1. Miˬ guiˬ chi hkʼoˆ lo ve chaw yonˍ daꞈ maˇ gʼa ve aˬ htoꞈ ma te ngaˬ hui anˇ tuˬ maˇ loˍ ve le?

 Saˍtanˍ uˉ peunˍ ve miˬ guiˬ hkʼoˆ lo ve chaw lehˬ, a shu htaꞈ yonˍ tuˬ maˇ shiˍ ve yoˬ. Tanˇ kaˍ paˍ, mvuhˇ miˬ hpawˇ kanˉ te paˍ, leh bon awˬ hoˉ yawˇ hui nyi ma naˬ tuˬ laiˉ pawˆ te piˇ ve yoˬ. Awˬ chawˇ, yehˬ paˇ yehˬ kui chehˇ ve chaw, leh yehˬ kʼa hkʼaw ve chaw kaꞈ yawˇ hui yonˍ daꞈ maˇ gʼa tuˬ te piˇ ve yoˬ. Chi hkʼe hpehꞈ ve lehˬ ngaˬ hui anˇ tuˬ maˇ loˍ. Awˬ lawn kʼo Liꞈ hpu hkʼaw kʼoˆ taˍ ve, ‘awˬ leh meuˇ ve awˬ nyi awˬ haˉ teˇ hpaˍ awˬ hkʼaw lo chaw teˇ hpaˍ lehˬ, maˇ daꞈ maˇ kehˬ ve chaw, shu htaꞈ hkʼaiˉ puiˉ ve chaw, shu htaꞈ chiˇ aꞈ piˇ puiˉ ve chaw hpehꞈ tuˬ yoˬ.’ Chi beuꞈ teˇ co˗e ve chaw lehˬ, Saˍtanˍ ve te hkʼaˇ dawˇ hkʼaˇ htaꞈ henˇ yuˬ ve pa taw yonˍ daꞈ maˇ gʼa ve yoˬ.—2 Tiˆmoˉseˍ 3:1-4; 2 Kawˇrenˍhtuˆ 4:4.

2. (a) Ngaˬ hui a shu htaꞈ hkʼa dehꞈ yonˍ gʼa ve le? (b) Leh chaw teˇ hpaˍ aˬ htoꞈ ma htaꞈ htawˇ dawˇ nawˬ dawˇ cawˬ ve le?

² Chi hkʼe hpehꞈ ve htawˇ, ngaˬ hui Hkriꞈ yaˇ hpehꞈ ve pa taw, Yaˬhoˉvaˬ htaꞈ hkʼa dehꞈ yonˍ gʼa ve yoˬ. (Yeˍraˍmiˆ 17:7, 8) Ngaˬ hui Gʼuiˬ sha ve awˬ chawˇ hpehꞈ ve pa taw yawˇ ngaˬ hui htaꞈ haꞈ leh “maˇ chiˇ baˬ” laˇ tehꞈ yonˍ gʼa ve yoˬ. (Chiˇ mvuh ve 9:10) Chi hkʼoˆ kaꞈ, Yeˍsuˆ ngaˬ hui awˬ pon a shaꞈ tanˇ laˇ ve pa taw, ngaˬ hui yawˇ htaꞈ yonˍ gʼa ve yoˬ. (1 Peˍtruˆ 3:18) Leh Liꞈ hpu hkʼaw beˆ maˍ laˇ hkawˇ ngaˬ hui yonˍ gʼa ve tehꞈ gʼa mawˬ ve yoˬ. (2 Tiˆmoˉseˍ 3:16, 17) Ngaˬ hui Yaˬhoˉvaˬ, Yeˍsuˆ, leh Liꞈ hpu htaꞈ awˬ tehˬ yonˍ gʼa ve yoˬ. Yaꞈ hkʼaˇ, chaw teˇ hpaˍ Hkriꞈ yaˇ awˬ moˍ hkʼaw ve chaw htaꞈ hkʼaˬ htaˆ kaꞈ yonˍ gʼa˗aw laˇ tehꞈ, htawˇ dawˇ nawˬ dawˇ cawˬ ve yoˬ hehˉ. Ngaˬ hui yawˇ hui htaꞈ yonˍ gʼa tuˬ aˬ htoꞈ ma te laˇ ve le?

3. Ngaˬ hui lehˬ daꞈ jaˇ ve aˬ htoꞈ ma cawˬ ve le? (Maˍkuˆ 10:29, 30)

³ Yaˬhoˉvaˬ lehˬ ngaˬ hui htaꞈ leuˆ yuˬ leh yawˇ ve yehˬ kʼa hkʼaw chehˇ tcuh laˇ ve yoˬ. Chi ve lehˬ daꞈ jaˇ leh ngaˬ hui laiˉ ceuˬ te gʼa tuˬ te laˇ ve yoˬ. (Maˍkuˆ 10:29, 30 gʼaw sheˍ.) Miˬ guiˬ hkʼoˆ lo awˬ  viˉ awˬ nyi Yaˬhoˉvaˬ htaꞈ haꞈ leh yawˇ ve awˬ liˇ awˬ hkʼaˇ htaꞈ gʼaꞈ te ve yoˬ. Ngaˬ hui chaw ceuˬ tawˇ hkawˇ maˇ shuˍ daꞈ ve, chaw liˇ vaˇ liˇ maˇ shuˍ daꞈ ve, leh veuꞈ kaˇ veuꞈ ve maˇ shuˍ daꞈ ve htawˇ, ngaˬ hui haꞈ daꞈ ve yoˬ. Ngaˬ hui awˉ lawˉ teˇ pawˆ mawˬ daꞈ ve htawˇ, meuˆ daꞈ ve yoˬ. Ngaˬ hui awˬ viˉ awˬ nyi geh Gʼuiˬ sha htaꞈ oˉ kʼoˍ teˇ geh pui ve dawˇ cawˇ ve yoˬ.—Chiˇ mvuh ve 133:1.

4. Aˬ htoꞈ ma te ngaˬ hui awˬ viˉ awˬ nyi cawˬ cawˇ ve le?

⁴ Chi teˇ hkui lehˬ ponˬ laˬ htaˇ aꞈ kehˉ ngaˬ hui teˇ moˍ tiˉ hpehꞈ cawˇ ve yoˬ. Teˇ pawˆ pawˆ kʼo, ngaˬ hui teˇ gʼaˇ leh teˇ gʼaˇ ve awˬ vuiˬ htaꞈ gʼa ga daꞈ cawˇ ve yoˬ. (Roˉmaꞈ 15:1; Gaˍlaˍtiˆ 6:2) Ngaˬ hui Yaˬhoˉvaˬ ve kanˉ caˉ leh te kʼai tuˬ leh yonˍ hkʼaˇ yonˍ yeˬ maˇ la tuˬ awˬ viˉ awˬ nyi ngaˬ hui htaꞈ awˬ gʼaˇ peꞈ laˇ ve yoˬ. (1 Hteˇsaˍlawˇniˆ 5:11; Heˍbrehˇ 10:23-25) Ngaˬ hui Saˍtanˍ leh haiˬ ve miˬ guiˬ chi htaꞈ tawˍ daꞈ gʼaˇ tuˬ, Hkriꞈ yaˇ awˬ moˍ hkʼaw ve awˬ viˉ awˬ nyi ngaˬ hui htaꞈ maˇ ga laˇ ve kʼo, hkʼaˬ hkʼe hpehꞈ tuˬ le dawˇ nyi sheˍ. Maˇ maw maw kʼo, Saˍtanˍ leh yawˇ hpawˇ chehˇ ve chaw lehˬ Yaˬhoˉvaˬ ve chaw htaꞈ ca te luˬ la tuˬ yoˬ. Oˇ ve teˇ yanˇ awˬ viˉ awˬ nyi ngaˬ hui paˇ lo chehˇ ve pa taw, ha lehˬ jaˇ tuˬ yoˬ.

5. Aˬ htoꞈ ma te chaw teˇ hpaˍ hpaˍ awˬ viˉ awˬ nyi htaꞈ yonˍ gʼa tuˬ haˍ ve le?

⁵ Chaw teˇ hpaˍ hpaˍ awˬ viˉ awˬ nyi htaꞈ yonˍ gʼa tuˬ haˍ ve yoˬ. Chi hkʼe hpehꞈ ve lehˬ awˬ viˉ awˬ nyi ka tiꞈ maˇ yeˬ ve, maˇ heˆ leh yawˇ hui ve awˬ lawn awˬ viˉ awˬ nyi teˇ hpaˍ hpaˍ htaꞈ kʼoˆ maˍ piˇ jaw leh yawˇ awˬ nu ve teˇ gʼa htaꞈ kʼawꞈ kʼoˆ maˍ piˇ ve pa taw yoˬ. Maˇ heˆ leh Hkriꞈ yaˇ awˬ moˍ hkʼaw ve chaw teˇ hpaˍ hpaˍ kʼoˆ ve leh te ve yawˇ hui nyi ma naˬ jaˇ tuˬ te piˇ ve pa taw yoˬ. Hkʼe kʼo, awˬ viˉ awˬ nyi teˇ gʼaˇ le le htaꞈ yonˍ gʼa tuˬ ngaˬ hui htaꞈ aˬ htoꞈ ma ga laˇ gʼa ve le?

6. Haꞈ pehnˇ ve lehˬ ngaˬ hui shu htaꞈ yonˍ gʼa tuˬ aˬ htoꞈ ma ga laˇ gʼa ve le? (1 Kawˇrenˍhtuˆ 13:4-8)

⁶ Ngaˬ hui a shu htaꞈ haꞈ ve kʼo, oˇ ve teˇ gʼaˇ htaꞈ yonˍ gʼa ve yoˬ. 1 Kawˇrenˍhtuˆ liꞈ kaˇ nanˉ uiˍ 13 hkʼaw haꞈ pehnˇ ve teˇ hpaˍ htaꞈ kʼoˆ taˍ ve yoˬ. Chi ve lehˬ ngaˬ hui awˬ viˉ awˬ nyi htaꞈ yonˍ gʼa tuˬ ga  laˇ ve yoˬ. (1 Kawˇrenˍhtuˆ 13:4-8 gʼaw sheˍ.) Tawˇ pa haˉ te kʼo, kaˇ nanˉ ehˉ 4 hkʼaw kʼoˆ ve, “haꞈ pehnˇ ve lehˬ, dawˇ zuhˬ gaˇ zuhˬ leh ha kʼaˉ puiˉ ve yoˬ.” Ngaˬ hui Yaˬhoˉvaˬ htaꞈ laiˉ ceuˬ te yaꞈ ve htawˇ, yawˇ ngaˬ hui htaꞈ yeunˇ hkanˍ laˇ ve yoˬ. Chi htaꞈ pa taw, awˬ viˉ awˬ nyi kʼoˆ ve leh te ve, ngaˬ hui beuꞈ tuˬ leh nyi ma naˬ tuˬ te laˇ ve kʼo, ngaˬ hui yawˇ htaꞈ yeunˇ hkanˍ cawˇ ve yoˬ. Leh kaˇ nanˉ ehˉ 5 hkʼaw kʼoˆ ve, ‘haꞈ pehnˇ ve lehˬ, nyi ma maˇ zuhˆ puiˉ, shu awˬ hkʼoˆ venˇ baˆ maˇ taˍ puiˉ ve yoˬ.’ Chi htaꞈ pa taw, awˬ viˉ awˬ nyi ngaˬ hui nyi ma maˇ sha tuˬ te laˇ ve kʼo, awˬ lawn oˇ ve htaꞈ tiˉ maˇ tawnˇ taˍ cawˇ. Cuˇ yiˍ piˇ ve liꞈ 7:9 hkʼaw kʼoˆ ve, “nyi ma haˆ haˆ taˇ zuhˆ.” Leh ngaˬ hui Eˇfeˇsuꞈ liꞈ 4:26 hkʼaw kʼoˆ taˍ ve hkʼe gʼaꞈ te cawˇ ve yoˬ. Oˇ kaˬ lo kʼoˆ ve, “mvuhˇ nyi maˇ kʼehˬ sheˍ htaˇ, nyi ma zuhˆ ve teˇ ceuˬ htaꞈ mehˉ kʼai piˇ lawˬ˗oꞈ!”

7. Maꞈhtehˍ liꞈ 7:1-5 hkʼaw ve awˬ liˇ awˬ hkʼaˇ ngaˬ hui awˬ viˉ awˬ nyi htaꞈ yonˍ gʼa tuˬ hkʼaˬ hkʼe ga laˇ ve le?

⁷ Ngaˬ hui awˬ viˉ awˬ nyi htaꞈ yonˍ gʼa tuˬ ga laˇ gʼa ve teˇ ceuˬ lehˬ, Yaˬhoˉvaˬ yawˇ hui htaꞈ nyi ve hkʼe ngaˬ hui kaꞈ nyi sheˍ. Yaˬhoˉvaˬ yawˇ hui htaꞈ haꞈ leh yawˇ hui te yaꞈ taˍ ve htaꞈ maˇ tawnˇ taˍ ve hkʼe ngaˬ hui kaꞈ te cawˇ ve yoˬ. (Chiˇ mvuh ve 130:3) Awˬ viˉ awˬ nyi yaꞈ ve htaꞈ ceh tiˉ nyi ve aꞈ kehˉ, daꞈ ve hpawˇ nyi tuˬ coˇ caˇ leh yawˇ hui daꞈ ve htaꞈ te gʼa ve tehꞈ ngaˬ hui yonˍ sheˍ. (Maꞈhtehˍ 7:1-5 gʼaw sheˍ.) Yawˇ hui daꞈ ve htaꞈ te gaˇ leh ngaˬ hui htaꞈ maˇ te luˬ laˇ gaˇ ve tehꞈ gʼa yonˍ cawˇ ve yoˬ. Awˬ lawn kʼo, haꞈ pehnˇ ve lehˬ ‘hkʼa peu˗eˬ htaꞈ yonˍ puiˉ ve yoˬ.’ (1 Kawˇrenˍhtuˆ 13:7) Liꞈ hpu chi teˇ tawn lehˬ Yaˬhoˉvaˬ ngaˬ hui htaꞈ teꞈ chiˉ maˇ dawˇ nyi leh awˬ nu ve chaw htaꞈ yonˍ tcuh gaˇ ve maˇ heˆ. Yaꞈ hkʼaˇ, awˬ viˉ awˬ nyi lehˬ ngaˬ hui yonˍ gʼa tuˬ hpeuꞈ maw laˇ ve pa taw, ngaˬ hui yawˇ hui htaꞈ yonˍ gʼa ve yoˬ. *

8. Nawˬ awˬ viˉ awˬ nyi htaꞈ hkʼaˬ hkʼe te yonˍ gʼa tuˬ le?

⁸ Chaw teˇ gʼaˇ gʼaˇ htaꞈ yonˍ gʼa tuˬ awˬ yanˇ gʼa yehˇ ve yoˬ. Hkʼe kʼo nawˬ awˬ viˉ awˬ nyi htaꞈ hkʼaˬ hkʼe te yonˍ gʼa tuˬ le? Nawˬ yawˇ hui htaꞈ shiˍ daꞈ tuˬ gʼa coˇ caˇ ve yoˬ. Hpawnˬ daꞈ kuiˬ hkʼaw maˇ heˆ leh Gʼuiˬ sha ve kanˉ teˇ geh te htaˇ yawˇ hui geh yaw daꞈ kaꞈ gʼa ve yoˬ. Nawˬ yawˇ hui htaꞈ yonˍ gʼa ve tehꞈ hpeuꞈ maw piˇ tuˬ yeunˇ hkanˍ leh awˬ yanˇ piˇ sheˍ. Awˬ viˉ awˬ nyi hpehꞈ la gehˇ sheˍ ve htaꞈ nawˬ ve awˬ lawn yawˇ htaꞈ maˇ kʼoˆ maˍ piˇ haˆ ve yoˬ hehˉ. Yaꞈ hkʼaˇ, meuˆ daꞈ la˗oˬ htaˇ nawˬ ve awˬ lawn yawˇ htaꞈ kʼoˆ maˍ piˇ haˆ ve yoˬ. (Luˉkaꞈ 16:10) Hkʼe kʼo awˬ viˉ awˬ nyi teˇ gʼaˇ nawˬ maˇ yonˍ gʼa tuˬ te laˇ ve kʼo, yawˇ htaꞈ awˬ chawˇ maˇ te˗o tehꞈ taˇ dawˇ. Chaw teˇ hpaˍ nawˬ nyi ma luˬ tuˬ te laˇ ve kʼo, awˬ viˉ awˬ nyi teˇ gʼaˇ le le htaꞈ maˇ yonˍ gʼa tehꞈ taˇ dawˇ. Gʼuiˬ sha ve kanˉ ka tiꞈ yeˬ ve hkʼaw te ve chaw teˇ hpaˍ yawˇ hui nyi ma luˬ tuˬ te piˇ ve htawˇ, yawˇ hui awˬ nu ve chaw htaꞈ yonˍ gʼa ve awˬ lawn teˇ geh nyi sheˍ.

9. (a) Yaˬhoˉvaˬ ve awˬ tanˬ te ve chaw teˇ hpaˍ te yaꞈ ve htawˇ, Yaˬhoˉvaˬ gu teh taˍ piˇ ve htaꞈ Haˍnaˆ hkʼaˬ hkʼe te yonˍ gʼa sheˍ ve le? (b) Yaˬhoˉvaˬ gu teh taˍ laˇ ve htaꞈ nawˬ yonˍ gʼa tuˬ Haˍnaˆ ve awˬ lawn nawˬ htaꞈ hkʼaˬ hkʼe maˍ laˇ ve le? (Awˬ han htaꞈ nyi sheˍ.)

⁹ Gʼuiˬ sha ve kanˉ hkʼaˇ hkʼaw sheh kʼai paˍ nawˬ nyi ma luˬ tuˬ te laˇ jaw˗aw laˇ? Te laˇ jaw ve kʼo, nawˬ Haˍnaˆ ve awˬ lawn htaꞈ dawˇ nyi ve lehˬ daꞈ ve yoˬ. Paw hkuˇ lonˉ Eˇliˆ Iˉsaˍreˍlaˆ chaw oˉ kʼoˍ pui ve htaꞈ sheh kʼai ve yoˬ. Yaꞈ hkʼaˇ, yawˇ ve yaˇ lehˬ haiˬ jaˇ. Yawˇ ve yaˇ paˍ paw hkuˇ hpehꞈ ve htawˇ, haˉ chawˇ haˉ paˆ te leh maˇ daꞈ ve laiˉ ceuˬ te ve yoˬ. Yaꞈ hkʼaˇ, Eˇliˆ lehˬ yawˇ ve yaˇ paˍ htaꞈ shaˍ tiꞈ hkʼa dehꞈ maˇ piˇ. Yaˬhoˉvaˬ lehˬ Eˇliˆ htaꞈ awˬ vuiˬ te tcuh chehˇ sheˍ. Eˇliˆ paw hkuˇ lonˉ te chehˇ sheˍ ve kʼo, Haˍnaˆ lehˬ daꞈ kehˬ ve bon yehˬ hkʼaw maˇ kʼai tehꞈ maˇ kʼoˆ. Peuˬ leh Haˍnaˆ nyi ma luˬ jaˇ leh bon lawˬ chehˇ ve htaꞈ Eˇliˆ gʼa mawˬ ve yoˬ. Eˇliˆ Haˍnaˆ htaꞈ hkʼa dehꞈ maˇ chaˬ nyi sheˍ ve kaꞈ Haˍnaˆ tzuhˬ bvuhˆ ve tehꞈ kʼoˆ piˇ ve yoˬ. (1 Saˍmo˗eˍlaˆ 1:12-16) Haˍnaˆ yaˇ paˍ cawˬ  ve kʼo, yawˇ daꞈ kehˬ ve bon yehˬ hkʼaw Gʼuiˬ sha ve kanˉ te tcuh tuˬ yoˬ tehꞈ ka tiꞈ te ve yoˬ. Paw hkuˇ lonˉ Eˇliˆ nyi haꞈ shaˉ ve awˬ hawˉ lo yawˇ ve yaˇ paˍ gʼa chehˇ ve tehꞈ shiˍ ve htawˇ, yawˇ ka tiꞈ te taˍ ve htaꞈ gʼaꞈ te ve yoˬ. (1 Saˍmo˗eˍlaˆ 1:11) Peuˬ hkʼawꞈ nawˉ Eˇliˆ ve yaˇ paˍ te yaꞈ taˍ ve htaꞈ gu piˇ˗aw laˇ? Awˬ tehˬ yoˬ, awˬ yanˇ gaˬ ve kʼo Yaˬhoˉvaˬ yawˇ hui htaꞈ gu piˇ tuˬ yoˬ. (1 Saˍmo˗eˍlaˆ 4:17) Awˬ yanˇ chi ve hkʼaw Gʼuiˬ sha lehˬ Haˍnaˆ htaꞈ yaˇ paˍ cawˬ la tcuh leh yaˇ paˍ chi lehˬ Saˍmo˗eˍlaˆ meh ve yoˬ.—1 Saˍmo˗eˍlaˆ 1:17-20.

10. Daˍviˆ lehˬ chaw teˇ hpaˍ yawˇ htaꞈ hpfuhˆ piˇ jaw ve htawˇ, yawˇ awˬ nu ve chaw htaꞈ hkʼaˬ hkʼe te yonˍ gʼa sheˍ ve le?

¹⁰ Nawˬ meuˆ daꞈ jaˇ ve awˬ chawˇ hpfuhˆ laˇ jaw˗aw laˇ? Hpfuhˆ laˇ jaw ve kʼo, jawˇ mawˇ Daˍviˆ ve awˬ lawn htaꞈ nyi sheˍ. Daˍviˆ awˬ chawˇ teˇ gʼaˇ cawˬ ve lehˬ Aˍhiˆtawˇhpeˍlaˆ yoˬ. Yaꞈ hkʼaˇ, Daˍviˆ ve yaˇ paˍ Aˍbaˆsaˍlonˍ awˬ pa ve aˉ yaˇ htaꞈ veh htaˇ, Aˍhiˆtawˇhpeˍlaˆ Aˍbaˆsaˍlonˍ hpawˇ chehˇ ve yoˬ. Daˍviˆ ve yaˇ paˍ leh yawˇ yonˍ gʼa jaˇ ve awˬ chawˇ yawˇ htaꞈ hpfuhˆ piˇ htaˇ nyi ma luˬ jaˇ ve yoˬ. Yaꞈ hkʼaˇ, awˬ lawn chi ve htaꞈ pa taw yawˇ awˬ nu ve chaw htaꞈ maˇ yonˍ gʼa tuˬ maˇ te laˇ tcuh. Canˇ paˍ hpawˇ maˇ chehˇ ve Daˍviˆ yawˇ ve awˬ chawˇ Huˆshehˇ htaꞈ yonˍ gʼa sheˍ ve yoˬ. Daˍviˆ chi teˇ gʼaˇ htaꞈ yonˍ ve lehˬ cawˇ ve yoˬ. Peuˬ hkʼawꞈ nawˉ Huˆshehˇ a shaꞈ tanˇ leh Daˍviˆ htaꞈ ga piˇ ve yoˬ. Huˆshehˇ lehˬ daꞈ jaˇ ve awˬ chawˇ hpehꞈ ve yoˬ.—2 Saˍmo˗eˍlaˆ 17:1-16.

11. Naˍbaˍlaˆ ve awˬ ceˬ teˇ gʼaˇ shu htaꞈ hkʼaˬ hkʼe te yonˍ gʼa ve le?

¹¹ Naˍbaˍlaˆ ve awˬ ceˬ teˇ gʼaˇ ve awˬ lawn htaꞈ teˇ geh nyi sheˍ. Iˉsaˍreˍlaˆ chaw paw sha jaˇ ve teˇ gʼaˇ Naˍbaˍlaˆ meh ve yawˇ ve awˬ ceˬ htaꞈ Daˍviˆ leh yawˇ ve chaw haꞈ shaˉ piˇ ve yoˬ. Peuˬ leh Daˍviˆ leh yawˇ ve chaw awˬ pon caˇ tuˬ Naˍbaˍlaˆ geh ca lawˬ˗e tcuh ve yoˬ. Daˍviˆ Naˍbaˍlaˆ htaꞈ ga piˇ jaw ve htawˇ, Naˍbaˍlaˆ lehˬ Daˍviˆ htaꞈ maˇ ga piˇ. Daˍviˆ beuꞈ jaˇ leh Naˍbaˍlaˆ ve yehˬ hkʼaw hawˉ hkʼaˆ hkʼa peu˗eˬ htaꞈ tiˇ pehˍ tuˬ yoˬ tehꞈ kʼoˆ piˇ ve yoˬ. Awˬ ceˬ teˇ gʼaˇ Naˍbaˍlaˆ ve awˬ miˇ ma Aˍbiˆgeˍlaˆ htaꞈ haˆ ca kʼoˆ piˇ ve yoˬ. Awˬ ceˬ chi teˇ gʼaˇ lehˬ yawˇ gʼa ponˬ tuˬ maˇ gʼa ponˬ tuˬ Aˍbiˆgeˍlaˆ htaꞈ cawˬ ve tehꞈ yawˇ shiˍ ve yoˬ. Leh yawˇ teˇ gʼaˇ tiˉ gʼa ponˬ tuˬ hpaw˗e cawˇ ve htawˇ, Aˍbiˆgeˍlaˆ lehˬ awˬ ceuˬ chi ve htaꞈ gu gʼa tuˬ yoˬ tehꞈ yawˇ yonˍ ve yoˬ. Aˍbiˆgeˍlaˆ lehˬ cuˇ yiˍ cawˬ jaˇ ve yaˇ miˇ hpehꞈ ve tehꞈ laiˉ gʼaˇ kaꞈ shiˍ leh yawˇ kaꞈ yonˍ ve cawˇ jaˇ. Daˍviˆ nyi ma pa gʼa tuˬ Aˍbiˆgeˍlaˆ haꞈ hanˉ ve hkʼaw yawˇ htaꞈ lawˬ hkawˉ piˇ ve yoˬ. (1 Saˍmo˗eˍlaˆ 25:2-35) Daˍviˆ lehˬ awˬ hkʼaˇ ca ve chaw hpehꞈ ve tehꞈ Aˍbiˆgeˍlaˆ shiˍ gʼa ve yoˬ.

12. Awˬ laꞈ gʼawˇ hui te yaꞈ jaw ve htawˇ Yeˍsuˆ yawˇ hui htaꞈ hkʼaˬ hkʼe te yonˍ gʼa sheˍ ve le?

 ¹² Awˬ laꞈ gʼawˇ hui laiˉ pawˆ te yaꞈ jaw ve htawˇ, Yeˍsuˆ yawˇ hui htaꞈ yonˍ gʼa sheˍ ve yoˬ. (Yoˇhanˬ 15:15, 16) Yaˍkoˆ leh Yoˇhanˬ aˉ yaˇ gʼa tuˬ Yeˍsuˆ geh lawˬ ve htawˇ, yawˇ hui Gʼuiˬ sha awˬ pon kanˉ te ve hkʼaˬ hkʼe ve htaꞈ dawˇ law ve htawˇ, Yeˍsuˆ htawˇ dawˇ nawˬ dawˇ maˇ cawˬ. Leh tcuh yaˇ ve awˬ moˍ hkʼaw yawˇ hui htaꞈ maˇ gʼaꞈ tawˆ piˇ. (Maˍkuˆ 10:35-40) Peuˬ leh Yeˍsuˆ htaꞈ ca hpeh la ve teˇ haˉ htaˇ, awˬ laꞈ gʼawˇ teˇ gʼaˇ le le yawˇ htaꞈ baˬ taˉ ve yoˬ. (Maꞈhtehˍ 26:56) Yaꞈ hkʼaˇ, Yeˍsuˆ yawˇ hui htaꞈ dawˇ law chehˇ sheˍ. Yawˇ hui maˇ biˇ ve chaw hpehꞈ ve tehꞈ Yeˍsuˆ shiˍ leh “awˬ leh hkʼa gaˬ yawˇ hui htaꞈ yawˇ haꞈ ve yoˬ.” (Yoˇhanˬ 13:1) Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ ve tcuh yaˇ 11 gʼaˇ htaꞈ a yeˇ uiˍ jaˇ ve awˬ vuiˬ piˇ ve lehˬ, shu awˬ laꞈ gʼawˇ hpehꞈ la tuˬ maˍ piˇ ve, leh yawˇ ve yawˬ awˬ hpfuhˇ hkʼaˆ jaˇ ve htaꞈ nyi haꞈ shaˉ tuˬ sheh kʼai tcuh ve yoˬ. (Maꞈhtehˍ 28:19, 20; Yoˇhanˬ 21:15-17) Yeˍsuˆ lehˬ yawˇ hui htaꞈ yonˍ ve cawˇ jaˇ. Miˬ guiˬ hkʼoˆ lo awˬ laꞈ gʼawˇ teˇ gʼaˇ le le Gʼuiˬ sha ve kanˉ ka tiꞈ yeˬ ve hkʼaw awˬ leh hkʼa gaˬ te ve pa taw yoˬ. Ngaˬ hui gʼa henˇ peuˬ˗oˬ ve hkʼe Haˍnaˆ, Daˍviˆ, Naˍbaˍlaˆ ve awˬ ceˬ, leh Yeˍsuˆ lehˬ, maˇ biˇ ve chaw htaꞈ yonˍ ve daꞈ jaˇ ve henˇ yuˬ tuˬ hpehꞈ ve tehꞈ ngaˬ hui gʼa mawˬ ve yoˬ.

13. Ngaˬ hui awˬ nu ve chaw htaꞈ maˇ yonˍ gʼa tuˬ aˬ htoꞈ ma te laˇ ve le?

¹³ Nawˬ awˬ viˉ awˬ nyi htaꞈ yonˍ leh nawˬ ve awˬ lawn yawˇ htaꞈ kʼoˆ maˍ piˇ htaˇ, yawˇ awˬ nu ve chaw htaꞈ kʼawꞈ kʼoˆ maˍ piˇ˗aw laˇ? Nawˬ kaꞈ chi hkʼe cawˬ jaw ve kʼo nyi ma luˬ jaˇ ve yoˬ hehˉ. Awˬ viˉ awˬ nyi yaˇ miˇ teˇ gʼaˇ kaꞈ chi hkʼe gʼa hpuˇ jaw ve yoˬ. Yawˇ ve awˬ lawn nyi haꞈ shaˉ paˍ teˇ gʼaˇ htaꞈ kʼoˆ maˍ piˇ ve yoˬ. Yaꞈ hkʼaˇ, mvuhˇ shawˉ gaˬ leh nyi haꞈ shaˉ paˍ awˬ miˇ ma yawˇ geh awˬ hkʼeun hkʼaw te la leh awˬ gʼaˇ peꞈ laˇ ve yoˬ. Nyi haꞈ shaˉ paˍ lehˬ yawˇ ve awˬ lawn awˬ miˇ ma htaꞈ kʼoˆ maˍ piˇ ve tehꞈ yaˇ miˇ chi teˇ gʼaˇ shiˍ ve yoˬ. Awˬ viˉ awˬ nyi yaˇ miˇ chi teˇ gʼaˇ nyi haꞈ shaˉ paˍ oˇ ve teˇ gʼaˇ htaꞈ yonˍ gʼa tuˬ haˍ jaˇ. Yaꞈ hkʼaˇ, yaˇ miˇ chi te ve cawˇ ve yoˬ. Yawˇ nyi haꞈ shaˉ paˍ awˬ nu ve teˇ gʼaˇ geh kʼawꞈ yaw daꞈ˗e leh nyi haꞈ shaˉ paˍ chi teˇ gʼaˇ lehˬ awˬ nu ve nyi haꞈ shaˉ paˍ htaꞈ yawˇ kʼawꞈ yonˍ gʼa tuˬ ga piˇ ve yoˬ.

14. Awˬ viˉ awˬ nyi hawˉ hkʼaˆ teˇ gʼaˇ awˬ viˉ awˬ nyi htaꞈ kʼawꞈ yonˍ gʼa tuˬ aˬ htoꞈ ma ga piˇ ve le?

¹⁴ Awˬ viˉ awˬ nyi hawˉ hkʼaˆ teˇ gʼaˇ nyi haꞈ shaˉ paˍ 2 gʼaˇ geh maˇ cawˇ maˇ hawˍ daꞈ ve maw˗oˬ. Leh yawˇ nyi haꞈ shaˉ paˍ chi 2 gʼaˇ htaꞈ maˇ yonˍ gʼa ve yoˬ. Yaꞈ hkʼaˇ, teˇ nyi gaˬ leh yawˇ yawˆ yan jaˇ ve awˬ viˉ awˬ nyi ve tawˇ hkawˇ htaꞈ dawˇ nawˇ ve yoˬ. Tawˇ hkawˇ chi lehˬ chi suhˉ˗ehˬ hpehꞈ ve htawˇ, awˬ gʼaˇ gʼa jaˇ. Awˬ viˉ awˬ nyi oˇ ve teˇ gʼaˇ kʼoˆ ve, “ngaˬ hui ve canˇ paˍ lehˬ Saˍtanˍ yoˬ. Awˬ viˉ awˬ nyi maˇ heˆ.” Awˬ viˉ awˬ nyi hawˉ hkʼaˆ chi ve teˇ gʼaˇ tawˇ hkawˇ chi ve htaꞈ dawˇ nyi ve yoˬ. Hkʼe te leh, yawˇ htaꞈ ga laˇ tuˬ Yaˬhoˉvaˬ geh bon lawˬ ve yoˬ. Peuˬ leh yawˇ nyi haꞈ shaˉ paˍ chi ve 2 gʼaˇ geh kʼawꞈ cawˇ daꞈ hawˍ daꞈ tuˬ te ve yoˬ.

15. Aˬ htoꞈ ma te awˬ viˉ awˬ nyi htaꞈ kʼawꞈ yonˍ gʼa tuˬ awˬ yanˇ gʼa yehˇ ve le? Tawˇ pa haˉ kʼoˆ maˍ laˇ sheˍ.

¹⁵ Nawˬ Hkriꞈ yaˇ awˬ moˍ hkʼaw daꞈ ve awˬ vuiˬ maˇ kʼawꞈ gʼa te˗o ve laˇ? Chi hkʼe hpehꞈ ve kʼo, nawˬ nyi ma luˬ jaˇ ve yoˬ hehˉ. Kehn˗hte ve awˬ lawn htaꞈ teˇ geh nyi sheˍ. Jaˬmaˬniˬ mvuhˇ miˬ lo Naˍziˬ uˉ peunˍ ve awˬ yanˇ ngaˬ hui ve kanˉ htaꞈ tawˍ laˇ htaˇ, Kehn˗hte leh awˬ e ka tiꞈ yeˬ ve Shaˉhkiˆhkanˍ ve chaw hpehꞈ ve yoˬ. Kehn˗hte daꞈ jaˇ ve awˬ vuiˬ gʼa ve lehˬ Shaw nyi kuiˬ Taꞈ yehˬ yanˍ tawˆ leh awˬ viˉ awˬ nyi htaꞈ gʼa piˇ ve yawˇ ha lehˬ jaˇ. Peuˬ hkʼawꞈ nawˉ yawˇ ve awˬ pa Shaˉhkiˆhkanˍ ve chaw htaꞈ tawˍ ve tehꞈ awˬ viˉ awˬ nyi gʼa shiˍ htaˇ, awˬ viˉ awˬ nyi yawˇ htaꞈ kanˉ chi ve maˇ kʼawꞈ te tcuh˗o. Yawˇ ve awˬ pa Hkriꞈ yaˇ awˬ moˍ hkʼaw ve awˬ lawn, tawˍ taˍ paˍ htaꞈ ca kʼoˆ piˇ la ve htaꞈ kawˆ ve pa taw yoˬ. Yaꞈ hkʼaˇ, chi hkʼe ceh tiˉ maˇ heˆ. Maꞈ lonˉ 2 pawˆ teˇ pawˆ htaˇ, Kehn˗hte leh awˬ e htaꞈ liꞈ kʼoˆ teˇ kʼoˆ˗ehꞈ kaꞈ maˇ piˇ. Awˬ viˉ awˬ nyi lehˬ Kehn˗hte leh awˬ e htaꞈ mawˬ daꞈ htaˇ, tawˇ maˇ yaw piˇ. Kehn˗hte leh awˬ e nyi ma hkʼaˬ hkʼe taw naˬ ve htaꞈ dawˇ nyi sheˍ. Kehn˗hte kʼoˆ ve, awˬ viˉ awˬ nyi  htaꞈ venˇ baˆ hpehˇ piˇ leh teˇ pawˆ kʼawꞈ yonˍ gʼa tuˬ awˬ yanˇ gʼa yehˇ maw jaˇ. Yaꞈ hkʼaˇ, Yaˬhoˉvaˬ yawˇ hui htaꞈ venˇ baˆ hpehˇ piˇ ve tehꞈ Kehn˗hte shiˍ ve yoˬ. Hkʼe te leh, yawˇ kaꞈ chi hkʼe te cawˇ ve tehꞈ shiˍ la ve yoˬ. *

16. Aˬ htoꞈ ma te ngaˬ hui awˬ viˉ awˬ nyi htaꞈ kʼawꞈ yonˍ gʼa cawˇ ve le?

¹⁶ Nawˬ awˬ lawn chi hkʼe ve gʼa hpuˇ jaw ve kʼo, awˬ viˉ awˬ nyi htaꞈ kʼawꞈ yonˍ gʼa tuˬ te jawˬ sheˍ. Chi ve lehˬ awˬ yanˇ gʼa yehˇ maw leh gʼa coˇ caˇ jaˇ. Yaꞈ hkʼaˇ, chi hkʼe te ve lehˬ awˬ hpfuhˇ hkʼawꞈ jaˇ. Nawˬ caˇ yaꞈ jaw ve kʼo, chi ve teˇ yanˇ lehˬ hpehꞈ haˍ jaˇ ve tehꞈ dawˇ nyi sheˍ. Leh nawˬ chi hkʼe hpehꞈ jaw ve pa taw, caˇ tuˬ htaꞈ shaˍ tiꞈ te ve yoˬ hehˉ. Yaꞈ hkʼaˇ, nawˬ caˇ tuˬ caˇ sheˍ ve maˇ heˆ laˇ? Chi ve hkʼa shuˍ shuˍ, awˬ viˉ awˬ nyi teˇ hpaˍ nawˬ nyi ma luˬ jaˇ tuˬ te laˇ ve htaꞈ gʼa hpuˇ ve yoˬ hehˉ. Teˇ gʼaˇ le le maˇ biˇ ve chaw hpehꞈ ve ngaˬ hui shiˍ ve pa taw, awˬ viˉ awˬ nyi htaꞈ maˇ yonˍ gʼa˗o ve maˇ te cawˇ. Ngaˬ hui awˬ viˉ awˬ nyi htaꞈ teˇ pawˆ kʼawꞈ yonˍ gʼa tuˬ coˇ caˇ ve kʼo, ngaˬ hui ha lehˬ jaˇ tuˬ yoˬ. Chi hkʼoˆ kaꞈ, ngaˬ hui coˇ caˇ leh Hkriꞈ yaˇ awˬ moˍ hkʼaw ve awˬ viˉ awˬ nyi yonˍ gʼa daꞈ tuˬ awˬ hkʼaˇ ca leh ga piˇ gaˇ ve yoˬ.

17. Aˬ htoꞈ ma te teˇ gʼaˇ leh teˇ gʼaˇ yonˍ gʼa daꞈ ve a yeˇ uiˍ jaˇ ve le? Leh gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁷ Saˍtanˍ ve miˬ guiˬ hkʼoˆ ve chaw lehˬ yonˍ gʼa daꞈ tuˬ haˍ jaˇ. Yaꞈ hkʼaˇ, Shaˉhkiˆhkanˍ ve chaw awˬ viˉ awˬ nyi haꞈ daꞈ ve pa taw yonˍ daꞈ gʼa ve yoˬ. Ngaˬ hui chi hkʼe te yonˍ daꞈ gʼa ve lehˬ, ngaˬ hui haꞈ daꞈ leh teˇ moˍ tiˉ hpehꞈ gʼa ve yoˬ. Leh awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ, ngaˬ hui ga daꞈ gʼa tuˬ yoˬ. Yaꞈ hkʼaˇ, awˬ viˉ awˬ nyi teˇ hpaˍ nawˬ nyi ma luˬ tuˬ te laˇ jaw leh nawˬ yawˇ htaꞈ yonˍ maˇ gʼa˗oˬ ve kʼo nawˬ hkʼaˬ hkʼe te tuˬ le? Hpehꞈ la ve awˬ lawn htaꞈ Yaˬhoˉvaˬ dawˇ ve hkʼe coˇ caˇ leh dawˇ sheˍ. Leh Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te sheˍ. Nawˬ awˬ viˉ awˬ nyi htaꞈ haꞈ tuˬ coˇ caˇ leh liꞈ hpu hkʼaw ve chaw ve awˬ lawn teˇ hpaˍ htaꞈ henˇ yuˬ sheˍ. Chi hkʼe te ve lehˬ, nawˬ nyi ma hkʼe taw maˇ luˬ leh awˬ nu ve chaw htaꞈ kʼawꞈ yonˍ gʼa tuˬ te laˇ ve yoˬ. Nawˬ chi hkʼe te htaˇ ‘awˬ suhˍ awˬ shaˍ hpawˇ ve awˬ viˉ awˬ nyi aꞈ kehˉ ka tiꞈ yeˬ puiˉ ve’ awˬ chawˇ maˇ maˇ cawˬ tuˬ yoˬ. (Tawˇ naˉ ve 18:24) Yaꞈ hkʼaˇ, awˬ nu ve chaw htaꞈ yonˍ gʼa ve ceh tiˉ maˇ te cawˇ. Awˬ nu ve chaw ngaˬ hui htaꞈ yonˍ gʼa tuˬ kaꞈ gʼa te cawˇ ve yoˬ. Ngaˬ hui yonˍ gʼa ve chaw hpehꞈ ve tehꞈ awˬ nu ve chaw mawˬ tuˬ hkʼaˬ hkʼe gʼa te cawˇ ve gʼuˇ suhˍ teˇ lawn hkʼaw teˇ geh henˇ tuˬ yoˬ.