1. Liꞈ henˇ kuiˬ lo ve awˬ chawˇ maˇ heˆ leh kanˉ te kuiˬ lo ve awˬ chawˇ aˬ htoꞈ ma ve awˬ lawn na laˇ ve le?

 Liꞈ teˇ geh henˇ ve awˬ chawˇ maˇ heˆ leh kanˉ teˇ geh te ve awˬ chawˇ, nawˬ ve yonˍ hkʼaˇ htaꞈ na laˇ ve kʼo, hkʼaˬ hkʼe dawˇ tuˬ ve le? Maˇ heˆ leh nawˬ dawˇ haˍ tuˬ ve laˇ? Maˇ˗awˍ ve chaw chi hkʼe dawˇ ve yoˬ. Yaꞈ hkʼaˇ, yawˇ hui ve na hkawˇ na ve chaw hkʼaˬ hkʼe dawˇ ve leh yawˇ aˬ htoꞈ ma htaꞈ yonˍ ve, shiˍ tuˬ te laˇ ve yoˬ. Leh chi ve ngaˬ hui yawˇ hui geh daꞈ ve awˬ lawn sha tanˇ hto maˍ piˇ tuˬ awˬ hkʼaˇ cawˬ ve yoˬ. Teˇ pawˆ pawˆ kʼo, ngaˬ hui yonˍ ve maˇ heˆ leh ngaˬ hui geh gʼawˬ daꞈ gaˇ ve htaꞈ pa taw ceh yawˇ hui na laˇ ve yoˬ. Chi hkʼe hpehꞈ ve lehˬ, ngaˬ hui ve yonˍ hkʼaˇ htaꞈ caˉ daꞈ ve maˇ heˆ heˆ ve awˬ lawn yawˇ hui gʼa kaˇ jaw ve yoˬ. (Tcuh yaˇ 28:22) Laiˉ gʼaˇ “shu ve venˇ baˆ htaꞈ maˇ hpehˇ piˇ puiˉ ve chaw” leh “haiˬ jaˇ ve chaw” chi hkʼe ve “awˬ leh meuˇ ve awˬ nyi awˬ haˉ” hkʼaw ngaˬ hui chehˇ ve yoˬ.—2 Tiˆmoˉseˍ 3:1, 3.

2. Aˬ htoꞈ ma te ngaˬ hui nyi ma nuˇ nehˬ ve chaw hpehꞈ gaˇ ve le?

² Nawˬ htawˇ dawˇ nawˬ dawˇ cawˬ ve ‘awˬ nu ve chaw ngaˬ ve yonˍ hkʼaˇ htaꞈ gʼawˬ daꞈ gaˇ ve kʼo, ngaˬ nyi ma gawˬ lehˍ ve hkʼaw hkʼaˬ hkʼe kʼoˆ piˇ gʼa tuˬ le?’ Nawˬ htaꞈ ga laˇ gʼa ve lehˬ nyi ma nuˇ nehˬ ve yoˬ. Nyi ma nuˇ nehˬ ve chaw lehˬ awˬ nu ve chaw yawˇ htaꞈ nyi ma zuhˆ tuˬ te piˇ htaˇ, haˆ maˇ beuꞈ leh hkʼaˬ hkʼe yaw hkʼawꞈ piˇ tuˬ maˇ shiˍ htaˇ kaꞈ maˇ dawˇ maˇ ve yoˬ. (Tawˇ naˉ ve 16:32) Hkʼaˬ htaˆ kaꞈ nyi ma nuˇ nehˬ ve chaw hpehꞈ ve lehˬ maˇ sha ve tehꞈ nawˬ dawˇ ve yoˬ hehˉ. Yaꞈ hkʼaˇ, nawˬ te gʼa ve yoˬ. Nawˬ leuˉ leh nyi ma nuˇ nehˬ ve chaw hkʼaˬ hkʼe hpehꞈ gʼa tuˬ le? Nawˬ ve yonˍ hkʼaˇ htaꞈ gʼawˬ daꞈ gaˇ ve chaw cawˬ ve kʼo, nawˬ nyi ma nuˇ nehˬ ve hkʼaw hkʼaˬ hkʼe yaw hkʼawꞈ piˇ gʼa tuˬ le? Leh nawˬ awˬ pa awˬ e hpehꞈ ve kʼo, yaˇ ve yonˍ hkʼaˇ kʼoˆ maˍ piˇ leh nyi ma nuˇ nehˬ ve hkʼaw te gʼa tuˬ nawˬ hkʼaˬ hkʼe ga piˇ gʼa tuˬ le? Chi ve teˇ hpaˍ teˇ geh henˇ tuˬ yoˬ.

3. Nyi ma nuˇ nehˬ ve chaw lehˬ awˬ gʼaˇ nuˇ ve maˇ heˆ tehꞈ aˬ htoꞈ ma te ngaˬ hui kʼoˆ gʼa ve le? (2 Tiˆmoˉseˍ 2:24, 25)

³ Nyi ma nuˇ nehˬ ve chaw lehˬ awˬ gʼaˇ nuˇ ve maˇ heˆ. Awˬ gʼaˇ hehnˇ ve chaw hpehꞈ ve yoˬ. Dawˇ haˍ ve awˬ lawn gʼa hpuˇ htaˇ, yawˇ nyi ma gawˬ lehˍ te tuˬ gʼa coˇ caˇ jaˇ. Nyi ma nuˇ nehˬ ve lehˬ ‘Gʼuiˬ sha ve awˬ ha hpu ve awˬ shiˍ nawꞈ ve hkʼaw’ teˇ ceuˬ hpehꞈ ve yoˬ. (Gaˍlaˍtiˆ 5:22, 23) Heˍlaˍsaˆ hkawˇ “nyi ma nuˇ nehˬ ve” tehꞈ kʼoˆ gaˇ ve lehˬ, iˉ mvuhˇ hteunˍ haiˬ jaˇ ve htaꞈ meuˇ la tuˬ te piˇ ve yoˬ. Yaꞈ hkʼaˇ, yawˇ meuˇ la˗oˬ ve htawˇ awˬ gʼaˇ hehnˇ jaˇ sheˍ. Chaw yaˇ lehˬ awˬ yanˇ teˇ yanˇ hkʼaw ceh tiˉ awˬ gʼaˇ nuˇ ve leh awˬ gʼaˇ hehnˇ ve hpehꞈ kʼai gʼa˗aw laˇ? Ngaˬ hui te gʼa ve htawˇ ngaˬ hui ve awˬ gʼaˇ awˬ shaˉ htaꞈ pa taw maˇ heˆ. Ngaˬ hui htaꞈ ga laˇ gʼa ve a yeˇ uiˍ jaˇ ve lehˬ Yaˬhoˉvaˬ geh daꞈ kehˬ ve awˬ ha hpu gʼa tuˬ lawˬ cawˇ ve yoˬ. Nyi ma nuˇ nehˬ te gʼa˗oˬ ve chaw laiˉ gʼaˇ ve awˬ lawn htaꞈ ngaˬ hui gʼa mawˬ ve yoˬ. Yaˬhoˉvaˬ ve Shaˉhkiˆhkanˍ ve chaw tawˍ taˍ paˍ yawˇ hui htaꞈ nyi ma zuhˆ tuˬ te piˇ ve htawˇ, yawˇ hui nyi ma nuˇ nehˬ ve tehꞈ hpeuꞈ maw piˇ leh chi hkʼe te piˇ ve htaꞈ mawˬ ve chaw Yaˬhoˉvaˬ ve Shaˉhkiˆhkanˍ ve chaw htaꞈ daꞈ ve hpawˇ nyi mawˬ ve yoˬ. (2 Tiˆmoˉseˍ 2:24, 25 gʼaw sheˍ.) Nawˬ nyi ma nuˇ nehˬ ve htawˇ hkʼaˬ hkʼe te awˬ gʼaˇ cawˬ ve chaw hpehꞈ gʼa tuˬ le?

4. Iˉcaˆ nyi ma nuˇ nehˬ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁴ Nyi ma nuˇ nehˬ ve lehˬ awˬ hpfuhˇ hkʼaˆ jaˇ ve tehꞈ Liꞈ hpu hkʼaw laiˉ gʼaˇ ve awˬ lawn htaꞈ gʼa mawˬ ve yoˬ. Iˉcaˆ ve awˬ lawn htaꞈ teˇ geh nyi sheˍ. Hpiˇliˇtiˆ chaw ve awˬ ti Geˍraˆ venˇ hkʼaw Iˉcaꞈ chehˇ htaˇ, Aˍbraˍhanˍ ve awˬ ceˬ nanˬ bawˍ duˇ taˍ ve teˇ bawˍ le le htaꞈ awˬ chawˇ awˬ paˆ hkawehˉ ve pa taw jeꞈ gʼaˆ keu piˇ ve yoˬ. Yaꞈ hkʼaˇ, yawˇ hui htaꞈ awˬ lawn te daꞈ ve aꞈ kehˉ nyi ma nuˇ nehˬ ve te piˇ leh nanˬ bawˍ teˇ kaˬ lo kʼawꞈ duˇ ve yoˬ. Yawˇ chi hkʼe te tuˬ coˇ caˇ jaˇ. (Awˬ hkuiˉ puiˍ 26:12-18) Yawˇ htaꞈ awˬ nu ve chaw shoꞈ shaꞈ piˇ ve htawˇ, yawˇ nyi ma nuˇ nehˬ ve cawˬ tuˬ aˬ htoꞈ ma ga piˇ ve le? Iˉcaˆ lehˬ Aˍbraˍhanˍ nyi ma nuˇ nehˬ ve hkʼaw shoꞈ shaꞈ ve awˬ lawn gu ve htaꞈ gʼa mawˬ leh Saˍraˇ “nyi ma nuˇ nehˬ ve leh gawˬ lehˍ chehˇ puiˉ ve” awˬ lawn htaꞈ kaꞈ yawˇ gʼa mawˬ jaw ve yoˬ.—1 Peˍtruˆ 3:4-6; Awˬ hkuiˉ puiˍ 21:22-34.

5. Hkriꞈ yaˇ hpehꞈ ve awˬ pa awˬ e yaˇ nyi ma nuˇ nehˬ ve chaw hpehꞈ gʼa tuˬ maˍ piˇ gʼa ve tehꞈ aˬ htoꞈ ma ve awˬ lawn gʼa mawˬ ve le?

⁵ Awˬ pa awˬ e hpehꞈ ve chaw˗oˬ, yaˇ nyi ma nuˇ nehˬ ve chaw hpehꞈ tuˬ maˍ piˇ gʼa ve yoˬ. Mehˆsi 17 hkʼawꞈ ve awˬ lawn htaꞈ teˇ geh nyi sheˍ. Mehˆsi lehˬ liꞈ henˇ kuiˬ lo maˇ heˆ leh hto toˇ kuiˬ awˬ ti lo nyi ma zuhˆ ve chaw htaꞈ gʼa mawˬ daꞈ ve yoˬ. Mehˆsi ve awˬ pa awˬ e lehˬ yawˇ nyi ma nuˇ nehˬ ve chaw hpehꞈ tuˬ maˍ piˇ ve yoˬ. Yawˇ hui kʼoˆ ve, “nyi ma zuhˆ ve te tawˆ la ve lehˬ sha jaˇ tehꞈ chi teˇ hkui yawˇ hui ve yaˇ na gʼa la ve yoˬ. Yaꞈ hkʼaˇ, a shu yawˇ awˬ to htaꞈ yuˬ tiˍ gʼaˇ leh nyi ma zuhˆ ve maˇ gʼa te tawˆ la tuˬ gʼa coˇ caˇ jaˇ ve yoˬ.” Mehˆsi nyi ma nuˇ nehˬ ve chaw hpehꞈ tuˬ awˬ lawn gʼa shiˍ ve ha lehˬ jaˇ.

6. Bon lawˬ ve lehˬ ngaˬ hui nyi ma nuˇ nehˬ ve chaw hpehꞈ gʼa tuˬ hkʼaˬ hkʼe ga laˇ gʼa ve le?

⁶ Ngaˬ hui nyi ma zuhˆ tuˬ te laˇ ve chaw htaꞈ gʼa mawˬ daꞈ ve kʼo, hkʼaˬ hkʼe te tuˬ ve le? Tawˇ pa haˉ te kʼo, Yaˬhoˉvaˬ maˇ heˆ leh Liꞈ hpu htaꞈ caˉ daꞈ ve shu maˇ daꞈ ve kʼoˆ laˇ htaˇ, Yaˬhoˉvaˬ geh daꞈ kehˬ ve awˬ ha hpu lawˬ leh chi hkʼe ve awˬ yanˇ htaˇ nyi ma nuˇ nehˬ ve tehꞈ hpeuꞈ maw piˇ tuˬ yawˇ geh cuˇ yiˍ lawˬ sheˍ. Ngaˬ hui maˇ te cawˇ ve awˬ hkʼaˇ oˇ ve teˇ gʼaˇ htaꞈ te hkʼawꞈ piˇ ve kʼo, hkʼaˬ hkʼe te tuˬ le? Ngaˬ hui bon teˇ pawˆ kʼawꞈ lawˬ leh awˬ gʼuˇ suhˍ teˇ pawˆ yawˇ htaꞈ chi aꞈ kehˉ daꞈ ve te piˇ gʼa tuˬ, dawˇ nyi sheˍ. Ngaˬ hui ve te hkʼaˇ dawˇ hkʼaˇ htaꞈ yuˬ tiˍ gʼaˇ leh nyi ma nuˇ nehˬ ve tehꞈ hpeuꞈ maw piˇ tuˬ, Yaˬhoˉvaˬ daꞈ kehˬ ve awˬ ha hpu ngaˬ hui htaꞈ peꞈ laˇ gʼa ve tehꞈ yonˍ gʼa ve yoˬ.

7. Liꞈ hpu teˇ tawn tawn tawnˇ gʼa tuˬ coˇ caˇ ve lehˬ a shu yawˇ awˬ to yuˬ tiˍ gʼaˇ tuˬ hkʼaˬ hkʼe ga laˇ gʼa ve le? (Tawˇ naˉ ve 15:1, 18)

⁷ Ngaˬ hui nyi ma zuhˆ tuˬ te laˇ htaˇ, Liꞈ hpu teˇ tawn tawn ngaˬ hui ve tawˇ hkawˇ htaꞈ yuˬ tiˍ gʼaˇ tuˬ ga laˇ gʼa ve yoˬ. Leh Liꞈ hpu awˬ tawn chi ve htaꞈ tawnˇ gʼa tuˬ Yaˬhoˉvaˬ ve daꞈ kehˬ ve awˬ ha hpu ngaˬ hui htaꞈ ga laˇ gʼa ve yoˬ. (Yoˇhanˬ 14:26) Tawˇ pa haˉ te kʼo, Tawˇ naˉ ve liꞈ hkʼaw awˬ liˇ awˬ hkʼaˇ teˇ tawn tawn htaꞈ ngaˬ hui gʼaw ve kʼo, nyi ma nuˇ nehˬ ve chaw hpehꞈ tuˬ ga laˇ gʼa ve yoˬ. (Tawˇ naˉ ve 15:1,  18 gʼaw sheˍ.) Chi hkʼoˆ kaꞈ, nyiˉ laˇ ve gʼa hpuˇ htaˇ, a shu yawˇ awˬ to htaꞈ yuˬ tiˍ gʼaˇ tuˬ Tawˇ naˉ ve liꞈ awˬ nu ve awˬ tawn hkʼaw awˬ bon cawˬ ve htaꞈ kʼoˆ taˍ sheˍ ve yoˬ.—Tawˇ naˉ ve 10:19; 17:27; 21:23; 25:15.

8. Na laˇ ve chaw awˬ pon aˬ htoꞈ ma te ngaˬ hui hkʼa dehꞈ dawˇ nyi piˇ cawˇ ve le?

⁸ Ngaˬ hui nyi ma nuˇ nehˬ ve chaw hpehꞈ tuˬ ga laˇ gʼa ve teˇ ceuˬ lehˬ hkʼa dehꞈ na gʼa ve yoˬ. (Tawˇ naˉ ve 19:11) Hkʼa dehꞈ na gʼa ve chaw lehˬ yawˇ ve yonˍ hkʼaˇ htaꞈ caˉ daꞈ ve awˬ nu ve chaw maˇ daꞈ ve kʼoˆ piˇ htaˇ, a shu yawˇ awˬ to htaꞈ yuˬ tiˍ gʼaˇ ve yoˬ. Chaw oˇ ve teˇ hpaˍ ve na hkawˇ leh yaw ve tawˇ hkawˇ a ngeu hkʼaw lonˉ htaꞈ tehˆ taˍ ve yoˬ. Maˇ˗awˍ ve kʼo a ngeu hkʼaw lonˉ lehˬ iˉ kaˆ hkʼoˆ lo a ciˉ ceh tiˉ tawˆ la taˍ ve htaꞈ ngaˬ hui gʼa mawˬ ve yoˬ. Chi htaꞈ pa taw, ngaˬ hui yonˍ hkʼaˇ htaꞈ caˉ daꞈ ve na laˇ ve chaw htaꞈ maˇ hkʼawꞈ piˇ sheˍ htaˇ, yawˇ aˬ htoꞈ ma ve awˬ hkʼaˇ htaꞈ na gaˇ ve ngaˬ hui maˇ shiˍ ve yoˬ.—Tawˇ naˉ ve 16:23.

9. Hkʼa dehꞈ na gʼa ve lehˬ Giˉdonˍ Eˇhpaˍrenˍ ve awˬ ceuˬ awˬ hkʼaˇ htaꞈ hkʼawꞈ piˇ htaˇ, nyi ma nuˇ nehˬ ve tehꞈ hkʼaˬ hkʼe hpeuꞈ maw piˇ ve le?

⁹ Eˇhpaˍrenˍ ve awˬ ceuˬ awˬ hkʼaˇ htaꞈ Giˉdonˍ hkʼawꞈ piˇ ve awˬ hkʼaˇ htaꞈ ngaˬ hui teˇ geh nyi sheˍ. Meˇdiˍanˍ chaw hui htaꞈ ca bawˆ˗e ve aˬ htoꞈ ma te yawˇ hui htaꞈ maˇ jehˬ laˇ ve le tehꞈ kʼoˆ leh venˇ baˆ taˍ ve yoˬ. Chi aˬ htoꞈ ma pa taw yawˇ hui chi hkʼe taw taw nyi ma zuhˆ tuˬ te piˇ ve le? Yaꞈ hkʼaˇ, aˬ htoꞈ ma awˬ hkʼaˇ htaꞈ pa taw maˇ kʼoˆ, Giˉdonˍ hkʼa dehꞈ na gʼa leh Eˇhpaˍrenˍ ve awˬ ceuˬ awˬ hkʼaˇ hkʼaˬ hkʼe dawˇ ve htaꞈ coˇ caˇ leh hkʼa dehꞈ dawˇ nyi piˇ ve  yoˬ. Giˉdonˍ nyi ma nuˇ nehˬ ve hkʼaw yawˇ hui htaꞈ tawˇ yaw piˇ ve yoˬ. Leh “yawˇ hui nyi ma gawˬ kʼai ve yoˬ.”—Suhˉ jehˬ ve 8:1-3.

10. Ngaˬ hui ve yonˍ hkʼaˇ htaꞈ awˬ nu ve chaw na laˇ htaˇ, hkʼaˬ hkʼe hkʼawꞈ piˇ cawˇ ve le? (1 Peˍtruˆ 3:15)

¹⁰ Teˇ pawˆ pawˆ kʼo liꞈ henˇ kuiˬ lo ve awˬ chawˇ maˇ heˆ leh kanˉ te kuiˬ lo ve awˬ chawˇ Liꞈ hpu hkʼaw ve awˬ liˇ awˬ hkʼaˇ htaꞈ caˉ daꞈ ve ngaˬ hui htaꞈ na laˇ ve yoˬ hehˉ. Liꞈ hpu hkʼaw ve awˬ liˇ awˬ hkʼaˇ daꞈ jaˇ ve tehꞈ ngaˬ hui coˇ caˇ leh yawˇ htaꞈ kʼoˆ maˍ piˇ ve yoˬ. Yaꞈ hkʼaˇ, yawˇ ve dawˇ hkʼaˇ htaꞈ ngaˬ hui yawˆ yan piˇ cawˇ ve yoˬ. (1 Peˍtruˆ 3:15 gʼaw sheˍ.) Chi htaꞈ pa taw, ngaˬ hui geh awˬ lawn cawˬ gaˇ ve, maˇ heˆ leh lawˇ nyi laˇ gaˇ ve tehꞈ dawˇ ve aꞈ kehˉ yawˇ na laˇ ve lehˬ, ngaˬ hui yawˇ geh leuˉ leh kʼawꞈ shiˍ daꞈ gaˇ tuˬ te laˇ ve tehꞈ dawˇ sheˍ. Yaꞈ hkʼaˇ, na laˇ ve chaw aˬ htoꞈ ma awˬ hkʼaˇ hpehꞈ ve htawˇ maˇ kʼoˆ, ngaˬ hui coˇ caˇ leh nyi ma nuˇ nehˬ ve hkʼaw hkʼawꞈ piˇ cawˇ ve yoˬ. Ngaˬ hui hkʼawꞈ piˇ ve lehˬ yawˇ yonˍ ve awˬ ceuˬ, awˬ hkʼaˇ cawˬ˗aw laˇ tehꞈ dawˇ nyi tuˬ te piˇ ve yoˬ. Yawˇ maˇ na sha ve tawˇ yaw laˇ ve htawˇ ngaˬ hui nuˇ nehˬ ve hkʼaw hkʼawꞈ piˇ gʼa ve yoˬ.—Roˉmaꞈ 12:17.

11-12. (a) Awˬ nu ve chaw na laˇ ve htaꞈ ngaˬ hui maˇ hkʼawꞈ piˇ sheˍ htaˇ aˬ htoꞈ ma htaꞈ dawˇ nyi cawˇ ve le? (Awˬ han htaꞈ nyi sheˍ.) (b) Chi hkʼe te ve lehˬ ngaˬ hui leuˉ leh yawˇ geh kʼawꞈ yaw daꞈ gʼa tuˬ hkʼaˬ hkʼe ga laˇ gʼa ve le?

¹¹ Awˬ nu ve chaw ngaˬ hui htaꞈ na laˇ htaˇ, yawˇ aˬ htoꞈ ma pa taw na laˇ ve tehꞈ ngaˬ hui dawˇ nyi tuˬ a yeˇ uiˍ jaˇ. Tawˇ pa haˉ te kʼo, kanˉ teˇ geh te ve awˬ chawˇ aˬ htoꞈ ma pa taw, ngaˬ hui paw ve awˬ nyi maˇ te ve le tehꞈ na laˇ ve kʼo, Shaˉhkiˆhkanˍ ve chaw pyawˍ ve awˬ ceuˬ maˇ te gʼa ve tehꞈ, yawˇ htawˇ dawˇ nawˬ dawˇ cawˬ ve laˇ tehꞈ dawˇ nyi sheˍ. Ngaˬ hui paw ve awˬ nyi maˇ te ve lehˬ kanˉ te kuiˬ lo ha lehˬ ve maˇ cawˬ tuˬ te laˇ ve tehꞈ yawˇ dawˇ ve yoˬ hehˉ. Chi hkʼe hpehꞈ ve kʼo, yawˇ maˇ dawˇ hkiˉ jaˇ tuˬ ga piˇ gʼa ve lehˬ kanˉ te kuiˬ lo yawˇ awˬ nu ve awˬ chawˇ htaꞈ a yeˇ yuˬ piˇ ve awˬ bon uiˍ jaˇ tehꞈ kʼoˆ piˇ gʼa ve yoˬ. Kanˉ te kuiˬ lo ngaˬ hui kaꞈ ha lehˬ ve cawˬ tuˬ te gaˇ ve tehꞈ yawˇ na gʼa tuˬ ga piˇ gaˇ ve yoˬ. Chi hkʼe te ve lehˬ Liꞈ hpu hkʼaw paw ve awˬ nyi te ve htaꞈ hkʼaˬ hkʼe kʼoˆ taˍ ve yawˇ geh yaw daꞈ gʼa tuˬ ga laˇ gʼa ve yoˬ.

¹² Maˇ cawˇ maˇ hawˍ daꞈ ve awˬ lawn awˬ nu ve chaw na laˇ htaˇ, awˬ hkʼaˇ chi hkʼa shuˍ yehˇ gʼa ve yoˬ. Tawˇ pa haˉ te kʼo, Yaˬhoˉvaˬ ve Shaˉhkiˆhkanˍ ve chaw hawˉ hkʼaˆ chawˇ hawˉ hkʼaˆ, yaˇ miˇ chawˇ yaˇ miˇ teˇ geh zuhꞈ ve maˇ cawˇ tehꞈ kʼoˆ ve awˬ hkʼaˇ liꞈ henˇ kuiˬ lo awˬ chawˇ kʼoˆ ve yoˬ hehˉ. Yawˇ chi hkʼe na laˇ ve lehˬ Shaˉhkiˆhkanˍ ve chaw htaꞈ caˉ daꞈ ve yawˇ maˇ na gʼa ve pa taw laˇ? Yawˇ ve awˬ chawˇ maˇ heˆ leh yawˇ ve awˬ viˉ awˬ nyi hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ teˇ geh zuhꞈ ve cawˬ ve hehˉ laˇ? Maˇ heˆ leh hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ teˇ geh zuhꞈ ve htaꞈ ngaˬ hui maˇ dawˇ cawˇ ve tehꞈ yawˇ dawˇ ve hehˉ laˇ? Hkʼaˬ hkʼe hpehꞈ ve htawˇ maˇ kʼoˆ, ngaˬ hui teˇ gʼaˇ le le htaꞈ haꞈ leh a shu yawˇ ve a shaꞈ teꞈ hkʼaˇ leuˆ yuˬ gʼa ve tehꞈ yawˇ hui yonˍ gʼa tuˬ te piˇ cawˇ ve yoˬ. b (1 Peˍtruˆ 2:17) Ngaˬ hui chi hkʼe te˗oˬ ve kʼo, Liꞈ hpu hkʼaw ve awˬ liˇ awˬ hkʼaˇ awˬ bon cawˬ ve htaꞈ caˉ daꞈ ve yawˇ geh yaw daꞈ gʼa ve yoˬ.

13. Gʼuiˬ sha htaꞈ yonˍ ve chaw lehˬ shaˉ hkiˆ maˇ cawˬ kaꞈ yonˍ ve tehꞈ dawˇ ve chaw htaꞈ nawˬ gʼa mawˬ daꞈ htaˇ yawˇ htaꞈ hkʼaˬ hkʼe ga piˇ gʼa tuˬ le?

¹³ Ngaˬ hui ve yonˍ hkʼaˇ htaꞈ maˇ dawˇ cawˇ ve chaw htaꞈ gʼa mawˬ daꞈ ve kʼo, yawˇ yonˍ ve awˬ ceuˬ htaꞈ caˉ daꞈ ve ngaˬ hui hkʼa peu˗eˬ shiˍ ve tehꞈ maˇ kʼoˆ cawˇ. (Tiˇtuˆ 3:2) Tawˇ pa haˉ te kʼo, Gʼuiˬ sha htaꞈ yonˍ ve chaw lehˬ shaˉ hkiˆ maˇ cawˬ kaꞈ yonˍ ve tehꞈ liꞈ henˇ kuiˬ lo awˬ chawˇ kʼoˆ laˇ ve kʼo, a shaꞈ teꞈ ve yawˇ hkʼaˇ yawˇ cawˬ la gʼa ve htaꞈ yawˇ yonˍ leh chi ve htaꞈ caˉ daꞈ ve yawˇ leuˉ leh shiˍ ve tehꞈ ngaˬ hui kʼoˆ cawˇ˗aw laˇ? Gʼuiˬ sha htaꞈ yonˍ ve chaw lehˬ shaˉ hkiˆ maˇ cawˬ kaꞈ yonˍ ve tehꞈ yawˇ kʼoˆ ve yoˬ. Yawˇ awˬ nu ve chaw kʼoˆ ve hkʼe kʼoˆ ve yoˬ hehˉ. A shaꞈ teꞈ ve yawˇ hkʼaˇ yawˇ cawˬ la gʼa ve tehꞈ kʼoˆ leh yawˇ geh gʼawˬ daꞈ ve aꞈ kehˉ awˬ lawn chi htaꞈ caˉ daꞈ ve ngaˬ hui yawˇ htaꞈ awˬ lawn awˬ leuˉ piˇ gʼa ve yoˬ. Tawˇ pa haˉ te kʼo, Gʼuiˬ sha hpanˍ taˍ ve awˬ ceuˬ htaꞈ caˉ daꞈ ve shaˉ hkiˆ vehˆsaiˉ jw.org hkʼaw yawˇ nyi tuˬ ngaˬ hui ga piˇ gʼa ve yoˬ. Vehˆsaiˉ hkʼaw ve liꞈ kʼoˆ yawˇ gʼaw ve, maˇ heˆ leh VDO gʼa nyi˗oˬ htaˇ, yawˇ nawˬ geh yaw daꞈ gaˇ tuˬ yoˬ hehˉ. Shu ve dawˇ hkʼaˇ htaꞈ  ngaˬ hui yawˆ yan piˇ ve kʼo, yawˇ Liꞈ hpu hkʼaw leuˉ leh shiˍ gaˇ tuˬ ngaˬ hui ga piˇ gʼa ve yoˬ.

14. Shaˉhkiˆhkanˍ ve chaw awˬ nu ve chaw maˇ gʼa dawˇ yaꞈ tuˬ Nen ngaˬ hui ve vehˆsaiˉ htaꞈ hkʼaˬ hkʼe yehˇ ve le?

¹⁴ Yaˇ nehˬ Nen meh ve teˇ gʼaˇ ngaˬ hui ve vehˆsaiˉ yehˇ leh awˬ nu ve chaw Shaˉhkiˆhkanˍ ve chaw htaꞈ maˇ gʼa dawˇ yaꞈ tuˬ ga piˇ ve yoˬ. Yawˇ kʼoˆ ve, “awˬ chawˇ teˇ gʼaˇ ngaˬ chaˬ nyi tehˆ nyi hpawˇ maˇ yonˍ leh, awˬ tehˬ ve htaꞈ yonˍ cawˇ ve htawˇ Liꞈ hpu hkʼaw kaˇ puiˇ kaˇ lao htaꞈ yonˍ ve tehꞈ kʼoˆ ve yoˬ.” Nen ve yonˍ hkʼaˇ htaꞈ caˉ daꞈ ve awˬ chawˇ chi ve teˇ gʼaˇ maˇ kʼoˆ tcuh ve yoˬ. Chi hkʼe hpehꞈ ve pa taw vehˆsaiˉ jw.org hkʼaw “Chaˬ nyi tehˆ nyi ve Liꞈ hpu htaꞈ caˉ daꞈ ve” yawˇ ve awˬ chawˇ htaꞈ nyi tcuh ve yoˬ. Peuˬ leh Nen ve awˬ chawˇ vehˆsaiˉ hkʼaw ca nyi ve laˇ tehꞈ yawˇ chaˬ nyi ve yoˬ. Peuˬ leh Awˬ hkuiˉ puiˍ ve a shaꞈ liꞈ kʼoˆ hkʼaw ve awˬ lawn Nen yawˇ geh yaw daꞈ ve yoˬ. Nawˬ kaꞈ chi hkʼa shuˍ te gʼa ve yoˬ.

15. Liꞈ henˇ kuiˬ lo yaˇ ve awˬ chawˇ yawˇ ve yonˍ hkʼaˇ htaꞈ caˉ daꞈ ve maˇ daꞈ ve awˬ lawn na piˇ htaˇ, awˬ pa awˬ e yaˇ nyi ma nuˇ nehˬ ve hkʼaw kʼoˆ maˍ piˇ gʼa tuˬ hkʼaˬ hkʼe ga piˇ gʼa ve le?

¹⁵ Liꞈ henˇ kuiˬ lo ve awˬ chawˇ maˇ heˆ leh yonˍ hkʼaˇ htaꞈ caˉ daꞈ ve maˇ daꞈ ve awˬ lawn awˬ chawˇ na laˇ htaˇ, yaˇ nuˇ nehˬ ve hkʼaw hkʼawꞈ piˇ gʼa tuˬ awˬ hkʼaˇ awˬ pa awˬ e maˍ piˇ gʼa ve yoˬ. Yaˇ hkʼawꞈ piˇ gʼa tuˬ teˇ hpaˍ hpaˍ kʼo yehˬ kʼa hkʼaw oˉ kʼoˍ pui htaˇ, yaˇ geh te jawˬ ve yoˬ. Leh liꞈ henˇ kuiˬ lo yaˇ htaꞈ na piˇ ve awˬ lawn ceh tiˉ yawˇ hui kʼoˆ daꞈ ve yoˬ. Na hkawˇ chi ve teˇ hpaˍ hkʼaˬ hkʼe hkʼawꞈ piˇ gʼa tuˬ yaˇ geh yaw daꞈ ve yoˬ. Peuˬ hkʼawꞈ nawˉ nuˇ nehˬ ve hkʼaw yaw piˇ leh shu na gaˇ tuˬ awˬ pa awˬ e yaˇ htaꞈ te maˍ piˇ ve yoˬ.—Awˇ ceˍ awˇ fa “ Teˇ geh gu ve lehˬ nawˬ ve yehˬ kʼa htaꞈ ga laˇ gʼa ve yoˬ.”

16-17. Teˇ geh gu ve lehˬ yaˇ htaꞈ hkʼaˬ hkʼe ga piˇ gʼa tuˬ le?

¹⁶ Yehˬ kʼa hkʼaw teˇ geh te jawˬ ve lehˬ yaˇ yawˇ ve yonˍ hkʼaˇ yonˍ yeˬ tuˬ ga piˇ gʼa leh awˬ nu ve chaw htaꞈ kʼoˆ maˍ piˇ puiˉ tuˬ kaꞈ ga piˇ gʼa ve yoˬ. Ga piˇ gʼa ve teˇ ceuˬ lehˬ, Laiˉ tawn cawˬ ve “Yaˇ nehˬ na ve na hkawˇ” leh vehˆsaiˉ jw.org hkʼaw “Yaˇ nehˬ ve dawˇ hkʼaˇ htaꞈ te jawˬ tcuh ve” hkʼaw nyi gʼa ve yoˬ. Chi ve 2 lawn lehˬ yaˇ nehˬ yawˇ hui ve yonˍ hkʼaˇ htaꞈ  yonˍ yeˬ tuˬ ga piˇ gʼa leh yawˇ hui tawˇ yaw jaw ve hkʼe yaw tuˬ kaꞈ ga piˇ gʼa ve yoˬ. Yehˬ kʼa hkʼaw oˉ kʼoˍ pui htaˇ chi ve 2 lawn htaꞈ teˇ geh te jawˬ ve kʼo, teˇ gʼaˇ le le kaꞈ yawˇ hui ve yonˍ hkʼaˇ nuˇ nehˬ ve leh na sha ve hkʼaw kʼoˆ maˍ piˇ gʼa tuˬ awˬ hkʼaˇ shiˍ ve yoˬ.

¹⁷ Yaˇ nehˬ teˇ gʼaˇ Maꞈhtehˍ meh ve kʼoˆ ve, yehˬ kʼa hkʼaw teˇ geh te jawˬ ve lehˬ yawˇ htaꞈ ga laˇ gʼa jaˇ ve yoˬ. Yehˬ kʼa hkʼaw teˇ geh oˉ kʼoˍ pui htaˇ yawˇ leh awˬ pa awˬ e liꞈ henˇ kuiˬ lo awˬ chawˇ na laˇ hkʼeh jaˇ ve awˬ lawn htaꞈ hpfuhˆ nyi ve yoˬ. Yawˇ kʼoˆ ve, “ngaˬ leh ngaˬ pa ngaˬ e awˬ chawˇ na laˇ tuˬ ve awˬ lawn htaꞈ dawˇ nyi ve yoˬ. Ngaˬ hui teˇ geh hpfuhˆ nyi leh hkʼaˬ hkʼe hkʼawꞈ piˇ tuˬ te jawˬ ve yoˬ. Chi ve aˬ htoꞈ ma te ngaˬ chi hkʼe yonˍ ve, hkʼa tawˍ lehˆ hkʼawꞈ piˇ gʼa tuˬ ga laˇ gʼa jaˇ. Chi hkʼe te htaˇ awˬ nu ve chaw htaꞈ nuˇ nehˬ ve hkʼaw hkʼawꞈ piˇ gʼa tuˬ yoˬ tehꞈ yonˍ gʼa leh sha jaˇ ve yoˬ.”

18. Kawˇlawˇsehˇ liꞈ 4:6 hkʼaw kʼoˆ taˍ ve hkʼe, a yeˇ uiˍ jaˇ ve lehˬ aˬ htoꞈ ma le?

¹⁸ Ngaˬ hkʼa dehꞈ kʼoˆ maˍ piˇ leh awˬ hkʼaˇ ca ve htawˇ, teˇ gʼaˇ le le na gaˇ ve maˇ heˆ. Ga laˇ gʼa jaˇ ve awˬ ceuˬ lehˬ ngaˬ hui nuˇ nehˬ ve leh na sha ve hkʼaw yaw piˇ cawˇ ve yoˬ. (Kawˇlawˇsehˇ 4:6 gʼaw sheˍ.) Ngaˬ hui ve yonˍ hkʼaˇ awˬ nu ve chaw htaꞈ kʼoˆ piˇ ve lehˬ, bawˉ shiˍ baˬ peu ve htaꞈ tehˆ daꞈ gʼa ve yoˬ. Ngaˬ hui a yehˉ yehˉ baˬ peu piˇ ve, maˇ heˆ leh gʼaˇ hteꞈ baˬ peu piˇ kaꞈ gʼa ve yoˬ. Ngaˬ hui a yehˉ yehˉ baˬ peu piˇ ve kʼo, yawˇ hui haꞈ yuˬ sha leh ngaˬ hui geh kʼawꞈ leˍ guiˇ gaˇ tuˬ yoˬ hehˉ. Chi ve hkʼa shuˍ shuˍ, ngaˬ hui ve yonˍ hkʼaˇ htaꞈ nuˇ nehˬ ve leh na sha ve hkʼaw yaw piˇ ve kʼo, ngaˬ hui yaw daꞈ ve chaw kaꞈ na gaˇ leh kʼawꞈ yaw daꞈ gaˇ tuˬ yoˬ. Yaꞈ hkʼaˇ, ngaˬ hui ve yonˍ hkʼaˇ htaꞈ nyi cha laˇ ve chaw htaꞈ gʼa mawˬ daꞈ ve maˇ heˆ leh ngaˬ hui htaꞈ gʼawˬ daꞈ gʼaˇ gaˇ ve chaw htaꞈ gʼa mawˬ daꞈ puiˉ la ve yoˬ hehˉ. Chi hkʼe hpehꞈ ve kʼo yawˇ hui geh tawˇ taˇ kʼawꞈ yaw daꞈ. (Tawˇ naˉ ve 26:4) Yaꞈ hkʼaˇ, chi hkʼe ve chaw htaꞈ mawˬ daꞈ ve lehˬ hkʼaˬ nyiˇ gʼaˇ maˇ heˆ. Ngaˬ hui nuˇ nehˬ ve hkʼaw tawˇ yaw piˇ ve kʼo maˇ˗awˍ ve chaw na gaˇ tuˬ yoˬ.

19. Ngaˬ hui ve yonˍ hkʼaˇ kʼoˆ maˍ piˇ htaˇ nyi ma nuˇ nehˬ ve tehꞈ hpeuꞈ maw piˇ tuˬ aˬ htoꞈ ma ga laˇ ve le?

¹⁹ Ngaˬ hui nyi ma nuˇ nehˬ ve chaw hpehꞈ tuˬ coˇ caˇ ve kʼo, awˬ bon gʼa jaˇ ve tehꞈ gʼa mawˬ ve yoˬ. Awˬ nu ve chaw nawˬ htaꞈ deˇ laˇ ve maˇ heˆ leh kʼoˆ guiˇ gʼuiˬ guiˇ laˇ htaˇ, nawˬ nyi ma nuˇ nehˬ ve chaw hpehꞈ gʼa tuˬ Yaˬhoˉvaˬ geh bon lawˬ sheˍ. Dawˇ hkʼaˇ maˇ shuˍ daꞈ htaˇ, nyi ma nuˇ nehˬ ve chaw hpehꞈ ve kʼo, maˇ gʼawˬ daꞈ leh maˇ deˇ daꞈ tuˬ ga laˇ gʼa ve tehꞈ tawnˇ taˍ sheˍ. Chi hkʼoˆ kaꞈ, nawˬ nuˇ nehˬ ve leh yawˆ yan ve hkʼaw hkʼawꞈ piˇ ve kʼo, nawˬ htaꞈ na laˇ ve chaw Shaˉhkiˆhkanˍ ve chaw leh Liꞈ hpu hkʼaw awˬ tehˬ ve htaꞈ daꞈ ve hpawˇ dawˇ tuˬ ga piˇ gʼa ve yoˬ. Nawˬ ve yonˍ hkʼaˇ “hkʼaˬ hkʼe yaw hkʼawꞈ piˇ tuˬ, hkʼa dehꞈ gu taˍ˗oꞈ.” Leh “nyi ma nuˇ nehˬ leh yawˆ yan ve awˬ hkʼaw lo te˗o.” (1 Peˍtruˆ 3:15) Nawˬ nyi ma nuˇ nehˬ ve htawˇ awˬ gʼaˇ cawˬ ve chaw hpehꞈ ve tehꞈ coˇ caˇ leh te sheˍ.