AWˬ HPAWˇ AWˬ MIˇ MA AWˬ PON
4: Venˇ baˆ hpehˇ daꞈ ve
HK’Aˬ HK’E K’Oˆ GAˇ VE LE?
Venˇ baˆ hpehˇ daꞈ ve lehˬ, nyi ma naˬ tuˬ te laˇ ve awˬ lawn htaꞈ maˇ tawnˇ taˍ-oꞈ ve tehꞈ k’oˆ gaˇ ve yoˬ. Yaꞈ hk’aˇ, awˬ lawn oˇ ve maˇ uiˍ leh maˇ hpehꞈ la jaw ve hk’e hpehꞈ ve tehꞈ k’oˆ gaˇ ve maˇ heˆ.
LIꞈ HPU HK’AW BEˆ MAˍ LAˇ TAˍ VE: “Teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ.”—Kawˇlawˇsehˇ 3:13.
“Nawˬ chaw teˇ g’aˇ htaꞈ haꞈ ve k’o, yawˇ ve yaꞈ kuiˬ htaꞈ maˇ nyi leh yawˇ daꞈ ve chaw hpehꞈ la tuˬ coˇ caˇ leh te ve htaꞈ nawˬ nyi cawˇ ve yoˬ.”—Eh-law.
Aˬ HTOꞈ MA TE A YEˇ UIˍ JAˇ VE LE?
Nyi ma naˬ tuˬ te laˇ ve htaꞈ nawˬ tawnˇ taˍ ve k’o, nawˬ awˬ to leh nawˬ ve nyi ma htaꞈ heuˆ la kuiˬ cawˬ jaˇ. Leh nawˬ ve awˬ ca htaꞈ kaꞈ te luˬ piˇ chehˇ ve yoˬ.
“Teˇ pawˆ htaˇ ngaˬ ve awˬ hpawˇ ngaˬ nyi ma naˬ jaˇ tuˬ te laˇ ve awˬ ceuˬ htaꞈ ca lawˬ hkawˉ la ve yoˬ. Awˉ lawˉ htaˇ, ngaˬ yawˇ htaꞈ venˇ baˆ hpehˇ piˇ tuˬ haˍ jaˇ. Yaꞈ hk’aˇ, awˬ leh meuˇ gaˬ leh ngaˬ yawˇ htaꞈ venˇ baˆ hpehˇ piˇ ve yoˬ. Ngaˬ yawˇ htaꞈ venˇ baˆ haˆ maˇ hpehˇ piˇ ve pa taw nyi ma luˬ jaˇ. Awˬ lawn k’o, chi ngaˬ huiˉ maˬ dawˇ maˇ jaˇ tuˬ te laˇ ve yoˬ.”—Co-leˇ.
NAWˬ Aˬ HTOꞈ MA TE G’A VE LE?
A SHU YAWˇ AWˬ TO HTAꞈ CHAˬ NYI VE
Awˬ g’uˇ suhˍ hpawˇ nawˬ ve awˬ ca tawˇ yaw ve leh te ve awˬ ceuˬ nawˬ htaꞈ nyi ma naˬ tuˬ te laˇ ve k’o, a shu yawˇ awˬ to htaꞈ na nyi sheˍ:
‘Ngaˬ dawˇ maˇ jaˇ ve chaw hpehꞈ ve laˇ?’
‘Ngaˬ beuꞈ ve awˬ ceuˬ yaꞈ jaˇ ve awˬ lawn hpehꞈ leh yawˇ ngaˬ geh ca lawˬ hkawˉ la tcuh cawˇ˗aw laˇ, maˇ heˆ leh awˬ lawn chi ve htaꞈ ngaˬ maˇ tawnˇ taˍ cawˇ ve laˇ?’
NAWˬ VE AWˬ CA GEH TAWˇ YAW DAꞈ SHEˍ
Maˇ˗awˍ ve k’o, ngaˬ hui venˇ baˆ hpehˇ daꞈ tuˬ awˬ yanˇ hk’aˬ hk’e maw g’a yehˇ ve le?
Venˇ baˆ haˆ haˆ hpehˇ daꞈ tuˬ ngaˬ hui hk’aˬ hk’e g’a te cawˇ ve le?
TE NYI SHEˍ
Nawˬ ve awˬ ca nawˬ beuꞈ tuˬ te laˇ ve k’o, yawˇ nawˬ htaꞈ te gaˇ leh te laˇ ve tehꞈ taˇ dawˇ.
Nawˬ ve awˬ ca htaꞈ venˇ baˆ taˇ taˍ. Awˬ lawn k’o, “ngaˬ hui hkʼa peu˗eˬ laiˉ ceuˬ te yaꞈ ve yoˬ.”—Yaˍkoˆ 3:2.
“Ngaˬ hui nyiˇ g’aˇ g’aˇ te yaꞈ ve k’o, venˇ baˆ hpehˇ daꞈ tuˬ sha ve yoˬ. Yaꞈ hk’aˇ, teˇ g’aˇ ceh tiˉ te yaꞈ ve k’o, venˇ baˆ hpehˇ daꞈ tuˬ haˍ jaˇ ve yoˬ. Lawˬ hkawˉ ve leh venˇ baˆ hpehˇ daꞈ ve awˬ ceuˬ lehˬ nyi ma nuˇ nehˬ ve g’a cawˬ ve yoˬ.”—Hki˗beu˗leˇ.
LIꞈ HPU HK’AW BEˆ MAˍ LAˇ TAˍ VE: “Cawˇ daꞈ tuˬ haˆ haˆ te loˬ.”—Maꞈhtehˍ 5:25.
Nyi ma naˬ tuˬ te laˇ ve htaꞈ nawˬ tawnˇ taˍ ve k’o, nawˬ awˬ to leh nawˬ ve nyi ma htaꞈ heuˆ la kuiˬ cawˬ jaˇ. Leh nawˬ ve awˬ ca htaꞈ kaꞈ te luˬ piˇ chehˇ ve yoˬ
