1-2. Chiˇ mvuh ve liꞈ 34:8 hkʼaw kʼoˆ taˍ ve hkʼe, Yaˬhoˉvaˬ daꞈ jaˇ ve tehꞈ ngaˬ hui hkʼaˬ hkʼe te shiˍ gʼa tuˬ le?

 Tawˇ pa haˉ te kʼo, chaw teˇ gʼaˇ nawˬ htaꞈ awˬ chiˇ teˇ hkehˇ peꞈ laˇ ve kʼo, awˬ chiˇ chi nawˬ maˇ caˇ jaw ve yoˬ hehˉ. Awˬ chiˇ chi hkʼaˬ hkʼe hpehꞈ ve, awˬ peꞈ hawˉ nyi ve, aˬ htoꞈ ma hkʼawꞈ taˍ ve chaˬ nyi ve, hkʼaˬ hkʼe te ve nawˬ shu htaꞈ na nyi ve yoˬ. Yaꞈ hkʼaˇ, awˬ hkʼaˇ teˇ hkʼaˇ lehˬ, nawˬ awˬ chiˇ chi ve htaꞈ dawˇ cawˇ, maˇ dawˇ cawˇ ve gʼa caˇ nyi ve yoˬ.

² Liꞈ gʼaw ve maˇ heˆ leh Gʼuiˬ sha ve kanˉ hkʼaˇ hkʼaw ve liꞈ kʼoˆ ngaˬ hui gʼaw htaˇ, Yaˬhoˉvaˬ ve awˬ lawn shiˍ gʼa ve yoˬ. Maˇ heˆ leh Yaˬhoˉvaˬ yawˇ htaꞈ daꞈ ve hkʼaˬ hkʼe taw te laˇ ve awˬ nu ve chaw kʼoˆ maˍ laˇ ve geh kaꞈ ngaˬ hui gʼa kaˇ ve yoˬ. Yaˬhoˉvaˬ hkʼaˬ hkʼe taw daꞈ ve ngaˬ hui ‘dawˇ nyi˗oˬ’ htaˇ, na gʼa la ve yoˬ. (Chiˇ mvuh ve 34:8 gʼaw sheˍ.) Awˬ lawn chi na gʼa tuˬ, tawˇ pa haˉ teˇ maˬ htaꞈ teˇ geh nyi sheˍ. Ngaˬ hui Gʼuiˬ sha ve kanˉ awˬ yanˇ hkʼa biˇ te gaˇ ve kʼo, chi hkʼe te gʼa tuˬ ngaˬ hui ve a shaꞈ teꞈ hkʼaˇ caˇ lawꞈ dawˬ lawꞈ gʼa te ve yoˬ. Gʼuiˬ sha ve mvuhˇ miˬ ngaˬ hui ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve kʼo, Yaˬhoˉvaˬ nyi haꞈ shaˉ leh loˍ ve awˬ ceuˬ peꞈ laˇ tuˬ yoˬ tehꞈ Yeˍsuˆ ka tiꞈ te taˍ laˇ ve htaꞈ ngaˬ hui teˇ hkui teˇ hkui gʼaw nyi ve yoˬ. (Maꞈhtehˍ 6:33) Hkʼaˬ hkʼe hpehꞈ ve htawˇ, ngaˬ hui Yeˍsuˆ ka tiꞈ te taˍ laˇ ve htaꞈ yonˍ ve yoˬ. Hkʼe te leh, ngaˬ hui hpu pehˇ yehˇ ve, kanˉ hkʼe taw maˇ te ve, leh Gʼuiˬ sha ve kanˉ maˇ maˇ te ve yoˬ. Chi hkʼe te ve lehˬ Yaˬhoˉvaˬ hkʼaˬ hkʼe ma daꞈ jaˇ ve htaꞈ ngaˬ hui “dawˇ nyi˗o” htaˇ, Yaˬhoˉvaˬ ngaˬ hui htaꞈ nyi haꞈ shaˉ laˇ ve gʼa mawˬ ve yoˬ.

3. Chiˇ mvuh ve liꞈ 16:1, 2 hkʼaw kʼoˆ taˍ ve hkʼe, Yaˬhoˉvaˬ daꞈ ve awˬ ceuˬ a shu htaꞈ piˇ ve le?

³ Yaˬhoˉvaˬ “chaw teˇ gʼaˇ le le htaꞈ awˬ bon naꞈ piˇ” ve yoˬ. (Chiˇ mvuh ve 145:9; Maꞈhtehˍ 5:45) Yaꞈ hkʼaˇ, Gʼuiˬ sha htaꞈ haꞈ leh yawˇ ve kanˉ nyi ma awˬ tawˬ hkʼa gaˬ te ve chaw awˬ pon yawˇ yawˇ hui htaꞈ daꞈ ve te piˇ ve yoˬ. (Chiˇ mvuh ve 16:1, 2 gʼaw sheˍ.)  Yaˬhoˉvaˬ ngaˬ hui htaꞈ peꞈ laˇ ve daꞈ ve awˬ ceuˬ aˬ htoꞈ ma cawˬ ve teˇ geh nyi sheˍ.

4. Yaˬhoˉvaˬ yawˇ geh tanˬ meuˆ daꞈ la ve chaw htaꞈ daꞈ ve hkʼaˬ hkʼe te piˇ ve le?

⁴ Yaˬhoˉvaˬ maˍ laˇ ve hkʼe teˇ pawˆ le le ngaˬ hui gʼaꞈ te htaˇ, ngaˬ hui ve a shaꞈ teꞈ hkʼaˇ daꞈ la ve htaꞈ gʼa mawˬ ve yoˬ. Gʼuiˬ sha htaꞈ caˉ daꞈ ve ngaˬ hui gʼa henˇ leh yawˇ htaꞈ haꞈ˗oˬ htaˇ, yawˇ maˇ dawˇ cawˇ ve awˬ ceuˬ leh yawˇ maˇ te ve awˬ ceuˬ htaꞈ ngaˬ hui kaꞈ maˇ te tuˬ ga laˇ ve yoˬ. (Kawˇlawˇsehˇ 1:21) Ngaˬ hui awˬ to chiˇ aꞈ leh Baˆtiˆsaˬ haꞈ yuˬ˗oˬ htaˇ, Yaˬhoˉvaˬ hkʼaˬ hkʼe ma daꞈ ve ngaˬ hui gʼa mawˬ ve yoˬ. Ngaˬ hui ve dawˇ shiˍ puiˉ ve nyi ma daꞈ kehˬ leh yawˇ geh meuˆ daꞈ maˇ la tuˬ ga laˇ ve yoˬ.—1 Peˍtruˆ 3:21.

5. Ngaˬ hui Gʼuiˬ sha ve kanˉ te htaˇ, yawˇ ga laˇ ve htaꞈ hkʼaˬ hkʼe gʼa mawˬ ve le?

⁵ Tanˬ hto toˇ˗e htaˇ, Yaˬhoˉvaˬ ngaˬ hui htaꞈ ga laˇ ve gʼa mawˬ tuˬ yoˬ. Nawˬ yaꞈ taw puiˉ ve chaw hpehꞈ˗aw laˇ? Yaˬhoˉvaˬ ve kanˉ te ve chaw laiˉ gʼaˇ kaꞈ yaꞈ taw puiˉ ve yoˬ. Shaˉhkiˆhkanˍ ve chaw maˇ hpehꞈ sheˍ htaˇ, teˇ yehˬ peuˬ teˇ yehˬ hto toˇ leh maˇ˗awˍ ve chaw maˇ dawˇ cawˇ ve awˬ lawn kʼoˆ tuˬ maˇ dawˇ nyi jaw. Chi teˇ hkui nawˬ hkʼaˬ htaˆ kaꞈ chi hkʼe te chehˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Kanˉ chi ve nawˬ dawˇ cawˇ tuˬ leh awˬ nu ve awˬ ceuˬ htaꞈ kaꞈ Yaˬhoˉvaˬ ga laˇ ve nawˬ gʼa mawˬ ve yoˬ. Tawˇ pa haˉ te kʼo, nawˬ htaꞈ shu maˇ daꞈ ve kʼoˆ laˇ htaˇ, nawˬ nyi ma gawˬ lehˍ cawˬ tuˬ Gʼuiˬ sha ga laˇ leh, yehˬ shehˍ hpaˇ nyi ma pfuhˇ tuˬ, Liꞈ hpu awˬ tawn dawˇ cawˇ ve htaꞈ hawˍ daꞈ ve nawˬ tawnˇ gʼa tuˬ Gʼuiˬ sha ga laˇ leh, hto toˇ kuiˬ awˬ ti lo ve chaw maˇ dawˇ cawˇ ve htawˇ, nawˬ caˉ leh hto toˇ kʼai gʼa tuˬ yawˇ awˬ gʼaˇ peꞈ laˇ tuˬ yoˬ.—Yeˍraˍmiˆ 20:7-9.

6. Yaˬhoˉvaˬ ngaˬ hui htaꞈ maˍ laˇ htaˇ, yawˇ ngaˬ hui htaꞈ ga laˇ gaˇ ve hkʼaˬ hkʼe gʼa mawˬ ve le?

⁶ Yaˬhoˉvaˬ ngaˬ hui htaꞈ ga laˇ gaˇ ve teˇ hkʼaˇ lehˬ, yawˇ ve kanˉ te cheuˬ la tuˬ maˍ laˇ ve yoˬ. (Yoˇhanˬ 6:45) Mvuhˇ hpeuꞈ haˉ hpawnˬ daꞈ ve hkʼaw tawˇ yaw daꞈ ve awˬ hkʼaˇ, ngaˬ hui hto toˇ htaˇ hkʼaˬ hkʼe yuˬ yehˇ ve awˬ ceuˬ shiˍ tuˬ maˍ laˇ ve yoˬ. Awˉ lawˉ htaˇ kawˆ leh awˬ hkʼaˇ awˬ suhˉ yehˇ cawˇ ve laˇ tehꞈ hkʼa dehꞈ maˇ yonˍ gʼa. Yaꞈ hkʼaˇ, ngaˬ hui gʼaꞈ te˗oˬ htaˇ, awˬ hkʼaˇ chi ve hto toˇ kuiˬ awˬ ti lo yuˬ yehˇ gʼa ve tehꞈ gʼa mawˬ ve yoˬ. Hkriꞈ yaˇ awˬ moˍ hpawnˬ daꞈ ve leh hpawnˬ daꞈ lonˉ hkʼaw ngaˬ hui hto toˇ htaˇ yuˬ yehˇ tuˬ awˬ hkʼaˇ awˬ suhˉ awˬ suhˉ beˆ maˍ laˇ ve yoˬ. Chi hkʼe yuˬ yehˇ htaˇ, ngaˬ hui kawˆ ve htawˇ, Yaˬhoˉvaˬ awˬ bon naꞈ laˇ ve htaꞈ gʼa mawˬ ve yoˬ. Yaˬhoˉvaˬ ve kanˉ te htaˇ awˬ hkʼaˇ awˬ suhˉ awˬ suhˉ yuˬ yehˇ ve kʼo, yawˇ ngaˬ hui htaꞈ daꞈ ve awˬ ceuˬ aˬ htoꞈ ma peꞈ laˇ ve le, chi teˇ hkui teˇ geh henˇ tuˬ yoˬ. Gʼuiˬ sha ve kanˉ maˇ maˇ te gʼa tuˬ, ngaˬ hui hkʼaˬ hkʼe gʼa te cawˇ ve kaꞈ teˇ geh henˇ tuˬ yoˬ.

7. Ngaˬ hui Gʼuiˬ sha ve kanˉ maˇ maˇ te ve kʼo, aˬ htoꞈ ma gʼa tuˬ le?

⁷ Ngaˬ hui Yaˬhoˉvaˬ geh meuˆ daꞈ maˇ la ve. Nyi haꞈ shaˉ paˍ Saˍmo˗eˍlaˆ * ve awˬ lawn htaꞈ teˇ geh nyi sheˍ. Yawˇ leh awˬ miˇ ma Koˬlam˗biˬ˗a mvuhˇ miˬ lo Gʼuiˬ sha ve kanˉ te ve yoˬ. Awˉ lawˉ htaˇ yawˇ hui paw kuiˬ hkʼaˆ Hkriꞈ awˬ moˍ hkʼaw gʼuˇ suhˍ peuˍ ve te ve pyawˍ ve yoˬ. Yaꞈ hkʼaˇ, yawˇ hui Gʼuiˬ sha ve kanˉ maˇ maˇ te gaˇ leh Hkriꞈ yaˇ awˬ moˍ loˍ jaˇ kuiˬ lo ca ga˗e ve yoˬ. Chi hkʼe te gʼa tuˬ, yawˇ hui teˇ ceuˬ ceuˬ gʼa yuˬ tanˇ ve yoˬ. Saˍmo˗eˍlaˆ kʼoˆ ve, “ngaˬ hui Maꞈhtehˍ liꞈ 6:33 hkʼaw gʼaꞈ te leh maˇ loˍ ve awˬ ceuˬ maˇ vuiˬ. Yaꞈ hkʼaˇ, ngaˬ hui awˬ pon haˍ jaˇ ve awˬ ceuˬ lehˬ, ngaˬ hui haꞈ jaˇ ve yehˬ htaꞈ gʼa baˬ taˉ ve yoˬ. Yehˬ chi ngaˬ hui teˇ geh gʼa ga te leh chi teˇ hkui ngaˬ hui yehˬ hpfuhˇ piˇ ve kaꞈ peuˬ˗oˬ.” Hkriꞈ yaˇ awˬ moˍ awˬ suhˉ hkʼaw jiˆ kʼai htaˇ, oˇ htaˇ hkʼe leˇ yawˇ hui hpu maˇ gʼa yehˇ maˇ. Chi teˇ hkui yawˇ hui gʼa ve hpu htaꞈ hkʼa dehꞈ gʼa pehˇ yehˇ ve yoˬ. Saˍmo˗eˍlaˆ kʼawꞈ kʼoˆ ve, “Yaˬhoˉvaˬ ngaˬ hui htaꞈ beˆ maˍ laˇ leh ngaˬ hui ve bon lawˬ hkawˇ htaꞈ hkʼawꞈ laˇ ve yoˬ.” Yawˇ ngaˬ hui htaꞈ haꞈ ve shiˍ leh nyi hkʼaˇ suh jaˇ ve kaꞈ shiˍ ve yoˬ. Nawˬ Gʼuiˬ sha ve kanˉ maˇ maˇ te gʼa˗aw laˇ? Te gʼa ve  kʼo, nawˬ Yaˬhoˉvaˬ geh gʼaˇ hteꞈ meuˆ daꞈ leh yawˇ nawˬ htaꞈ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ.—Chiˇ mvuh ve 18:25.

8. I˗vehˆ leh Viˆtaw˗ri ve tawˇ hkawˇ nawˬ htaꞈ hkʼaˬ hkʼe maˍ laˇ ve le?

⁸ Ngaˬ hui Gʼuiˬ sha ve kanˉ te ve htaꞈ ha lehˬ ve. I˗vehˆ leh Viˆtaw˗ri yawˇ huiˉ maˬ Kaˬjiˆsaˍtanˍ mvuhˇ miˬ lo gʼuˇ suhˍ peuˍ ve te ve yoˬ. Yawˇ hui Gʼuiˬ sha ve kanˉ yehˬ te ve hpawˇ leh awˬ nu ve teˇ hpaˍ htaꞈ ga gʼa tuˬ, a shaꞈ teꞈ hkʼaˇ caˇ lawꞈ dawˬ lawꞈ te ve yoˬ. I˗vehˆ kʼoˆ ve, “mvuhˇ hpeuꞈ la gaˬ kʼo ngaˬ hui heuˬ jaˇ. Ngaˬ hui cawˬ taˍ ve awˬ gʼaˇ awˬ shaˉ hkʼa peu˗eˬ Yaˬhoˉvaˬ ve kanˉ te piˇ ve tehꞈ shiˍ ve pa taw, ha lehˬ jaˇ. Awˬ chawˇ awˬ suhˉ awˬ suhˉ cawˬ ve, daꞈ ve awˬ lawn, leh hpehꞈ laˬ jaw ve awˬ lawn kaꞈ cawˬ ve ha lehˬ jaˇ.”—Maˍkuˆ 10:29, 30.

9. Awˬ viˉ awˬ nyi yaˇ miˇ teˇ gʼaˇ yawˇ tuꞈ ve hkanˍ ve gʼa hpuˇ ve htawˇ, Gʼuiˬ sha ve kanˉ maˇ maˇ te gʼa tuˬ yawˇ aˬ htoꞈ ma te ve le? Leh awˬ bon hkʼaˬ hkʼe gʼa ve le?

⁹ Ngaˬ hui tuꞈ ve hkanˍ ve laiˉ ceuˬ gʼa hpuˇ ve htawˇ, Yaˬhoˉvaˬ ve kanˉ te ve ha lehˬ gʼa sheˍ ve yoˬ. Aˍfaˍriˆkaˆ miˬ guiˬ awˬ hawˉ hpawˇ lo chehˇ ve awˬ viˉ awˬ nyi Mi˗lehn mehˇ chawˇ ma ve awˬ lawn htaꞈ teˇ geh nyi sheˍ. Oˇ htaˇ yawˇ saˍ laꞈ gʼonˍ hpehꞈ leh yawˇ a shaꞈ gaˬ leh kanˉ maˇ te˗o htaˇ gʼuˇ suhˍ peuˍ ve te ve yoˬ. Yawˇ awˬ tcuhˉ awˬ ma naˬ ve pa taw, teˇ yehˬ peuˬ teˇ yehˬ hto toˇ ve teˇ pawˆ le le yawˇ 1 naˍ riˍ ceh tiˉ te gʼa ve yoˬ. Yaꞈ hkʼaˇ, yawˇ liꞈ kʼoˆ keu leh caꞈ tuˬ yehˇ htaˇ te gʼa maw ve yoˬ. Yawˇ ca kʼawꞈ guiˇ˗e ve laiˉ gʼaˇ cawˬ ve, Liꞈ hpu henˇ ve chaw kaꞈ laiˉ gʼaˇ cawˬ leh, tawˇ yaw tuˬ awˬ hkʼeun yehˇ leh Liꞈ hpu maˍ piˇ ve yoˬ. Mi˗lehn Gʼuiˬ sha ve kanˉ maˇ maˇ te gaˇ tuˬ aˬ htoꞈ ma te piˇ ve le? Yawˇ kʼawꞈ kʼoˆ ve, “ngaˬ Yaˬhoˉvaˬ leh Yeˍsuˆ htaꞈ nyi ma awˬ tawˬ hkʼa gaˬ haꞈ ve yoˬ. Ngaˬ Yaˬhoˉvaˬ geh bon hkʼaˬ htaˆ kaꞈ lawˬ ve yoˬ. Gʼuiˬ sha ve kanˉ ngaˬ te gʼa ve hkʼe te tuˬ, yawˇ ga laˇ tuˬ kaꞈ lawˬ ve yoˬ.”—Maꞈhtehˍ 22:36, 37.

10. 1 Peˍtruˆ liꞈ 5:10 hkʼaw kʼoˆ taˍ ve hkʼe, Yaˬhoˉvaˬ ve kanˉ maˇ maˇ te ve chaw aˬ htoꞈ ma awˬ bon gʼa ve le?

¹⁰ Ngaˬ hui Yaˬhoˉvaˬ maˍ laˇ ve htaꞈ gʼa ve. Mawˉriˇshaˆ mvuhˇ miˬ lo gʼuˇ suhˍ peuˍ ve te ve Hkeh˗neˇ kaꞈ chi hkʼe dawˇ ve yoˬ. Yawˇ awˬ tehˬ ve gʼa henˇ˗oˬ htaˇ, liꞈ tanˇ mvuh ve hkʼaw maˇ henˇ˗o leh, Baˆtiˆsaˬ haꞈ yuˬ leh hkʼaˬ htaˆ kaꞈ gʼuˇ suhˍ peuˍ ve tanˬ te ve yoˬ. Yawˇ kʼoˆ ve, “tcuh kaˍ paˍ Iˉsaˍyaˇ kʼoˆ taˍ ve hkʼe, ‘ngaˬ kʼai tuˬ yoˬ! Ngaˬ htaꞈ kʼai peu laˇ˗oˆ!’ Chi ve ngaˬ coˇ caˇ leh henˇ yuˬ ve yoˬ.” (Iˉsaˍyaˆ 6:8) Peuˬ hkʼawꞈ nawˉ, Hkeh˗neˇ Gʼuiˬ sha ve kanˉ yehˬ te ve hpawˇ laiˉ kaˬ lo ga piˇ leh yawˇ ve chaw ceuˬ tawˇ hkawˇ liꞈ yuˬ tawˆ ve htaꞈ kaꞈ gʼa ga piˇ ve yoˬ. Yawˇ kʼoˆ ve, “ngaˬ awˬ vuiˬ gʼa htaˇ hkʼa dehꞈ te ve yoˬ.” Yaꞈ hkʼaˇ, chi hkʼe ceh maˇ heˆ. Yawˇ kʼawꞈ kʼoˆ ve, “ngaˬ puiˉ ve hpehꞈ ve hkʼaˬ hkʼe taw te gʼa ve htaꞈ shiˍ leh ngaˬ Yaˬhoˉvaˬ ve kanˉ te shehˍ hpaˇ hpehꞈ tuˬ, daꞈ ve te hkʼaˇ dawˇ hkʼaˇ cawˬ tuˬ kaꞈ te jawˬ ve yoˬ.” (1 Peˍtruˆ 5:10 gʼaw sheˍ.) Yaˬhoˉvaˬ maˍ laˇ ve htaꞈ gʼa tuˬ, nawˬ a shaꞈ teꞈ kuiˬ hkʼaw teˇ ceuˬ ceuˬ pa gʼa˗aw laˇ?

11. Koˇreˇ˗aˇ awˬ hawˉ hpawˇ mvuhˇ miˬ lo chehˇ ve awˬ viˉ awˬ nyi yaˇ miˇ, Gʼuiˬ sha ve kanˉ maˇ maˇ te gʼa tuˬ aˬ htoꞈ ma te ve le? Leh awˬ bon hkʼaˬ hkʼe gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

¹¹ Awˬ viˉ awˬ nyi hpehꞈ maw jaˇ˗oˬ ve Gʼuiˬ sha ve kanˉ awˬ hkʼaˇ awˬ suhˉ te nyi htaˇ, yawˇ te ve htaꞈ awˬ bon gʼa tuˬ yoˬ. A naˍ 19 cawˬ htaˇ, Koˇreˇ˗aˇ awˬ hawˉ hpawˇ mvuhˇ miˬ lo chehˇ ve nyi haꞈ shaˍ paˍ teˇ gʼaˇ kʼoˆ ve, “awˬ viˉ awˬ nyi teˇ hpaˍ maˇ chehˇ sha ve pa taw, hkʼa dehꞈ hto toˇ˗e maˇ gʼa tehꞈ dawˇ jaw ve yoˬ. Chi teˇ hkui yawˇ hui awn˗laiˉ hpawˇ lo hto toˇ gʼa ve yoˬ. Ngaˬ hui ve Hkriꞈ yaˇ awˬ moˍ hkʼaw 80 hkʼawꞈ hpaˆ˗oˬ ve awˬ viˉ awˬ nyi yaˇ miˇ 3 gʼaˇ hkʼaw˗hpi˗u˗teuˇ yehˇ tuˬ henˇ ve yoˬ. Leh chi teˇ hkui yawˇ hui ngaˬ hui geh teˇ nyi le le hto toˇ ve yoˬ.” (Chiˇ mvuh ve 92:14, 15) Nawˬ Yaˬhoˉvaˬ ve kanˉ maˇ maˇ te gaˇ leh yawˇ hkʼaˬ hkʼe ma daꞈ ve dawˇ nyi˗oˬ laˇ? Nawˬ chi hkʼe te gʼa tuˬ aˬ htoꞈ ma ga laˇ ve dawˇ nyi sheˍ.

12. Yaˬhoˉvaˬ htaꞈ gʼaˇ va ve chaw yawˇ aˬ htoꞈ ma ve ka tiꞈ te taˍ laˇ ve le?

¹² Yaˬhoˉvaˬ htaꞈ gʼaˇ va tuˬ te jawˬ ve. Ngaˬ hui Yaˬhoˉvaˬ htaꞈ gʼaˇ va leh yawˇ ve kanˉ te gʼa ve hkʼe  maˇ maˇ te ve kʼo, yawˇ awˬ bon maˇ maˇ naꞈ laˇ tuˬ yoˬ tehꞈ ka tiꞈ te taˍ laˇ ve yoˬ. (Maˍlaˍhkiˆ 3:10) Koˬlam˗biˬ˗a mvuhˇ miˬ lo chehˇ ve awˬ viˉ awˬ nyi yaˇ miˇ Fa˗bi˗o˗laˇ meh ve Yaˬhoˉvaˬ ka tiꞈ te taˍ ve hkʼe gʼaꞈ te ve htaꞈ yawˇ gʼa mawˬ ve yoˬ. Baˆtiˆsaˬ haꞈ yuˬ peuˬ hkʼawꞈ nawˉ, yawˇ hkʼaˬ htaˆ kaꞈ gʼuˇ suhˍ peuˍ ve haˆ te gaˇ ve yoˬ. Yaꞈ hkʼaˇ, yawˇ yaˇ 3 gʼaˇ htaꞈ hu tuˬ kanˉ kaꞈ gʼa te ve yoˬ. Yawˇ a shaꞈ gaˬ leh kanˉ maˇ te˗o htaˇ, chi htaꞈ caˉ daꞈ ve yawˇ bon gʼaˇ hteꞈ lawˬ ve yoˬ. Fa˗bi˗o˗laˇ kʼoˆ ve, “maˇ˗awˍ ve kʼo, a shaꞈ gaˬ leh kanˉ maˇ te˗o htaˇ hpu gʼa tuˬ awˬ hkʼaˇ laiˉ ceuˬ gu peuˬ hkʼawꞈ nawˉ hpu gʼa tuˬ awˬ yanˇ gʼa yehˇ maw jaˇ. Yaꞈ hkʼaˇ, ngaˬ awˬ pon 1 ha pa ceh tiˉ kaꞈ gʼa˗oˬ. Chi anˇ tuˬ hkʼe hpehꞈ ve yoˬ.” 2 ha pa peuˬ hkʼawꞈ nawˉ, yawˇ gʼuˇ suhˍ peuˍ ve tanˬ te ve yoˬ. Chi teˇ hkui yawˇ 70 hkʼawꞈ hpaˆ˗oˬ leh gʼuˇ suhˍ peuˍ ve kaꞈ 20 hkʼawꞈ hpaˆ te˗oˬ. Yawˇ 8 gʼaˇ htaꞈ ga piˇ leh Baˆtiˆsaˬ haꞈ yuˬ ve yoˬ. Yawˇ kʼoˆ ve, “teˇ nyi nyi kʼo ngaˬ heuˬ jaˇ ve htawˇ, ngaˬ dawˇ taˍ ve hkʼe te gʼa tuˬ Yaˬhoˉvaˬ ga laˇ leh gʼuˇ suhˍ peuˍ ve te gʼa sheˍ ve yoˬ.”

13-14. Ngaˬ hui Yaˬhoˉvaˬ htaꞈ gʼaˇ va leh yawˇ ve kanˉ maˇ maˇ te tuˬ a shu ve awˬ lawn maˍ laˇ ve le?

¹³ Yaˬhoˉvaˬ htaꞈ gʼaˇ va ve chaw ve awˬ lawn maˍ laˇ ve. Liꞈ hpu hkʼaw Yaˬhoˉvaˬ ve kanˉ maˇ maˇ te ve laiˉ gʼaˇ ve awˬ lawn cawˬ ve yoˬ. Yaˬhoˉvaˬ yawˇ hui htaꞈ awˬ bon maˇ naꞈ piˇ sheˍ htaˇ, yawˇ hui Gʼuiˬ sha htaꞈ gʼaˇ va ve tehꞈ hpeuꞈ maw piˇ tuˬ, teˇ ceuˬ ceuˬ gʼa te ve ngaˬ hui laiˉ pawˆ mawˬ ve yoˬ. Tawˇ pa haˉ te kʼo, Aˍbraˍhanˍ Yaˬhoˉvaˬ hkawˇ na yuˬ leh ‘yawˇ htaꞈ hkʼaˬ kaˬ lo kʼai tcuh tuˬ maˇ shiˍ ve htawˇ, na yuˬ leh kʼai ve’ pa taw, awˬ bon naꞈ piˇ ve yoˬ. (Heˍbrehˇ 11:8) Yaˍkoˆ Yaˬhoˉvaˬ geh awˬ bon gʼa tuˬ, mvuhˇ naw ma tcuh yaˇ htaꞈ awˉ lawˉ gʼa pehˇ daꞈ sheˍ ve yoˬ. (Awˬ hkuiˉ puiˍ 32:24-30) Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ lo kʼai tuˬ, paw hkuˇ teˇ hpaˍ Yawˇdanˍ iˉ kaˆ lawˬ hkʼaw awˉ  lawˉ hkanˍ kʼai leh iˉ kaˆ feˍ˗oˬ htaˇ, mvuhˇ miˬ yaˇ htaꞈ juˇ kʼai tcuh ve yoˬ.

¹⁴ Chi beuꞈ teˇ co˗e Yaˬhoˉvaˬ htaꞈ gʼaˇ va ve awˬ viˉ awˬ nyi ve awˬ lawn nawˬ htaꞈ maˍ laˇ gʼa leh Yaˬhoˉvaˬ ve kanˉ maˇ maˇ te gʼa ve yoˬ. Tawˇ pa haˉ te kʼo, awˬ viˉ awˬ nyi Hpeh˗hton leh Di˗aˉnaˆ yawˇ huiˉ maˬ awˬ viˉ awˬ nyi Gʼuiˬ sha ve kanˉ maˇ maˇ te gaˇ ve awˬ lawn gʼaw ve dawˇ cawˇ ve yoˬ. Laiˉ lawn cawˬ ve awˬ meh lehˬ * “yawˇ hui awˬ nu ve teˇ kaˬ lo ha lehˬ ha kʼa Gʼuiˬ sha ve kanˉ te ve” yoˬ. Hpeh˗hton kʼoˆ ve, “awˬ viˉ awˬ nyi ve hpehꞈ laˬ jaw ve awˬ lawn gʼaw htaˇ, yawˇ hui awˬ chiˇ mehˬ jaˇ ve htaꞈ caˇ chehˇ ve, ngaˬ hui nyi chehˇ ve htaꞈ shuˍ ve yoˬ. Ngaˬ hui yawˇ hui htaꞈ nyi htaˇ, Yaˬhoˉvaˬ hkʼaˬ ma daꞈ jaˇ ve htaꞈ dawˇ nyi gaˇ ve yoˬ.” Awˬ leh meuˇ Hpeh˗hton leh Di˗aˉnaˆ kaꞈ Gʼuiˬ sha ve kanˉ te ve loˍ jaˇ kuiˬ lo kʼai ve yoˬ. Laiˉ lawn cawˬ ve chi htaꞈ nawˬ gʼa gʼaw˗oˬ laˇ? Vehˆsaiˉ jw.org VDO hkʼaw Awˆsuh˗teˇriˇaˇ vuiˇ jaˇ kuiˬ awˬ ti lo hto toˇ ve leh Aiˍreˍlanˍ vuiˇ jaˇ kuiˬ awˬ ti lo hto toˇ ve nawˬ gʼa nyi jaw˗oˬ laˇ? Chi nawˬ Gʼuiˬ sha ve kanˉ maˇ maˇ te tuˬ, hkʼaˬ hkʼe gʼa te cawˇ ve shiˍ tuˬ ga laˇ ve yoˬ.

15. Daꞈ ve awˬ chawˇ leuˆ ve ngaˬ hui htaꞈ hkʼaˬ hkʼe ga laˇ ve le?

¹⁵ Gʼuiˬ sha ve kanˉ maˇ maˇ te tuˬ awˬ gʼaˇ peꞈ laˇ ve chaw htaꞈ awˬ chawˇ te ve. Ngaˬ hui maˇ caˇ jaw ve awˬ chiˇ awˬ nu ve chaw caˇ chehˇ ve htaꞈ ngaˬ hui mawˬ htaˇ, yawˇ caˇ mehˬ jaˇ ve pa taw ngaˬ hui kaꞈ caˇ gaˇ ve yoˬ. A shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve chaw geh ngaˬ hui awˬ chawˇ te ve kʼo, ngaˬ hui kaꞈ Yaˬhoˉvaˬ ve kanˉ maˇ maˇ te gaˇ tuˬ yoˬ. Awˬ hpawˇ awˬ miˇ ma teˇ ca Hkeh leh Ve˗lo˗ne˗kaˇ kaꞈ chi hkʼe dawˇ ve yoˬ. Hkeh kʼoˆ ve, “awˬ chawˇ leh yehˬ kʼa hkʼaw ve chaw ngaˬ hui Gʼuiˬ sha ve kanˉ awˬ nu ve awˬ hkʼaˇ te nyi tuˬ awˬ gʼaˇ peꞈ laˇ ve yoˬ. A shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve chaw geh ngaˬ hui awˬ chawˇ te ve kʼo, awˬ hkʼaˇ awˬ suhˉ awˬ suhˉ te gʼa tuˬ tehꞈ ngaˬ hui yonˍ gʼa ve yoˬ.” Hkeh leh Ve˗lo˗ne˗kaˇ chi teˇ hkui Seuˉbiˇaˇ mvuhˇ miˬ lo tcuh peu ve gʼuˇ suhˍ peuˍ ve te chehˇ ve yoˬ.

16. Luˉkaꞈ liꞈ 12:16-21 hkʼaw Yeˍsuˆ tawˇ pa haˉ tehˆ maˍ laˇ ve hkʼe, ngaˬ hui ha lehˬ ha kʼa te gaˇ tuˬ aˬ htoꞈ ma te laˇ ve le?

¹⁶ Yaˬhoˉvaˬ awˬ pon awˬ yanˇ yuˬ tanˇ ve. Yaˬhoˉvaˬ nyi hkʼaˇ suh ve te piˇ tuˬ, ngaˬ hui dawˇ cawˇ ve teˇ ceuˬ le le maˇ te gʼa˗o ve maˇ heˆ. (Cuˇ yiˍ piˇ ve 5:19, 20) Yaꞈ hkʼaˇ, ngaˬ hui dawˇ cawˇ ve awˬ ceuˬ htaꞈ te gaˇ jaˇ ve kʼo, Yaˬhoˉvaˬ ve kanˉ maˇ maˇ maˇ te tuˬ leuˆ yuˬ ve yoˬ. Yeˍsuˆ tawˇ pa haˉ tehˆ maˍ laˇ ve hkʼaw a shaꞈ teꞈ hkʼaˇ hpehꞈ sha gaˇ leh, Gʼuiˬ sha htaꞈ a yeˇ maˇ yuˬ ve hawˉ hkʼaˆ teˇ gʼaˇ hkʼa shuˍ, ngaˬ hui kaꞈ hpehꞈ gʼa ve yoˬ hehˉ. (Luˉkaꞈ 12:16-21 gʼaw sheˍ.) Hpaˉlanˍ mvuhˇ miˬ lo chehˇ ve awˬ viˉ awˬ nyi teˇ gʼaˇ Hkriˇshaˍtiˍ kʼoˆ ve, “ngaˬ ve awˬ yanˇ leh awˬ gʼaˇ awˬ shaˉ Yaˬhoˉvaˬ leh yehˬ kʼa hkʼaw ve chaw htaꞈ a yeˇ hkʼa dehꞈ maˇ te piˇ.” Hkʼe te leh, yawˇ leh awˬ miˇ ma gʼuˇ suhˍ peuˍ ve te tuˬ dawˇ cheˆ ve yoˬ. Yaꞈ hkʼaˇ, chi hkʼe te gʼa tuˬ kanˉ lawˬ tawˆ˗e leh a shu yawˇ awˬ to hu gʼa tuˬ, daꞈ kehˬ tuˬ kanˉ te kuiˬ yehˬ ehˉ hpaw leh yawˇ hui hpu pehˇ yehˇ ve yoˬ. Yawˇ hui yuˬ tanˇ ve awˬ hpfuhˇ hkʼawꞈ˗aw laˇ? Hkriˇshaˍtiˍ kʼoˆ ve, “Gʼuiˬ sha ve kanˉ te ve hkʼaw ngaˬ hui ha lehˬ jaˇ leh, ngaˬ hui ca kʼawꞈ guiˇ˗e ve chaw leh Liꞈ hpu henˇ ve chaw Yaˬhoˉvaˬ ve awˬ lawn henˇ ve ngaˬ hui gʼa mawˬ htaˇ ha lehˬ jaˇ.”

17. Gʼuiˬ sha ve kanˉ awˬ hkʼaˇ awˬ suhˉ awˬ suhˉ ngaˬ hui maˇ te gaˇ tuˬ aˬ htoꞈ ma te laˇ ve le?

¹⁷ Gʼuiˬ sha ve kanˉ awˬ hkʼaˇ awˬ suhˉ awˬ suhˉ te nyi ve. (Tcuh yaˇ 17:16, 17; 20:20, 21) Aˍmeˬriˆkaꞈ mvuhˇ miˬ lo gʼuˇ suhˍ peuˍ ve te ve Cha˗lawꞈ a naˍ 19 ve awˬ yanˇ yawˇ Gʼuiˬ sha ve kanˉ te ve awˬ hkʼaˇ gʼa kʼawꞈ pa ve yoˬ. Awˉ lawˉ htaˇ tawˇ yaw tuˬ awˬ hkʼeun yehˇ leh hto toˇ ve yawˇ maˇ te gaˇ. Yaꞈ hkʼaˇ, toˇ nyi shehˍ hpaˇ guiˇ la ve awˬ yanˇ  yawˇ gʼa henˇ ve awˬ hkʼaˇ, yawˇ tawˇ yaw tuˬ awˬ hkʼeun yehˇ leh hto toˇ ve hkʼaˬ htaˆ kaꞈ te ve yoˬ. Cha˗lawꞈ kʼoˆ ve, “awˉ lawˉ htaˇ ngaˬ kawˆ jaˇ. Chi teˇ hkui tawˇ yaw tuˬ awˬ hkʼeun yehˇ leh hto toˇ ve ngaˬ dawˇ cawˇ jaˇ. Teˇ yehˬ peuˬ teˇ yehˬ hto toˇ htaˇ ve aꞈ kehˉ kaꞈ chi teˇ hkui ngaˬ shu geh gʼa yaw daꞈ jaˇ.”

18. Ngaˬ hui Gʼuiˬ sha ve kanˉ maˇ maˇ te leh shoꞈ shaꞈ ve gʼa hpuˇ htaˇ, aˬ htoꞈ ma ga laˇ ve le?

¹⁸ Awˬ hkʼaˇ gu leh gʼaꞈ te ve. Ngaˬ hui shoꞈ shaꞈ ve gʼa hpuˇ htaˇ, bon lawˬ leh shoꞈ shaꞈ ve htaꞈ hkʼaˬ hkʼe gu tuˬ hkʼa dehꞈ gʼa dawˇ cheˆ ve yoˬ. (Tawˇ naˉ ve 3:21) Uˉyawˉpaˆ miˬ guiˬ lo Ro˗ma˗ne chaw ceuˬ tawˇ hkawˇ awˬ moˍ hkʼaw chehˇ ve Sha˗yanˉ kʼoˆ ve, “ngaˬ dawˇ teh taˍ ve awˬ ceuˬ liꞈ kʼoˆ hkʼaw bvuhꞈ keu leh mawˬ sha kuiˬ awˬ ti lo nehˉ taˍ ve yoˬ. Ngaˬ ve hpui lawˇ hkʼoˆ yaꞈ kʼaw ceh daꞈ ve awˬ han nehˉ taˍ ve yoˬ. Ngaˬ dawˇ cheˆ ve teˇ pawˆ le le awˬ han oˇ ve htaꞈ nyi leh, ngaˬ htaꞈ yaꞈ kʼaw hkʼaˬ ve teˇ caˆ lo shiˍ kʼai laˇ tuˬ, ngaˬ hkʼa dehꞈ dawˇ cheˆ ve yoˬ.” Chi hkʼoˆ kaꞈ, Sha˗yanˉ shoꞈ shaꞈ ve gʼa hpuˇ htaˇ daꞈ ve htaꞈ dawˇ nyi ve yoˬ. Yawˇ kʼoˆ ve, “ngaˬ a shaꞈ teꞈ kuiˬ hkʼaw aˬ htoꞈ ma gʼa hpuˇ ve kaꞈ ngaˬ dawˇ ve htaꞈ cawˬ ve yoˬ. Chi ve ngaˬ htaꞈ tawˍ laˇ taˍ ve gʼoꞈ pa ko taˍ ve htaꞈ shuˍ leh, dawˇ teh taˍ ve awˬ ti lo gaˬ tuˬ, coˬ tcuhˉ laˇ ve htaꞈ shuˍ ve tehꞈ ngaˬ dawˇ ve yoˬ.”

19. Ngaˬ hui aˬ htoꞈ ma te tuˬ dawˇ teh taˍ ve le?

¹⁹ Yaˬhoˉvaˬ ngaˬ hui htaꞈ daꞈ ve awˬ ceuˬ laiˉ ceuˬ peꞈ laˇ ve yoˬ. Yaˬhoˉvaˬ chiˇ uiˍ chiˇ mvuh ve gʼa tuˬ, yawˇ te laˇ ve htaꞈ ngaˬ hui awˬ bon uiˍ jaˇ tehꞈ hpeuꞈ maw piˇ tuˬ, ngaˬ hui te gʼa ve hkʼe te ve yoˬ. (Heˍbrehˇ 13:15) Ngaˬ hui te gʼa ve teˇ ceuˬ lehˬ, Gʼuiˬ sha ve kanˉ maˇ maˇ te gʼa tuˬ awˬ hkʼaˇ awˬ suhˉ awˬ suhˉ te nyi ve yoˬ. Chi ngaˬ hui Yaˬhoˉvaˬ geh daꞈ ve awˬ ceuˬ maˇ maˇ gʼa tuˬ te laˇ ve yoˬ. Teˇ nyi le le Gʼuiˬ sha hkʼaˬ ma daꞈ jaˇ ve awˬ lawn nawˬ hkʼaˇ nawˬ dawˇ nyi˗o. “Ngaˬ htaꞈ peu laˇ shehˍ hpaˇ ve a loˍ htaꞈ te leh, yawˇ ve kanˉ htaꞈ te peuˬ tuˬ ve lehˬ, ngaˬ ve caˇ tuˬ hpehꞈ ve yoˬ” tehꞈ Yeˍsuˆ kʼoˆ ve hkʼe ngaˬ hui kaꞈ kʼoˆ gʼa ve yoˬ.—Yoˇhanˬ 4:34.