AWˬ LAWN 30
KʼA MUIˬ HKAWˇ 36 Ngaˬ hui ve nyi ma htaꞈ haꞈ shaˉ ve
Iˉsaˍreˍlaˆ chaw jawˇ mawˇ ve awˬ lawn maˍ laˇ ve
“Hteˇ ve cawˇ ve chaw leh haiˬ ve chaw, ngaˬ ve tawˇ htaꞈ na yuˬ ve chaw leh maˇ na yuˬ ve chaw, hkʼaˬ ma peun daꞈ ve htaꞈ ngaˬ ve chaw teˇ hpaˍ gʼa mawˬ tuˬ yoˬ.”—MAˍLAˍHKIˆ 3:18.
A YEˇ UIˍ VE AWˬ LAWN
Yaˬhoˉvaˬ nyi hkʼaˇ suh ve te piˇ tuˬ, ngaˬ hui hkʼaˬ hkʼe gʼa te cawˇ ve htaꞈ na gʼa tuˬ, yawˇ Iˉsaˍreˍlaˆ chaw ve jawˇ mawˇ htaꞈ hkʼaˬ hkʼe nyi ve teˇ geh henˇ tuˬ yoˬ.
1-2. Liꞈ hpu hkʼaw Iˉsaˍreˍlaˆ chaw ve jawˇ mawˇ teˇ hpaˍ htaꞈ hkʼaˬ hkʼe kʼoˆ sheˍ ve le?
Liꞈ hpu hkʼaw Iˉsaˍreˍlaˆ chaw ve jawˇ mawˇ 40 gʼaˇ hpaˆ htaꞈ kʼoˆ taˍ ve yoˬ. a Leh yawˇ hui htaꞈ caˉ daꞈ ve awˬ lawn kaꞈ hteˇ˗ehˍ kʼoˆ taˍ ve yoˬ. Leh daꞈ ve jawˇ mawˇ maˇ daꞈ ve awˬ ceuˬ htaꞈ te ve kaꞈ kʼoˆ taˍ ve yoˬ. Tawˇ pa haˉ te kʼo, Yaˬhoˉvaˬ jawˇ mawˇ Daˍviˆ htaꞈ kʼoˆ taˍ ve, ‘ngaˬ ve awˬ ceˬ paˍ Daˍviˆ lehˬ ngaˬ ve tawˇ htaꞈ na yuˬ puiˉ jaˇ ve yoˬ.’ (1 Jawˇmawˇ 14:8) Chi hkʼe hpehꞈ ve htawˇ, Daˍviˆ shu ve awˬ miˇ ma htaꞈ haˉ chawˇ haˉ paˆ te ve yoˬ. Leh awˬ hpawˇ htaꞈ kaꞈ maꞈ bawˆ kuiˬ hkʼaw suh˗e tuˬ awˬ hkʼaˇ gu ve yoˬ.—2 Saˍmo˗eˍlaˆ 11:4, 14, 15.
2 Liꞈ hpu hkʼaw kʼoˆ ve, maˇ daꞈ ve jawˇ mawˇ kaꞈ daꞈ ve awˬ ceuˬ te jaw ve yoˬ. Tawˇ pa haˉ te kʼo, Yawˇbaoˍ lehˬ Yaˬhoˉvaˬ awˬ pon kʼo, “haiˬ ve kanˉ htaꞈ tiˉ te ve yoˬ.” (2 Raˍsaˍvanˍ 12:14) Yaꞈ hkʼaˇ, Iˉsaˍreˍlaˆ chaw 10 chaw ceuˬ htaꞈ taˇ bawˆ˗e tehꞈ Yaˬhoˉvaˬ Yawˇbaoˍ htaꞈ kʼoˆ piˇ htaˇ, yawˇ na yuˬ ve yoˬ. Chi hkʼoˆ kaꞈ, yawˇ Yaˬhoˉvaˬ ve mvuhˇ miˬ yaˇ htaꞈ kaꞈ haꞈ shaˉ piˇ sheˍ ve yoˬ. Chi ve lehˬ, yawˇ laiˉ venˇ lo venˇ taˍ meuꞈ hpeꞈ te ve yoˬ.—1 Jawˇmawˇ 12:21-24; 2 Raˍsaˍvanˍ 11:5-12.
3. A yeˇ uiˍ ve na hkawˇ aˬ htoꞈ ma cawˬ la ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
3 A yeˇ uiˍ ve na hkawˇ cawˬ la ve yoˬ. Oˇ ve lehˬ Iˉsaˍreˍlaˆ chaw ve jawˇ mawˇ maˇ daꞈ ve awˬ ceuˬ leh daꞈ ve awˬ ceuˬ te jaw ve htawˇ, oˇ ve teˇ gʼaˇ Yaˬhoˉvaˬ mehˆ gʼuˇ suhˍ lo ka tiꞈ yeˬ ve tehꞈ yawˇ hkʼaˬ hkʼe ve htaꞈ nyi leh dawˇ cheˆ ve le? Yaˬhoˉvaˬ nyi hkʼaˇ suh tuˬ ngaˬ hui aˬ htoꞈ ma gʼa te cawˇ ve, na hkawˇ chi ve ngaˬ hui na gʼa tuˬ ga laˇ ve yoˬ. (1) Yawˇ ve nyi ma, (2) yawˇ venˇ baˆ dawˇ hpfuhˆ ve hehˉ laˇ, leh (3) yawˇ awˬ tehˬ oˉ kʼoˍ pui ve htaꞈ gʼa ga piˇ ve laˇ? Yaˬhoˉvaˬ chi ve teˇ hpaˍ htaꞈ cuˇ leh Iˉsaˍreˍlaˆ chaw ve jawˇ mawˇ htaꞈ dawˇ cheˆ piˇ ve teˇ geh henˇ tuˬ yoˬ.
YAWˇ HUI YAˬHOˉVAˬ VE KANˉ NYI MA AWˬ TAWˬ HKʼA GAˬ TE VE
4. Daꞈ ve jawˇ mawˇ leh maˇ daꞈ ve jawˇ mawˇ hkʼaˬ hkʼe peun daꞈ ve le?
4 Iˉsaˍreˍlaˆ chaw ve jawˇ mawˇ Yawˇshaˍhpaˆ b lehˬ “Gʼuiˬ sha nyi ma cawˇ ve kanˉ htaꞈ tiˉ” te ve yoˬ. (2 Raˍsaˍvanˍ 22:9) Liꞈ hpu hkʼaw Yawˇshiˆ htaꞈ kʼoˆ taˍ ve, ‘jawˇ mawˇ Yawˇshiˆ hkʼa shuˍ, nyi ma hkʼa peu˗eˬ, Gʼuiˬ sha htaꞈ haꞈ ve jawˇ mawˇ teˇ gʼaˇ kaꞈ maˇ cawˬ jaw sheˍ.’ (2 Jawˇmawˇ 23:25) Hkʼe kʼo, peuˬ hkʼawꞈ nawˉ jawˇ mawˇ Sawˉlaꞈmonˍ maˇ daꞈ ve awˬ ceuˬ htaꞈ te ve hkʼaˬ hkʼe hpehꞈ ve le? Liꞈ hpu hkʼaw kʼoˆ ve, ‘yawˇ lehˬ Gʼuiˬ sha htaꞈ ka tiꞈ maˇ yeˬ ve yoˬ.’ (1 Jawˇmawˇ 11:4) Chi hkʼoˆ kaꞈ, Liꞈ hpu hkʼaw maˇ daꞈ ve jawˇ mawˇ Aˍbiˇyaˆ htaꞈ kaꞈ kʼoˆ sheˍ ve, yawˇ “Gʼuiˬ sha htaꞈ ka tiꞈ maˇ yeˬ” ve yoˬ.—1 Jawˇmawˇ 15:3.
5. Yaˬhoˉvaˬ ve kanˉ nyi ma awˬ tawˬ hkʼa gaˬ te ve aˬ htoꞈ ma htaꞈ kʼoˆ gaˇ ve le?
5 Chi hkʼe hpehꞈ ve kʼo, Yaˬhoˉvaˬ ve kanˉ nyi ma awˬ tawˬ hkʼa gaˬ te ve aˬ htoꞈ ma kʼoˆ gaˇ ve le? Yaˬhoˉvaˬ ve kanˉ nyi ma awˬ tawˬ hkʼa gaˬ te ve lehˬ, awˬ liˇ cawˬ taˍ ve hkʼe ceh maˇ te. Yaꞈ hkʼaˇ, yawˇ Yaˬhoˉvaˬ ve kanˉ te ve lehˬ, yawˇ htaꞈ haꞈ leh yawˆ yan ve pa taw yoˬ. Leh yawˇ hkʼaˬ htaˆ kaꞈ chi hkʼe te tuˬ yoˬ.
6. Ngaˬ hui hkʼaˬ htaˆ kaꞈ Yaˬhoˉvaˬ htaꞈ nyi ma awˬ tawˬ hkʼa gaˬ haꞈ tuˬ hkʼaˬ hkʼe te gʼa ve le? (Tawˇ naˉ ve 4:23; Maꞈhtehˍ 5:29, 30)
6 Ngaˬ hui daꞈ ve jawˇ mawˇ htaꞈ henˇ yuˬ leh Yaˬhoˉvaˬ htaꞈ nyi ma awˬ tawˬ hkʼa gaˬ hkʼaˬ hkʼe te haꞈ gʼa tuˬ le? Ngaˬ hui htaꞈ heuˆ la kuiˬ cawˬ ve maˇ daꞈ ve teˇ hpaˍ htaꞈ jaw kʼai ve kʼo, te gʼa ve yoˬ. Tawˇ pa haˉ te kʼo, pyawˍ ve awˬ ceuˬ maˇ keunˍ ve, ngaˬ hui Yaˬhoˉvaˬ htaꞈ nyi ma awˬ tawˬ hkʼa gaˬ maˇ haꞈ tuˬ te laˇ gʼa ve yoˬ. Maˇ daꞈ ve chaw htaꞈ awˬ chawˇ te ve, leh hpu htaꞈ haꞈ ve kaꞈ ngaˬ hui Yaˬhoˉvaˬ htaꞈ nyi ma awˬ tawˬ hkʼa gaˬ, maˇ haꞈ tuˬ te laˇ gʼa ve yoˬ. Ngaˬ hui Yaˬhoˉvaˬ htaꞈ hkʼa dehꞈ maˇ haꞈ tuˬ te laˇ ve teˇ ceuˬ ceuˬ htaꞈ mawˬ ve kʼo, ngaˬ hui laꞈ haˉ gu cawˇ ve yoˬ.—Tawˇ naˉ ve 4:23; Maꞈhtehˍ 5:29, 30 gʼaw sheˍ.
7. Maˇ daꞈ ve awˬ ceuˬ teˇ hpaˍ htaꞈ ngaˬ hui jaw kʼai tuˬ aˬ htoꞈ ma te a yeˇ uiˍ jaˇ ve le?
7 Ngaˬ hui Yaˬhoˉvaˬ htaꞈ nyi ma awˬ tawˬ hkʼa gaˬ gʼa haꞈ leh teˇ ceuˬ˗ehˬ kaꞈ yawˇ htaꞈ maˇ htaꞈ tuˬ maˇ te laˇ tcuh. Ngaˬ hui shaˍ tiꞈ maˇ te ve kʼo, a shu yawˇ awˬ to htaꞈ heˍ leh ngaˬ hui Yaˬhoˉvaˬ ve kanˉ hkʼa dehꞈ te chehˇ ve kʼo, maˇ daꞈ ve heuˆ la kuiˬ htaꞈ shaˍ tiꞈ te tuˬ maˇ loˍ tehꞈ dawˇ la ve yoˬ. Awˬ lawn chi ve htaꞈ teˇ geh dawˇ nyi sheˍ. Haw jaˇ ve teˇ nyi htaˇ, nawˬ aˉ hkʼaw lo kʼawꞈ la leh Eh (air) gawˬ˗e hpaw ve yoˬ. Yaꞈ hkʼaˇ, nawˬ Eh hpaw leh yehˬ miˉ leh yehˬ miˉ ehˉ maˇ hoˆ ve kʼo, nawˬ dawˇ kʼo gawˬ tuˬ hehˉ laˇ? Awˬ lawn kʼo, haw jaˇ ve awˬ shaˉ nawˬ ve aˉ hkʼaw lo loꞈ la ve yoˬ. A yeˇ uiˍ jaˇ ve lehˬ aˬ htoꞈ ma le? Ngaˬ hui Yaˬhoˉvaˬ geh meuˆ daꞈ tuˬ ga laˇ gʼa ve yonˍ hkʼaˇ, co ha hpawˇ ve caˇ tuˬ htaꞈ ceh tiˉ gʼa cawˇ ve maˇ heˆ. Mvuhˇ haw shaˉ haw ve aˉ hkʼaw lo maˇ gʼa loꞈ la tuˬ yehˬ miˉ gʼa hoˆ cawˇ ve yoˬ. Chi ve hkʼa shuˍ shuˍ, maˇ daꞈ ve awˬ ceuˬ ngaˬ hui ve nyi ma hkʼaw maˇ gʼa loꞈ la tcuh leh maˇ gʼa cawˬ tcuh ve yoˬ.—Eˇfeˇsuꞈ 2:2.
YAWˇ HUI VENˇ BAˆ DAWˇ HPFUHˆ VE
8-9. Jawˇ mawˇ Daˍviˆ leh jawˇ mawˇ Heˍsaˍkiˆ beˆ maˍ piˇ ve htaꞈ gʼa htaˇ, yawˇ hui hkʼaˬ hkʼe te ve le? (Awˬ htaꞈ hpawˇ ve awˬ han htaꞈ nyi sheˍ.)
8 Chi awˬ gʼuˇ suhˍ htaˇ gʼa henˇ˗oˬ ve hkʼa shuˍ, jawˇ mawˇ Daˍviˆ venˇ baˆ uiˍ jaˇ ve htaꞈ te ve yoˬ. Yaꞈ hkʼaˇ, tcuh kaˍ paˍ Naˍtanˍ lehˬ Daˍviˆ venˇ baˆ te ve htaꞈ Yaˬhoˉvaˬ hkʼaˬ hkʼe dawˇ ve yawˇ htaꞈ kʼoˆ piˇ tcuh ve yoˬ. Hkʼe te leh, Daˍviˆ nyi ma nuˇ nehˬ ve hkʼaw venˇ baˆ dawˇ hpfuhˆ ve yoˬ. (2 Saˍmo˗eˍlaˆ 12:13) Leh Chiˇ mvuh ve liꞈ kaˇ nanˉ uiˍ 51 hkʼaw Daˍviˆ ve tawˇ hkawˇ yawˇ te ve awˬ ceuˬ nyi ma luˬ jaˇ leh venˇ baˆ dawˇ hpfuhˆ ve tehꞈ, ngaˬ hui hkʼa tawˍ lehˆ gʼa mawˬ ve yoˬ. Daˍviˆ Naˍtanˍ htaꞈ heˍ piˇ leh yawˇ venˇ baˆ te ve htaꞈ maˇ ciˍ yanˍ laˇ tuˬ, nyi ma luˬ ve hkʼe ceh tiˉ te ve maˇ heˆ.—Chiˇ mvuh ve 51:3, 4, 17.
9 Jawˇ mawˇ Heˍsaˍkiˆ kaꞈ Yaˬhoˉvaˬ htaꞈ venˇ baˆ te yaꞈ ve yoˬ. Liꞈ hpu hkʼaw kʼoˆ ve, yawˇ “nyi ma uiˍ chehˇ ve pa taw, Gʼuiˬ sha nyi ma zuhˆ ve awˬ ceuˬ Yuˇdaꞈ mvuhˇ miˬ leh Yeˍruˆsaˍlehnˍ venˇ awˬ hkʼoˆ lo gaˬ la ve yoˬ.” (2 Raˍsaˍvanˍ 32:25) Aˬ htoꞈ ma te Heˍsaˍkiˆ nyi ma uiˍ ve chaw hpehꞈ la ve le? Awˬ lawn kʼo, yawˇ paw sha jaˇ ve, Aˍsuˇriˆ chaw htaꞈ bawˆ gʼaˇ ve, leh yawˇ naˬ ve anˇ lawꞈ lawꞈ ve hkʼaw na˗e la ve tehꞈ dawˇ ve pa taw yoˬ. Hkʼe te leh, yawˇ awˬ nu ve chaw aꞈ kehˉ uiˍ ve tehꞈ dawˇ leh, yawˇ uiˍ muiˬ caˆ muiˬ ve pa taw hkʼaˬ hkʼe taw paw sha ve, Baˍbuˍlonˍ chaw htaꞈ te maˍ piˇ gaˇ ve yoˬ hehˉ. Leh tcuh kaˍ paˍ Iˉsaˍyaˆ yawˇ htaꞈ kʼoˆ piˇ ve, Yaˬhoˉvaˬ yawˇ htaꞈ beuꞈ jaˇ ve yoˬ. (2 Jawˇmawˇ 20:12-18) Yaꞈ hkʼaˇ, Daˍviˆ hkʼa shuˍ shuˍ, Heˍsaˍkiˆ nyi ma nuˇ nehˬ ve hkʼaw venˇ baˆ dawˇ hpfuhˆ ve yoˬ. (2 Raˍsaˍvanˍ 32:26) Awˬ bon gʼa ve lehˬ, Heˍsaˍkiˆ ka tiꞈ yeˬ ve jawˇ mawˇ hpehꞈ ve tehꞈ Yaˬhoˉvaˬ shawˍ leh “yawˇ lehˬ Gʼuiˬ sha nyi ma cawˇ ve kanˉ htaꞈ tiˉ te ve yoˬ.”—2 Jawˇmawˇ 18:3.
Jawˇ mawˇ Daˍviˆ leh jawˇ mawˇ Heˍsaˍkiˆ htaꞈ tcuh kaˍ paˍ beˆ maˍ piˇ htaˇ, nyi ma nuˇ nehˬ te leh venˇ baˆ dawˇ hpfuhˆ ve (Awˬ tawn 8-9 nyi sheˍ)
10. Jawˇ mawˇ Aˍmaˍziˆ htaꞈ maˍ piˇ htaˇ yawˇ hkʼaˬ hkʼe te ve le?
10 Yuˇdaꞈ ve jawˇ mawˇ Aˍmaˍziˆ lehˬ Daˍviˆ leh Heˍsaˍkiˆ htaꞈ maˇ shuˍ. Yawˇ cawˇ ve awˬ ceuˬ htaꞈ te ve htawˇ, “nyi ma pfuhˇ leh te ve maˇ heˆ.” (2 Raˍsaˍvanˍ 25:2) Yawˇ aˬ htoꞈ ma te ve le? Yaˬhoˉvaˬ yawˇ htaꞈ ga piˇ leh Eˇdonˍ chaw htaꞈ bawˆ gʼaˇ ve peuˬ hkʼawꞈ nawˉ, Aˍmaˍziˆ Eˇdonˍ chaw ve shaˉ hoꞈ htaꞈ oˉ kʼoˍ pui ve yoˬ. c Leh awˬ lawn chi Yaˬhoˉvaˬ ve tcuh kaˍ paˍ yawˇ htaꞈ shaˍ tiꞈ piˇ htaˇ, yawˇ maˇ na yuˬ leh Yaˬhoˉvaˬ ve tcuh kaˍ paˍ htaꞈ gʼaꞈ kʼoˬ piˇ ve yoˬ.—2 Raˍsaˍvanˍ 25:14-16.
11. 2 Kawˇrenˍhtuˆ liꞈ 7:9, 11 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ hkʼaˬ hkʼe gʼa te cawˇ ve le? (Awˬ han htaꞈ nyi sheˍ.)
11 Awˬ lawn chi ve teˇ hpaˍ ngaˬ hui htaꞈ hkʼaˬ hkʼe maˍ laˇ ve le? Ngaˬ hui venˇ baˆ gʼa dawˇ hpfuhˆ leh maˇ kʼawꞈ te yaꞈ tuˬ te gʼa ve hkʼe gʼa te ve yoˬ. Awˬ lawn i ve htawˇ, nyi haꞈ shaˉ paˍ ngaˬ hui htaꞈ beˆ maˍ laˇ ve kʼo, hkʼaˬ hkʼe te cawˇ ve le? Ngaˬ hui htaꞈ beˆ maˍ laˇ ve gʼa htaˇ, Yaˬhoˉvaˬ ngaˬ hui htaꞈ maˇ haꞈ˗oˬ ve tehꞈ maˇ dawˇ leh, nyi haꞈ shaˉ paˍ ngaˬ hui htaꞈ maˇ dawˇ cawˇ ve tehꞈ kaꞈ maˇ dawˇ nyi cawˇ ve yoˬ. Daꞈ ve jawˇ mawˇ hpehꞈ ve htawˇ, beˆ maˍ piˇ ve leh shaˍ tiꞈ piˇ ve htaꞈ kaꞈ gʼa ve, ngaˬ hui maˇ leunˇ cawˇ ve yoˬ. (Heˍbrehˇ 12:6) Ngaˬ hui htaꞈ beˆ maˍ laˇ htaˇ, ngaˬ hui te cawˇ ve awˬ ceuˬ lehˬ, (1) nyi ma nuˇ nehˬ ve hkʼaw na yuˬ ve, (2) a shu yawˇ ve te hkʼaˇ dawˇ hkʼaˇ pa ve, leh (3) Yaˬhoˉvaˬ ve kanˉ kaiˬ ve hkʼaw te cawˇ ve yoˬ. Ngaˬ hui venˇ baˆ dawˇ hpfuhˆ ve kʼo, Yaˬhoˉvaˬ venˇ baˆ hpehˇ laˇ tuˬ yoˬ.—2 Kawˇrenˍhtuˆ 7:9, 11 gʼaw sheˍ.
Ngaˬ hui htaꞈ awˬ nu ve chaw shaˍ tiꞈ peꞈ laˇ htaˇ, (1) nyi ma nuˇ nehˬ te leh haꞈ yuˬ ve, (2) te hkʼaˇ dawˇ hkʼaˇ pa ve, leh (3) Yaˬhoˉvaˬ ve kanˉ caˉ leh te tuˬ dawˇ teh taˍ ve (Awˬ tawn 11 nyi sheˍ) f
YAWˇ HUI AWˬ TEHˬ VE HTAꞈ Oˉ KʼOˍ PUI VE
12. A yeˇ uiˍ jaˇ ve lehˬ, daꞈ ve jawˇ mawˇ leh maˇ daꞈ ve jawˇ mawˇ htaꞈ hkʼaˬ hkʼe peun daꞈ ve le?
12 Yaˬhoˉvaˬ mehˆ gʼuˇ suhˍ daꞈ ve jawˇ mawˇ lehˬ, awˬ tehˬ ve oˉ kʼoˍ pui ve hpawˇ chehˇ leh mvuhˇ miˬ yaˇ kaꞈ Yaˬhoˉvaˬ htaꞈ oˉ kʼoˍ pui tuˬ ga piˇ ve yoˬ. Ngaˬ hui gʼa henˇ˗oˬ ve hkʼa shuˍ, daꞈ ve jawˇ mawˇ chi teˇ hpaˍ kaꞈ te yaꞈ puiˉ ve yoˬ. Chi hkʼe hpehꞈ ve htawˇ, yawˇ hui Yaˬhoˉvaˬ htaꞈ yawˆ yan ve, yawˇ teˇ gʼaˇ htaꞈ ceh tiˉ oˉ kʼoˍ pui leh Iˉsaˍreˍlaˆ mvuhˇ miˬ hkʼaw shaˉ hoꞈ hkʼa peu˗eˬ htaꞈ te luˬ ve yoˬ. d
13. Aˬ htoꞈ ma te Yaˬhoˉvaˬ lehˬ Aˍhaˆ maˇ daꞈ ve jawˇ mawˇ hpehꞈ ve tehꞈ dawˇ cheˆ piˇ ve le?
13 Yaˬhoˉvaˬ mehˆ gʼuˇ suhˍ maˇ daꞈ ve jawˇ mawˇ kʼo, hkʼaˬ hkʼe hpehꞈ ve le? Yawˇ hui te ve teˇ ceuˬ le le maˇ daꞈ ve maˇ heˆ. Haiˬ jaˇ ve jawˇ mawˇ Aˍhaˆ kaꞈ Naˍboˆ suh˗e tuˬ yawˇ kaꞈ te piˇ ve tehꞈ gʼa shiˍ htaˇ, yawˇ nyi ma nuˇ nehˬ ve hkʼaw nyi ma luˬ jaˇ ve tehꞈ hpeuꞈ maw laˇ ve yoˬ. (1 Jawˇmawˇ 21:27-29) Chi hkʼoˆ kaꞈ, yawˇ venˇ teˇ hpaˍ htaꞈ te leh Iˉsaˍreˍlaˆ chaw ve canˇ paˍ htaꞈ kaꞈ te luˬ piˇ ve yoˬ. (1 Jawˇmawˇ 20:21, 29; 22:39) Yaꞈ hkʼaˇ, Aˍhaˆ haiˬ jaˇ ve htaꞈ te ve lehˬ, shaˉ hoꞈ htaꞈ oˉ kʼoˍ pui ve yoˬ. Chi ve lehˬ yawˇ ve awˬ miˇ ma geh maˇ daꞈ ve dawˇ hkʼaˇ gʼa ve pa taw yoˬ. Leh chi hkʼe te ve htaꞈ yawˇ venˇ baˆ maˇ dawˇ hpfuhˆ.—1 Jawˇmawˇ 21:25, 26.
14. (a) Aˬ htoꞈ ma te Yaˬhoˉvaˬ lehˬ Yawˇbaoˍ maˇ daꞈ ve jawˇ mawˇ hpehꞈ ve tehꞈ shawˍ ve le? (b) Iˉsaˍreˍlaˆ chaw ve jawˇ mawˇ maˇ daꞈ ve maˇ˗awˍ ve aˬ htoꞈ ma shuˍ daꞈ ve le?
14 Maˇ daꞈ ve jawˇ mawˇ Yawˇbaoˍ ve awˬ lawn htaꞈ teˇ geh kʼawꞈ nyi sheˍ. Awˬ lawn chi ve hkʼaw awˉ lawˉ htaˇ gʼa henˇ˗oˬ ve hkʼa shuˍ, Yawˇbaoˍ daꞈ ve laiˉ ceuˬ htaꞈ te ve yoˬ. Yaꞈ hkʼaˇ, yawˇ mvuhˇ miˬ htaꞈ uˉ peunˍ˗oˬ htaˇ, yawˇ Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te leh shaˉ hoꞈ htaꞈ oˉ kʼoˍ pui ve yoˬ. (2 Raˍsaˍvanˍ 12:1) Peuˬ hkʼawꞈ nawˉ, yawˇ Yaˬhoˉvaˬ htaꞈ oˉ kʼoˍ kʼawꞈ pui la ve yoˬ. Peuˬ leh yawˇ shaˉ hoꞈ htaꞈ oˉ kʼoˍ teˇ pawˆ kʼawꞈ ca pui˗e ve yoˬ. (1 Jawˇmawˇ 14:21-24) Shaˉ hoꞈ htaꞈ oˉ kʼoˍ pui ve Yawˇbaoˍ leh Aˍhaˆ ceh tiˉ maˇ heˆ. Iˉsaˍreˍlaˆ chaw ve jawˇ mawˇ maˇ˗awˍ ve shaˉ hoꞈ htaꞈ oˉ kʼoˍ pui leh mvuhˇ miˬ yaˇ kaꞈ pui tuˬ awˬ gʼaˇ piˇ ve yoˬ. Jawˇ mawˇ hkʼaˬ ve teˇ gʼaˇ daꞈ ve, maˇ daꞈ ve tehꞈ Yaˬhoˉvaˬ shawˍ tuˬ, yawˇ mehˆ gʼuˇ suhˍ awˬ tehˬ ve htaꞈ oˉ kʼoˍ pui ve a yeˇ uiˍ jaˇ ve tehꞈ hkʼa tawˍ lehˆ gʼa mawˬ ve yoˬ.
15. Awˬ tehˬ ve htaꞈ oˉ kʼoˍ pui ve aˬ htoꞈ ma te Yaˬhoˉvaˬ awˬ pon a yeˇ uiˍ jaˇ ve le?
15 Aˬ htoꞈ ma te oˉ kʼoˍ pui ve Yaˬhoˉvaˬ awˬ pon a yeˇ uiˍ jaˇ ve le? Awˬ hkʼaˇ teˇ hkʼaˇ lehˬ, jawˇ mawˇ lehˬ mvuhˇ miˬ yaˇ awˬ pon awˬ tehˬ ve oˉ kʼoˍ pui ve htaꞈ awˉ lawˉ gʼa sheh kʼai piˇ ve yoˬ. Chi hkʼoˆ kaꞈ, jawˇ mawˇ leh Iˉsaˍreˍlaˆ chaw shaˉ hoꞈ htaꞈ oˉ kʼoˍ pui ve lehˬ, venˇ baˆ uiˍ jaˇ ve htaꞈ te leh yawˇ hui maˇ daꞈ ve awˬ ceuˬ htaꞈ te tuˬ te piˇ ve yoˬ. (Hawˇseˍ 4:1, 2) Jawˇ mawˇ leh Iˉsaˍreˍlaˆ chaw ceuˬ hkʼa peu˗eˬ Yaˬhoˉvaˬ ve chaw hpehꞈ ve yoˬ. Chi htaꞈ pa taw, yawˇ hui Yaˬhoˉvaˬ htaꞈ ka tiꞈ maˇ yeˬ leh shaˉ hoꞈ htaꞈ oˉ kʼoˍ pui ve lehˬ, haˉ chawˇ haˉ paˆ te ve htaꞈ shuˍ ve yoˬ. (Yeˍraˍmiˆ 3:8, 9) Haˉ chawˇ haˉ paˆ te ve lehˬ, awˬ ca htaꞈ ka tiꞈ maˇ yeˬ leh nyi ma luˬ jaˇ tuˬ te piˇ ve yoˬ. Chi ve hkʼa shuˍ shuˍ, Yaˬhoˉvaˬ ve kanˉ te leh yawˇ htaꞈ awˬ to chiˇ aꞈ piˇ˗oˬ ve chaw lehˬ, yawˇ hui Yaˬhoˉvaˬ htaꞈ ka tiꞈ maˇ yeˬ leh shaˉ hoꞈ htaꞈ oˉ kʼoˍ pui ve kʼo, yawˇ nyi ma luˬ jaˇ tuˬ te piˇ ve yoˬ. e—Bon maˍ ve 4:23, 24.
16. Yaˬhoˉvaˬ mehˆ gʼuˇ suhˍ hteˇ ve chaw leh maˇ hteˇ ve chaw hkʼaˬ hkʼe peun daꞈ ve le?
16 Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Shaˉ hoꞈ htaꞈ oˉ kʼoˍ pui ve teˇ ceuˬ le le ngaˬ hui maˇ caˉ daꞈ cawˇ ve yoˬ. Yaꞈ hkʼaˇ, ngaˬ hui awˬ tehˬ ve oˉ kʼoˍ pui ve hpawˇ chehˇ leh Yaˬhoˉvaˬ ve kanˉ kaiˬ ve hkʼaw te cawˇ ve yoˬ. Yaˬhoˉvaˬ mehˆ gʼuˇ suhˍ daꞈ ve chaw leh haiˬ ve chaw hkʼaˬ hkʼe peun daꞈ ve, tcuh kaˍ paˍ Maˍlaˍhkiˆ hkʼa tawˍ lehˆ kʼoˆ taˍ ve yoˬ. Yawˇ kʼoˆ ve, “hteˇ ve cawˇ ve chaw leh haiˬ ve chaw, ngaˬ ve tawˇ htaꞈ na yuˬ ve chaw leh maˇ na yuˬ ve chaw, hkʼaˬ ma peun daꞈ ve htaꞈ ngaˬ ve chaw teˇ hpaˍ gʼa mawˬ tuˬ yoˬ.” (Maˍlaˍhkiˆ 3:18) Chi htaꞈ pa taw, Yaˬhoˉvaˬ mehˆ gʼuˇ suhˍ ngaˬ hui hteˇ ve cawˇ ve chaw hpehꞈ gaˇ ve kʼo, ngaˬ hui yawˇ ve kanˉ maˇ te tuˬ teˇ ceuˬ˗ehˬ kaꞈ maˇ te laˇ tcuh cawˇ ve yoˬ. Ngaˬ hui maˇ biˇ ve maˇ heˆ leh te yaꞈ ve htawˇ, Yaˬhoˉvaˬ ve kanˉ maˇ te ve lehˬ venˇ baˆ uiˍ jaˇ ve awˬ ceuˬ hpehꞈ ve yoˬ.
17. Ngaˬ hui heuˆ daꞈ tuˬ ve chaw htaꞈ leuˆ yuˬ htaˇ, aˬ htoꞈ ma te shaˍ tiꞈ gʼa te cawˇ ve le?
17 Nawˬ chaw haˉ yaˇ miˇ haˉ hpehꞈ leh heuˆ daꞈ tuˬ dawˇ nyi ve kʼo, nawˬ ve awˬ ca te la tuˬ ve chaw htaꞈ leuˆ yuˬ ve lehˬ, Maˍlaˍhkiˆ ve tawˇ hkawˇ nawˬ htaꞈ hkʼaˬ hkʼe ga laˇ ve le? Nawˬ nyi ma daꞈ ve chaw teˇ gʼaˇ htaꞈ mawˬ daꞈ ve yoˬ hehˉ. Yaꞈ hkʼaˇ, yawˇ Yaˬhoˉvaˬ ve kanˉ maˇ te ve kʼo, yawˇ Yaˬhoˉvaˬ mehˆ gʼuˇ suhˍ daꞈ ve chaw hpehꞈ˗aw laˇ? (2 Kawˇrenˍhtuˆ 6:14) Leh nawˬ chaw chi teˇ gʼaˇ htaꞈ heuˆ daꞈ ve kʼo, nawˬ Yaˬhoˉvaˬ ve kanˉ ka tiꞈ yeˬ ve hkʼaw te tuˬ yawˇ ga laˇ˗aw laˇ? Jawˇ mawˇ Sawˉlaꞈmonˍ ve awˬ lawn htaꞈ dawˇ nyi sheˍ. Sawˉlaꞈmonˍ ve awˬ miˇ ma teˇ hpaˍ te hkʼaˇ dawˇ hkʼaˇ daꞈ ve teˇ ceuˬ ceuˬ cawˬ ve yoˬ. Yaꞈ hkʼaˇ, chi hkʼe hpehꞈ ve htawˇ, yawˇ hui Yaˬhoˉvaˬ htaꞈ oˉ kʼoˍ maˇ pui ve pa taw, Sawˉlaꞈmonˍ awˬ meu˗eˇ awˬ meu˗eˇ shaˉ hoꞈ htaꞈ oˉ kʼoˍ pui tuˬ te piˇ ve yoˬ.—1 Jawˇmawˇ 11:1, 4.
18. Awˬ pa awˬ e yaˇ htaꞈ aˬ htoꞈ ma ve awˬ lawn maˍ piˇ cawˇ ve le?
18 Awˬ pa awˬ e hpehꞈ ve chaw˗oˬ, Iˉsaˍreˍlaˆ chaw ve jawˇ mawˇ teˇ hpaˍ ve awˬ lawn yehˇ leh, nawˬ ve yaˇ Yaˬhoˉvaˬ ve kanˉ nyi ma pfuhˇ ve hkʼaw te tuˬ maˍ piˇ gʼa ve yoˬ. Iˉsaˍreˍlaˆ chaw ve jawˇ mawˇ daꞈ ve chaw, leh haiˬ ve chaw hpehꞈ ve htaꞈ Yaˬhoˉvaˬ shawˍ tuˬ te piˇ ve lehˬ, yawˇ awˬ tehˬ ve htaꞈ oˉ kʼoˍ pui ve laˇ, nawˬ ve yaˇ mawˬ tuˬ a yeˇ uiˍ jaˇ. Hkriꞈ yaˇ ve awˬ vuiˬ teˇ hpaˍ Liꞈ hpu gʼaw ve, Liꞈ hpu henˇ ve, hpawnˬ daꞈ˗e ve, hto toˇ˗e ve, nawˬ kʼoˆ ve leh te ve awˬ ceuˬ nawˬ ve yaˇ mawˬ tuˬ maˍ piˇ gʼa ve yoˬ. Chi ve teˇ hpaˍ lehˬ, awˬ nu ve awˬ ceuˬ aꞈ kehˉ a yeˇ uiˍ jaˇ ve yoˬ. (Maꞈhtehˍ 6:33) Nawˬ chi hkʼe maˇ te ve kʼo, yaˇ Yaˬhoˉvaˬ ve Shaˉhkiˆhkanˍ ve chaw hpehꞈ ve lehˬ, awˬ pa awˬ e te ve htaꞈ pa taw, te ve tehꞈ dawˇ la ve yoˬ. Leh Yaˬhoˉvaˬ htaꞈ oˉ kʼoˍ pui ve a shaꞈ teꞈ kuiˬ hkʼaw a yeˇ uiˍ jaˇ ve tehꞈ yaˇ maˇ dawˇ tuˬ te piˇ la ve yoˬ. Leh yaˇ Gʼuiˬ sha ve kanˉ maˇ te˗oˬ tuˬ kaꞈ te piˇ la ve yoˬ.
19. Yaˬhoˉvaˬ ve kanˉ maˇ te˗oˬ ve chaw htaꞈ aˬ htoꞈ ma dawˇ law gʼa sheˍ ve le? (Awˇ ceˍ awˇ fa “ Nawˬ Yaˬhoˉvaˬ geh kʼawꞈ kʼawꞈ la gʼa ve!” htaꞈ nyi sheˍ.)
19 Yaˬhoˉvaˬ ve kanˉ maˇ te˗oˬ ve chaw awˬ pon kʼo, yawˇ ve awˬ chawˇ kʼawꞈ te la tuˬ sheˍ ve tehꞈ dawˇ law gʼa˗aw laˇ? Yawˇ hui venˇ baˆ dawˇ hpfuhˆ leh awˬ tehˬ ve htaꞈ oˉ kʼoˍ kʼawꞈ pui la ve kʼo, dawˇ law gʼa ve yoˬ. Yawˇ hui nyi ma nuˇ nehˬ te leh nyi haꞈ shaˉ paˍ ga laˇ tcuh cawˇ ve yoˬ. (Yaˍkoˆ 5:14) Yaˬhoˉvaˬ ve kanˉ te ve chaw kʼawꞈ hpehꞈ la leh yawˇ htaꞈ awˬ chawˇ te la ve lehˬ awˬ hpfuhˇ hkʼawꞈ jaˇ ve yoˬ.
20. Ngaˬ hui daꞈ ve jawˇ mawˇ htaꞈ henˇ yuˬ ve kʼo, Yaˬhoˉvaˬ ngaˬ hui htaꞈ hkʼaˬ hkʼe shawˍ laˇ tuˬ ve le?
20 Iˉsaˍreˍlaˆ chaw ve jawˇ mawˇ ve awˬ lawn ngaˬ hui htaꞈ aˬ htoꞈ ma maˍ laˇ ve le? Ngaˬ hui Yaˬhoˉvaˬ ve kanˉ nyi ma awˬ tawˬ hkʼa gaˬ te ve kʼo, daꞈ ve jawˇ mawˇ hkʼe hpehꞈ ve yoˬ. Ngaˬ hui te yaꞈ puiˉ ve kʼo, ngaˬ hui htaꞈ maˍ laˇ gʼa ve lehˬ, venˇ baˆ dawˇ hpfuhˆ leh beˆ maˍ laˇ ve htaꞈ haꞈ yuˬ ve yoˬ. Awˬ tehˬ ve Gʼuiˬ sha teˇ gʼaˇ tiˉ htaꞈ oˉ kʼoˍ pui ve a yeˇ hkʼaˬ hkʼe taw uiˍ ve htaꞈ tawnˇ taˍ sheˍ. Nawˬ Yaˬhoˉvaˬ htaꞈ ka tiꞈ yeˬ ve kʼo, Yaˬhoˉvaˬ mehˆ gʼuˇ suhˍ nawˬ cawˇ ve awˬ ceuˬ htaꞈ te ve tehꞈ yawˇ shawˍ laˇ tuˬ yoˬ.
KʼA MUIˬ HKAWˇ 45 Ngaˬ ve nyi ma hkʼaw cawˬ ve teˇ hpaˍ
a Awˬ lawn chi ve hkʼaw “Iˉsaˍreˍlaˆ chaw hui ve jawˇ mawˇ” lehˬ, Yaˬhoˉvaˬ ve mvuhˇ miˬ yaˇ htaꞈ uˉ peunˍ jaw ve jawˇ mawˇ teˇ gʼaˇ le le htaꞈ kʼoˆ gaˇ ve yoˬ. Yuˇdaꞈ mvuhˇ miˬ htaꞈ uˉ peunˍ ve 2 chaw ceuˬ ve jawˇ mawˇ, Iˉsaˍreˍlaˆ 10 chaw ceuˬ htaꞈ uˉ peunˍ ve jawˇ mawˇ, maˇ heˆ leh Iˉsaˍreˍlaˆ 12 chaw ceuˬ htaꞈ uˉ peunˍ ve jawˇ mawˇ htaꞈ kaꞈ kʼoˆ gaˇ ve yoˬ.
b KʼAWꞈ KʼOˆ MAˍ TAˍ VE: Liꞈ hpu hkʼaw “nyi ma” kʼoˆ ve tawˇ hkawˇ ngaˬ hui nyi ma hkʼaw cawˬ ve awˬ ceuˬ htaꞈ kʼoˆ maˍ laˇ ve yoˬ. Chi ve lehˬ loˍ ve, dawˇ ve, te gaˇ ve, leh ngaˬ hui dawˇ teh taˍ ve chi ve teˇ hpaˍ hpehꞈ ve yoˬ.
c Awˬ nu ve jawˇ mawˇ hkʼaˬ ve teˇ mvuhˇ miˬ htaꞈ bawˆ gʼaˇ ve kʼo, yawˇ hui bawˆ gʼaˇ ve mvuhˇ miˬ ve shaˉ hoꞈ htaꞈ oˉ kʼoˍ pui ve lehˬ awˬ liˇ hkʼe hpehꞈ ve yoˬ.
d Jawˇ mawˇ Aˍsaˍ venˇ baˆ uiˍ jaˇ ve htaꞈ te jaw ve yoˬ. (2 Raˍsaˍvanˍ 16:7, 10) Yaꞈ hkʼaˇ, yawˇ htaꞈ Liꞈ hpu hkʼaw daꞈ ve jawˇ mawˇ hpehꞈ ve tehꞈ kʼoˆ ve yoˬ. Teˇ pawˆ htaˇ yawˇ maˇ te cawˇ ve awˬ ceuˬ htaꞈ te ve pa taw, Yaˬhoˉvaˬ tcuh kaˍ paˍ htaꞈ peu piˇ leh yawˇ htaꞈ shaˍ tiꞈ piˇ tcuh ve yoˬ. Awˉ lawˉ htaˇ yawˇ maˇ na yuˬ ve htawˇ, peuˬ hkʼawꞈ nawˉ yawˇ venˇ baˆ dawˇ hpfuhˆ la ve yoˬ. Yaˬhoˉvaˬ Aˍsaˍ htaꞈ maˇ daꞈ ve hpawˇ aꞈ kehˉ daꞈ ve hpawˇ nyi ve yoˬ. Leh a yeˇ uiˍ jaˇ ve lehˬ, Aˍsaˍ Yaˬhoˉvaˬ teˇ gʼaˇ htaꞈ ceh tiˉ oˉ kʼoˍ pui leh yawˇ uˉ peunˍ ve mvuhˇ miˬ hkʼaw shaˉ hoꞈ teˇ hpaˍ htaꞈ coˇ caˇ leh te luˬ ve yoˬ.—1 Jawˇmawˇ 15:11-13; 2 Raˍsaˍvanˍ 14:2-5.
e Moˉseˍ ve awˬ liˇ tawˇ hkawˇ awˉ lawˉ 2 hkawˇ hkʼaw kʼoˆ ve, Yaˬhoˉvaˬ teˇ gʼaˇ htaꞈ ceh tiˉ oˉ kʼoˍ gʼa pui leh awˬ nu ve shaˉ hoꞈ maˇ heˆ leh awˬ nu ve awˬ ceuˬ htaꞈ oˉ kʼoˍ maˇ gʼa pui.—Tawˆ kʼai ve 20:1-6.
f AWˬ HTAꞈ HPAWˇ VE AWˬ HAN HTAꞈ: A shaꞈ i ve nyi haꞈ shaˉ paˍ awˬ viˉ awˬ nyi hawˉ hkʼaˆ teˇ gʼaˇ tzuhˬ dawˬ ve htaꞈ dawˇ haˍ ve. Awˬ viˉ awˬ nyi hawˉ hkʼaˆ chi ve teˇ gʼaˇ nyi ma nuˇ nehˬ te leh beˆ maˍ piˇ ve htaꞈ na yuˬ ve. Te hkʼaˇ dawˇ hkʼaˇ pa ve, leh Yaˬhoˉvaˬ ve kanˉ ka tiꞈ yeˬ ve hkʼaw caˉ leh te ve.
