Iˉsaˍyaˆ liꞈ 60:1 hkʼaw kʼoˆ ve, “Yeˍruˆsaˍlehnˍ˗oˬ, tu la leh mvuhˇ nyi hkʼa shuˍ awˬ gʼeuˆ ba chehˇ˗oˆ. Gʼuiˬ sha ve awˬ meꞈ awˬ hponˇ nawˬ awˬ hkʼoˆ lo ba chehˇ taˍ ve yoˬ.” Yeˍruˆsaˍlehnˍ maˇ heˆ leh Ziˉonˍ venˇ lehˬ, oˇ htaˇ teˇ co˗e Yuˇdaꞈ chaw ve venˇ lonˉ hpehꞈ ve yoˬ. Venˇ chi ve lehˬ Iˉsaˍreˍlaˆ chaw ceuˬ hkʼa peu˗eˬ htaꞈ kʼoˆ gaˇ ve yoˬ. (Iˉsaˍyaˆ 60:14; 62:1, 2) Chi ve teˇ tawn hkʼaw Iˉsaˍyaˆ ve tawˇ hkawˇ na hkawˇ 2 maˬ cawˬ la ve lehˬ, awˉ lawˉ teˇ maˬ, Yeˍruˆsaˍlehnˍ “tu la” leh hkʼaˬ hkʼe htaˇ, awˬ gʼeuˆ ba leh hkʼaˬ hkʼe te ve le? Na hkawˇ 2 maˬ teˇ maˬ lehˬ, chi ve teˇ tawn hkʼaw Iˉsaˍyaˆ ve tawˇ hkawˇ ngaˬ hui ve awˬ co˗e aꞈ kehˉ maˍ ve kanˉ cawˬ maˇ jaˇ sheˍ ve awˬ tehˬ hpehꞈ tuˬ ve laˇ?

Yeˍruˆsaˍlehnˍ “tu la” leh hkʼaˬ hkʼe htaˇ awˬ gʼeuˆ ba leh hkʼaˬ hkʼe te ve le? Yuˇdaꞈ chaw Baˍbuˍlonˍ mvuhˇ miˬ lo shu ceˬ te ve 70 hkʼawꞈ ve awˬ yanˇ htaˇ, Yeˍruˆsaˍlehnˍ venˇ leh bon yehˬ lonˉ luˬ kʼai peuˬ. Yaꞈ hkʼaˇ, Baˍbuˍlonˍ chaw Meˍdiˆ chaw leh Paˇshaˇ chaw htaꞈ bawˆ maˇ gʼaˇ peuˬ hkʼawꞈ nawˉ, Baˍbuˍlonˍ mvuhˇ miˬ lo Yuˇdaꞈ chaw shu ceˬ te chehˇ ve hkʼa peu˗eˬ htaꞈ hpehˇ piˇ ve yoˬ. Hkʼe te leh, awˬ tehˬ ve oˉ kʼoˍ pui kuiˬ htaꞈ kʼawꞈ gu te tuˬ yawˇ hui chehˇ kuiˬ lo kʼoꞈ˗e ve yoˬ. (Eˇzaˍraˆ 1:1-4) 537 hkʼawꞈ B.C.E. htaˇ, ka tiꞈ yeˬ ve Iˉsaˍreˍlaˆ chaw 12 chaw ceuˬ Yeˍruˆsaˍlehnˍ venˇ lo kʼoꞈ˗e ve yoˬ. (Iˉsaˍyaˆ 60:4) Yawˇ hui Yaˬhoˉvaˬ htaꞈ tanˬ tuˉ tanˇ piˇ ve yoˬ. Pawehˇ teˇ hpaˍ te leh bon yehˬ lonˉ awˬ suhˉ kaꞈ te ve yoˬ. (Eˇzaˍraˆ 3:1˗4, 7-11; 6:16-22) Yaˬhoˉvaˬ ve awˬ gʼeuˆ Yeˍruˆsaˍlehnˍ venˇ lo tanˬ ba piˇ ve hkʼa tawˍ lehˆ gʼa mawˬ ve yoˬ. Chi ve lehˬ Gʼuiˬ sha ve mvuhˇ miˬ yaˇ htaꞈ awˬ gʼeuˆ teˇ pawˆ kʼawꞈ ba piˇ leh yawˇ hui lehˬ Yaˬhoˉvaˬ htaꞈ maˇ shiˍ ve mvuhˇ miˬ teˇ hpaˍ ve awˬ gʼeuˆ hkʼe hpehꞈ ve yoˬ.

Yaꞈ hkʼaˇ, oˇ htaˇ teˇ co˗e tcuh kaˍ paˍ Iˉsaˍyaˆ ve tawˇ hkawˇ teˇ ceuˬ ceuˬ ceh awˬ tehˬ hpehꞈ la sheˍ ve yoˬ. Peuˬ hkʼawꞈ nawˉ, Iˉsaˍreˍlaˆ chaw maˇ˗awˍ ve Yaˬhoˉvaˬ ve hkawˇ maˇ na yuˬ ve yoˬ. (Neˍhaˍmiˆ 13:27; Maˍlaˍhkiˆ 1:6-8; 2:13, 14; Maꞈhtehˍ 15:7-9) Leh awˉ lawˉ peuˇ ve awˬ co˗e htaˇ, Yeˍsuˆ Meˍsiˉyaꞈ hpehꞈ ve tehꞈ chaw laiˉ gʼaˇ maˇ haꞈ yuˬ ve yoˬ. (Maꞈhtehˍ 27:1, 2) 70 hkʼawꞈ C.E. htaˇ gaˬ leh Yeˍruˆsaˍlehnˍ venˇ leh bon yehˬ lonˉ kaꞈ teˇ pawˆ kʼawꞈ te luˬ piˇ ve yoˬ.

Nyi ma luˬ lawꞈ lawꞈ ve awˬ ceuˬ chi hkʼe ve hpehꞈ la tuˬ yoˬ tehꞈ, Yaˬhoˉvaˬ awˉ lawˉ htaˇ kaꞈ kʼoˆ taˍ ve yoˬ. (Daˍyeˍlaˆ 9:24-27) Iˉsaˍyaˆ liꞈ kaˇ nanˉ uiˍ 60 hkʼaw Yeˍruˆsaˍlehnˍ venˇ kʼawꞈ gu te tuˬ yoˬ tehꞈ, tcuh kaˍ paˍ tawˇ hkawˇ kʼoˆ taˍ ve awˬ tehˬ hpehꞈ la ve htaꞈ gʼa mawˬ ve yoˬ.

Leh Iˉsaˍyaˆ tcuh kaˍ paˍ ve tawˇ hkawˇ kʼoˆ taˍ ve, maˍ ve kanˉ ngaˬ hui ve awˬ co˗e aꞈ kehˉ cawˬ maˇ jaˇ tuˬ ve laˇ? Cawˬ maˇ jaˇ tuˬ ve yoˬ. Yaꞈ hkʼaˇ, “mvuhˇ naw ma lo cawˬ ve Yeˍruˆsaˍlehnˍ venˇ” htaꞈ awˬ tehˬ hpehꞈ la ve yoˬ. Pawˇluꞈ kʼoˆ ve, yawˇ “ngaˬ hui ve awˬ e hpehꞈ ve yoˬ.” (Gaˍlaˍtiˆ 4:26) Mvuhˇ naw ma lo cawˬ ve Yeˍruˆsaˍlehnˍ venˇ lehˬ, mvuhˇ naw ma hkʼoˆ lo Gʼuiˬ sha ve kanˉ hkʼaˇ htaꞈ kʼoˆ gaˇ ve yoˬ. Chi ve lehˬ Yaˬhoˉvaˬ htaꞈ ka tiꞈ yeˬ ve mvuhˇ naw ma tcuh yaˇ hpehꞈ ve yoˬ. Yawˇ ve “yaˇ” hui lehˬ, Yeˍsuˆ Hkriꞈ leh leuˆ yuˬ taˍ ve chaw 144,000 gʼaˇ hpehꞈ ve yoˬ. Yawˇ hui Pawˇluꞈ hkʼa shuˍ mvuhˇ naw ma hkʼoˆ lo kʼai tuˬ dawˇ law kuiˬ cawˬ ve yoˬ. Leuˆ yuˬ taˍ ve chaw lehˬ “daꞈ kehˬ ve mvuhˇ miˬ yaˇ” maˇ heˆ leh “Gʼuiˬ sha ve Iˉsaˍreˍlaˆ chaw” hpehꞈ ve yoˬ.—1 Peˍtruˆ 2:9; Gaˍlaˍtiˆ 6:16.

Mvuhˇ naw ma lo cawˬ ve Yeˍruˆsaˍlehnˍ venˇ “tu la” leh hkʼaˬ hkʼe te “awˬ gʼeuˆ ba” tuˬ le? Yawˇ chi hkʼe te ve lehˬ leuˆ yuˬ taˍ ve chaw leuˆ taˍ sheˍ ve htaꞈ cuˇ ve yoˬ. Yawˇ hui htaꞈ hpehꞈ la ve awˬ ceuˬ leh Iˉsaˍyaˆ liꞈ kaˇ nanˉ uiˍ 60 hkʼaw tcuh kaˍ paˍ ve tawˇ hkawˇ htaꞈ ngaˬ hui tehˆ daꞈ nyi sheˍ.

Leuˆ yuˬ taˍ ve chaw gʼa “tu la” cawˇ ve yoˬ. 200 hkʼawꞈ ve awˬ yanˇ htaˇ tanˬ leh tcuh yaˇ hui suh peuˬ hkʼawꞈ nawˉ, Gʼuiˬ sha htaꞈ hpfuhˆ ve chaw maˇ jaˇ ve pa taw, yawˇ hui yonˍ hkʼaˇ hpawˇ naˆ hoꞈ ve hkʼaw chehˇ taˍ ve yoˬ. (Maꞈhtehˍ 13:37-43) Hkʼe te leh, yawˇ hui Baˍbuˍlonˍ ve awˬ ceˬ te ve hkʼe hpehꞈ ve, maˇ heˆ leh maˇ heˆ heˆ ve bon liˇ hkʼa peu˗eˬ “miˬ guiˬ chi leh ve awˬ yanˇ” hkʼaw chehˇ taˍ ve hkʼe hpehꞈ ve yoˬ. Chi lehˬ, 1914 hkʼawꞈ htaˇ tanˬ leh leuˆ yuˬ taˍ ve chaw kaꞈ awˬ ceˬ hkʼe hpehꞈ chehˇ sheˍ ve yoˬ. (Maꞈhtehˍ 13:39,  40) Yaꞈ hkʼaˇ, 1919 hkʼawꞈ gaˬ htaˇ, yawˇ hui hpehˇ piˇ ve htaꞈ gʼa leh yonˍ hkʼaˇ hpawˇ awˬ gʼeuˆ kʼawꞈ ba ve yoˬ. Chi ve lehˬ Gʼuiˬ sha ve mvuhˇ miˬ awˬ lawn gʼaˇ hteꞈ hto toˇ ve yoˬ. a Peuˬ laˬ ve laiˉ hkʼawꞈ htaˇ, mvuhˇ miˬ teˇ peˆ le le leh, Gʼuiˬ sha ve Iˉsaˍreˍlaˆ chaw hui leuˉ taˍ sheˍ ve kaꞈ awˬ gʼeuˆ gʼa ve ve yoˬ. Chi ve lehˬ Iˉsaˍyaˆ liꞈ 60:3 hkʼaw “jawˇ mawˇ teˇ hpaˍ” htaꞈ kaꞈ kʼoˆ gaˇ ve yoˬ.—Hpeuꞈ maˍ ve 5:9, 10.

Awˬ gʼuˇ suhˍ hpawˇ leuˆ yuˬ taˍ ve chaw Gʼuiˬ sha ve awˬ gʼeuˆ chi teˇ hkui aꞈ kehˉ kʼawꞈ ba tuˬ yoˬ. Hkʼaˬ hkʼe hpawˇ ba tuˬ le? Yawˇ hui miˬ guiˬ hkʼoˆ lo a shaꞈ leh peuˬ hkʼawꞈ nawˉ, yawˇ hui “Yeˍruˆsaˍlehnˍ venˇ awˬ suhˉ” hkʼaw teˇ gʼaˇ hpehꞈ ve, maˇ heˆ leh yawˇ hui Yeˍsuˆ ve yaˇ miˇ haˉ 144,000 gʼaˇ hpehꞈ leh jawˇ mawˇ leh paw hkuˆ kaꞈ hpehꞈ tuˬ yoˬ.—Hpeuꞈ maˍ ve 14:1; 21:1, 2, 24; 22:3-5.

Yeˍruˆsaˍlehnˍ venˇ awˬ suhˉ lehˬ Iˉsaˍyaˆ liꞈ 60:1 hkʼaw awˬ tehˬ hpehꞈ la tuˬ te piˇ gʼa ve yoˬ. (Iˉsaˍyaˆ liꞈ 60:1, 3, 5, 11, 19, 20 leh Hpeuꞈ maˍ ve liꞈ 21:2, 9-11, 22-26 htaꞈ tehˆ daꞈ sheˍ.) Oˇ htaˇ teˇ co˗e Yeˍruˆsaˍlehnˍ venˇ lehˬ uˉ peunˍ kuiˬ awˬ ti hpehꞈ ve hkʼa shuˍ, Yeˍruˆsaˍlehnˍ venˇ awˬ suhˉ lehˬ Yeˍsuˆ pawnˇ daꞈ leh miˬ guiˬ awˬ suhˉ htaꞈ uˉ peunˍ tuˬ yoˬ. Yeˍruˆsaˍlehnˍ venˇ awˬ suhˉ “mvuhˇ naw ma hkʼoˆ Gʼuiˬ sha geh lo tawˆ la leh yaꞈ la chehˇ ve” hkʼaˬ hkʼe ve le? Chi ve lehˬ miˬ guiˬ hkʼoˆ lo chehˇ ve chaw htaꞈ a yeˇ yuˬ ve yoˬ. Venˇ chi lehˬ Gʼuiˬ sha htaꞈ kawˆ leh yawˆ yan ve mvuhˇ miˬ hkʼaw chehˇ ve chaw htaꞈ “awˬ gʼeuˆ oˇ ve awˬ hkʼaw lo toˇ kʼai tuˬ” te piˇ tuˬ yoˬ. Leh awˬ gʼuˇ suhˍ hpawˇ Gʼuiˬ sha htaꞈ kawˆ leh yawˆ yan ve chaw chi teˇ hpaˍ venˇ baˆ maˇ cawˬ leh maˇ gʼa suh˗o. (Hpeuꞈ maˍ ve 21:3, 4, 24) Awˬ bon gʼa ve lehˬ, Iˉsaˍyaˆ leh awˬ nu ve tcuh kaˍ paˍ awˬ gʼuˇ suhˍ htaˇ kaꞈ kʼoˆ taˍ ve hkʼe, “awˬ ceuˬ hkʼa peu˗eˬ ve htaꞈ awˬ suhˉ kʼawꞈ gu te” tuˬ yoˬ. (Tcuh yaˇ 3:21) Yeˍsuˆ jawˇ mawˇ te leh yawˇ uˉ peunˍ ve 1,000 hkʼawꞈ peuˬ hkʼawꞈ nawˉ, awˬ suhˉ kʼawꞈ gu te ve uiˍ jaˇ ve cawˬ tuˬ yoˬ.