AWˬ PA AWˬ E AWˬ PON
8: Daꞈ ve henˇ yuˬ tuˬ hpehꞈ ve
HK’Aˬ HK’E K’Oˆ GAˇ VE LE?
Awˬ pa awˬ e yaˇ htaꞈ maˍ piˇ ve hk’e g’aꞈ te ve k’o, yaˇ awˬ pon daꞈ ve henˇ yuˬ tuˬ hpehꞈ ve yoˬ. Tawˇ pa haˉ te k’o, nawˬ ve aˉ hk’aw lo chaw teˇ g’aˇ laˬ leh “ngaˬ aˉ hk’aw lo maˇ chehˇ” tehꞈ yaˇ htaꞈ ca k’oˆ piˇ tcuh ve yoˬ. Nawˬ awˬ tehˬ ve tawˇ maˇ yaw ve k’o, nawˬ ve yaˇ kaꞈ awˬ tehˬ ve tawˇ maˇ yaw taˬ.
“Awˬ pa awˬ e lehˬ yawˇ hui k’oˆ taˍ ve hk’e maˇ g’aꞈ te ve k’o, yaˇ kaꞈ g’aꞈ te tuˬ ve maˇ heˆ. Yaˇ ehˉ teˇ hpaˍ kaꞈ iˉ kaˆ cawꞈ g’a ve hpa htaꞈ shuˍ leh ngaˬ hui k’oˆ ve leh te ve awˬ ceuˬ htaꞈ henˇ yuˬ ve yoˬ. Ngaˬ hui te ve awˬ ceuˬ lehˬ yawˇ hui htaꞈ maˍ piˇ ve awˬ ceuˬ maˇ shuˍ daꞈ tehꞈ k’oˆ laˇ sheˍ ve yoˬ.”—Daˍviˆ.
LIꞈ HPU HK’AW BEˆ MAˍ LAˇ TAˍ VE: “Shu ve mawˇ htaꞈ taˇ hkʼawˇ tehꞈ nawˬ maˍ piˇ chehˇ ve kaꞈ, nawˬ awˬ to shu ve mawˇ htaꞈ hkʼawˇ ve laˇ?”—Roˉmaꞈ 2:21.
Aˬ HTOꞈ MA TE A YEˇ UIˍ JAˇ VE LE?
Awˬ nu ve chaw maˇ heˆ leh awˬ chawˇ teˇ hpaˍ, yaˇ leh yaˇ nehˬ htaꞈ heuˆ la kuiˬ hk’e taw maˇ cawˬ ve yoˬ. Yaꞈ hk’aˇ, awˬ pa awˬ e lehˬ yawˇ hui ve yaˇ htaꞈ heuˆ la kuiˬ cawˬ jaˇ ve yoˬ. Chi k’oˆ gaˇ ve lehˬ, awˬ pa awˬ e yaˇ htaꞈ cawˇ ve awˬ ceuˬ beˆ maˍ piˇ tuˬ a yeˇ uiˍ jaˇ ve yoˬ. Chi htaꞈ pa taw, nawˬ k’oˆ taˍ ve hk’e g’a g’aꞈ te cawˇ ve yoˬ.
“Ngaˬ hui yaˇ htaꞈ laiˉ pawˆ maˍ piˇ ve yoˬ hehˉ. Yaꞈ hk’aˇ, ngaˬ hui maˍ piˇ ve hk’e teˇ pawˆ ceh tiˉ maˇ g’aꞈ te ve htawˇ, yaˇ laꞈ haˉ k’oˆ laˇ ve yoˬ. Ngaˬ hui te ve htaꞈ yaˇ a yeˇ maˇ yuˬ ve tehꞈ dawˇ ve htawˇ, ngaˬ hui te ve teˇ ceuˬ le le htaꞈ yaˇ nyi chehˇ ve yoˬ.”—Niˆ hkon.
LIꞈ HPU HK’AW BEˆ MAˍ LAˇ TAˍ VE: ‘Mvuhˇ naw ma lo yaꞈ la ve cuˇ yiˍ lehˬ, heˍ ve nyi ma maˇ cawˬ ve yoˬ.’—Yaˍkoˆ 3:17.
NAWˬ Aˬ HTOꞈ MA TE G’A VE LE?
Nawˬ daꞈ ve henˇ yuˬ tuˬ hpehꞈ-aw laˇ tehꞈ chaˬ nyi sheˍ. Nawˬ tanˇ-a htaˇ, nyi ve leh na ve awˬ ceuˬ aˬ htoꞈ ma htaꞈ dawˇ cawˇ ve le? Nawˬ yaˇ leh awˬ miˇ ma maˇ heˆ leh awˬ hpawˇ htaꞈ daꞈ ve awˬ ceuˬ te piˇ-aw laˇ? Nawˬ ve awˬ chawˇ hk’aˬ hk’e ve chaw hpehꞈ ve le? Nawˬ shu awˬ pon dawˇ nyi piˇ ve laˇ? Awˬ tehˬ k’oˆ k’o, nawˬ yaˇ awˬ pon daꞈ ve henˇ yuˬ tuˬ hpehꞈ-aw laˇ?
“Ngaˬ leh ngaˬ hpawˇ ngaˬ huiˉ maˬ maˇ te ve awˬ ceuˬ yaˇ te tuˬ maˇ nyiˉ piˇ.”—Hkiˇsuh-tin.
Nawˬ te yaꞈ htaˇ lawˬ hkawˉ piˇ sheˍ. Teˇ pawˆ pawˆ nawˬ kaꞈ te yaꞈ ve tehꞈ yaˇ shiˍ ve yoˬ. Nawˬ te yaꞈ-oˬ htaˇ, nawˬ ve awˬ ca leh nawˬ ve yaˇ geh “lawˬ hkawˉ laˇ ve yoˬ” tehꞈ k’oˆ piˇ g’a ve yoˬ. Nawˬ chi hk’e te htaˇ, nawˬ nyi ma nuˇ nehˬ ve leh ka tiꞈ yeˬ ve awˬ ceuˬ yawˇ hui henˇ yuˬ tuˬ te maˍ piˇ chehˇ ve yoˬ.
“Ngaˬ hui yehˬ k’a hk’aw ve chaw htaꞈ te yaꞈ htaˇ, haꞈ yuˬ leh lawˬ hkawˉ piˇ cawˇ ve yoˬ. Awˬ lawn k’o, chi hk’e te ve lehˬ yaˇ henˇ yuˬ tuˬ hpehꞈ ve yoˬ. Chi hk’e maˇ te ve k’o, yaˇ yawˇ hui te yaꞈ htaˇ te yaꞈ taˍ ve awˬ ceuˬ htaꞈ maˇ ha yuˬ ve yoˬ.”—Ro-bin.
“Awˬ pa awˬ e te ve awˬ ceuˬ lehˬ yaˇ htaꞈ heuˆ la kuiˬ cawˬ jaˇ leh, yaˇ htaꞈ maˍ piˇ tuˬ daꞈ jaˇ ve awˬ hk’aˇ hpehꞈ ve yoˬ. Yawˇ hui ngaˬ hui te ve awˬ ceuˬ htaꞈ hk’aˬ htaˆ kaꞈ mawˬ ve pa taw henˇ yuˬ chehˇ ve yoˬ.”—Ven-de.
