1. Yaˬhoˉvaˬ hpanˍ taˍ ve teˇ ceuˬ le le htaꞈ ngaˬ hui dawˇ nyi htaˇ hkʼaˬ hkʼe dawˇ ve le?

 Yaˬhoˉvaˬ hpanˍ taˍ ve mvuhˇ naw ma miˬ naˆ ma htaꞈ ngaˬ hui dawˇ nyi htaˇ, Daˍviˆ Yaˬhoˉvaˬ geh bon lawˬ ve hkʼe ngaˬ hui kaꞈ dawˇ ve yoˬ. Oˇ kaˬ lo kʼoˆ ve, “nawˬ te hpanˍ taˍ ve mvuhˇ naw ma, ha pa leh meuꞈ keu shiˍ teˇ hpaˍ htaꞈ ngaˬ chiˇ nyi ve teˇ yanˇ, nawˬ yawˇ htaꞈ gʼa dawˇ nyi tuˬ chaw yaˇ lehˬ aˬ htoꞈ ma hpehꞈ ve le? Nawˬ yawˇ htaꞈ gʼa haꞈ shaˉ piˇ tuˬ yawˇ lehˬ aˬ htoꞈ ma hpehꞈ ve le?” (Chiˇ mvuh ve 8:3, 4) Ngaˬ hui i jaˇ ve chaw hpehꞈ ve htawˇ, Yaˬhoˉvaˬ a yeˇ yuˬ laˇ ve htaꞈ shiˍ htaˇ ha lehˬ jaˇ. Yaˬhoˉvaˬ lehˬ Aˍdanˍ leh Eˇvaꞈ htaꞈ tanˬ hpanˍ htaˇ kaꞈ a yeˇ yuˬ piˇ ve tehꞈ ngaˬ hui gʼa mawˬ ve yoˬ. Yaꞈ hkʼaˇ, chi hkʼe ceh maˇ heˆ. Yawˇ hui htaꞈ Gʼuiˬ sha ve yehˬ kʼa hkʼaw ve chaw kaꞈ hpehꞈ la tcuh ve yoˬ.

2. Yaˬhoˉvaˬ Aˍdanˍ leh Eˇvaꞈ htaꞈ aˬ htoꞈ ma te tcuh gaˇ ve le?

² Aˍdanˍ leh Eˇvaꞈ lehˬ miˬ guiˬ hkʼoˆ lo Yaˬhoˉvaˬ ve yaˇ awˉ lawˉ 2 gʼaˇ hpehꞈ leh Yaˬhoˉvaˬ kaꞈ yawˇ hui htaꞈ haꞈ jaˇ ve Awˬ pa hpehꞈ ve yoˬ. Gʼuiˬ sha yawˇ hui ve awˬ vuiˬ htaꞈ hkʼa dehꞈ te tcuh gaˇ ve yoˬ. Gʼuiˬ sha yawˇ hui htaꞈ kʼoˆ piˇ ve, “yaˇ maˇ maˇ cawˬ la piˇ˗oˆ. Chaw yaˇ teˇ hpaˍ miˬ guiˬ hkʼoˆ biˇ la piˇ˗oˆ.” (Awˬ hkuiˉ puiˍ 1:28) Yaˬhoˉvaˬ lehˬ yawˇ hui htaꞈ awˬ yaˇ awˬ duˬ cawˬ tcuh gaˇ leh miˬ guiˬ hkʼoˆ lo yawˇ hui ve yehˬ htaꞈ haꞈ shaˉ tcuh gaˇ ve yoˬ. Aˍdanˍ leh Eˇvaꞈ Gʼuiˬ sha hkawˇ na leh gʼaꞈ te ve kʼo, yawˇ huiˉ maˬ leh yawˇ hui ve awˬ yaˇ awˬ duˬ kaꞈ Gʼuiˬ sha ve yehˬ kʼa hkʼaw miˬ guiˬ hkʼoˆ co co taiˍ taiˍ gʼa chehˇ tuˬ yoˬ.

3. Aˍdanˍ leh Eˇvaꞈ Yaˬhoˉvaˬ ve yehˬ kʼa hkʼaw gʼa chehˇ ve awˬ meꞈ awˬ hponˇ cawˬ ve tehꞈ aˬ htoꞈ ma te ngaˬ hui kʼoˆ gʼa ve le?

³ Aˍdanˍ leh Eˇvaꞈ Yaˬhoˉvaˬ ve yehˬ kʼa awˬ meꞈ awˬ hponˇ cawˬ ve hkʼaw gʼa chehˇ ve yoˬ. Awˬ lawn chi Chiˇ mvuh ve liꞈ 8:5 hkʼaw Daˍviˆ kʼoˆ ve tawˇ hkawˇ htaꞈ ngaˬ hui mawˬ gʼa ve yoˬ. Yawˇ Yaˬhoˉvaˬ hpanˍ taˍ ve chaw yaˇ htaꞈ kʼoˆ ve, “yawˇ htaꞈ nawˬ awˬ hawˉ a ciˉ ceh tiˉ nehˬ  ve chehˇ kuiˬ lo teh taˍ leh, awˬ meꞈ awˬ hponˇ piˇ taˍ ve yoˬ.” Chaw yaˇ kanˇ paˆ, cuˇ yiˍ, maˇ heˆ leh puiˉ ve hpehꞈ ve mvuhˇ naw ma tcuh yaˇ htaꞈ maˇ shuˍ daꞈ ve htawˇ, chaw yaˇ lehˬ mvuhˇ naw ma tcuh yaˇ aꞈ kehˉ a ciˉ ceh tiˉ nehˬ ve yoˬ. (Chiˇ mvuh ve 103:20) Yaˬhoˉvaˬ lehˬ ngaˬ hui ve awˬ pa awˬ e awˉ lawˉ teˇ ca htaꞈ daꞈ jaˇ ve a shaꞈ piˇ taˍ ve htaꞈ dawˇ nyi sheˍ.

4. Aˍdanˍ leh Eˇvaꞈ Yaˬhoˉvaˬ ve hkawˇ maˇ na hkʼawꞈ nawˉ hkʼaˬ hkʼe hpehꞈ la ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 ⁴ Aˍdanˍ leh Eˇvaꞈ Yaˬhoˉvaˬ ve yehˬ kʼa hkʼaw maˇ kʼawꞈ gʼa chehˇ ve nyi ma luˬ jaˇ. Yawˇ hui maˇ na yuˬ ve pa taw, awˬ yaˇ awˬ duˬ haiˬ ve gʼa hpuˇ ve awˬ lawn chi ve hkʼaw ngaˬ hui gʼa henˇ tuˬ yoˬ. Yaꞈ hkʼaˇ, Yaˬhoˉvaˬ dawˇ law taˍ ve maˇ pa jaw. Na yuˬ ve chaw htaꞈ Gʼuiˬ sha ve yaˇ co co taiˍ taiˍ hpehꞈ tcuh gaˇ ve yoˬ. Awˉ lawˉ htaˇ Yaˬhoˉvaˬ ngaˬ hui htaꞈ hkʼaˬ hkʼe yawˆ yan laˇ ve teˇ geh nyi sheˍ. Peuˬ leh ngaˬ hui Gʼuiˬ sha ve yehˬ kʼa hkʼaw chehˇ gaˇ ve tehꞈ mawˬ tcuh tuˬ, aˬ htoꞈ ma te gʼa ve kaꞈ teˇ geh henˇ tuˬ yoˬ. Awˬ leh meuˇ htaˇ, miˬ guiˬ hkʼoˆ lo chehˇ ve Yaˬhoˉvaˬ ve yaˇ co co taiˍ taiˍ aˬ htoꞈ ma ve awˬ bon gʼa tuˬ ve kaꞈ teˇ geh henˇ tuˬ yoˬ.

5. Yaˬhoˉvaˬ lehˬ ngaˬ hui yawˇ hkʼa shuˍ hpanˍ taˍ laˇ ve, hkʼaˬ hkʼe te yawˇ htaꞈ yawˆ yan piˇ gʼa tuˬ le?

⁵ Yaˬhoˉvaˬ ngaˬ hui htaꞈ yawˆ yan laˇ ve lehˬ yawˇ hkʼa shuˍ hpanˍ taˍ laˇ ve. (Awˬ hkuiˉ puiˍ 1:26, 27) Ngaˬ hui htaꞈ Gʼuiˬ sha ve awˬ hoꞈ awˬ han hkʼa shuˍ hpanˍ taˍ laˇ ve pa taw, haꞈ pehnˇ ve, ha kʼaˉ ve, ka tiꞈ yeˬ ve, leh hteˇ ve cawˇ ve kaꞈ yawˇ htaꞈ shuˍ gʼa ve yoˬ. (Chiˇ mvuh ve 86:15; 145:17) Ngaˬ hui te hkʼaˇ dawˇ hkʼaˇ chi ve teˇ hpaˍ cawˬ htaˇ, Yaˬhoˉvaˬ htaꞈ yawˆ yan leh yawˇ ngaˬ hui htaꞈ peꞈ laˇ ve awˬ ceuˬ htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ. (1 Peˍtruˆ 1:14-16) Ngaˬ hui Yaˬhoˉvaˬ ha lehˬ tuˬ te piˇ leh ngaˬ hui kaꞈ ha lehˬ ve yoˬ. Leh ngaˬ hui Yaˬhoˉvaˬ ve yehˬ kʼa hkʼaw chehˇ tcuh gaˇ ve chaw hpehꞈ tuˬ yoˬ.

6. Gʼuiˬ sha chaw yaˇ htaꞈ miˬ guiˬ hkʼoˆ lo chehˇ kuiˬ gu piˇ htaˇ, yawˇ chaw yaˇ htaꞈ hkʼaˬ hkʼe yawˆ yan piˇ ve le?

⁶ Yaˬhoˉvaˬ ngaˬ hui htaꞈ daꞈ jaˇ ve yehˬ cawˬ tuˬ gu laˇ ve. Yaˬhoˉvaˬ chaw yaˇ htaꞈ maˇ hpanˍ sheˍ htaˇ kaꞈ miˬ guiˬ gu teh taˍ ve maw jaˇ˗oˬ. (Yawˇbaˆ 38:4-6; Yeˍraˍmiˆ 10:12) Yaˬhoˉvaˬ lehˬ piˇ gaˇ ve Gʼuiˬ sha hpehꞈ ve pa taw, shu awˬ pon dawˇ nyi ve yoˬ. Hkʼe te leh, ngaˬ hui ha lehˬ tuˬ yawˇ daꞈ jaˇ ve laiˉ ceuˬ hpanˍ taˍ laˇ ve yoˬ. (Chiˇ mvuh ve 104:14, 15, 24) Gʼuiˬ sha yawˇ hpanˍ ve laiˉ ceuˬ htaꞈ nyi htaˇ “daꞈ jaˇ ve htaꞈ” gʼa mawˬ ve yoˬ. (Awˬ hkuiˉ puiˍ 1:10, 12, 31) Gʼuiˬ sha chaw yaˇ htaꞈ yawˆ yan ve lehˬ miˬ guiˬ hkʼoˆ yawˇ hpanˍ taˍ ve htaꞈ “uˉ peunˍ tcuh” ve yoˬ. (Chiˇ mvuh ve 8:6) Gʼuiˬ sha chaw yaˇ htaꞈ biˇ ve a shaꞈ cawˬ tcuh tuˬ leh yawˇ hpanˍ taˍ ve awˬ ceuˬ htaꞈ hkʼaˬ htaˆ kaꞈ nyi haꞈ shaˉ leh ha lehˬ tcuh gaˇ ve yoˬ. Awˬ gʼuˇ suhˍ hpawˇ ngaˬ hui chi hkʼe ve a shaꞈ cawˬ tuˬ yoˬ tehꞈ, Gʼuiˬ sha ka tiꞈ te taˍ laˇ ve yoˬ. Awˬ lawn chi ve nawˬ Yaˬhoˉvaˬ htaꞈ hkʼaˬ htaˆ kaꞈ awˬ bon uiˍ jaˇ tehꞈ kʼoˆ piˇ˗aw laˇ?

7. Chaw yaˇ a shu yawˇ hkʼaˇ yawˇ dawˇ cheˆ gʼa ve a hkaw˗anˬ cawˬ ve tehꞈ Yawˇsuˆ liꞈ 24:15 hkʼaw kʼoˆ taˍ ve htaꞈ ngaˬ hui hkʼaˬ hkʼe gʼa mawˬ ve le?

⁷ Yaˬhoˉvaˬ ngaˬ hui htaꞈ a shu yawˇ hkʼaˇ yawˇ dawˇ cheˆ tuˬ a hkaw˗anˬ peꞈ laˇ ve. A shaꞈ teꞈ hkʼaˇ hkʼaˬ hkʼe te tuˬ ngaˬ hui a shu yawˇ hkʼaˇ yawˇ leuˆ yuˬ gʼa ve yoˬ. (Yawˇsuˆ 24:15 gʼaw sheˍ.) Ngaˬ hui Yaˬhoˉvaˬ ve kanˉ te tuˬ leuˆ htaˇ, yawˇ kaꞈ ha lehˬ ve yoˬ. (Chiˇ mvuh ve 84:11; Tawˇ naˉ ve 27:11) Chi hkʼoˆ kaꞈ, ngaˬ hui daꞈ ve laiˉ ceuˬ te gʼa tuˬ leuˆ yuˬ gʼa ve tehꞈ Yeˍsuˆ ve awˬ lawn htaꞈ teˇ geh nyi sheˍ.

8. Yeˍsuˆ leuˆ yuˬ tuˬ ve a hkaw˗anˬ htaꞈ hkʼaˬ hkʼe yehˇ ve le?

⁸ Ngaˬ hui leuˆ yuˬ tuˬ ve a hkaw˗anˬ htaꞈ yehˇ gʼa ve teˇ hkʼaˇ lehˬ, ngaˬ hui awˬ to aꞈ kehˉ shu htaꞈ a yeˇ yuˬ piˇ cawˇ ve yoˬ. Ngaˬ hui chi hkʼe te ve kʼo, Yeˍsuˆ htaꞈ henˇ yuˬ chehˇ ve yoˬ. Teˇ pawˆ htaˇ, Yeˍsuˆ leh awˬ laꞈ gʼawˇ hui heuˬ jaˇ leh gʼaˇ jehˇ tuˬ chaw gawˬ kuiˬ lo kʼai ve yoˬ. Yaꞈ hkʼaˇ, chaw yaˇ shiˍ htaˇ Yeˍsuˆ maˍ ve hkawˇ na tuˬ yawˇ hui yawˇ awˬ hkʼaˇ suh gʼaꞈ kʼai ve yoˬ. Yeˍsuˆ heuˬ jaˇ ve htawˇ yawˇ yawˇ hui htaꞈ maˇ nyi bawˬ leh ha kʼaˉ  jaˇ leh “awˬ lawn laiˉ ceuˬ maˍ piˇ ve yoˬ.” (Maˍkuˆ 6:30-34) Ngaˬ hui awˬ nu ve chaw htaꞈ ga piˇ tuˬ awˬ yanˇ leh awˬ gʼaˇ yuˬ tanˇ ve Yeˍsuˆ htaꞈ henˇ yuˬ gʼa ve yoˬ. Ngaˬ hui chi hkʼe te ve kʼo, Yaˬhoˉvaˬ chiˇ uiˍ chiˇ mvuh ve gʼa tuˬ yoˬ. (Maꞈhtehˍ 5:14-16) Ngaˬ hui Yaˬhoˉvaˬ ve yehˬ kʼa hkʼaw chehˇ gaˇ ve tehꞈ yawˇ htaꞈ mawˬ tcuh gʼa ve yoˬ.

9. Awˬ pa awˬ e aˬ htoꞈ ma htaꞈ dawˇ nyi cawˇ ve le?

⁹ Yaˬhoˉvaˬ lehˬ chaw yaˇ htaꞈ yaˇ cawˬ tcuh leh yaˇ Yaˬhoˉvaˬ htaꞈ haꞈ leh yawˇ ve kanˉ te tuˬ gʼa maˍ piˇ ve. Yaˬhoˉvaˬ lehˬ mvuhˇ naw ma tcuh yaˇ htaꞈ puiˉ ve hpehꞈ ve laiˉ ceuˬ cawˬ tcuh ve htawˇ, yawˇ daꞈ jaˇ ve awˬ vuiˬ chi mvuhˇ naw ma tcuh yaˇ htaꞈ maˇ piˇ. Awˬ pa awˬ e hpehꞈ ve chaw˗oˬ, daꞈ jaˇ ve awˬ vuiˬ chi htaꞈ nawˬ awˬ hpfuhˇ shiˍ˗aw laˇ? Awˬ pa awˬ e yaˇ htaꞈ Yaˬhoˉvaˬ “maˍ laˇ ve hkʼe yawˇ hui htaꞈ hkʼa dehꞈ maˍ piˇ leh sheh kʼai˗o.” (Eˇfeˇsuꞈ 6:4; Bon maˍ ve 6:5-7; Chiˇ mvuh ve 127:3) Awˬ pa awˬ e chi hkʼe te gʼa tuˬ, liꞈ kʼoˆ, VDO, liꞈ hkawˇ, vehˆ saiˉ hkʼaw ve awˬ lawn, chi ve teˇ hpaˍ Gʼuiˬ sha ve kanˉ hkʼaˇ gu teh taˍ laˇ ve yoˬ. Yaˬhoˉvaˬ leh Yeˍsuˆ kaꞈ yaˇ ehˉ htaꞈ haꞈ jaˇ ve tehꞈ hkʼa tawˍ lehˆ gʼa mawˬ ve yoˬ. (Luˉkaꞈ 18:15-17) Awˬ pa awˬ e Yaˬhoˉvaˬ htaꞈ gʼaˇ va leh yaˇ htaꞈ hkʼa dehꞈ nyi haꞈ shaˉ ve kʼo, yawˇ hui Yaˬhoˉvaˬ nyi hkʼaˇ suh tuˬ te piˇ ve yoˬ. Yaˇ Yaˬhoˉvaˬ ve yehˬ kʼa hkʼaw co co taiˍ taiˍ gʼa chehˇ tuˬ kaꞈ te piˇ ve yoˬ.

10-11. Htaiˍ hkʼawꞈ ve aˬ htoꞈ ma hpehꞈ gʼa tuˬ te laˇ ve le?

¹⁰ Ngaˬ hui Yaˬhoˉvaˬ ve yehˬ kʼa hkʼaw chehˇ la gʼa tuˬ yawˇ haꞈ jaˇ ve Yaˇ ngaˬ hui awˬ pon tanˇ laˇ ve.  Awˬ tawn 4 hkʼaw ngaˬ hui gʼa henˇ˗oˬ ve Aˍdanˍ leh Eˇvaꞈ Yaˬhoˉvaˬ ve yehˬ kʼa hkʼaw maˇ kʼawꞈ gʼa chehˇ˗oˬ. Leh yawˇ hui ve awˬ yaˇ awˬ duˬ kaꞈ Gʼuiˬ sha ve yehˬ kʼa hkʼaw maˇ gʼa chehˇ tuˬ te piˇ ve yoˬ. (Roˉmaꞈ 5:12) Aˍdanˍ leh Eˇvaꞈ Gʼuiˬ sha hkawˇ maˇ na leh yawˇ hui lehˬ Gʼuiˬ sha ve yehˬ kʼa hkʼaw maˇ chehˇ keunˍ˗oˬ ve yoˬ. Yaꞈ hkʼaˇ, Yaˬhoˉvaˬ lehˬ yawˇ hui ve awˬ yaˇ awˬ duˬ htaꞈ haꞈ ve yoˬ. Na yuˬ ve chaw lehˬ Gʼuiˬ sha ve yehˬ kʼa hkʼaw kʼawꞈ chehˇ la gʼa tuˬ, Gʼuiˬ sha yawˇ ve Yaˇ Yeˍsuˆ teˇ gʼaˇ tiˉ ngaˬ hui awˬ pon htaiˍ hkʼawꞈ tcuh laˇ ve yoˬ. (Yoˇhanˬ 3:16; Roˉmaꞈ 5:19) Yeˍsuˆ htaiˍ hkʼawꞈ laˇ ve lehˬ ka tiꞈ yeˬ ve chaw 144,000 gʼaˇ Gʼuiˬ sha ve yaˇ hpehꞈ gʼa ve yoˬ.—Roˉmaꞈ 8:15-17; Hpeuꞈ maˍ ve 14:1.

¹¹ Chi hkʼoˆ kaꞈ, chaw laiˉ lanˬ gʼaˇ na yuˬ leh Yaˬhoˉvaˬ ve a loˍ htaꞈ gʼaꞈ te chehˇ ve yoˬ. 1,000 hkʼawꞈ peuˬ ve awˬ yanˇ hkʼaw yawˇ hui beˬ ve lawˇ ve awˬ leh meuˇ hkʼa gaˬ yeunˇ hkanˍ gʼaˇ htaˇ, yawˇ hui Yaˬhoˉvaˬ ve yehˬ kʼa hkʼaw awˬ tehˬ gʼa chehˇ tuˬ dawˇ law kuiˬ cawˬ ve yoˬ. (Chiˇ mvuh ve 25:14; Roˉmaꞈ 8:20, 21) Yawˇ hui dawˇ law kuiˬ chi hkʼe cawˬ ve pa taw, yawˇ hui htaꞈ hpanˍ shehˍ hpaˇ Yaˬhoˉvaˬ htaꞈ chi teˇ hkui kaꞈ “Awˬ pa˗oˬ” tehꞈ kuˬ gʼa ve yoˬ. (Maꞈhtehˍ 6:9) Kʼawꞈ teꞈ tu la ve chaw Yaˬhoˉvaˬ yawˇ hui htaꞈ aˬ htoꞈ te tcuh laˇ tuˬ ve yawˇ hui gʼa henˇ ve yoˬ. Yawˇ hui na yuˬ leh gʼaꞈ te ve kʼo, yawˇ hui kaꞈ Yaˬhoˉvaˬ ve yehˬ kʼa hkʼaw chehˇ la gʼa ve yoˬ.

12. Ngaˬ hui aˬ htoꞈ ma htaꞈ kʼawꞈ henˇ tuˬ le?

¹² Yaˬhoˉvaˬ chaw yaˇ htaꞈ awˉ lawˉ yawˆ yan laˇ ve tehꞈ hpeuꞈ maw laˇ ve lehˬ, yawˇ laiˉ ceuˬ te ve yoˬ. Chi teˇ hkui leuˆ yuˬ taˍ ve chaw htaꞈ Yaˬhoˉvaˬ haꞈ yuˬ leh yawˇ ve yaˇ te tcuh˗oˬ ve yoˬ. Leh yawˇ “chaw awˬ moˍ lonˉ” htaꞈ miˬ guiˬ awˬ suhˉ hkʼaw yawˇ ve yaˇ awˬ tehˬ hpehꞈ tuˬ dawˇ law kuiˬ cawˬ tcuh ve yoˬ. (Hpeuꞈ maˍ ve 7:9) Ngaˬ hui Yaˬhoˉvaˬ ve yehˬ kʼa hkʼaw hkʼaˬ htaˆ kaꞈ chehˇ gaˇ ve tehꞈ yawˇ htaꞈ mawˬ tcuh tuˬ, chi teˇ hkui ngaˬ hui aˬ htoꞈ ma te cawˇ ve teˇ geh henˇ tuˬ yoˬ.

13. Ngaˬ hui Gʼuiˬ sha ve yehˬ kʼa hkʼaw hkʼaˬ htaˆ kaꞈ gʼa chehˇ tuˬ aˬ htoꞈ ma gʼa te cawˇ ve le? (Maˍkuˆ 12:30)

¹³ Yaˬhoˉvaˬ htaꞈ haꞈ leh yawˇ ve kanˉ nyi ma awˬ tawˬ hkʼa gaˬ te ve. (Maˍkuˆ 12:30 gʼaw sheˍ.) Yaˬhoˉvaˬ lehˬ piˇ gaˇ ve Gʼuiˬ sha hpehꞈ ve yoˬ. Yawˇ ngaˬ hui htaꞈ laiˉ ceuˬ peꞈ laˇ gaˇ ve yoˬ. Yawˇ ngaˬ hui htaꞈ peꞈ laˇ ve daꞈ jaˇ ve teˇ ceuˬ lehˬ ngaˬ hui te puiˉ te hpehꞈ ve hkʼe yawˇ ve kanˉ te tcuh gaˇ ve yoˬ. Ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ gʼa ve lehˬ “yawˇ piˇ taˍ ve tawˇ hkawˇ teˇ hpaˍ” htaꞈ  na yuˬ ve yoˬ. (1 Yoˇhanˬ 5:3) Yaˬhoˉvaˬ piˇ laˇ taˍ ve tawˇ hkawˇ teˇ maˬ lehˬ, shu awˬ laꞈ gʼawˇ hpehꞈ la tuˬ maˍ piˇ leh Baˆtiˆsaˬ piˇ˗oˆ tehꞈ Yeˍsuˆ kʼoˆ taˍ ve htaꞈ gʼaꞈ ve yoˬ. (Maꞈhtehˍ 28:19) Ngaˬ hui haꞈ daꞈ tehꞈ Yeˍsuˆ kʼoˆ laˇ ve yoˬ. (Yoˇhanˬ 13:35) Ngaˬ hui Yaˬhoˉvaˬ kʼoˆ laˇ ve tawˇ hkawˇ htaꞈ na yuˬ ve kʼo, yawˇ ngaˬ hui htaꞈ yawˇ ve yehˬ kʼa hkʼaw hkʼaˬ htaˆ kaꞈ chehˇ tcuh laˇ tuˬ yoˬ.

14. Ngaˬ hui shu htaꞈ haꞈ ve tehꞈ hkʼaˬ hkʼe mawˬ tcuh gʼa tuˬ le? (Maꞈhtehˍ 9:36-38; Roˉmaꞈ 12:10)

¹⁴ Shu htaꞈ haꞈ ve. Haꞈ pehnˇ ve lehˬ Yaˬhoˉvaˬ ve te hkʼaˇ dawˇ hkʼaˇ a yeˇ uiˍ jaˇ ve hpehꞈ ve yoˬ. (1 Yoˇhanˬ 4:8) Ngaˬ hui yawˇ htaꞈ maˇ shiˍ daꞈ sheˍ htaˇ kaꞈ yawˇ awˉ lawˉ ngaˬ hui htaꞈ haꞈ laˇ ve yoˬ. (1 Yoˇhanˬ 4:9, 10) Ngaˬ hui shu htaꞈ haꞈ ve kʼo, Gʼuiˬ sha htaꞈ henˇ yuˬ chehˇ ve yoˬ. (Eˇfeˇsuꞈ 5:1) Ngaˬ hui shu htaꞈ haꞈ ve tehꞈ hpeuꞈ maw piˇ ve daꞈ jaˇ ve teˇ hkʼaˇ lehˬ, awˬ yanˇ cawˬ sheˍ htaˇ yawˇ Yaˬhoˉvaˬ htaꞈ shiˍ daꞈ la tuˬ ga piˇ ve yoˬ. (Maꞈhtehˍ 9:36-38 gʼaw sheˍ.) Chi hkʼe te ve lehˬ yawˇ hui Gʼuiˬ sha ve yehˬ kʼa hkʼaw chehˇ la gʼa tuˬ ga piˇ ve yoˬ. Leh yawˇ Baˆtiˆsaˬ haꞈ yuˬ˗oˬ ve htawˇ yawˇ htaꞈ haꞈ leh gʼa yawˆ yan piˇ sheˍ. (1 Yoˇhanˬ 4:20, 21) Tawˇ pa haˉ te kʼo, yawˇ ngaˬ hui htaꞈ htawˇ dawˇ nawˬ dawˇ cawˬ tuˬ te laˇ ve kʼo, ngaˬ hui yawˇ htaꞈ daꞈ ve hpawˇ nyi leh yawˇ maˇ daꞈ ve tehꞈ maˇ dawˇ. Awˬ viˉ awˬ nyi htaꞈ yawˆ yan leh yawˇ ngaˬ hui aꞈ kehˉ daꞈ ve tehꞈ dawˇ ve yoˬ.—Roˉmaꞈ 12:10 gʼaw sheˍ; Hpiˇliˇpiˆ 2:3.

15. Ngaˬ hui a shu htaꞈ ha kʼaˉ leh daꞈ ve te piˇ cawˇ ve le?

¹⁵ Teˇ gʼaˇ le le htaꞈ ha kʼaˉ leh daꞈ ve te piˇ ve. Ngaˬ hui Yaˬhoˉvaˬ htaꞈ Awˬ pa tehꞈ kuˬ gaˇ ve kʼo, yawˇ ve yehˬ kʼa hkʼaw hkʼaˬ htaˆ kaꞈ gʼa chehˇ ve yoˬ. Ngaˬ hui Liꞈ hpu hkʼaw kʼoˆ taˍ ve htaꞈ gʼaꞈ te cawˇ ve yoˬ. Tawˇ pa haˉ te kʼo, Yeˍsuˆ ngaˬ hui htaꞈ maˍ laˇ ve, teˇ gʼaˇ le le htaꞈ haꞈ leh daꞈ ve gʼa te piˇ ve yoˬ. Leh canˇ paˍ htaꞈ kaꞈ yoˬ. (Luˉkaꞈ 6:32-36) Ngaˬ hui chi hkʼe te tuˬ haˍ ve tehꞈ dawˇ ve kʼo, Yeˍsuˆ hkʼe dawˇ leh yawˇ hkʼe gʼaꞈ te sheˍ. Ngaˬ hui Yaˬhoˉvaˬ hkawˇ na yuˬ leh Yeˍsuˆ htaꞈ hkʼa dehꞈ henˇ yuˬ ve kʼo, Yaˬhoˉvaˬ ve yehˬ kʼa hkʼaw hkʼaˬ htaˆ kaꞈ chehˇ gaˇ ve tehꞈ yawˇ mawˬ tuˬ te piˇ chehˇ ve yoˬ.

16. Ngaˬ hui Yaˬhoˉvaˬ ve yehˬ kʼa ve awˬ meh htaꞈ hkʼaˬ hkʼe te haꞈ shaˉ gʼa tuˬ le?

¹⁶ Yaˬhoˉvaˬ ve yehˬ kʼa ve awˬ meh htaꞈ haꞈ shaˉ ve. Maˇ˗awˍ ve kʼo, awˬ nyi lehˬ awˬ viˉ htaꞈ henˇ yuˬ ve yoˬ. Awˬ viˉ lehˬ Liꞈ hpu hkʼaw beˆ maˍ laˇ taˍ ve htaꞈ gʼaꞈ te ve kʼo, daꞈ ve henˇ yuˬ tuˬ hpehꞈ ve yoˬ. Yaꞈ hkʼaˇ, awˬ viˉ te maˇ daꞈ ve kʼo, awˬ nyi kaꞈ awˬ viˉ hkʼe maˇ daꞈ ve te tuˬ yoˬ. Yaˬhoˉvaˬ ve yehˬ kʼa hkʼaw kaꞈ hkʼa shuˍ yoˬ. Awˬ viˉ awˬ nyi teˇ gʼaˇ Yaˬhoˉvaˬ ve kanˉ ka tiꞈ yeˬ ve hkʼaw te jaw ve Gʼuiˬ sha htaꞈ hpfuhˆ ve chaw hpehꞈ la leh, pehꞈ ve tzuhˆ ve maˇ heˆ leh maˇ daꞈ ve awˬ ceuˬ te ve awˬ nu ve awˬ viˉ awˬ nyi kaꞈ henˇ yuˬ kʼo, Yaˬhoˉvaˬ ve yehˬ kʼa hkʼaw awˬ meh luˬ tuˬ te piˇ ve yoˬ. (1 Hteˇsaˍlawˇniˆ 4:3-8) Chi htaꞈ pa taw, awˬ nu ve chaw maˇ daꞈ ve awˬ lawn htaꞈ maˇ henˇ yuˬ cawˇ. Ngaˬ hui mvuhˇ naw ma hkʼoˆ ve Awˬ pa htaꞈ vuiˇ daꞈ tuˬ teˇ ceuˬ kaꞈ maˇ te laˇ tcuh cawˇ ve yoˬ.

17. Ngaˬ hui hkʼaˬ hkʼe maˇ dawˇ nyi cawˇ ve le? Leh aˬ htoꞈ ma pa taw le?

¹⁷ Hpu shi mawˇ jeˬ htaꞈ gʼaˇ va ve maˇ heˆ, Yaˬhoˉvaˬ htaꞈ gʼaˇ va ve. Ngaˬ hui a shaꞈ teꞈ chehˇ kuiˬ hkʼaw Yaˬhoˉvaˬ ve awˬ liˇ awˬ hkʼaˇ cawˇ ve htaꞈ gʼaꞈ te leh yawˇ uˉ peunˍ ve htaꞈ a yeˇ uiˍ jaˇ ve tehꞈ shawˍ ve kʼo, yawˇ ngaˬ hui htaꞈ nyi haꞈ shaˉ leh loˍ ve awˬ ceuˬ peꞈ laˇ tuˬ yoˬ tehꞈ ka tiꞈ te taˍ laˇ ve yoˬ. Tawˇ pa haˉ te kʼo, caˇ tuˬ, aˉ poꞈ veuꞈ kʼaˇ, leh chehˇ kuiˬ peꞈ laˇ tuˬ yoˬ. (Chiˇ mvuh ve 55:22; Maꞈhtehˍ 6:33) Ngaˬ hui yawˇ ka tiꞈ te taˍ laˇ ve htaꞈ yonˍ ve kʼo, hpu shi mawˇ jeˬ ngaˬ hui ve a shaꞈ htaꞈ kawˆ ve maˇ cawˬ tuˬ leh hkʼaˬ htaˆ kaꞈ ha lehˬ ve cawˬ tuˬ te laˇ gʼa ve tehꞈ maˇ dawˇ. Ngaˬ hui nyi ma gawˬ lehˍ cawˬ gʼa tuˬ, Yaˬhoˉvaˬ ve a loˍ htaꞈ gʼaꞈ te ve yoˬ. (Hpiˇliˇpiˆ 4:6, 7) Ngaˬ hui hpu cawˬ leh mawˇ chi ma ma vuiˬ gʼa ve htawˇ, ngaˬ hui awˬ yanˇ leh awˬ gʼaˇ mawˇ chi teˇ hpaˍ htaꞈ yehˇ leh nyi haꞈ shaˉ gʼa˗aw laˇ? Chi hkʼoˆ kaꞈ, ngaˬ hui cawˬ taˍ ve mawˇ htaꞈ haꞈ leh a yeˇ uiˍ jaˇ ve tehꞈ dawˇ ve hpehꞈ kʼai gʼa˗aw laˇ? Ngaˬ hui Yaˬhoˉvaˬ ve yehˬ kʼa hkʼaw ve chaw hpehꞈ ve tehꞈ tawnˇ taˍ leh, yawˇ ngaˬ hui htaꞈ te tcuh laˇ ve awˬ ceuˬ a yeˇ maˇ yuˬ tuˬ teˇ ceuˬ kaꞈ taˇ te laˇ tcuh. Yeˍsuˆ awˬ hkʼaˇ suh gʼaꞈ  kʼai tuˬ hawˉ hkʼaˆ teˇ gʼaˇ htaꞈ jehˬ piˇ ve hkʼe ngaˬ hui maˇ hpehꞈ gaˇ. Yawˇ Yaˬhoˉvaˬ ve kanˉ te tuˬ haꞈ yuˬ leh yawˇ ve yaˇ te cawˇ ve htawˇ yawˇ hpu shi mawˇ jeˬ htaꞈ haꞈ ve pa taw yawˇ kanˉ chi htaꞈ maˇ haꞈ yuˬ!—Maˍkuˆ 10:17-22.

18. Chaw yaˇ na yuˬ ve lehˬ awˬ meꞈ awˬ hponˇ gʼa leh hkʼaˬ htaˆ kaꞈ aˬ htoꞈ ma awˬ bon gʼa tuˬ le?

¹⁸ Na yuˬ ve chaw Yaˬhoˉvaˬ geh uiˍ jaˇ mvuh jaˇ ve awˬ meꞈ awˬ hponˇ gʼa tuˬ ve lehˬ, Yaˬhoˉvaˬ htaꞈ haꞈ leh hkʼaˬ htaˆ kaꞈ yawˇ htaꞈ oˉ kʼoˍ gʼa pui tuˬ yoˬ. Chi hkʼoˆ kaꞈ, Yaˬhoˉvaˬ yawˇ hui htaꞈ awˉ lawˉ yehˬ te piˇ taˍ ve htaꞈ yawˇ hui daꞈ jaˇ ve miˬ guiˬ htaꞈ gʼa nyi haꞈ shaˉ tuˬ yoˬ. Maˇ maw kʼo, Gʼuiˬ sha ve mvuhˇ miˬ miˬ guiˬ chi hkʼoˆ lo teˇ ceuˬ le le daꞈ jaˇ ve hpehꞈ tcuh tuˬ yoˬ. Aˍdanˍ leh Eˇvaꞈ Gʼuiˬ sha ve yehˬ kʼa htaꞈ baˬ taˉ tuˬ leuˆ leh te luˬ taˍ ve htaꞈ Yeˍsuˆ gu laˇ tuˬ yoˬ. Yaˬhoˉvaˬ lehˬ chaw laiˉ lanˬ gʼaˇ htaꞈ kʼawꞈ teꞈ tu la tcuh piˇ tuˬ yoˬ. Yawˇ hui chehˇ sha cawˬ sha leh miˬ guiˬ chi hkʼoˆ Paˍraˍdiˇsuˆ hkʼaw hkʼaˬ htaˆ kaꞈ gʼa chehˇ tuˬ yoˬ. (Luˉkaꞈ 23:42, 43) Awˬ leh meuˇ htaˇ, Yaˬhoˉvaˬ ve kanˉ te ve chaw awˬ tehˬ biˇ ve chaw hpehꞈ leh yawˇ hui teˇ gʼaˇ leh teˇ gʼaˇ Daˍviˆ kʼoˆ taˍ ve hkʼe “awˬ meꞈ awˬ hponˇ” gʼa tuˬ yoˬ.—Chiˇ mvuh ve 8:5.

19. Ngaˬ hui hkʼaˬ htaˆ kaꞈ aˬ htoꞈ ma htaꞈ tawnˇ taˍ cawˇ ve le?

¹⁹ Nawˬ “chaw awˬ moˍ lonˉ” hpehꞈ ve kʼo, nawˬ daꞈ jaˇ ve dawˇ law kuiˬ cawˬ ve tehꞈ tawnˇ taˍ sheˍ. Gʼuiˬ sha nawˬ htaꞈ haꞈ leh yawˇ ve yehˬ kʼa hkʼaw chehˇ la tcuh gaˇ ve yoˬ. Gʼuiˬ sha nyi hkʼaˇ suh tuˬ leh Gʼuiˬ sha ka tiꞈ te taˍ laˇ ve nawˬ ve nyi ma hkʼaw hkʼaˬ htaˆ kaꞈ cawˬ tcuh tuˬ, nawˬ te gʼa ve hkʼe teˇ ceuˬ le le te sheˍ. Nawˬ mvuhˇ naw ma hkʼoˆ Awˬ pa ve kanˉ gʼa te ve awˬ vuiˬ htaꞈ daꞈ jaˇ ve tehꞈ shawˍ leh yawˇ htaꞈ hkʼaˬ htaˆ kaꞈ chiˇ mvuh gʼa ve yoˬ!