1. Yeˍhawˇshaˆ, Awˇziˆ, Yawˇshiˆ haˍ ve kanˉ aˬ htoꞈ ma gʼa hpuˇ ve le?

 Nawˬ jawˇ mawˇ hpehꞈ leh maˇ uiˍ sheˍ htaˇ kaꞈ Yaˬhoˉvaˬ ve chaw htaꞈ gʼa uˉ peunˍ ve kʼo, hkʼaˬ hkʼe hpehꞈ tuˬ ve le, dawˇ nyi sheˍ. Nawˬ ve kanˇ paˆ htaꞈ hkʼaˬ hkʼe yehˇ tuˬ le? Laiˉ gʼaˇ maˇ uiˍ sheˍ htaˇ kaꞈ Yuˇdaꞈ ve jawˇ mawˇ gʼa te ve Liꞈ hpu hkʼaw kʼoˆ taˍ ve yoˬ. Tawˇ pa haˉ te kʼo, Yeˍhawˇshaˆ 7 hkʼawꞈ htaˇ kaꞈ jawˇ mawˇ gʼa te ve yoˬ. Awˇziˆ 16 hkʼawꞈ htaˇ jawˇ mawˇ gʼa te ve yoˬ. Yawˇshiˆ 8 hkʼawꞈ htaˇ jawˇ mawˇ gʼa te ve yoˬ. Yawˇ hui haˍ jaˇ ve awˬ vuiˬ gʼa te ve yoˬ. Chi hkʼe hpehꞈ ve htawˇ, yawˇ hui cawˇ ve awˬ ceuˬ htaꞈ te gʼa tuˬ Yaˬhoˉvaˬ leh awˬ nu ve chaw ga piˇ ve yoˬ.

2. Yeˍhawˇshaˆ, Awˇziˆ, Yawˇshiˆ yawˇ hui ve awˬ lawn htaꞈ aˬ htoꞈ ma te ngaˬ hui a yeˇ yuˬ cawˇ ve le?

² Ngaˬ hui jawˇ mawˇ maˇ heˆ leh jawˇ mawˇ ma maˇ gʼa te ve htawˇ, Yeˍhawˇshaˆ, Awˇziˆ leh Yawˇshiˆ yawˇ hui ve awˬ lawn ngaˬ hui htaꞈ laiˉ ceuˬ maˍ laˇ gʼa ve yoˬ. Yawˇ hui cuˇ yiˍ cawˬ ve hkʼaw laiˉ lawn htaꞈ gʼa dawˇ cheˆ ve yoˬ. Yaꞈ hkʼaˇ, yawˇ hui cuˇ yiˍ maˇ cawˬ ve hkʼaw dawˇ cheˆ ve awˬ lawn kaꞈ cawˬ ve yoˬ. Aˬ htoꞈ ma pa taw ngaˬ hui daꞈ ve awˬ chawˇ leuˆ cawˇ ve, hkʼaˬ htaˆ kaꞈ nyi ma nuˇ nehˬ ve chaw hpehꞈ ve, leh caˉ leh Yaˬhoˉvaˬ ve kanˉ te ve, yawˇ hui ve awˬ lawn aˬ htoꞈ ma maˍ laˇ ve teˇ geh henˇ tuˬ yoˬ.

3. Jawˇ mawˇ Yeˍhawˇshaˆ Yawˇyaˍdaˆ beˆ maˍ piˇ ve htaꞈ na yuˬ ve tehꞈ hkʼaˬ hkʼe hpeuꞈ maw laˇ ve le?

³ Yeˍhawˇshaˆ hkʼa shuˍ cuˇ yiˍ cawˬ ve hkʼaw dawˇ cheˆ ve. Jawˇ mawˇ Yeˍhawˇshaˆ a shaꞈ i chehˇ sheˍ htaˇ, yawˇ cuˇ yiˍ cawˬ ve hkʼaw dawˇ cheˆ ve yoˬ. Yawˇ awˬ pa maˇ cawˬ leh paw hkuˇ lonˉ Yawˇyaˍdaˆ beˆ maˍ piˇ ve htaꞈ gʼaꞈ te ve yoˬ. Yawˇyaˍdaˆ lehˬ Yeˍhawˇshaˆ htaꞈ yawˇ ve yaˇ paˍ hkʼa shuˍ maˍ piˇ ve yoˬ. Hkʼe te leh, Yeˍhawˇshaˆ daꞈ kehˬ ve oˉ kʼoˍ pui ve htaꞈ sheh kʼai tuˬ leuˆ yuˬ leh Yaˬhoˉvaˬ ve kanˉ htaꞈ hkʼa dehꞈ te ve yoˬ. Chi hkʼoˆ kaꞈ, Yaˬhoˉvaˬ ve bon yehˬ kʼawꞈ gu te tuˬ awˬ hkʼaˇ kaꞈ gu teh piˇ ve yoˬ.—2 Raˍsaˍvanˍ 24:1, 2, 4, 13, 14.

4. Ngaˬ hui Yaˬhoˉvaˬ ve hkawˇ hkʼa dehꞈ na yuˬ ve kʼo aˬ htoꞈ ma awˬ bon gʼa tuˬ le? (Tawˇ naˉ ve 2:1, 10-12)

 ⁴ Awˬ pa awˬ e leh awˬ nu ve chaw nawˬ Yaˬhoˉvaˬ htaꞈ haꞈ tuˬ maˍ laˇ leh yawˇ ve awˬ liˇ awˬ hkʼaˇ a shaꞈ teꞈ kuiˬ hkʼaw yuˬ yehˇ ve kʼo, daꞈ jaˇ ve awˬ ceuˬ htaꞈ nawˬ gʼa ve yoˬ. Chi ve lehˬ daꞈ jaˇ ve laꞈ shawnˍ hpehꞈ ve yoˬ. (Tawˇ naˉ ve 2:1, 10-12 gʼaw sheˍ.) Awˬ pa awˬ e nawˬ htaꞈ maˍ laˇ tuˬ laiˉ hkʼaˇ yehˇ ve yoˬ. Hkeh˗yaˇ ve awˬ pa yawˇ cuˇ yiˍ cawˬ ve hkʼaw dawˇ cheˆ tuˬ maˍ piˇ ve awˬ lawn htaꞈ teˇ geh nyi sheˍ. Teˇ shawˉ le le Hkeh˗yaˇ ve awˬ pa yawˇ htaꞈ liꞈ henˇ yehˬ lo ca shiˍ kʼoˬ piˇ htaˇ, teˇ nyi le le Liꞈ hpu chaˬ nyi tuˬ hkʼaw yawˇ hui yaw daꞈ ve yoˬ. Hkeh˗yaˇ kʼoˆ ve, “awˬ lawn kʼo chi ngaˬ pa ngaˬ geh teˇ nyi le le yaw daꞈ ve yoˬ. Hkʼe te leh, ngaˬ oˇ ve teˇ nyi hkʼaw shoꞈ shaꞈ ve gʼa hpuˇ ve htaꞈ yeunˇ hkanˍ gʼaˇ tuˬ ga laˇ ve yoˬ.” Awˬ pa awˬ e awˬ liˇ teh ve Liꞈ hpu hkʼaw ve awˬ lawn hpehꞈ ve htawˇ, nawˬ nyi ma maˇ sha ve kʼo hkʼaˬ hkʼe te tuˬ le? Awˬ pa awˬ e awˬ liˇ teh taˍ ve htaꞈ nawˬ gʼaꞈ te gʼa tuˬ aˬ htoꞈ ma ga laˇ gʼa ve le? Awˬ viˉ awˬ nyi yaˇ miˇ A˗na˗sha˗tan˗si kʼoˆ ve, awˬ pa awˬ e aˬ htoꞈ ma te awˬ liˇ teˇ ceuˬ ceuˬ teh ve yawˇ geh yaw daꞈ ve yoˬ. Yawˇ kʼoˆ ve, “awˬ pa awˬ e awˬ liˇ chi hkʼe teh ve lehˬ ngaˬ htaꞈ uˉ peunˍ tuˬ maˇ heˆ tehꞈ ngaˬ na gʼa tuˬ ga laˇ ve yoˬ. Yaꞈ hkʼaˇ, ngaˬ pa ngaˬ e chi hkʼe te ve lehˬ, ngaˬ htaꞈ haꞈ leh haꞈ shaˉ laˇ gaˇ ve pa taw yoˬ.”

5. Nawˬ te ve awˬ ceuˬ Yaˬhoˉvaˬ leh awˬ pa awˬ e htaꞈ heuˆ la kuiˬ hkʼaˬ hkʼe cawˬ ve le? (Tawˇ naˉ ve 22:6; 23:15, 24, 25)

⁵ Liꞈ hpu hkʼaw beˆ maˍ laˇ ve htaꞈ nawˬ yuˬ yehˇ htaˇ, awˬ pa awˬ e ha lehˬ tuˬ nawˬ te piˇ ve yoˬ. Chi aꞈ kehˉ a yeˇ uiˍ jaˇ ve lehˬ Yaˬhoˉvaˬ ha lehˬ tuˬ te piˇ ve yoˬ. Chi ve lehˬ nawˬ Yaˬhoˉvaˬ geh leuˉ leh meuˆ daꞈ tuˬ kaꞈ te laˇ ve yoˬ. (Tawˇ naˉ ve 22:6; 23:15, 24, 25 gʼaw sheˍ.) Chi htaꞈ pa taw, Yeˍhawˇshaˆ a shaꞈ i chehˇ sheˍ htaˇ ngaˬ hui henˇ yuˬ gaˇ ve awˬ hkʼaˇ laiˉ hkʼaˇ cawˬ ve htaꞈ nawˬ mawˬ˗aw laˇ?

6. Yawˇyaˍdaˆ suh peuˬ hkʼawꞈ nawˉ Yeˍhawˇshaˆ a shu beˆ maˍ piˇ ve hkawˇ na ve le? Leh yawˇ htaꞈ heuˆ la kuiˬ hkʼaˬ hkʼe cawˬ ve le? (2 Raˍsaˍvanˍ 24:17, 18)

⁶ Yeˍhawˇshaˆ cuˇ yiˍ maˇ cawˬ ve hkʼaw dawˇ cheˆ ve awˬ lawn maˍ laˇ ve. Yawˇyaˍdaˆ suh peuˬ hkʼawꞈ nawˉ Yeˍhawˇshaˆ maˇ daꞈ ve chaw htaꞈ awˬ chawˇ te ve pa taw, yawˇ maˇ daꞈ ve awˬ ceuˬ htaꞈ te ve yoˬ. (2 Raˍsaˍvanˍ 24:17, 18 gʼaw sheˍ.) Maˇ daꞈ ve awˬ hoˉ awˬ na Yaˬhoˉvaˬ htaꞈ maˇ haꞈ ve chaw teˇ hpaˍ hkawˇ yawˇ na ve yoˬ. Yawˇ hui maˇ daꞈ ve awˬ ceuˬ htaꞈ te ve pa taw, Yeˍhawˇshaˆ yawˇ hui geh awˬ chawˇ maˇ te cawˇ ve tehꞈ nawˬ mawˬ˗aw laˇ? (Tawˇ naˉ ve 1:10) Yaꞈ hkʼaˇ, Yeˍhawˇshaˆ chaw oˇ ve teˇ hpaˍ hkawˇ na leh awˬ chawˇ tehꞈ kʼoˆ ve yoˬ. Yeˍhawˇshaˆ ve awˬ viˉ awˬ nyi Zaˍhkaˍriˆ kaꞈ yawˇ htaꞈ shaˍ tiꞈ piˇ ve yoˬ. Yaꞈ hkʼaˇ, yawˇ maˇ na yuˬ ve awˬ hkʼoˆ kaꞈ Zaˍhkaˍriˆ htaꞈ tiˇ pehˍ tcuh ve yoˬ. (2 Raˍsaˍvanˍ 24:20, 21; Maꞈhtehˍ 23:35) Yeˍhawˇshaˆ haiˬ jaˇ ve awˬ ceuˬ htaꞈ te leh cuˇ yiˍ maˇ cawˬ. Awˉ lawˉ htaˇ, yawˇ ve a shaꞈ teꞈ hkʼaˇ daꞈ jaˇ ve htawˇ, yawˇ Gʼuiˬ sha htaꞈ hpfuhˆ leh tiˇ pehˍ paˍ hpehꞈ la ve yoˬ. Awˬ leh meuˇ htaˇ yawˇ ve a maꞈ lonˉ yawˇ htaꞈ tiˇ pehˍ piˇ ve yoˬ. (2 Raˍsaˍvanˍ 24:22-25) Yeˍhawˇshaˆ Yaˬhoˉvaˬ hkawˇ na yuˬ leh Yaˬhoˉvaˬ htaꞈ haꞈ ve chaw beˆ maˍ piˇ hkawˇ yawˇ na yuˬ ve kʼo, yawˇ  oˇ hkʼe maˇ gʼa hpuˇ taˬ. Yeˍhawˇshaˆ cuˇ yiˍ maˇ cawˬ ve hkʼaw dawˇ cheˆ ve nawˬ htaꞈ aˬ htoꞈ ma maˍ laˇ ve le?

7. Nawˬ a shu htaꞈ awˬ chawˇ te tuˬ leuˆ yuˬ cawˇ ve le? (Awˬ han htaꞈ nyi sheˍ.)

⁷ Yeˍhawˇshaˆ cuˇ yiˍ maˇ cawˬ ve hkʼaw dawˇ cheˆ ve ngaˬ hui htaꞈ maˍ laˇ gʼa ve teˇ lawn lehˬ, ngaˬ hui cawˇ ve awˬ ceuˬ htaꞈ te tuˬ ga laˇ gʼa ve awˬ chawˇ htaꞈ gʼa leuˆ cawˇ ve yoˬ. Yaˬhoˉvaˬ htaꞈ haꞈ leh yawˇ ha lehˬ tuˬ te piˇ gaˇ ve chaw htaꞈ ngaˬ hui awˬ chawˇ te tuˬ gʼa leuˆ cawˇ ve yoˬ. Ngaˬ hui a shaꞈ hkʼa shuˍ ve chaw htaꞈ ceh tiˉ awˬ chawˇ maˇ te gaˇ. Yeˍhawˇshaˆ aꞈ kehˉ Yawˇyaˍdaˆ a shaꞈ maˇ ve htawˇ, yawˇ huiˉ maˬ meuˆ daꞈ jaˇ ve awˬ chawˇ hpehꞈ ve tehꞈ tawnˇ taˍ sheˍ. Chi htaꞈ pa taw, nawˬ awˬ chawˇ te ve chaw htaꞈ dawˇ nyi leh a shu yawˇ awˬ to htaꞈ na nyi cawˇ ve, ‘yawˇ hui ngaˬ Yaˬhoˉvaˬ htaꞈ yonˍ yeˬ tuˬ ga laˇ˗aw laˇ? Yawˇ hui ngaˬ a shaꞈ teꞈ kuiˬ hkʼaw Yaˬhoˉvaˬ ve awˬ liˇ awˬ hkʼaˇ htaꞈ yuˬ yehˇ tuˬ ga laˇ˗aw laˇ? Yawˇ hui Yaˬhoˉvaˬ leh Liꞈ hpu hkʼaw awˬ tehˬ ve htaꞈ yaw daꞈ˗aw laˇ? Yawˇ hui ngaˬ htaꞈ chiˇ mvuh laˇ ve maˇ heˆ leh ngaˬ maˇ cawˇ ve awˬ ceuˬ htaꞈ te htaˇ, yawˇ hui ngaˬ htaꞈ shaˍ tiꞈ peꞈ laˇ haˆ˗aw laˇ?’ (Tawˇ naˉ ve 27:5, 6, 17) Nawˬ awˬ chawˇ te ve chaw yawˇ hui Yaˬhoˉvaˬ htaꞈ maˇ haꞈ ve kʼo, awˬ chawˇ maˇ te cawˇ. Yaꞈ hkʼaˇ, nawˬ ve awˬ chawˇ Yaˬhoˉvaˬ htaꞈ haꞈ ve kʼo, yawˇ hui geh caˉ leh awˬ chawˇ te sheˍ. Awˬ lawn kʼo, yawˇ hui hkʼa shuˍ nawˬ kaꞈ Yaˬhoˉvaˬ htaꞈ haꞈ tuˬ ga laˇ gʼa ve yoˬ.—Tawˇ naˉ ve 13:20.

8. Ngaˬ hui in˗teu˗neꞈ yehˇ htaˇ aˬ htoꞈ ma awˬ lawn htaꞈ dawˇ nyi cawˇ ve le?

⁸ Awˬ chawˇ maˇ heˆ leh yehˬ kʼa hkʼaw ve chaw htaꞈ yaw daꞈ tuˬ, in˗teu˗neꞈ htaꞈ yehˇ ve yoˬ. Yaꞈ hkʼaˇ, laiˉ gʼaˇ awˬ nu ve chaw dawˇ cawˇ tuˬ chi hkʼe yehˇ ve yoˬ. Yawˇ hui aˬ htoꞈ ma vuiˬ ve maˇ heˆ leh aˬ htoꞈ ma te chehˇ ve awˬ han maˇ heˆ leh VDO htawnˍ keu ve yoˬ. Nawˬ in˗teu˗neꞈ yehˇ ve kʼo, a shu yawˇ awˬ to htaꞈ na nyi cawˇ ve, ‘chi ngaˬ awˬ nu ve chaw dawˇ cawˇ tuˬ awˬ pon yehˇ ve laˇ? Chi yehˇ ve lehˬ ngaˬ awˬ nu ve chaw htaꞈ awˬ gʼaˇ piˇ ve, maˇ heˆ leh awˬ nu ve chaw ngaˬ htaꞈ a yeˇ yuˬ tuˬ te ve laˇ? Awˬ nu ve chaw in˗teu˗neꞈ hkʼaw awˬ han keu taˍ ve htaꞈ ngaˬ nyi peuˬ hkʼawꞈ nawˉ, maˇ daꞈ ve awˬ ceuˬ hpehꞈ ve tehꞈ shiˍ ve htawˇ, yawˇ hui hkʼe leˇ dawˇ ve, kʼoˆ ve, maˇ heˆ leh te gaˇ tuˬ ve laˇ?’ Awˬ viˉ awˬ nyi Naˍtanˍnawˍ Uˉ peunˍ ve Kawˍmiˍtiˍ te jaw ve beˆ maˍ laˇ ve, “teˇ gʼaˇ le le dawˇ cawˇ tuˬ coˇ caˇ leh taˇ te. Awˬ lawn kʼo, nawˬ chi hkʼe te maˇ gʼa taˬ. Yaꞈ hkʼaˇ, nawˬ Yaˬhoˉvaˬ nyi hkʼaˇ suh tuˬ te piˇ leh Yaˬhoˉvaˬ htaꞈ haꞈ ve chaw teˇ gʼaˇ le le nawˬ htaꞈ nyi hkʼaˇ suh tuˬ yoˬ.”

9. Awˇziˆ htaꞈ Yaˬhoˉvaˬ hkʼaˬ hkʼe ga piˇ ve le? (2 Raˍsaˍvanˍ 26:1-5)

⁹ Awˇziˆ hkʼa shuˍ ngaˬ hui cuˇ yiˍ cawˬ ve hkʼaw dawˇ cheˆ ve. Awˇziˆ a shaꞈ i sheˍ htaˇ yawˇ nyi ma nuˇ nehˬ ve chaw hpehꞈ ve yoˬ. Yawˇ awˬ tehˬ ve Gʼuiˬ sha htaꞈ yawˆ yan tuˬ henˇ ve yoˬ. Yawˇ 68 hkʼawꞈ hkʼa gaˬ a shaꞈ teꞈ chehˇ sheˍ leh yawˇ a shaꞈ teꞈ chehˇ ve teˇ co˗e Yaˬhoˉvaˬ awˬ bon naꞈ piˇ ve yoˬ. (2 Raˍsaˍvanˍ 26:1-5 gʼaw sheˍ.) Awˇziˆ canˇ paˍ maˇ maˇ htaꞈ bawˆ gʼaˇ leh Yeˍruˆsaˍlehnˍ venˇ htaꞈ hkʼa dehꞈ haꞈ shaˉ gʼa ve yoˬ. (2 Raˍsaˍvanˍ 26:6-15) Awˇziˆ Yaˬhoˉvaˬ ga piˇ ve pa taw hkʼa dehꞈ te gʼa ve htaꞈ ha lehˬ jaˇ ve yoˬ.—Cuˇ yiˍ piˇ ve 3:12, 13.

10. Awˇziˆ ve a shaꞈ teꞈ hkʼaˇ hkʼaˬ hkʼe hpehꞈ la ve le?

¹⁰ Awˇziˆ cuˇ yiˍ maˇ cawˬ ve hkʼaw dawˇ cheˆ ve awˬ lawn maˍ laˇ ve. Jawˇ mawˇ Awˇziˆ lehˬ awˬ nu ve chaw yawˇ hkʼa shuˍ gʼaꞈ te tuˬ tawˇ piˇ ve yoˬ. Hkʼe te leh, yawˇ te gaˇ ve htaꞈ te leh Yaˬhoˉvaˬ ve tawˇ hkawˇ htaꞈ a yeˇ maˇ yuˬ kaꞈ hpehꞈ ve tehꞈ yawˇ dawˇ ve yoˬ. Teˇ nyi htaˇ Awˇziˆ lehˬ Yaˬhoˉvaˬ ve bon yehˬ hkʼaw loꞈ˗e leh jawˇ mawˇ tuˉ tanˇ maˇ keunˍ ve htaꞈ yawˇ tuˉ tanˇ ve yoˬ. (2 Raˍsaˍvanˍ 26:16-18) Paw hkuˇ lonˉ Aˍhaˍziˆ yawˇ htaꞈ tawˍ piˇ ve htawˇ, yawˇ maˇ na leh beuꞈ jaˇ ve yoˬ. Awˇziˆ Yaˬhoˉvaˬ ve kanˉ hkʼaˬ htaˆ kaꞈ ka tiꞈ yeˬ ve hkʼaw te ve htawˇ, teˇ pawˆ htaˇ yawˇ maˇ na yuˬ ve pa taw yawˇ htaꞈ ciˍ yanˍ piˇ ve lehˬ, hkiˬ tuꞈ a naˍ hpehꞈ tcuh ve yoˬ. (2 Raˍsaˍvanˍ 26:19-21) Awˇziˆ hkʼaˬ htaˆ kaꞈ nyi ma nuˇ nehˬ ve kʼo, yawˇ chi hkʼe maˇ gʼa hpuˇ taˬ.

11. Ngaˬ hui hkʼaˬ htaˆ kaꞈ nyi ma nuˇ nehˬ ve chaw hpehꞈ tuˬ aˬ htoꞈ ma ga laˇ ve le? (Awˬ han htaꞈ nyi sheˍ)

¹¹ Awˇziˆ kanˇ paˆ cawˬ la htaˇ Yaˬhoˉvaˬ yawˇ awˬ pon te piˇ jaw ve awˬ ceuˬ teˇ hpaˍ htaꞈ yawˇ awˬ hpfuhˇ maˇ shiˍ ve yoˬ. Aˬ htoꞈ ma maˍ laˇ ve le? Daꞈ ve  awˬ ceuˬ hkʼa peu˗eˬ leh ngaˬ hui Yaˬhoˉvaˬ ve kanˉ te ve hkʼa peu˗eˬ yawˇ geh laˬ ve tehꞈ gʼa tawnˇ taˍ cawˇ ve yoˬ. b (1 Kawˇrenˍhtuˆ 4:7) Ngaˬ hui te gʼa ve awˬ ceuˬ htaꞈ chiˇ mvuh ve aꞈ kehˉ ngaˬ hui chi hkʼe te gʼa ve Yaˬhoˉvaˬ htaꞈ chiˇ mvuh cawˇ ve yoˬ. Ngaˬ hui maˇ biˇ ve chaw hpehꞈ leh hkʼaˬ htaˆ kaꞈ gʼa beˆ maˍ laˇ cawˇ ve tehꞈ gʼa haꞈ yuˬ cawˇ ve yoˬ. Awˬ viˉ awˬ nyi hawˉ hkʼaˆ teˇ gʼaˇ aˬ laˬ hkʼe 60 hkʼawꞈ gaˬ ve kʼoˆ ve, “awˬ nu ve chaw beˆ maˍ laˇ htaˇ, ngaˬ maˇ beuꞈ leh awˬ gʼaˇ maˇ nuˇ. Yaꞈ hkʼaˇ, ngaˬ a shu yawˇ ve dawˇ hkʼaˇ pa leh uiˍ la mvuh la tuˬ coˇ caˇ ve yoˬ.” Ngaˬ hui Yaˬhoˉvaˬ htaꞈ yawˆ yan leh hkʼaˬ htaˆ kaꞈ nyi ma nuˇ nehˬ ve chaw hpehꞈ ve kʼo, ngaˬ hui ve a shaꞈ teꞈ kuiˬ hkʼaw ha lehˬ jaˇ tuˬ yoˬ.—Tawˇ naˉ ve 22:4.

12. Yawˇshiˆ yaˇ nehˬ htaˇ Yaˬhoˉvaˬ ve kanˉ hkʼaˬ hkʼe tanˬ te ve le? (2 Raˍsaˍvanˍ 34:1-3)

¹² Yawˇshiˆ hkʼa shuˍ cuˇ yiˍ cawˬ ve hkʼaw dawˇ cheˆ ve. Yawˇshiˆ yaˇ nehˬ htaˇ kaꞈ Yaˬhoˉvaˬ ve kanˉ tanˬ te ve yoˬ. Yawˇ lehˬ Yaˬhoˉvaˬ htaꞈ caˉ daꞈ ve leh yawˇ ve a loˍ htaꞈ gʼaꞈ te tuˬ henˇ gaˇ ve yoˬ. Yaꞈ hkʼaˇ, yawˇ ve a shaꞈ teꞈ kuiˬ hkʼaw maˇ sha. Oˇ ve teˇ yanˇ maˇ˗awˍ ve chaw shaˉ hoꞈ htaꞈ oˉ kʼoˍ pui ve yoˬ. Yawˇshiˆ shaˉ hoꞈ htaꞈ te luˬ tuˬ, haꞈ hanˉ ve gʼa cawˬ ve yoˬ. Yawˇ awˬ tehˬ awˬ na chi hkʼe te ve yoˬ. Yawˇshiˆ 20 hkʼawꞈ maˇ gaˬ sheˍ htaˇ, yawˇ ve mvuhˇ miˬ hkʼaw shaˉ hoꞈ htaꞈ te luˬ ve yoˬ.—2 Raˍsaˍvanˍ 34:1-3 gʼaw sheˍ.

13. Yaˬhoˉvaˬ htaꞈ awˬ to chiˇ aꞈ piˇ ve aˬ htoꞈ ma htaꞈ kʼoˆ gaˇ ve le?

¹³ Nawˬ yaˇ nehˬ hpehꞈ ve htawˇ Yawˇshiˆ htaꞈ henˇ yuˬ gʼa ve yoˬ. Yaˬhoˉvaˬ leh yawˇ ve te hkʼaˇ dawˇ hkʼaˇ daꞈ jaˇ ve htaꞈ caˉ daꞈ ve henˇ yuˬ tuˬ dawˇ teh taˍ sheˍ. Chi hkʼe te ve lehˬ nawˬ Yaˬhoˉvaˬ htaꞈ awˬ to chiˇ aꞈ piˇ tuˬ ga laˇ gʼa ve yoˬ. Nawˬ awˬ to Yaˬhoˉvaˬ htaꞈ chiˇ aꞈ piˇ ve lehˬ a shaꞈ teꞈ kuiˬ hkʼaw teˇ nyi le le awˬ bon hkʼaˬ hkʼe cawˬ ve le? Lonˆ meh ve 14 hkʼawꞈ htaˇ Baˆtiˆsaˬ haꞈ yuˬ ve kʼoˆ ve, “oˇ teˇ hkui tanˬ leh ngaˬ Yaˬhoˉvaˬ ve kanˉ te ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ leh yawˇ ha lehˬ tuˬ te piˇ tuˬ dawˇ teh taˍ ve yoˬ.” (Maˍkuˆ 12:30) Nawˬ Lonˆ hkʼa shuˍ shuˍ te ve kʼo, nawˬ a shaꞈ teꞈ kuiˬ hkʼaw ha lehˬ jaˇ tuˬ yoˬ.

14. Yaˇ nehˬ teˇ hpaˍ jawˇ mawˇ Yawˇshiˆ htaꞈ hkʼaˬ hkʼe henˇ yuˬ gʼa ve le? Tawˇ pa haˉ kʼoˆ maˍ laˇ sheˍ

¹⁴ Yaˬhoˉvaˬ ve kanˉ te ve chaw yaˇ nehˬ shoꞈ shaꞈ ve aˬ htoꞈ ma gʼa hpuˇ ve le? Yoˇhanˬ meh ve 12 hkʼawꞈ htaˇ Baˆtiˆsaˬ haꞈ yuˬ ve kʼoˆ ve, liꞈ teˇ geh henˇ ve awˬ chawˇ yawˇ shuˉ dawˬ tuˬ nyiˉ piˇ ve yoˬ. Chi ve htaꞈ Yoˇhanˬ tawˍ daꞈ gʼaˇ tuˬ, shuˉ dawˬ ve lehˬ yawˇ awˬ to htaꞈ heuˆ la kuiˬ cawˬ jaˇ leh Yaˬhoˉvaˬ geh  meuˆ daꞈ ve htaꞈ leuˆ la kuiˬ cawˬ jaˇ ve tehꞈ yawˇ awˬ to htaꞈ hkʼaˬ htaˆ kaꞈ shaˍ tiꞈ piˇ ve yoˬ. Le˗chen 14 hkʼawꞈ htaˇ Baˆtiˆsaˬ haꞈ yuˬ ve kʼoˆ ve, yawˇ liꞈ henˇ yehˬ lo shoꞈ shaꞈ ve gʼa hpuˇ ve htaꞈ yeunˇ hkanˍ gʼaˇ tuˬ aˬ htoꞈ ma ga piˇ ve le? Yawˇ kʼoˆ ve, “Liꞈ hpu hkʼaw leh Yaˬhoˉvaˬ htaꞈ caˉ daꞈ ve ngaˬ htaꞈ shaˍ tiꞈ peꞈ laˇ ve awˬ ceuˬ htaꞈ coˇ caˇ leh dawˇ nyi ve yoˬ. Tawˇ pa haˉ te kʼo, teˇ co˗e peuˬ teˇ co˗e hpehꞈ laˬ ve awˬ lawn henˇ htaˇ, Liꞈ hpu hkʼaw ve awˬ lawn leh tcuh kaˍ paˍ ve tawˇ hkawˇ teˇ hpaˍ htaꞈ caˉ daꞈ ve ngaˬ coˇ caˇ leh dawˇ nyi ve yoˬ. Leh ngaˬ awˬ nu ve chaw geh tawˇ yaw daꞈ htaˇ, shu htaꞈ kʼoˆ maˍ piˇ gʼa tuˬ ve Liꞈ hpu awˬ tawn htaꞈ ngaˬ dawˇ nyi ve yoˬ.” Nawˬ gʼa hpuˇ ve shoꞈ shaꞈ ve awˬ lawn jawˇ mawˇ Yawˇshiˆ gʼa hpuˇ ve htaꞈ peun daꞈ ve yoˬ hehˉ. Yaꞈ hkʼaˇ, nawˬ cuˇ yiˍ cawˬ ve hkʼaw dawˇ cheˆ gʼa leh yawˇ ka tiꞈ yeˬ ve hkʼaw te ve hkʼa shuˍ te gʼa ve yoˬ. Nawˬ yaˇ nehˬ htaˇ shoꞈ shaꞈ ve gʼa hpuˇ ve htaꞈ yeunˇ hkanˍ gʼaˇ ve lehˬ, awˬ gʼuˇ suhˍ hpawˇ shoꞈ shaꞈ ve gʼa hpuˇ tuˬ htaꞈ gu hehnˇ taˍ gʼa tuˬ ga laˇ gʼa ve yoˬ.

15. Yawˇshiˆ caˉ leh Yaˬhoˉvaˬ ve kanˉ htaꞈ te tuˬ aˬ htoꞈ ma ga piˇ ve le? (2 Raˍsaˍvanˍ 34:14, 18-21)

¹⁵ Jawˇ mawˇ Yawˇshiˆ 26 hkʼawꞈ htaˇ bon yehˬ lonˉ kʼawꞈ gu te ve yoˬ. Te chehˇ ve awˬ yanˇ htaˇ “Gʼuiˬ sha Moˉseˍ htaꞈ piˇ taˍ ve awˬ liˇ tawˇ hkawˇ liꞈ daw htaꞈ” awˬ nu ve chaw gʼa mawˬ ve yoˬ. Liꞈ daw hkʼaw ve awˬ liˇ tawˇ hkawˇ gʼaw ve htaꞈ jawˇ mawˇ gʼa kaˇ htaˇ, oˇ ve hkʼaw bvuhꞈ taˍ ve hkʼe yawˇ laꞈ haˉ gʼaꞈ te ve yoˬ. (2 Raˍsaˍvanˍ 34:14, 18-21 gʼaw sheˍ.) Nawˬ Liꞈ hpu hkʼaˬ htaˆ kaꞈ gʼaw gaˇ˗aw laˇ? Chi hkʼe te chehˇ ve kʼo, cawˇ˗aw laˇ? Nawˬ htaꞈ awˬ gʼaˇ peꞈ laˇ gʼa ve Liꞈ hpu awˬ tawn htaꞈ nawˬ tawnˇ gʼa˗aw laˇ? Lonˆ kʼawꞈ kʼoˆ ve, Liꞈ hpu hkʼaw yawˇ gʼaw ve awˬ ceuˬ dawˇ cawˇ ve teˇ hpaˍ htaꞈ bvuhꞈ taˍ ve yoˬ. Nawˬ Lonˆ hkʼa shuˍ te ve kʼo, nawˬ Liꞈ hpu awˬ tawn htaꞈ tawnˇ gʼa tuˬ ga laˇ ve, maˇ heˆ leh nawˬ Liꞈ hpu hkʼaw gʼaw ve htaꞈ awˬ bon gʼa tuˬ kaꞈ ga laˇ ve yoˬ. Nawˬ Liꞈ hpu hkʼaw hkʼa dehꞈ shiˍ leh haꞈ ve kʼo, nawˬ Yaˬhoˉvaˬ ve kanˉ leuˉ leh te gaˇ tuˬ yoˬ. Yaˬhoˉvaˬ ve liꞈ daw hkʼaw awˬ liˇ tawˇ hkawˇ hkʼa shuˍ Yawˇshiˆ cawˇ ve awˬ ceuˬ htaꞈ te tuˬ ga piˇ ve yoˬ. Liꞈ hpu hkʼaw nawˬ htaꞈ kaꞈ ga laˇ gʼa ve yoˬ.

16. Aˬ htoꞈ ma te Yawˇshiˆ venˇ baˆ uiˍ jaˇ ve htaꞈ te yaꞈ ve le? Leh yawˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁶ Yawˇshiˆ cuˇ yiˍ maˇ cawˬ ve hkʼaw dawˇ cheˆ ve awˬ lawn maˍ laˇ ve. Yawˇshiˆ 39 hkʼawꞈ htaˇ, yawˇ te yaꞈ ve pa taw gʼa suh˗e ve yoˬ. Yaˬhoˉvaˬ beˆ maˍ laˇ ve  aꞈ kehˉ yawˇ awˬ to htaꞈ yonˍ jaˇ ve yoˬ. (2 Raˍsaˍvanˍ 35:20-25) Maˍ laˇ ve lehˬ, ngaˬ hui a shaꞈ hkʼaˬ hkʼe ma gaˬ˗oˬ ve maˇ heˆ leh Liꞈ hpu hkʼaˬ hkʼe maw henˇ˗oˬ ve htawˇ maˇ kʼoˆ, ngaˬ hui Yaˬhoˉvaˬ ve kanˉ te leh yawˇ htaꞈ hkʼaˬ htaˆ kaꞈ gʼaˇ va tuˬ dawˇ teh taˍ cawˇ ve yoˬ. Beˆ maˍ laˇ tuˬ ngaˬ hui hkʼaˬ htaˆ kaꞈ bon lawˬ ve, Liꞈ hpu henˇ ve, co ha hpawˇ ve chaw mawˇ beˆ maˍ laˇ ve htaꞈ na yuˬ cawˇ ve yoˬ. Ngaˬ hui chi hkʼe te ve kʼo, uiˍ jaˇ ve venˇ baˆ htaꞈ maˇ te yaꞈ leh ngaˬ hui ve a shaꞈ teꞈ kuiˬ hkʼaw ha lehˬ jaˇ tuˬ yoˬ.—Yaˍkoˆ 1:25.

17. Yuˇdaꞈ ve jawˇ mawˇ 3 gʼaˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁷ Yaˇ nehˬ hpehꞈ htaˇ te gʼa ve hkʼaw ha lehˬ ve laiˉ ceuˬ cawˬ ve yoˬ. Yeˍhawˇshaˆ, Awˇziˆ leh Yawˇshiˆ yawˇ hui ve awˬ lawn yaˇ nehˬ cuˇ yiˍ cawˬ ve hkʼaw dawˇ cheˆ leh a shaꞈ teꞈ kuiˬ hkʼaw Yaˬhoˉvaˬ nyi hkʼaˇ suh tuˬ te piˇ gʼa ve tehꞈ gʼa mawˬ ve yoˬ. Jawˇ mawˇ chi ve 3 gʼaˇ te yaꞈ leh yawˇ hui maˇ daꞈ ve awˬ ceuˬ gʼa hpuˇ tuˬ te piˇ ve yoˬ. Yaꞈ hkʼaˇ, yawˇ hui daꞈ ve awˬ lawn htaꞈ nawˬ henˇ yuˬ leh yawˇ hui te yaꞈ ve hkʼe nawˬ maˇ te ve kʼo, nawˬ ve a shaꞈ teꞈ kuiˬ hkʼaw ha lehˬ jaˇ tuˬ yoˬ.

18. Nawˬ ve a shaꞈ teꞈ kuiˬ hkʼaw ha lehˬ gʼa ve htaꞈ ga laˇ gʼa ve, Liꞈ hpu awˬ tawn hkʼaˬ ve teˇ tawn hpeuꞈ maw laˇ ve le? (Awˬ han htaꞈ nyi sheˍ.)

¹⁸ Liꞈ hpu hkʼaw yaˇ nehˬ Yaˬhoˉvaˬ geh meuˆ daꞈ ve awˬ lawn yawˇ nyi hkʼaˇ suh tuˬ te piˇ ve, leh yawˇ hui a shaꞈ teꞈ kuiˬ hkʼaw ha lehˬ gʼa ve awˬ lawn Liꞈ hpu hkʼaw bvuhꞈ keu taˍ ve yoˬ. Daˍviˆ kaꞈ teˇ gʼaˇ chi hkʼe hpehꞈ ve yoˬ. Yawˇ a shaꞈ i chehˇ sheˍ htaˇ kaꞈ Yaˬhoˉvaˬ ve kanˉ te tuˬ leuˆ yuˬ leh yawˇ ka tiꞈ yeˬ ve jawˇ mawˇ hpehꞈ la ve yoˬ. Teˇ pawˆ pawˆ kʼo Daˍviˆ te yaꞈ ve htawˇ, Daˍviˆ lehˬ ka tiꞈ yeˬ ve hk’aw Yaˬhoˉvaˬ ve kanˉ te ve tehꞈ yawˇ shawnˍ ve yoˬ. (1 Jawˇmawˇ 3:6; 9:4, 5; 14:8) Nawˬ Daˍviˆ ve awˬ lawn gʼaw ve kʼo, yawˇ ve awˬ lawn nawˬ Yaˬhoˉvaˬ ve kanˉ ka tiꞈ ve hkʼaw te gʼa tuˬ ga laˇ gʼa ve yoˬ. Maˍkuˆ leh Tiˆmoˉseˍ htaꞈ caˉ daꞈ ve awˬ lawn a shu yawˇ hkʼaˇ yawˇ Liꞈ hpu henˇ nyi gʼa ve yoˬ. Yawˇ hui a shaꞈ i chehˇ sheˍ htaˇ kaꞈ Yaˬhoˉvaˬ ve kanˉ te leh yawˇ hui ka tiꞈ yeˬ ve hkʼaw Yaˬhoˉvaˬ ve kanˉ te ve htaꞈ nawˬ gʼa mawˬ tuˬ yoˬ. Yawˇ hui dawˇ cheˆ ve Yaˬhoˉvaˬ ha lehˬ tuˬ te piˇ leh yawˇ hui a shaꞈ teꞈ kuiˬ hkʼaw kaꞈ ha lehˬ jaˇ ve yoˬ.

19. Nawˬ ve a shaꞈ teꞈ hkʼaˇ hkʼaˬ hkʼe hpehꞈ gaˇ ve le?

¹⁹ A shaꞈ teꞈ kuiˬ hkʼaw hkʼaˬ hkʼe hpehꞈ ve chi teˇ hkui nawˬ te ve htaꞈ cawˬ ve yoˬ. Nawˬ Yaˬhoˉvaˬ htaꞈ gʼaˇ va leh a shu yawˇ awˬ to htaꞈ gʼaˇ maˇ va ve kʼo, nawˬ cuˇ yiˍ cawˬ ve hkʼaw dawˇ cheˆ gʼa tuˬ yawˇ ga laˇ tuˬ yoˬ. (Tawˇ naˉ ve 20:24) Nawˬ a shaꞈ teꞈ kuiˬ hkʼaw ha lehˬ jaˇ ve yoˬ. Nawˬ Yaˬhoˉvaˬ awˬ pon te piˇ ve htaꞈ yawˇ awˬ hpfuhˇ shiˍ ve tehꞈ tawnˇ taˍ sheˍ. Ngaˬ hui htaꞈ haꞈ jaˇ ve Awˬ pa Yaˬhoˉvaˬ ve kanˉ te ve aꞈ kehˉ daꞈ jaˇ ve awˬ ceuˬ maˇ cawˬ.