AWˬ HPAWˇ AWˬ MIˇ MA AWˬ PON
1: Hk’a dehꞈ yawˆ yan daꞈ ve
HK’Aˬ HK’E K’Oˆ GAˇ VE LE?
Awˬ hpawˇ awˬ miˇ ma hpehꞈ ve lehˬ a yeˇ uiˍ jaˇ ve tehꞈ shawˍ leh yawˇ huiˉ maˬ hk’aˬ htaˆ kaꞈ g’a meuˆ daꞈ cawˇ ve tehꞈ dawˇ ve yoˬ. Yawˇ huiˉ maˬ aˬ htoꞈ ma g’a hpuˇ ve htawˇ maˇ k’oˆ, hk’aˬ htaˆ kaꞈ teˇ geh g’a chehˇ tuˬ yoˬ tehꞈ yonˍ g’a ve yoˬ.
Awˬ chawˇ awˬ paˆ maˇ heˆ leh yehˬ k’a hk’aw ve chaw nyiˉ piˇ ve pa taw, awˬ ca teˇ hpaˍ k’o teˇ geh k’awꞈ chehˇ ve yoˬ. Yaꞈ hk’aˇ, yawˇ huiˉ maˬ haꞈ daꞈ leh yawˆ yan daꞈ ve pa taw teˇ geh chehˇ ve k’o daꞈ jaˇ ve yoˬ.
LIꞈ HPU HK’AW BEˆ MAˍ LAˇ TAˍ VE: “Awˬ hpawˇ htawˇ, awˬ miˇ ma htaꞈ maˇ gʼa baˬ.”—1 Kawˇrenˍhtuˆ liꞈ 7:11.
“Nawˬ awˬ ca htaꞈ a yeˇ uiˍ jaˇ tehꞈ shawˍ ve k’o, nawˬ yawˇ htaꞈ maˇ beuꞈ taˬ. Yaꞈ hk’aˇ, venˇ baˆ hpehˇ piˇ leh lawˬ hkawˉ daꞈ ve yoˬ. Shoꞈ shaꞈ ve awˬ ceuˬ lehˬ haˍ ve awˬ ceuˬ hpehꞈ ve htawˇ, baˬ daꞈ tuˬ te laˇ ve awˬ hk’aˇ maˇ heˆ tehꞈ nawˬ dawˇ ve yoˬ.”—Maiˉhkaw.
Aˬ HTOꞈ MA TE A YEˇ UIˍ JAˇ VE LE?
Shoꞈ shaꞈ ve awˬ lawn cawˬ htaˇ, awˬ ca htaꞈ a yeˇ uiˍ jaˇ tehꞈ maˇ shawˍ ve chaw lehˬ, ‘ngaˬ hui awˬ tehˬ ve awˬ ca hpehꞈ ve maˇ heˆ’ tehꞈ k’oˆ leh baˬ daꞈ tuˬ awˬ hk’aˇ ca ve yoˬ.
“Laiˉ g’aˇ maˇ heuˆ daꞈ sheˍ htaˇ kaꞈ yawˇ hui dawˇ teh taˍ ve awˬ hk’aˇ cawˬ ve lehˬ teˇ geh chehˇ maˇ g’a ve k’o baˬ daꞈ ve yoˬ. Maˇ heuˆ daꞈ sheˍ htaˇ kaꞈ baˬ daꞈ tuˬ dawˇ taˍ ve chaw lehˬ, awˉ lawˉ htaˇ kaꞈ awˬ ca htaꞈ a yeˇ uiˍ jaˇ tehꞈ maˇ shawˍ ve yoˬ.”—Ce.
NAWˬ Aˬ HTOꞈ MA TE G’A VE LE?
A SHU YAWˇ AWˬ TO HTAꞈ CHAˬ NYI VE
Deˇ daꞈ htaˇ . . .
Nawˬ chi teˇ g’aˇ htaꞈ heuˆ daꞈ ve nyi ma luˬ-a tehꞈ dawˇ-aw laˇ?
Nawˬ awˬ nu ve chaw geh ca chehˇ gaˇ-aw laˇ?
“Ngaˬ hui baˬ daꞈ-a yoˬ” maˇ heˆ leh “ngaˬ htaꞈ haꞈ ve chaw geh k’ai-a yoˬ” tehꞈ nawˬ k’oˆ-aw laˇ?
Na hkawˇ chi teˇ hpaˍ hk’aw ve teˇ maˬ htaꞈ nawˬ yoˬ tehꞈ dawˇ ve k’o, chi teˇ hkui ponˬ laˬ htaˇ aꞈ kehˉ nawˬ ve awˬ ca htaꞈ a yeˇ uiˍ jaˇ tehꞈ shawˍ ve tehꞈ g’a hpeuꞈ maw piˇ ve yoˬ.
NAWˬ VE AWˬ CA GEH TAWˇ YAW DAꞈ SHEˍ
Ngaˬ hui ve awˬ ca geh awˉ lawˉ htaˇ hk’e meuˆ daꞈ chehˇ-aw laˇ? Maˇ meuˆ daꞈ ve k’o aˬ htoꞈ ma pa taw le?
Chi teˇ hkui ngaˬ hui ve awˬ ca geh hk’a dehꞈ meuˆ daꞈ maˇ la tuˬ, aˬ htoꞈ ma g’a te cawˇ ve le?
TE NYI SHEˍ
Teˇ pawˆ teˇ yanˇ nawˬ ve awˬ ca htaꞈ haꞈ jaˇ tehꞈ k’oˆ leh liꞈ bvuhꞈ piˇ nyi sheˍ.
Nawˬ ve awˬ ca htaꞈ haꞈ ve tehꞈ hpeuꞈ maw piˇ tuˬ, nawˬ kanˉ te kuiˬ hpui lawˇ hk’oˆ lo awˬ han htawˍ taˍ ve teh taˍ sheˍ.
Nawˬ kanˉ te kuiˬ lo chehˇ htaˇ maˇ heˆ leh aˉ hk’aw maˇ chehˇ htaˇ tawˇ yaw tuˬ awˬ hk’eun hk’aw tawˇ yaw k’ai ve, maˇ heˆ leh liꞈ bvuhꞈ feu piˇ sheˍ.
LIꞈ HPU HK’AW BEˆ MAˍ LAˇ TAˍ VE: “Gʼuiˬ sha caˉ daꞈ piˇ taˍ ve htaꞈ chaw yaˇ maˇ gʼa yuˬ hpaˆ daꞈ piˇ.”—Maꞈhtehˍ liꞈ 19:6.
