1-2. Zaˍdoˆ a shu hpehꞈ ve le? (1 Raˍsaˍvanˍ 12:22, 26-28)

 Daˍviˆ Iˉsaˍreˍlaˆ chaw ve jawˇ mawˇ te tcuh tuˬ, chaw 340,000 gʼaˇ Daˍviˆ geh laˬ ve htaꞈ dawˇ nyi sheˍ. Chaw chi teˇ hpaˍ hkʼa peu˗eˬ Heˍbronˍ venˇ awˬ paˇ hkʼaw hkʼoˆ lo 3 nyi chehˇ ve yoˬ. Yawˇ hui tawˇ yaw daꞈ ve, ha lehˬ ve, Yaˬhoˉvaˬ htaꞈ kʼa muiˬ hkawˇ kʼa chiˇ mvuh chehˇ ve yoˬ. (1 Raˍsaˍvanˍ 12:39) Zaˍdoˆ meh ve yaˇ nehˬ teˇ gʼaˇ kaꞈ oˇ kaˬ lo chehˇ taˍ ve yoˬ. Yawˇ oˇ kaˬ lo chehˇ taˍ ve tehꞈ laiˉ gʼaˇ maˇ chaˬ nyi. Yaꞈ hkʼaˇ, Yaˬhoˉvaˬ yawˇ htaꞈ mawˬ leh Yaˬhoˉvaˬ kaꞈ ngaˬ hui Zaˍdoˆ htaꞈ shiˍ tcuh gaˇ ve yoˬ. (1 Raˍsaˍvanˍ 12:22, 26-28 gʼaw sheˍ.) Leh Zaˍdoˆ a shu hpehꞈ ve le?

² Zaˍdoˆ lehˬ paw hkuˇ hpehꞈ ve yoˬ. Yawˇ paw hkuˇ lonˉ Aˍbyaˍtaˍ geh kanˉ te ve yoˬ. Leh yawˇ Gʼuiˬ sha htaꞈ shiˍ ve chaw kaꞈ hpehꞈ ve yoˬ. Yaˬhoˉvaˬ Zaˍdoˆ htaꞈ cuˇ yiˍ piˇ leh yawˇ ve a loˍ htaꞈ na gʼa tuˬ kaꞈ te piˇ ve yoˬ. (2 Saˍmo˗eˍlaˆ 15:27) Iˉsaˍreˍlaˆ chaw beˆ maˍ laˇ ve htaꞈ gʼa tuˬ yawˇ geh laˬ ve yoˬ. Chi hkʼoˆ kaꞈ, Zaˍdoˆ lehˬ haꞈ hanˉ ve chaw hpehꞈ leh, te hkʼaˇ dawˇ hkʼaˇ chi ve teˇ hpaˍ cawˬ ve awˬ lawn chi ve hkʼaw ngaˬ hui teˇ geh henˇ tuˬ yoˬ.

3. (a) Aˬ htoꞈ ma te Gʼuiˬ sha ve kanˉ te ve chaw gʼa haꞈ hanˉ cawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Awˬ leh meuˇ ve awˬ yanˇ hkʼaw Gʼuiˬ sha ve kanˉ te ve chaw ve yonˍ hkʼaˇ htaꞈ te luˬ tuˬ Saˍtanˍ coˇ caˇ jaˇ. (1 Peˍtruˆ 5:8) Hkʼe te leh, ngaˬ hui Saˍtanˍ leh haiˬ ve miˬ guiˬ chi htaꞈ Yaˬhoˉvaˬ te luˬ htaˇ hkʼa gaˬ, caˉ leh yeunˇ hkanˍ ve cawˬ tuˬ gʼa haꞈ hanˉ cawˇ ve yoˬ. (Chiˇ mvuh ve 31:24) Zaˍdoˆ haꞈ hanˉ ve cawˬ ve ngaˬ hui henˇ yuˬ gʼa ve 3 hkʼaˇ htaꞈ teˇ geh henˇ tuˬ yoˬ.

GʼUIˬ SHA VE MVUHˇ MIˬ HPAWˇ CHEHˇ VE

4. Yaˬhoˉvaˬ ve kanˉ te ve chaw yawˇ ve mvuhˇ miˬ hpawˇ chehˇ tuˬ aˬ htoꞈ ma te gʼa haꞈ hanˉ cawˇ ve le? (Awˬ han htaꞈ nyi sheˍ.)

⁴ Ngaˬ hui Yaˬhoˉvaˬ ve kanˉ te ve chaw hpehꞈ ve pa taw, Yaˬhoˉvaˬ  ve mvuhˇ miˬ hpawˇ ngaˬ hui nyi ma awˬ tawˬ hkʼa gaˬ gʼa ga piˇ ve yoˬ. Yaꞈ hkʼaˇ, ngaˬ hui chi hkʼe te gʼa tuˬ haꞈ hanˉ ve gʼa cawˬ ve yoˬ. (Maꞈhtehˍ 6:33) Tawˇ pa haˉ te kʼo, Saˍtanˍ ve miˬ guiˬ hkʼoˆ lo Yaˬhoˉvaˬ ve awˬ liˇ awˬ hkʼaˇ htaꞈ a shaꞈ teꞈ kuiˬ hkʼaw gʼaꞈ te leh, yawˇ ve mvuhˇ miˬ daꞈ ve awˬ lawn sha tanˇ hto toˇ tuˬ, ngaˬ hui haꞈ hanˉ ve gʼa cawˬ cawˇ ve yoˬ. (1 Hteˇsaˍlawˇniˆ 2:2) Chi beuꞈ teˇ co˗e miˬ guiˬ hkʼoˆ lo maˇ cawˇ maˇ hawˍ daꞈ ve cawˬ maˇ jaˇ ve pa taw, ngaˬ hui mvuhˇ miˬ hpawˇ choˬ paˉ oˇ paˉ maˇ chehˇ tuˬ haꞈ hanˉ ve gʼa cawˬ cawˇ ve yoˬ. (Yoˇhanˬ 18:36) Awˬ lawn kʼo, Gʼuiˬ sha ve chaw laiˉ gʼaˇ mvuhˇ miˬ hpawˇ maˇ caˉ daꞈ leh, maꞈ yaˇ maˇ te ve pa taw, kanˉ te caˇ hpawˇ shoꞈ shaꞈ ve, awˬ to htaꞈ naˬ tuˬ te piˇ ve, leh hkawnˍ hkʼaw lo kaꞈ yuˬ keu piˇ ve yoˬ.

5. Zaˍdoˆ Daˍviˆ htaꞈ ga piˇ tuˬ aˬ htoꞈ ma te yawˇ gʼa haꞈ hanˉ cawˇ ve le?

⁵ Zaˍdoˆ Heˍbronˍ venˇ lo kʼai ve lehˬ, Daˍviˆ jawˇ mawˇ gʼa hpehꞈ ve htaꞈ ceh tiˉ hti caˇ hti dawˬ˗e ve maˇ heˆ. Yaꞈ hkʼaˇ, maꞈ bawˆ tuˬ awˬ pon laꞈ caˉ kaꞈ yuˬ kʼai ve yoˬ. (1 Raˍsaˍvanˍ 12:38) Yawˇ maꞈ bawˆ kuiˬ lo Daˍviˆ hkʼaˇ suh kʼai leh Iˉsaˍreˍlaˆ chaw canˇ paˍ htaꞈ ponˬ piˇ tuˬ kaꞈ yawˇ kʼai ve yoˬ. Zaˍdoˆ maꞈ hkʼa dehꞈ maˇ bawˆ jaw ve htawˇ, yawˇ haꞈ hanˉ ve cawˬ ve yoˬ.

6. Haꞈ hanˉ ve awˬ lawn Daˍviˆ lehˬ Zaˍdoˆ henˇ yuˬ tuˬ hkʼaˬ hkʼe hpehꞈ ve le? (Chiˇ mvuh ve 138:3)

⁶ Paw hkuˇ Zaˍdoˆ haꞈ hanˉ ve hkʼaˬ kaˬ lo gʼa ve le? Yawˇ lehˬ hawˉ hkʼaˆ laiˉ gʼaˇ awˬ gʼaˇ hehnˇ ve leh haꞈ hanˉ ve cawˬ ve chaw htaꞈ henˇ yuˬ ve yoˬ. Tawˇ pa haˉ te kʼo, Daˍviˆ “Iˉsaˍreˍlaˆ chaw hui htaꞈ shiˍ leh maꞈ bawˆ kuiˬ lo kʼai ve yoˬ.” Hkʼe te leh, Iˉsaˍreˍlaˆ chaw Daˍviˆ htaꞈ jawˇ mawˇ te tuˬ awˬ gʼaˇ piˇ ve yoˬ. (1 Raˍsaˍvanˍ 11:1, 2) Daˍviˆ canˇ paˍ htaꞈ bawˆ daꞈ htaˇ, Yaˬhoˉvaˬ htaꞈ gʼaˇ va ve yoˬ. (Chiˇ mvuh ve 28:7; Chiˇ mvuh ve 138:3 gʼaw sheˍ.) Chi hkʼoˆ kaꞈ, Zaˍdoˆ haꞈ hanˉ ve cawˬ tuˬ awˬ nu ve chaw htaꞈ kaꞈ henˇ yuˬ sheˍ ve yoˬ. Tawˇ pa haˉ te kʼo, Zaˍdoˆ lehˬ Yawˇyaˍdaˆ leh yawˇ ve maꞈ poˍ Beˍnaˍyaˆ htaꞈ kaꞈ henˇ yuˬ ve yoˬ. Leh Daˍviˆ hpawˇ chehˇ ve awˬ ceuˬ awˬ hkʼaˇ hkʼaw ve awˬ hoˉ 22 gʼaˇ htaꞈ kaꞈ henˇ yuˬ ve yoˬ. (1 Raˍsaˍvanˍ 11:22-25; 12:26-28) Chi teˇ hpaˍ Daˍviˆ jawˇ mawˇ te tuˬ awˬ gʼaˇ piˇ leh Daˍviˆ htaꞈ kaꞈ haꞈ shaˉ piˇ tuˬ gu hehnˇ taˍ ve yoˬ.

7. (a) Chi beuꞈ teˇ co˗e ngaˬ hui henˇ yuˬ gʼa ve haꞈ hanˉ ve a shu ve awˬ lawn cawˬ ve le? (b) VDO hkʼaw awˬ viˉ awˬ nyi Enˍsiˍluˍ ve awˬ lawn nawˬ htaꞈ hkʼaˬ hkʼe maˍ laˇ ve le?

 ⁷ Awˬ viˉ awˬ nyi lehˬ Yaˬhoˉvaˬ htaꞈ ka tiꞈ yeˬ leh yawˇ ve mvuhˇ miˬ uˉ peunˍ ve hpawˇ chehˇ tuˬ haꞈ hanˉ ve htaꞈ ngaˬ hui gʼa mawˬ htaˇ, chi ngaˬ hui yonˍ yeˬ ve leh haꞈ hanˉ ve cawˬ tuˬ kaꞈ te laˇ ve yoˬ. Ngaˬ hui ve Jawˇ mawˇ Yeˍsuˆ mvuhˇ miˬ uˉ peunˍ ve htaꞈ maˇ caˉ daꞈ ve yoˬ. (Maꞈhtehˍ 4:8-11; Yoˇhanˬ 6:14, 15) Yeˍsuˆ yonˍ yeˬ ve leh haꞈ hanˉ ve cawˬ tuˬ Yaˬhoˉvaˬ htaꞈ gʼaˇ va ve yoˬ. Chi beuꞈ teˇ co˗e awˬ viˉ awˬ nyi yaˇ nehˬ ve awˬ lawn htaꞈ ngaˬ hui gʼa mawˬ ve yoˬ. Yawˇ hui maꞈ yaˇ maˇ te leh mvuhˇ miˬ hpawˇ maˇ caˉ daꞈ ve tehꞈ haꞈ hanˉ ve hkʼaw hkʼaˬ hkʼe hpeuꞈ maw laˇ ve le? Yawˇ hui ve awˬ lawn vehˆsaiˉ jw.org hkʼaw gʼaw gʼa ve yoˬ. a

AWˬ VIˉ AWˬ NYI HTAꞈ GA PIˇ VE

8. Nyi haꞈ shaˉ paˍ awˬ viˉ awˬ nyi htaꞈ ga piˇ tuˬ haꞈ hanˉ ve gʼa cawˬ cawˇ ve hkʼaˬ hkʼe htaˇ le?

⁸ Yaˬhoˉvaˬ ve chaw lehˬ teˇ gʼaˇ leh teˇ gʼaˇ ga daꞈ ve yoˬ. (2 Kawˇrenˍhtuˆ 8:4) Chi hkʼe hpehꞈ ve htawˇ teˇ pawˆ pawˆ kʼo, haꞈ hanˉ ve kaꞈ gʼa cawˬ ve yoˬ. Tawˇ pa haˉ te kʼo, maꞈ te daꞈ htaˇ, awˬ viˉ awˬ nyi awˬ gʼaˇ gʼa tuˬ loˍ ve tehꞈ nyi haꞈ shaˉ paˍ shiˍ ve yoˬ. Loˍ ve awˬ ceuˬ teˇ hpaˍ gʼa ga laˇ cawˇ ve kaꞈ shiˍ leh awˬ viˉ awˬ nyi yonˍ hkʼaˇ hpawˇ yonˍ yeˬ tuˬ Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ kʼoˆ gʼa cawˬ cawˇ ve tehꞈ kaꞈ shiˍ ve yoˬ. Nyi haꞈ shaˉ paˍ awˬ viˉ awˬ nyi htaꞈ haꞈ ve lehˬ, loˍ ve awˬ ceuˬ yawˇ hui gu teh taˍ tuˬ te piˇ ve yoˬ. Chi hkʼe te ve teˇ pawˆ pawˆ kʼo, yawˇ hui kawˆ tuˬ gʼa hpuˇ ve yoˬ. (Yoˇhanˬ 15:12, 13) Yawˇ hui chi hkʼe te htaˇ, Zaˍdoˆ haꞈ hanˉ ve htaꞈ henˇ yuˬ chehˇ ve yoˬ.

9. 2 Saˍmo˗eˍlaˆ liꞈ 15:27-29 hkʼaw kʼoˆ taˍ ve hkʼe, Daˍviˆ Zaˍdoˆ htaꞈ aˬ htoꞈ ma te tcuh ve le? (Awˬ han htaꞈ nyi sheˍ.)

⁹ Daˍviˆ ve a shaꞈ teꞈ kuiˬ hkʼaw kawˆ tuˬ cawˬ jaˇ ve yoˬ. Daˍviˆ ve yaˇ paˍ Aˍbaˆsaˍlonˍ yawˇ htaꞈ hpfuhˆ ve yoˬ. (2 Saˍmo˗eˍlaˆ 15:12, 13) Hkʼe te leh, Daˍviˆ Yeˍruˆsaˍlehnˍ venˇ hkʼaw laꞈ haˉ gʼa hpaw tawˆ˗e ve yoˬ. Daˍviˆ yawˇ ve chaw htaꞈ kʼoˆ piˇ ve, “Aˍbaˆsaˍlonˍ laꞈ sheh hkʼaw gʼa ponˬ tuˬ ngaˬ hui choˬ kaˬ lo haˆ gʼa tawˆ kʼai tuˬ yoˬ.” (2 Saˍmo˗eˍlaˆ 15:14) Daˍviˆ leh yawˇ ve chaw hpaw˗e chehˇ htaˇ, Aˍbaˆsaˍlonˍ hkʼaˬ hkʼe te ve htaꞈ shiˍ tuˬ, Yeˍruˆsaˍlehnˍ venˇ hkʼaw Daˍviˆ ve chaw gʼa chehˇ taˉ cawˇ ve tehꞈ shiˍ ve yoˬ.  Chi htaꞈ pa taw, Aˍbaˆsaˍlonˍ hkʼaˬ hkʼe te ve htaꞈ shiˍ tuˬ, Daˍviˆ lehˬ Zaˍdoˆ leh awˬ nu ve paw hkuˇ htaꞈ Yeˍruˆsaˍlehnˍ venˇ hkʼaw kʼoꞈ˗e tcuh ve yoˬ. (2 Saˍmo˗eˍlaˆ 15:27-29 gʼaw sheˍ.) Zaˍdoˆ leh awˬ nu ve paw hkuˇ shaˍ tiꞈ gʼa te ve yoˬ. Awˬ lawn kʼo, Daˍviˆ yawˇ hui htaꞈ te tcuh ve awˬ ceuˬ lehˬ, kawˆ tuˬ cawˬ jaˇ leh yawˇ hui ve a shaꞈ htaꞈ heuˆ la kuiˬ cawˬ jaˇ ve yoˬ. Aˍbaˆsaˍlonˍ uiˍ muiˬ caˆ muiˬ ve, yawˇ awˬ pon tiˉ dawˇ nyi ve, te hkʼawꞈ gaˇ ve leh shu htaꞈ hpfuhˆ ve yoˬ. Zaˍdoˆ leh awˬ nu ve paw hkuˇ Daˍviˆ htaꞈ haꞈ shaˉ tuˬ, Aˍbaˆsaˍlonˍ htaꞈ ca chaˬ nyi la ve tehꞈ yawˇ shiˍ htaˇ, hkʼaˬ hkʼe hpehꞈ la tuˬ ve htaꞈ dawˇ nyi sheˍ.

10. Zaˍdoˆ leh awˬ nu ve chaw Daˍviˆ htaꞈ hkʼaˬ hkʼe ga piˇ ve le?

¹⁰ Daˍviˆ Aˍbaˆsaˍlonˍ awˬ hkʼaˇ gu ve htaꞈ shiˍ tuˬ, yawˇ htaꞈ ka tiꞈ yeˬ ve Zaˍdoˆ leh Huˆshehˇ ga laˇ tuˬ lawˬ ve yoˬ. (2 Saˍmo˗eˍlaˆ 15:32-37) Huˆshehˇ Daˍviˆ gu taˍ ve awˬ hkʼaˇ htaꞈ gʼaꞈ te ve yoˬ. Huˆshehˇ Aˍbaˆsaˍlonˍ yonˍ gʼa tuˬ yawˇ hpawˇ chehˇ ve hkʼe te ve yoˬ. Peuˬ hkʼawꞈ nawˉ Huˆshehˇ Daˍviˆ htaꞈ hkʼaˬ hkʼe te bawˆ tuˬ Aˍbaˆsaˍlonˍ htaꞈ awˬ hkʼaˇ beˆ maˍ piˇ ve yoˬ. Chi hkʼe te ve lehˬ, Aˍbaˆsaˍlonˍ bawˆ la htaˇ Daˍviˆ gu tuˬ ve awˬ yanˇ cawˬ tuˬ ga piˇ ve yoˬ. Peuˬ hkʼawꞈ nawˉ Huˆshehˇ teˇ lawn le le Zaˍdoˆ leh Aˍbyaˍtaˍ htaꞈ kʼoˆ maˍ piˇ ve yoˬ. (2 Saˍmo˗eˍlaˆ 17:8-16) Leh yawˇ huiˉ maˬ kaꞈ Daˍviˆ htaꞈ kʼawꞈ kʼoˆ piˇ ve yoˬ. (2 Saˍmo˗eˍlaˆ 17:17) Yaˬhoˉvaˬ ga laˇ tcuh ve pa taw, Zaˍdoˆ leh awˬ nu ve paw hkuˇ Daˍviˆ a shaꞈ gʼa ponˬ tuˬ yawˇ hui ga piˇ ve yoˬ.—2 Saˍmo˗eˍlaˆ 17:21, 22.

11. Awˬ viˉ awˬ nyi htaꞈ ga piˇ htaˇ, Zaˍdoˆ haꞈ hanˉ ve htaꞈ ngaˬ hui hkʼaˬ hkʼe henˇ yuˬ gʼa ve le?

¹¹ Kawˆ tuˬ cawˬ ve awˬ ceuˬ awˬ viˉ awˬ nyi ngaˬ hui htaꞈ ga laˇ tuˬ lawˬ laˇ ve kʼo, ngaˬ hui Zaˍdoˆ hkʼa shuˍ haꞈ hanˉ ve hkʼaˬ hkʼe hpeuꞈ maw piˇ gʼa tuˬ le? (1) Beˆ maˍ laˇ ve htaꞈ gʼaꞈ te ve. Awˬ lawn chi hkʼa shuˍ gʼa hpuˇ htaˇ, teˇ moˍ tiˉ hpehꞈ tuˬ a yeˇ uiˍ jaˇ ve tehꞈ ngaˬ hui gʼa tawnˇ taˍ cawˇ ve yoˬ. Awˬ tcuhˆ puiˍ lo laˬ ve beˆ maˍ laˇ hkawˇ ngaˬ hui gʼa na yuˬ leh gʼa gʼaꞈ te ve yoˬ. (Heˍbrehˇ 13:17) Mvuhˇ yeˬ mvuhˇ haw lonˉ gʼa hpuˇ htaˇ leh maˇ gʼa hpuˇ sheˍ htaˇ hkʼaˬ hkʼe gu hehnˇ taˍ gʼa tuˬ, beˆ maˍ laˇ hkawˇ htaꞈ caˉ daꞈ ve nyi haꞈ shaˉ paˍ teˇ hkui teˇ hkui gʼa chaˬ nyi cawˇ ve yoˬ. (1 Kawˇrenˍhtuˆ 14:33, 40) (2) Haꞈ hanˉ ve htawˇ shaˍ tiꞈ gʼa te ve. (Tawˇ naˉ ve 22:3) Maˇ te sheˍ htaˇ gʼa dawˇ nyi leh a yeˇ maˇ uiˍ ve awˬ ceuˬ htaꞈ haˆ maˇ  te cawˇ ve yoˬ. (3) Yaˬhoˉvaˬ htaꞈ gʼaˇ va ve. Yaˬhoˉvaˬ lehˬ nawˬ leh awˬ viˉ awˬ nyi htaꞈ kawˆ ve maˇ cawˬ tcuh gaˇ ve tehꞈ tawnˇ taˍ sheˍ. Nawˬ awˬ viˉ awˬ nyi htaꞈ ga piˇ gʼa tuˬ Yaˬhoˉvaˬ nawˬ htaꞈ ga laˇ gʼa ve yoˬ.

12-13. Viˆtawn leh Vin˗ta˗linˇ ve awˬ lawn nawˬ htaꞈ hkʼaˬ hkʼe maˍ laˇ ve le? (Awˬ han htaꞈ nyi sheˍ.)

¹² Awˬ viˉ awˬ nyi hawˉ hkʼaˆ 2 gʼaˇ Viˆtawn leh Vin˗ta˗linˇ yonˍ hkʼaˇ yonˍ yeˬ ve awˬ lawn htaꞈ teˇ geh nyi sheˍ. Yuˬkaˬrenˇ mvuhˇ miˬ lo yawˇ huiˉ maˬ awˬ viˉ awˬ nyi htaꞈ caˇ tuˬ leh iˉ kʼaˆ ca yuˬ piˇ˗e ve yoˬ. Viˆtawn kʼoˆ ve, “awˬ viˉ awˬ nyi htaꞈ caˇ tuˬ ca yuˬ piˇ˗e tuˬ ngaˬ hui laiˉ kaˬ lo gʼa kʼai ve yoˬ. Laiˉ pawˆ kʼo ngaˬ hui awˬ paˇ lo naˆ bawˆ daꞈ ve awˬ hkawˇ gʼa kaˇ ve yoˬ. Awˬ viˉ awˬ nyi hawˉ hkʼaˆ 1 gʼaˇ mawˇ hawˇ kuiˬ sainˍ hpaw taˍ ve pa taw, caˇ tuˬ peꞈ laˇ ve yoˬ. Awˬ viˉ awˬ nyi a shaꞈ gʼa ponˬ tuˬ, laiˉ gʼaˇ loˍ ve awˬ ceuˬ cawˬ tuˬ ga piˇ ve yoˬ. Ngaˬ hui kaˇ hkʼaw caˇ tuˬ yuˬ keu chehˇ htaˇ, naˆ shiˍ lonˉ bawˆ peu laˇ ve ngaˬ hui htaꞈ vuiˇ daꞈ ve 20 meˆ hkʼe taw ce la ve yoˬ. Awˬ viˉ awˬ nyi htaꞈ caˉ leh kʼawꞈ ga piˇ gʼa tuˬ, ngaˬ haꞈ hanˉ ve cawˬ tuˬ Yaˬhoˉvaˬ geh teˇ nyi mvuhˇ hkʼa hpeuꞈ bon lawˬ ve yoˬ.”

¹³ Vin˗ta˗linˇ koˆ ve, “ngaˬ hui chi hkʼe gʼa hpuˇ htaˇ, haꞈ hanˉ ve gʼa cawˬ jaˇ ve yoˬ. Ngaˬ hui kʼai ve awˉ lawˉ teˇ pawˆ awˬ yanˇ 12 naˍ riˍ gʼa yehˇ ve yoˬ. Kʼai chehˇ htaˇ ngaˬ hkʼaˬ htaˆ kaꞈ bon lawˬ ve yoˬ.” Vin˗ta˗linˇ haꞈ hanˉ ve htawˇ shaˍ tiꞈ gʼa te ve yoˬ. Yawˇ kʼoˆ ve, “ngaˬ cuˇ yiˍ leh nyi ma nuˇ nehˬ ve cawˬ tuˬ, Yaˬhoˉvaˬ geh hkʼaˬ htaˆ kaꞈ bon lawˬ ve yoˬ. Mvuhˇ miˬ uˉ peunˍ ve yaꞈ kʼaw kʼai tcuh laˇ ve htaꞈ ceh tiˉ ngaˬ kʼai ve yoˬ. Awˬ viˉ awˬ nyi ga daꞈ ve htaꞈ ngaˬ mawˬ htaˇ, ngaˬ ve yonˍ hkʼaˇ kaꞈ gʼaˇ hteꞈ kʼawꞈ yonˍ yeˬ maˇ la ve yoˬ. Awˬ viˉ awˬ nyi yaꞈ kʼaw kʼai gʼa tuˬ ga daꞈ ve, caˇ tuˬ, veuꞈ kʼaˇ, leh loˍ ve awˬ ceuˬ kaˇ hkʼaw chiˇ keu ve kaꞈ ga daꞈ ve yoˬ. Leh ngaˬ hui htaꞈ caˇ tuˬ leh haˉ kuiˬ kaꞈ gu laˇ ve yoˬ.”

YAˬHOˉVAˬ HTAꞈ HKʼAˬ HTAˆ KAꞈ KA TIꞈ YEˬ SHEˍ

14. Ngaˬ hui haꞈ ve chaw Yaˬhoˉvaˬ htaꞈ baˬ taˉ htaˇ, ngaˬ hui hkʼaˬ hkʼe dawˇ tuˬ le?

¹⁴ Ngaˬ hui haꞈ yuˬ haˍ jaˇ ve shoꞈ shaꞈ ve teˇ ceuˬ lehˬ, yehˬ kʼa hkʼaw ve chaw maˇ heˆ leh ngaˬ hui meuˆ daꞈ jaˇ ve awˬ chawˇ Yaˬhoˉvaˬ htaꞈ baˬ taˉ htaˇ hpehꞈ ve yoˬ. (Chiˇ mvuh ve 78:40; Tawˇ naˉ ve 24:10) Ngaˬ hui yawˇ htaꞈ meuˆ daꞈ jaˇ ve kʼo, leuˉ leh kʼawꞈ haꞈ yuˬ haˍ jaˇ ve yoˬ. Nawˬ awˬ lawn chi hkʼe ve gʼa hpuˇ ve kʼo, Zaˍdoˆ ve awˬ lawn nawˬ htaꞈ ga laˇ gʼa ve yoˬ.

15. Zaˍdoˆ aˬ htoꞈ ma te Yaˬhoˉvaˬ htaꞈ ka tiꞈ yeˬ tuˬ gʼa haꞈ hanˉ cawˇ ve le? (1 Jawˇmawˇ 1:5-8)

¹⁵ Zaˍdoˆ ve awˬ chawˇ Aˍbyaˍtaˍ Yaˬhoˉvaˬ htaꞈ ka tiꞈ maˇ yeˬ ve htawˇ, Zaˍdoˆ Yaˬhoˉvaˬ htaꞈ ka tiꞈ yeˬ tuˬ leuˆ yuˬ ve yoˬ. Awˬ lawn chi ve Daˍviˆ jawˇ mawˇ te ve awˬ yanˇ htaˇ hpehꞈ ve yoˬ. Daˍviˆ suh la paˇ neˇ htaˇ, Yaˬhoˉvaˬ lehˬ Sawˉlaꞈmonˍ htaꞈ jawˇ mawˇ te tcuh tuˬ yoˬ tehꞈ ka tiꞈ te taˍ ve htaꞈ Daˍviˆ ve yaˇ paˍ Aˍdawˇniˇyaˆ coˇ caˇ leh veh yuˬ ve yoˬ. (1 Raˍsaˍvanˍ 22:9, 10) Aˍbyaˍtaˍ Aˍdawˇniˇyaˆ hpawˇ lo chehˇ tuˬ leuˆ yuˬ ve yoˬ. (1 Jawˇmawˇ 1:5-8 gʼaw sheˍ.) Chi hkʼe te ve lehˬ, Aˍbyaˍtaˍ Daˍviˆ htaꞈ ka tiꞈ maˇ yeˬ ve ceh tiˉ maˇ heˆ. Yaꞈ hkʼaˇ, yawˇ Yaˬhoˉvaˬ htaꞈ kaꞈ ka tiꞈ maˇ yeˬ ve yoˬ. Zaˍdoˆ nyi ma hkʼaˬ hkʼe taw luˬ ve htaꞈ nawˬ dawˇ nyi sheˍ. Zaˍdoˆ leh Aˍbyaˍtaˍ paw hkuˇ ve kanˉ aˬ laˬ hkʼe 40 hkʼawꞈ teˇ geh te ve yoˬ. (2 Saˍmo˗eˍlaˆ 8:17) Yawˇ hui “ka tiꞈ shaˉ caˆ ta kʼoˍ” htaꞈ haꞈ shaˉve yoˬ. (2 Saˍmo˗eˍlaˆ 15:29) Awˉ lawˉ htaˇ yawˇ huiˉ maˬ Daˍviˆ jawˇ mawˇ te tuˬ awˬ gʼaˇ piˇ leh, Yaˬhoˉvaˬ ve kanˉ laiˉ ceuˬ teˇ geh te jaw ve yoˬ.—2 Saˍmo˗eˍlaˆ 19:11-14.

16. Zaˍdoˆ ka tiꞈ yeˬ tuˬ aˬ htoꞈ ma ga piˇ ve le?

¹⁶ Aˍbyaˍtaˍ Yaˬhoˉvaˬ htaꞈ ka tiꞈ maˇ yeˬ ve htawˇ, Zaˍdoˆ Yaˬhoˉvaˬ htaꞈ ka tiꞈ yeˬ tuˬ te ve yoˬ. Daˍviˆ Zaˍdoˆ htaꞈ hkʼaˬ htaˆ kaꞈ gʼaˇ va gʼa ve tehꞈ shiˍ ve yoˬ. Aˍdawˇniˇyaˆ ve awˬ hkʼaˇ shiˍ la htaˇ, Daˍviˆ lehˬ Zaˍdoˆ, Naˍtanˍ, leh Aˍbyaˍtaˍ htaꞈ leuˆ yuˬ leh Sawˉlaꞈmonˍ jawˇ mawˇ te tuˬ ga piˇ tcuh ve yoˬ. (1 Jawˇmawˇ 1:32-34) Zaˍdoˆ lehˬ, Yaˬhoˉvaˬ ve kanˉ te ve ka tiꞈ yeˬ ve awˬ nu ve chaw geh awˬ gʼaˇ gʼa ve yoˬ. Tawˇ pa haˉ te kʼo, Yaˬhoˉvaˬ htaꞈ ka tiꞈ yeˬ leh Daˍviˆ htaꞈ ga piˇ ve Naˍtanˍ geh Zaˍdoˆ awˬ gʼaˇ gʼa ve yoˬ. (1 Jawˇmawˇ 1:38, 39) Sawˉlaꞈmonˍ jawˇ mawˇ te˗o htaˇ, “Aˍbyaˍtaˍ awˬ tan Zaˍdoˆ htaꞈ paw hkuˇ te tcuh ve yoˬ.”—1 Jawˇmawˇ 2:35.

17. Nawˬ haꞈ ve chaw Yaˬhoˉvaˬ htaꞈ baˬ taˉ htaˇ, nawˬ Zaˍdoˆ htaꞈ hkʼaˬ hkʼe henˇ yuˬ gʼa tuˬ le?

¹⁷ Nawˬ Zaˍdoˆ htaꞈ hkʼaˬ hkʼe te henˇ yuˬ gʼa tuˬ  le? Nawˬ haꞈ ve chaw Yaˬhoˉvaˬ htaꞈ baˬ taˉ tuˬ leuˆ ve kʼo, nawˬ Yaˬhoˉvaˬ htaꞈ ka tiꞈ yeˬ gaˇ ve tehꞈ hkʼa tawˍ lehˆ gʼa hpeuꞈ maw piˇ cawˇ ve yoˬ. (Yawˇsuˆ 24:15) Nawˬ cawˇ ve awˬ ceuˬ htaꞈ te tuˬ, Yaˬhoˉvaˬ nawˬ htaꞈ awˬ gʼaˇ leh haꞈ hanˉ ve cawˬ tuˬ peꞈ laˇ tuˬ yoˬ. Nawˬ bon lawˬ ve hkʼaw Yaˬhoˉvaˬ htaꞈ gʼaˇ va leh yawˇ htaꞈ ka tiꞈ yeˬ ve awˬ chawˇ geh meuˆ daꞈ sheˍ. Leh nawˬ ka tiꞈ yeˬ ve htaꞈ Yaˬhoˉvaˬ awˬ hpfuhˇ shiˍ leh nawˬ htaꞈ laꞈ shawnˍ peꞈ laˇ tuˬ yoˬ.—2 Saˍmo˗eˍlaˆ 22:26.

18. Ma˗hko leh Siˆse ve awˬ lawn nawˬ htaꞈ hkʼaˬ hkʼe maˍ laˇ ve le?

¹⁸ Ma˗hko leh yawˇ ve awˬ miˇ ma Siˆse ve awˬ lawn htaꞈ teˇ geh nyi sheˍ. Yawˇ hui yaˇ miˇ 2 gʼaˇ cawˬ ve yoˬ. Yaꞈ hkʼaˇ, 2 gʼaˇ gʼaˇ kaꞈ Yaˬhoˉvaˬ htaꞈ baˬ taˉ ve yoˬ. Ma˗hko kʼoˆ ve, “yaˇ paw la ve teˇ nyi tanˬ leh ngaˬ hui yawˇ hui htaꞈ haꞈ jaˇ. Yaˇ kawˆ ve maˇ gʼa heuˆ la tuˬ, ngaˬ hui teˇ ceuˬ le le gu leh haꞈ shaˉ piˇ ve yoˬ. Yaꞈ hkʼaˇ, yawˇ hui Yaˬhoˉvaˬ htaꞈ baˬ taˉ tuˬ leuˆ htaˇ, ngaˬ hui nyi ma naˬ jaˇ tuˬ te laˇ ve yoˬ.” Yawˇ kʼawꞈ kʼoˆ ve, “Yaˬhoˉvaˬ ngaˬ hui awˬ paˇ lo hkʼaˬ htaˆ kaꞈ chehˇ ve yoˬ. Yaˬhoˉvaˬ ngaˬ htaꞈ ga laˇ ve pa taw, ngaˬ awˬ gʼaˇ nuˇ htaˇ, ngaˬ miˇ ma awˬ gʼaˇ hehnˇ ve, ngaˬ miˇ ma awˬ gʼaˇ nuˇ htaˇ, ngaˬ awˬ gʼaˇ hehnˇ ve yoˬ.” Siˆse kʼoˆ ve, “Yaˬhoˉvaˬ maˇ ga laˇ ve kʼo, awˬ lawn chi hkʼe ve htaꞈ ngaˬ hui yeunˇ hkanˍ maˇ gʼa taˬ. Ngaˬ hui yeunˇ hkanˍ gʼaˇ tuˬ Yaˬhoˉvaˬ awˬ gʼaˇ peꞈ laˇ ve yoˬ. Oˇ ve teˇ yanˇ ngaˬ awˬ to htaꞈ venˇ baˆ taˍ ve htaꞈ tawˍ daꞈ leh, ngaˬ hkʼaˬ hkʼe dawˇ ve Yaˬhoˉvaˬ htaꞈ kʼoˆ piˇ ve yoˬ. Peuˬ hkʼawꞈ nawˉ maˇ maw, awˬ viˉ awˬ nyi yaˇ miˇ 1 gʼaˇ ngaˬ maˇ mawˬ daꞈ ve laiˉ hkʼawꞈ gaˬ˗oˬ ve htaꞈ kʼawꞈ mawˬ daꞈ ve yoˬ. Yawˇ ngaˬ htaꞈ kʼuˉ laˇ leh ngaˬ mehˆ hpfuhˇ htaꞈ nyi leh kʼoˆ laˇ ve, ‘Siˆse˗oˬ chi nawˬ ve yaꞈ kuiˬ hpehꞈ ve maˇ heˆ, tawnˇ taˍ sheˍ mehˍ.’ Ngaˬ Yaˬhoˉvaˬ ve kanˉ ha lehˬ ha kʼa ve hkʼaw kʼawꞈ te kʼai gʼa sheˍ ve lehˬ, yawˇ ga laˇ ve tehꞈ shiˍ ve yoˬ.”

19. Nawˬ aˬ htoꞈ ma te tuˬ dawˇ teh taˍ ve le?

¹⁹ Yaˬhoˉvaˬ lehˬ yawˇ ve kanˉ te ve chaw teˇ gʼaˇ le le Zaˍdoˆ hkʼa shuˍ haꞈ hanˉ ve cawˬ tcuh gaˇ ve yoˬ. (2 Tiˆmoˉseˍ 1:7) Yaꞈ hkʼaˇ, Yaˬhoˉvaˬ ngaˬ hui a shu yawˇ awˬ to htaꞈ gʼaˇ maˇ va tcuh gaˇ. Yawˇ htaꞈ gʼaˇ va tcuh gaˇ ve yoˬ. Chi htaꞈ pa taw, nawˬ gʼa haꞈ hanˉ cawˇ ve awˬ lawn gʼa hpuˇ ve kʼo, Yaˬhoˉvaˬ htaꞈ gʼaˇ va sheˍ. Nawˬ Zaˍdoˆ hkʼa shuˍ haꞈ hanˉ ve cawˬ gʼa tuˬ, Yaˬhoˉvaˬ ga laˇ gʼa ve tehꞈ yonˍ gʼa ve yoˬ.—1 Peˍtruˆ 5:10.