AWˬ LAWN 36
Aˍmaˍgeˍdonˍ lehˬ daꞈ ve awˬ lawn hpehꞈ ve!
“Awˬ ha oˇ ve teˇ hpaˍ lehˬ, hkunˉ hawˉ hkanˇ teˇ hpaˍ htaꞈ Aˍmaˍgeˍdonˍ meh ve chehˇ kuiˬ lo hpawnˬ daꞈ piˇ lawˬ ve yoˬ.”—HPEUꞈ MAˍ VE 16:16.
KʼA MUIˬ HKAWˇ 150 Ngaˬ hui ponˬ gʼa tuˬ, Gʼuiˬ sha hpawˇ chehˇ˗oˆ
HENˇ TUˬ VE TEˇ HPAˍ *
1-2. (a) Aˬ htoꞈ ma te Aˍmaˍgeˍdonˍ chaw yaˇ awˬ pon daꞈ ve awˬ lawn hpehꞈ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
Chaw yaˇ “Aˍmaˍgeˍdonˍ” htaꞈ maꞈ aˬ miˍ shiˍ lonˉ leh mvuhˇ naw ma hkʼoˆ ce la ve haˉ pui shiˍ lonˉ miˬ guiˬ htaꞈ guˆ ve tehꞈ kʼoˆ ve nawˬ gʼa kaˇ jaw˗aw laˇ? Chi Liꞈ hpu hkʼaw maˇ hawˍ daꞈ. Liꞈ hpu hkʼaw kʼoˆ ve Aˍmaˍgeˍdonˍ ngaˬ hui ha lehˬ tuˬ te laˇ ve yoˬ! (Hpeuꞈ maˍ ve 1:3) Chi chaw yaˇ htaꞈ te luˬ ve maˇ heˆ, gʼa ponˬ tuˬ yoˬ. Hpehꞈ gʼa˗aw laˇ?
2 Liꞈ hpu hkʼaw kʼoˆ ve Aˍmaˍgeˍdonˍ gaˬ la htaˇ, chaw yaˇ uˉ peunˍ ve te luˬ taˍ ve htaꞈ kʼawꞈ gu te ve, haiˬ ve chaw htaꞈ te luˬ leh daꞈ ve chaw htaꞈ ga piˇ ve, miˬ guiˬ htaꞈ maˇ gʼa te luˬ tuˬ haꞈ shaˉ laˇ tuˬ yoˬ. (Hpeuꞈ maˍ ve 11:18) Awˬ lawn chi hkʼa dehꞈ na gʼa tuˬ 4 maˬ teˇ geh henˇ tuˬ yoˬ. Aˍmaˍgeˍdonˍ aˬ htoꞈ ma le? Chi maˇ hpehꞈ la sheˍ htaˇ awˬ heˆ teˇ hpaˍ hkʼaˬ hkʼe hpehꞈ la tuˬ le? Aˍmaˍgeˍdonˍ gʼa ponˬ ve awˬ moˍ hkʼaw ngaˬ hui teˇ gʼaˇ hpehꞈ tuˬ hkʼaˬ hkʼe gʼa te cawˇ ve le? Aˍmaˍgeˍdonˍ gaˬ la paˇ neˇ htaˇ, hkʼaˬ hkʼe te leh ngaˬ hui Yaˬhoˉvaˬ htaꞈ ka tiꞈ yeˬ gʼa tuˬ le?
AˍMAˍGEˍDONˍ Aˬ HTOꞈ MA LE?
3. (a) “Aˍmaˍgeˍdonˍ” aˬ htoꞈ ma le? (b) Hpeuꞈ maˍ ve liꞈ 16:14, 16 hkʼaw kʼoˆ taˍ ve hkʼe, Aˍmaˍgeˍdonˍ lehˬ awˬ ti awˬ tehˬ cawˬ ve maˇ heˆ tehꞈ aˬ htoꞈ ma te ngaˬ hui shiˍ gʼa ve le?
3 Hpeuꞈ maˍ ve liꞈ 16:14, 16 gʼaw sheˍ. “Aˍmaˍgeˍdonˍ” Liꞈ hpu hkʼaw teˇ pawˆ tiˉ cawˬ ve yoˬ. Chi lehˬ Heˍbrehˇ hkawˇ kʼo “Mehˆgiˇdoˍ hkʼaw” htaꞈ kʼoˆ ve yoˬ. (Hpeuꞈ maˍ ve 16:16) Mehˆgiˇdoˍ Iˉsaˍreˍlaˆ mvuhˇ miˬ hkʼaw ve awˬ meh teˇ meh hpehꞈ ve yoˬ. (Yawˇsuˆ 17:11) Aˍmaˍgeˍdonˍ miˬ guiˬ hkʼoˆ lo awˬ ti awˬ tehˬ maˇ cawˬ. Chi lehˬ Yaˬhoˉvaˬ htaꞈ tawˍ piˇ tuˬ “miˬ guiˬ hkʼoˆ teˇ kaˬ le le lo chehˇ ve hkunˉ hawˉ hkanˇ teˇ hpaˍ” hpawnˬ daꞈ piˇ lawˬ ve htaꞈ kʼoˆ gaˇ ve yoˬ. (Hpeuꞈ maˍ ve 16:14) Yaꞈ hkʼaˇ, henˇ tuˬ ve awˬ lawn chi ve hkʼaw Aˍmaˍgeˍdonˍ lehˬ hkunˉ hawˉ hkanˇ teˇ hpaˍ hpawnˬ daꞈ piˇ lawˬ peuˬ hkʼawꞈ nawˉ Gʼuiˬ sha ve maꞈ uiˍ jaˇ ve awˬ nyi htaꞈ kaꞈ kʼoˆ gaˇ ve yoˬ. Awˬ tehˬ ve awˬ ti maˇ heˆ tehꞈ hkʼaˬ hkʼe te shiˍ gʼa ve le? Awˉ lawˉ teˇ hkʼaˇ lehˬ, Mehˆgiˇdoˍ hkʼaw awˬ tehˬ maˇ cawˬ. Nyiˇ hkʼaˇ lehˬ Mehˆgiˇdoˍ hkʼaw awˬ paˇ lo jawˇ mawˇ teˇ hpaˍ leh laꞈ caˉ shaw hpoˆ kuiˬ awˬ ti maˇ uiˍ. Shehˆ hkʼaˇ lehˬ “jawˇ mawˇ” teˇ hpaˍ Gʼuiˬ sha ve chaw miˬ guiˬ hkʼoˆ lo chehˇ ve htaꞈ ca yaꞈ la htaˇ, Aˍmaˍgeˍdonˍ tanˬ tuˬ yoˬ.
4. Aˬ htoꞈ ma te Gʼuiˬ sha lehˬ maꞈ uiˍ jaˇ ve awˬ leh meuˇ teˇ pawˆ htaꞈ Aˍmaˍgeˍdonˍ tehꞈ kʼoˆ ve le?
4 Aˬ htoꞈ ma te maꞈ uiˍ jaˇ ve awˬ leh meuˇ teˇ pawˆ Mehˆgiˇdoˍ htaꞈ caˉ daꞈ ve le? Liꞈ hpu ve awˬ co˗e htaˇ, Mehˆgiˇdoˍ venˇ leh Yeˍsaˍreˍlaˆ lawˬ hkʼoꞈ lo laiˉ pawˆ bawˆ daꞈ ve yoˬ. Oˇ kaˬ lo Yaˬhoˉvaˬ yawˇ ve chaw htaꞈ ga piˇ jaw ve yoˬ. Tawˇ pa haˉ te kʼo, suhˉ jehˬ paˍ Baˍrehˆ Iˉsaˍreˍlaˆ chaw Hkaˍnanˍ chaw ve maꞈ awˬ hoˉ Siˇsaˍraˆ htaꞈ gʼaˇ tuˬ, Gʼuiˬ sha “Mehˆgiˇdoˍ iˉ kaˆ lawˬ” htaꞈ cuˇ ve yoˬ. Baˍrehˆ leh tcuh kaˍ maˍ Deˍboˇraˍ Yaˬhoˉvaˬ anˇ tuˬ te leh ga piˇ ve htaꞈ awˬ bon uiˍ jaˇ kʼoˆ ve yoˬ. Yawˇ hui kʼa muiˬ hkawˇ kʼa ve, ‘meuꞈ keu shiˍ teˇ hpaˍ htawˇ, mvuhˇ naw ma hkʼoˆ lo chehˇ leh Siˇsaˍraˆ htaꞈ maꞈ bawˆ ve yoˬ. Kiˇshonˍ iˉ kaˆ lawˬ lehˬ, yawˇ hui htaꞈ te luˬ piˇ ve yoˬ.’—Suhˉ jehˬ ve 5:19-21.
5. Aˍmaˍgeˍdonˍ leh Baˍrehˆ ve awˬ co˗e htaˇ maꞈ hkʼaˬ hkʼe peun daꞈ ve le?
5 Baˍrehˆ leh Deˍboˇraˍ kʼa muiˬ hkawˇ kʼa ve, “[Yaˬhoˉvaˬ]˗oˬ, nawˬ ve canˇ paˍ hkʼa peu˗eˬ suh˗e peuˬ piˇ˗oˆ. Yaꞈ hkʼaˇ, nawˬ ve awˬ chawˇ teˇ hpaˍ lehˬ, mvuhˇ nyi hkʼa shuˍ awˬ gʼeuˆ ba chehˇ piˇ˗oˆ.” (Suhˉ jehˬ ve 5:31) Aˍmaˍgeˍdonˍ hkʼaw Yaˬhoˉvaˬ ve canˇ paˍ htaꞈ te luˬ leh yawˇ htaꞈ haꞈ ve chaw ponˬ piˇ tuˬ yoˬ. Baˍrehˆ ve awˬ co˗e htaˇ maꞈ bawˆ ve leh Aˍmaˍgeˍdonˍ peun daꞈ jaˇ. Maꞈ chi ve hkʼaw Yaˬhoˉvaˬ ve chaw maˇ gʼa bawˆ. Yawˇ hui laꞈ caˉ kaꞈ maˇ cawˬ. Yaˬhoˉvaˬ leh mvuhˇ naw ma tcuh yaˇ htaꞈ gʼaˇ va ve pa taw, “awˬ gʼaˇ kʼawꞈ cawˬ la leh gawˬ lehˍ gʼa chehˇ tuˬ yoˬ.”—Iˉsaˍyaˆ 30:15; Hpeuꞈ maˍ ve 19:11-15.
6. Yaˬhoˉvaˬ ve canˇ paˍ htaꞈ Aˍmaˍgeˍdonˍ hkʼaw hkʼaˬ hkʼe te luˬ piˇ tuˬ le?
6 Gʼuiˬ sha ve canˇ paˍ htaꞈ Aˍmaˍgeˍdonˍ hkʼaw hkʼaˬ hkʼe te luˬ piˇ tuˬ le? Yawˇ laiˉ hkʼaˇ yehˇ ve yoˬ. Miˬ hiˆ ve, vaˇ shiˍ ce la ve, leh mvuhˇ htehˆ piˇ ve yoˬ. (Yawˇbaˆ 38:22, 23; Yeˍsaˍkeˍlaˆ 38:19-22) Yawˇ hui hkʼaˇ yawˇ hui tiˇ pehˍ daꞈ tcuh ve yoˬ hehˉ. (2 Raˍsaˍvanˍ 20:17, 22, 23) Maˇ heˆ leh mvuhˇ naw ma tcuh yaˇ haiˬ ve chaw htaꞈ tiˇ pehˍ piˇ ve yoˬ. (Iˉsaˍyaˆ 37:36) Hkʼaˬ hkʼe yehˇ ve htawˇ maˇ kʼoˆ Gʼuiˬ sha gʼaˇ paˍ hpehꞈ ve yoˬ. Yawˇ ve canˇ paˍ htaꞈ te luˬ piˇ leh daꞈ ve chaw htaꞈ ponˬ piˇ tuˬ yoˬ.—Tawˇ naˉ ve 3:25, 26.
AˍMAˍGEˍDONˍ MAˇ HPEHꞈ LA SHEˍ HTAˇ AWˬ HEˆ TEˇ HPAˍ HKʼAˬ HKʼE HPEHꞈ LA TUˬ LE?
7-8. (a) 1 Hteˇsaˍlawˇniˆ liꞈ 5:1-6 hkʼaw mvuhˇ miˬ uˉ peunˍ paˍ teˇ hpaˍ maˇ kaˇ jaw ve awˬ lawn hkʼaˬ hkʼe hto laˇ tuˬ le? (b) Aˬ htoꞈ ma te hto laˇ ve chi kawˆ tuˬ uiˍ jaˇ ve le?
7 ‘Yaˬhoˉvaˬ ve awˬ nyi’ maˇ gaˬ la sheˍ htaˇ ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ’ tehꞈ hto laˇ tuˬ yoˬ. (1 Hteˇsaˍlawˇniˆ 5:1-6 gʼaw sheˍ.) 1 Hteˇsaˍlawˇniˆ liꞈ 5:2 hkʼaw “[Yaˬhoˉvaˬ] ve awˬ nyi” tcuhˉ kuiˬ lehˬ “uiˍ jaˇ ve tuꞈ ve hkanˍ” ve htaꞈ kʼoˆ gaˇ ve yoˬ. (Hpeuꞈ maˍ ve 7:14) Tuꞈ jaˇ hkanˍ jaˇ ve awˬ nyi gaˬ la tuˬ ngaˬ hui hkʼaˬ hkʼe te shiˍ gʼa ve le? Liꞈ hpu hkʼaw kʼoˆ ve tuꞈ jaˇ hkanˍ jaˇ ve awˬ nyi gaˬ la yoˬ te htaˇ, maˇ kaˇ jaw ve awˬ lawn hto laˇ tuˬ yoˬ.
8 “Mvuhˇ miˬ gawˬ la peuˬ leh ngaˬ hui teꞈ chiˉ dawˇ haˍ tuˬ maˇ cawˬ” tehꞈ uˉ peunˍ paˍ teˇ hpaˍ hto laˇ tuˬ yoˬ. Aˬ htoꞈ ma pa taw le? Bon awˬ hoˉ teˇ hpaˍ kaꞈ pawnˇ daꞈ tuˬ ve laˇ? Maˇ shiˍ. Yaꞈ hkʼaˇ, hpehꞈ gʼa ve yoˬ. Hto laˇ ve chi Saˍtanˍ geh laˬ leh heˍ ve tehꞈ ngaˬ hui shiˍ ve yoˬ. Chi kawˆ tuˬ uiˍ jaˇ. Neˇ haiˬ chaw yaˇ kawˆ tuˬ maˇ cawˬ˗oˬ tehꞈ dawˇ tcuh htaˇ, maˇ hpehꞈ la jaw ve tuꞈ jaˇ hkanˍ jaˇ ve laˬ chehˇ ve yoˬ. Oˇ teˇ yanˇ “yaˇ paw tuˬ naˬ ve yaˇ miˇ teˇ gʼaˇ naˬ jaˇ ve htaꞈ gʼa hkanˍ ve hkʼe, luˬ ve sheˆ ve teˇ ceuˬ yawˇ hui awˬ hkʼoˆ teˇ cawˬ haˉ gaˬ la tuˬ yoˬ.” Yaˬhoˉvaˬ htaꞈ ka tiꞈ yeˬ ve chaw hkʼaˬ hkʼe hpehꞈ la tuˬ le? Tuꞈ jaˇ hkanˍ jaˇ ve hkʼaˬ htaˆ tanˬ tuˬ ve ngaˬ hui maˇ shiˍ. Chi hpehꞈ la htaˇ ngaˬ hui anˇ jaˇ. Yaꞈ hkʼaˇ, gu hehnˇ taˍ˗oꞈ.
9. Yaˬhoˉvaˬ Saˍtanˍ ve kanˉ hkʼaˇ htaꞈ teˇ pawˆ tiˉ te luˬ piˇ tuˬ ve laˇ? Kʼoˆ maˍ laˇ sheˍ.
9 Yaˬhoˉvaˬ Noˉaꞈ ve awˬ co˗e htaˇ te luˬ piˇ ve hkʼe, Saˍtanˍ ve awˬ yanˇ htaꞈ teˇ pawˆ tiˉ te luˬ piˇ tuˬ ve maˇ heˆ. Yaꞈ hkʼaˇ, 2 pawˆ te luˬ piˇ tuˬ yoˬ. Awˉ lawˉ teˇ pawˆ Gʼuiˬ sha Baˍbuˍlonˍ htaꞈ te luˬ ve lehˬ maˇ heˆ heˆ ve bon liˇ hkʼa peu˗eˬ htaꞈ yoˬ. Peuˬ leh Aˍmaˍgeˍdonˍ lehˬ Saˍtanˍ ve kanˉ hkʼaˇ leuˉ taˍ ve htaꞈ te luˬ tuˬ yoˬ. Mvuhˇ miˬ, maꞈ yaˇ, tanˇ kaˬ hkʼaˇ hkʼa peu˗eˬ yoˬ. Chi htaꞈ caˉ daꞈ ve a yeˇ uiˍ ve 2 lawn htaꞈ henˇ tuˬ yoˬ.
10. Hpeuꞈ maˍ ve liꞈ 17:1, 6 leh 18:24, hkʼaw kʼoˆ taˍ ve hkʼe, aˬ htoꞈ ma te Yaˬhoˉvaˬ Uiˍ ve Baˍbuˍlonˍ htaꞈ te luˬ piˇ tuˬ le?
10 “Meh maˬ lanˉ lonˉ htaꞈ suhˉ jehˬ” piˇ tuˬ yoˬ. (Hpeuꞈ maˍ ve 17:1, 6; 18:24 gʼaw sheˍ.) Laiˉ gʼaˇ Gʼuiˬ sha ve awˬ meh htaꞈ maˇ yawˆ yan tuˬ Uiˍ ve Baˍbuˍlonˍ venˇ te piˇ ve yoˬ. Gʼuiˬ sha htaꞈ caˉ daꞈ ve neˇ haiˬ heˍ ve yoˬ. Uiˍ ve Baˍbuˍlonˍ venˇ Yaˬhoˉvaˬ htaꞈ ka tiꞈ maˇ yeˬ leh chaw yaˇ uˉ peunˍ ve hpawˇ awˬ gʼaˇ piˇ ve yoˬ. Chi lehˬ Meh maˬ lanˉ lonˉ htaꞈ shuˍ ve yoˬ. Yawˇ hui ve kanˇ paˆ htaꞈ yehˇ leh awˬ moˍ yaˇ hui geh nyiˉ caˇ ve yoˬ. Chi hkʼoˆ kaꞈ Yaˬhoˉvaˬ ve chaw leh, chaw maˇ maˇ htaꞈ suh˗e tuˬ neˇ haiˬ te piˇ ve yoˬ. (Hpeuꞈ maˍ ve 19:2) Gʼuiˬ sha Uiˍ ve Baˍbuˍlonˍ htaꞈ hkʼaˬ hkʼe te luˬ piˇ tuˬ le?
11. Nyiˉ˗ehˍ ve haiˬ ve to nuˇ to shaˆ aˬ htoꞈ ma le? Gʼuiˬ sha yawˇ htaꞈ cuˇ leh Uiˍ ve Baˍbuˍlonˍ venˇ htaꞈ hkʼaˬ hkʼe te luˬ tcuh tuˬ le?
11 Yaˬhoˉvaˬ lehˬ “nyiˉ˗ehˍ ve haiˬ ve to nuˇ to shaˆ” ve “awˬ hkaw teˇ chi maˬ” cawˬ ve htaꞈ cuˇ leh “meh maˬ lanˉ lonˉ” htaꞈ te luˬ tuˬ yoˬ. Haiˬ ve to nuˇ to shaˆ chi lehˬ Mvuhˇ miˬ Awˬ moˍ lonˉ (United Nations) htaꞈ kʼoˆ gaˇ ve yoˬ. Awˬ hkaw teˇ chi maˬ lehˬ awˬ moˍ chi ve htaꞈ awˬ gʼaˇ piˇ ve mvuhˇ miˬ teˇ hpaˍ htaꞈ kʼoˆ gaˇ ve yoˬ. Yaˬhoˉvaˬ tinˍ taˍ ve awˬ nyi gaˬ htaˇ mvuhˇ miˬ teˇ hpaˍ lehˬ Uiˍ ve Baˍbuˍlonˍ venˇ htaꞈ te luˬ tuˬ yoˬ. Yawˇ hui yawˇ ve hpu shi mawˇ jeˬ yuˬ kʼai leh haiˬ ve htaꞈ kʼoˆ tawˆ la leh “yawˇ htaꞈ gawˬ cu gawˬ pehˆ hpehꞈ piˇ lawˬ leh, awˬ kʼu nyi te piˇ tuˬ yoˬ.” (Hpeuꞈ maˍ ve 17:3, 16) Te luˬ ve chi vaiˇ jaˇ leh “teˇ nyi tiˉ awˬ hkʼaw lo” te luˬ tuˬ yoˬ. Maˇ heˆ heˆ ve bon liˇ hpawˇ chehˇ ve cheˆ˗ehꞈ kʼai tuˬ yoˬ. Awˬ lawn kʼo yawˇ hui kʼoˆ maw jaˇ˗oˬ ve, “ngaˬ lehˬ nanˇ hawˉ hkanˇ ma te leh mui chehˇ ve yoˬ. Ngaˬ mehˇ chawˇ ma maˇ heˆ. Dawˇ haˍ ve teˇ ceuˬ htaꞈ ngaˬ a ciˉ kaꞈ gʼa hpuˇ tuˬ maˇ heˆ.”—Hpeuꞈ maˍ ve 18:7, 8.
12. Yaˬhoˉvaˬ mvuhˇ miˬ teˇ hpaˍ htaꞈ aˬ htoꞈ ma maˇ te tcuh ve le? Aˬ htoꞈ ma te yawˇ oˇ hkʼe maˇ te tcuh ve le?
12 Yaˬhoˉvaˬ lehˬ mvuhˇ miˬ teˇ hpaˍ yawˇ ve chaw htaꞈ maˇ te luˬ tcuh. Gʼuiˬ sha ve chaw yawˇ ve awˬ meh htaꞈ gʼa yehˇ leh yawˇ ve tawˇ hkawˇ htaꞈ na yuˬ leh Uiˍ ve Baˍbuˍlonˍ venˇ htaꞈ gʼa tawˆ la ve ha lehˬ jaˇ. (Tcuh yaˇ 15:16, 17; Hpeuꞈ maˍ ve 18:4) Chi hkʼoˆ kaꞈ chaw yaˇ Uiˍ ve Baˍbuˍlonˍ venˇ htaꞈ tawˆ la tuˬ coˇ caˇ jaˇ. Hkʼe te leh Yaˬhoˉvaˬ ve chaw yawˇ hui geh ‘fawˉ mehˍ ve teˇ hpaˍ gʼa hkanˍ tuˬ’ ve maˇ heˆ. Gʼuˇ suhˍ hpawˇ yawˇ hui yeunˇ hkanˍ gʼaˇ tuˬ, yonˍ yeˬ ve gʼa cawˬ ve yoˬ.
13. (a) Gawˇgaˆ a shu le? (b) Yeˍsaˍkeˍlaˆ liꞈ 38:2, 8, 9 hkʼaw kʼoˆ taˍ ve hkʼe, Gawˇgaˆ Gʼuiˬ sha ve chaw htaꞈ bawˆ la tuˬ aˬ htoꞈ ma te piˇ ve le?
13 Gawˇgaˆ bawˆ la tuˬ yoˬ. (Yeˍsaˍkeˍlaˆ 38:2, 8, 9 gʼaw sheˍ.) Maˇ heˆ heˆ ve bon liˇ htaꞈ te luˬ peuˬ hkʼawꞈ nawˉ Yaˬhoˉvaˬ ve chaw ceh leuˉ taˉ tuˬ yoˬ. Suhˆ cehˬ lonˉ mvuhˇ haw lonˉ laˬ leh leuˉ taˉ ve hkʼa shuˍ yoˬ. Saˍtanˍ beuꞈ jaˇ leh “chaꞈ chiˆ ve awˬ han” htaꞈ cuˇ leh dawˇ pawnˍ piˇ ve yoˬ. Chi neˇ teˇ hpaˍ ve awˬ lawn kʼoˆ tawˆ ve yoˬ. Neˇ haiˬ mvuhˇ miˬ teˇ hpaˍ htaꞈ awˬ gʼaˇ piˇ leh Yaˬhoˉvaˬ ve chaw htaꞈ bawˆ tcuh ve yoˬ. (Hpeuꞈ maˍ ve 16:13, 14) Mvuhˇ miˬ teˇ hpaˍ ‘Maˍgawˇgaˆ leh Gawˇgaˆ’ tehꞈ kʼoˆ ve yoˬ. Chi Yaˬhoˉvaˬ ve chaw htaꞈ bawˆ la htaˇ, Aˍmaˍgeˍdonˍ tanˬ tuˬ yoˬ.—Hpeuꞈ maˍ ve 16:16.
Miˬ guiˬ hkʼoˆ Yaˬhoˉvaˬ ve chaw hkʼaˬ kaˬ lo chehˇ ve htawˇ maˇ kʼoˆ canˇ paˍ ca te luˬ la htaˇ yawˇ htaꞈ gʼaˇ va ve (Awˬ tawn 13 nyi sheˍ) *
14. Gawˇgaˆ aˬ htoꞈ ma htaꞈ shiˍ la tuˬ le?
14 Gawˇgaˆ yawˇ hui ve “kanˇ paˆ” leh maꞈ yaˇ htaꞈ gʼaˇ va tuˬ yoˬ. (2 Raˍsaˍvanˍ 32:8) Ngaˬ hui Yaˬhoˉvaˬ htaꞈ gʼaˇ va tuˬ yoˬ. Mvuhˇ miˬ teˇ hpaˍ awˬ pon kʼo, kʼaˍ jaˇ tehꞈ dawˇ ve yoˬ. Aˬ htoꞈ ma te yawˇ hui chi hkʼe dawˇ ve le? Uiˍ ve Baˍbuˍlonˍ venˇ kanˇ paˆ uiˍ jaˇ ve pa taw yoˬ. Yaꞈ hkʼaˇ, “haiˬ ve to nuˇ to shaˆ” leh “awˬ hkaw teˇ chi maˬ” cawˬ ve Uiˍ ve Baˍbuˍlonˍ venˇ htaꞈ ca bawˆ la htaˇ shaˉ hoꞈ teˇ hpaˍ ga piˇ maˇ gʼa! (Hpeuꞈ maˍ ve 17:16) Chi htaꞈ pa taw, Gawˇgaˆ leh mvuhˇ miˬ teˇ hpaˍ ngaˬ hui htaꞈ te luˬ sha jaˇ tehꞈ dawˇ ve yoˬ. Yawˇ hui Yaˬhoˉvaˬ ve chaw htaꞈ “miˬ guiˬ hkʼoˆ lo meuˆ laˬ chehˇ ve mvuhˇ haw mvuhˇ yeˬ lonˉ hkʼa shuˍ” bawˆ la tuˬ yoˬ. (Yeˍsaˍkeˍlaˆ 38:16) Maˇ maw ve awˬ yanˇ yawˇ hui va yaw tuˬ yoˬ. Awˬ tehˬ kʼo, yawˇ hui Hpaˍrawˇ hkʼe hpehꞈ leh, Yaˬhoˉvaˬ htaꞈ bawˆ daꞈ chehˇ ve tehꞈ shiˍ la tuˬ yoˬ.—Tawˆ kʼai ve 14:1-4; Yeˍsaˍkeˍlaˆ 38:3, 4, 18, 21-23.
15. Aˍmaˍgeˍdonˍ hkʼaw Yeˍsuˆ aˬ htoꞈ ma te tuˬ le?
15 Yeˍsuˆ leh yawˇ ve maꞈ yaˇ Yaˬhoˉvaˬ ve chaw htaꞈ haꞈ shaˉ leh Gawˇgaˆ ve awˬ moˍ hkʼa peu˗eˬ htaꞈ te luˬ piˇ tuˬ yoˬ. (Hpeuꞈ maˍ ve 19:11, 14, 15) Yaꞈ hkʼaˇ, Saˍtanˍ mvuhˇ miˬ teˇ hpaˍ htaꞈ heˍ piˇ leh Yaˬhoˉvaˬ ve chaw htaꞈ Aˍmaˍgeˍdonˍ hkʼaw ca bawˆ la htaˇ, Saˍtanˍ hkʼaˬ hkʼe hpehꞈ la tuˬ le? Yeˍsuˆ lehˬ neˇ haiˬ hkʼa peu˗eˬ htaꞈ miˬ kʼoˍ naˉ jaˇ ve hkʼaw baˬ keu tuˬ yoˬ. Yawˇ hui htaꞈ oˇ kaˬ lo teˇ hinˉ hkʼawꞈ haw ti tuˬ yoˬ.—Hpeuꞈ maˍ ve 20:1-3.
AˍMAˍGEˍDONˍ HTAꞈ GʼA PONˬ TUˬ NAWˬ Aˬ HTOꞈ MA GʼA TE CAWˇ VE LE?
16. (a) Ngaˬ hui “Gʼuiˬ sha htaꞈ shiˍ ve” hkʼaˬ hkʼe te hpeuꞈ maw piˇ gʼa tuˬ le? (b) Aˍmaˍgeˍdonˍ hkʼaw Yaˬhoˉvaˬ htaꞈ shiˍ ve chaw hkʼaˬ hkʼe hpehꞈ la tuˬ le?
16 Shaˉhkiˆkanˍ ve chaw hpehꞈ gehˇ sheˍ ve maˇ heˆ leh maw jaˇ˗oˬ ve htawˇ, Aˍmaˍgeˍdonˍ htaꞈ ponˬ gʼa tuˬ ‘Gʼuiˬ sha htaꞈ shiˍ leh Jawˇmawˇ Yeˍsuˆ ve ha lehˬ ve bon hkawˇ htaꞈ na yuˬ ve’ tehꞈ hpeuꞈ maw piˇ cawˇ ve yoˬ. (2 Hteˇsaˍlawˇniˆ 1:7-9) ‘Gʼuiˬ sha htaꞈ shiˍ’ ve lehˬ yawˇ dawˇ cawˇ ve, maˇ dawˇ cawˇ ve leh yawˇ ve awˬ liˇ awˬ hkʼaˇ htaꞈ kaꞈ gʼa shiˍ ve yoˬ. Chi hkʼoˆ kaꞈ ngaˬ hui yawˇ htaꞈ shiˍ leh haꞈ htaˇ, yawˇ hkawˇ na yuˬ ve, yawˇ htaꞈ ceh tiˉ oˉ kʼoˍ pui ve tehꞈ hpeuꞈ maw piˇ ve yoˬ. (1 Yoˇhanˬ 2:3-5; 5:3) Ngaˬ hui Gʼuiˬ sha htaꞈ shiˍ htaˇ ‘yawˇ kaꞈ ngaˬ hui htaꞈ shiˍ ve yoˬ.’ Chi Gʼuiˬ sha ngaˬ hui htaꞈ nyi hkʼaˇ suh ve yoˬ! (1 Kawˇrenˍhtuˆ 8:3) Chi Aˍmaˍgeˍdonˍ htaꞈ ponˬ tuˬ ga laˇ ve yoˬ.
17. ‘Jawˇmawˇ Yeˍsuˆ ve ha lehˬ ve bon hkawˇ htaꞈ na yuˬ ve’ hkʼaˬ hkʼe le?
17 “Jawˇmawˇ Yeˍsuˆ ve ha lehˬ ve bon hkawˇ” yawˇ maˍ ve teˇ ceuˬ le le Liꞈ hpu hkʼaw awˬ tehˬ cawˬ ve yoˬ. Chi ngaˬ hui na yuˬ ve yoˬ. Chi hkʼoˆ kaꞈ, a shaꞈ teꞈ kuiˬ hkʼaw Gʼuiˬ sha ve kanˉ a yeˇ uiˍ jaˇ tehꞈ shawˍ ve, yawˇ ve awˬ liˇ awˬ hkʼaˇ htaꞈ gʼaꞈ te ve, leh Gʼuiˬ sha ve mvuhˇ miˬ hto toˇ ve yoˬ. (Maꞈhtehˍ 6:33; 24:14) Chi hkʼoˆ kaꞈ, na yuˬ ve lehˬ Yeˍsuˆ ve awˬ viˉ awˬ nyi leuˆ yuˬ taˍ ve miˬ guiˬ hkʼoˆ chehˇ htaˇ a yeˇ uiˍ ve awˬ vuiˬ te ve htaꞈ gʼa ga piˇ ve kʼoˆ gaˇ ve yoˬ.—Maꞈhtehˍ 25:31-40.
18. Leuˆ yuˬ taˍ ve chaw “yawˬ oˇ ve teˇ hpaˍ” htaꞈ hkʼaˬ hkʼe ga piˇ tuˬ le?
18 Maˇ maw ve awˬ yanˇ Gʼuiˬ sha leuˆ yuˬ taˍ ve chaw “yawˬ oˇ ve teˇ hpaˍ” htaꞈ ga piˇ tuˬ yoˬ. (Yoˇhanˬ 10:16) Yawˇ hui hkʼaˬ hkʼe te gʼa tuˬ le? Leuˆ yuˬ taˍ ve chaw 144,000 gʼaˇ Aˍmaˍgeˍdonˍ maˇ tanˬ sheˍ htaˇ mvuhˇ naw ma hkʼoˆ hkʼa peu˗eˬ taˆ˗e tuˬ yoˬ. Yawˇ hui mvuhˇ naw ma hkʼoˆ maˇ suh puiˉ ve a shaꞈ gʼa tuˬ yoˬ. Yawˇ hui mvuhˇ naw ma tcuh yaˇ geh teˇ geh Gawˆgaˇ htaꞈ bawˆ leh Yaˬhoˉvaˬ ve “chaw awˬ moˍ lonˉ” htaꞈ haꞈ shaˉ tuˬ yoˬ. (Hpeuꞈ maˍ ve 2:26, 27; 7:9, 10) Chaw awˬ moˍ lonˉ lehˬ Yaˬhoˉvaˬ ve leuˆ yuˬ taˍ ve chaw miˬ guiˬ hkʼoˆ chehˇ sheˍ htaˇ ga piˇ gʼa ve pa taw, chaw awˬ moˍ lonˉ ha lehˬ jaˇ!
AˍMAˍGEˍDONˍ GAˬ LA HTAˇ, HKʼAˬ HKʼE TE NGAˬ HUI YAˬHOˉVAˬ HTAꞈ KA TIꞈ YEˬ GʼA TUˬ LE?
19-20. Aˍmaˍgeˍdonˍ gaˬ la paˇ neˇ htaˇ, ngaˬ hui shoꞈ shaꞈ ve gʼa hpuˇ jaˇ ve htawˇ, hkʼaˬ hkʼe te caˉ leh Yaˬhoˉvaˬ htaꞈ ka tiꞈ yeˬ gʼa tuˬ le?
19 Awˬ leh meuˇ ve awˬ yanˇ Yaˬhoˉvaˬ ve chaw laiˉ gʼaˇ shoꞈ shaꞈ ve gʼa hpuˇ jaˇ. Hkʼaˬ hkʼe hpehꞈ ve htawˇ yeunˇ hkanˍ gʼaˇ ve ha lehˬ jaˇ. (Yaˍkoˆ 1:2-4) Ngaˬ hui htaꞈ ga laˇ gʼa lehˬ nyi ma awˬ tawˍ hkʼa gaˬ bon lawˬ ve yoˬ. (Luˉkaꞈ 21:36) Chi hkʼoˆ kaꞈ ngaˬ hui bon lawˬ ve ceh maˇ heˆ, teˇ nyi le le Liꞈ hpu gʼaw leh hkʼa dehꞈ gʼa dawˇ nyi ve yoˬ. Chi tcuh kaˍ paˍ ve tawˇ hkawˇ ngaˬ hui ve awˬ co˗e hpehꞈ la tuˬ ve htaꞈ kaꞈ yoˬ. (Chiˇ mvuh ve 77:12) Ngaˬ hui co ha hpawˇ uiˍ la mvuh la tuˬ leh dawˇ law kuiˬ yonˍ yeˬ gʼa tuˬ hto toˇ ve kaꞈ ga laˇ gʼa jaˇ!
20 Uiˍ ve Baˍbuˍlonˍ venˇ htaꞈ te luˬ leh Aˍmaˍgeˍdonˍ awˬ leh meuˇ ve htaꞈ nawˬ gʼa mawˬ htaˇ, hkʼaˬ hkʼe taw ha lehˬ ve dawˇ nyi sheˍ. Chi aꞈ kehˉ chaw hkʼa peu˗eˬ Yaˬhoˉvaˬ ve awˬ meh leh yawˇ uˉ peunˍ ve htaꞈ yawˆ yan ve gʼa mawˬ htaˇ, nawˬ hkʼaˬ hkʼe taw ha lehˬ tuˬ ve dawˇ nyi sheˍ! (Yeˍsaˍkeˍlaˆ 38:23) Gʼuiˬ sha htaꞈ shiˍ ve chaw awˬ pon Aˍmaˍgeˍdonˍ lehˬ daꞈ ve awˬ lawn hpehꞈ ve, yawˇ ve Yaˇ paˍ hkawˇ na yuˬ ve, leh awˬ leh meuˇ hkʼa gaˬ yeunˇ hkanˍ sheˍ.—Maꞈhtehˍ 24:13.
KʼA MUIˬ HKAWˇ 143 Kanˉ te ve, shaw nyi ve, law tcuhˉ taˍ sheˍ
^ Yaˬhoˉvaˬ ve chaw Aˍmaˍgeˍdonˍ htaꞈ law maw jaˇ˗oˬ. Aˍmaˍgeˍdonˍ aˬ htoꞈ ma le, Aˍmaˍgeˍdonˍ maˇ gaˬ la sheˍ htaˇ aˬ htoꞈ ma awˬ heˆ hpehꞈ la tuˬ le, awˬ leh meuˇ ve awˬ yanˇ gaˬ la paˇ neˇ htaˇ, hkʼaˬ hkʼe te leh ngaˬ hui Yaˬhoˉvaˬ htaꞈ ka tiꞈ yeˬ gʼa tuˬ awˬ lawn chi ve hkʼaw henˇ tuˬ yoˬ.
^ AWˬ HAN HTAꞈ KʼOˆ MAˍ TAˍ VE: Oˇ ve teˇ yanˇ anˇ lawꞈ lawꞈ ve awˬ heˆ hpehꞈ la tuˬ yoˬ. Ngaˬ hui (1) te gʼa ve hkʼe gʼaˇ hteꞈ hto toˇ ve. (2) Caˉ leh Liꞈ hpu maˍ ve. (3) Yawˇ ngaˬ hui htaꞈ ga laˇ tuˬ yoˬ tehꞈ hkʼaˬ htaˆ kaꞈ gʼaˇ va ve.
^ AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi teˇ yehˬ kʼa htaꞈ taˍ nuꞈ (paˍ leˆ) ca te luˬ la ve htawˇ, yawˇ hui hkʼaˬ hkʼe hpehꞈ tuˬ ve Yeˍsuˆ leh mvuhˇ naw ma tcuh yaˇ shiˍ ve tehꞈ yawˇ hui gʼaˇ va ve.