1. Laiˉ gʼaˇ Yaˬhoˉvaˬ ve kanˉ maˇ maˇ hkʼaˬ hkʼe te ve le?

  Awˬ leh meuˇ ve awˬ yanˇ gʼaˇ hteꞈ gaˬ la paˇ neˇ ve kʼo, ngaˬ hui kanˉ te tuˬ cawˬ maˇ jaˇ. (Maꞈhtehˍ 24:14; Luˉkaꞈ 10:2; 1 Peˍtruˆ 5:2) Yaˬhoˉvaˬ awˬ pon ngaˬ hui te gʼa ve hkʼe te gaˇ leh laiˉ gʼaˇ Yaˬhoˉvaˬ ve kanˉ maˇ maˇ te ve yoˬ. Chaw teˇ hpaˍ gʼuˇ suhˍ peuˍ ve te gaˇ ve, Beˍteˍlaˆ hkʼaw Gʼuiˬ sha ve kanˉ te gaˇ ve, hpawnˬ daꞈ kuiˬ yehˬ te ve htaꞈ ga piˇ gaˇ leh Gʼuiˬ sha ve kanˉ hkʼaˇ hpawˇ yehˬ te ve kaꞈ ga piˇ gaˇ ve yoˬ. Awˬ viˉ awˬ nyi hawˉ hkʼaˆ laiˉ gʼaˇ ga piˇ shehˍ hpaˇ leh nyi haꞈ shaˉ paˍ kaꞈ te gaˇ ve yoˬ. (1 Tiˆmoˉseˍ 3:1, 8) Yaˬhoˉvaˬ ve chaw yawˇ ve kanˉ ha lehˬ ha kʼa te ve htaꞈ gʼa mawˬ htaˇ ha lehˬ jaˇ!—Chiˇ mvuh ve 110:3; Iˉsaˍyaˆ 6:8.

2. Ngaˬ hui dawˇ teh taˍ ve hkʼe te maˇ gʼa ve kʼo, hkʼaˬ hkʼe dawˇ tuˬ te laˇ ve le?

² Ngaˬ hui Gʼuiˬ sha ve kanˉ te tuˬ dawˇ teh taˍ ve te maˇ gʼa sheˍ ve kʼo, awˬ gʼaˇ nuˇ ve yoˬ hehˉ. A shaꞈ maˇ leh a shaꞈ teꞈ kuiˬ hkʼaw awˬ tcuhˆ awˬ yanˇ pa kʼai ve pa taw, awˬ vuiˬ te gaˇ ve hkʼe maˇ gʼa te ve pa taw, nyi ma luˬ ve yoˬ. (Tawˇ naˇ ve 13:12) Meh˗le˗saˇ kaꞈ chi hkʼe dawˇ jaw ve yoˬ. * Yawˇ Beˍtaˍlaˆ hkʼaw maˇ heˆ leh Gʼuiˬ sha ve mvuhˇ miˬ Hto toˇ ve chaw Liꞈ henˇ yehˬ lo kʼai gaˇ ve yoˬ. (SKE) Yawˇ kʼoˆ ve, “oˇ ve teˇ yanˇ ngaˬ a shaꞈ maˇ˗oˬ leh awˬ vuiˬ chi teˇ hpaˍ lehˬ, ngaˬ ve zuhꞈ maˆ hkʼe hpehꞈ ve yoˬ. Teˇ pawˆ pawˆ chi ve ngaˬ awˬ gʼaˇ nuˇ tuˬ te laˇ ve yoˬ.”

3. Chaw teˇ hpaˍ awˬ vuiˬ maˇ maˇ gʼa tuˬ aˬ htoꞈ ma gʼa te cawˇ ve le?

³ Awˬ viˉ awˬ nyi teˇ hpaˍ a shaꞈ i sheˍ leh awˬ gʼaˇ daꞈ ve awˬ vuiˬ  gʼa tuˬ te hkʼaˇ dawˇ hkʼaˇ gʼa daꞈ ve yoˬ. Yawˇ cuˇ yiˍ cawˬ ve, dawˇ cheˆ haˉ ve, leh nyi ma pfuhˇ ve yoˬ. Yaꞈ hkʼaˇ, yawˇ yeunˇ hkanˍ ve chaw gʼa hpehꞈ ve, hkʼa dehꞈ gʼa te ve, leh shu htaꞈ kaꞈ gʼa yawˆ yan piˇ ve yoˬ. Nawˬ te hkʼaˇ dawˇ hkʼaˇ chi ve teˇ hpaˍ te jawˬ ve kʼo, nawˬ maˇ dawˇ maˇ gaˇ ve hkʼaw awˬ vuiˬ kaꞈ gʼa la ve yoˬ hehˉ. Niˆ ve awˬ lawn htaꞈ teˇ geh nyi sheˍ. Yawˇ 20 hkʼawꞈ htaˇ, ga piˇ shehˍ hpaˇ maˇ gʼa te ve pa taw, nyi ma luˬ jaˇ. Yawˇ kʼoˆ ve, “ngaˬ teˇ ceuˬ ceuˬ maˇ daꞈ ve cawˬ ve tehꞈ dawˇ ve yoˬ.” Yaꞈ hkʼaˇ, Niˆ awˬ gʼaˇ maˇ nuˇ. Yawˇ Hkriꞈ yaˇ awˬ moˍ hkʼaw awˬ vuiˬ gʼa ve htaꞈ te ve, leh Gʼuiˬ sha ve kanˉ kaꞈ hkʼa dehꞈ te ve yoˬ. Chi teˇ hkui yawˇ Awˬ tcuhˆ puiˍ lo ve Kawˍmiˍtiˍ hkʼaw kanˉ te chehˇ ve yoˬ.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Nawˬ dawˇ teh taˍ ve teˇ ceuˬ ceuˬ maˇ gʼa te sheˍ ve pa taw, nyi ma luˬ˗aw laˇ? Nawˬ chi hkʼe dawˇ ve kʼo, bon lawˬ htaˇ Yaˬhoˉvaˬ htaꞈ kʼoˆ maˍ piˇ sheˍ. (Chiˇ mvuh ve 37:5-7) Chi hkʼoˆ kaꞈ, nawˬ Gʼuiˬ sha ve kanˉ te ve hkʼaw hkʼaˬ hkʼe te daꞈ la gʼa tuˬ, awˬ viˉ awˬ nyi hpehꞈ laˬ jaw ve chaw geh beˆ maˍ laˇ tuˬ lawˬ sheˍ. Leh yawˇ beˆ maˍ laˇ ve hkʼe coˇ caˇ leh gʼaꞈ te sheˍ. Nawˬ chi hkʼe gʼaꞈ te ve kʼo, nawˬ dawˇ teh taˍ ve awˬ vuiˬ htaꞈ gʼa te tuˬ yoˬ hehˉ. Yaꞈ hkʼaˇ, chi awˬ gʼuˇ suhˍ htaˇ kʼoˆ kʼai peuˬ ve Meh˗le˗saˇ hkʼe nawˬ dawˇ ve kʼo, te gaˇ ve awˬ vuiˬ htaꞈ te gʼa tuˬ hpehꞈ kʼai maˇ gʼa tehꞈ nawˬ shiˍ ve yoˬ. Ha lehˬ ve chaw hpehꞈ gʼa tuˬ nawˬ hkʼaˬ hkʼe gʼa te tuˬ le? Awˬ lawn chi ve hkʼaw (1) ha lehˬ tuˬ te laˇ ve aˬ htoꞈ ma le? (2) Nawˬ ha lehˬ maˇ la tuˬ aˬ htoꞈ ma gʼa te ve le? (3) Dawˇ teh taˍ ve ha lehˬ maˇ la tuˬ te laˇ gʼa ve aˬ htoꞈ ma cawˬ ve le? Chi ve teˇ hpaˍ htaꞈ teˇ geh henˇ tuˬ yoˬ.

5. Cuˇ yiˍ piˇ ve liꞈ 6:9 hkʼaw ngaˬ hui ha lehˬ gʼa tuˬ hkʼaˬ hkʼe gʼa te cawˇ ve le?

⁵ Cuˇ yiˍ piˇ ve liꞈ 6:9 hkʼaw ngaˬ hui ha lehˬ gʼa tuˬ ga laˇ gʼa ve htaꞈ shiˍ tuˬ yoˬ. (Gʼaw sheˍ.) “Cawˬ taˍ ve mawˇ hta nyi hkʼaˇ suh chehˇ ve” chaw lehˬ yawˇ cawˬ taˍ ve leh hpehꞈ chehˇ ve awˬ ceuˬ htaꞈ nyi hkaˇ suh ve chaw hpehꞈ ve yoˬ. Yaꞈ hkʼaˇ, “heuˆ gaˇ ve mawˇ htaꞈ dawˇ law chehˇ ve” chaw lehˬ, yawˇ gʼa tuˬ awˬ hkʼaˇ maˇ cawˬ ve htaꞈ gʼaˇ hteꞈ dawˇ nyi chehˇ ve chaw hpehꞈ ve yoˬ. Chi ngaˬ hui htaꞈ aˬ htoꞈ ma maˍ laˇ ve le? Ngaˬ hui ha lehˬ gʼa tuˬ cawˬ taˍ ve htaꞈ nyi hkʼaˇ suh leh ngaˬ hui awˬ tehˬ te gʼa tuˬ ve htaꞈ dawˇ teh taˍ sheˍ.

6. Tawˇ pa haˉ tehˆ maˍ laˇ ve awˬ lawn htaꞈ ngaˬ hui aˬ htoꞈ ma henˇ tuˬ le? Leh hkʼaˬ ve teˇ tawn htaꞈ hkʼa dehꞈ dawˇ nyi cawˇ ve le?

⁶ Ngaˬ hui cawˬ taˍ ve awˬ ceuˬ htaꞈ nyi hkʼaˇ suh ve hpehꞈ kʼai gʼa˗aw laˇ? Chaw teˇ hpaˍ kʼo awˬ suhˉ awˬ suhˉ htaꞈ hkʼaˬ htaˆ kaꞈ heuˆ gaˇ ve pa taw, cawˬ taˍ ve awˬ ceuˬ htaꞈ nyi hkʼaˇ maˇ suh. Yaꞈ hkʼaˇ, Liꞈ hpu hkʼaw kʼoˆ ve, chi teˇ hkui ngaˬ hui cawˬ taˍ ve awˬ ceuˬ htaꞈ nyi hkʼaˇ suh chehˇ gʼa ve yoˬ. Chi hkʼaˬ hkʼe hpehꞈ gʼa ve le? Maꞈhtehˍ liꞈ 25:14-30 hkʼaw Yeˍsuˆ tawˇ pa haˉ tehˆ maˍ laˇ ve hpu ve awˬ lawn htaꞈ ngaˬ hui teˇ geh nyi sheˍ. Ngaˬ hui te chehˇ ve awˬ ceuˬ htaꞈ hkʼaˬ hkʼe te ha lehˬ gʼa tuˬ leh ha lehˬ maˇ la tuˬ hkʼaˬ hkʼe gʼa te cawˇ ve hkʼa dehꞈ chaˬ nyi sheˍ.

7. Hpu awˬ lawn tawˇ pa haˉ tehˆ maˍ laˇ taˍ ve htaꞈ a ciˉ kʼoˆ maˍ laˇ sheˍ

⁷ Hawˉ hkʼaˆ teˇ gʼaˇ shu mvuhˇ miˬ lo kʼai˗a te chehˇ ve awˬ lawn Yeˍsuˆ tawˇ pa haˉ tehˆ maˍ laˇ ve yoˬ. Yawˇ maˇ kʼai sheˍ htaˇ awˬ ceˬ htaꞈ kuˬ laˬ leh teˇ gʼaˇ leh teˇ gʼaˇ tanˇ kaˬ te tuˬ hpu piˇ ve yoˬ. Awˬ ceˬ teˇ gʼaˇ leh teˇ gʼaˇ puiˉ ve hpehꞈ ve maˇ shuˍ daꞈ ve tehꞈ yawˇ shiˍ ve yoˬ. Awˬ ceˬ teˇ gʼaˇ leh teˇ gʼaˇ puiˉ ve hpehꞈ ve hkʼe yawˇ hpu piˇ ve yoˬ. Awˬ ceˬ awˉ lawˉ teˇ gʼaˇ hpu 5,000 htehꞈ gʼa ve, 2 gʼaˇ teˇ gʼaˇ 2,000 htehꞈ gʼa ve, leh 3 gʼaˇ teˇ gʼaˇ 1,000 htehꞈ gʼa ve yoˬ. Awˬ ceˬ 2 gʼaˇ lehˬ awˬ shehˍ hpaˇ ve awˬ yawˬ gʼa tuˬ te piˇ ve yoˬ. Awˬ leh teˇ gʼaˇ teꞈ chiˉ maˇ te ve pa taw, awˬ shehˍ hpaˇ gʼaꞈ kʼoˍ piˇ ve yoˬ.

8. Tawˇ pa haˉ te maˍ laˇ ve hkʼaw awˬ ceˬ awˉ lawˉ teˇ gʼaˇ aˬ htoꞈ ma te ha lehˬ ve le?

 ⁸ Awˬ ceˬ awˉ lawˉ teˇ gʼaˇ hpu 5,000 htehꞈ gʼa ve pa taw, ha lehˬ jaˇ ve yoˬ hehˉ. Chi awˬ shehˍ hpaˇ yawˇ htaꞈ yonˍ gʼa jaˇ ve tehꞈ hpeuꞈ maw piˇ ve yoˬ hehˉ. Awˬ ceˬ 2 gʼaˇ teˇ gʼaˇ yawˇ awˉ lawˉ teˇ gʼaˇ hkʼe hpu maˇ gʼa ve pa taw, nyi ma luˬ kaꞈ gʼa ve yoˬ. Yaꞈ hkʼaˇ, yawˇ nyi ma maˇ luˬ.

9. Awˬ ceˬ 2 gʼaˇ teˇ gʼaˇ htaꞈ caˉ daꞈ ve Yeˍsuˆ aˬ htoꞈ ma maˇ gʼa kʼoˆ ve le? (Maꞈhtehˍ 25:22, 23)

⁹ Maꞈhtehˍ liꞈ 25:22, 23 gʼaw sheˍ. Awˬ ceˬ 2 gʼaˇ teˇ gʼaˇ hpu 2,000 htehꞈ ceh tiˉ gʼa ve pa taw, beuꞈ leh nyi ma luˬ ve tehꞈ Yeˍsuˆ maˇ gʼa kʼoˆ laˇ taˍ. ‘Awˬ ceˬ hkanˇ leh ngaˬ hpu chi hkʼe ceh tiˉ gʼa ve laˇ? Awˬ tehˬ kʼo, ngaˬ kaꞈ awˬ ceˬ awˉ lawˉ teˇ gʼaˇ hkʼe cheuˬ ve neˬ. Awˬ shehˍ hpaˇ ngaˬ puiˉ ve hpehꞈ ve htaꞈ awˬ hpfuhˇ maˇ shiˍ ve kʼo, ngaˬ yawˇ awˬ pon kanˉ maˇ te piˇ˗o. Hpu htaꞈ duˇ faˉ taˉ leh awˬ nu ve teˇ kaˬ lo kanˉ ca te tuˬ yoˬ’ tehꞈ Yeˍsuˆ maˇ gʼa kʼoˆ laˇ taˍ.

10. Awˬ ceˬ 2 gʼaˇ teˇ gʼaˇ yawˇ hpu gʼa taˍ ve htaꞈ hkʼaˬ hkʼe te ve le?

¹⁰ Awˬ ceˬ 2 gʼaˇ teˇ gʼaˇ awˬ ceˬ awˉ lawˉ teˇ gʼaˇ hkʼa shuˍ coˇ caˇ leh kanˉ te ve yoˬ. Hkʼe te leh, awˬ ceˬ 2 gʼaˇ teˇ gʼaˇ awˬ shehˍ hpaˇ ve hpu awˬ peuˇ hkʼa shuˍ awˬ yawˬ gʼa tuˬ te piˇ ve yoˬ. Awˬ bon gʼa ve lehˬ, awˬ shehˍ hpaˇ yawˇ htaꞈ nyi hkʼaˇ suh jaˇ leh yawˇ htaꞈ awˬ vuiˬ maˇ maˇ kʼawꞈ piˇ tuˬ yoˬ tehꞈ kʼoˆ ve yoˬ.

11. Ngaˬ hui hkʼaˬ hkʼe te ha lehˬ maˇ la gʼa tuˬ le?

¹¹ Ngaˬ hui gʼa taˍ ve awˬ vuiˬ teˇ ceuˬ le le htaꞈ gʼaˇ hteꞈ te ve kʼo, ngaˬ hui ha lehˬ jaˇ tuˬ yoˬ. Nawˬ “gʼaˇ hteꞈ” hto toˇ leh Hkriꞈ yaˇ awˬ moˍ hkʼaw ve awˬ vuiˬ teˇ hpaˍ kaiˬ ve hkʼaw te sheˍ.  (Tcuh yaˇ 18:5; Heˍbrehˇ 10:24, 25) Hpawnˬ daꞈ htaˇ awˬ nu ve chaw htaꞈ awˬ gʼaˇ piˇ gʼa tuˬ, nawˬ hkʼa dehꞈ gu sheˍ. Mvuhˇ hpeuꞈ haˉ hpawnˬ daꞈ ve hkʼaw nawˬ aˬ htoꞈ ma awˬ vuiˬ gʼa ve maˇ kʼoˆ, coˇ caˇ leh hkʼa dehꞈ gu sheˍ. Hkriꞈ yaˇ awˬ moˍ hkʼaw ve kanˉ gʼa ga laˇ tuˬ nawˬ htaꞈ kaꞈ lawˬ laˇ ve kʼo, awˬ yanˇ cawˇ cawˇ kʼai leh hkʼa dehꞈ te sheˍ. Kanˉ teˇ ceuˬ ceuˬ a yeˇ maˇ uiˍ ve tehꞈ maˇ shawˍ leh kanˉ chi ve htaꞈ kaꞈ awˬ yanˇ shonˇ ve tehꞈ kaꞈ taˇ dawˇ. Nawˬ awˬ vuiˬ gʼa taˍ ve htaꞈ cheuˬ la tuˬ coˇ caˇ leh te jawˬ sheˍ. (Tawˇnaˉ ve 22:29) Awˬ vuiˬ gʼa taˍ ve htaꞈ nawˬ coˇ caˇ leh te ve kʼo, gʼaˇ hteꞈ kʼawꞈ cheuˬ la ve, Yaˬhoˉvaˬ geh kaꞈ meuˆ daꞈ ve, leh ha lehˬ jaˇ tuˬ yoˬ. (Gaˍlaˍtiˆ 6:4) Yaꞈ hkʼaˇ, nawˬ chi hkʼe te ve kʼo, nawˬ te gaˇ ve awˬ vuiˬ gʼa te ve chaw geh kaꞈ nawˬ ha lehˬ gʼa tuˬ sha ve yoˬ.—Roˉmaꞈ 12:15; Gaˍlaˍtiˆ 5:26.

12. Awˬ viˉ awˬ nyi 2 gʼaˇ ha lehˬ jaˇ tuˬ aˬ htoꞈ ma te ve le?

¹² Meh˗le˗saˇ Beˍtaˍlaˆ lo kʼai gaˇ leh Gʼuiˬ sha ve mvuhˇ miˬ Hto toˇ ve chaw Liꞈ henˇ yehˬ lo kʼai gaˇ ve htaꞈ nawˬ tawnˇ˗gʼa laˇ? Yawˇ te gaˇ ve hkʼe maˇ gʼa te ve yoˬ. Yawˇ kʼoˆ ve, “ngaˬ gʼuˇ suhˍ peuˍ ve htaꞈ coˇ caˇ leh te ve, leh hto toˇ ve te gʼa ve hkʼe teˇ ceuˬ le le te ve yoˬ. Chi ha lehˬ jaˇ tuˬ te laˇ ve yoˬ.” Niˆ ga piˇ shehˍ hpaˇ maˇ gʼa te ve pa taw, yawˇ awˬ gʼaˇ nuˇ htaˇ hkʼaˬ hkʼe te ve le? Yawˇ kʼoˆ ve, “yawˇ gʼa te ve awˬ vuiˬ hto toˇ ve leh hpawnˬ daꞈ kuiˬ hkʼaw awˬ gʼaˇ piˇ daꞈ ve htaꞈ a yeˇ yuˬ leh Beˍtaˍlaˆ hkʼaw kʼai tuˬ kaꞈ liꞈ bvuhꞈ feu piˇ ve yoˬ. 1 hkʼawꞈ peuꞈ hkʼawꞈ nawˉ ngaˬ Beˍteˍlaˆ hkʼaw gʼa kʼai ve yoˬ.”

13. Chi teˇ hkui nawˬ gʼa ve awˬ vuiˬ htaꞈ gʼaˇ hteꞈ te ve kʼo, awˬ bon hkʼaˬ hkʼe gʼa tuˬ le? (Cuˇ yiˍ piˇ ve liꞈ 2:24)

¹³ Chi teˇ hkui nawˬ gʼa ve awˬ vuiˬ htaꞈ gʼaˇ hteꞈ te ve kʼo, awˬ gʼuˇ suhˍ hpawˇ nawˬ awˬ vuiˬ maˇ maˇ kʼawꞈ gʼa tuˬ laˇ? Niˆ awˬ vuiˬ gʼa ve hkʼe, nawˬ kaꞈ gʼa tuˬ yoˬ hehˉ. Meh˗le˗saˇ dawˇ teh taˍ ve awˬ vuiˬ htaꞈ maˇ gʼa te ve hkʼe, nawˬ kaꞈ dawˇ teh taˍ ve awˬ vuiˬ htaꞈ maˇ gʼa te ve kʼo, ha lehˬ gʼa sheˍ ve yoˬ. Teˇ ceuˬ ceuˬ te gʼa ve htaꞈ nawˬ nyi hkʼaˇ suh tuˬ yoˬ. (Cuˇ yiˍ piˇ ve 2:24 gʼaw sheˍ.) Jawˇmawˇ Yeˍsuˆ nyi hkʼaˇ suh tuˬ nawˬ te piˇ chehˇ ve tehꞈ shiˍ ve pa taw, ha lehˬ tuˬ yoˬ.

14. Yaˬhoˉvaˬ ve kanˉ te tuˬ dawˇ teh taˍ htaˇ ngaˬ hui aˬ htoꞈ ma htaꞈ tawnˇ taˍ cawˇ ve le?

¹⁴ Chi teˇ hkui ngaˬ hui awˬ vuiˬ gʼa ve htaꞈ a yeˇ yuˬ ve kʼo, Yaˬhoˉvaˬ ve kanˉ maˇ maˇ kʼawꞈ te tuˬ awˬ hkʼaˇ maˇ ca ve htaꞈ kʼoˆ gaˇ ve laˇ? Chi hkʼe maˇ heˆ. Awˬ viˉ awˬ nyi htaꞈ ga piˇ tuˬ leh Gʼuiˬ sha ve kanˉ maˇ maˇ kʼawꞈ te tuˬ coˇ caˇ leh dawˇ teh taˍ sheˍ. Ngaˬ hui awˬ to aꞈ kehˉ shu htaꞈ a yeˇ yuˬ ve kʼo, te gʼa tuˬ yoˬ.—Tawˇ naˉ ve 11:2; Tcuh yaˇ 20:35.

15. Nawˬ ha lehˬ maˇ la tuˬ ga laˇ gʼa ve dawˇ teh taˍ ve aˬ htoꞈ ma cawˬ ve le?

¹⁵ Nawˬ aˬ htoꞈ ma te tuˬ dawˇ teh taˍ gʼa ve le? Nawˬ dawˇ teh taˍ ve htaꞈ awˬ tehˬ te gʼa tuˬ, Yaˬhoˉvaˬ ga laˇ tcuh sheˍ. (Tawˇ naˉ ve 16:3; Yaˍkoˆ 1:5)  Awˬ lawn chi ve hkʼaw awˉ lawˉ htaˇ kʼoˆ kʼai peuˬ ve hkʼe, teˇ tcuhˉ teˇ yanˇ gʼuˇ suhˍ peuˍ ve te ve, hkʼaˬ htaˆ kaꞈ gʼuˇ suhˍ peuˍ ve te ve, Beˍteˍlaˆ hkʼaw Gʼuiˬ sha ve kanˉ te ve, hpawnˬ daꞈ kuiˬ yehˬ te ve htaꞈ ga piˇ ve, Gʼuiˬ sha ve kanˉ hkʼaˇ hpawˇ te tuˬ dawˇ teh taˍ ve htaꞈ nawˬ tawnˇ gʼa˗aw laˇ? Maˇ maˇ hto toˇ gʼa tuˬ, nawˬ chaw ceuˬ tawˇ hkawˇ awˬ suhˉ henˇ taˍ ve geh ca ga piˇ gʼa ve yoˬ. Yaˬhoˉvaˬ ve a loˍ te tuˬ hteˇ˗ehˬ shawˇ˗ehˬ gu ve liꞈ kʼoˆ awˬ lawn 10 hkʼaw dawˇ teh taˍ ve htaꞈ caˉ daꞈ ve nawˬ hkʼa dehꞈ gʼaw nyi gʼa ve yoˬ. Leh Hkriꞈ yaˇ awˬ moˍ hkʼaw nyi haꞈ shaˉ paˍ geh kaꞈ nawˬ yaw daꞈ gʼa ve yoˬ. * Nawˬ dawˇ teh taˍ ve chi ve teˇ hpaˍ htaꞈ gʼaꞈ te˗oˬ htaˇ, nawˬ ha lehˬ maˇ la leh co ha hpawˇ uiˍ la mvuh la ve htaꞈ awˬ nu ve chaw mawˬ tuˬ yoˬ.

16. Chi teˇ hkui nawˬ dawˇ teh taˍ ve htaꞈ teˇ ceuˬ ceuˬ maˇ te gʼa sheˍ ve kʼo, nawˬ aˬ htoꞈ ma te cawˇ ve le?

¹⁶ Chi awˬ gʼuˇ suhˍ htaˇ kʼoˆ kʼai peuˬ ve hkʼe, chi teˇ hkui nawˬ dawˇ teh taˍ ve htaꞈ teˇ ceuˬ ceuˬ maˇ  te gʼa sheˍ ve kʼo, nawˬ awˬ tehˬ te gʼa tuˬ, dawˇ teh taˍ ve htaꞈ dawˇ nyi sheˍ. Teˇ lawn lawn htaꞈ teˇ geh nyi sheˍ.

17. 1 Tiˆmoˉseˍ liꞈ 4:13, 15 hkʼaw kʼoˆ taˍ ve hkʼe, awˬ viˉ awˬ nyi hawˉ hkʼaˆ hkʼa dehꞈ maˍ puiˉ tuˬ hkʼaˬ hkʼe te gʼa ve le?

¹⁷ 1 Tiˆmoˉseˍ liꞈ 4:13, 15 gʼaw sheˍ. Nawˬ awˬ viˉ awˬ nyi hawˉ hkʼaˆ Baˆtiˆsaˬ haꞈ yuˬ˗oˬ ve chaw hpehꞈ ve kʼo, tawˇ hkʼa dehꞈ yaw puiˉ tuˬ, hkʼa dehꞈ maˍ cheuˬ tuˬ, leh bon hkʼa dehꞈ maˍ puiˉ tuˬ coˇ caˇ leh te jawˬ sheˍ. Aˬ htoꞈ ma pa taw le? Awˬ lawn kʼo, nawˬ gʼaˇ hteꞈ gʼaw jawˬ ve, gʼaˇ hteꞈ kʼoˆ jawˬ ve, leh gʼaˇ hteꞈ maˍ jawˬ ve kʼo, na ve chaw htaꞈ ga piˇ gʼa jaˇ tuˬ yoˬ. Nawˬ ve liꞈ kʼoˆ Gʼaw leh maˍ puiˉ tuˬ coˇ caˇ sheˍ tehꞈ kʼoˆ ve htaꞈ teˇ lawn peuˬ teˇ lawn henˇ tuˬ dawˇ teh taˍ sheˍ. Aˉ hkʼaw chehˇ htaˇ te jawˬ leh awˬ vuiˬ gʼa htaˇ nawˬ te jawˬ taˍ ve hkʼe gʼaꞈ te sheˍ. Chi hkʼoˆ kaꞈ, hpawnˬ daꞈ ve beˆ maˍ piˇ paˍ, maˇ heˆ leh awˬ nu ve nyi haꞈ shaˉ paˍ “bon maˍ ve leh shu htaꞈ maˍ piˇ ve kanˉ” te hkeu ve chaw geh kaꞈ nawˬ htaꞈ beˆ maˍ laˇ tuˬ lawˬ gʼa ve yoˬ. * (1 Tiˆmoˉseˍ 5:17) Liꞈ kʼoˆ hkʼaw kʼoˆ maˍ laˇ taˍ ve hkʼe, tawˇ yaw tuˬ awˬ hkʼaˇ htaꞈ tiˉ gʼaꞈ te tuˬ maˇ loˍ. Yaꞈ hkʼaˇ, na ve chaw yonˍ hkʼaˇ yonˍ yeˬ tuˬ ga piˇ leh yawˇ hui teˇ ceuˬ ceuˬ te gaˇ tuˬ te piˇ sheˍ. Nawˬ chi hkʼe te ve kʼo, nawˬ awˬ to leh nawˬ maˍ piˇ ve htaꞈ na ve chaw ha lehˬ jaˇ tuˬ yoˬ.

18. Htoˇ toˇ ve leh Liꞈ hpu maˍ ve ngaˬ hui dawˇ teh taˍ ve htaꞈ te gʼa tuˬ ga laˇ gʼa ve aˬ htoꞈ ma cawˬ ve le?

¹⁸ Ngaˬ hui teˇ gʼaˇ le le hto toˇ leh shu awˬ laꞈ gʼawˇ hpehꞈ la tuˬ ve maˍ piˇ tuˬ awˬ vuiˬ gʼa ve yoˬ. (Maꞈhtehˍ 28:19, 20; Roˉmaꞈ 10:14) Nawˬ a yeˇ uiˍ ve kanˉ chi htaꞈ cheuˬ la tuˬ te gaˇ˗aw laˇ? Nawˬ ve liꞈ kʼoˆ Gʼaw leh maˍ puiˉ tuˬ coˇ caˇ sheˍ tehꞈ kʼoˆ ve hkʼaw beˆ maˍ laˇ taˍ ve htaꞈ gʼaw leh gʼaꞈ te tuˬ coˇ caˇ sheˍ. Chi hkʼoˆ kaꞈ, mvuhˇ hpeuꞈ haˉ hpawnˬ daꞈ ve te htaˇ, Ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve hkʼaw daꞈ jaˇ ve beˆ  maˍ laˇ hkawˇ cawˬ leh VDO hkʼaw kaꞈ tawˇ yaw daꞈ tuˬ awˬ hkʼaˇ daꞈ jaˇ ve beˆ maˍ laˇ taˍ ve cawˬ ve yoˬ. Nawˬ hto toˇ kuiˬ awˬ ti lo awˬ hkʼaˇ hkʼaˬ hkʼe ve keunˍ daꞈ jaˇ ve laiˉ hkʼaˇ te nyi sheˍ. Nawˬ chi teˇ hpaˍ htaꞈ gʼaꞈ te ve kʼo, nawˬ hto toˇ leh Liꞈ hpu maˍ cheuˬ ve chaw hpehꞈ leh ha lehˬ jaˇ tuˬ yoˬ.

19. Nawˬ ve te hkʼaˇ dawˇ hkʼaˇ Gʼuiˬ sha nyi hkʼaˇ suh tuˬ hkʼaˬ hkʼe te gʼa tuˬ le?

¹⁹ Dawˇ teh taˍ ve a yeˇ uiˍ jaˇ ve nawˬ gʼa te cawˇ ve teˇ ceuˬ lehˬ, te hkʼaˇ dawˇ hkʼaˇ Gʼuiˬ sha nyi hkʼaˇ suh tuˬ gʼa te cawˇ ve taˇ leunˇ sheˍ. (Gaˍlaˍtiˆ 5:22, 23; Kawˇlawˇsehˇ 3:12; 2 Peˍtruˆ 1:5-8) Nawˬ dawˇ teh taˍ ve chi htaꞈ hkʼaˬ hkʼe te gʼa tuˬ le? Tawˇ pa haˉ te kʼo, nawˬ ve yonˍ hkʼaˇ uiˍ la mvuh la gaˇ ve kʼo, ngaˬ hui ve liꞈ kʼoˆ hkʼaw awˬ lawn Nawˬ yonˍ yeˬ tuˬ kʼoˆ ve awˬ hkʼaˇ htaꞈ gʼaw sheˍ. JW awˬ han tawˆ kuiˬ hkʼaw awˬ viˉ awˬ nyi shoꞈ shaꞈ ve gʼa hpuˇ ve htawˇ, ka tiꞈ yeˬ gʼa sheˍ ve awˬ lawn htaꞈ nyi gʼa ve yoˬ. Yawˇ hui ve yonˍ hkʼaˇ htaꞈ nawˬ hkʼaˬ hkʼe te henˇ yuˬ gʼa ve dawˇ nyi sheˍ.

20. Ngaˬ hui ha lehˬ maˇ la leh hkʼaˬ hkʼe te nyi ma maˇ luˬ tuˬ ve le?

²⁰ Chi teˇ hkui te chehˇ ve aꞈ kehˉ ngaˬ hui teˇ gʼaˇ le le Yaˬhoˉvaˬ awˬ pon maˇ maˇ te gaˇ ve yoˬ. Miˬ guiˬ awˬ suhˉ hkʼaw gaˬ kʼo, ngaˬ hui Gʼuiˬ sha ve kanˉ chi aꞈ kehˉ te gʼa maˇ jaˇ tuˬ yoˬ. Yaꞈ hkʼaˇ, oˇ ve teˇ yanˇ maˇ gaˬ sheˍ htaˇ, ngaˬ hui te gʼa ve awˬ ceuˬ htaꞈ coˇ caˇ leh te ve kʼo, ngaˬ hui ha lehˬ maˇ la leh nyi ma maˇ luˬ. A yeˇ uiˍ jaˇ ve lehˬ “awˬ bon uiˍ ve Gʼuiˬ sha” chiˇ uiˍ chiˇ ve htaꞈ gʼa tuˬ ngaˬ hui te ve yoˬ. (1 Tiˆmoˉseˍ 1:11) Chi htaꞈ pa taw, Gʼuiˬ sha awˬ pon ngaˬ hui te piˇ gʼa ve awˬ ceuˬ htaꞈ ha lehˬ ve yoˬ.