AWˬ HPAWˇ AWˬ MIˇ MA AWˬ PON
3: Yawˆ yan daꞈ ve
HK’Aˬ HK’E K’Oˆ GAˇ VE LE?
Awˬ ca lehˬ teˇ g’aˇ leh teˇ g’aˇ dawˇ hk’aˇ maˇ shuˍ daꞈ htaˇ, yawˇ hui teˇ g’aˇ ve dawˇ hk’aˇ htaꞈ yawˆ yan piˇ cawˇ ve yoˬ. Liꞈ k’oˆ teˇ k’oˆ hk’aw k’oˆ ve, “a shu yawˇ ve dawˇ hk’aˇ htaꞈ ceh g’awˆ tiˍ taˍ ve aꞈ kehˉ, yawˇ hui dawˇ hk’aˇ maˇ shuˍ daꞈ ve awˬ lawn htaꞈ yaw daꞈ ve yoˬ. Yawˆ yan ve hk’aw teˇ g’aˇ tawˇ yaw ve htaꞈ na taˍ piˇ leh, gu tuˬ awˬ hk’aˇ teˇ geh ca ve yoˬ.”
LIꞈ HPU HK’AW BEˆ MAˍ LAˇ VE: ‘Haꞈ pehnˇ ve lehˬ, a shu yawˇ awˬ to awˬ pon maˇ ca puiˉ.’—1 Kawˇrenˍhtuˆ 13:4, 5.
“Ngaˬ ve awˬ miˇ ma htaꞈ yawˆ yan ve k’oˆ gaˇ ve lehˬ, ngaˬ yawˇ htaꞈ awˬ hpfuhˇ shiˍ ve pa taw yawˇ nyi ma luˬ tuˬ teˇ ceuˬ kaꞈ maˇ te piˇ leh ngaˬ hui ve awˬ ca htaꞈ heuˆ la kuiˬ kaꞈ maˇ te.”—Mai˗hka.
Aˬ HTOꞈ MA TE A YEˇ UIˍ JAˇ VE LE?
Awˬ hpawˇ awˬ miˇ ma lehˬ maˇ yawˆ yan daꞈ ve k’o, teˇ g’aˇ htaꞈ maˇ daꞈ ve hpawˇ k’oˆ ve, teˇ g’aˇ leh teˇ g’aˇ nyi ma naˬ tuˬ, leh teˇ g’aˇ leh teˇ g’aˇ maˇ shawˍ maˇ caˆ tawˇ yaw daꞈ ve yoˬ. Chi ve hk’a peu˗eˬ lehˬ awˬ hpawˇ awˬ miˇ ma baˬ daꞈ tuˬ te piˇ ve tehꞈ cuˇ yiˍ cawˬ paˍ k’oˆ ve yoˬ.
“Teˇ g’aˇ leh teˇ g’aˇ maˇ shawˍ maˇ caˆ tawˇ yaw daꞈ ve, nyi ma naˬ tuˬ tawˇ yaw daꞈ ve, maˇ heˆ leh awˬ miˇ ma htaꞈ k’oˆ guiˇ g’uiˬ guiˇ piˇ ve lehˬ, awˬ miˇ ma awˬ hpawˇ htaꞈ g’aˇ hk’a dehꞈ maˇ va g’a tuˬ te piˇ ve yoˬ. Chi hk’e te ve lehˬ awˬ ca htaꞈ hpaˆ daꞈ tuˬ te piˇ ve yoˬ.”—Bai˗a.
NAWˬ Aˬ HTOꞈ MA TE G’A VE LE?
A SHU YAWˇ AWˬ TO HTAꞈ CHA NYI SHEˍ
Teˇ shinˉ ve hk’aw nawˬ tawˇ yaw ve leh te ve awˬ ceuˬ htaꞈ chaˬ nyi sheˍ. Peuˬ leh awˬ hawˉ lo ve na hkawˇ chi a shu yawˇ awˬ to htaꞈ na nyi cawˇ ve:
‘Ngaˬ lehˬ ngaˬ ve awˬ ca htaꞈ hk’aˬ hk’e taw deˇ piˇ hkeh ve le? Leh yawˇ htaꞈ hk’aˬ hk’e taw taw chiˇ mvuh piˇ ve le?’
‘Ngaˬ lehˬ ngaˬ ve awˬ ca htaꞈ yawˆ yan piˇ chehˇ ve tehꞈ hk’aˬ hk’e hpeuꞈ maw piˇ tuˬ le?’
NAWˬ VE AWˬ CA GEH YAW DAꞈ SHEˍ
Teˇ g’aˇ leh teˇ g’aˇ yawˆ yan daꞈ ve tehꞈ hpeuꞈ maw piˇ tuˬ, te ve awˬ ceuˬ leh tawˇ yaw ve awˬ ceuˬ hk’aˬ hk’e te cawˇ ve le?
Nawˬ ve awˬ ca htaꞈ tawˇ yaw ve leh te piˇ ve awˬ ceuˬ maˇ yawˆ yan daꞈ ve aˬ htoꞈ ma cawˬ ve le?
TE NYI SHEˍ
Nawˬ lehˬ nawˬ ve awˬ ca nawˬ htaꞈ yawˆ yan laˇ tuˬ te tcuh gaˇ ve 3 ceuˬ htaꞈ bvuhꞈ tawˆ leh pa daꞈ g’aw nyi sheˍ. Peuˬ hk’awꞈ nawˉ bvuhꞈ taˍ ve hk’e coˇ caˇ leh g’aꞈ te nyi sheˍ.
Nawˬ ve awˬ ca ve te hk’aˇ dawˇ hk’aˇ nawˬ dawˇ cawˇ ve awˬ ceuˬ bvuhꞈ tawˆ la sheˍ. Leh awˬ hk’oˆ kaꞈ, te hk’aˇ dawˇ hk’aˇ oˇ ve teˇ hpaˍ nawˬ dawˇ cawˇ ve tehꞈ k’oˆ piˇ sheˍ.
“Ngaˬ hpawˇ htaꞈ yawˆ yan ve tehꞈ hpeuꞈ maw piˇ ve awˬ hk’aˇ lehˬ, ngaˬ yawˇ te ve awˬ ceuˬ htaꞈ awˬ hpfuhˇ shiˍ leh yawˇ ha lehˬ tuˬ te piˇ gaˇ ve yoˬ. Ngaˬ yawˇ htaꞈ nyi ma awˬ tawˬ hk’a gaˬ yawˆ yan ve tehꞈ hpeuꞈ maw piˇ tuˬ, hk’aˬ htaˆ kaꞈ daꞈ ve awˬ ceuˬ te piˇ ve yoˬ.”—Me˗keh.
A yeˇ uiˍ jaˇ ve lehˬ, nawˬ ve awˬ ca htaꞈ nawˬ yawˆ yan piˇ ve tehꞈ yawˇ dawˇ-aw laˇ? Nawˬ yawˇ htaꞈ yawˆ yan piˇ-oˬ ve tehꞈ nawˬ hk’aˇ nawˬ maˇ dawˇ nyi cawˇ.
LIꞈ HPU HK’AW BEˆ MAˍ LAˇ VE: “Ha kʼaˉ puiˉ ve, shu awˬ pon daꞈ ve htaꞈ te ve, nyi ma taˍ nehˬ ve, nyi ma nuˇ nuˇ nehˬ nehˬ ve leh, nyi ma dawˇ zuhˬ gaˇ zuhˬ ve, chi teˇ hpaˍ htaꞈ veuꞈ deh-o.”—Kawˇlawˇsehˇ 3:12.
