ hkʼaw 16:30-35, 41, 49) Chi beuꞈ teˇ co˗e, Yaˬhoˉvaˬ ve kanˉ hkʼaˇ beˆ maˍ piˇ ve htaꞈ maˇ haꞈ yuˬ ve chaw yawˇ nyi hkʼaˇ maˇ suh ve tehꞈ ngaˬ hui gʼa shiˍ ve yoˬ.
Nawˬ a shu hpawˇ chehˇ tuˬ le? (Awˬ tawn 11 nyi sheˍ)
12. Aˬ htoꞈ ma te ngaˬ hui Yaˬhoˉvaˬ ve kanˉ hkʼaˇ htaꞈ hkʼaˬ htaˆ kaꞈ yonˍ gʼa ve le?
12 Ngaˬ hui Yaˬhoˉvaˬ ve kanˉ hkʼaˇ htaꞈ hkʼaˬ htaˆ kaꞈ yonˍ gʼa ve yoˬ. Liꞈ hpu hkʼaw awˬ tehˬ ve htaꞈ caˉ daꞈ ve na gʼa ve awˬ suhˉ gʼa pa cawˇ ve, maˇ heˆ leh Gʼuiˬ sha ve kanˉ te ve awˬ hkʼaˇ gʼa pa cawˇ ve, ka tiꞈ yeˬ leh cuˇ yiˍ cawˬ ve awˬ ceˬ gʼa mawˬ htaˇ, yawˇ hui htawˇ dawˇ nawˬ dawˇ maˇ cawˬ leh pa ve yoˬ. (Tawˇ naˉ ve 4:18) Yawˇ hui chi hkʼe te ve lehˬ, Yaˬhoˉvaˬ nyi hkʼaˇ suh tuˬ a yeˇ uiˍ jaˇ ve awˬ ceuˬ htaꞈ te piˇ ve yoˬ. Chi hkʼoˆ kaꞈ, yawˇ hui awˬ lawn teˇ hpaˍ dawˇ cheˆ htaˇ, Liꞈ hpu htaꞈ cuˇ ve yoˬ. Chi hkʼe te ve lehˬ, Yaˬhoˉvaˬ ve kanˉ te ve chaw teˇ gʼaˇ le le yawˇ ve awˬ liˇ awˬ hkʼaˇ htaꞈ gʼa gʼaꞈ te cawˇ ve yoˬ.
13. “Daꞈ jaˇ biˇ jaˇ ve tawˇ hkawˇ teˇ hpaˍ” aˬ htoꞈ ma htaꞈ kʼoˆ gaˇ ve le? Leh awˬ liˇ awˬ hkʼaˇ chi ve htaꞈ ngaˬ hui hkʼaˬ hkʼe gʼaꞈ te cawˇ ve le?
13 “Daꞈ jaˇ biˇ jaˇ ve tawˇ hkawˇ teˇ hpaˍ htaꞈ hkʼa dehꞈ na yuˬ leh te kʼai˗o.” (2 Tiˆmoˉseˍ 1:13) “Daꞈ jaˇ biˇ jaˇ ve tawˇ hkawˇ” chi ve lehˬ Liꞈ hpu hkʼaw cawˬ ve Hkriꞈ yaˇ hui ve tawˇ hkawˇ htaꞈ kʼoˆ gaˇ ve yoˬ. (Yoˇhanˬ 17:17) Tawˇ hkawˇ chi ve teˇ hpaˍ lehˬ, ngaˬ hui ve yonˍ hkʼaˇ awˬ lawn lonˉ ma hpehꞈ ve yoˬ. Yaˬhoˉvaˬ ve kanˉ hkʼaˇ ngaˬ hui awˬ liˇ awˬ hkʼaˇ chi ve teˇ hpaˍ htaꞈ na yuˬ tuˬ maˍ laˇ ve yoˬ. Ngaˬ hui na yuˬ ve kʼo Yaˬhoˉvaˬ awˬ bon naꞈ laˇ tuˬ yoˬ.
14. “Daꞈ jaˇ biˇ jaˇ ve tawˇ hkawˇ” Hkriꞈ yaˇ teˇ hpaˍ hkʼaˬ hkʼe te maˇ na yuˬ leh maˇ te kʼai ve le?
14 “Daꞈ jaˇ biˇ jaˇ ve tawˇ hkawˇ teˇ hpaˍ htaꞈ” ngaˬ hui maˇ na yuˬ leh maˇ te ve kʼo, hkʼaˬ hkʼe hpehꞈ la tuˬ ve le? Awˉ lawˉ peuˇ ve Hkriꞈ yaˇ ve awˬ lawn htaꞈ teˇ geh nyi sheˍ. Awˬ yanˇ teˇ yanˇ htaˇ, Yaˬhoˉvaˬ ve awˬ nyi gaˬ la˗oˬ kʼoˆ ve maˇ heˆ heˆ ve awˬ lawn gʼa kaˇ ve yoˬ. Maˇ heˆ heˆ ve awˬ lawn chi Pawˇluꞈ geh bvuhꞈ laˬ ve liꞈ hpehꞈ ve tehꞈ yonˍ tuˬ te piˇ ve yoˬ. Hteˇsaˍlawˇniˆ venˇ hkʼaw chehˇ ve Hkriꞈ yaˇ teˇ hpaˍ, hkʼa dehꞈ maˇ chaˬ nyi ve yoˬ. Hkʼe te leh, yawˇ hui maˇ heˆ heˆ ve awˬ lawn oˇ ve htaꞈ yonˍ leh awˬ nu ve chaw htaꞈ kʼawꞈ kʼoˆ piˇ ve yoˬ. Pawˇluꞈ yawˇ hui geh chehˇ htaˇ maˍ piˇ ve awˬ lawn htaꞈ yawˇ hui tawnˇ taˍ ve kʼo, Hkriꞈ yaˇ chi ve teˇ hpaˍ htaꞈ heˍ piˇ maˇ gʼa taˬ. (2 Hteˇsaˍlawˇniˆ 2:1-5) Hkʼe te leh, awˬ gʼuˇ suhˍ hpawˇ awˬ viˉ awˬ nyi chi teˇ hpaˍ htaꞈ maˇ gʼa heˍ piˇ tuˬ awˬ pon, Pawˇluꞈ Hkriꞈ yaˇ chi ve teˇ hpaˍ htaꞈ liꞈ bvuhꞈ leh beˆ maˍ piˇ ve hkʼaw teˇ ceuˬ le le gʼaˇ kaˇ ve htaꞈ taˇ yonˍ tehꞈ kʼoˆ piˇ ve yoˬ. Hkʼe te leh, Pawˇluꞈ Hteˇsaˍlawˇniˆ venˇ hkʼaw chehˇ ve awˬ viˉ awˬ nyi htaꞈ liꞈ bvuhꞈ piˇ ve 2 kʼoˆ teˇ kʼoˆ awˬ leh meuˇ teˇ tawn hkʼaw ‘ngaˬ Pawˇluꞈ lehˬ, nawˬ hui htaꞈ dawˇ nawˇ ve awˬ hkʼaw lo tawˇ chi teˇ hkawˇ ngaˬ awˬ to nawˬ hui htaꞈ bvuhꞈ laˇ ve yoˬ. Ngaˬ bvuhꞈ ve liꞈ teˇ kʼoˆ le le awˬ hkʼaw lo nawˬ hui shiˍ hpehꞈ tuˬ, ngaˬ bvuhꞈ ve laꞈ meuˇ lehˬ, chi hkʼe cawˬ ve yoˬ.’—2 Hteˇsaˍlawˇniˆ 3:17.
15. Heˍ ve awˬ lawn nyi˗a kʼo awˬ tehˬ ve awˬ lawn htaꞈ shuˍ ve ngaˬ hui a shu yawˇ awˬ to htaꞈ hkʼaˬ hkʼe te shaˍ tiꞈ te cawˇ ve le? Tawˇ pa haˉ kʼoˆ maˍ laˇ sheˍ. (Awˬ han htaꞈ nyi sheˍ.)
15 Hteˇsaˍlawˇniˆ venˇ hkʼaw chehˇ ve awˬ viˉ awˬ nyi htaꞈ Pawˇluꞈ liꞈ bvuhꞈ piˇ ve ngaˬ hui htaꞈ hkʼaˬ hkʼe maˍ laˇ gʼa ve le? Liꞈ hpu hkʼaw ngaˬ hui gʼa henˇ jaw ve awˬ ceuˬ htaꞈ maˇ hawˍ daꞈ ve awˬ lawn teˇ ceuˬ ceuˬ gʼa kaˇ ve, maˇ heˆ leh cheˆ˗ehꞈ kʼai ve maˇ heˆ heˆ ve awˬ lawn htaꞈ ngaˬ hui gʼa kaˇ htaˇ, aˬ htoꞈ ma ve awˬ lawn awˬ tehˬ hpehꞈ ve htaꞈ ngaˬ hui nyi mawˬ tuˬ, hkʼa dehꞈ gʼa chaˬ nyi cawˇ ve yoˬ. Soˍviˉ˗e mvuhˇ miˬ uˉ peunˍ ve awˬ yanˇ htaˇ, tawˍ taˍ paˍ nyi˗a kʼo liꞈ awˬ tcuhˆ puiˍ lo laˬ ve htaꞈ shuˍ ve, awˬ viˉ awˬ nyi htaꞈ yuˬ piˇ ve yoˬ. Liꞈ chi ve hkʼaw awˬ viˉ awˬ nyi teˇ hpaˍ hpaˍ a shu yawˇ hkʼaˇ yawˇ ve awˬ moˍ teh tuˬ awˬ gʼaˇ piˇ ve yoˬ. Liꞈ chi ve nyi˗a kʼo awˬ tcuhˆ puiˍ lonˉ hkʼaw laˬ ve htaꞈ shuˍ ve yoˬ. Yaꞈ hkʼaˇ, ka tiꞈ yeˬ ve awˬ viˉ awˬ nyi maˇ yonˍ. Awˬ lawn kʼo, liꞈ chi ve hkʼaw beˆ maˍ laˇ ve lehˬ, yawˇ hui gʼa henˇ jaw ve awˬ ceuˬ htaꞈ maˇ hawˍ daꞈ ve tehꞈ shiˍ ve yoˬ. Chi beuꞈ teˇ co˗e, ngaˬ hui ve canˇ paˍ awˬ tehˬ ve awˬ lawn htaꞈ coˇ caˇ leh heˍ tuˬ, ngaˬ hui htawˇ dawˇ nawˬ dawˇ cawˬ leh maˇ cawˇ maˇ hawˍ daꞈ tuˬ, awˬ hkʼaˇ awˬ hkʼeun awˬ suhˉ awˬ suhˉ htaꞈ yehˇ ve yoˬ. Ngaˬ hui “nyi ma shoꞈ shaꞈ ve” cawˬ ve aꞈ kehˉ ngaˬ hui gʼaw ve, maˇ heˆ leh ngaˬ hui gʼa kaˇ ve awˬ ceuˬ, Liꞈ hpu hkʼaw ngaˬ hui gʼa henˇ ve htaꞈ hawˍ daꞈ˗aw laˇ tehꞈ, hkʼa dehꞈ gʼa dawˇ nyi cawˇ ve yoˬ.—2 Hteˇsaˍlawˇniˆ 2:2; 1 Yoˇhanˬ 4:1.
Nyi˗a kʼo awˬ tehˬ ve awˬ lawn htaꞈ shuˍ ve heˍ ve awˬ ceuˬ taˇ heˍ laˇ tcuh (Awˬ tawn 15 nyi sheˍ) a
16. Roˉmaꞈ liꞈ 16:17, 18 hkʼaw kʼoˆ taˍ ve hkʼe, chaw teˇ hpaˍ awˬ tehˬ ve awˬ lawn htaꞈ maˇ hawˍ daꞈ ve kʼoˆ ve kʼo, ngaˬ hui hkʼaˬ hkʼe te tuˬ le?
16 Yaˬhoˉvaˬ htaꞈ ka tiꞈ yeˬ ve chaw geh teˇ moˍ tiˉ hpehꞈ sheˍ. Awˬ tehˬ ve htaꞈ oˉ kʼoˍ pui ve hkʼaw Yaˬhoˉvaˬ lehˬ ngaˬ hui htaꞈ teˇ moˍ tiˉ hpehꞈ tcuh gaˇ ve yoˬ. Ngaˬ hui awˬ tehˬ ve htaꞈ hkʼa dehꞈ na yuˬ ve kʼo, hkʼaˬ htaˆ kaꞈ teˇ moˍ tiˉ hpehꞈ gʼa ve yoˬ. A shu teˇ gʼaˇ maˇ kʼoˆ, awˬ tehˬ ve htaꞈ maˇ caˉ daꞈ ve awˬ lawn kʼoˆ ve kʼo, Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ teˇ piˇ chehˇ ve yoˬ. Chi htaꞈ pa taw, Yaˬhoˉvaˬ ngaˬ hui htaꞈ shaˍ tiꞈ peꞈ laˇ ve, chaw oˇ hkʼe ve htaꞈ maˇ “jaw kʼai” ve kʼo, ngaˬ hui awˬ tehˬ ve htaꞈ baˬ taˉ la tuˬ yoˬ.—Roˉmaꞈ 16:17, 18 gʼaw sheˍ.
17. Hkʼaˬ ve awˬ tehˬ hpehꞈ ve htaꞈ ngaˬ hui nyi mawˬ leh na yuˬ ve kʼo aˬ htoꞈ ma awˬ bon gʼa tuˬ le?
17 Ngaˬ hui hkʼaˬ ve awˬ tehˬ hpehꞈ ve htaꞈ nyi mawˬ leh awˬ tehˬ ve htaꞈ hkʼaˬ htaˆ kaꞈ na yuˬ ve kʼo, Yaˬhoˉvaˬ geh meuˆ daꞈ leh yonˍ hkʼaˇ yonˍ yeˬ jaˇ tuˬ yoˬ. (Eˇfeˇsuꞈ 4:15, 16) Tuꞈ jaˇ hkanˍ jaˇ ve awˬ yanˇ htaˇ, Yaˬhoˉvaˬ haꞈ shaˉ laˇ ve htaꞈ gʼa tuˬ, maˇ heˆ heˆ ve awˬ lawn ngaˬ hui htaꞈ maˇ gʼa heˍ laˇ leh, Saˍtanˍ yehˇ ve awˬ hkʼaˇ ngaˬ hui htaꞈ maˇ gʼa heˍ laˇ tcuh. Chi htaꞈ pa taw, nawˬ hui awˬ tehˬ ve htaꞈ hkʼa dehꞈ na yuˬ cawˇ ve yoˬ. Chi hkʼe te ve kʼo, “dawˇ sha piˇ shehˍ hpaˇ Gʼuiˬ sha lehˬ, nawˬ hui geh chehˇ tuˬ yoˬ.”—Hpiˇliˇpiˆ 4:8, 9.
KʼA MUIˬ HKAWˇ 122 Nyi ma yeˬ ve chaw hpehꞈ sheˍ!
a AWˬ HTAꞈ HPAWˇ VE AWˬ HAN HTAꞈ KʼOˆ MAˍ TAˍ VE: Peuˬ laˬ ve laiˉ chi hkʼawꞈ htaˇ ve awˬ lawn tawˇ pa haˉ kʼoˆ maˍ laˇ taˍ ve. Soˍviˉ˗e mvuhˇ miˬ uˉ peunˍ ve awˬ yanˇ htaˇ nyi˗a kʼo awˬ tcuhˆ puiˍ lonˉ hkʼaw laˬ ve liꞈ htaꞈ shuˍ ve awˬ viˉ awˬ nyi gʼa ve. Yaꞈ hkʼaˇ, awˬ tehˬ kʼo liꞈ chi ve lehˬ canˇ paˍ geh laˬ ve. Chi beuꞈ teˇ co˗e ve awˬ han ngaˬ hui ve canˇ paˍ Yaˬhoˉvaˬ ve kanˉ hkʼaˇ htaꞈ caˉ daꞈ ve heˍ ve awˬ lawn in˗teu˗neꞈ hkʼaw cawˬ ve.
