1 Kawˇrenˍhtuˆ liꞈ 15:8 hkʼaw Pawˇluꞈ kʼoˆ ve, “ngaˬ lehˬ awˬ yanˇ maˇ gaˬ sheˍ kaꞈ paw la ve yaˇ ehˉ hkʼe hpehꞈ ve htawˇ, awˬ leh teˇ pawˆ yawˇ awˬ to ngaˬ htaꞈ htawˇ maw laˇ ve yoˬ.” Yeˍsuˆ mvuhˇ naw ma hkʼoˆ lo chehˇ taˍ ve htaꞈ Pawˇluꞈ awˬ han hkʼaw mawˬ htaˇ, yawˇ kʼawꞈ teꞈ tu la leh mvuhˇ naw ma hkʼoˆ taˆ˗e htaˇ hehꞈ yawˇ Yeˍsuˆ htaꞈ mawˬ gʼa ve tehꞈ Pawˇluꞈ chi hkʼe kʼoˆ ve htaꞈ, oˇ htaˇ ngaˬ hui na gʼa jaw ve yoˬ. Awˬ tehˬ kʼo, chi hkʼe hpehꞈ la tuˬ ve lehˬ awˬ yanˇ maw jaˇ sheˍ. Pawˇluꞈ awˬ han hkʼaw Yeˍsuˆ htaꞈ chi hkʼe mawˬ ve lehˬ, yawˇ gʼa kʼawꞈ paw la ve, maˇ heˆ leh yawˇ kʼawꞈ teꞈ tu la leh mvuhˇ naw ma hkʼoˆ taˆ˗e ve, awˬ yanˇ maˇ gaˬ sheˍ htaˇ ve htaꞈ shuˍ ve yoˬ. Yaꞈ hkʼaˇ, Liꞈ hpu chi ve teˇ tawn htaꞈ hkʼa dehꞈ chaˬ nyi peuˬ hkʼawꞈ nawˉ, na gʼa ve chi htaꞈ gʼa pa cawˇ ve tehꞈ ngaˬ hui shiˍ ve yoˬ.

Pawˇluꞈ yawˇ pa leh Hkriꞈ yaˇ hpehꞈ la htaˇ ve htaꞈ kʼoˆ gaˇ ve tehꞈ ngaˬ hui na gʼa ve cawˇ˗oˬ. Yaꞈ hkʼaˇ, “awˬ yanˇ maˇ gaˬ sheˍ kaꞈ paw la ve yaˇ ehˉ” chi yawˇ hkʼaˬ hkʼe kʼoˆ gaˇ ve le? Laiˉ ceuˬ htaꞈ kʼoˆ gʼa ve yoˬ hehˉ.

Pawˇluꞈ laꞈ tcuh laꞈ haˉ pa leh Hkriꞈ yaˇ hpehꞈ la ve lehˬ anˇ jaˇ. Maˇ dawˇ maˇ gaˇ ve hkʼaw awˬ yanˇ maˇ gaˬ sheˍ kaꞈ paw la ve yaˇ ehˉ chi anˇ tuˬ te laˇ ve yoˬ. Sawˉluꞈ Daˍmaˍsehˆ venˇ lo Hkriꞈ yaˇ htaꞈ fawˉ mehˍ tuˬ kʼai htaˇ, Yeˍsuˆ htaꞈ caˉ daꞈ ve awˬ han hkʼaw yawˇ gʼa mawˬ tuˬ tehꞈ maˇ dawˇ. Leh yawˇ Hkriꞈ yaˇ hpehꞈ la tuˬ kaꞈ maˇ dawˇ. Chi hkʼe ceh tiˉ maˇ heˆ. Venˇ oˇ ve hkʼaw chehˇ ve Hkriꞈ yaˇ Sawˉluꞈ fawˉ mehˍ piˇ jaw ve chaw awˬ lawn chi ve htaꞈ gʼa shiˍ htaˇ, anˇ jaˇ. Chi hkʼoˆ kaꞈ, chi yawˇ cheˆ˗ehꞈ kʼai leh teˇ tcuhˉ teˇ yanˇ mehˆ maˇ mawˬ ve yoˬ.—Tcuh yaˇ 9:1-9, 17-19.

Pawˇluꞈ pa leh Hkriꞈ yaˇ hpehꞈ la ve lehˬ “awˬ yanˇ maˇ cawˇ ve.” Heˍlaˍsaˆ tawˇ hkawˇ hkʼaw “awˬ yanˇ maˇ gaˬ sheˍ kaꞈ paw la ve yaˇ ehˉ” tawˇ hkawˇ chi lehˬ, “awˬ yanˇ maˇ cawˇ ve” hkʼaw paw la ve yaˇ ehˉ htaꞈ kʼoˆ gʼa ve yoˬ. Yeˍruˆsaˍlehnˍ Liꞈ hpu hkʼaw chi teˇ tawn htaꞈ kʼoˆ ve, “ngaˬ lehˬ chaw teˇ gʼaˇ kaꞈ maˇ dawˇ law htaˇ paw la ve yaˇ ehˉ hkʼe hpehꞈ ve yoˬ.” Chi awˬ gʼuˇ suhˍ htaˇ Liꞈ hpu awˬ tawn hkʼaw Yeˍsuˆ kʼawꞈ teꞈ tu la leh laiˉ gʼaˇ mawˬ ve htaꞈ Pawˇluꞈ kʼoˆ ve yoˬ. (1 Kawˇrenˍhtuˆ 15:4-8) Oˇ ve teˇ yanˇ Pawˇluꞈ Yeˍsuˆ htaꞈ maˇ gʼa mawˬ ve htawˇ, Yeˍsuˆ mvuhˇ naw ma hkʼoˆ lo chehˇ˗oˬ htaˇ, yawˇ awˬ to Pawˇluꞈ htaꞈ maw piˇ ve yoˬ. Chi lehˬ “awˬ yanˇ maˇ cawˇ ve” maˇ heˆ leh Yeˍsuˆ mvuhˇ naw ma hkʼoˆ lo chehˇ˗oˬ ve htaꞈ chaw teˇ gʼaˇ˗ehꞈ kaꞈ maˇ dawˇ law htaˇ ve htaꞈ shuˍ ve yoˬ.

Pawˇluꞈ nyi ma nuˇ nehˬ ve hkʼaw kʼoˆ ve. Dawˇ hkʼaˇ chi hkʼe ve lehˬ Pawˇluꞈ yawˇ maˇ daꞈ ve tehꞈ dawˇ ve htaꞈ Liꞈ hpu hpawˇ chaˬ nyi tehˆ nyi paˍ teˇ hpaˍ kʼoˆ ve yoˬ. Pawˇluꞈ chi hkʼe dawˇ ve kʼo, tawˇ hkawˇ chi ve lehˬ yawˇ tcuh yaˇ hpehꞈ ve maˇ keunˍ tehꞈ kʼoˆ ve yoˬ. Awˬ tehˬ kʼo, Pawˇluꞈ Liꞈ hpu awˬ tawn awˬ hawˉ lo ve hkʼaw kʼoˆ ve, “ngaˬ lehˬ tcuh yaˇ hui awˬ hkʼaw lo i jaˇ ve teˇ gʼaˇ hpehꞈ ve yoˬ. Gʼuiˬ sha ve Hkriꞈ yaˇ awˬ moˍ htaꞈ ngaˬ fawˉ mehˍ jaw ve pa taw, shu ngaˬ htaꞈ tcuh yaˇ kʼoˆ tuˬ ve htaꞈ kaꞈ ngaˬ maˇ keunˍ ve yoˬ. Yaꞈ hkʼaˇ, ngaˬ tcuh yaˇ hpehꞈ chehˇ ve lehˬ, Gʼuiˬ sha ve awˬ bon htaꞈ pa taw yoˬ.”—1 Kawˇrenˍhtuˆ 15:9, 10.

Pawˇluꞈ lehˬ “awˬ yanˇ maˇ gaˬ sheˍ kaꞈ paw la ve yaˇ ehˉ” hkʼe hpehꞈ ve tehꞈ kʼoˆ htaˇ, Yeˍsuˆ ve awˬ to Pawˇluꞈ htaꞈ maw piˇ ve lehˬ laꞈ tcuh laꞈ haˉ hpehꞈ leh anˇ jaˇ ve yoˬ. Maˇ heˆ leh maˇ dawˇ maˇ gaˇ ve hkʼaw awˬ yanˇ maˇ cawˇ ve hkʼaw hpehꞈ la ve yoˬ. Maˇ heˆ leh oˇ ve htaꞈ Pawˇluꞈ maˇ mawˬ keunˍ ve tehꞈ dawˇ ve htaꞈ ngaˬ hui kʼoˆ gʼa ve yoˬ. Pawˇluꞈ yawˇ daꞈ jaˇ ve awˬ vuiˬ htaꞈ gʼa ve tehꞈ dawˇ ve yoˬ. Awˬ lawn oˇ ve lehˬ Yeˍsuˆ kʼawꞈ teꞈ tu la˗oˬ ve tehꞈ Pawˇluꞈ yonˍ gʼa tuˬ te piˇ ve yoˬ. Chi hkʼoˆ kaꞈ, Yeˍsuˆ kʼawꞈ teꞈ tu la˗oˬ ve awˬ lawn htaꞈ caˉ daꞈ ve yawˇ bon maˍ htaˇ, yawˇ awˬ lawn oˇ ve htaꞈ teˇ hkui teˇ hkui kʼoˆ ve yoˬ.—Tcuh yaˇ 22:6-11; 26:13-18.