1. Maꞈhtehˍ liꞈ 11:28-30 hkʼaw kʼoˆ taˍ ve hkʼe, Yeˍsuˆ aˬ htoꞈ ma ve ka tiꞈ te taˍ laˇ ve le?

 Chaw awˬ moˍ lonˉ htaꞈ Yeˍsuˆ daꞈ jaˇ ve ka tiꞈ te piˇ ve yoˬ. Yawˇ kʼoˆ ve, “ngaˬ geh laˬ˗oꞈ. Ngaˬ nawˬ hui htaꞈ gʼaˇ jehˇ piˇ tuˬ yoˬ.” (Maꞈhtehˍ 11:28-30 gʼaw sheˍ.) Chi aˬ hkʼe leˇ ka tiꞈ te taˍ ve maˇ heˆ. Yaˇ miˇ teˇ gʼaˇ naˬ ve htaꞈ pa taw, awˬ yanˇ maw chaweh gʼa tuꞈ gʼa hkanˍ ve Yeˍsuˆ yawˇ htaꞈ hkʼaˬ hkʼe gu na˗e piˇ ve teˇ geh nyi sheˍ.

2. Naˬ chehˇ ve yaˇ miˇ htaꞈ Yeˍsuˆ hkʼaˬ hkʼe gu piˇ ve le?

² Yaˇ miˇ chi ve teˇ gʼaˇ ga laˇ tuˬ htaꞈ loˍ jaˇ. Yawˇ naˆ tsuhˇ shehˍ hpaˇ laiˉ gʼaˇ geh kʼai ve lehˬ yawˇ naˬ ve na˗e tuˬ dawˇ law taˍ ve yoˬ. 12 hkʼawꞈ gʼaˬ˗oˬ ve htawˇ, maˇ na˗e sheˍ. Moˉseˍ ve awˬ liˇ tawˇ hkawˇ lehˬ yawˇ hkʼe ve a naˍ maˇ daꞈ kehˬ tehꞈ shawˍ ve yoˬ. (Oˉ kʼoˍ pui ve 15:25) Yeˍsuˆ chaw naˬ htaꞈ gu na˗e piˇ gʼa ve yawˇ gʼa kaˇ htaˇ, Yeˍsuˆ htaꞈ gʼaꞈ ca ve yoˬ. Yawˇ Yeˍsuˆ htaꞈ mawˬ htaˇ, Yeˍsuˆ ve aˉ poꞈ awˬ caˍ meuˇ htaꞈ htawˇ ve ceh kaꞈ laꞈ haˉ na˗e la ve yoˬ. Yeˍsuˆ yawˇ naˬ ve htaꞈ ceh gu na˗e piˇ ve maˇ heˆ. Yaꞈ hkʼaˇ, Yeˍsuˆ yawˇ htaꞈ te piˇ ve awˬ hkʼaˇ yawˇ htaꞈ haꞈ ve chaw cawˬ sheˍ ve tehꞈ shiˍ tuˬ hpeuꞈ maw piˇ ve yoˬ. Tawˇ pa haˉ te kʼo, Yeˍsuˆ nyi ma nuˇ nehˬ ve hkʼaw “yaˇ miˇ˗oˬ” tehꞈ kʼoˆ piˇ htaˇ, yawˇ awˬ gʼaˇ gʼa leh nyi ma sha jaˇ!—Luˉkaꞈ 8:43-48.

3. Aˬ htoꞈ ma ve na hkawˇ htaꞈ ngaˬ hui gʼa henˇ tuˬ le?

³ Yaˇ miˇ chi te ve htaꞈ chaˬ nyi sheˍ. Yawˇ Yeˍsuˆ “geh laˬ” ve yoˬ. Ngaˬ hui kaꞈ Yeˍsuˆ geh gʼa kʼai ve yoˬ. Chi beuꞈ teˇ co˗e chaw naˬ yawˇ geh laˬ leh anˇ tuˬ te leh maˇ gu na˗e piˇ ve htawˇ, “ngaˬ geh  laˬ˗oꞈ. Ngaˬ nawˬ hui htaꞈ gʼaˇ jehˇ piˇ tuˬ yoˬ” tehꞈ kʼoˆ laˇ ve yoˬ. Ngaˬ hui hkʼaˬ hkʼe te leh Yeˍsuˆ “geh laˬ” gʼa tuˬ le? Yawˇ ve taˆ tuˬ htaꞈ taˆ ve aˬ htoꞈ ma htaꞈ kʼoˆ gaˇ ve le? Yeˍsuˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? Aˬ htoꞈ ma te Yeˍsuˆ ngaˬ hui htaꞈ awˬ vuiˬ peꞈ laˇ taˍ ve nyi ma sha tuˬ te laˇ ve le? Leh ngaˬ hui Yeˍsuˆ ve taˆ tuˬ htaꞈ nyi ma sha ve hkʼaw caˉ leh hkʼaˬ hkʼe te taˆ gʼa tuˬ le? Awˬ lawn chi ve 5 maˬ gʼa henˇ tuˬ yoˬ.

4-5. Hkʼaˬ hkʼe te Yeˍsuˆ “geh laˬ” gʼa tuˬ le?

⁴ Ngaˬ hui Yeˍsuˆ “geh laˬ” gʼa ve awˬ hkʼaˇ teˇ hkʼaˇ lehˬ, yawˇ ve tawˇ hkawˇ leh te hkʼaˇ dawˇ hkʼaˇ htaꞈ henˇ yuˬ ve yoˬ. (Luˉkaꞈ 1:1-4) Chi hkʼe te ve lehˬ ngaˬ hui awˬ tan shu te laˇ maˇ gʼa. A shu yawˇ hkʼaˇ yawˇ gʼa te ve yoˬ. Chi hkʼoˆ kaꞈ ngaˬ hui Baˆtiˆsaˬ haꞈ yuˬ tuˬ dawˇ cheˆ leh Yeˍsuˆ ve awˬ laꞈ gʼawˇ hpehꞈ la tuˬ yawˇ “geh laˬ” gʼa ve yoˬ.

⁵ Ngaˬ hui Yeˍsuˆ “geh laˬ” gʼa ve teˇ hkʼaˇ lehˬ, nyi haꞈ shaˉ paˍ ga laˇ tuˬ lawˬ gʼa ve yoˬ. Yeˍsuˆ ve yawˬ htaꞈ nyi haꞈ shaˉ tuˬ, nyi haꞈ shaˉ paˍ lehˬ “laꞈ shawnˍ” hkʼe hpehꞈ ve yoˬ. (Eˇfeˇsuꞈ 4:7, 8, 11; Yoˇhanˬ 21:16; 1 Peˍtruˆ 5:1-3) Hkʼe te leh yawˇ hui ga laˇ tuˬ lawˬ cawˇ ve yoˬ. Ngaˬ hui aˬ htoꞈ ma loˍ ve leh nyi ma hkʼaw hkʼaˬ hkʼe cawˬ ve nyi haꞈ shaˉ paˍ maˇ shiˍ. Awˬ viˉ awˬ nyi Jun˗linˇ ve awˬ lawn htaꞈ dawˇ nyi sheˍ. Yawˇ kʼoˆ ve, “ngaˬ maˇ chehˇ sha ve pa taw, Beˍteˍlaˆ hkʼaw gʼa tawˆ la ve yoˬ. Ngaˬ htaꞈ nyi haꞈ shaˉ paˍ awˬ gʼaˇ peꞈ laˇ tcuh cawˇ ve tehꞈ awˬ chawˇ kʼoˆ laˇ ve yoˬ. Awˉ lawˉ htaˇ lehˬ ngaˬ loˍ ve tehꞈ maˇ dawˇ jaw. Yaꞈ hkʼaˇ, ngaˬ te peuˬ hkʼawꞈ nawˉ, awˬ gʼaˇ gʼa jaˇ.” Nyi haꞈ shaˉ paˍ 2 gʼaˇ Jun˗linˇ geh guiˇ˗e ve hkʼa shuˍ yoˬ. Ka tiꞈ yeˬ ve nyi haꞈ shaˉ paˍ coˇ caˇ leh ngaˬ hui “Hkriꞈ ve nyi ma” cawˬ tuˬ ga laˇ ve yoˬ. Oˇ ve lehˬ Yeˍsuˆ hkʼaˬ hkʼe dawˇ ve htaꞈ na gʼa leh yawˇ hkʼe dawˇ tuˬ ga laˇ ve yoˬ. (1 Kawˇrenˍhtuˆ 2:16; 1 Peˍtruˆ 2:21) Nyi haꞈ shaˉ paˍ ngaˬ hui htaꞈ ga laˇ htaˇ, daꞈ jaˇ ve laꞈ shawnˍ hkʼe hpehꞈ ve yoˬ.

6. Yeˍsuˆ “ngaˬ ve taˆ tuˬ htaꞈ taˆ” la˗o kʼoˆ ve lehˬ aˬ htoꞈ ma htaꞈ kʼoˆ gaˇ ve le?

⁶ Yeˍsuˆ “ngaˬ ve taˆ tuˬ htaꞈ taˆ” la˗oˬ kʼoˆ ve lehˬ “yawˇ ve kanˇ paˆ awˬ hawˉ lo” chehˇ ve yoˬ. Yawˇ kʼawꞈ kʼoˆ ve, “ngaˬ geh taˆ tuˬ taˆ la˗oˬ, chi hkʼe te ve kʼo, ngaˬ hui teˇ geh Yaˬhoˉvaˬ ve kanˉ te tuˬ yoˬ.” Hkʼaˬ hkʼe hpehꞈ ve htawˇ maˇ kʼoˆ, taˆ tuˬ taˆ ve lehˬ kanˉ te ve htaꞈ caˉ daꞈ ve tehꞈ shiˍ ve yoˬ.

7. Maꞈhtehˍ liꞈ 28:18-20 hkʼaw kʼoˆ taˍ ve hkʼe, ngaˬ hui aˬ htoꞈ ma htaꞈ te tuˬ awˬ vuiˬ gʼa ve le? Aˬ htoꞈ ma awˬ lawn htaꞈ ngaˬ hui yonˍ gʼa ve le?

⁷ Ngaˬ hui Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ htaˇ, Yeˍsuˆ kuˬ laˇ ve htaꞈ haꞈ yuˬ ve yoˬ. Yeˍsuˆ teˇ gʼaˇ le le htaꞈ kuˬ laˇ ve yoˬ. Yaˬhoˉvaˬ ve kanˉ te gaˇ ve chaw htaꞈ Yeˍsuˆ maˇ haꞈ yuˬ piˇ ve maˇ te jaw. (Yoˇhanˬ 6:37, 38) Yeˍsuˆ ve awˬ laꞈ gʼawˇ daꞈ jaˇ ve awˬ vuiˬ cawˬ leh Yaˬhoˉvaˬ Yeˍsuˆ htaꞈ piˇ taˍ ve kanˉ yawˇ hui gʼa te ve yoˬ. Yeˍsuˆ ngaˬ hui htaꞈ ga laˇ ve pa taw, kanˉ chi te gʼa ve yoˬ.—Maꞈhtehˍ 28:18-20 gʼaw sheˍ.

8-9. Aˬ htoꞈ ma te nyi ma nuˇ nehˬ ve chaw Yeˍsuˆ geh laˬ gaˇ ve le? A shu yawˇ awˬ to htaꞈ hkʼaˬ hkʼe na nyi cawˇ ve le?

⁸ Nyi ma nuˇ nehˬ ve chaw Yeˍsuˆ geh laˬ gaˇ ve yoˬ. (Maꞈhtehˍ 19:13, 14; Luˉkaꞈ 7:37, 38) Aˬ htoꞈ ma pa taw le? Hpaˍriˍsehˇ leh bon awˬ hoˉ teˇ hpaˍ, Yeˍsuˆ htaꞈ hkʼaˬ hkʼe peun daꞈ ve teˇ geh nyi sheˍ. Yawˇ hui shu htaꞈ a yeˇ maˇ te leh uiˍ muiˬ caˆ muiˬ jaˇ. (Maꞈhtehˍ 12:9-14) Yaꞈ hkʼaˇ, Yeˍsuˆ nyi ma nuˇ nehˬ jaˇ. Hpaˍriˍsehˇ hui shu mehˆ gʼuˇ suhˍ aˉ yaˇ cawˬ ve htaꞈ dawˇ cawˇ jaˇ. Yaꞈ hkʼaˇ, Yeˍsuˆ kʼoˆ ve chi hkʼe te ve maˇ cawˇ leh awˬ laꞈ gʼawˇ nyi ma nuˇ nehˬ leh shu ve awˬ ceˬ te tuˬ maˍ piˇ ve yoˬ. (Maꞈhtehˍ 23:2, 6-11) Hpaˍriˍsehˇ hui kanˇ paˆ  yehˇ leh shu kawˆ tuˬ nyiˉ piˇ ve dawˇ cawˇ jaˇ. (Yoˇhanˬ 9:13, 22) Yaꞈ hkʼaˇ, Yeˍsuˆ shu htaꞈ daꞈ ve tawˇ yaw piˇ leh haꞈ pehnˇ ve hpeuꞈ maw piˇ ve pa taw shu nyi ma sha jaˇ.

⁹ Nawˬ Yeˍsuˆ htaꞈ henˇ yuˬ chehˇ˗aw laˇ? A shu yawˇ awˬ to htaꞈ na nyi cawˇ ve, ‘ngaˬ nuˇ nehˬ ve chaw hpehꞈ ve tehꞈ shu mawˬ˗aw laˇ? Shu a yeˇ maˇ yuˬ ve kanˉ htaꞈ te piˇ˗aw laˇ? Ngaˬ daꞈ ve tawˇ yaw leh shu htaꞈ daꞈ ve te piˇ˗aw laˇ?’

12-14. Yeˍsuˆ peꞈ laˇ ve awˬ vuiˬ htaꞈ ngaˬ hui te htaˇ, aˬ htoꞈ ma te ngaˬ hui ha lehˬ ve le?

¹² Yeˍsuˆ peꞈ laˇ ve awˬ vuiˬ htaꞈ ngaˬ hui te htaˇ, aˬ htoꞈ ma te ha lehˬ ve le? Ngaˬ hui chi hkʼe dawˇ tuˬ laiˉ ceuˬ te laˇ ve yoˬ. Teˇ ceuˬ ceuˬ htaꞈ nyi sheˍ.

¹³ Ngaˬ hui nyi haꞈ shaˉ paˍ daꞈ jaˇ ve laiˉ gʼaˇ cawˬ ve yoˬ. Yaˬhoˉvaˬ lehˬ uiˍ jaˇ ve nyi haꞈ shaˉ paˍ hpehꞈ ve yoˬ. Yawˇ lehˬ paw leˬ hkuiˬ jaˇ ve hkʼe maˇ heˆ. Yawˇ lehˬ ngaˬ hui kanˉ te ve htaꞈ awˬ hpfuhˇ shiˍ ve yoˬ. (Heˍbrehˇ 6:10) Yawˇ ve kanˉ hkʼa dehꞈ te gʼa tuˬ ngaˬ hui loˍ ve kaꞈ peꞈ laˇ ve yoˬ. (2 Kawˇrenˍhtuˆ 4:7; Gaˍlaˍtiˆ 6:5) Jawˇmawˇ Yeˍsuˆ kaꞈ nyi haꞈ shaˉ paˍ daꞈ jaˇ ve hpehꞈ ve yoˬ. Yawˇ shu htaꞈ te piˇ ve daꞈ jaˇ. (Yoˇhanˬ 13:15) Chi hkʼoˆ kaꞈ Hkriꞈ yaˇ awˬ moˍ hkʼaw ve nyi haꞈ shaˉ paˍ “yawˬ hawˉ shehˍ hpaˇ uiˍ jaˇ ve” Yeˍsuˆ htaꞈ henˇ yuˬ chehˇ ve yoˬ. (Heˍbrehˇ 13:20; 1 Peˍtruˆ 5:2) Nyi haꞈ shaˉ paˍ maˍ laˇ leh ga laˇ htaˇ, yawˇ haꞈ pehnˇ ve, awˬ gʼaˇ peꞈ laˇ ve, leh haꞈ hanˉ ve hpeuꞈ maw laˇ ve yoˬ.

¹⁴ Ngaˬ hui daꞈ jaˇ ve awˬ chawˇ cawˬ ve yoˬ. Miˬ guiˬ hkʼoˆ lo chaw yaˇ dawˇ law kuiˬ daꞈ ve ngaˬ hui hkʼe maˇ cawˬ. Leh ngaˬ hui hkʼe leˇ haꞈ daꞈ ve kaꞈ maˇ cawˬ. Ngaˬ hui awˬ viˉ awˬ nyi pehꞈ ve tzuhˆ ve hpawˇ maˇ te ve chaw geh kanˉ gʼa te ve yoˬ. Yaꞈ hkʼaˇ, yawˇ hui shu aꞈ kehˉ daꞈ ve tehꞈ maˇ dawˇ. Yawˇ hui laiˉ ceuˬ te gʼa ve htawˇ, nyi ma nuˇ nehˬ leh shu aꞈ kehˉ a yeˇ uiˍ ve tehꞈ maˇ shawˍ. Yawˇ hui kanˉ teˇ geh te chehˇ ve chaw ceh maˇ dawˇ. Yaꞈ hkʼaˇ, awˬ tehˬ ve awˬ chawˇ shawˍ ve yoˬ. Yawˇ hui ngaˬ hui htaꞈ haꞈ jaˇ leh hkanˍ suh laˇ gʼa ve yoˬ.

15. Ngaˬ hui te ve kanˉ htaꞈ hkʼaˬ hkʼe dawˇ ve le?

¹⁵ Ngaˬ hui daꞈ jaˇ ve kanˉ cawˬ ve yoˬ. Yaˬhoˉvaˬ ve awˬ tehˬ ve ngaˬ hui chaw yaˇ htaꞈ gʼa maˍ piˇ leh Saˍtanˍ heˍ ve hpeuꞈ maw piˇ ve yoˬ. (Yoˇhanˬ 8:44) Saˍtanˍ chaw yaˇ htaꞈ awˬ vuiˬ taˆ hehnˇ tuˬ te piˇ ve lehˬ chaw yaˇ dawˇ law kuiˬ maˇ cawˬ tuˬ heˍ piˇ ve yoˬ. Tawˇ pa haˉ te kʼo, Yaˬhoˉvaˬ chaw yaˇ htaꞈ venˇ baˆ maˇ hpehˇ laˇ leh haꞈ pehnˇ ve maˇ gʼa keunˍ ve tehꞈ Saˍtanˍ dawˇ tcuh ve yoˬ. Heˍ ve chi  haiˬ jaˇ. Yaꞈ hkʼaˇ, ngaˬ hui Yeˍsuˆ “geh laˬ” htaˇ, ngaˬ hui ve venˇ baˆ awˬ tehˬ hpehˇ laˇ˗oˬ ve tehꞈ shiˍ leh Yaˬhoˉvaˬ ngaˬ hui htaꞈ haꞈ jaˇ. (Roˉmaꞈ 8:32, 38, 39) Chaw yaˇ Yaˬhoˉvaˬ htaꞈ gʼaˇ va tuˬ ngaˬ hui ga piˇ leh yawˇ hui ve a shaꞈ teꞈ hkʼaˇ kaꞈ daꞈ la ve ha lehˬ jaˇ.

16. Yeˍsuˆ ngaˬ hui htaꞈ peꞈ laˇ ve taˆ tuˬ leh awˬ nu ve taˆ tuˬ htaꞈ hkʼaˬ hkʼe peun daꞈ ve le?

¹⁶ Yeˍsuˆ ngaˬ hui htaꞈ peꞈ laˇ ve taˆ tuˬ lehˬ awˬ nu ve taˆ tuˬ htaꞈ maˇ shuˍ. Tawˇ pa haˉ te kʼo, teˇ nyi le le ngaˬ hui kanˉ te peuˬ hkʼawꞈ nawˉ, awˬ gʼaˇ peuˬ ve ceh maˇ heˆ, ha lehˬ kuiˬ kaꞈ maˇ cawˬ. Yaˬhoˉvaˬ leh Yeˍsuˆ ve kanˉ ngaˬ hui te peuˬ hkʼawꞈ nawˉ ha lehˬ jaˇ. Teˇ pawˆ pawˆ ngaˬ hui teˇ nyi mvuhˇ hkʼa hpeuꞈ kanˉ te ve pa taw, mvuhˇ hpeuꞈ la kʼo heuˬ jaˇ ve htawˇ, mvuhˇ hpeuꞈ haˉ hpawnˬ daꞈ ve ngaˬ hui kʼai htaˇ nyi ma sha jaˇ leh awˬ gʼaˇ gʼa jaˇ. Chi ve hkʼa shuˍ ngaˬ hui hto toˇ˗e leh a shu yawˇ hkʼaˇ yawˇ Liꞈ hpu henˇ peuˬ hkʼawꞈ nawˉ nyi ma sha jaˇ!

17. Ngaˬ hui awˬ tehˬ ve htaꞈ hkʼaˬ hkʼe haꞈ yuˬ cawˇ ve le? Ngaˬ hui aˬ htoꞈ ma htaꞈ shaˍ tiꞈ te cawˇ ve le?

¹⁷ Ngaˬ hui ve awˬ gʼaˇ lehˬ peuˬ kuiˬ leh kuiˬ cawˬ ve tehꞈ tawnˇ taˍ cawˇ ve yoˬ. Hkʼe htaꞈ pa taw ngaˬ hui hkʼaˬ hkʼe hpawˇ yehˇ tuˬ hkʼa dehꞈ dawˇ nyi cawˇ ve yoˬ. Tawˇ pa haˉ te kʼo, hpu chi ma ma gʼa tuˬ ngaˬ hui awˬ yanˇ yehˇ maˇ jaˇ. Yaˇ nehˬ hawˉ hkʼaˆ teˇ gʼaˇ paw sha jaˇ ve htaꞈ Yeˍsuˆ tawˇ yaw piˇ ve dawˇ nyi sheˍ. Yawˇ Yeˍsuˆ htaꞈ na piˇ ve, “co tiꞈ ha tiꞈ gʼa tuˬ ngaˬ hkʼaˬ hkʼe gʼa te tuˬ le” hawˉ hkʼaˆ chi ve teˇ gʼaˇ Moˉseˍ ve awˬ liˇ tawˇ hkawˇ htaꞈ gʼaꞈ te˗oˬ leh Maˍkuˆ liꞈ hkʼaw kʼoˆ taˍ ve hkʼe Yeˍsuˆ yawˇ htaꞈ ha kʼaˉ leh yawˇ daꞈ ve chaw gʼa hpehꞈ cawˇ ve tehꞈ dawˇ ve yoˬ. Yeˍsuˆ yawˇ htaꞈ kʼoˆ piˇ ve, “mawˇ jeˬ htaꞈ hawˇ baˬ leh . . . ngaˬ hkʼaˇ suh laˬ˗oꞈ.” Oˇ teˇ yanˇ yawˇ nyi ma luˬ jaˇ. Yawˇ ve “mawˇ jeˬ cawˬ maˇ jaˇ” ve pa taw maˇ baˬ taˉ gaˇ. (Maˍkuˆ 10:17-22) Yawˇ Yeˍsuˆ ve taˆ tuˬ htaꞈ maˇ taˆ gaˇ leh “hpu shi mawˇ jeˬ ve awˬ ceˬ” kʼawꞈ te ve yoˬ. (Maꞈhtehˍ 6:24) Nawˬ hpehꞈ ve kʼo aˬ htoꞈ ma htaꞈ leuˆ tuˬ le?

18. Teˇ hkui teˇ hkui ngaˬ hui aˬ htoꞈ ma htaꞈ chaˬ nyi cawˇ ve le? Aˬ htoꞈ ma pa taw le?

¹⁸ Ngaˬ hui a shaꞈ teꞈ kuiˬ hkʼaw aˬ htoꞈ ma htaꞈ awˉ lawˉ teh cawˇ ve teˇ hkui teˇ hkui gʼa chaˬ nyi cawˇ ve yoˬ. Aˬ htoꞈ ma pa taw le? Ngaˬ hui ve awˬ gʼaˇ cuˇ yiˍ cawˬ ve hkʼaw yehˇ ve tehꞈ yonˍ gʼa tuˬ awˬ pon yoˬ. Yaˇ nehˬ teˇ gʼaˇ Mainˉ ve awˬ lawn htaꞈ chaˬ nyi sheˍ. Yawˇ kʼoˆ ve, “ponˬ laˬ ve laiˉ hkʼawꞈ ngaˬ a shaꞈ teꞈ hkʼaˇ caˇ lawꞈ dawˬ lawꞈ te ve yoˬ. Ngaˬ hpehꞈ sha gaˇ ve pa taw, gʼuˇ suhˍ peuˍ ve te chehˇ ve kaꞈ hpu awˬ lawn teˇ hkui teˇ hkui dawˇ nyi ve yoˬ. Yaꞈ hkʼaˇ, ngaˬ teˇ ceuˬ ceuˬ taˆ leh hehnˇ jaˇ ve htaꞈ shuˍ ve yoˬ. Awˬ yanˇ leh awˬ gʼaˇ ngaˬ loˍ ve htaꞈ awˉ lawˉ teh ve pa taw, Yaˬhoˉvaˬ htaꞈ awˬ yanˇ hkʼa dehꞈ maˇ piˇ ve tehꞈ ngaˬ shiˍ la ve yoˬ.” Mainˉ dawˇ hkʼaˇ pa leh yawˇ ve a shaꞈ teꞈ hkʼaˇ hkʼaw Yaˬhoˉvaˬ ve kanˉ te ve awˬ yanˇ yehˇ maˇ la ve yoˬ. Yawˇ kʼoˆ ve, “teˇ pawˆ pawˆ kʼo ngaˬ hpu awˬ lawn dawˇ haˍ chehˇ sheˍ. Yaꞈ hkʼaˇ, Yaˬhoˉvaˬ leh Yeˍsuˆ ngaˬ shoꞈ shaꞈ ve chi htaꞈ gʼaˇ tuˬ ga laˇ ve yoˬ.”

19. Aˬ htoꞈ ma te cawˇ ve dawˇ hkʼaˇ cawˬ ve a yeˇ uiˍ jaˇ ve le?

¹⁹ Ngaˬ hui chi ve 3 ceuˬ htaꞈ te ve kʼo, Yeˍsuˆ ve taˆ tuˬ htaꞈ taˆ gʼa tuˬ yoˬ. Awˉ lawˉ teˇ ceuˬ lehˬ ngaˬ hui cawˇ ve dawˇ hkʼaˇ gʼa cawˬ ve yoˬ. Ngaˬ hui Yaˬhoˉvaˬ ve kanˉ te ve pa taw, yawˇ ve awˬ hkʼaˇ htaꞈ te cawˇ ve yoˬ. Ngaˬ hui lehˬ kanˉ te ve chaw hpehꞈ leh yawˇ lehˬ Awˬ shehˍ hpaˇ hpehꞈ ve yoˬ. (Luˉkaꞈ 17:10) Ngaˬ hui dawˇ taˍ ve hkʼe te ve kʼo, taˆ tuˬ htaꞈ taˆ ve lehˬ haˍ jaˇ. Nuˇ awˬ gʼaˇ hehnˇ jaˇ ve htawˇ, taˆ tuˬ taˆ taˍ leh teˇ gʼaˇ teˇ hpawˇ kʼai ve kʼo naˬ leh heuˬ jaˇ tuˬ yoˬ. Awˬ nu ve teˇ hkʼaˇ lehˬ ngaˬ hui Yaˬhoˉvaˬ ve awˬ hkʼaˇ htaꞈ gʼaꞈ te ve kʼo, te maˇ gʼa tehꞈ dawˇ ve htawˇ te gʼa ve yoˬ. Leh shoꞈ shaꞈ ve laiˉ ceuˬ htaꞈ kaꞈ tawˍ daꞈ maˇ gʼaˇ tehꞈ dawˇ  ve htawˇ tawˍ daꞈ gʼaˇ ve yoˬ. Yaˬhoˉvaˬ htaꞈ teˇ gʼaˇ kaꞈ tawˍ taˍ maˇ gʼa tehꞈ nawˬ tawnˇ taˍ sheˍ!—Roˉmaꞈ 8:31; 1 Yoˇhanˬ 4:4.

20. Yeˍsuˆ ve taˆ tuˬ htaꞈ taˆ gaˇ tuˬ aˬ htoꞈ ma te laˇ ve le?

²⁰ Nyiˇ hkʼaˇ teˇ hkʼaˇ lehˬ ngaˬ hui kanˉ te ve kaꞈ cawˇ ve hkʼaw gʼa te ve yoˬ. Yaˬhoˉvaˬ htaꞈ awˬ meꞈ awˬ hponˇ gʼa tcuh gaˇ ve pa taw, ngaˬ hui Yeˍsuˆ ve taˆ tuˬ htaꞈ taˆ ve yoˬ. Yeˍsuˆ ve awˬ co˗e htaˇ, yawˇ geh laˬ ve chaw lawˇ hpaꞈ uiˍ leh a shu yawˇ awˬ pon tiˉ dawˇ nyi ve pa taw, ha lehˬ kuiˬ maˇ cawˬ leh Yeˍsuˆ ve taˆ tuˬ htaꞈ baˬ taˉ ve yoˬ. (Yoˇhanˬ 6:25-27, 51, 60, 66; Hpiˇliˇpiˆ 3:18, 19) Yeˍsuˆ geh laˬ ve chaw Gʼuiˬ sha htaꞈ haꞈ leh a shu yawˇ awˬ pon maˇ dawˇ nyi leh shu htaꞈ haꞈ ve pa taw, yawˇ hui miˬ guiˬ hkʼoˆ a shaꞈ teꞈ chehˇ ve teˇ co˗e ha lehˬ leh mvuhˇ naw ma hkʼoˆ Yeˍsuˆ geh teˇ geh gʼa uˉ peunˍ tuˬ dawˇ law kuiˬ cawˬ ve yoˬ. Chi hkʼa shuˍ Yeˍsuˆ ve taˆ tuˬ htaꞈ cawˇ ve hkʼaw taˆ ve kʼo, hkʼaˬ htaˆ kaꞈ ha lehˬ tuˬ yoˬ.

21. Maꞈhtehˍ liꞈ 6:31-33 hkʼaw kʼoˆ taˍ ve hkʼe, Yaˬhoˉvaˬ aˬ htoꞈ ma te tuˬ ngaˬ hui yonˍ gʼa ve le?

²¹ Shehˆ hkʼaˇ teˇ hkʼaˇ lehˬ, ngaˬ hui hkʼaˬ htaˆ kaꞈ gʼa yonˍ yeˬ ve yoˬ. Ngaˬ hui Gʼuiˬ sha ve kanˉ maˇ maˇ te tuˬ awˬ yanˇ yuˬ tanˇ ve yoˬ. Ngaˬ hui fawˉ mehˍ ve gʼa hpuˇ tuˬ yoˬ tehꞈ Yeˍsuˆ shaˍ tiꞈ peꞈ laˇ ve yoˬ. Yaꞈ hkʼaˇ, ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ awˬ gʼaˇ peꞈ laˇ tuˬ tehꞈ yonˍ gʼa ve yoˬ. Ngaˬ hui gʼaˇ hteꞈ yeunˇ hkanˍ ve kʼo, yonˍ yeˬ ve cawˬ maˇ la tuˬ yoˬ. (Yaˍkoˆ 1:2-4) Chi hkʼoˆ kaꞈ, ngaˬ hui loˍ ve awˬ ceuˬ teˇ hpaˍ Yaˬhoˉvaˬ peꞈ laˇ tuˬ, Yeˍsuˆ haꞈ shaˉ laˇ tuˬ, leh awˬ viˉ awˬ nyi awˬ gʼaˇ peꞈ laˇ tuˬ tehꞈ yonˍ gʼa ve yoˬ. (Maꞈhtehˍ 6:31-33 gʼaw sheˍ. Yoˇhanˬ 10:14; 1 Hteˇsaˍlawˇniˆ 5:11) Ngaˬ hui yeunˇ hkanˍ gʼaˇ tuˬ chi aꞈ kehˉ loˍ ve maˇ cawˬ˗oˬ. Awˬ tehˬ laˇ?

22. Ngaˬ hui aˬ htoꞈ ma htaꞈ awˬ bon uiˍ jaˇ ve le?

²² Yeˍsuˆ gu na˗e piˇ ve yaˇ miˇ oˇ ve teˇ nyi hkʼaw ha lehˬ jaˇ. Yaꞈ hkʼaˇ, yawˇ Yeˍsuˆ ve awˬ laꞈ gʼawˇ ka tiꞈ yeˬ ve hpehꞈ la ve kʼo, co co taiˍ taiˍ ha lehˬ jaˇ tuˬ yoˬ. Nawˬ dawˇ kʼo yawˇ oˇ hkʼe leuˆ˗aw laˇ? Yeˍsuˆ ve taˆ tuˬ awˬ hawˉ lo chehˇ tuˬ yawˇ leuˆ yuˬ htaˇ, yawˇ Yeˍsuˆ geh teˇ geh mvuhˇ naw ma hkʼoˆ uˉ peunˍ tuˬ laꞈ shawnˍ gʼa ve yoˬ. Yawˇ awˬ yanˇ yuˬ tanˇ leh Yeˍsuˆ awˬ hkʼaˇ suh gʼaꞈ kʼai ve lehˬ teˇ ceuˬ kaꞈ tehˆ maˇ gʼa. Ngaˬ hui mvuhˇ naw ma hkʼoˆ leh, miˬ guiˬ hkʼoˆ lo co co taiˍ taiˍ gʼa chehˇ tuˬ dawˇ law kuiˬ cawˬ ve maˇ kʼoˆ, Yeˍsuˆ “ngaˬ geh laˬ˗oꞈ” kʼoˆ laˇ ve ngaˬ hui awˬ bon uiˍ jaˇ.