Neˆhkaw˗laˆ leh Seh˗rin kaꞈ laiˉ ceuˬ htaꞈ gʼa yeunˇ hkanˍ ve yoˬ. Hpaˉlanˍ mvuhˇ miˬ lo ve awˬ tcuhˆ puiˍ yawˇ hui htaꞈ Hkriꞈ yaˇ awˬ moˍ teˇ kaˬ lo jiˆ kʼai tcuh ve yoˬ. Yawˇ hui kʼoˆ ve, “awˉ lawˉ htaˇ ngaˬ hui ha lehˬ jaˇ. Peuˬ hkʼawꞈ nawˉ ngaˬ hui ve awˬ chawˇ htaꞈ dawˇ nawˇ jaˇ ve yoˬ. Awˬ lawn kʼo, ngaˬ hui jiˆ kʼai kuiˬ Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ kaꞈ ngaˬ hui maˇ meuˆ daꞈ sheˍ ve yoˬ.” a Chi hkʼe gʼa hpuˇ htaˇ, nawˬ ha lehˬ ve cawˬ leh nawˬ jiˆ kʼai ve Hkriꞈ yaˇ awˬ moˍ hkʼaw hkʼaˬ hkʼe ga piˇ gʼa tuˬ le? Awˬ nu ve awˬ viˉ awˬ nyi Hkriꞈ yaˇ awˬ moˍ hkʼaw jiˆ laˬ gehˇ sheˍ ve awˬ viˉ awˬ nyi htaꞈ hkʼaˬ hkʼe ga piˇ gʼa tuˬ le? Leh nawˬ Hkriꞈ yaˇ awˬ moˍ teˇ kaˬ lo jiˆ kʼai peuˬ hkʼawꞈ nawˉ, nawˬ oˇ kaˬ lo ve awˬ viˉ awˬ nyi geh awˬ gʼaˇ gʼa leh hkʼaˬ hkʼe te yawˇ hui htaꞈ awˬ gʼaˇ piˇ gʼa tuˬ le?

NAWˬ HAꞈ YUˬ GʼA TUˬ GA LAˇ GʼA VE AWˬ LIˇ AWˬ HKʼAˇ 4 CEUˬ CAWˬ VE

1. Yaˬhoˉvaˬ htaꞈ gʼaˇ va ve. (Chiˇ mvuh ve 37:5) Jaˬpanˍ mvuhˇ miˬ lo chehˇ ve Hka˗si˗mi ve awˬ hpawˇ yawˇ kanˉ te kuiˬ hkʼaw lo ve, yawˇ htaꞈ kanˉ teˇ kaˬ lo ca te tcuh ve pa taw, yawˇ 20 hkʼawꞈ chehˇ jaw ve Hkriꞈ yaˇ awˬ moˍ hkʼaw maˇ kʼawꞈ gʼa chehˇ˗o ve yoˬ. “Yaˬhoˉvaˬ yawˇ htaꞈ hkʼaˬ hkʼe beˆ maˍ laˇ tcuh ve le?” Yawˇ kʼoˆ ve, “ngaˬ nyi ma hkʼaw cawˬ ve awˬ ceuˬ hkʼa peu˗eˬ bon lawˬ ve hkʼaw Yaˬhoˉvaˬ htaꞈ kʼoˆ maˍ piˇ ve yoˬ. Ngaˬ kawˆ ve, chehˇ bawˬ ve, maˇ heˆ leh dawˇ haˍ ve htawˇ, ngaˬ bon chi hkʼe lawˬ htaˇ, ngaˬ awˬ gʼaˇ cawˬ tuˬ Yaˬhoˉvaˬ ga laˇ ve yoˬ.”

Nawˬ hkʼaˬ hkʼe te Yaˬhoˉvaˬ htaꞈ gʼaˇ hkʼa dehꞈ va gʼa tuˬ le? Suhˆ cehˬ uiˍ la gʼa sha tuˬ iˉ kaˆ hkʼa dehꞈ pfuhˍ leh miˬ hkuiˇ daꞈ ve gʼa ve hkʼa shuˍ, ngaˬ hui ve yonˍ hkʼaˇ hkʼa dehꞈ yonˍ yeˬ tuˬ, co ha hpawˇ ve caˇ tuˬ hkʼaˬ htaˆ kaꞈ gʼa gʼa cawˇ ve yoˬ. Neˆhkaw˗laˆ kʼawꞈ kʼoˆ ve, Yaˬhoˉvaˬ ve a loˍ htaꞈ gʼaꞈ te tuˬ, laiˉ gʼaˇ a shu yawˇ awˬ to yuˬ tanˇ ve awˬ lawn htaꞈ hkʼa dehꞈ dawˇ nyi ve yoˬ. Tawˇ pa haˉ te kʼo, Aˍbrnˍhanˍ, Yeˍsuˆ, leh Pawˇluꞈ yawˇ hui ve awˬ lawn yawˇ htaꞈ ga piˇ gʼa jaˇ. Awˬ lawn chi ve teˇ hpaˍ Yaˬhoˉvaˬ yawˇ htaꞈ ga laˇ tuˬ yoˬ tehꞈ yonˍ gʼa ve yoˬ. A shu yawˇ hkʼaˇ yawˇ Liꞈ hpu hkʼaˬ htaˆ kaꞈ henˇ ve kʼo, chi  ve nawˬ a shaꞈ teꞈ kuiˬ hkʼaw pa ve awˬ ceuˬ htaꞈ haꞈ yuˬ gʼa tuˬ ga laˇ leh, nawˬ jiˆ kʼai ve Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ daꞈ ve awˬ ceuˬ pehˬ piˇ gʼa tuˬ kaꞈ te laˇ ve yoˬ.

2. Taˇ tehˆ daꞈ. (Cuˇ yiˍ piˇ ve 7:10) Con Biˬniˬ mvuhˇ miˬ lo chehˇ leh Aˍmeˬriˆkaꞈ mvuhˇ miˬ lo jiˆ k’ai htaˇ, oˇ kaˬ lo ve chaw liˇ vaˇ liˇ htaꞈ yawˇ shiˍ tuˬ gʼa pa jaˇ. Yawˇ kʼoˆ ve, “ngaˬ a shu teˇ gʼaˇ htaꞈ awˬ meh kʼoˆ piˇ htaˇ, ngaˬ ve awˬ lawn yawˇ hui htaꞈ teˇ pawˆ le le gʼa kʼoˆ maˍ piˇ ve yoˬ.” Chi ve yawˇ chehˇ jaw ve chaw liˇ vaˇ liˇ htaꞈ peun daꞈ jaˇ ve pa taw, Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ yawˇ maˇ meuˆ daꞈ gaˇ tuˬ te piˇ ve yoˬ. Yaꞈ hkʼaˇ, yawˇ awˬ viˉ awˬ nyi htaꞈ hkʼa dehꞈ shiˍ daꞈ˗oˬ htaˇ, yawˇ ve dawˇ hkʼaˇ kaꞈ pa kʼai ve yoˬ. Yawˇ kʼoˆ ve, “ngaˬ hui hkʼaˬ kaˬ lo chehˇ ve htawˇ maˇ kʼoˆ, hkʼa shuˍ hpehꞈ ve tehꞈ chi teˇ hkui ngaˬ shiˍ la ve yoˬ. Yaꞈ hkʼaˇ, te tawˆ la ve awˬ hkʼaˇ maˇ shuˍ daꞈ ve ceh lawn.” Teˇ gʼaˇ leh teˇ gʼaˇ peun daꞈ ve tehꞈ haꞈ yuˬ cawˇ ve yoˬ. Chi htaꞈ pa taw, nawˬ chehˇ jaw ve Hkriꞈ yaˇ awˬ moˍ hkʼaw ve awˬ viˉ awˬ nyi leh nawˬ ca chehˇ˗e kuiˬ lo ve awˬ viˉ awˬ nyi htaꞈ taˇ tehˆ daꞈ. Gʼuˇ suhˍ peuˍ ve te ve awˬ viˉ awˬ nyi yaˇ miˇ teˇ gʼaˇ Eh˗riˆ meh ve kʼoˆ ve, “ngaˬ gʼa hpuˇ jaw ve ceh tiˉ gʼa hpuˇ tuˬ teˇ kaˬ lo chehˇ˗e ve maˇ heˆ. Yaꞈ hkʼaˇ, laiˉ ceuˬ awˬ suhˉ awˬ suhˉ gʼa hpuˇ tuˬ yoˬ tehꞈ dawˇ law taˍ ve yoˬ.”

Nyi haꞈ shaˉ paˍ kaꞈ yawˇ ca chehˇ˗e tuˬ ve Hkriꞈ yaˇ awˬ moˍ leh yawˇ chehˇ jaw ve Hkriꞈ yaˇ awˬ moˍ maˇ tehˆ daꞈ cawˇ ve yoˬ. Yawˇ ca chehˇ˗e tuˬ ve Hkriꞈ yaˇ awˬ moˍ hkʼaw ve awˬ viˉ awˬ nyi te ve awˬ ceuˬ teˇ hpaˍ, yawˇ chehˇ jaw ve Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ maˇ shuˍ ve kʼo, yawˇ hui teˇ ceuˬ ceuˬ te yaꞈ ve tehꞈ kʼoˆ gaˇ ve maˇ heˆ. Chi htaꞈ pa taw, nawˬ maˇ beˆ maˍ piˇ sheˍ htaˇ, oˇ kaˬ lo ve awˬ ceuˬ teˇ hpaˍ htaꞈ shiˍ tuˬ henˇ ve lehˬ cuˇ yiˍ cawˬ ve yoˬ. (Cuˇ yiˍ piˇ ve 3:1, 7) Awˬ viˉ awˬ nyi nawˬ ve dawˇ hkʼaˇ htaꞈ gʼaꞈ te tcuh ve aꞈ kehˉ, nawˬ yawˇ hui awˬ pon henˇ yuˬ tuˬ hpehꞈ piˇ ve lehˬ daꞈ jaˇ ve yoˬ.—2 Kawˇrenˍhtuˆ 1:24.

3. Awˬ viˉ awˬ nyi geh awˬ chawˇ te leh ca chehˇ˗e kuiˬ Hkriꞈ yaˇ awˬ moˍ hkʼaw laiˉ ceuˬ teˇ geh te cawˇ ve. (Hpiˇliˇpiˆ 1:27) Teˇ kaˬ lo jiˆ kʼai ve lehˬ awˬ yanˇ gʼa yehˇ leh heuˬ jaˇ tuˬ te laˇ ve yoˬ. Yaꞈ hkʼaˇ, te gʼa ve hkʼe nawˬ ca chehˇ˗e kuiˬ Hkriꞈ yaˇ awˬ moˍ hkʼaw haˆ hpawnˬ daꞈ˗e ve lehˬ a yeˇ uiˍ jaˇ. Nawˬ maˇ hpawnˬ daꞈ˗e ve kʼo, awˬ viˉ awˬ nyi nawˬ htaꞈ maˇ shiˍ daꞈ leh hkʼaˬ hkʼe ga laˇ tuˬ naˍ maˇ shiˍ. Lu˗si˗danˇ leh yawˇ ve yaˇ miˇ 2 gʼaˇ, Aˍfaˍriˆkaˆ miˬ guiˬ awˬ hawˉ hpawˇ venˇ lonˉ teˇ venˇ hkʼaw yawˇ hui jiˆ kʼai ve yoˬ. Yawˇ kʼoˆ ve, “ngaˬ ca chehˇ˗e ve Hkriꞈ yaˇ awˬ moˍ hkʼaw awˬ viˉ awˬ nyi htaꞈ shiˍ daꞈ tuˬ leh meuˆ daꞈ tuˬ te cawˇ ve tehꞈ, awˬ chawˇ beˆ maˍ laˇ ve yoˬ. Hto toˇ˗e cawˇ ve, Hkriꞈ yaˇ awˬ moˍ hkʼaw laꞈ sheh chiˇ leh hkʼawꞈ cawˇ ve kaꞈ baˆ maˍ laˇ ve yoˬ. Ngaˬ ve yehˬ hto toˇ˗e tuˬ awˬ pon hpawnˬ daꞈ htaˇ yehˇ hpehꞈ ve tehꞈ, awˬ viˉ awˬ nyi htaꞈ kʼoˆ piˇ tehꞈ kʼoˆ leh beˆ maˍ laˇ ve yoˬ.”

Nawˬ ca chehˇ kuiˬ Hkriꞈ yaˇ awˬ moˍ hkʼaw ve awˬ viˉ awˬ nyi geh awˬ vuiˬ teˇ hpaˍ “teˇ geh gʼaˇ hteꞈ te chehˇ” cawˇ ve yoˬ. Chi hkʼe te htaˇ, nawˬ awˬ viˉ awˬ nyi htaꞈ awˬ gʼaˇ piˇ tuˬ ga laˇ leh nawˬ yonˍ yeˬ ve cawˬ tuˬ kaꞈ ga laˇ ve yoˬ. Eh˗riˆ kʼawꞈ kʼoˆ ve, hto toˇ˗e htaˇ awˬ viˉ awˬ nyi teˇ gʼaˇ le le geh ku cawˇ ve tehꞈ nyi haꞈ shaˉ paˍ beˆ maˍ laˇ ve yoˬ. Awˬ bon hkʼaˬ hkʼe gʼa ve le? Yawˇ kʼoˆ ve, “chi hkʼe te htaˇ ngaˬ kaꞈ Hkriꞈ yaˇ awˬ moˍ hkʼaw ve chaw teˇ gʼaˇ hpehꞈ ve tehꞈ mawˬ tuˬ te laˇ ve yoˬ.” Chi hkʼoˆ kaꞈ, hpawnˬ daꞈ kuiˬ hkʼaw daꞈ kehˬ tuˬ te ve, maˇ heˆ leh kʼawꞈ gu te ve, chi ve teˇ hpaˍ htaꞈ nawˬ ga piˇ ve kʼo, hpawnˬ daꞈ kuiˬ chi ve nawˬ ve kaꞈ hpehꞈ ve tehꞈ, awˬ viˉ awˬ nyi mawˬ tuˬ te piˇ chehˇ ve yoˬ. Hpawnˬ daꞈ kuiˬ yehˬ htaꞈ caˉ daꞈ ve awˬ vuiˬ teˇ hpaˍ nawˬ leuˉ leh gʼa ga piˇ ve kʼo, nawˬ ha lehˬ jaˇ leh, nawˬ ca chehˇ˗e ve Hkriꞈ yaˇ awˬ moˍ  hkʼaw ve awˬ viˉ awˬ nyi, nawˬ ve yehˬ kʼa hkʼaw ve chaw hkʼe hpehꞈ ve tehꞈ dawˇ ve yoˬ.

4. Awˬ chawˇ awˬ suhˉ ca ve. (2 Kawˇrenˍhtuˆ 6:11-13) Awˬ viˉ awˬ nyi htaꞈ a yeˇ hkʼa dehꞈ yuˬ ve tehꞈ hpeuꞈ maw piˇ ve lehˬ, yawˇ hui geh awˬ chawˇ te gʼa tuˬ daꞈ jaˇ ve awˬ hkʼaˇ hpehꞈ ve yoˬ. Chi htaꞈ pa taw, maˇ hpawnˬ daꞈ sheˍ htaˇ leh hpawnˬ daꞈ peuˬ hkʼawꞈ nawˉ, awˬ viˉ awˬ nyi geh tawˇ yaw daꞈ leh hkʼa dehꞈ shiˍ daꞈ tuˬ te sheˍ. Yawˇ hui teˇ gʼaˇ leh teˇ gʼaˇ ve awˬ meh htaꞈ shiˍ tuˬ coˇ caˇ sheˍ. Nawˬ awˬ viˉ awˬ nyi ve awˬ meh tawnˇ gʼa ve kʼo, nawˬ yawˇ hui geh awˬ chawˇ te gaˇ ve tehꞈ yawˇ hui dawˇ leh awˬ chawˇ te daꞈ sha ve kaꞈ dawˇ tuˬ yoˬ. Hkʼe te leh, yawˇ hui nawˬ htaꞈ hkʼa dehꞈ shiˍ daꞈ gaˇ leh awˬ chawˇ kaꞈ te gaˇ tuˬ yoˬ.

Awˬ viˉ awˬ nyi nawˬ htaꞈ haꞈ yuˬ laˇ tuˬ ve laˇ tehꞈ nawˬ dawˇ haˍ ve aꞈ kehˉ, nawˬ hkʼaˬ hkʼe ve chaw hpehꞈ ve tehꞈ nawˬ jiˆ kʼai ve Hkriꞈ yaˇ awˬ moˍ hkʼaw ve chaw htaꞈ shiˍ tcuh sheˍ. Nawˬ Lu˗si˗danˇ hkʼa shuˍ te nyi sheˍ. Yawˇ kʼoˆ ve, “awˬ viˉ awˬ nyi htaꞈ ngaˬ ve aˉ hkʼaw lo laˬ tuˬ, ngaˬ awˉ lawˉ jehˬ piˇ ve pa taw, ngaˬ meuˆ daꞈ jaˇ ve awˬ chawˇ laiˉ gʼaˇ cawˬ ve yoˬ.”

“TEˇ GʼAˇ LEH TEˇ GʼAˇ HTAꞈ HAꞈ YUˬ˗Oꞈ”

Chaw teˇ gʼaˇ˗ehꞈ kaꞈ maˇ shiˍ daꞈ kuiˬ hpawnˬ daꞈ kuiˬ lo kʼai ve lehˬ, teˇ gʼaˇ gʼaˇ awˬ pon haˍ jaˇ ve awˬ lawn hpehꞈ ve yoˬ. Nawˬ chehˇ kuiˬ Hkriꞈ yaˇ awˬ moˍ hkʼaw awˬ viˉ awˬ nyi jiˆ laˬ gehˇ sheˍ ve chaw htaꞈ hkʼaˬ hkʼe ga piˇ gʼa tuˬ le? Tcuh yaˇ Pawˇluꞈ ngaˬ hui htaꞈ awˬ gʼaˇ peꞈ laˇ ve, “Hkriꞈ nawˬ hui htaꞈ haꞈ yuˬ ve hkʼe, nawˬ hui teˇ gʼaˇ leh teˇ gʼaˇ htaꞈ haꞈ yuˬ˗oꞈ.” (Roˉmaꞈ 15:7) Nyi haꞈ shaˉ paˍ Yeˍsuˆ htaꞈ henˇ yuˬ gʼa ve lehˬ, jiˆ laˬ gehˇ sheˍ ve awˬ viˉ awˬ nyi htaꞈ haꞈ yuˬ laˇ ve tehꞈ dawˇ tuˬ ga piˇ sheˍ. (Awˇ ceˍ awˇ fa “ Hkʼa sha sha˗ehꞈ jiˆ kʼai gʼa tuˬ aˬ htoꞈ ma ga piˇ ve le?” htaꞈ nyi sheˍ.) Yaꞈ hkʼaˇ, Hkriꞈ yaˇ awˬ moˍ hkʼaw ve chaw teˇ gʼaˇ le le leh yaˇ ehˉ kaꞈ jiˆ laˬ gehˇ sheˍ ve awˬ viˉ awˬ nyi haꞈ yuˬ laˇ ve htaꞈ gʼa ve tehꞈ dawˇ tuˬ ga piˇ sheˍ.

Awˬ viˉ awˬ nyi htaꞈ haꞈ yuˬ piˇ ve lehˬ, yawˇ hui htaꞈ jehˬ piˇ leh aˉ hkʼaw lo ca guiˇ la tcuh kaꞈ gʼa ve yoˬ. Leh laiˉ ceuˬ hpawˇ ga piˇ kaꞈ gʼa ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ, jiˆ laˬ gehˇ sheˍ ve awˬ viˉ awˬ nyi yaˇ miˇ htaꞈ shiˍ leh, venˇ hkʼaw lo ca guiˇ˗e leh chaw gʼawˬ caˇ ve kaˇ ciˇ tuˬ, maˇ heˆ leh aˬ miˍ lawˬ ciˇ tuˬ kaꞈ maˍ piˇ ve yoˬ. Chi hkʼe te ve awˬ viˉ awˬ nyi jiˆ laˬ gehˇ sheˍ ve ha lehˬ jaˇ tuˬ te piˇ leh, yawˇ ca chehˇ la ve Hkriꞈ yaˇ awˬ moˍ yawˇ ve yehˬ kʼa hkʼaw ve chaw htaꞈ shuˍ ve hkʼe dawˇ tuˬ te piˇ leh, yawˇ haˆ pa gʼa tuˬ kaꞈ te piˇ ve yoˬ.

 GʼUIˬ SHA VE KANˉ HKʼA DEHꞈ TE GʼA TUˬ TE VE

Paˉ ceꞈ uiˍ la leh toˍ laꞈ kʼuˉ heh leh poˬ gʼa tuˬ gʼa law ve yoˬ. Chi ve hkʼa shuˍ shuˍ, nawˬ Hkriꞈ yaˇ awˬ moˍ teˇ kaˬ lo jiˆ kʼai htaˇ, nawˬ Yaˬhoˉvaˬ ve kanˉ te maˇ gʼa tuˬ te laˇ ve awˬ ceuˬ htaꞈ yuˬ baˬ sheˍ. Neˆhkaw˗laˆ leh Seh˗rin kʼawꞈ kʼoˆ ve, “awˬ viˉ awˬ nyi geh awˬ chawˇ te gʼa tuˬ leh awˬ ti oˇ kaˬ lo chehˇ gʼa tuˬ, Hkriꞈ yaˇ ve te hkʼaˇ dawˇ hkʼaˇ awˬ suhˉ gʼa cawˬ tcuh ve yoˬ.” Chawn˗cha yawˇ ve yehˬ kʼa awˬ bon hkʼaˬ hkʼe gʼa ve htaꞈ kʼoˆ maˍ laˇ ve yoˬ. Yawˇ kʼoˆ ve, “chi hkʼe te htaˇ ngaˬ hui ve yaˇ teˇ hpaˍ, co ha hpawˇ uiˍ la mvuh la leh Yaˬhoˉvaˬ geh kaꞈ meuˆ daꞈ maˇ la ve yoˬ. Ngaˬ hui jiˆ laˬ ve hkʼaˬ nyiˇ ha pa maˇ gaˬ sheˍ htaˇ, ngaˬ hui ve yaˇ miˇ mvuhˇ hpeuꞈ hanˉ hpawnˬ daꞈ ve hkʼaw awˬ vuiˬ tanˬ te leh yaˇ paˍ kaꞈ hto toˇ ve chaw tanˬ te ve yoˬ.”

Nawˬ hto toˇ ve chaw loˍ jaˇ kuiˬ awˬ ti lo ca ga piˇ˗e gaˇ leh nawˬ shoꞈ shaꞈ ve laiˉ ceuˬ cawˬ ve kʼo, hkʼaˬ hkʼe te tuˬ le? Nawˬ Hkriꞈ yaˇ awˬ moˍ hkʼaw laiˉ ceuˬ ga piˇ gʼa leh, chi teˇ lawn hkʼaw beˆ maˍ laˇ taˍ ve htaꞈ yuˬ yehˇ sheˍ. Tawˇ pa haˉ te kʼo, Yaˬhoˉvaˬ htaꞈ gʼaˇ va leh Hkriꞈ yaˇ awˬ moˍ hkʼaw laiˉ ceuˬ te sheˍ. Chi ve lehˬ, awˬ nu ve awˬ viˉ awˬ nyi geh kanˉ teˇ geh te ve, awˬ chawˇ awˬ suhˉ ca ve, maˇ heˆ leh daꞈ ve awˬ chawˇ hpehꞈ piˇ sheˍ. Chi hkʼoˆ kaꞈ, Baˆtiˆsaˬ haꞈ yuˬ gehˇ sheˍ ve awˬ viˉ awˬ nyi htaꞈ nawˬ ga piˇ ve, maˇ heˆ leh awˬ viˉ awˬ nyi loˍ chehˇ ve htaꞈ nawˬ ga piˇ gʼa˗aw laˇ? Haꞈ pehnˇ ve lehˬ, a shu awˬ tehˬ ve Hkriꞈ yaˇ hpehꞈ ve tehꞈ shiˍ tuˬ ga laˇ ve, awˬ hkʼoˆ kaꞈ nawˬ awˬ viˉ awˬ nyi htaꞈ ga piˇ ve kaꞈ, leuˉ leh Yaˬhoˉvaˬ geh meuˆ daꞈ tuˬ kaꞈ te laˇ ve yoˬ. (Yoˇhanˬ 13:35) “Chi hkʼe ve tanˇ tuˬ teˇ hpaˍ htaꞈ Gʼuiˬ sha nyi ma cawˇ ve yoˬ” tehꞈ nawˬ yonˍ gʼa ve yoˬ.—Heˍbrehˇ 13:16.

Shoꞈ shaꞈ ve laiˉ ceuˬ cawˬ ve htawˇ, awˬ viˉ awˬ nyi laiˉ gʼaˇ ha lehˬ ve cawˬ leh yawˇ hui Hkriꞈ yaˇ awˬ moˍ teˇ kaˬ lo jiˆ kʼai htaˇ kaꞈ awˬ bon cawˬ ve yoˬ. Chi htaꞈ pa taw, nawˬ kaꞈ hkʼa shuˍ te gʼa ve yoˬ. Eh˗riˆ kʼoˆ ve, “ngaˬ Hkriꞈ yaˇ awˬ moˍ teˇ kaˬ lo jiˆ kʼai htaˇ, laiˉ ceuˬ ga piˇ puiˉ tuˬ ga laˇ ve yoˬ.” Leh Hka˗si˗mi kaꞈ yonˍ gʼa ve hkʼaw kʼoˆ ve, “nawˬ Hkriꞈ yaˇ awˬ moˍ teˇ kaˬ lo jiˆ kʼai ve kʼo, Yaˬhoˉvaˬ peuˬ laˬ htaˇ aꞈ kehˉ nawˬ htaꞈ ga laˇ ve htaꞈ gʼa mawˬ tuˬ yoˬ.” Con kʼawꞈ kʼoˆ ve, “ngaˬ Hkriꞈ yaˇ awˬ moˍ teˇ kaˬ lo jiˆ kʼai ve hkʼaw awˬ viˉ awˬ nyi geh hkʼa dehꞈ meuˆ daꞈ htaˇ, ngaˬ ve aˉ hkʼaw lo chehˇ taˍ ve htaꞈ shuˍ tuˬ ga laˇ ve yoˬ. Chi teˇ hkui ngaˬ awˬ viˉ awˬ nyi geh meuˆ daꞈ jaˇ leh teˇ kaˬ lo gʼa kʼawꞈ jiˆ kʼai ve kʼo, nyi ma luˬ jaˇ tuˬ yoˬ tehꞈ dawˇ ve yoˬ.”