AWˬ HPAWˇ AWˬ MIˇ MA AWˬ PON
2: Teˇ geh kanˉ te ve
HK’Aˬ HK’E K’Oˆ GAˇ VE LE?
Awˬ hpawˇ leh awˬ miˇ ma kanˉ teˇ geh te htaˇ, yawˇ huiˉ maˬ lehˬ caꞈ poˬ g’aꞈ paˍ leh ga piˇ ve chaw hk’e hpehꞈ ve yoˬ. Shoꞈ shaꞈ ve awˬ lawn cawˬ htaˇ “ngaˬ” k’oˆ ve aꞈ kehˉ “ngaˬ hui” k’oˆ ve yoˬ.
LIꞈ HPU HK’AW BEˆ MAˍ LAˇ TAˍ VE: “Yawˇ huiˉ maˬ nyiˇ gʼaˇ hpehꞈ ve maˇ heˆ, teˇ gʼaˇ tiˉ hpehꞈ la peuˬ.”—Maꞈhtehˍ 19:6.
“Awˬ ca cawˬ ve chaw lehˬ teˇ g’aˇ tiˉ ve awˬ lawn maˇ hpehꞈ-o. Yehˬ k’a hk’aw dawˇ taˍ ve hk’e te g’a tuˬ, awˬ hpawˇ awˬ miˇ ma lehˬ g’a ga daꞈ ve yoˬ.”—Hkiˆto-feuˇ
Aˬ HTOꞈ MA TE A YEˇ UIˍ JAˇ VE LE?
Awˬ hpawˇ awˬ miˇ ma maˇ cawˇ maˇ hawˍ daꞈ htaˇ, yawˇ hui shoꞈ shaꞈ ve awˬ lawn cawˬ ve htaꞈ gu cawˇ ve kaꞈ teˇ g’aˇ leh teˇ g’aˇ venˇ baˆ taˍ daꞈ ve yoˬ. Chi lehˬ leuˉ leh shoꞈ shaꞈ ve cawˬ tuˬ te piˇ ve yoˬ.
“Yehˬ k’a hk’aw awˬ ca htaꞈ cawˇ daꞈ hawˍ daꞈ ve lehˬ a yeˇ uiˍ jaˇ. Ngaˬ leh ngaˬ hpawˇ maˇ cawˇ maˇ hawˍ daꞈ ve k’o, ngaˬ hui pawehˇ hk’aw zuhꞈ ve awˬ chawˇ hk’e ceh hpehꞈ ve yoˬ. Awˬ tehˬ ve awˬ ca hpehꞈ ve maˇ heˆ. Leh ngaˬ hui a yeˇ uiˍ ve awˬ lawn teˇ geh dawˇ cheˆ htaˇ, shoꞈ shaꞈ ve awˬ lawn cawˬ tuˬ yoˬ hehˉ.”—A-leˆsa-deuˇ.
NAWˬ Aˬ HTOꞈ MA TE G’A VE LE?
NAWˬ HK’Aˬ HK’E DAWˇ VE A SHU YAWˇ AWˬ TO HTAꞈ CHAˬ NYI SHEˍ
Ngaˬ ca g’a taˍ ve hpu lehˬ “ngaˬ ve ceh tiˉ hpehꞈ ve laˇ?”
Ngaˬ ve awˬ ca maˇ chehˇ htaˇ ngaˬ g’aˇ hk’a dehꞈ maˇ jehˇ ve laˇ?
Ngaˬ ve awˬ ca yawˇ ve awˬ viˉ awˬ nyi geh meuˆ daꞈ ve htawˇ, ngaˬ yawˇ hui geh maˇ caˉ daꞈ gaˇ ve laˇ?
NAWˬ VE AWˬ CA GEH TAWˇ YAW DAꞈ SHEˍ
Ngaˬ hui cawˇ daꞈ hawˍ daꞈ g’a ve hk’aˬ hk’e hpawˇ le?
Ngaˬ hui g’a pa cawˇ ve aˬ htoꞈ ma cawˬ ve le?
Ngaˬ hui cawˇ daꞈ hawˍ daꞈ ve cawˬ maˇ la tuˬ ga laˇ g’a ve aˬ htoꞈ ma cawˬ ve le?
TE NYI SHEˍ
Nawˬ ve awˬ ca geh bawˉ shiˍ ehˉ (hteh-niˆ) dawˆ guiˇ htaˇ nawˬ teˇ hpawˇ lo chehˇ ve aꞈ kehˉ teˇ geh pawnˇ daꞈ leh teˇ moˍ tiˉ te g’a tuˬ, nawˬ aˬ htoꞈ ma te g’a ve htaꞈ dawˇ nyi sheˍ.
‘Ngaˬ hk’aˬ hk’e te g’aˇ tuˬ le ceh’ tehꞈ dawˇ nyi ve aꞈ kehˉ ‘ngaˬ hui hk’aˬ hk’e te g’aˇ tuˬ’ ve htaꞈ dawˇ nyi sheˍ.
“A shu cawˇ ve maˇ cawˇ ve a yeˇ maˇ uiˍ. Awˬ lawn k’o a yeˇ uiˍ jaˇ ve awˬ ceuˬ lehˬ, nawˬ ve awˬ ca geh dawˇ sha gawˬ lehˍ cawˬ leh teˇ moˍ tiˉ hpehꞈ ve yoˬ.”—E-hta.
LIꞈ HPU HK’AW BEˆ MAˍ LAˇ TAˍ VE: “A shu yawˇ awˬ to htaꞈ caˉ daꞈ ve awˬ lawn teˇ hpaˍ htaꞈ ceh tiˉ taˇ dawˇ nyi. Yaꞈ hkʼaˇ, shu htaꞈ caˉ daꞈ ve awˬ lawn teˇ hpaˍ htaꞈ htawˇ dawˇ nyi-o.”—Hpiˇliˇpiˆ 2:3, 4.
