Dawˇ teh taˍ ve lehˬ zuhꞈ maˆ hk’e ceh hpehꞈ ve maˇ heˆ. Awˬ tehˬ hpehꞈ la tcuh gaˇ ve yoˬ. Dawˇ teh taˍ ve awˬ tehˬ te g’a tuˬ, awˬ hk’aˇ g’a gu teh ve, pa keunˍ pa cawˇ ve k’o g’a pa leh kanˉ te hkeuꞈ ve htaꞈ daꞈ ve dawˇ hk’aˇ g’a cawˬ ve yoˬ.

Dawˇ teh taˍ ve lehˬ te tuˬ laiˉ ceuˬ cawˬ ve yoˬ. Maˇ maw ve hk’aw te g’a tuˬ ve awˬ yanˇ (hk’aˬ nyiˇ nyi maˇ heˆ leh hk’aˬ nyiˇ shinˉ hk’aw te peuˬ g’a ve), awˬ kaˍ lehˉ ve awˬ yanˇ (awˬ yanˇ laiˉ ha pa yehˇ ve), leh awˬ yanˇ yehˇ maw ve (awˬ yanˇ teˇ hk’awꞈ maˇ heˆ leh oˇ ve aꞈ kehˉ yehˇ maw ve yoˬ.) Dawˇ teh taˍ ve awˬ ceuˬ awˬ yanˇ maw ve htaꞈ te g’a tuˬ, awˬ yanˇ maˇ yehˇ maw ve htaꞈ awˉ lawˉ g’a te nyi ve yoˬ.

Dawˇ teh taˍ ve awˬ ceuˬ htaꞈ te ve lehˬ, nawˬ te g’a ve awˬ ceuˬ htaꞈ hk’a dehꞈ yonˍ g’a tuˬ te laˇ ve, nawˬ ve awˬ chawˇ nawˬ htaꞈ nyi ma cawˇ tuˬ te laˇ ve, leh nawˬ kaꞈ ha lehˬ ve cawˬ tuˬ te piˇ ve yoˬ.

A shu yawˇ awˬ to htaꞈ yonˍ g’a ve: Nawˬ dawˇ teh taˍ ve i ve awˬ ceuˬ htaꞈ te peuˬ g’a htaˇ, dawˇ teh taˍ ve uiˍ ve awˬ ceuˬ htaꞈ nawˬ hk’a dehꞈ te g’a tuˬ tehꞈ yonˍ ve yoˬ. Teˇ nyi le le nawˬ shoꞈ shaꞈ ve awˬ lawn htaꞈ gu g’a tuˬ tehꞈ yonˍ ve yoˬ. Tawˇ pa haˉ te k’o, nawˬ ve awˬ chawˇ teˇ hpaˍ nawˬ te yaꞈ tuˬ nyiˉ laˇ htaˇ kaꞈ gu g’a ve yoˬ.

Nawˬ ve awˬ chawˇ nawˬ htaꞈ nyi ma cawˇ tuˬ yoˬ: Maˇ-awˍ ve chaw lehˬ, dawˇ teh taˍ ve htaꞈ awˬ tehˬ te g’a ve chaw geh awˬ chawˇ te gaˇ ve yoˬ. Chi ve lehˬ a shu yawˇ awˬ to aˬ htoꞈ ma te gaˇ ve htaꞈ shiˍ leh dawˇ teh taˍ ve te g’a tuˬ coˇ caˇ ve yoˬ. Chi hk’oˆ kaꞈ, daꞈ jaˇ ve awˬ hk’aˇ teˇ hk’aˇ yawˇ hui geh meuˆ daꞈ maˇ laˇ tuˬ ve lehˬ, dawˇ teh taˍ ve hk’a shuˍ cawˬ ve chaw geh kanˉ te ve yoˬ.

Ha lehˬ ve cawˬ ve: Nawˬ dawˇ teh taˍ ve htaꞈ te peuˬ g’a htaˇ nawˬ kaꞈ nyi hk’aˇ suh jaˇ ve yoˬ.

“Ngaˬ dawˇ teh taˍ ve awˬ ceuˬ cawˬ gaˇ ve yoˬ. Awˬ lawn k’o, dawˇ teh taˍ ve chi lehˬ ngaˬ hk’a dehꞈ te g’a tuˬ g’aꞈ te gaˇ ve yoˬ. Leh nawˬ g’aꞈ te g’a-oˬ htaˇ, peuˬ taˉ ve awˬ ceuˬ htaꞈ k’awꞈ dawˇ nyi htaˇ nyi ma sha jaˇ leh k’oˆ ve, ‘daꞈ jaˇ. Ngaˬ te g’a leh te g’a peuˬ-o.’”—Hkiˆ-to-feuˇ.

LIꞈ HPU HK’AW BEˆ MAˍ LAˇ TAˍ VE: “Mvuhˇ daꞈ ve awˬ yanˇ htaꞈ ceh nawˬ law chehˇ ve k’o, nawˬ teꞈ chiˉ g’a ti g’a g’euꞈ taˉ tuˬ ve maˇ heˆ.”—Cuˇ yiˍ piˇ ve 11:4.

Dawˇ teh taˍ ve htaꞈ te g’a tuˬ awˬ hawˉ lo cawˬ ve awˬ ceuˬ teˇ hpaˍ htaꞈ te nyi sheˍ.

Dawˇ teh taˍ ve. Nawˬ te peuˬ g’a tuˬ dawˇ teh taˍ ve awˬ hk’aˇ aˬ htoꞈ ma cawˬ ve bvuhꞈ tawˆ la sheˍ. Hk’aˬ ve teˇ ceuˬ awˉ lawˉ te tuˬ shawˍ teh sheˍ. Chi lehˬ awˉ lawˉ te g’a tuˬ teˇ ceuˬ, 2 ceuˬ, 3 ceuˬ, leh k’awꞈ caˉ te k’ai g’a tuˬ leuˆ yuˬ ve yoˬ.

Te tuˬ awˬ hk’aˇ gu teh ve. Dawˇ teh taˍ ve teˇ ceuˬ leh teˇ ceuˬ htaꞈ te g’a tuˬ, awˬ hawˉ lo ve awˬ hk’aˇ htaꞈ g’aꞈ te nyi sheˍ:

• Nawˬ te peuˬ g’a tuˬ awˬ yanˇ shawˍ teh ve.

• Nawˬ g’a te cawˇ ve aˬ htoꞈ ma awˬ hk’aˇ cawˬ ve dawˇ nyi ve.

• Aˬ htoꞈ ma g’a hpuˇ ve htawˇ gu tuˬ awˬ g’uˇ suhˍ htaˇ kaꞈ awˉ lawˉ g’a dawˇ nyi ve.

G’aꞈ te sheˍ. Teˇ ceuˬ le le cawˬ-oˬ htaˇ hehꞈ te-a tehꞈ taˇ dawˇ. ‘Ngaˬ dawˇ teh taˍ ve awˬ lawn htaꞈ g’aꞈ te tuˬ, ngaˬ te g’a ve awˬ ceuˬ awˉ lawˉ teˇ ceuˬ aˬ htoꞈ ma le?’ tehꞈ dawˇ nyi sheˍ. Ngaˬ hui te tuˬ ve awˬ ceuˬ htaꞈ shiˍ-oˬ ve k’o, g’aꞈ te loˬ. Leh ngaˬ hui hk’aˬ hk’e taw g’aꞈ te g’a-oˬ ve tehꞈ a shu yawˇ awˬ to htaꞈ chaˬ nyi sheˍ.

LIꞈ HPU HK’AW BEˆ MAˍ LAˇ TAˍ VE: “Nawˬ hkʼa dehꞈ gu taˍ ve hkʼaw kanˉ te ve kʼo, caˇ leuˉ dawˬ leuˉ hkʼa biˇ cawˬ tuˬ yoˬ.”—Tawˇ naˉ ve 21:5.