1-2. Aˬ htoꞈ ma te ngaˬ hui Sanˍsonˍ ve awˬ lawn htaꞈ henˇ cawˇ ve le?

 Nawˬ Sanˍsonˍ ve awˬ meh htaꞈ gʼa kaˇ htaˇ, aˬ htoꞈ ma htaꞈ dawˇ mawˬ ve le? Teˇ gʼaˇ le le aꞈ kehˉ awˬ gʼaˇ hehnˇ jaˇ ve htaꞈ nawˬ dawˇ mawˬ ve yoˬ. Yaꞈ hkʼaˇ, Sanˍsonˍ dawˇ cheˆ ve maˇ cawˇ ve pa taw, yawˇ a shaꞈ teꞈ kuiˬ hkʼaw shoꞈ shaꞈ jaˇ ve awˬ ceuˬ gʼa hpuˇ ve yoˬ. Chi hkʼe hpehꞈ ve htawˇ, Sanˍsonˍ ka tiꞈ yeˬ leh Yaˬhoˉvaˬ awˬ pon te piˇ ve teˇ ceuˬ le le htaꞈ nyi ve yoˬ. Ngaˬ hui awˬ pon awˬ bon gʼa tuˬ Sanˍsonˍ ve awˬ lawn Liꞈ hpu hkʼaw Yaˬhoˉvaˬ bvuhꞈ keu tcuh taˍ laˇ ve yoˬ.

² Iˉsaˍreˍlaˆ chaw htaꞈ ga piˇ tuˬ Yaˬhoˉvaˬ Sanˍsonˍ htaꞈ cuˇ leh anˇ tuˬ laiˉ ceuˬ te ve yoˬ. Sanˍsonˍ suh ve laiˉ ha hkʼawꞈ peuˬ hkʼawꞈ nawˉ, Yaˬhoˉvaˬ tcuh yaˇ Pawˇluꞈ htaꞈ dawˇ pawnˍ piˇ leh yonˍ hkʼaˇ yonˍ yeˬ ve chaw awˬ meh bvuhꞈ keu kuiˬ liꞈ kʼoˆ hkʼaw Sanˍsonˍ ve awˬ meh kaꞈ bvuhꞈ keu tcuh ve yoˬ. (Heˍbrehˇ 11:32-34) Sanˍsonˍ ve awˬ lawn ngaˬ hui htaꞈ kaꞈ awˬ gʼaˇ peꞈ laˇ ve yoˬ. Yawˇ ve a shaꞈ teꞈ kuiˬ hkʼaw tuꞈ hkanˍ jaˇ ve gʼa hpuˇ htaˇ Yaˬhoˉvaˬ htaꞈ gʼaˇ va ve yoˬ. Sanˍsonˍ ve awˬ lawn ngaˬ hui htaꞈ aˬ htoꞈ ma maˍ laˇ ve, leh awˬ gʼaˇ hkʼaˬ hkʼe peꞈ laˇ ve kaꞈ teˇ geh henˇ tuˬ yoˬ.

3. Sanˍsonˍ aˬ htoꞈ ma ve kanˉ gʼa te ve le?

³ Sanˍsonˍ paw la htaˇ, Hpiˇliˇtiˆ chaw Iˉsaˍreˍlaˆ chaw htaꞈ uˉ peunˍ leh fawˉ mehˍ piˇ ve yoˬ. (Suhˉ jehˬ ve 13:1) Hpiˇliˇtiˆ chaw haiˬ jaˇ ve pa taw, Iˉsaˍreˍlaˆ chaw a shaꞈ teꞈ kuiˬ hkʼaw hpehꞈ haˍ jaˇ ve yoˬ. “Iˉsaˍreˍlaˆ chaw hui htaꞈ Hpiˇliˇtiˆ chaw hui ve laꞈ sheh hkʼaw lo htaiˍ hkʼawꞈ piˇ tuˬ” Yaˬhoˉvaˬ Sanˍsonˍ htaꞈ leuˆ yuˬ ve yoˬ. (Suhˉ jehˬ ve 13:5) Yaꞈ hkʼaˇ, kanˉ chi lehˬ maˇ sha. Chi htaꞈ pa taw, Sanˍsonˍ kanˉ chi htaꞈ hkʼa dehꞈ te gʼa tuˬ, yawˇ Yaˬhoˉvaˬ htaꞈ gʼaˇ va ve yoˬ.

4. Yaˬhoˉvaˬ Sanˍsonˍ htaꞈ hkʼaˬ hkʼe ga piˇ ve le? (Suhˉ jehˬ ve 15:14-16)

⁴ Sanˍsonˍ Yaˬhoˉvaˬ htaꞈ yonˍ leh yawˇ htaꞈ gʼaˇ va ve tehꞈ hpeuꞈ maw laˇ ve, awˬ lawn htaꞈ teˇ geh nyi sheˍ. Yuˇdaꞈ mvuhˇ miˬ lo cawˬ  ve Leˍhiˍ venˇ hkʼaw Sanˍsonˍ chehˇ htaˇ, Hpiˇliˇtiˆ ve maꞈ yaˇ yawˇ htaꞈ ca hpeh la ve yoˬ. Yuˇdaꞈ chaw Sanˍsonˍ ve awˬ chawˇ awˬ paˆ kawˆ jaˇ ve pa taw, canˇ paˍ htaꞈ chiˇ aꞈ piˇ ve yoˬ. Yawˇ hui Sanˍsonˍ htaꞈ aˉ caˆ hkeh awˬ suhˉ 2 caˆ yuˬ hpeh leh Hpiˇliˇtiˆ chaw htaꞈ chiˇ aꞈ piˇ ve yoˬ. (Suhˉ jehˬ ve 15:9-13) Yaꞈ hkʼaˇ, “Gʼuiˬ sha ve kanˇ paˆ yawˇ htaꞈ awˬ gʼaˇ cawˬ la piˇ” ve pa taw, yawˇ aˉ caˆ hkeh htaꞈ gʼawˬ cheˆ gʼa ve yoˬ. Hkʼe te leh, yawˇ “piˉ laˬ paˇ kaˇ gʼawˇ teˇ maˬ htaꞈ gʼawˆ yuˬ” leh Hpiˇliˇtiˆ chaw 1,000 gʼaˇ htaꞈ tiˇ pehˍ piˇ ve yoˬ.—Suhˉ jehˬ ve 15:14-16 gʼaw sheˍ.

5. Sanˍsonˍ piˉ laˬ paˇ kaˇ gʼawˇ htaꞈ yuˬ leh Hpiˇliˇtiˆ chaw hui htaꞈ vaˇ daꞈ ve lehˬ, yawˇ Yaˬhoˉvaˬ htaꞈ gʼaˇ va ve tehꞈ hkʼaˬ hkʼe hpeuꞈ maw laˇ ve le?

⁵ Aˬ htoꞈ ma te Sanˍsonˍ piˉ laˬ paˇ kaˇ gʼawˇ htaꞈ gʼawˆ yuˬ leh Hpiˇliˇtiˆ chaw htaꞈ tiˇ pehˍ piˇ ve le? Yawˇ chi hkʼe te gʼa ve anˇ jaˇ. Gʼaˇ tuˬ ve lehˬ laꞈ caˉ htaꞈ cawˬ ve maˇ heˆ tehꞈ Sanˍsonˍ shiˍ ve pa taw, yawˇ piˉ laˬ paˇ kaˇ gʼawˇ htaꞈ yuˬ leh yehˇ ve yoˬ. Yaꞈ hkʼaˇ, Yaˬhoˉvaˬ htaꞈ gʼaˇ va ve yoˬ. Yaˬhoˉvaˬ ve a loˍ htaꞈ hkʼa dehꞈ te gʼa tuˬ oˇ ve teˇ yanˇ, yawˇ ca gʼa ve awˬ ceuˬ htaꞈ yehˇ ve yoˬ. Yawˇ Yaˬhoˉvaˬ htaꞈ gʼaˇ va ve pa taw, canˇ paˍ htaꞈ gʼaˇ ve tehꞈ gʼa mawˬ ve yoˬ.

6. Sanˍsonˍ ve awˬ lawn ngaˬ hui henˇ yuˬ gʼa ve teˇ ceuˬ lehˬ aˬ htoꞈ ma ve le?

⁶ Nyi˗a kʼo, ngaˬ hui ve awˬ vuiˬ haˍ jaˇ tehꞈ dawˇ ve htawˇ, hkʼa dehꞈ te gʼa tuˬ Yaˬhoˉvaˬ awˬ gʼaˇ peꞈ laˇ tuˬ yoˬ. Leh ngaˬ hui maˇ dawˇ gaˬ ve hkʼaw yawˇ ga laˇ tuˬ yoˬ. Chi htaꞈ pa taw, Sanˍsonˍ htaꞈ awˬ gʼaˇ piˇ shehˍ hpaˇ Yaˬhoˉvaˬ htaꞈ gʼaˇ va sheˍ. Nawˬ Yaˬhoˉvaˬ htaꞈ hkʼaˬ htaˆ kaꞈ gʼaˇ va ve kʼo, yawˇ loˍ ve awˬ ceuˬ htaꞈ nawˬ te gʼa tuˬ ga laˇ tuˬ yoˬ.—Tawˇ naˉ ve 16:3.

7. Yaˬhoˉvaˬ beˆ maˍ laˇ ve htaꞈ ngaˬ hui a yeˇ uiˍ jaˇ ve awˬ lawn hpehꞈ ve tehꞈ shawˍ tuˬ, aˬ htoꞈ ma hpeuꞈ maw piˇ gʼa ve le?

⁷ Awˬ viˉ awˬ nyi laiˉ gʼaˇ Gʼuiˬ sha ve kanˉ hkʼaˇ hpawˇ yehˬ te ve lehˬ, yawˇ hui Yaˬhoˉvaˬ htaꞈ awˬ tehˬ gʼaˇ va ve tehꞈ hpeuꞈ maw laˇ ve yoˬ. Oˇ htaˇ ngaˬ hui hpawnˬ daꞈ kuiˬ yehˬ leh Gʼuiˬ sha ve kanˉ hkʼaˇ awˬ pon yehˬ cawˬ tuˬ loˍ ve yoˬ. Maˇ˗awˍ ve kʼo yehˬ chi teˇ hpaˍ te tuˬ ngaˬ hui hkʼaˇ ngaˬ hui awˬ han shawehˇ leh te ve yoˬ. Yaꞈ hkʼaˇ, chi teˇ hkui Gʼuiˬ sha ve kanˉ hkʼaˇ uiˍ la mvuh la leh chaw awˬ suhˉ awˬ suhˉ loꞈ la maˇ jaˇ ve pa taw, pa ve cawˬ ve yoˬ. Awˬ viˉ awˬ nyi Gʼuiˬ sha ve kanˉ hkʼaˇ hkʼaw sheh kʼai ve chaw Yaˬhoˉvaˬ beˆ maˍ laˇ tuˬ lawˬ leh, awˬ hkʼaˇ awˬ suhˉ awˬ suhˉ te nyi ve yoˬ. Tawˇ pa haˉ te kʼo, yehˬ teˇ hpaˍ  vuiˬ leh kʼawꞈ gu te ve yoˬ. Awˬ viˉ awˬ nyi Ro˗beuꞈ yehˬ te ve hpawˇ laiˉ hkʼawꞈ te laˬ˗oˬ ve kʼoˆ ve, “awˉ lawˉ htaˇ kanˉ hkʼaˇ awˬ suhˉ chi htaꞈ haꞈ yuˬ haˍ jaˇ tehꞈ laiˉ gʼaˇ dawˇ ve yoˬ. Ngaˬ hui laiˉ hkʼawꞈ te laˬ ve htaꞈ maˇ shuˍ ve pa taw yoˬ. Yaꞈ hkʼaˇ, awˬ viˉ awˬ nyi kaꞈ ha lehˬ ha kʼa ve hkʼaw gʼaꞈ te ve pa taw, awˬ hkʼaˇ awˬ suhˉ chi htaꞈ Yaˬhoˉvaˬ awˬ bon naꞈ laˇ ve tehꞈ ngaˬ hui hkʼa tawˍ lehˆ gʼa mawˬ ve yoˬ.” Chi awˬ hkʼoˆ kaꞈ, Yaˬhoˉvaˬ dawˇ teh taˍ ve awˬ ceuˬ htaꞈ hkʼa dehꞈ te gʼa tuˬ, yawˇ ve chaw htaꞈ yawˇ beˆ maˍ piˇ chehˇ ve tehꞈ, ngaˬ hui laiˉ lawn gʼa mawˬ ve yoˬ. Ngaˬ hui a shu yawˇ awˬ to htaꞈ teˇ hkui teˇ hkui na nyi cawˇ ve, “ngaˬ Yaˬhoˉvaˬ ve kanˉ te ve htaꞈ caˉ daꞈ ve pa tuˬ Gʼuiˬ sha beˆ maˍ laˇ tcuh˗aw laˇ?”

8. Teˇ pawˆ htaˇ Sanˍsonˍ iˉ kaˆ shiˉ jaˇ leh yawˇ aˬ htoꞈ ma te ve le?

⁸ Sanˍsonˍ teꞈ chiˉ laꞈ caˉ maˇ cawˬ ve hkʼaw laˇ caˬ shiˉ htaꞈ tiˇ pehˍ piˇ ve awˬ lawn nawˬ tawnˇ gʼa tuˬ yoˬ hehˉ. Peuˬ leh, yawˇ Aˍshaˆkeˍlonˍ venˇ lo kʼai leh Hpiˇliˇtiˆ chaw 30 gʼaˇ htaꞈ tiˇ pehˍ piˇ ve yoˬ. (Suhˉ jehˬ ve 14:5, 6, 19) Sanˍsonˍ chi hkʼe te gʼa ve lehˬ, yawˇ ve awˬ gʼaˇ awˬ shaˉ htaꞈ pa taw maˇ heˆ ve tehꞈ yawˇ shiˍ ve yoˬ. Yaꞈ hkʼaˇ, yawˇ Yaˬhoˉvaˬ htaꞈ ga laˇ tcuh ve yoˬ. Yawˇ Hpiˇliˇtiˆ chaw 1,000 gʼaˇ htaꞈ tiˇ pehˍ piˇ ve awˬ lawn htaꞈ ngaˬ hui gʼa shiˍ ve yoˬ. Oˇ ve teˇ yanˇ Sanˍsonˍ iˉ kaˆ shiˉ jaˇ ve yoˬ. Yaꞈ hkʼaˇ, yawˇ hkʼaˇ yawˇ iˉ kaˆ ca dawˬ cawˇ ve aꞈ kehˉ, Yaˬhoˉvaˬ ga laˇ tuˬ bon lawˬ ve yoˬ.—Suhˉ jehˬ ve 15:18.

9. Yaˬhoˉvaˬ Sanˍsonˍ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le? (Suhˉ jehˬ ve 15:19)

⁹ Sanˍsonˍ bon lawˬ ve htaꞈ Yaˬhoˉvaˬ hkʼawꞈ piˇ ve lehˬ, anˇ tuˬ te leh lawˬ hkʼoꞈ hkʼaw iˉ kaˆ tawˆ la tcuh piˇ ve pa taw Sanˍsonˍ iˉ kaˆ gʼa dawˬ ve yoˬ. Hkʼe te leh, yawˇ “awˬ gʼaˇ kʼawꞈ cawˬ la ve yoˬ.” (Suhˉ jehˬ ve 15:19 gʼaw sheˍ.) Tcuh kaˍ paˍ Saˍmo˗eˍlaˆ htaꞈ dawˇ pawnˍ piˇ leh Suhˉ jehˬ ve liꞈ bvuhꞈ tcuh htaˇ kaꞈ iˉ kaˆ tawˆ la kuiˬ lawˬ hkʼoꞈ oˇ ve laiˉ hkʼawꞈ cawˬ sheˍ ve yoˬ hehˉ. Teˇ pawˆ le le lawˬ hkʼoꞈ oˇ ve hkʼaw iˉ kaˆ tawˆ la ve htaꞈ Iˉsaˍreˍlaˆ chaw gʼa mawˬ leh ga laˇ tuˬ loˍ htaˇ, yawˇ hui Yaˬhoˉvaˬ htaꞈ hkʼaˬ htaˆ kaꞈ gʼaˇ va gʼa ve tehꞈ shaˍ tiꞈ piˇ ve yoˬ.

10. Yaˬhoˉvaˬ ngaˬ hui htaꞈ ga laˇ tcuh gaˇ ve kʼo, hkʼaˬ hkʼe gʼa te cawˇ ve le? (Awˬ han htaꞈ nyi sheˍ.)

¹⁰ Ngaˬ hui kaꞈ hkʼa shuˍ shuˍ, ngaˬ hui te puiˉ te hpehꞈ ve hkʼaˬ hkʼe taw cawˬ ve, maˇ heˆ leh ngaˬ hui Gʼuiˬ sha ve kanˉ hkʼa dehꞈ te gʼa˗oˬ ve htawˇ, ngaˬ hui Yaˬhoˉvaˬ ga laˇ tcuh sheˍ ve yoˬ. Ngaˬ hui Gʼuiˬ sha ve kanˉ hkʼa dehꞈ te gʼa ve lehˬ, yawˇ htaꞈ gʼaˇ va leh nyi ma nuˇ nehˬ ve hkʼaw gʼa haꞈ yuˬ ve yoˬ. Yaˬhoˉvaˬ Sanˍsonˍ htaꞈ iˉ kaˆ taw piˇ leh awˬ gʼaˇ cawˬ la ve hkʼa shuˍ, ngaˬ hui yonˍ yeˬ ve hkʼaw caˉ leh ka tiꞈ yeˬ gaˇ ve kʼo, Yaˬhoˉvaˬ gu teh taˍ laˇ ve awˬ ceuˬ teˇ hpaˍ htaꞈ ngaˬ hui gʼa haꞈ yuˬ cawˇ ve yoˬ.—Maꞈhtehˍ 11:28.

11. Ngaˬ hui Yaˬhoˉvaˬ htaꞈ gʼaˇ va tuˬ hkʼaˬ hkʼe gʼa te cawˇ ve le? Awˬ viˉ awˬ nyi teˇ gʼaˇ ve awˬ lawn kʼoˆ maˍ laˇ sheˍ.

¹¹ Ruˇsaˆ mvuhˇ miˬ lo chehˇ ve awˬ viˉ awˬ nyi Aˬleˇsiˇ yawˇ shu fawˉ mehˍ piˇ ve htaꞈ gʼa yeunˇ hkanˍ jaˇ ve awˬ lawn teˇ geh nyi sheˍ. Yawˇ tuꞈ hkanˍ ve htaꞈ gʼa hpuˇ jaˇ htaˇ, yonˍ yeˬ tuˬ aˬ htoꞈ ma ga piˇ ve le? Aˬleˇsiˇ yawˇ awˬ miˇ ma Yaˬhoˉvaˬ htaꞈ oˉ kʼoˍ pui ve, Liꞈ hpu gʼaw ve, leh hkʼaˬ htaˆ kaꞈ henˇ ve yoˬ. Aˬleˇsiˇ kʼoˆ ve, “ngaˬ a shu yawˇ hkʼaˇ yawˇ Liꞈ hpu henˇ leh teˇ nyi le le Liꞈ hpu hkʼaˬ htaˆ kaꞈ gʼaw ve yoˬ. Ngaˬ leh ngaˬ miˇ ma teˇ nyi le le Liꞈ hpu chaˬ tuˬ teˇ shawˉ le le gʼaw leh Yaˬhoˉvaˬ geh bon teˇ geh lawˬ ve yoˬ.” Awˬ lawn chi ve ngaˬ hui htaꞈ aˬ htoꞈ ma maˍ laˇ ve le? Ngaˬ hui a shu yawˇ awˬ to htaꞈ gʼaˇ maˇ va leh Yaˬhoˉvaˬ htaꞈ hkʼaˬ htaˆ kaꞈ gʼaˇ va cawˇ ve yoˬ. Chi ngaˬ hui hkʼaˬ hkʼe te gʼa tuˬ le? Ngaˬ hui caˉ leh yonˍ yeˬ ve cawˬ tuˬ ga laˇ gʼa ve awˬ ceuˬ htaꞈ hkʼaˬ htaˆ kaꞈ te cawˇ ve yoˬ. Tawˇ pa haˉ te kʼo, Liꞈ hpu gʼaw leh henˇ ve, bon lawˬ ve, hpawnˬ daꞈ˗e ve, leh hto toˇ˗e ve yoˬ. Ngaˬ hui chi hkʼe te ve kʼo, ngaˬ hui coˇ caˇ ve htaꞈ Yaˬhoˉvaˬ awˬ bon naꞈ laˇ tuˬ yoˬ. Leh Yaˬhoˉvaˬ Sanˍsonˍ htaꞈ awˬ gʼaˇ awˬ shaˉ piˇ ve hkʼa shuˍ, yawˇ ngaˬ hui htaꞈ kaꞈ awˬ gʼaˇ peꞈ laˇ leh yonˍ yeˬ ve cawˬ tuˬ ga laˇ tuˬ yoˬ.

12. Sanˍsonˍ dawˇ cheˆ ve maˇ cawˇ ve aˬ htoꞈ ma awˬ lawn le? Leh chi ve Sanˍsonˍ awˬ nu ve te ve htaꞈ hkʼaˬ hkʼe peun daꞈ ve le?

¹² Sanˍsonˍ kaꞈ ngaˬ hui hkʼa shuˍ maˇ biˇ ve chaw hpehꞈ ve yoˬ. Laiˉ pawˆ kʼo, yawˇ dawˇ cheˆ ve kaꞈ maˇ cawˇ ve yoˬ. Teˇ pawˆ htaˇ yawˇ dawˇ cheˆ ve maˇ cawˇ ve pa taw, nyi ma luˬ jaˇ ve yoˬ. Sanˍsonˍ teˇ tcuhˉ teˇ yanˇ suhˉ jehˬ paˍ gʼa te peuˬ hkʼawꞈ nawˉ, “Sanˍsonˍ lehˬ Sawˇrehˆ lawˬ hkʼoꞈ hkʼaw chehˇ ve yaˇ miˇ teˇ gʼaˇ htaꞈ kʼawꞈ maˆ ve yoˬ. Yawˇ ve awˬ meh lehˬ, Deˍleˍlaˆ hpehꞈ ve yoˬ.” (Suhˉ jehˬ ve 16:4) Chi awˬ gʼuˇ suhˍ htaˇ Sanˍsonˍ lehˬ, Hpiˇliˇtiˆ chaw yaˇ miˇ teˇ gʼaˇ htaꞈ heuˆ gaˇ ve yoˬ. Chi hkʼe hpehꞈ ve lehˬ “Gʼuiˬ sha Sanˍsonˍ htaꞈ awˬ hkʼaˇ gu piˇ chehˇ ve” yoˬ. “Gʼuiˬ sha lehˬ, Hpiˇliˇtiˆ chaw hui htaꞈ maꞈ bawˆ tuˬ daꞈ ve awˬ yanˇ htaꞈ ca chehˇ ve yoˬ.” Peuˬ leh Hpiˇliˇtiˆ mvuhˇ miˬ hkʼaw Gaˍsaˍ venˇ lo meh maˬ lanˉ ve yehˬ teˇ yehˬ hkʼaw yawˇ ca chehˇ˗e ve yoˬ. Oˇ ve teˇ yanˇ Yaˬhoˉvaˬ Sanˍsonˍ htaꞈ awˬ gʼaˇ piˇ leh Sanˍsonˍ venˇ taˍ meꞈ hpeꞈ htaꞈ gʼawˬ taˆ leh venˇ chi awˬ gʼaˇ nuˇ kʼai ve yoˬ. (Suhˉ jehˬ ve 14:1-4; 16:1-3) Yaꞈ hkʼaˇ, oˇ ve teˇ yanˇ Sanˍsonˍ Deˍleˍlaˆ htaꞈ heuˆ gaˇ htaˇ, yawˇ htaꞈ maˇ daꞈ ve hpawˇ heuˆ la kuiˬ cawˬ ve yoˬ. Awˬ lawn kʼo, Deˍleˍlaˆ lehˬ Iˉsaˍreˍlaˆ chaw hpehꞈ ve yoˬ. Sanˍsonˍ yawˇ htaꞈ dawˇ cawˇ jaˇ ve pa taw, Hpiˇliˇtiˆ chaw htaꞈ te luˬ tuˬ awˬ yanˇ maˇ cawˬ ve yoˬ.

13. Deˍleˍlaˆ Sanˍsonˍ htaꞈ aˬ htoꞈ ma te piˇ ve le?

¹³ Hpiˇliˇtiˆ chaw hui Deˍleˍlaˆ htaꞈ hpu teˇ biˬ piˇ ve pa taw, Sanˍsonˍ htaꞈ hpfuhˆ ve yoˬ. Sanˍsonˍ Deˍleˍlaˆ htaꞈ haꞈ jaˇ ve pa taw, yawˇ hkʼaˬ hkʼe dawˇ ve htaꞈ a yeˇ maˇ te ve yoˬ. Nawˬ awˬ gʼaˇ hkʼaˬ hkʼe te leh chi taw taw uiˍ ve yawˇ htaꞈ kʼoˆ laˇ tuˬ hkʼaˬ htaˆ kaꞈ beˬ na piˇ ve pa taw, yawˇ htaꞈ hteˇ lehˍ kʼoˆ piˇ ve yoˬ. Sanˍsonˍ yawˇ te yaꞈ ve pa taw, yawˇ ve awˬ gʼaˇ awˬ shaˉ nuˇ kʼai leh Yaˬhoˉvaˬ yawˇ htaꞈ teˇ tcuhˉ teˇ yanˇ chiˇ baˬ peuˬ ve tehꞈ yawˇ maˇ shiˍ ve yoˬ.—Suhˉ jehˬ ve 16:16-20.

14. Sanˍsonˍ Deˍleˍlaˆ hkawˇ na ve pa taw aˬ htoꞈ ma gʼa hpuˇ ve le?

¹⁴ Sanˍsonˍ Yaˬhoˉvaˬ ve hkawˇ na ve aꞈ kehˉ  Deˍleˍlaˆ ve hkawˇ na ve pa taw, yawˇ luˬ ve sheˆ ve gʼa hpuˇ ve yoˬ. Sanˍsonˍ htaꞈ Hpiˇliˇtiˆ chaw hpeh yuˬ leh mehˆ shiˍ 2 paˉ paˉ juˆ peꞈ piˇ ve yoˬ. Yawˇ hui Gaˍsaˍ venˇ lo Sanˍsonˍ htaꞈ haw tiˍ piˇ ve yoˬ. Oˇ kaˬ lo lehˬ Sanˍsonˍ Hpiˇliˇtiˆ chaw hui htaꞈ yaꞈ tawˍ tuˬ te piˇ kuiˬ awˬ ti hpehꞈ ve yoˬ. Yawˇ hui Sanˍsonˍ htaꞈ te hkʼawꞈ piˇ ve lehˬ, awˬ ceˬ hkʼe kanˉ te tcuh leh htawnˍ hkʼaw lo ve caˬ geuˆ tcuh ve yoˬ. Yawˇ hui Sanˍsonˍ htaꞈ hpeh yuˬ gʼa ve lehˬ, Daˍgonˍ gʼuiˬ sha ga laˇ ve tehꞈ yonˍ ve pa taw, Hpiˇliˇtiˆ chaw hui Daˍgonˍ gʼuiˬ sha htaꞈ ha lehˬ ha kʼa tuˉ tanˇ piˇ ve yoˬ. Yawˇ hui Sanˍsonˍ htaꞈ htawnˍ hkʼaw lo yuˬ tawˆ la tcuh leh Sanˍsonˍ htaꞈ “hkʼa mvuhˇ hkʼa na” te piˇ ve yoˬ.—Suhˉ jehˬ ve 16:21-25.

15. Sanˍsonˍ Yaˬhoˉvaˬ htaꞈ hkʼaˬ hkʼe te gʼaˇ teˇ pawˆ kʼawꞈ va ve le?

¹⁵ Sanˍsonˍ yawˇ te yaꞈ jaˇ ve htawˇ, yawˇ awˬ gʼaˇ maˇ nuˇ. Yaˬhoˉvaˬ loˍ ve hkʼe yawˇ Hpiˇliˇtiˆ chaw htaꞈ te luˬ tuˬ, awˬ yanˇ ca chehˇ sheˍ ve yoˬ. (Suhˉ jehˬ ve 16:28-30 gʼaw sheˍ.) “Hpiˇliˇtiˆ chaw chi teˇ hpaˍ htaꞈ ngaˬ kʼawꞈ te hkʼawꞈ piˇ hpehꞈ tuˬ” Sanˍsonˍ Yaˬhoˉvaˬ geh bon lawˬ ve yoˬ. Sanˍsonˍ ve bon lawˬ hkawˇ Yaˬhoˉvaˬ hkʼawꞈ piˇ ve lehˬ, yawˇ htaꞈ awˬ gʼaˇ teˇ pawˆ kʼawꞈ cawˬ la piˇ ve yoˬ. Chi teˇ pawˆ lehˬ teˇ pawˆ le le aꞈ kehˉ Hpiˇliˇtiˆ chaw htaꞈ tiˇ pehˍ piˇ maˇ jaˇ ve yoˬ.

16. Sanˍsonˍ te ve maˇ cawˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁶ Sanˍsonˍ yawˇ te yaꞈ ve pa taw, luˬ ve sheˆ ve htaꞈ gʼa hpuˇ ve yoˬ. Yaꞈ hkʼaˇ, yawˇ Yaˬhoˉvaˬ ve a loˍ htaꞈ gʼaꞈ te tuˬ, dawˇ law chehˇ sheˍ ve yoˬ. Ngaˬ hui kaꞈ hkʼa shuˍ, ngaˬ hui te yaꞈ leh diˇ maˍ laˇ ve, maˇ heˆ leh awˬ vuiˬ teˇ hpaˍ maˇ gʼa te˗o htaˇ, ngaˬ hui kaꞈ caˉ leh awˬ gʼaˇ maˇ nuˇ cawˇ ve yoˬ. Leh Yaˬhoˉvaˬ ngaˬ hui htaꞈ dawˇ law chehˇ sheˍ ve tehꞈ tawnˇ taˍ cawˇ ve yoˬ. (Chiˇ mvuh ve 103:8-10) Ngaˬ hui te yaꞈ ve htawˇ, Yaˬhoˉvaˬ Sanˍsonˍ htaꞈ yehˇ sheˍ ve hkʼe, ngaˬ hui htaꞈ kaꞈ yehˇ sheˍ ve yoˬ.

17-18. Mai˗hkeunˇ ve awˬ lawn nawˬ htaꞈ awˬ gʼaˇ hkʼaˬ hkʼe peꞈ laˇ ve le? (Awˬ han htaꞈ nyi sheˍ.)

¹⁷ Yaˇ nehˬ teˇ gʼaˇ Mai˗hkeunˇ meh ve awˬ lawn htaꞈ teˇ geh nyi sheˍ. Yawˇ ga piˇ shehˍ hpaˇ leh hkʼaˬ htaˆ kaꞈ gʼuˇ suhˍ peuˍ ve chaw te chehˇ ve yoˬ. Yawˇ Gʼuiˬ sha ve kanˉ te maˇ jaˇ ve yoˬ. Yaꞈ hkʼaˇ, yawˇ te yaꞈ ve pa taw, Hkriꞈ yaˇ awˬ moˍ hkʼaw ve awˬ vuiˬ maˇ gʼa te˗o ve sheˉ lai jaˇ. Mai˗hkeunˇ kʼoˆ ve, “oˇ ve teˇ yanˇ teˇ ceuˬ le le te gʼa˗oˬ ve yoˬ. Yaꞈ hkʼaˇ, peuˬ hkʼawꞈ nawˉ teˇ ceuˬ le le luˬ kʼai ve yoˬ. Gʼuiˬ sha ve kanˉ htaꞈ ngaˬ te maˇ gʼa˗o tehꞈ dawˇ ve yoˬ. Yaˬhoˉvaˬ ngaˬ htaꞈ maˇ chiˇ baˬ laˇ taˬ tehꞈ ngaˬ shiˍ ve yoˬ. Yaꞈ hkʼaˇ, ngaˬ Yaˬhoˉvaˬ geh teˇ pawˆ kʼawꞈ meuˆ daꞈ gʼa tuˬ sheˍ ve laˇ, maˇ heˆ leh ngaˬ Gʼuiˬ sha ve kanˉ te jaw ve hkʼe leˇ te gʼa tuˬ ve laˇ tehꞈ htawˇ dawˇ nawˬ dawˇ cawˬ ve yoˬ.”

 ¹⁸ Mai˗hkeunˇ awˬ gʼaˇ maˇ nuˇ ve ha lehˬ jaˇ. Yawˇ kʼoˆ ve, “ngaˬ Yaˬhoˉvaˬ geh kʼawꞈ meuˆ daꞈ gʼa tuˬ coˇ caˇ jaˇ ve yoˬ. Ngaˬ nyi ma hkʼaw cawˬ ve awˬ ceuˬ bon lawˬ htaˇ hkʼaˬ htaˆ kaꞈ Gʼuiˬ sha htaꞈ kʼoˆ maˍ piˇ ve, a shu yawˇ hkʼaˇ yawˇ Liꞈ hpu henˇ ve, leh hkʼaˬ htaˆ kaꞈ dawˇ nyi ve yoˬ.” Peuˬ leh Mai˗hkeunˇ Hkriꞈ yaˇ awˬ moˍ hkʼaw awˬ vuiˬ gʼa kʼawꞈ te ve yoˬ. Yawˇ nyi haꞈ shaˉ paˍ leh hkʼaˬ htaˆ kaꞈ gʼuˇ suhˍ peuˍ ve gʼa kʼawꞈ te ve yoˬ. Yawˇ kʼoˆ ve, “nyi haꞈ shaˉ paˍ ngaˬ htaꞈ awˬ gʼaˇ peꞈ laˇ leh ga laˇ ve pa taw, awˬ gʼaˇ gʼa jaˇ. Chi Yaˬhoˉvaˬ ngaˬ htaꞈ haꞈ chehˇ sheˍ ve tehꞈ shiˍ tuˬ te laˇ ve yoˬ. Ngaˬ Hkriꞈ yaˇ awˬ moˍ hkʼaw Yaˬhoˉvaˬ ve kanˉ teˇ pawˆ kʼawꞈ te leh ngaˬ te yaꞈ ve htaꞈ maˇ dawˇ nyi tuˬ te laˇ ve yoˬ. Awˬ lawn chi awˬ tehˬ awˬ na venˇ baˆ dawˇ hpfuhˆ ve chaw htaꞈ Yaˬhoˉvaˬ venˇ baˆ hpehˇ laˇ gʼa ve tehꞈ ngaˬ shiˍ ve yoˬ.” Chi ve hkʼa shuˍ shuˍ ngaˬ hui te yaꞈ ve htawˇ, ngaˬ hui coˇ caˇ leh a shu yawˇ awˬ to htaꞈ pa tuˬ teˇ ceuˬ le le Yaˬhoˉvaˬ htaꞈ gʼaˇ hkʼaˬ htaˆ kaꞈ va ve kʼo, yawˇ ngaˬ hui htaꞈ yehˇ leh awˬ bon naꞈ laˇ tuˬ yoˬ tehꞈ ngaˬ hui yonˍ gʼa ve yoˬ.—Chiˇ mvuh ve 86:5; Tawˇ naˉ ve 28:13.

19. Sanˍsonˍ ve awˬ lawn nawˬ htaꞈ awˬ gʼaˇ hkʼaˬ hkʼe peꞈ laˇ ve le?

¹⁹ Awˬ lawn chi ve hkʼaw Sanˍsonˍ ve awˬ lawn ngaˬ hui gʼa henˇ˗oˬ ve yoˬ. Yawˇ maˇ biˇ ve chaw hpehꞈ ve htawˇ, yawˇ dawˇ cheˆ ve maˇ cawˇ ve Deˍleˍlaˆ htaꞈ kʼoˆ piˇ peuˬ hkʼawꞈ nawˉ, yawˇ Yaˬhoˉvaˬ ve kanˉ caˉ leh te sheˍ ve yoˬ. Yaˬhoˉvaˬ yawˇ htaꞈ kʼawꞈ yehˇ sheˍ ve lehˬ, chaw yaˇ maˇ te gʼa ve awˬ ceuˬ htaꞈ yawˇ te tcuh ve yoˬ. Yaˬhoˉvaˬ Sanˍsonˍ htaꞈ yonˍ yeˬ ve chaw hpehꞈ ve tehꞈ shawˍ ve lehˬ, Heˍbrehˇ liꞈ kaˇ nanˉ uiˍ 11 hkʼaw ka tiꞈ yeˬ ve chaw ve awˬ meh bvuhꞈ keu kuiˬ liꞈ kʼoˆ hkʼaw yawˇ ve awˬ meh kaꞈ bvuhꞈ keu tcuh ve yoˬ. Ngaˬ hui htaꞈ haꞈ ve Yaˬhoˉvaˬ ve kanˉ te leh, ngaˬ hui shoꞈ shaꞈ ve htaꞈ gʼa hpuˇ leh ga laˇ tuˬ loˍ htaˇ, yawˇ ngaˬ hui yonˍ yeˬ ve cawˬ tuˬ ga laˇ gaˇ ve tehꞈ shiˍ ve pa taw, awˬ gʼaˇ gʼa jaˇ ve yoˬ. Sanˍsonˍ lehˬ ‘Gʼuiˬ sha˗oˬ, ngaˬ htaꞈ a ciˉ dawˇ nawˇ laˇ˗oˆ. Ngaˬ htaꞈ teˇ pawˆ ceh awˬ gʼaˇ kʼawꞈ cawˬ la piˇ˗oˆ’ tehꞈ yawˇ Yaˬhoˉvaˬ geh lawˬ ve hkʼa shuˍ ngaˬ hui kaꞈ lawˬ cawˇ ve yoˬ.—Suhˉ jehˬ ve 16:28.