1. Yeˍsuˆ anˇ tuˬ te leh Peˍtruˆ ngaˇ gʼa maˇ jaˇ tuˬ ga piˇ peuˬ hkʼawꞈ nawˉ, yawˇ hkʼaˬ hkʼe dawˇ ve le?

 Peˍtruˆ teˇ haˉ mvuhˇ hkʼa htiˇ ngaˇ ca ve yoˬ. Yaꞈ hkʼaˇ, teˇ hkeh kaꞈ ca maˇ gʼa. Peuˬ leh Yeˍsuˆ yawˇ htaꞈ kʼoˆ piˇ ve, “iˉ kaˆ naˉ kuiˬ lo jiˆ kʼai leh, ngaˇ gʼa tuˬ nawˬ hui ve geuꞈ teˇ hpaˍ htaꞈ hpehˇ˗oˆ.” (Luˉkaꞈ 5:4) Ngaˇ gʼa tuˬ ve laˇ tehꞈ Peˍtruˆ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, yawˇ Yeˍsuˆ kʼoˆ piˇ ve hkʼe gʼaꞈ te ve yoˬ. Peˍtruˆ leh awˬ nu ve chaw teˇ hpaˍ ngaˇ gʼa maˇ jaˇ leh geuꞈ kaꞈ tzuhꞈ paˇ neˇ ve yoˬ. Chi htaꞈ gʼa mawˬ htaˇ, yawˇ hui “anˇ jaˇ ve yoˬ.” Leh Peˍtruˆ Yeˍsuˆ htaꞈ kʼoˆ piˇ ve, “Jawˇ mawˇ˗oˬ, ngaˬ geh lo tawˆ kʼai˗o. Awˬ lawn kʼo, ngaˬ lehˬ venˇ baˆ uiˍ ve chaw hpehꞈ ve yoˬ.” (Luˉkaꞈ 5:6-9) Peˍtruˆ yawˇ Yeˍsuˆ awˬ paˇ lo gʼa chehˇ ve maˇ keunˍ tehꞈ dawˇ ve yoˬ.

2. Peˍtruˆ ve awˬ lawn htaꞈ henˇ ve lehˬ ngaˬ hui awˬ pon awˬ bon hkʼaˬ hkʼe cawˬ ve le?

² Peˍtruˆ “venˇ baˆ uiˍ ve chaw hpehꞈ ve” tehꞈ kʼoˆ ve cawˇ ve yoˬ. Ngaˬ hui Liꞈ hpu hkʼaw gʼaw htaˇ, teˇ pawˆ pawˆ Peˍtruˆ kʼoˆ ve, leh te ve awˬ ceuˬ, peuˬ hkʼawꞈ nawˉ yawˇ nyi ma luˬ ve htaꞈ ngaˬ hui gʼa mawˬ ve yoˬ. Nawˬ Peˍtruˆ hkʼa shuˍ hpehꞈ˗aw laˇ? Nawˬ ve awˬ gʼaˇ nuˇ kuiˬ maˇ heˆ leh te hkʼaˇ dawˇ hkʼaˇ teˇ ceuˬ ceuˬ pa gaˇ maw jaˇ˗oˬ ve yoˬ hehˉ. Yaꞈ hkʼaˇ, pa maˇ gʼa sheˍ. Chi hkʼe hpehꞈ ve kʼo, Peˍtruˆ ve awˬ lawn htaꞈ dawˇ nyi htaˇ, nawˬ awˬ gʼaˇ gʼa ve yoˬ. Aˬ htoꞈ ma te chi hkʼe hpehꞈ ve le? Yaˬhoˉvaˬ lehˬ Peˍtruˆ te yaꞈ ve awˬ lawn maˇ bvuhꞈ keu tcuh kaꞈ gʼa ve htawˇ, bvuhꞈ keu tcuh sheˍ ve yoˬ. Aˬ htoꞈ ma pa taw le? Awˬ lawn kʼo, Peˍtruˆ ve awˬ lawn ngaˬ hui htaꞈ henˇ yuˬ tcuh gaˇ ve yoˬ. (2 Tiˆmoˉseˍ 3:16, 17) Peˍtruˆ kaꞈ ngaˬ hui hkʼa shuˍ awˬ gʼaˇ nuˇ leh dawˇ haˍ ve yoˬ. Chi ve htaꞈ gʼa mawˬ htaˇ, ngaˬ hui kaꞈ hkʼa dehꞈ te gʼa tuˬ Yaˬhoˉvaˬ maˇ dawˇ law. Yaꞈ hkʼaˇ, Yaˬhoˉvaˬ lehˬ ngaˬ hui awˬ gʼaˇ nuˇ kuiˬ cawˬ ve htawˇ, coˇ caˇ leh awˬ gʼaˇ maˇ nuˇ tcuh gaˇ ve yoˬ.

3. Aˬ htoꞈ ma te ngaˬ hui coˇ caˇ leh awˬ gʼaˇ maˇ nuˇ cawˇ ve le?

³ Aˬ htoꞈ ma pa taw, ngaˬ hui coˇ caˇ leh awˬ gʼaˇ maˇ nuˇ cawˇ ve le? Laˇhuˍ chaw mawˇ hkawˇ kʼoˆ ve, coˇ caˇ ve kʼo te gʼa tuˬ yoˬ. Tinˍ hteˆ paˍ ve awˬ lawn htaꞈ dawˇ nyi sheˍ. Tinˍ hteˆ paˍ lehˬ hkʼa dehꞈ hteˆ cheuˬ gʼa  tuˬ laiˉ hkʼawꞈ gʼa te jawˬ ve yoˬ. Yaꞈ hkʼaˇ, yawˇ te jawˬ ve laiˉ hkʼawꞈ htaˇ, yawˇ tinˍ hteˆ ve laiˉ pawˆ maˇ cawˇ ve yoˬ. Leh yawˇ yeunˇ hkanˍ ve hkʼaw hteˆ jawˬ ve kʼo, cheuˬ jaˇ tuˬ yoˬ. Yawˇ tinˍ hteˆ cheuˬ jaˇ˗oˬ ve chaw hpehꞈ ve htawˇ, teˇ pawˆ pawˆ kʼo yawˇ tinˍ hteˆ maˇ cawˇ sheˍ ve yoˬ. Chi hkʼe hpehꞈ ve htawˇ, yawˇ awˬ gʼaˇ maˇ nuˇ leh caˉ leh te jawˬ ve kʼo, cheuˬ jaˇ tuˬ yoˬ. Chi ve hkʼa shuˍ shuˍ, ngaˬ hui kaꞈ awˬ gʼaˇ nuˇ kuiˬ teˇ ceuˬ ceuˬ htaꞈ gʼaˇ˗oˬ ve tehꞈ dawˇ ve htawˇ, awˬ gʼaˇ kʼawꞈ nuˇ la puiˉ ve yoˬ. Chi htaꞈ pa taw, ngaˬ hui caˉ leh gʼa coˇ caˇ cawˇ ve yoˬ. Teˇ gʼaˇ le le kʼoˆ ve, maˇ heˆ leh te ve awˬ ceuˬ peuˬ hkʼawꞈ nawˉ nyi ma luˬ tuˬ te laˇ gʼa ve yoˬ. Yaꞈ hkʼaˇ, ngaˬ hui awˬ gʼaˇ maˇ nuˇ ve kʼo, Yaˬhoˉvaˬ ga laˇ tuˬ yoˬ. (1 Peˍtruˆ 5:10) Peˍtruˆ coˇ caˇ leh awˬ gʼaˇ maˇ nuˇ ve awˬ lawn leh yawˇ te yaꞈ ve htawˇ, Yeˍsuˆ yawˇ htaꞈ ha kʼaˉ piˇ ve awˬ lawn htaꞈ teˇ geh nyi sheˍ. Chi ve ngaˬ hui Yaˬhoˉvaˬ ve kanˉ caˉ leh te kʼai tuˬ awˬ gʼaˇ hkʼaˬ hkʼe peꞈ laˇ ve kaꞈ teˇ geh nyi sheˍ.

4. Luˉkaꞈ liꞈ 5:5-10 hkʼaw kʼoˆ taˍ ve hkʼe, Peˍtruˆ yawˇ awˬ to htaꞈ hkʼaˬ hkʼe kʼoˆ ve le? Leh Yeˍsuˆ Peˍtruˆ yonˍ gʼa tuˬ aˬ htoꞈ ma te piˇ ve le?

⁴ Aˬ htoꞈ ma te Peˍtruˆ yawˇ “venˇ baˆ uiˍ ve chaw hpehꞈ ve” tehꞈ Liꞈ hpu hkʼaw maˇ gʼa kʼoˆ laˇ taˍ ve yoˬ. Yawˇ te yaꞈ ve awˬ ceuˬ htaꞈ dawˇ nyi ve kaꞈ maˇ gʼa kʼoˆ laˇ taˍ ve yoˬ. (Luˉkaꞈ 5:5-10 gʼaw sheˍ.) Yaꞈ hkʼaˇ, Peˍtruˆ venˇ baˆ uiˍ ve teˇ ceuˬ ceuˬ htaꞈ te yaꞈ jaw ve yoˬ hehˉ. Aˬ htoꞈ ma pa taw Peˍtruˆ kawˆ ve htaꞈ Yeˍsuˆ shiˍ ve yoˬ. Teˇ pawˆ pawˆ kʼo, yawˇ ve te hkʼaˇ dawˇ hkʼaˇ maˇ daꞈ tehꞈ dawˇ ve yoˬ hehˉ. Peˍtruˆ Yeˍsuˆ htaꞈ hkʼaˬ htaˆ kaꞈ ka tiꞈ yeˬ gʼa ve tehꞈ Yeˍsuˆ shiˍ ve yoˬ. Chi htaꞈ pa taw, Yeˍsuˆ Peˍtruˆ htaꞈ “taˇ kawˆ” tehꞈ kʼoˆ piˇ ve yoˬ. Yeˍsuˆ Peˍtruˆ htaꞈ chi hkʼe yonˍ gʼa ve lehˬ, yawˇ ve te hkʼaˇ dawˇ hkʼaˇ pa kʼai jaˇ ve yoˬ. Peˍtruˆ leh yawˇ ve awˬ nyi paˍ Anˍdrehˍ ngaˇ ca ve kanˉ htaꞈ baˬ taˉ leh Yeˍsuˆ awˬ hkʼaˇ suh kʼai ve yoˬ. Peˍtruˆ chi hkʼe dawˇ cheˆ ve pa taw, awˬ bon gʼa jaˇ.—Maˍkuˆ 1:16-18.

5. Peˍtruˆ kawˆ ve htaꞈ gʼaˇ leh Yeˍsuˆ jehˬ laˇ ve htaꞈ haꞈ yuˬ htaˇ, yawˇ aˬ htoꞈ ma awˬ bon gʼa ve le?

⁵ Peˍtruˆ Yeˍsuˆ awˬ hkʼaˇ suh kʼai htaˇ, daꞈ ve laiˉ ceuˬ htaꞈ yawˇ gʼa henˇ ve yoˬ. Yeˍsuˆ anˇ tuˬ te ve laiˉ ceuˬ htaꞈ yawˇ gʼa mawˬ ve yoˬ. Tawˇ pa haˉ te kʼo, naˬ ve chaw htaꞈ gu na˗e piˇ ve, neˇ geh ve htaꞈ chaw neˇ gʼaꞈ tawˆ piˇ ve, leh suh ve chaw htaꞈ kʼawꞈ teꞈ tu la piˇ gʼa ve yoˬ. b (Maꞈhtehˍ 8:14-17; Maˍkuˆ 5:37, 41, 42) Chi hkʼoˆ kaꞈ, Yeˍsuˆ mvuhˇ naw ma hkʼoˆ Gʼuiˬ sha ve mvuhˇ miˬ hkʼaw Jawˇ mawˇ te ve htaꞈ caˉ daꞈ ve Peˍtruˆ zuhꞈ maˆ gʼa mawˬ htaˇ, ha lehˬ jaˇ ve yoˬ. Chi ve htaꞈ yawˇ maˇ leunˇ gʼa ve yoˬ. (Maˍkuˆ 9:1-8; 2 Peˍtruˆ 1:16-18) Peˍtruˆ Yeˍsuˆ ve awˬ laꞈ gʼawˇ maˇ hpehꞈ ve kʼo, daꞈ jaˇ ve chi hkʼa peu˗eˬ htaꞈ yawˇ maˇ gʼa mawˬ leh awˬ bon kaꞈ maˇ gʼa taˬ. Yawˇ ve te hkʼaˇ dawˇ hkʼaˇ htaꞈ caˉ daꞈ ve maˇ daꞈ ve dawˇ hkʼaˇ htaꞈ gʼaˇ ve, yawˇ ha lehˬ jaˇ ve yoˬ.

6. Peˍtruˆ yawˇ ve awˬ gʼuˇ nuˇ kuiˬ htaꞈ laꞈ haˉ tawˍ daꞈ gʼaˇ ve laˇ? Tawˇ pa haˉ kʼoˆ maˍ laˇ sheˍ.

⁶ Peˍtruˆ Yeˍsuˆ maˍ ve htaꞈ gʼa kaˇ leh Yeˍsuˆ te  ve laiˉ ceuˬ htaꞈ gʼa mawˬ ve htawˇ, yawˇ awˬ gʼaˇ nuˇ kuiˬ htaꞈ gʼa tawˍ daꞈ chehˇ sheˍ ve yoˬ. Teˇ lawn lawn htaꞈ teˇ geh nyi sheˍ. Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe, Yeˍsuˆ lehˬ tuꞈ hkanˍ ve hkʼaw gʼa suh˗e tuˬ yoˬ tehꞈ kʼoˆ maˍ piˇ htaˇ, Yeˍsuˆ chi hkʼe maˇ gʼa hpuˇ taˬ tehꞈ Peˍtruˆ kʼoˆ ve yoˬ. (Maˍkuˆ 8:31-33) Chi hkʼoˆ kaꞈ, a shu teˇ gʼaˇ shu aꞈ kehˉ uiˍ ve le tehꞈ Peˍtruˆ leh awˬ nu ve awˬ laꞈ gʼawˇ hui gʼawˬ daꞈ hkʼeh ve yoˬ. (Maˍkuˆ 9:33, 34) Yeˍsuˆ miˬ guiˬ hkʼoˆ lo a shaꞈ teꞈ chehˇ ve awˬ leh meuˇ teˇ haˉ htaˇ, Peˍtruˆ nyi ma zuhˆ ve hkʼaw hawˉ hkʼaˆ teˇ gʼaˇ ve naˍ paw htaꞈ chaw cheˆ piˇ ve yoˬ. (Yoˇhanˬ 18:10) Oˇ ve teˇ haˉ hkʼaw Peˍtruˆ kawˆ jaˇ leh Yeˍsuˆ htaꞈ 3 pawˆ chiˇ baˬ piˇ ve yoˬ. (Maˍkuˆ 14:66-72) Chi Peˍtruˆ nyi ma luˬ jaˇ tuˬ te piˇ ve pa taw gʼaˇ hteꞈ hawˬ ve yoˬ.—Maꞈhtehˍ 26:75.

7. Yeˍsuˆ kʼawꞈ teꞈ tu la peuˬ hkʼawꞈ nawˉ yawˇ Peˍtruˆ htaꞈ aˬ htoꞈ ma awˬ vuiˬ te tcuh ve le?

⁷ Peˍtruˆ yawˇ te yaꞈ ve awˬ ceuˬ htaꞈ nyi ma luˬ ve htawˇ, Yeˍsuˆ yawˇ htaꞈ dawˇ law chehˇ sheˍ ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ Peˍtruˆ htaꞈ haꞈ ve tehꞈ hpeuꞈ maw piˇ ve yoˬ. Peˍtruˆ Yeˍsuˆ ve yawˬ htaꞈ nyi haꞈ shaˉ tuˬ awˬ vuiˬ piˇ ve yoˬ. (Yoˇhanˬ 21:15-17) Yeˍsuˆ te tcuh gaˇ ve teˇ ceuˬ le le htaꞈ Peˍtruˆ te ve yoˬ. Chi htaꞈ pa taw, Peˍteˍkoˆteˍ pawehˇ awˬ nyi htaˇ, Peˍtruˆ Yeˍruˆsaˍlehnˍ venˇ lo chehˇ leh daꞈ kehˬ ve awˬ ha hpu leuˆ yuˬ piˇ ve awˉ lawˉ teˇ moˍ hkʼaw yawˇ kaꞈ teˇ gʼaˇ hpehꞈ ve yoˬ.

8. Peˍtruˆ Anˍtiˆawˍ venˇ lo venˇ baˆ uiˍ ve aˬ htoꞈ ma te ve le?

⁸ Peˍtruˆ htaꞈ daꞈ kehˬ ve awˬ ha hpu leuˆ yuˬ piˇ˗oˬ ve htawˇ, yawˇ ve gʼaˇ nuˇ kuiˬ htaꞈ gʼa tawˍ daꞈ chehˇ sheˍ ve yoˬ. 36 hkʼawꞈ C.E. htaˇ, Yaˬhoˉvaˬ Peˍtruˆ htaꞈ awˬ guiˬ meuˇ maˇ shoˍ ve buiˇ shaˆ aˉ naˆ chaw Kawˍneˍliˆ geh kʼai tcuh leh, Kawˍneˍliˆ htaꞈ kaꞈ daꞈ kehˬ ve awˬ ha hpu leuˆ yuˬ piˇ ve Peˍtruˆ gʼa mawˬ ve yoˬ. Chi ve htaꞈ pa taw, “Gʼuiˬ sha lehˬ chaw mehˆ hpfuhˇ htaꞈ maˇ nyi ve” hkʼa tawˍ lehˆ gʼa mawˬ ve yoˬ. Gʼuiˬ sha htaꞈ kawˆ leh yawˆ yan ve buiˇ shaˆ aˉ naˆ chaw teˇ gʼaˇ le le htaꞈ Hkriꞈ yaˇ awˬ moˍ hkʼaw chehˇ la tcuh ve yoˬ. (Tcuh yaˇ 10:34, 44, 45) Chi ve peuˬ hkʼawꞈ nawˉ, Peˍtruˆ buiˇ shaˆ aˉ naˆ chaw geh awˍ caˇ ve yoˬ. Awˉ lawˉ htaˇ yawˇ buiˇ shaˆ aˉ naˆ chaw geh teˇ geh awˍ maˇ caˇ. (Gaˍlaˍtiˆ 2:12) Yaꞈ hkʼaˇ, Hkriꞈ yaˇ hpehꞈ ve Yuˇdaꞈ chaw teˇ hpaˍ dawˇ ve, Yuˇdaꞈ chaw leh buiˇ shaˆ aˉ naˆ chaw awˍ teˇ geh maˇ caˇ keunˍ ve yoˬ. Chi hkʼe dawˇ ve chaw Anˍtiˆawˍ venˇ lo laˬ htaˇ, Hkriꞈ yaˇ hpehꞈ ve Yuˇdaꞈ chaw maˇ dawˇ cawˇ la ve htaꞈ kawˆ ve pa taw, Peˍtruˆ buiˇ shaˆ aˉ naˆ chaw Hkriꞈ yaˇ hpehꞈ la ve geh awˍ maˇ caˇ˗o. Tcuh yaˇ Pawˇluꞈ chi hkʼe gʼa mawˬ htaˇ, Peˍtruˆ htaꞈ shu mehˆ gʼuˇ suhˍ lo deˇ piˇ ve yoˬ. (Gaˍlaˍtiˆ 2:13, 14) Peˍtruˆ chi hkʼe te ve htawˇ, yawˇ awˬ to htaꞈ dawˇ law chehˇ sheˍ leh awˬ gʼaˇ maˇ nuˇ. Yawˇ htaꞈ ga piˇ gʼa ve awˬ ceuˬ aˬ htoꞈ ma le?

9. Yoˇhanˬ liꞈ 6:68, 69 hkʼaw Peˍtruˆ ka tiꞈ yeˬ ve tehꞈ ngaˬ hui mawˬ tuˬ aˬ htoꞈ ma hpeuꞈ maw laˇ ve le?

⁹ Peˍtruˆ lehˬ ka tiꞈ yeˬ ve chaw hpehꞈ leh yawˇ Yeˍsuˆ awˬ hkʼaˇ suh maˇ gʼa kʼai tuˬ teˇ ceuˬ kaꞈ maˇ tawˍ laˇ tcuh. Awˬ lawn chi ve Yeˍsuˆ tcuh yaˇ hui htaꞈ teˇ ceuˬ ceuˬ kʼoˆ piˇ leh yawˇ hui maˇ na gʼa ve htaꞈ ngaˬ hui hkʼa tawˍ lehˆ gʼa mawˬ ve yoˬ. (Yoˇhanˬ 6:68, 69 gʼaw sheˍ.) Awˬ laꞈ gʼawˇ laiˉ gʼaˇ maˇ te nyi sheˍ ve maˇ heˆ leh maˇ kʼoˆ maˍ laˇ tcuh sheˍ ve kaꞈ Yeˍsuˆ awˬ hkʼaˇ suh laꞈ haˉ maˇ gʼaꞈ kʼai˗o ve yoˬ. Yaꞈ hkʼaˇ, Peˍtruˆ chi hkʼe maˇ te. Yawˇ Yeˍsuˆ htaꞈ ka tiꞈ yeˬ leh Yeˍsuˆ ceh tiˉ “co tiꞈ ha tiꞈ ve tawˇ hkawˇ cawˬ taˍ ve yoˬ” tehꞈ Peˍtruˆ kʼoˆ ve yoˬ.

10. Yeˍsuˆ Peˍtruˆ htaꞈ hkʼaˬ hkʼe yonˍ gʼa ve le? (Awˬ han htaꞈ nyi sheˍ.)

¹⁰ Yeˍsuˆ kaꞈ Peˍtruˆ htaꞈ maˇ baˬ taˉ piˇ. Tawˇ pa haˉ te kʼo, Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, Peˍtruˆ leh tcuh yaˇ hui Yeˍsuˆ htaꞈ baˬ taˉ laˇ tuˬ yoˬ tehꞈ Yeˍsuˆ shiˍ ve yoˬ. Yaꞈ hkʼaˇ, Peˍtruˆ Yeˍsuˆ geh kʼawꞈ hpfuhˆ kʼawꞈ la tuˬ yoˬ tehꞈ yawˇ yonˍ gʼa leh Peˍtruˆ Yeˍsuˆ htaꞈ caˉ leh ka tiꞈ yeˬ ve yoˬ. (Luˉkaꞈ 22:31, 32) Peˍtruˆ “te gaˇ ve nyi ma cawˬ htawˇ, awˬ suhˍ awˬ shaˍ lehˬ awˬ gʼaˇ nuˇ ve yoˬ” tehꞈ Yeˍsuˆ shiˍ ve yoˬ. (Maˍkuˆ 14:38) Chi htaꞈ pa taw, Peˍtruˆ Yeˍsuˆ htaꞈ maˇ shiˍ tehꞈ chiˇ baˬ piˇ htaˇ, Yeˍsuˆ kaꞈ Peˍtruˆ htaꞈ dawˇ law chehˇ sheˍ ve yoˬ. Leh Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ awˬ to Peˍtruˆ htaꞈ mawˬ tcuh ve yoˬ. Nyi˗a kʼo oˇ ve teˇ yanˇ Peˍtruˆ  teˇ gʼaˇ tiˉ chehˇ taˍ ve yoˬ hehˉ. (Maˍkuˆ 16:7; Luˉkaꞈ 24:34; 1 Kawˇrenˍhtuˆ 15:5) Oˇ ve teˇ yanˇ Peˍtruˆ nyi ma luˬ jaˇ ve htawˇ, awˬ gʼaˇ hkʼaˬ hkʼe taw gʼa ve htaꞈ dawˇ nyi leh chi yawˇ awˬ gʼaˇ gʼa tuˬ te piˇ ve yoˬ.

11. Yaˬhoˉvaˬ Peˍtruˆ htaꞈ nyi haꞈ shaˉ laˇ tuˬ yoˬ tehꞈ yonˍ gʼa tuˬ Yeˍsuˆ hkʼaˬ hkʼe ga piˇ ve le?

¹¹ Yaˬhoˉvaˬ Peˍtruˆ htaꞈ nyi haꞈ shaˉ laˇ tuˬ yoˬ tehꞈ yonˍ gʼa tuˬ Yeˍsuˆ ga piˇ ve yoˬ. Tawˇ pa haˉ te kʼo, Yeˍsuˆ kʼawꞈ teꞈ tu la peuˬ hkʼawꞈ nawˉ, Peˍtruˆ leh tcuh yaˇ hui ngaˇ ca gʼa maˇ jaˇ tuˬ Yeˍsuˆ anˇ tuˬ kʼawꞈ te piˇ ve yoˬ. (Yoˇhanˬ 21:4-6) Yaˬhoˉvaˬ lehˬ Peˍtruˆ loˍ ve awˬ ceuˬ htaꞈ piˇ tuˬ sha jaˇ ve tehꞈ anˇ tuˬ chi ve Peˍtruˆ yonˍ gʼa tuˬ te piˇ ve yoˬ. A shu teˇ gʼaˇ “Gʼuiˬ sha ve mvuhˇ miˬ . . . awˉ lawˉ ca” ve kʼo, Gʼuiˬ sha lehˬ yawˇ hui loˍ ve awˬ ceuˬ htaꞈ piˇ tuˬ yoˬ tehꞈ, Yeˍsuˆ kʼoˆ ve tawˇ hkawˇ chi ve htaꞈ Peˍtruˆ dawˇ nawˇ la ve yoˬ hehˉ. (Maꞈhtehˍ 6:33) Chi ve lehˬ Peˍtruˆ awˬ pon awˬ bon cawˬ jaˇ ve tehꞈ ngaˬ hui gʼa mawˬ ve yoˬ. Peˍtruˆ a shaꞈ teꞈ kuiˬ hkʼaw Gʼuiˬ sha ve kanˉ te ve a yeˇ uiˍ jaˇ tehꞈ shawˍ ve yoˬ. Leh Peˍteˍkoˆteˍ 33 hkʼawꞈ htaˇ, Peˍtruˆ haꞈ hanˉ ve hkʼaw bon maˍ leh laiˉ hinˉ gʼaˇ awˬ laꞈ gʼawˇ hpehꞈ la ve yoˬ. (Tcuh yaˇ 2:14, 37-41) Peuˬ hkʼawꞈ nawˉ Saˍmaˍriˆ chaw leh buiˇ shaˆ aˉ naˆ chaw laiˉ gʼaˇ Yeˍsuˆ awˬ hkʼaˇ suhˍ gʼaꞈ kʼai tuˬ Peˍtruˆ ga piˇ gʼa ve yoˬ. (Tcuh yaˇ 8:14-17; 10:44-48) Chaw teˇ ceuˬ le le Hkriꞈ yaˇ hpehꞈ la tuˬ Yaˬhoˉvaˬ Peˍtruˆ htaꞈ awˬ vuiˬ piˇ ve lehˬ daꞈ jaˇ ve yoˬ.

12. Peˍtruˆ ve awˬ lawn ngaˬ hui awˬ gʼuˇ nuˇ kuiˬ htaꞈ pa maˇ gʼa sheˍ tehꞈ dawˇ ve kʼo, aˬ htoꞈ ma htaꞈ tawnˇ taˍ cawˇ ve le?

¹² Ngaˬ hui awˬ gʼaˇ maˇ nuˇ tuˬ Yaˬhoˉvaˬ ga laˇ tuˬ yoˬ. Ngaˬ hui ve awˬ gʼaˇ nuˇ kuiˬ maˇ cawˬ tcuh gaˇ ve maw jaˇ˗oˬ ve kaꞈ te maˇ gʼa sheˍ ve, maˇ heˆ leh ngaˬ hui ve awˬ gʼaˇ nuˇ kuiˬ Peˍtruˆ aꞈ kehˉ cawˬ maˇ ve kʼo, ngaˬ hui caˉ leh awˬ gʼaˇ maˇ kʼawꞈ nuˇ tuˬ Yaˬhoˉvaˬ awˬ gʼaˇ peꞈ laˇ tuˬ yoˬ. (Chiˇ mvuh ve 94:17-19) Awˬ viˉ awˬ nyi hawˉ hkʼaˆ teˇ gʼaˇ, hawˉ hkʼaˆ chawˇ hawˉ hkʼaˆ teˇ geh zuhꞈ ve laiˉ hkʼawꞈ gaˬ˗oˬ ve awˬ lawn htaꞈ teˇ geh nyi sheˍ. Shaˉhkiˆhkanˍ ve chaw hpehꞈ la htaˇ, yawˇ chi hkʼe maˇ kʼawꞈ te˗o. Yaꞈ hkʼaˇ, teˇ pawˆ pawˆ kʼo, yawˇ maˇ daꞈ ve awˬ ceuˬ te gaˇ sheˍ ve yoˬ. Chi htaꞈ yawˇ tawˍ daꞈ gʼaˇ tuˬ aˬ htoꞈ ma ga piˇ ve le? Yawˇ kʼoˆ ve, “Yaˬhoˉvaˬ ngaˬ hui htaꞈ awˬ gʼaˇ peꞈ laˇ jaˇ ve . . . , Yaˬhoˉvaˬ kʼoˆ laˇ ve hkʼe [caˉ leh] a shaꞈ teꞈ kuiˬ hkʼaw yuˬ yehˇ gʼa tuˬ ngaˬ gʼa henˇ ve . . . Yaˬhoˉvaˬ ve daꞈ kehˬ ve awˬ ha hpu ngaˬ hui htaꞈ ga laˇ tcuh ve kʼo, Yaˬhoˉvaˬ ngaˬ htaꞈ yehˇ laˇ ve lehˬ ngaˬ awˬ hpfuhˇ shiˍ jaˇ tehꞈ dawˇ leh ngaˬ maˇ biˇ ve chaw hpehꞈ ve htawˇ, Yaˬhoˉvaˬ ngaˬ htaꞈ ga laˇ leh awˬ gʼaˇ peꞈ laˇ sheˍ ve yoˬ.”

13. Tcuh yaˇ liꞈ 4:13, 29, 31 hkʼaw kʼoˆ taˍ ve hkʼe, Peˍtruˆ ve awˬ lawn htaꞈ ngaˬ hui hkʼaˬ hkʼe henˇ yuˬ gʼa tuˬ le? (Awˬ han htaꞈ nyi sheˍ.)

¹³ Ngaˬ hui gʼa henˇ˗oˬ ve hkʼa shuˍ Peˍtruˆ chaw yaˇ htaꞈ kawˆ ve pa taw, yawˇ venˇ baˆ uiˍ ve laiˉ pawˆ te yaꞈ ve yoˬ. Yaꞈ hkʼaˇ, peuˬ hkʼawꞈ nawˉ Peˍtruˆ haꞈ  hanˉ ve cawˬ tuˬ bon lawˬ htaˇ, Yaˬhoˉvaˬ ga piˇ ve yoˬ. (Tcuh yaˇ 4:13, 29, 31 gʼaw sheˍ.) Ngaˬ hui kaꞈ chaw yaˇ htaꞈ kawˆ ve gʼaˇ hpehꞈ ve yoˬ. Yaˇ nehˬ teˇ gʼaˇ Hawˆ meh ve awˬ lawn htaꞈ teˇ geh nyi sheˍ. Naˍziˬ uˉ peunˍ ve awˬ yanˇ htaˇ, yawˇ Jaˬmaˬniˬ mvuhˇ miˬ lo chehˇ ve yoˬ. Oˇ ve teˇ yanˇ chaw yaˇ “Hiˆleuˇ!” kʼoˆ tuˬ nyiˉ piˇ ve yoˬ. Chi kʼoˆ gaˇ ve lehˬ Hiˆleuˇ! ngaˬ hui htaꞈ ga laˇ gʼa ve yoˬ. Hawˆ lehˬ liꞈ henˇ kuiˬ lo ve awˬ chawˇ maˇ heˆ leh liꞈ maˍ paˍ saˍ laꞈ “Hiˆleuˇ!” kʼoˆ tuˬ nyiˉ piˇ ve pa taw, yawˇ kʼoˆ leh laiˉ pawˆ awˬ gʼaˇ nuˇ ve yoˬ. Chi hkʼe kʼoˆ ve Hawˆ ve awˬ pa awˬ e shiˍ htaˇ, yawˇ htaꞈ maˇ deˇ piˇ. Yaꞈ hkʼaˇ, awˬ pa awˬ e yawˇ haꞈ hanˉ ve cawˬ tuˬ Yaˬhoˉvaˬ ga piˇ tuˬ kaꞈ teˇ geh bon lawˬ ve yoˬ. Hawˆ Yaˬhoˉvaˬ htaꞈ gʼaˇ va leh awˬ pa awˬ e ga laˇ tcuh htaˇ, awˬ tehˬ ve awˬ lawn htaꞈ kʼoˆ tuˬ yawˇ haꞈ hanˉ ve yoˬ. Peuˬ hkʼawꞈ nawˉ Hawˆ kʼoˆ ve, “Yaˬhoˉvaˬ ngaˬ htaꞈ maˇ baˬ taˉ laˇ jaw.” c

14. Nyi haꞈ shaˉ paˍ awˬ gʼaˇ nuˇ ve chaw htaꞈ hkʼaˬ hkʼe ga piˇ gʼa tuˬ le?

¹⁴ Yaˬhoˉvaˬ leh Yeˍsuˆ ngaˬ hui htaꞈ dawˇ law chehˇ ve yoˬ. Peˍtruˆ Yeˍsuˆ htaꞈ chiˇ baˬ peuˬ hkʼawꞈ nawˉ yawˇ a shaꞈ teꞈ kuiˬ hkʼaw a yeˇ uiˍ jaˇ ve teˇ ceuˬ gʼa dawˇ cheˆ ve yoˬ. Chi ve lehˬ yawˇ Yeˍsuˆ ve awˬ laꞈ gʼawˇ maˇ te˗o ve, maˇ heˆ leh yawˇ awˬ gʼaˇ maˇ nuˇ leh Yeˍsuˆ awˬ hkʼaˇ suh caˉ leh gʼaꞈ kʼai tuˬ ve laˇ? Peˍtruˆ dawˇ cheˆ gʼa tuˬ ga piˇ gʼa ve teˇ ceuˬ lehˬ, yawˇ Yeˍsuˆ kʼoˆ ve tawˇ hkawˇ htaꞈ dawˇ nyi ve yoˬ. Chi awˬ gʼuˇ suhˍ htaˇ Yeˍsuˆ Peˍtruˆ htaꞈ kʼoˆ piˇ ve, Peˍtruˆ ve yonˍ hkʼaˇ yonˍ yeˬ tuˬ Yeˍsuˆ Yaˬhoˉvaˬ geh bon lawˬ ve yoˬ. Peˍtruˆ awˬ viˉ awˬ nyi yonˍ hkʼaˇ hpawˇ awˬ gʼaˇ hehnˇ la tuˬ ga piˇ gʼa ve tehꞈ Yeˍsuˆ yonˍ ve yoˬ. (Luˉkaꞈ 22:31, 32) Ngaˬ hui kaꞈ hkʼa shuˍ shuˍ, a shaꞈ teꞈ kuiˬ hkʼaw a yeˇ uiˍ jaˇ ve awˬ lawn gʼa dawˇ cheˆ htaˇ, ngaˬ hui caˉ leh ka tiꞈ yeˬ gʼa tuˬ Yaˬhoˉvaˬ nyi haꞈ shaˉ paˍ htaꞈ cuˇ leh ga laˇ ve tehꞈ ngaˬ hui yonˍ gʼa ve yoˬ. (Eˇfeˇsuꞈ 4:8, 11) Awˬ viˉ awˬ nyi teˇ gʼaˇ Pawˇluꞈ meh ve nyi haꞈ shaˉ paˍ te laˬ maw jaˇ˗oˬ leh awˬ viˉ awˬ nyi htaꞈ awˬ gʼaˇ piˇ tuˬ coˇ caˇ ve yoˬ. Awˬ gʼaˇ nuˇ ve  chaw htaꞈ yawˇ kʼoˆ piˇ ve, yawˇ hui awˬ tehˬ ve htaꞈ shiˍ la ve Yaˬhoˉvaˬ hkʼaˬ hkʼe ga laˇ ve htaꞈ dawˇ nyi sheˍ. Yaˬhoˉvaˬ lehˬ haꞈ pehnˇ uiˍ jaˇ ve tehꞈ yawˇ hui yonˍ gʼa tuˬ Pawˇluꞈ ga piˇ ve yoˬ. Yaˬhoˉvaˬ yawˇ htaꞈ dawˇ law chehˇ sheˍ ve yoˬ. Pawˇluꞈ kʼoˆ ve, “awˬ viˉ awˬ nyi laiˉ gʼaˇ awˬ gʼaˇ nuˇ ve htaꞈ ngaˬ gʼa mawˬ ve yoˬ. Yaꞈ hkʼaˇ, yawˇ hui htaꞈ Yaˬhoˉvaˬ ga piˇ ve pa taw, caˉ leh awˬ gʼaˇ maˇ nuˇ ve yoˬ.”

15. Maꞈhtehˍ liꞈ 6:33 hkʼaw awˬ tehˬ hpehꞈ la ve tehꞈ Peˍtruˆ leh Hawˆ ve awˬ lawn hkʼaˬ hkʼe hpeuꞈ maw laˇ ve le?

¹⁵ Peˍtruˆ leh tcuh yaˇ hui a shaꞈ teꞈ kuiˬ hkʼaw loˍ ve awˬ ceuˬ cawˬ tuˬ Yaˬhoˉvaˬ nyi haꞈ shaˉ piˇ ve hkʼa shuˍ, ngaˬ hui kaꞈ a shaꞈ teꞈ kuiˬ hkʼaw yawˇ ve kanˉ a yeˇ uiˍ jaˇ tehꞈ shawˍ ve kʼo, yawˇ nyi haꞈ shaˉ laˇ tuˬ yoˬ. (Maꞈhtehˍ 6:33) Maꞈ lonˉ 2 pawˆ teˇ pawˆ peuˬ hkʼawꞈ nawˉ, chi awˬ gʼuˇ suhˍ htaˇ gʼa henˇ kʼai peuˬ ve Hawˆ gʼuˇ suhˍ peuˍ ve te tuˬ dawˇ nyi ve yoˬ. Yaꞈ hkʼaˇ, yawˇ haˍ gʼawˇ jaˇ leh gʼuˇ suhˍ peuˍ ve te ve kʼo, yawˇ awˬ to htaꞈ hu gʼa tuˬ ve laˇ tehꞈ maˇ yonˍ gʼa ve yoˬ. Yawˇ ve a shaꞈ teꞈ kuiˬ hkʼaw loˍ ve awˬ ceuˬ Yaˬhoˉvaˬ nyi haꞈ shaˉ laˇ tuˬ ve le naˍ, toˇ nyi shehˍ hpaˇ guiˇ la ve awˬ yanˇ htaˇ, oˇ ve teˇ shinˉ hkʼaw teˇ nyi le le yawˇ Gʼuiˬ sha ve kanˉ te ve yoˬ. Oˇ ve teˇ shinˉ peuˬ hkʼawꞈ nawˉ, toˇ nyi shehˍ hpaˇ yawˇ htaꞈ liꞈ hpeu peꞈ laˇ ve hkʼaw hpu teˇ diˬ keu taˍ laˇ ve htaꞈ gʼa mawˬ htaˇ, yawˇ cheˆ˗ehˬ kʼai ve yoˬ. Yaꞈ hkʼaˇ, hpu oˇ ve a shu peꞈ laˇ ve toˇ nyi shehˍ hpaˇ yawˇ htaꞈ maˇ gʼa kʼoˆ piˇ. Hpu oˇ ve yawˇ laiˉ ha pa gʼuˇ suhˍ peuˍ ve te tuˬ yehˇ lawꞈ ve yoˬ. Chi ve lehˬ Hawˆ Yaˬhoˉvaˬ yawˇ htaꞈ nyi haꞈ shaˉ laˇ gʼa ve tehꞈ yonˍ gʼa tuˬ te piˇ ve yoˬ. Oˇ ve teˇ yanˇ tanˬ leh yawˇ ve a shaꞈ teꞈ kuiˬ hkʼaw Yaˬhoˉvaˬ ve kanˉ te ve a yeˇ uiˍ jaˇ tehꞈ shawˍ ve yoˬ.—Maˍlaˍhkiˆ 3:10.

16. Peˍtruˆ ve awˬ lawn leh yawˇ bvuhꞈ taˍ ve liꞈ htaꞈ aˬ htoꞈ ma te ngaˬ hui a yeˇ yuˬ cawˇ ve le?

¹⁶ Peˍtruˆ Yeˍsuˆ htaꞈ kʼoˆ piˇ jaw ve, “ngaˬ geh lo tawˆ kʼai˗o.” Yaꞈ hkʼaˇ, Peˍtruˆ lawˬ ve hkʼe Yeˍsuˆ maˇ te ve pa taw, yawˇ ha lehˬ jaˇ leh Yeˍsuˆ Peˍtruˆ htaꞈ kaꞈ maˇ chiˇ baˬ piˇ jaw ve yoˬ. Peˍtruˆ ka tiꞈ yeˬ ve tcuh yaˇ hpehꞈ leh Hkriꞈ yaˇ awˬ pon daꞈ ve henˇ yuˬ gʼa tuˬ Yeˍsuˆ caˉ leh Peˍtruˆ htaꞈ maˍ piˇ ve yoˬ. Yeˍsuˆ Peˍtruˆ htaꞈ maˍ piˇ ve laiˉ lawn ngaˬ hui kaꞈ henˇ yuˬ gʼa ve yoˬ. Awˉ lawˉ peuˇ ve Hkriꞈ yaˇ htaꞈ bvuhꞈ piˇ ve liꞈ 2 daw hkʼaw henˇ yuˬ gʼa tuˬ ve awˬ lawn teˇ hpaˍ leh awˬ nu ve awˬ lawn kaꞈ Peˍtruˆ bvuhꞈ taˍ ve yoˬ. Gʼuˇ suhˍ teˇ lawn hkʼaw Peˍtruˆ yawˇ ve liꞈ hkʼaw bvuhꞈ taˍ ve htaꞈ kʼoˆ leh chi beuꞈ teˇ co˗e ngaˬ hui awˬ pon hkʼaˬ hkʼe yuˬ yehˇ gʼa ve htaꞈ teˇ geh henˇ tuˬ yoˬ.