Kaiˬ ve chaw lehˬ kanˉ te gaˇ puiˉ ve yoˬ. Yawˇ kanˉ te ve lehˬ awˬ meh bvuhˬ tuˬ leh awˬ meꞈ awˬ hponˇ cawˬ tuˬ te ve maˇ heˆ ve htawˇ, a shaꞈ teꞈ kuiˬ hk’aw loˍ ve awˬ ceuˬ leh awˬ nu ve chaw htaꞈ ga piˇ g’a tuˬ yawˇ kanˉ te hkeuꞈ ve htaꞈ ha lehˬ ve yoˬ.

Awˬ tehˬ k’oˆ k’o, ngaˬ hui teˇ g’aˇ le le a shaꞈ teꞈ kuiˬ hk’aw laiˉ ceuˬ g’a te ve yoˬ. Nawˬ kanˉ te kaiˬ ve chaw hpehꞈ ve k’o, shu aꞈ kehˉ te puiˉ tuˬ yoˬ. Awˬ lawn k’o, chi beuꞈ teˇ co-e ve chaw laiˉ g’aˇ lehˬ kanˉ hkeuꞈ ve htaꞈ maˇ te gaˇ ve yoˬ.—Cuˇ yiˍ piˇ ve 3:13.

“Chaw yaˇ kanˉ te kaiˬ ve k’o, yawˇ nyi hk’aˇ suhˍ tuˬ leh ha lehˬ tuˬ te piˇ ve tehꞈ ngaˬ g’a shiˍ ve yoˬ. Chi hk’e ve dawˇ hk’aˇ cawˬ htaˇ, ngaˬ kanˉ tanˬ te gaˇ la ve yoˬ. Nawˬ te ve kanˉ htaꞈ hk’a dehꞈ te ve k’o, nawˬ kaꞈ daꞈ ve awˬ meh cawˬ tuˬ yoˬ.”—Le-yaw.

LIꞈ HPU HK’AW BEˆ MAˍ LAˇ TAˍ VE: “Nawˬ kanˉ te kaiˬ ve kʼo nawˬ ve a shaꞈ htaꞈ hu gʼa tuˬ yoˬ.”—Tawˇ naˉ ve 14:23.

Awˬ hawˉ lo beˆ maˍ laˇ taˍ ve awˬ ceuˬ htaꞈ nawˬ g’aꞈ te ve k’o, nawˬ kanˉ te ve hpawˇ daꞈ ve dawˇ hk’aˇ cawˬ tuˬ yoˬ.

Puiˉ la tuˬ te jawˬ ve: Aˉ hk’aw ve kanˉ te ve, liꞈ henˇ yehˬ lo te tcuh laˇ ve awˬ ceuˬ aˉ hk’aw te ve, leh a shaꞈ hu tuˬ kanˉ te ve k’o coˇ caˇ leh hk’a dehꞈ te sheˍ. Nawˬ kanˉ hk’a dehꞈ te g’a-oˬ ve k’o, leuˉ leh k’awꞈ te g’a tuˬ awˬ hk’aˇ ca sheˍ. Kanˉ te vaiˇ ve maˇ heˆ leh awˉ lawˉ htaˇ aꞈ kehˉ daꞈ ve htaꞈ te g’a ve yoˬ. Nawˬ kanˉ hk’a dehꞈ te puiˉ la ve k’o, kanˉ te ve htaꞈ leuˉ leh ha lehˬ g’a ve yoˬ.

LIꞈ HPU HK’AW BEˆ MAˍ LAˇ TAˍ VE: ‘Daꞈ ve kanˉ htaꞈ tiˉ te ve chaw lehˬ, shu aꞈ kehˉ daꞈ leh jawˇ mawˇ htaꞈ awˬ chawˇ te keunˍ ve chaw hpehꞈ ve yoˬ.’—Tawˇ naˉ ve 22:29.

Shu awˬ pon awˬ bon g’a tuˬ dawˇ nyi piˇ ve: Maˇ-awˍ ve k’o, nawˬ ve awˬ vuiˬ htaꞈ a yeˇ hk’a dehꞈ yuˬ htaˇ, shu awˬ pon kaꞈ awˬ bon g’a tuˬ yoˬ. Tawˇ pa haˉ te k’o, nawˬ aˉ hk’aw lo ve kanˉ te kaiˬ ve k’o, yehˬ k’a hk’aw ve chaw kanˉ hk’e taw maˇ g’a te tuˬ nawˬ ga piˇ g’a ve yoˬ.

LIꞈ HPU HK’AW BEˆ MAˍ LAˇ TAˍ VE: “Piˇ ve lehˬ gʼa ve aꞈ kehˉ awˬ bon uiˍ ve yoˬ.”—Tcuh yaˇ 20:35.

Lawˬ ve aꞈ kehˉ hk’a dehꞈ te leh daꞈ ve awˬ ceuˬ htaꞈ te piˇ ve. Awˬ nu ve chaw nawˬ geh lawˬ ve aꞈ kehˉ nawˬ coˇ caˇ leh hk’a dehꞈ te piˇ ve, maˇ heˆ leh oˇ ve aꞈ kehˉ nawˬ k’awꞈ te piˇ g’a ve yoˬ. Nawˬ oˇ hk’e te htaˇ, nawˬ leuˆ yuˬ leh te ve pa taw ha lehˬ g’a ve yoˬ.—Maꞈhtehˍ 5:41.

LIꞈ HPU HK’AW BEˆ MAˍ LAˇ TAˍ VE: ‘Nawˬ awˬ bon te laˇ ve lehˬ, gʼa te ve pa taw te ve teˇ ceuˬ maˇ gʼa hpehꞈ leh, te gaˇ ve awˬ hkʼaw lo te ve teˇ ceuˬ gʼa hpehꞈ tuˬ yoˬ.’—Hpiˇleˍmonˍ 14.

Keunˍ lawꞈ cawˇ lawꞈ ve chaw hpehꞈ ve. Kaiˬ ve chaw lehˬ kanˉ tiˉ te ve chaw hpehꞈ ve maˇ heˆ. Leh chaw bawˬ hpehꞈ ve kaꞈ maˇ heˆ. Yaꞈ hk’aˇ, yawˇ keunˍ lawꞈ cawˇ lawꞈ ve chaw hpehꞈ ve lehˬ, yawˇ kanˉ te hkeuꞈ jaˇ leh g’aˇ jehˇ htaˇ kaꞈ ha lehˬ g’a ve yoˬ.

LIꞈ HPU HK’AW BEˆ MAˍ LAˇ TAˍ VE: “Caˇ tuˬ a ciˉ ceh tiˉ gʼa caˇ ve htawˇ nyi ma gawˬ lehˍ cawˬ ve chaw lehˬ, maˇ zuhꞈ maˇ gʼuˇ kanˉ gʼaˇ hteꞈ te leh, mvuhˇ haw htaꞈ gʼaꞈ yuˬ chehˇ ve chaw aꞈ kehˉ daꞈ leuˉ ve yoˬ.”—Cuˇ yiˍ piˇ ve 4:6.