1. Tcuh yaˇ Peˍtruˆ maˇ suh sheˍ htaˇ, yawˇ aˬ htoꞈ ma te tuˬ dawˇ pawnˍ piˇ ve le?

 Peˍtruˆ maˇ maw kʼo, yawˇ gʼa suh˗e tuˬ ve htaꞈ shiˍ ve yoˬ. Peˍtruˆ Gʼuiˬ sha ve kanˉ ka tiꞈ yeˬ ve hkʼaw laiˉ hkʼawꞈ te ve yoˬ. Yawˇ Yeˍsuˆ geh teˇ geh bon gʼa maˍ ve, buiˇ shaˆ aˉ naˆ chaw htaꞈ bon maˍ piˇ leh uˉ peunˍ ve kawˍmiˍtiˍ hkʼaw kaꞈ teˇ gʼaˇ hpehꞈ ve yoˬ. Chi hkʼe ceh tiˉ maˇ heˆ. Peˍtruˆ maˇ suh sheˍ htaˇ, Yaˬhoˉvaˬ Peˍtruˆ htaꞈ kanˉ kʼawꞈ piˇ ve yoˬ. Aˬ laˬ hkʼe 62-64 hkʼawꞈ C.E. htaˇ, Gʼuiˬ sha ve awˬ ha hpu Peˍtruˆ htaꞈ dawˇ pawnˍ piˇ leh 1 Peˍtruˆ liꞈ leh 2 Peˍtruˆ liꞈ bvuhꞈ tcuh ve yoˬ. Liꞈ chi ve 2 daw lehˬ, yawˇ suh peuˬ hkʼawꞈ nawˉ Hkriꞈ yaˇ htaꞈ ga piˇ gʼa tuˬ yoˬ tehꞈ yawˇ dawˇ law taˍ ve yoˬ.—2 Peˍtruˆ 1:12-15.

2. Aˬ htoꞈ ma te Peˍtruˆ ve liꞈ lehˬ oˇ htaˇ teˇ co˗e Hkriꞈ yaˇ awˬ pon a yeˇ uiˍ jaˇ ve le?

² Yonˍ hkʼaˇ hkʼa shuˍ ve awˬ chawˇ ‘tuꞈ ve hkanˍ ve leh lawˇ nyi piˇ ve laiˉ ceuˬ htaꞈ gʼa hpuˇ’ chehˇ htaˇ, Peˍtruˆ yawˇ ve liꞈ yawˇ bvuhꞈ ve yoˬ. (1 Peˍtruˆ 1:6) Haiˬ ve chaw lehˬ Hkriꞈ yaˇ awˬ moˍ hkʼaw ve chaw htaꞈ maˇ heˆ heˆ ve awˬ lawn maˍ piˇ leh, Hkriꞈ yaˇ Gʼuiˬ sha mehˆ gʼuˇ suhˍ lo maˇ daꞈ ve awˬ ceuˬ htaꞈ te tuˬ kaꞈ jehˬ piˇ ve yoˬ. (2 Peˍtruˆ 2:1, 2, 14) Chi hkʼoˆ kaꞈ, maˇ maw ve awˬ yanˇ hkʼaw Yeˍruˆsaˍlehnˍ venˇ lo chehˇ ve Hkriꞈ yaˇ “awˬ ceuˬ hkʼa peu˗eˬ ve lehˬ, awˬ leh meuˇ gaˬ la paˇ neˇ” ve htaꞈ gʼa hpuˇ tuˬ yoˬ. Chi ve lehˬ Roˉmaꞈ ve maꞈ yaˇ Yeˍruˆsaˍlehnˍ venˇ leh bon yehˬ lonˉ htaꞈ kaꞈ te luˬ ve yoˬ. (1 Peˍtruˆ 4:7) Oˇ ve teˇ yanˇ ve Hkriꞈ yaˇ tuꞈ ve hkanˍ ve htaꞈ yeunˇ hkanˍ gʼaˇ tuˬ, yawˇ hui aˬ htoꞈ ma gʼa te cawˇ ve htaꞈ shiˍ leh awˬ gʼuˇ suhˍ hpawˇ tuꞈ ve hkanˍ ve gʼa hpuˇ htaˇ gu hehnˇ taˍ gʼa tuˬ, hkʼaˬ hkʼe gʼa te cawˇ ve htaꞈ shiˍ tuˬ, Peˍtruˆ ve liꞈ yawˇ hui htaꞈ ga piˇ ve yoˬ hehˉ. b

3. Aˬ htoꞈ ma te ngaˬ hui Peˍtruˆ ve liꞈ 2 daw htaꞈ a yeˇ yuˬ cawˇ ve le?

³ Peˍtruˆ awˉ lawˉ peuˇ ve Hkriꞈ yaˇ htaꞈ liꞈ bvuhꞈ piˇ ve htawˇ, Yaˬhoˉvaˬ lehˬ Peˍtruˆ bvuhꞈ taˍ ve liꞈ, Liꞈ hpu hkʼaw kaꞈ cawˬ tcuh taˍ ve yoˬ. Chi htaꞈ pa taw, chi beuꞈ teˇ co˗e ngaˬ hui kaꞈ Peˍtruˆ ve liꞈ htaꞈ awˬ bon gʼa ve yoˬ. (Roˉmaꞈ 15:4) Chi beuꞈ teˇ co˗e ngaˬ hui Yaˬhoˉvaˬ mehˆ  gʼuˇ suhˍ lo maˇ daꞈ ve awˬ ceuˬ te ve chaw geh ngaˬ hui gʼa chehˇ ve pa taw, yawˇ ve kanˉ te tuˬ maˇ sha ve yoˬ. Chi hkʼoˆ kaꞈ, awˉ lawˉ peuˇ ve Hkriꞈ yaˇ Yeˍruˆsaˍlehnˍ venˇ leh bon yehˬ lonˉ htaꞈ te luˬ htaˇ, tuꞈ ve hkanˍ ve gʼa hpuˇ ve aꞈ kehˉ, maˇ maw ve awˬ yanˇ ngaˬ hui tuꞈ jaˇ hkanˍ jaˇ ve htaꞈ gʼa hpuˇ tuˬ yoˬ. Peˍtruˆ ve liꞈ 2 daw hkʼaw chi Yaˬhoˉvaˬ ve awˬ nyi htaꞈ law taˍ leh dawˇ law tcuhˉ taˍ tuˬ ga laˇ ve, chaw htaꞈ maˇ kawˆ˗o ve, leh teˇ gʼaˇ leh teˇ gʼaˇ, gʼaˇ hteꞈ haꞈ daꞈ tuˬ kaꞈ ga laˇ ve yoˬ. Chi hkʼoˆ kaꞈ, nyi haꞈ shaˉ paˍ Hkriꞈ yaˇ awˬ moˍ hkʼaw ve awˬ viˉ awˬ nyi yonˍ hkʼaˇ yonˍ yeˬ tuˬ, liꞈ chi ve 2 daw hkʼaw bvuhꞈ taˍ ve yawˇ hui htaꞈ ga piˇ ve yoˬ.

4. 2 Peˍtruˆ liꞈ 3:3, 4 hkʼaw kʼoˆ taˍ ve hkʼe, ngaˬ hui ve yonˍ hkʼaˇ htaꞈ heuˆ la kuiˬ hkʼaˬ hkʼe cawˬ ve le?

⁴ Chi beuꞈ teˇ co˗e maˇ˗awˍ ve chaw Liꞈ hpu hkʼaw tcuh kaˍ paˍ ve tawˇ hkawˇ htaꞈ maˇ yonˍ leh, haiˬ ve miˬ guiˬ awˬ leh meuˇ ve awˬ yanˇ gaˬ la tuˬ ngaˬ hui law maw jaˇ˗o ve tehꞈ, tawˍ taˍ paˍ ngaˬ hui htaꞈ kʼoˆ guiˇ gʼuiˬ guiˇ laˇ ve yoˬ. Leh chaw teˇ hpaˍ kʼoˆ ve, awˬ nyi oˇ ve maˇ gaˬ la taˬ. (2 Peˍtruˆ 3:3, 4 gʼaw sheˍ.) Chi hkʼe ve tawˇ hkawˇ yehˬ shehˍ hpaˇ, kanˉ teˇ geh te ve awˬ chawˇ, maˇ heˆ leh yehˬ kʼa hkʼaw ve chaw, yawˇ hui kʼoˆ ve htaꞈ ngaˬ hui gʼa kaˇ ve kʼo, chi ngaˬ hui ve yonˍ hkʼaˇ htaꞈ heuˆ la kuiˬ cawˬ leh ngaˬ hui maˇ yonˍ gʼa tuˬ kaꞈ te laˇ ve yoˬ. Yaꞈ hkʼaˇ, Peˍtruˆ kʼoˆ ve awˬ ceuˬ chi ngaˬ hui htaꞈ ga laˇ gʼa ve yoˬ.

5. Haiˬ ve miˬ guiˬ chi ve awˬ yanˇ hkʼaw ngaˬ hui cawˇ ve dawˇ hkʼaˇ cawˬ tuˬ aˬ htoꞈ ma ga laˇ ve le? (2 Peˍtruˆ 3:8, 9)

⁵ Aˬ htoꞈ ma te Yaˬhoˉvaˬ haiˬ ve miˬ guiˬ chi ve htaꞈ maˇ te luˬ sheˍ ve tehꞈ chaw teˇ hpaˍ dawˇ ve yoˬ. Yaꞈ hkʼaˇ, Peˍtruˆ ve liꞈ ngaˬ hui cawˇ ve dawˇ hkʼaˇ cawˬ tuˬ shaˍ tiꞈ peꞈ laˇ ve yoˬ. Awˬ nyi awˬ haˉ ve awˬ lawn htaꞈ caˉ daꞈ ve Yaˬhoˉvaˬ ve dawˇ hkʼaˇ lehˬ, ngaˬ hui htaꞈ peun daꞈ jaˇ. (2 Peˍtruˆ 3:8, 9 gʼaw sheˍ.) Teˇ hinˉ hkʼawꞈ ve awˬ nyi lehˬ, Yaˬhoˉvaˬ awˬ pon kʼo teˇ nyi ceh tiˉ hkʼe hpehꞈ leh yawˇ yeunˇ hkanˍ jaˇ ve yoˬ. Yaˬhoˉvaˬ chaw teˇ gʼaˇ htaꞈ kaꞈ maˇ te luˬ gaˇ ve yoˬ. Yaꞈ hkʼaˇ, yawˇ ve awˬ nyi gaˬ la htaˇ, haiˬ ve miˬ guiˬ chi htaꞈ te luˬ tuˬ yoˬ. Chi teˇ hkui leuˉ taˍ ve awˬ yanˇ miˬ guiˬ hkʼoˆ lo teˇ gʼaˇ le le htaꞈ hto maˍ piˇ tuˬ, ngaˬ hui daꞈ jaˇ ve awˬ vuiˬ gʼa ve yoˬ.

6. Ngaˬ hui “Gʼuiˬ sha ve awˬ nyi htaꞈ law taˍ leh dawˇ law chehˇ” tuˬ aˬ htoꞈ ma ga laˇ ve le? (2 Peˍtruˆ 3:11, 12)

⁶ Peˍtruˆ ngaˬ hui htaꞈ “Gʼuiˬ sha ve awˬ nyi htaꞈ law taˍ leh dawˇ law” chehˇ tuˬ awˬ gʼaˇ peꞈ laˇ ve yoˬ. (2 Peˍtruˆ 3:11, 12 gʼaw sheˍ.) Chi ve ngaˬ hui hkʼaˬ hkʼe te gʼa tuˬ le? Hpehꞈ gʼa ve kʼo miˬ guiˬ awˬ suhˉ hkʼaw ve a shaꞈ hkʼaˬ hkʼe hpehꞈ tuˬ, teˇ nyi le le ngaˬ hui hkʼa dehꞈ dawˇ nyi cawˇ ve yoˬ. Daꞈ jaˇ ve mvuhˇ haw awˬ shaˉ, awˬ bon cawˬ ve caˇ tuˬ mehˬ jaˇ ve, nawˬ haꞈ ve chaw kʼawꞈ teꞈ tu la ve htaꞈ haꞈ yuˬ piˇ ve, chi teˇ hpaˍ htaꞈ dawˇ mawˬ gʼa ve yoˬ. Leh Liꞈ hpu hkʼaw tcuh kaˍ paˍ ve tawˇ hkawˇ awˬ tehˬ hpehꞈ la˗oˬ ve htaꞈ caˉ daꞈ ve, ponˬ laˬ ve laiˉ hinˉ hkʼawꞈ htaˇ a shaꞈ teꞈ chehˇ jaw ve chaw htaꞈ gʼa maˍ piˇ ve htaꞈ kaꞈ dawˇ mawˬ gʼa ve yoˬ. Awˬ ceuˬ chi ve teˇ hpaˍ htaꞈ dawˇ nyi ve lehˬ, Yaˬhoˉvaˬ ve awˬ nyi htaꞈ law taˍ leh dawˇ nyi tcuhˉ taˍ tuˬ ga laˇ leh haiˬ ve miˬ guiˬ chi htaꞈ te luˬ tuˬ yoˬ tehꞈ yonˍ gʼa ve yoˬ. Awˬ gʼuˇ suhˍ hpawˇ daꞈ jaˇ ve awˬ ceuˬ ngaˬ hui htaꞈ law taˍ ve gʼa shiˍ htaˇ, maˇ heˆ heˆ maˍ ve ‘te yaꞈ ve awˬ hkʼaˇ suh maˇ gʼa sheh kʼai laˇ tuˬ’ gʼa shiˍ ve yoˬ.—2 Peˍtruˆ 3:17.

7. Chaw htaꞈ kawˆ ve ngaˬ hui htaꞈ heuˆ la kuiˬ hkʼaˬ hkʼe cawˬ ve le?

⁷ Ngaˬ hui Yaˬhoˉvaˬ ve awˬ nyi htaꞈ hkʼaˬ htaˆ kaꞈ dawˇ nyi htaˇ, chi ve ngaˬ hui awˬ nu ve chaw htaꞈ daꞈ ve awˬ lawn sha tanˇ hto maˍ piˇ gʼa tuˬ ga laˇ gʼa ve yoˬ. Yaꞈ hkʼaˇ, teˇ pawˆ pawˆ ngaˬ hui maˇ hto maˍ piˇ haˆ ve yoˬ. Aˬ htoꞈ ma pa taw le? Ngaˬ hui chaw htaꞈ kawˆ ve, maˇ heˆ leh awˬ nu ve chaw ngaˬ hui htaꞈ hkʼaˬ hkʼe dawˇ la ve htaꞈ dawˇ haˍ ve yoˬ. Peˍtruˆ kaꞈ chi hkʼa shuˍ dawˇ jaw ve yoˬ. Yeˍsuˆ htaꞈ suhˉ jehˬ piˇ ve teˇ haˉ htaˇ, yawˇ Yeˍsuˆ ve awˬ laꞈ gʼawˇ hpehꞈ ve tehꞈ maˇ kʼoˆ. Yawˇ Yeˍsuˆ htaꞈ maˇ shiˍ tehꞈ laiˉ pawˆ kʼoˆ ve yoˬ. (Maꞈhtehˍ 26:69-75) Chi hkʼe hpehꞈ ve htawˇ, peuˬ hkʼawꞈ nawˉ Peˍtruˆ yonˍ gʼa ve hkʼaw kʼoˆ ve, “yawˇ hui ho laˇ ve htaꞈ taˇ kawˆ, shoꞈ shaꞈ ve nyi ma kaꞈ taˇ cawˬ piˇ.” (1 Peˍtruˆ 3:14) Peˍtruˆ ve tawˇ hkawˇ chi ve ngaˬ hui kaꞈ chaw yaˇ htaꞈ kawˆ ve gʼaˇ hpehꞈ ve tehꞈ yonˍ gʼa ve yoˬ.

8. Ngaˬ hui chaw htaꞈ kawˆ ve gʼaˇ tuˬ aˬ htoꞈ ma ga laˇ ve le? (1 Peˍtruˆ 3:15)

 ⁸ Chaw htaꞈ kawˆ ve ngaˬ hui gʼaˇ tuˬ aˬ htoꞈ ma ga laˇ gʼa ve le? Peˍtruˆ kʼoˆ ve, “nawˬ hui ve nyi ma awˬ hkʼaw lo Hkriꞈ htaꞈ Jawˇ mawˇ yoˬ tehꞈ shawˍ taˍ leh yawˆ yan˗o.” ( 1 Peˍtruˆ 3:15 gʼaw sheˍ.) Chi teˇ hkui Yeˍsuˆ Jawˇ mawˇ hpehꞈ leh kanˇ paˆ hkʼaˬ hkʼe taw cawˬ ve htaꞈ dawˇ nyi sheˍ. Nawˬ awˬ nu ve chaw htaꞈ gʼa hto maˍ piˇ htaˇ, nawˬ kawˆ ve, maˇ heˆ leh dawˇ haˍ ve kʼo, chi teˇ hkui Yeˍsuˆ mvuhˇ naw ma hkʼoˆ Jawˇ mawˇ te chehˇ˗oˬ ve htaꞈ dawˇ nyi leh yawˇ geh teˇ geh mvuhˇ naw ma tcuh yaˇ laiˉ lanˬ gʼaˇ htaꞈ kaꞈ dawˇ nyi gʼa ve yoˬ. Chi hkʼoˆ kaꞈ, “mvuhˇ naw ma hkʼoˆ leh miˬ guiˬ hkʼoˆ ve kanˇ paˆ hkʼa peu˗eˬ” Yeˍsuˆ gʼa peuˬ˗oˬ ve htaꞈ dawˇ nyi gʼa ve yoˬ. Leh ‘miˬ guiˬ chi awˬ yanˇ leh htaˇ hkʼa gaˬ Yeˍsuˆ nawˬ geh hkʼaˬ htaˆ kaꞈ chehˇ tuˬ yoˬ.’ (Maꞈhtehˍ 28:18-20) Ngaˬ hui ve yonˍ hkʼaˇ htaꞈ kʼoˆ maˍ piˇ tuˬ “hkʼa dehꞈ gu taˍ˗oꞈ” tehꞈ Peˍtruˆ awˬ gʼaˇ peꞈ laˇ ve yoˬ. Kanˉ te kuiˬ lo ve chaw, liꞈ henˇ kuiˬ lo ve chaw, maˇ heˆ leh hto toˇ kuiˬ awˬ ti lo maˇ chehˇ htaˇ kaꞈ nawˬ hto maˍ piˇ gaˇ˗aw laˇ? Hkʼaˬ ve teˇ yanˇ nawˬ chi hkʼe te gʼa tuˬ awˉ lawˉ htaˇ kaꞈ dawˇ nyi sheˍ. Leh aˬ htoꞈ ma kʼoˆ maˍ piˇ gʼa tuˬ awˉ lawˉ htaˇ kaꞈ gu teh taˍ sheˍ. Nawˬ haꞈ hanˉ ve cawˬ tuˬ bon lawˬ leh nawˬ chaw htaꞈ kawˆ ve maˇ cawˬ tuˬ, Yaˬhoˉvaˬ ga laˇ gʼa ve yoˬ tehꞈ yonˍ gʼa ve yoˬ.—Tcuh yaˇ 4:29.

9. Teˇ pawˆ htaˇ Peˍtruˆ haꞈ pehnˇ ve maˇ hpeuꞈ maw piˇ ve hkʼaˬ hkʼe htaˇ le? (Awˬ han htaꞈ nyi sheˍ.)

⁹ Haꞈ pehnˇ ve hkʼaˬ hkʼe hpeuꞈ maw piˇ tuˬ Peˍtruˆ gʼa shiˍ ve yoˬ. Peˍtruˆ Yeˍsuˆ geh chehˇ htaˇ Yeˍsuˆ kʼoˆ ve, “nawˬ hui teˇ gʼaˇ leh teˇ gʼaˇ haꞈ daꞈ˗oꞈ tehꞈ,  ngaˬ nawˬ hui htaꞈ tawˇ awˬ suhˉ teˇ hkawˇ piˇ ve yoˬ. Ngaˬ nawˬ hui htaꞈ haꞈ ve hkʼe, nawˬ hui htawˇ teˇ gʼaˇ leh teˇ gʼaˇ haꞈ daꞈ˗oꞈ.” (Yoˇhanˬ 13:34) Yeˍsuˆ chi hkʼe maˍ piˇ ve htawˇ, Peˍtruˆ nyiˉ piˇ ve htaꞈ gʼa hpuˇ htaˇ, yawˇ awˬ gʼaˇ nuˇ leh buiˇ shaˆ aˉ naˆ chaw awˬ viˉ awˬ nyi hpehꞈ la ve chaw geh awˍ maˇ caˇ. Peˍtruˆ te ve awˬ ceuˬ lehˬ “maˇ heˆ ve htaꞈ kʼawꞈ te ve” tehꞈ Pawˇluꞈ kʼoˆ ve yoˬ. (Gaˍlaˍtiˆ 2:11-14) Peˍtruˆ yawˇ te yaꞈ ve htaꞈ haꞈ yuˬ leh oˇ ve teˇ pawˆ te yaꞈ ve awˬ lawn yawˇ htaꞈ maˍ piˇ ve yoˬ. Awˬ lawn chi ve Peˍtruˆ bvuhꞈ taˍ ve liꞈ 2 daw hkʼaw ngaˬ hui mawˬ gʼa ve yoˬ. Ngaˬ hui awˬ viˉ awˬ nyi htaꞈ haꞈ ve ceh maˇ heˆ. Gʼa te tawˆ la ve tehꞈ yawˇ kʼoˆ ve yoˬ.

10. Ngaˬ hui “nyi ma awˬ tawˬ hkʼa gaˬ teˇ gʼaˇ leh teˇ gʼaˇ haꞈ daꞈ” tuˬ aˬ htoꞈ ma ga laˇ ve le? (1 Peˍtruˆ 1:22)

¹⁰ Peˍtruˆ kʼoˆ ve, ngaˬ hui “awˬ viˉ awˬ nyi hui htaꞈ awˬ tehˬ awˬ na haꞈ hpehꞈ tuˬ” gʼa te cawˇ ve yoˬ. (1 Peˍtruˆ 1:22 gʼaw sheˍ.) Ngaˬ hui chi hkʼe haꞈ daꞈ ve cawˬ tuˬ “hteˇ ve cawˇ ve htaꞈ na yuˬ” leh a yeˇ uiˍ jaˇ ve teˇ ceuˬ “Gʼuiˬ sha lehˬ chaw mehˆ hpfuhˇ htaꞈ maˇ nyi ve” yoˬ. (Tcuh yaˇ 10:34, 35) Chi hkʼoˆ kaꞈ, Hkriꞈ yaˇ awˬ moˍ hkʼaw ve chaw teˇ hpaˍ htaꞈ ceh tiˉ ngaˬ hui haꞈ ve kʼo, Yeˍsuˆ ve tawˇ hkawˇ htaꞈ ngaˬ hui na yuˬ ve tehꞈ kʼoˆ maˇ gʼa. Yeˍsuˆ kaꞈ awˬ laꞈ gʼawˇ teˇ hpaˍ htaꞈ awˬ nu ve awˬ laꞈ gʼawˇ hui aꞈ kehˉ meuˆ daꞈ ve pa taw, ngaˬ hui kaꞈ awˬ nu ve chaw teˇ hpaˍ htaꞈ awˬ nu ve chaw aꞈ kehˉ meuˆ daꞈ ve lehˬ yaꞈ ve maˇ heˆ. (Yoˇhanˬ 13:23; 20:2) Yaꞈ hkʼaˇ, Peˍtruˆ ngaˬ hui htaꞈ shaˍ tiꞈ peꞈ laˇ ve, Hkriꞈ yaˇ awˬ moˍ hkʼaw ve chaw lehˬ, ngaˬ hui ve yehˬ kʼa hkʼaw ve chaw hkʼe hpehꞈ leh ‘awˬ viˉ awˬ nyi htaꞈ haꞈ hpehꞈ tuˬ’ gʼa te cawˇ ve yoˬ.—1 Peˍtruˆ 2:17.

11. Chaw yaˇ htaꞈ “nyi ma awˬ tawˬ hkʼa gaˬ” haꞈ ve aˬ htoꞈ ma kʼoˆ gaˇ ve le?

¹¹ Peˍtruˆ ngaˬ hui htaꞈ kʼoˆ laˇ sheˍ ve, “nyi ma awˬ tawˬ hkʼa gaˬ teˇ gʼaˇ leh teˇ gʼaˇ haꞈ daꞈ˗oꞈ.” Awˬ lawn chi ve Heˍlaˍsaˆ ve tawˇ hkawˇ “nyi ma awˬ tawˬ hkʼa gaˬ” kʼoˆ ve lehˬ, peuˬ laˬ htaˇ te jaw ve aꞈ kehˉ te ve yoˬ. Awˬ viˉ awˬ nyi ngaˬ hui nyi ma naˬ tuˬ te laˇ ve, maˇ heˆ leh ngaˬ hui maˇ dawˇ cawˇ ve teˇ ceuˬ ceuˬ htaꞈ te laˇ ve kʼo, ngaˬ hui yawˇ htaꞈ haꞈ ve tehꞈ maˇ hpeuꞈ maw piˇ gaˇ leh kʼawꞈ te hkʼawꞈ gaˇ ve yoˬ. Yaꞈ hkʼaˇ, ngaˬ hui te hkʼawꞈ ve kʼo, Gʼuiˬ sha nyi hkʼaˇ maˇ suh taˬ tehꞈ Peˍtruˆ Yeˍsuˆ geh gʼa henˇ ve yoˬ. (Yoˇhanˬ 18:10, 11) Peˍtruˆ kʼoˆ ve, “shu awˬ haiˬ te laˇ ve htawˇ, awˬ haiˬ taˇ kʼawꞈ te hkʼawꞈ. Shu hkʼa mvuhˇ hkʼa na kʼoˆ laˇ ve htawˇ, hkʼa mvuhˇ hkʼa na taˇ kʼawꞈ kʼoˆ hkʼawꞈ. Yaꞈ hkʼaˇ, yawˇ hui htaꞈ naꞈ piˇ˗oˆ.” (1 Peˍtruˆ 3:9) Chi htaꞈ pa taw, nawˬ awˬ viˉ awˬ nyi htaꞈ nyi ma awˬ tawˬ hkʼa gaˬ haꞈ ve kʼo, yawˇ nawˬ nyi ma naˬ tuˬ te laˇ ve htawˇ, yawˇ htaꞈ daꞈ ve te piˇ leh ha kʼaˉ piˇ ve yoˬ.

12. (a) Ngaˬ hui awˬ nu ve chaw htaꞈ haꞈ ve kʼo, aˬ htoꞈ ma te gaˇ sheˍ ve le? (b) VDO hkʼaw Cawˇ daꞈ hawˍ daꞈ ve lehˬ awˬ hpfuhˇ hkʼaˆ jaˇ ve laꞈ shawnˍ hpehꞈ ve tehꞈ awˬ viˉ awˬ nyi ve awˬ lawn nawˬ gʼa mawˬ htaˇ, nawˬ aˬ htoꞈ ma te gaˇ ve le?

¹² Chi hkʼoˆ kaꞈ, Peˍtruˆ ve liꞈ awˉ lawˉ teˇ daw hkʼaw tawˇ hkawˇ chi hkʼa shuˍ ve kaꞈ cawˬ ve yoˬ. Yawˇ Hkriꞈ yaˇ htaꞈ kʼoˆ piˇ ve, “teˇ gʼaˇ leh teˇ gʼaˇ, gʼaˇ hteꞈ haꞈ daꞈ˗oꞈ.” Haꞈ ve chi lehˬ venˇ baˆ hkʼaˬ nyiˇ ceuˬ htaꞈ ceh tiˉ hoˆ beh taˍ ve maˇ heˆ. Yaꞈ hkʼaˇ, ‘maˇ jaˇ ve venˇ baˆ htaꞈ beh taˍ gʼa ve yoˬ.’ (1 Peˍtruˆ 4:8) Ponˬ laˬ ve laiˉ hkʼawꞈ htaˇ, Yeˍsuˆ Peˍtruˆ htaꞈ venˇ baˆ hpehˇ piˇ ve awˬ lawn maˍ piˇ ve htaꞈ Peˍtruˆ dawˇ mawˬ ve yoˬ. Oˇ ve teˇ yanˇ Peˍtruˆ awˬ viˉ awˬ nyi htaꞈ venˇ baˆ “7 pawˆ” hpehˇ piˇ ve pa taw, yawˇ venˇ baˆ hpehˇ piˇ puiˉ jaˇ ve tehꞈ dawˇ ve yoˬ. Yeˍsuˆ Peˍtruˆ leh ngaˬ hui htaꞈ kaꞈ maˍ laˇ ve, ‘77 pawˆ hkʼa gaˬ’ venˇ baˆ gʼa hpehˇ piˇ ve yoˬ. Chi kʼoˆ gaˇ ve lehˬ, ngaˬ hui hkʼaˬ htaˆ kaꞈ venˇ baˆ gʼa hpehˇ piˇ ve yoˬ. (Maꞈhtehˍ 18:21, 22) Teˇ pawˆ pawˆ kʼo, awˬ nu ve chaw htaꞈ venˇ baˆ hpehˇ piˇ tuˬ haˍ jaˇ tehꞈ nawˬ dawˇ ve kʼo, chi hkʼe te tuˬ awˬ gʼaˇ taˇ nuˇ. Gʼuiˬ sha ve kanˉ te ve chaw kaꞈ teˇ pawˆ pawˆ kʼo, chi hkʼa shuˍ dawˇ ve yoˬ. A yeˇ uiˍ jaˇ ve lehˬ, awˬ viˉ awˬ nyi htaꞈ venˇ baˆ hpehˇ piˇ leh yawˇ geh cawˇ daꞈ hawˍ daꞈ ve cawˬ tuˬ te cawˇ ve yoˬ. c

13. Aˬ htoꞈ ma te nyi haꞈ shaˉ paˍ awˬ viˉ awˬ nyi htaꞈ nyi haꞈ shaˉ tuˬ maˇ sha ve le?

¹³ Yeˍsuˆ teꞈ tu la peuˬ hkʼawꞈ nawˉ, Peˍtruˆ htaꞈ “ngaˬ ve yawˬ teˇ hpaˍ htaꞈ haꞈ shaˉ˗oˆ” tehꞈ kʼoˆ piˇ ve  tawˇ hkawˇ htaꞈ Peˍtruˆ maˇ leunˇ gʼa ve yoˬ. (Yoˇhanˬ 21:16) Nawˬ nyi haꞈ shaˉ paˍ hpehꞈ ve kʼo, tawˇ hkawˇ oˇ ve htaꞈ nawˬ kaꞈ gʼa gʼaꞈ te cawˇ ve yoˬ. Yaꞈ hkʼaˇ, nyi haꞈ shaˉ paˍ lehˬ awˬ viˉ awˬ nyi htaꞈ nyi haꞈ shaˉ tuˬ sha ve maˇ heˆ. Awˉ lawˉ teˇ ceuˬ nyi haꞈ shaˉ paˍ lehˬ yehˬ kʼa hkʼaw ve chaw htaꞈ gʼa nyi haꞈ shaˉ sheˍ ve yoˬ. Yehˬ kʼa hkʼaw ve chaw htaꞈ awˬ to hpawˇ, nyi ma hpawˇ, yawˇ hui ve yonˍ hkʼaˇ leh Yaˬhoˉvaˬ geh meuˆ daꞈ tuˬ kaꞈ gʼa nyi haꞈ shaˉ piˇ ve yoˬ. Nyi haꞈ shaˉ paˍ lehˬ hto toˇ ve leh Hkriꞈ yaˇ awˬ moˍ hpawnˬ daꞈ ve hkʼaw hkʼawꞈ htaˇ kaꞈ daꞈ ve henˇ yuˬ tuˬ gʼa hpehꞈ piˇ ve yoˬ. Chi hkʼoˆ kaꞈ, Hkriꞈ yaˇ awˬ moˍ hpawnˬ daꞈ ve leh hpawnˬ daꞈ lonˉ hkʼaw kaꞈ yawˇ awˬ vuiˬ gʼa te ve yoˬ. Nyi haꞈ shaˉ paˍ teˇ hpaˍ hpaˍ naˆ tsuhˇ yehˬ lo caˉ daꞈ ve awˬ moˍ hkʼaw laiˉ gʼaˇ te chehˇ sheˍ ve yoˬ. Leh Nyi haꞈ shaˉ paˍ teˇ hpaˍ hpaˍ kʼo, Gʼuiˬ sha ve kanˉ hkʼaˇ yehˬ te ve hpawˇ awˬ han shawehˇ ve, maˇ heˆ leh yawˇ hui awˬ paˇ awˬ kui lo hpawnˬ daꞈ kuiˬ yehˬ te htaˇ ca ga piˇ ve yoˬ. Nyi haꞈ shaˉ paˍ kanˉ maˇ jaˇ ve htaꞈ ngaˬ hui gʼa mawˬ ve yoˬ.

14. Aˬ htoꞈ ma te nyi haꞈ shaˉ paˍ Gʼuiˬ sha ve yawˬ htaꞈ nyi haꞈ shaˉ cawˇ ve le? (1 Peˍtruˆ 5:1-4)

¹⁴ Peˍtruˆ nyi haꞈ shaˉ paˍ hui htaꞈ kʼoˆ piˇ ve, “Gʼuiˬ sha ve yawˬ awˬ moˍ htaꞈ hkʼa dehꞈ haꞈ shaˉ˗oˆ.” (1 Peˍtruˆ 5:1-4 gʼaw sheˍ.) Nawˬ nyi haꞈ shaˉ paˍ hpehꞈ ve kʼo, awˬ viˉ awˬ nyi htaꞈ haꞈ leh a yeˇ yuˬ piˇ gaˇ jaˇ ve tehꞈ ngaˬ hui shiˍ ve yoˬ. Yaꞈ hkʼaˇ, teˇ pawˆ pawˆ kʼo, nawˬ kanˉ maˇ jaˇ ve maˇ heˆ leh heuˬ jaˇ ve pa taw, awˬ viˉ awˬ nyi htaꞈ hkʼa dehꞈ nyi haꞈ shaˉ piˇ maˇ gʼa tehꞈ dawˇ ve yoˬ. Chi hkʼe hpehꞈ ve kʼo, nawˬ hkʼaˬ hkʼe te cawˇ ve le? Nawˬ dawˇ haˍ ve awˬ lawn Yaˬhoˉvaˬ htaꞈ kʼoˆ piˇ leh nawˬ awˬ viˉ awˬ nyi htaꞈ hkʼaˬ hkʼe taw ga piˇ gaˇ jaˇ ve kaꞈ yawˇ htaꞈ kʼoˆ piˇ sheˍ. Peˍtruˆ kʼoˆ ve, “chaw teˇ gʼaˇ gʼaˇ shu htaꞈ ga piˇ ve kʼo, Gʼuiˬ sha peꞈ laˇ ve awˬ gʼaˇ awˬ shaˉ htaꞈ cuˇ leh ga piˇ˗oˆ.” Nawˬ ve awˬ viˉ awˬ nyi chi teˇ hkui gu maˇ gʼa ve shoꞈ shaꞈ ve laiˉ ceuˬ gʼa hpuˇ ve yoˬ hehˉ. Yeˍsuˆ “yawˬ hawˉ shehˍ hpaˇ” hpehꞈ leh nawˬ aꞈ kehˉ awˬ viˉ awˬ nyi htaꞈ ga piˇ gʼa jaˇ ve tehꞈ tawnˇ taˍ sheˍ. Yeˍsuˆ lehˬ awˬ viˉ awˬ nyi htaꞈ chi teˇ hkui leh miˬ guiˬ awˬ suhˉ hkʼaw kaꞈ ga piˇ gʼa ve yoˬ. Chi htaꞈ pa taw, Yaˬhoˉvaˬ chi teˇ hkui nyi haꞈ shaˉ paˍ htaꞈ te tcuh gaˇ ve awˬ ceuˬ lehˬ, awˬ viˉ awˬ nyi htaꞈ haꞈ ve, a yeˇ yuˬ piˇ ve, leh “yawˬ awˬ moˍ mehˆ gʼuˇ suhˍ henˇ kuiˬ jawˬ kuiˬ hpehꞈ piˇ˗oˆ.”

15. Nyi haꞈ shaˉ paˍ teˇ gʼaˇ awˬ viˉ awˬ nyi htaꞈ a yeˇ hkʼaˬ hkʼe yuˬ piˇ ve le? (Awˬ han htaꞈ nyi sheˍ.)

¹⁵ Nyi haꞈ shaˉ paˍ laiˉ hkʼawꞈ te laˬ˗oˬ ve Vi˗liˇ awˬ viˉ awˬ nyi htaꞈ nyi haꞈ shaˉ tuˬ a yeˇ hkʼaˬ hkʼe taw uiˍ ve yawˇ na gʼa ve yoˬ. A naˍ 19 ve awˬ yanˇ htaˇ, Vi˗liˇ leh awˬ nu ve nyi haꞈ shaˉ paˍ hto toˇ ve awˬ moˍ ehˉ hkʼaw ve awˬ viˉ awˬ nyi htaꞈ teˇ shinˉ le le caˉ daꞈ ve yoˬ. Leh oˇ ve teˇ yanˇ kanˉ chi ve yawˇ hui awˬ pon a yeˇ uiˍ jaˇ tehꞈ shawˍ ve yoˬ. Yawˇ kʼoˆ ve, “awˬ  viˉ awˬ nyi laiˉ gʼaˇ aˉ hkʼaw lo teˇ gʼaˇ tiˉ chehˇ ve yoˬ. Chi ve lehˬ yawˇ hui maˇ daꞈ ve dawˇ hkʼaˇ cawˬ tuˬ te piˇ ve yoˬ.” Awˬ viˉ awˬ nyi shoꞈ shaꞈ ve gʼa hpuˇ htaˇ, yawˇ hui aˬ htoꞈ ma ve awˬ lawn dawˇ haˍ leh ga laˇ tuˬ aˬ htoꞈ ma loˍ ve kʼoˆ maˍ laˇ htaˇ, Vi˗liˇ hkʼa dehꞈ na taˍ ve yoˬ. Vi˗liˇ awˬ viˉ awˬ nyi htaꞈ awˬ gʼaˇ piˇ gʼa tuˬ, Gʼuiˬ sha ve kanˉ hkʼaˇ vehˆsaiˉ hkʼaw liꞈ kʼoˆ maˇ heˆ leh VDO hpfuhˆ nyi ve yoˬ. Yawˇ kʼawꞈ kʼoˆ sheˍ ve, “awˬ viˉ awˬ nyi htaꞈ a yeˇ yuˬ piˇ ve lehˬ awˬ nu ve awˬ ceuˬ aꞈ kehˉ a yeˇ uiˍ jaˇ. Awˬ nu ve chaw Yaˬhoˉvaˬ htaꞈ shiˍ la tuˬ ngaˬ hui coˇ caˇ leh ga piˇ ve yoˬ. Awˬ viˉ awˬ nyi caˉ leh yonˍ hkʼaˇ hpawˇ yonˍ yeˬ tuˬ kaꞈ ngaˬ hui coˇ caˇ leh ga piˇ ve yoˬ.”

16. Peˍtruˆ ve liꞈ 2 daw ngaˬ hui gʼa henˇ˗oˬ ve awˬ ceuˬ hkʼaˬ hkʼe yuˬ yehˇ gʼa ve le?

¹⁶ Peˍtruˆ ve liꞈ 2 daw hkʼaw henˇ yuˬ tuˬ teˇ hpaˍ hpaˍ htaꞈ caˉ daꞈ ve ngaˬ hui gʼa henˇ˗oˬ ve yoˬ. Nawˬ ve te hkʼaˇ dawˇ hkʼaˇ hkʼa dehꞈ pa gʼa tuˬ, teˇ lawn lawn htaꞈ kaꞈ gʼa henˇ˗oˬ ve yoˬ. Tawˇ pa haˉ te kʼo, miˬ guiˬ awˬ suhˉ hkʼaw daꞈ ve awˬ ceuˬ gʼa tuˬ ve htaꞈ caˉ daꞈ ve nawˬ teˇ hkui teˇ hkui dawˇ nyi gaˇ˗aw laˇ? Kanˉ teˇ geh te ve awˬ chawˇ, liꞈ teˇ geh henˇ ve awˬ chawˇ htaꞈ to maˍ piˇ ve, maˇ heˆ leh hto toˇ kuiˬ lo maˇ chehˇ htaˇ kaꞈ nawˬ hto toˇ tuˬ dawˇ teh taˍ˗aw laˇ? Awˬ viˉ awˬ nyi htaꞈ leuˉ leh haꞈ ve tehꞈ hpeuꞈ maw piˇ tuˬ, aˬ htoꞈ ma awˬ hkʼaˇ cawˬ sheˍ ve htaꞈ nawˬ dawˇ mawˬ ve le? Nyi haꞈ shaˉ paˍ˗oˬ, nawˬ Yaˬhoˉvaˬ ve yawˬ htaꞈ hkʼa dehꞈ haꞈ shaˉ piˇ tuˬ dawˇ teh taˍ˗aw laˇ? A shu yawˇ awˬ to htaꞈ hkʼa dehꞈ chaˬ nyi ve lehˬ, hkʼaˬ teˇ kaˬ lo pa cawˇ ve htaꞈ mawˬ tuˬ yoˬ. Yaꞈ hkʼaˇ, awˬ gʼaˇ taˇ nuˇ. ‘Jawˇ mawˇ Yeˍsuˆ ha kʼaˉ puiˉ jaˇ’ leh nawˬ ve te hkʼaˇ dawˇ hkʼaˇ daꞈ la tuˬ ga laˇ gʼa ve yoˬ. (1 Peˍtruˆ 2:3) Peˍtruˆ ngaˬ hui htaꞈ ka tiꞈ te laˇ ve, “Gʼuiˬ sha lehˬ, nawˬ hui htaꞈ biˇ la piˇ, yeˬ la piˇ leh awˬ gʼaˇ cawˬ la piˇ tuˬ yoˬ.”—1 Peˍtruˆ 5:10.

17. Ngaˬ hui awˬ gʼaˇ maˇ nuˇ leh Yaˬhoˉvaˬ htaꞈ maˍ laˇ tcuh ve kʼo, awˬ bon hkʼaˬ hkʼe gʼa tuˬ le?

¹⁷ Awˉ lawˉ htaˇ Peˍtruˆ yawˇ Yeˍsuˆ awˬ paˇ lo gʼa chehˇ tuˬ maˇ keunˍ tehꞈ dawˇ ve yoˬ. (Luˉkaꞈ 5:8) Yaꞈ hkʼaˇ, haꞈ pehnˇ ve hkʼaw Yaˬhoˉvaˬ leh Yeˍsuˆ ga laˇ tcuh ve pa taw, yawˇ ka tiꞈ yeˬ ve hkʼaw Yeˍsuˆ awˬ hkʼaˇ suh caˉ leh gʼaꞈ kʼai gʼa ve yoˬ. Chi htaꞈ pa taw, Yaˬhoˉvaˬ Peˍtruˆ htaꞈ ‘ngaˬ hui ve Jawˇ mawˇ leh Htaiˍ hkʼawꞈ paˍ Yeˍsuˆ Hkriꞈ ve co co taiˍ taiˍ yeˬ ve mvuhˇ miˬ awˬ hkʼaw lo gʼa loꞈ˗e tuˬ gu taˍ laˇ tuˬ yoˬ.’ (2 Peˍtruˆ 1:11) Chi lehˬ daꞈ jaˇ ve laꞈ shawnˍ hpehꞈ ve yoˬ. Nawˬ Peˍtruˆ hkʼa shuˍ awˬ gʼaˇ maˇ nuˇ leh Yaˬhoˉvaˬ nawˬ htaꞈ maˍ laˇ tcuh ve kʼo, nawˬ kaꞈ co co taiˍ taiˍ ve a shaꞈ laꞈ shawnˍ gʼa tuˬ yoˬ. Peˍtruˆ kʼoˆ ve, ‘nawˬ hui yonˍ ve pa taw, nawˬ hui htaiˍ hkʼawꞈ ve htaꞈ gʼa ve yoˬ.’—1 Peˍtruˆ 1:9.