1-2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Nawˬ mawˇ teˇ ceuˬ ceuˬ shanˍ vuiˬ leh haˆ maˇ gaˬ la sheˍ ve kʼo, hkʼaˬ hkʼe dawˇ tuˬ ve le? Nawˬ nyi ma luˬ tuˬ laˇ? Tawˇ naˉ ve liꞈ 13:12 hkʼaw kʼoˆ ve hkʼe nawˬ kaꞈ dawˇ tuˬ yoˬ. Oˇ kaˬ kʼoˆ ve, “dawˇ law tuˬ mehˉ kʼai ve kʼo, nyi ma htawˇ luˬ kʼai ve yoˬ.” Yaꞈ hkʼaˇ, nawˬ mawˇ shanˍ vuiˬ taˍ ve aˬ htoꞈ ma pa taw laˬ naiˇ ve le tehꞈ nawˬ shiˍ ve kʼo, yeunˇ hkanˍ leh law tuˬ ve maˇ heˆ laˇ?

² Liꞈ hpu hkʼaw ve awˬ liˇ awˬ hkʼaˇ teˇ tawn tawn ngaˬ hui yeunˇ hkanˍ leh ‘law tcuhˉ taˍ’ gʼa tuˬ ga laˇ gʼa ve awˬ lawn chi ve hkʼaw teˇ geh henˇ tuˬ yoˬ. (Miˆhkaˍ 7:7) Leh ngaˬ hui aˬ htoꞈ ma te Yaˬhoˉvaˬ htaꞈ gʼa law cawˇ ve 2 lawn kaꞈ teˇ geh henˇ tuˬ yoˬ. Yeunˇ hkanˍ leh Yaˬhoˉvaˬ htaꞈ law ve chaw aˬ htoꞈ ma awˬ bon gʼa tuˬ ve kaꞈ teˇ geh henˇ tuˬ yoˬ.

3. Tawˇ naˉ ve liꞈ 13:11 hkʼaw ngaˬ hui htaꞈ aˬ htoꞈ ma maˍ laˇ ve le?

³ Tawˇ naˉ ve liꞈ 13:11 hkʼaw ngaˬ hui yeunˇ hkanˍ leh law tcuhˉ taˍ cawˇ ve maˍ laˇ ve yoˬ. Oˇ kaˬ lo kʼoˆ ve, “nawˬ hpu hkʼa sha sha˗ehˬ ca gʼa ve kʼo, hkʼa sha sha˗ehˬ mehˉ kʼai tuˬ yoˬ. Hkeuꞈ ve haˍ ve hkʼaw ca gʼa taˍ ve hpu lehˬ, nawˬ geh leuˉ leh chehˇ yeˬ tuˬ yoˬ.” Nawˬ chi teˇ tawn hkʼaw ve awˬ liˇ awˬ hkʼaˇ htaꞈ mawˬ˗aw laˇ? Ngaˬ hui yeunˇ hkanˍ leh a yehˉ yehˉ te ve kʼo, awˬ bon gʼa ve htaꞈ mawˬ tuˬ yoˬ.

4. Tawˇ naˉ ve liꞈ 4:18 hkʼaw ngaˬ hui htaꞈ aˬ htoꞈ ma maˍ laˇ ve le?

⁴ Tawˇ naˉ ve liꞈ 4:18 hkʼaw kʼoˆ ve, “hteˇ ve cawˇ ve chaw hui toˇ kʼai ve yaꞈ kʼaw lehˬ, mvuhˇ nyi tawˆ la chehˇ ve hkʼe hpehꞈ leh, shaˬ te shaˬ awˬ gʼeuˆ ba la chehˇ ve yoˬ.” Yaˬhoˉvaˬ yawˇ ve kanˉ te ve chaw htaꞈ yawˇ ve a loˍ awˬ meu˗eˇ awˬ meu˗eˇ shiˍ tcuh chehˇ ve tehꞈ ngaˬ  hui na gʼa tuˬ chi teˇ tawn ga laˇ ve yoˬ. Chi ve teˇ tawn tcuhˉ kuiˬ lehˬ, Hkriꞈ yaˇ co ha hpawˇ uiˍ la mvuh la leh Yaˬhoˉvaˬ geh gʼaˇ hteꞈ meuˆ daꞈ ve htaꞈ kaꞈ kʼoˆ gaˇ ve yoˬ. Chi awˬ yanˇ gʼa yehˇ leh ngaˬ hui haˆ haˆ te maˇ gʼa. Liꞈ hpu hkʼaw gʼa henˇ taˍ ve leh Gʼuiˬ sha ve kanˉ hkʼaˇ hkʼaw gʼa henˇ taˍ ve htaꞈ yuˬ yehˇ ve kʼo, ngaˬ hui ve te hkʼaˇ dawˇ hkʼaˇ Yeˍsuˆ hkʼe leˇ awˬ meu˗eˇ awˬ meu˗eˇ cawˬ la leh Yaˬhoˉvaˬ htaꞈ kaꞈ shiˍ maˇ la tuˬ yoˬ. Yeˍsuˆ tawˇ pa haˉ hkʼaˬ hkʼe tehˆ maˍ laˇ ve htaꞈ teˇ geh nyi sheˍ.

5. Pa ve awˬ yanˇ gʼa yehˇ ve tehꞈ shiˍ tuˬ Yeˍsuˆ aˬ htoꞈ ma ve tawˇ pa haˉ htaꞈ tehˆ maˍ laˇ ve le?

⁵ Gʼuiˬ sha ve mvuhˇ miˬ daꞈ ve awˬ lawn sha tanˇ lehˬ, awˬ tehˬ ve htaꞈ haꞈ yuˬ ve chaw nyi ma hkʼaw awˬ yawˇ awˬ meu˗eˇ awˬ meu˗eˇ uiˍ la ve htaꞈ shuˍ ve tehꞈ mawˬ tuˬ, Yeˍsuˆ tawˇ pa haˉ tehˆ maˍ laˇ ve yoˬ. Yawˇ kʼoˆ ve, “awˬ yawˇ oˇ ve hkʼaˬ hkʼe te yeˬ la uiˍ la ve htaꞈ yawˇ maˇ shiˍ. Miˬ guiˬ yawˇ hkʼaˇ yawˇ awˬ shiˍ nawꞈ la piˇ ve yoˬ. Awˉ lawˉ awˬ yeˬ yeˬ la leh, awˬ hkʼawꞈ nawˉ awˬ nu, awˬ hkʼaw lo awˬ shiˍ nawꞈ la maˇ la ve yoˬ.” (Maˍkuˆ 4:27, 28) Yeˍsuˆ hkʼaˬ hkʼe kʼoˆ gaˇ ve le? Awˬ yeˬ awˬ meu˗eˇ awˬ meu˗eˇ uiˍ la ve htaꞈ shuˍ ve tehꞈ yawˇ kʼoˆ gaˇ ve yoˬ. Awˬ tehˬ ve htaꞈ haꞈ yuˬ ve chaw kaꞈ awˬ meu˗eˇ awˬ meu˗eˇ uiˍ la mvuh la ve yoˬ. Tawˇ pa haˉ te kʼo, ngaˬ hui geh Liꞈ hpu henˇ ve chaw Yaˬhoˉvaˬ geh hkʼa dehꞈ meuˆ daꞈ˗oˬ htaˇ, yawˇ ve te hkʼaˇ dawˇ hkʼaˇ pa ve htaꞈ ngaˬ hui kaꞈ gʼa mawˬ tuˬ yoˬ. (Eˇfeˇsuꞈ 4:22-24) Yaꞈ hkʼaˇ, Yaˬhoˉvaˬ lehˬ yeˬ la uiˍ la piˇ shehˍ hpaˇ hpehꞈ ve tehꞈ ngaˬ hui tawnˇ taˍ sheˍ.—1 Kawˇrenˍhtuˆ 3:7.

6-7. Yaˬhoˉvaˬ miˬ guiˬ htaꞈ hpanˍ htaˇ ve awˬ lawn ngaˬ hui aˬ htoꞈ ma henˇ yuˬ gʼa ve le?

⁶ Gʼuiˬ sha aˬ htoꞈ ma te ve htawˇ haˆ haˆ maˇ te. Yeunˇ hkanˍ ve Gʼuiˬ sha hpehꞈ ve yoˬ. Chi hkʼe te ve lehˬ, Gʼuiˬ sha chiˇ uiˍ chiˇ mvuh ve htaꞈ gʼa keunˍ leh Gʼuiˬ sha miˬ guiˬ htaꞈ hpanˍ leh chaw yaˇ htaꞈ piˇ htaˇ, awˬ nu ve chaw htaꞈ kaꞈ awˬ bon cawˬ ve tehꞈ ngaˬ hui gʼa mawˬ ve yoˬ. Awˬ lawn chi Gʼuiˬ sha miˬ guiˬ htaꞈ hpanˍ leh chaw yaˇ htaꞈ piˇ htaˇ ve htaꞈ ngaˬ hui mawˬ gʼa ve yoˬ.

⁷ Liꞈ hpu hkʼaw Gʼuiˬ sha “miˬ guiˬ oˇ ve hkʼaˬ hui cawˬ cawˇ ve htaꞈ dawˇ cheˆ” leh “miˬ guiˬ htaꞈ kanˬ chiˇ taˍ ve yehˬ hkuiˉ daw” leh “miˬ guiˬ ve awˬ hkuiˉ puiˍ htaꞈ” tanˬ hpanˍ htaˇ ve htaꞈ kʼoˆ taˍ ve yoˬ. (Yawˇbaˆ 38:5, 6) Leh Gʼuiˬ sha yawˇ hpanˍ taˍ ve htaꞈ dawˇ nyi tuˬ awˬ yanˇ yehˇ ve yoˬ. (Awˬ hkuiˉ puiˍ 1:10, 12) Mvuhˇ naw ma tcuh yaˇ Yaˬhoˉvaˬ  hpanˍ taˍ ve awˬ ceuˬ teˇ hpaˍ htaꞈ gʼa mawˬ htaˇ, yawˇ hui hkʼaˬ hkʼe dawˇ ve htaꞈ nawˬ dawˇ nyi sheˍ. Liꞈ hpu hkʼaw kʼoˆ ve, yawˇ hui “ha lehˬ ha kʼa kuˬ chehˇ ve yoˬ.” (Yawˇbaˆ 38:7) Awˬ lawn chi ngaˬ hui aˬ htoꞈ ma henˇ yuˬ gʼa ve le? Yaˬhoˉvaˬ kaꞈ teˇ ceuˬ le le htaꞈ hpanˍ peuˬ htaˇ, awˬ yanˇ laiˉ hinˉ hkʼawꞈ gʼa yehˇ ve htawˇ, yawˇ “te hpanˍ taˍ ve awˬ ceuˬ teˇ hpaˍ htaꞈ nyi leh daꞈ jaˇ ve htaꞈ gʼa mawˬ ve yoˬ.”—Awˬ hkuiˉ puiˍ 1:31.

8. Ngaˬ hui aˬ htoꞈ ma htaꞈ kʼawꞈ henˇ tuˬ ve le?

⁸ Ngaˬ hui gʼa henˇ peuˬ˗oˬ ve awˬ ceuˬ teˇ hpaˍ, ngaˬ hui gʼa yeunˇ hkanˍ cawˇ ve tehꞈ, Liꞈ hpu hkʼaw ve awˬ liˇ awˬ hkʼaˇ laiˉ tawn beˆ maˍ laˇ ve htaꞈ gʼa mawˬ ve yoˬ. Ngaˬ hui yeunˇ hkanˍ leh Yaˬhoˉvaˬ htaꞈ law cawˇ ve 2 lawn htaꞈ teˇ geh henˇ tuˬ yoˬ.

9. Ngaˬ hui Yaˬhoˉvaˬ htaꞈ law cawˇ ve hkʼaˬ hkʼe htaˇ le?

⁹ Ngaˬ hui ve bon lawˬ hkawˇ htaꞈ hkʼawꞈ laˇ tuˬ Yaˬhoˉvaˬ htaꞈ gʼa law cawˇ ve. Ngaˬ hui shoꞈ shaꞈ ve teˇ ceuˬ ceuˬ gʼa hpuˇ htaˇ, Yaˬhoˉvaˬ ga laˇ tuˬ lawˬ ve, maˇ heˆ leh awˬ gʼaˇ nuˇ ve htaꞈ tawˍ daꞈ gʼaˇ tuˬ yawˇ geh gʼa lawˬ ve yoˬ. Ngaˬ hui bon lawˬ ve htaꞈ Yaˬhoˉvaˬ laꞈ haˉ maˇ hkʼawꞈ laˇ sheˍ ve tehꞈ dawˇ ve kʼo, aˬ htoꞈ ma te chi hkʼe dawˇ ve le?

10. Aˬ htoꞈ ma te Yaˬhoˉvaˬ ngaˬ hui htaꞈ yeunˇ hkanˍ tcuh gaˇ ve le?

¹⁰ Yaˬhoˉvaˬ ngaˬ hui ve bon lawˬ hkawˇ htaꞈ hkʼa dehꞈ na taˍ ve yoˬ. (Chiˇ mvuh ve 65:2) Gʼuiˬ sha awˬ pon kʼo, ngaˬ hui ve bon lawˬ hkawˇ lehˬ yonˍ ve cawˬ ve tehꞈ shaˉ hkiˆ hpeuꞈ maw piˇ ve yoˬ. (Heˍbrehˇ 11:6) Chi hkʼoˆ kaꞈ, ngaˬ hui bon lawˬ ve hkʼe gʼaꞈ te ve htaꞈ Yaˬhoˉvaˬ mawˬ gaˇ ve yoˬ. (1 Yoˇhanˬ 3:22) Ngaˬ hui awˬ gʼaˇ nuˇ ve htaꞈ tawˍ daꞈ gʼaˇ tuˬ Yaˬhoˉvaˬ ga laˇ tuˬ lawˬ ve, ngaˬ hui ve te hkʼaˇ dawˇ hkʼaˇ maˇ daꞈ ve htaꞈ yeunˇ hkanˍ gʼaˇ tuˬ leh, chi ve teˇ hpaˍ htaꞈ tawˍ daꞈ gʼaˇ tuˬ yawˇ ga laˇ tuˬ lawˬ sheˍ. Teˇ pawˆ pawˆ ngaˬ hui ve bon lawˬ hkawˇ htaꞈ Yaˬhoˉvaˬ laꞈ haˉ maˇ hkʼawꞈ laˇ sheˍ ve tehꞈ na gʼa tuˬ Yeˍsuˆ ga laˇ ve yoˬ. Yawˇ kʼoˆ ve, “lawˬ loˬ. Lawˬ kʼo gʼa tuˬ yoˬ. Ca loˬ. Ca kʼo mawˬ tuˬ yoˬ. Yehˬ miˉ htaꞈ htawˆ loˬ. Htawˆ kʼo hpaw laˇ tuˬ yoˬ. Awˬ lawn kʼo, lawˬ ve chaw teˇ gʼaˇ le le lehˬ gʼa tuˬ yoˬ. Ca ve chaw htawˇ, mawˬ tuˬ yoˬ. Yehˬ miˉ htaꞈ htawˆ ve chaw awˬ pon htawˇ, yehˬ miˉ hpaw la tuˬ yoˬ.” (Maꞈhtehˍ 7:7, 8) Beˆ maˍ laˇ hkawˇ chi htaꞈ ngaˬ hui gʼaꞈ te leh hkʼaˬ htaˆ kaꞈ bon lawˬ ve kʼo, Yaˬhoˉvaˬ ngaˬ hui ve bon lawˬ hkawˇ htaꞈ na leh hkʼawꞈ laˇ tuˬ yoˬ tehꞈ yonˍ gʼa ve yoˬ.—Kawˇlawˇsehˇ 4:2.

11. Yaˬhoˉvaˬ ngaˬ hui ve bon lawˬ hkawˇ htaꞈ laꞈ haˉ maˇ hkʼawꞈ laˇ sheˍ ve tehꞈ dawˇ ve kʼo, ngaˬ hui hkʼaˬ hkʼe dawˇ nyi cawˇ ve le? (Heˍbrehˇ 4:16)

¹¹ Yaˬhoˉvaˬ ngaˬ hui ve bon lawˬ hkawˇ htaꞈ laꞈ haˉ maˇ hkʼawꞈ laˇ sheˍ ve tehꞈ dawˇ ve kʼo, “loˍ ve awˬ yanˇ awˬ hkʼaw lo ga laˇ tuˬ” yoˬ tehꞈ yawˇ ka tiꞈ te taˍ laˇ ve yoˬ. (Heˍbrehˇ 4:16 gʼaw sheˍ.) Hkʼe te leh, Yaˬhoˉvaˬ ngaˬ hui ve bon lawˬ hkawˇ htaꞈ dawˇ taˍ ve hkʼe laꞈ haˉ maˇ hkʼawꞈ laˇ ve kʼo, venˇ baˆ taˇ taˍ. Tawˇ pa haˉ te kʼo, Gʼuiˬ sha ve mvuhˇ miˬ haiˬ ve miˬ guiˬ chi htaꞈ te luˬ laˇ tuˬ laiˉ gʼaˇ bon lawˬ ve laiˉ hkʼawꞈ gaˬ˗oˬ. Awˬ tehˬ kʼo, Yeˍsuˆ kaꞈ ngaˬ hui htaꞈ bon chi hkʼe lawˬ tuˬ maˍ laˇ ve yoˬ. (Maꞈhtehˍ 6:10) Awˬ leh meuˇ ve awˬ yanˇ ngaˬ hui dawˇ taˍ ve hkʼe maˇ gaˬ la sheˍ ve pa taw, Gʼuiˬ sha htaꞈ maˇ yonˍ ve lehˬ kʼaˍ jaˇ. (Haˍbaˍkuˆ 2:3; Maꞈhtehˍ 24:44) Ngaˬ hui cuˇ yiˍ cawˬ leh Yaˬhoˉvaˬ htaꞈ law ve kʼo, yonˍ ve hkʼaw caˉ leh bon lawˬ ve yoˬ. “Awˬ nyi awˬ haˉ oˇ ve” Yaˬhoˉvaˬ tinˍ taˍ˗oˬ ve pa taw haiˬ ve miˬ guiˬ chi htaꞈ Yaˬhoˉvaˬ te luˬ tuˬ yoˬ. Oˇ ve teˇ yanˇ gaˬ kʼo, teˇ gʼaˇ le le awˬ pon daꞈ ve awˬ yanˇ hpehꞈ ve tehꞈ ngaˬ hui gʼa shiˍ tuˬ yoˬ.—Maꞈhtehˍ 24:36; 2 Peˍtruˆ 3:15.

12. Ngaˬ hui yeunˇ hkanˍ gʼaˇ tuˬ haˍ jaˇ tehꞈ dawˇ ve hkʼaˬ hkʼe htaˇ le?

¹² Hteˇ ve cawˇ ve gʼa tuˬ ngaˬ hui yeunˇ hkanˍ leh gʼa law ve. Chi beuꞈ ve chaw laiˉ gʼaˇ mvuhˇ miˬ, chaw ceuˬ, chaw hpu chaw naˆ, hawˉ hkʼaˆ yaˇ miˇ, leh chaw liˇ vaˇ liˇ maˇ shuˍ daꞈ ve pa taw, maˇ daꞈ ve te piˇ ve yoˬ. Teˇ hpaˍ kʼo, awˬ to hpawˇ leh uˉ nawꞈ nehˆ hpawˇ shu htaꞈ maˇ shuˍ ve pa taw, maˇ hteˇ maˇ cawˇ ve gʼa hpuˇ ve yoˬ. Yaˬhoˉvaˬ ve  Shaˉhkiˆhkanˍ ve chaw kaꞈ yonˍ ve htaꞈ pa taw maˇ hteˇ maˇ cawˇ ve gʼa hpuˇ ve yoˬ. Ngaˬ hui chi hkʼe ve gʼa hpuˇ htaˇ “awˬ leh hkʼa gaˬ yeˬ chehˇ ve chaw lehˬ, htaiˍ hkʼawꞈ ve htaꞈ gʼa tuˬ yoˬ” tehꞈ Yeˍsuˆ kʼoˆ ve htaꞈ tawnˇ taˍ sheˍ. (Maꞈhtehˍ 24:13) Ngaˬ hui yeunˇ hkanˍ leh gʼa law cawˇ sheˍ ve awˬ nu ve kaꞈ cawˬ ve yoˬ. Tawˇ pa haˉ te kʼo, nawˬ venˇ baˆ uiˍ jaˇ ve htaꞈ te yaꞈ ve kʼo, hkʼaˬ hkʼe te tuˬ le? Nyi haꞈ shaˉ paˍ awˬ lawn chi htaꞈ shiˍ˗oˬ leh nawˬ yeunˇ hkanˍ leh yawˇ hui kaꞈ Yaˬhoˉvaˬ gu ve hkʼe gu tuˬ tehꞈ nawˬ yonˍ gʼa˗aw laˇ? Nyi haꞈ shaˉ paˍ awˬ lawn chi htaꞈ gu tuˬ hkʼaˬ hkʼe gʼa te ve ngaˬ hui teˇ geh nyi sheˍ.

13. Awˬ lawn cawˬ htaˇ nyi haꞈ shaˉ paˍ lehˬ Yaˬhoˉvaˬ gu ve hkʼe gu tuˬ hkʼaˬ hkʼe gʼa te cawˇ ve le?

¹³ Hkriꞈ yaˇ awˬ moˍ hkʼaw venˇ baˆ uiˍ jaˇ ve htaꞈ te yaꞈ ve chaw cawˬ ve tehꞈ nyi haꞈ shaˉ paˍ shiˍ htaˇ, yawˇ hui Yaˬhoˉvaˬ dawˇ ve hkʼe dawˇ tuˬ “mvuhˇ naw ma lo yaꞈ laˬ ve cuˇ yiˍ” htaꞈ gʼa lawˬ cawˇ ve yoˬ. (Yaˍkoˆ 3:17) Nyi haꞈ shaˉ paˍ dawˇ teh taˍ ve lehˬ te yaꞈ ve chaw htaꞈ “shiˍ hkʼawꞈ veu laˇ tuˬ” ga piˇ ve yoˬ. (Yaˍkoˆ 5:19, 20) Yawˇ hui Hkriꞈ yaˇ awˬ moˍ htaꞈ haꞈ shaˉ tuˬ leh awˬ viˉ awˬ nyi te yaꞈ ve chaw htaꞈ awˬ gʼaˇ piˇ tuˬ te gʼa ve hkʼe teˇ ceuˬ le le te ve yoˬ. (2 Kawˇrenˍhtuˆ 1:3, 4) Venˇ baˆ uiˍ jaˇ ve htaꞈ te yaꞈ ve tehꞈ nyi haꞈ shaˉ paˍ shiˍ htaˇ, awˬ tehˬ ve htaꞈ gʼaꞈ ca tuˬ awˬ yanˇ gʼa yehˇ ve yoˬ. Te yaꞈ ve chaw htaꞈ keunˍ daꞈ ve hkʼe beˆ maˍ piˇ tuˬ yawˇ hui bon lawˬ leh Liꞈ hpu hkʼaw beˆ maˍ laˇ taˍ ve htaꞈ hkʼa dehꞈ nyi sheˍ ve yoˬ. (Yeˍraˍmiˆ 30:11) Yawˇ hui haˆ maˇ dawˇ cheˆ ve htawˇ awˬ yanˇ chi maw maˇ teh taˬ. Nyi haꞈ shaˉ paˍ Yaˬhoˉvaˬ beˆ maˍ laˇ ve htaꞈ gʼaꞈ te˗oˬ htaˇ, teˇ hpawˇ le le kaꞈ daꞈ ve tehꞈ Hkriꞈ yaˇ awˬ moˍ hkʼaw ve chaw gʼa mawˬ tuˬ yoˬ. Yaꞈ hkʼaˇ, cawˇ ve hkʼaw gu˗oˬ htaˇ, te yaꞈ ve chaw kaꞈ nyi ma naˬ sheˍ ve yoˬ hehˉ. Nawˬ chi hkʼe dawˇ ve kʼo, aˬ htoꞈ ma ga laˇ gʼa tuˬ le?

14. Awˬ viˉ awˬ nyi nawˬ nyi ma naˬ tuˬ te laˇ leh nyi ma luˬ ve kʼo, nawˬ htaꞈ ga laˇ gʼa ve Liꞈ hpu hkʼaw a shu ve awˬ lawn cawˬ ve le?

¹⁴ Nawˬ nyi ma naˬ tuˬ te laˇ leh nyi ma luˬ jaˇ tuˬ te laˇ ve chaw cawˬ jaw˗aw laˇ? Teˇ pawˆ pawˆ awˬ viˉ awˬ nyi hpehꞈ ve yoˬ hehˉ. Awˬ lawn chi hkʼe ve nawˬ gʼa hpuˇ ve kʼo, maˇ hteˇ maˇ cawˇ ve htaꞈ Yaˬhoˉvaˬ gu gʼa ve tehꞈ, nawˬ yeunˇ hkanˍ leh law gʼa tuˬ Liꞈ hpu hkʼaw Yoˇsehꞈ ve awˬ lawn maˍ laˇ gʼa ve yoˬ. Awˬ viˉ paˍ hui yawˇ htaꞈ maˇ hteˇ maˇ cawˇ te piˇ ve htawˇ, Yoˇsehꞈ maˇ te hkʼawꞈ. Yawˇ Yaˬhoˉvaˬ ve kanˉ te gʼa tuˬ te gʼa ve hkʼe te leh yawˇ yeunˇ hkanˍ ve htaꞈ Yaˬhoˉvaˬ awˬ bon naꞈ piˇ ve yoˬ. (Awˬ hkuiˉ puiˍ 39:21) Ponˬ kʼai ve awˬ yanˇ Yoˇsehꞈ nyi ma naˬ tuˬ te piˇ ve chaw htaꞈ venˇ baˆ hpehˇ piˇ gʼa leh  Yaˬhoˉvaˬ yawˇ htaꞈ awˬ bon hkʼaˬ hkʼe naꞈ piˇ ve gʼa mawˬ ve yoˬ. (Awˬ hkuiˉ puiˍ 45:5) Yoˇsehꞈ hkʼa shuˍ ngaˬ hui kaꞈ hkʼaˬ htaˆ kaꞈ Yaˬhoˉvaˬ geh meuˆ daꞈ htaˇ awˬ bon gʼa tuˬ yoˬ. Ngaˬ hui gʼa hpuˇ chehˇ ve maˇ hteˇ maˇ cawˇ ve htaꞈ Gʼuiˬ sha ga laˇ tuˬ yoˬ tehꞈ yeunˇ hkanˍ leh law taˍ sheˍ.—Chiˇ mvuh ve 7:17; 73:28.

15. Awˬ viˉ awˬ nyi yaˇ miˇ teˇ gʼaˇ maˇ hteˇ maˇ cawˇ ve gʼa hpuˇ ve htaꞈ yeunˇ hkanˍ gʼaˇ tuˬ aˬ htoꞈ ma ga piˇ ve le?

¹⁵ Yoˇsehꞈ gʼa hpuˇ ve hkʼa shuˍ ngaˬ hui maˇ gʼa hpuˇ ve htawˇ, ngaˬ hui maˇ hteˇ maˇ cawˇ ve teˇ ceuˬ ceuˬ gʼa hpuˇ ve kʼo, nyi ma luˬ jaˇ ve yoˬ hehˉ. Yaˬhoˉvaˬ ve Shaˉhkiˆhkanˍ ve chaw maˇ heˆ ve teˇ gʼaˇ geh ngaˬ hui awˬ lawn cawˬ daꞈ htaˇ, Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te ve kʼo, daꞈ ve awˬ bon gʼa tuˬ yoˬ. (Hpiˇliˇpiˆ 2:3, 4) Hpehꞈ laˬ jaw ve awˬ lawn htaꞈ teˇ geh nyi sheˍ. Awˬ viˉ awˬ nyi yaˇ miˇ teˇ gʼaˇ kanˉ te kuiˬ lo ve awˬ chawˇ yawˇ htaꞈ hkʼaiˉ leh awˬ tehˬ maˇ heˆ ve awˬ lawn kʼoˆ piˇ ve yoˬ. Yawˇ nyi ma naˬ leh nyi ma luˬ jaˇ. Yaꞈ hkʼaˇ, yawˇ laꞈ haˉ hkʼawꞈ piˇ ve aꞈ kehˉ awˬ yanˇ yehˇ leh Yeˍsuˆ ve awˬ lawn htaꞈ dawˇ nyi ve yoˬ. Yeˍsuˆ htaꞈ shu deˇ piˇ ve htawˇ, yawˇ maˇ deˇ hkʼawꞈ. (1 Peˍtruˆ 2:21, 23) Awˬ lawn chi ve htaꞈ yawˇ dawˇ nyi htaˇ, awˬ chawˇ oˇ ve teˇ gʼaˇ geh awˬ lawn maˇ cawˬ daꞈ. Peuˬ hkʼawꞈ nawˉ awˬ chawˇ oˇ ve teˇ gʼaˇ naˬ leh dawˇ maˇ ve htaꞈ yawˇ gʼa shiˍ htaˇ, yawˇ te gaˇ leh te ve tehꞈ maˇ dawˇ. Awˬ viˉ awˬ nyi yaˇ miˇ yeunˇ hkanˍ gʼaˇ leh nyi ma gawˬ lehˍ cawˬ ve yoˬ.

16. Nawˬ maˇ hteˇ maˇ cawˇ ve gʼa hpuˇ htaˇ yeunˇ hkanˍ gʼaˇ tuˬ aˬ htoꞈ ma ga laˇ gʼa ve le? (1 Peˍtruˆ 3:12)

¹⁶ Nawˬ maˇ hteˇ maˇ cawˇ gʼa hpuˇ ve htaꞈ yeunˇ hkanˍ chehˇ leh nyi ma luˬ jaˇ tuˬ teˇ ceuˬ ceuˬ te laˇ ve kʼo, “Gʼuiˬ sha lehˬ nyi ma luˬ chehˇ ve chaw hui awˬ paˇ neˇ lo chehˇ taˍ ve yoˬ” tehꞈ tawnˇ taˍ sheˍ. (Chiˇ mvuh ve 34:18) Nawˬ yeunˇ hkanˍ chehˇ ve htaꞈ Gʼuiˬ sha haꞈ leh nawˬ ve dawˇ haˍ tuˬ teˇ hpaˍ Gʼuiˬ sha geh teh taˉ˗oˆ. (Chiˇ mvuh ve 55:22) Gʼuiˬ sha lehˬ miˬ guiˬ chi ve htaꞈ suhˉ jehˬ shehˍ hpaˇ hpehꞈ leh yawˇ mehˆ gʼuˇ suhˍ teˇ ceuˬ˗ehˬ kaꞈ faˉ taˍ maˇ gʼa. (1 Peˍtruˆ 3:12 gʼaw sheˍ.) Nawˬ shoꞈ shaꞈ ve gʼa hpuˇ leh gu maˇ gʼa tehꞈ dawˇ ve kʼo, Yaˬhoˉvaˬ gu laˇ tuˬ law taˍ˗aw laˇ?

17. Iˉsaˍyaˆ liꞈ 30:18 hkʼaw Yaˬhoˉvaˬ ngaˬ hui htaꞈ aˬ htoꞈ ma ve awˬ lawn htawˆ hkanˍ laˇ taˍ ve le?

¹⁷ Yaˬhoˉvaˬ lehˬ yawˇ ve mvuhˇ miˬ htaꞈ cuˇ leh ngaˬ hui htaꞈ awˬ bon naꞈ laˇ tuˬ yoˬ. Iˉsaˍyaˆ liꞈ 30:18 hkʼaw kʼoˆ ve, “Gʼuiˬ sha lehˬ nawˬ hui htaꞈ ha kʼaˉ ve nyi ma cawˬ chehˇ sheˍ ve yoˬ. Awˬ lawn  kʼo, yawˇ lehˬ hkʼaˬ htaˆ kaꞈ hteˇ ve cawˇ ve kanˉ htaꞈ ceh tiˉ te ve pa taw, nawˬ hui htaꞈ ga laˇ tuˬ gu taˍ hehnˇ taˍ ve yoˬ. Gʼuiˬ sha htaꞈ gʼaˇ va ve teˇ ceuˬ ceh tiˉ, ha lehˬ tuˬ ve awˬ ceuˬ htaꞈ gʼa hpehꞈ ve yoˬ.” Chaw chi teˇ hpaˍ lehˬ chi teˇ hkui leh awˬ gʼuˇ suhˍ hpawˇ kaꞈ Yaˬhoˉvaˬ geh awˬ bon gʼa tuˬ yoˬ.

18. Ngaˬ hui awˬ bon maˇ maˇ gʼa tuˬ ve aˬ htoꞈ ma le?

¹⁸ Ngaˬ hui miˬ guiˬ awˬ suhˉ hkʼaw chehˇ htaˇ, dawˇ haˍ dawˇ hkiˉ ve htaꞈ maˇ gʼa hpuˇ˗o leh, chi teˇ hkui ngaˬ hui gʼa hpuˇ chehˇ ve awˬ ceuˬ kaꞈ maˇ gʼa hpuˇ˗o. Maˇ hteˇ maˇ cawˇ ve maˇ cawˬ˗o leh naˬ ve gawˬ ve kaꞈ maˇ gʼa hpuˇ˗o. (Hpeuꞈ maˍ ve 21:4) Ngaˬ hui teꞈ chiˉ kaꞈ maˇ gʼa dawˇ haˍ˗o leh loˍ ve teˇ ceuˬ le le cawˬ tuˬ yoˬ. (Chiˇ mvuh ve 72:16; Iˉsaˍyaˆ 54:13) Chi lehˬ daꞈ jaˇ ve maˇ heˆ laˇ?

19. Yaˬhoˉvaˬ ngaˬ hui awˬ pon aˬ htoꞈ ma gu laˇ chehˇ ve le?

¹⁹ Ngaˬ hui maˇ daꞈ ve te hkʼaˇ dawˇ hkʼaˇ maˇ cawˬ tuˬ leh Yaˬhoˉvaˬ cawˬ ve hkʼe daꞈ ve te hkʼaˇ dawˇ hkʼaˇ cawˬ tuˬ, yawˇ uˉ peunˍ ve awˬ hawˉ lo chehˇ gʼa tuˬ, chi teˇ hkui kaꞈ Yaˬhoˉvaˬ gu laˇ chehˇ ve yoˬ. Awˬ gʼaˇ nuˇ leh Yaˬhoˉvaˬ ve kanˉ maˇ te ve taˇ te. Ngaˬ hui daꞈ jaˇ ve a shaꞈ teꞈ hkʼaˇ gʼa˗e la ve yoˬ. Awˬ gʼuˇ suhˍ hpawˇ daꞈ jaˇ ve htaꞈ ngaˬ hui law chehˇ ve awˬ yanˇ htaˇ, Yaˬhoˉvaˬ yawˇ ka tiꞈ te taˍ ve htaꞈ gʼaꞈ te tuˬ, ngaˬ hui coˇ caˇ leh law taˍ sheˍ.