Awˬ pa awˬ e˗oˬ, nawˬ hui a shaꞈ teꞈ kuiˬ hkʼaw awˬ liˇ awˬ hkʼaˇ htaꞈ gʼaꞈ te tuˬ coˇ caˇ ve yoˬ. Tawˇ pa haˉ te k’o, nawˬ teˇ ceuˬ le le awˬ hk’aw lo ka tiꞈ yeˬ tuˬ coˇ caˇ-aw laˇ? Chi hk’e hpehꞈ ve k’o, nawˬ ve yaˇ htaꞈ kaꞈ ka tiꞈ yeˬ ve cawˬ tcuh gaˇ ve yoˬ.

Chi hkʼoˆ kaꞈ, nawˬ ve yaˇ htaꞈ kaiˬ ve chaw, hteˇ ve cawˇ ve chaw, leh shu htaꞈ a yeˇ yuˬ ve chaw hpehꞈ tcuh gaˇ ve yoˬ. Te hk’aˇ dawˇ hk’aˇ daꞈ ve chi hk’e ve cawˬ g’a tuˬ yaˇ ehˉ htaˇ kaꞈ tanˬ te jaw g’a ve yoˬ.

LIꞈ HPU HK’AW BEˆ MAˍ LAˇ TAˍ VE: “Yaˇ ehˉ teˇ gʼaˇ hkʼaˬ hkʼe a shaꞈ teꞈ cawˇ ve yawˇ htaꞈ maˍ piˇ-oˆ. Yawˇ a shaꞈ teꞈ chehˇ ve teˇ co-e awˬ lawn oˇ ve htaꞈ dawˇ nawˇ chehˇ tuˬ yoˬ.”—Tawˇ naˉ ve 22:6.

Ngaˬ hui ve awˬ co-e yehˇ tuˬ ve awˬ hk’eun cawˬ maˇ jaˇ ve pa taw, daꞈ ve awˬ liˇ awˬ hk’aˇ cawˬ tuˬ a yeˇ uiˍ jaˇ ve yoˬ. Hka-li-naiˇ meh ve awˬ e teˇ g’aˇ k’oˆ ve, “chi beuꞈ teˇ co-e tawˇ yaw tuˬ awˬ hk’eun maˇ heˆ leh htehˆleꞈ hk’aw maˇ daꞈ ve awˬ ceuˬ mawˬ tuˬ sha jaˇ. Yaˇ ngaˬ hui awˬ paˇ lo mui taˍ ve kaꞈ yawˇ maˇ daꞈ ve awˬ ceuˬ nyi chehˇ ve yoˬ hehˉ!”

LIꞈ HPU HK’AW BEˆ MAˍ LAˇ TAˍ VE: ‘Chaw mawˇ lehˬ, a shu yawˇ mawˬ ve kaˇ ve jawˬ ve awˬ ceuˬ teˇ hpaˍ htaꞈ puiˉ la tuˬ laiˉ pawˆ te jawˬ ve pa taw, daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa ve yoˬ.’—Heˍbrehˇ 5:14.

Shu htaꞈ dawˇ nyi ve a yeˇ uiˍ jaˇ. Chi lehˬ daꞈ ve awˬ liˇ awˬ hk’aˇ cawˬ ve htaꞈ kaꞈ k’oˆ gaˇ ve yoˬ. (Tawˇ pa haˉ te k’o, chi hk’e te, oˇ hk’e te, k’oˆ ve aꞈ kehˉ “awˬ bon uiˍ jaˇ” tehꞈ k’oˆ piˇ ve, maˇ heˆ leh lawˬ hkawˉ piˇ ve tawˇ yaw ve lehˬ daꞈ ve yoˬ.) Chi beuꞈ teˇ co-e shu awˬ pon dawˇ nyi piˇ ve awˬ liˇ awˬ hk’aˇ chi hk’e ve ca haˍ jaˇ. Awˬ lawn k’o, chi beuꞈ teˇ co-e ve chaw lehˬ, tawˇ yaw tuˬ awˬ hk’eun maˇ heˆ leh htehˆleꞈ htaꞈ a yeˇ yuˬ jaˇ ve pa taw, awˬ paˇ awˬ kui ve chaw htaꞈ a yeˇ maˇ yuˬ.

LIꞈ HPU HK’AW BEˆ MAˍ LAˇ TAˍ VE: “Shu nawˬ hui htaꞈ te laˇ piˇ lawˬ gaˇ ve hkʼe, nawˬ hui shu htaꞈ oˇ hkʼe te piˇ-oˆ.”—Luˉkaꞈ 6:31.

Nawˬ awˬ liˇ awˬ hk’aˇ yaˇ htaꞈ k’oˆ maˍ piˇ. Chaˬ nyi tehˆ nyi hpawˇ k’oˆ ve, awˬ pa awˬ e lehˬ yaˇ chaw haˉ yaˇ miˇ haˉ hpehꞈ-oˬ htaˇ maˇ heuˆ daꞈ sheˍ leh teˇ geh zuhꞈ ve lehˬ yaꞈ ve tehꞈ yaˇ htaꞈ hk’a dehꞈ k’oˆ maˍ piˇ ve k’o, yawˇ hui kaꞈ awˬ pa awˬ e maˍ piˇ ve hk’e na yuˬ leh g’aꞈ te tuˬ yoˬ.

TE NYI SHEˍ: Hpehꞈ la gehˇ sheˍ ve awˬ lawn htaꞈ cuˇ leh daꞈ ve awˬ liˇ awˬ hk’aˇ htaꞈ yaw daꞈ sheˍ. Tawˇ pa haˉ te k’o, nyi bawˬ daꞈ ve htaꞈ pa taw tiˇ pehˍ daꞈ ve awˬ lawn sha tanˇ teˇ hpaˍ hk’aw g’a mawˬ ve yoˬ. Nawˬ ve yaˇ htaꞈ k’oˆ piˇ ve, “chaw yaˇ nyi bawˬ daꞈ leh tiˇ pehˍ daꞈ ve lehˬ kawˆ tuˬ cawˬ jaˇ. Yaˇ-oˬ, nawˬ dawˇ ve k’o aˬ htoꞈ ma te chaw yaˇ chi hk’e te ve le?”

“Yaˇ teˇ hpaˍ aˬ htoꞈ ma teˇ ceuˬ cawˇ ve, maˇ cawˇ ve htaꞈ maˇ shiˍ ve k’o, yawˇ hui awˬ pon aˬ htoꞈ ma cawˇ ve, maˇ cawˇ ve htaꞈ dawˇ cheˆ leh leuˆ yuˬ tuˬ haˍ jaˇ ve yoˬ.”—Beh-dawˇ.

Yaˇ shu htaꞈ dawˇ nyi piˇ puiˉ tuˬ maˍ piˇ ve. Yaˇ ehˉ kaꞈ na sha ve tawˇ yaw ve, “awˬ bon uiˍ jaˇ” yaw ve, leh shu htaꞈ yawˆ yan piˇ ve, chi teˇ hpaˍ henˇ g’a ve yoˬ. Liꞈ k’oˆ teˇ k’oˆ hk’aw k’oˆ ve, “yaˇ yehˬ k’a hk’aw ve chaw teˇ g’aˇ, liꞈ henˇ yehˬ hk’aw ve chaw teˇ g’aˇ, leh chaw yaˇ awˬ moˍ hk’aw ve chaw teˇ g’aˇ hpehꞈ ve tehꞈ shiˍ ve k’o, yawˇ hui shu htaꞈ ha k’aˉ ve tehꞈ hpeuꞈ maw piˇ gaˇ puiˉ leh, a shu yawˇ awˬ pon tiˉ maˇ dawˇ nyi ve yoˬ.”

TE NYI SHEˍ: Yaˇ awˬ nu ve chaw htaꞈ dawˇ nyi piˇ puiˉ tuˬ, aˉ hk’aw lo ve kanˉ teˇ ceuˬ ceuˬ te tcuh nyi sheˍ.

“Yaˇ teˇ hpaˍ yaˇ ehˉ htaˇ kaꞈ aˉ hk’aw lo ve kanˉ te jaw tcuh nyi ve k’o, yawˇ hui teˇ kaˬ lo ca chehˇ-e htaˇ kaꞈ a shu yawˇ awˬ to htaꞈ nyi haꞈ shaˉ g’a ve yoˬ.”—Hteh-la.