Yaˇ geh tawˇ yaw daꞈ ve lehˬ, awˬ pa awˬ e leh yaˇ ve te hk’aˇ dawˇ hk’aˇ hpeuꞈ maw daꞈ ve yoˬ.

Yaˇ chaw haˉ yaˇ miˇ haˉ hpehꞈ-oˬ ve geh tawˇ yaw daꞈ ve maˇ sha. Liꞈ k’oˆ teˇ k’oˆ hk’aw k’oˆ ve, chi awˬ g’uˇ suhˍ htaˇ k’o “yaˇ ve a shaꞈ teꞈ hk’aˇ htaꞈ ca nyi tuˬ sha pawehˇ hk’awꞈ nawˉ lo hpanˍ k’ai g’a tuˬ yehˬ miˉ hpeꞈ lo shawˍ taˍ ve chaw htaꞈ baˬ ehˉ g’a maˍ piˇ ve htaꞈ shuˍ ve yoˬ. Yaꞈ hk’aˇ, chi teˇ hkui nawˬ dawˇ law g’a ve teˇ ceuˬ ceh tiˉ cawˬ ve lehˬ, sha pawehˇ g’uˇ suhˍ lo awˬ nu ve chaw geh teˇ geh mui taˍ leh nyi chehˇ ve yoˬ. Yaꞈ hk’aˇ, nawˬ mui kuiˬ maˇ daꞈ.” Yaˇ nawˬ geh tawˇ maˇ yaw daꞈ gaˇ ve tehꞈ nawˬ shiˍ ve yoˬ. Yaꞈ hk’aˇ, awˬ tehˬ k’o awˬ yanˇ oˇ ve teˇ yanˇ lehˬ, nawˬ ve yaˇ geh tawˇ yaw daꞈ ve daꞈ jaˇ ve awˬ yanˇ hpehꞈ ve yoˬ!

Hk’aˬ htaˆ kaꞈ yaˇ geh tawˇ yaw daꞈ tuˬ gu hehnˇ taˍ ve: Tanˇ hkuinˇ gaˬ-oˬ ve htawˇ maˇ k’oˆ nawˬ yaˇ geh tawˇ yaw daꞈ tuˬ g’a gu hehnˇ taˍ ve yoˬ.

“Nawˬ dawˇ k’o ‘aˬ htoꞈ ma te chi teˇ hkui tawˇ ca yaw la ve le naˍ? Teˇ nyi mvuhˇ hk’a hpeuꞈ teˇ geh chehˇ ve kaꞈ teꞈ chiˉ tawˇ maˇ yaw laˇ mawˬ!’ Yaˇ ngaˬ hui geh tawˇ yaw daꞈ gaˇ ve k’o ngaˬ hui kaꞈ ha lehˬ cawˇ ve maˇ heˆ laˇ? Awˬ lawn k’o ngaˬ hui yaˇ geh tawˇ yaw daꞈ gaˇ ve maˇ heˆ laˇ?”—Lin-saˇ.

“Ngaˬ zuhꞈ vaiˇ jaˇ ve yoˬ. Yaꞈ hk’aˇ, yaˇ geh yaw daꞈ ve laiˉ pawˆ k’o hk’a dehꞈ na g’a ve awˬ yanˇ lehˬ, shehˍ k’aw hkui htaˇ hpehꞈ ve yoˬ.”—Heu-beuꞈ.

LIꞈ HPU HK’AW BEˆ MAˍ LAˇ TAˍ VE: “A shu yawˇ awˬ to awˬ pon awˬ bon g’a tuˬ taˇ ca. Yaꞈ hk’aˇ, shu awˬ pon awˬ bon g’a tuˬ ca-o.”—1 Kawˇrenˍhtuˆ 10:24.

Yaˇ tawˇ yaw htaˇ hk’a dehꞈ na taˍ. Awˬ pa teˇ g’aˇ k’oˆ ve, “teˇ pawˆ pawˆ yaˇ geh tawˇ yaw daꞈ htaˇ, ngaˬ awˬ nu ve awˬ lawn htaꞈ dawˇ nyi chehˇ ve yoˬ. Chi hk’e te htaˇ ngaˬ yawˇ hui hkawˇ hk’a dehꞈ maˇ na laˇ ve tehꞈ yaˇ nyi mawˬ ve yoˬ.”

Nawˬ chi hk’e hpehꞈ ve k’o, TV hoˆ ve, tawˇ yaw tuˬ awˬ hk’eun leh htehˆ leꞈ kaꞈ teh sheˍ. Awˬ lawn chi ve nawˬ awˬ pon i jaˇ ve awˬ lawn hpehꞈ ve htawˇ, yaˇ k’oˆ ve htaꞈ hk’a dehꞈ na taˍ leh yaˇ k’oˆ ve htaꞈ nawˬ a yeˇ yuˬ piˇ ve tehꞈ mawˬ tcuh sheˍ.

“Yaˇ hk’aˬ hk’e dawˇ ve htaꞈ ngaˬ hui a yeˇ yuˬ laˇ ve tehꞈ yawˇ yonˍ g’a tuˬ te piˇ sheˍ. Yaˇ htaꞈ ngaˬ hui a yeˇ maˇ yuˬ ve hk’e te piˇ ve k’o, yaˇ ngaˬ hui htaꞈ teꞈ chiˉ maˇ k’oˆ maˍ laˇ gaˇ. Leh yaˇ awˬ nu ve chaw ga laˇ tuˬ ca lawˬ-e ve yoˬ.”—Ma-lehˇ-da.

“Yaˇ dawˇ ve maˇ heˆ leh yawˇ tawˇ yaw ve maˇ daꞈ ve k’o, nawˬ cheˆ-ehˬ k’ai ve tehꞈ yawˇ hui mawˬ tuˬ taˇ te maˍ piˇ.”—Eh-hto-niˇ.

LIꞈ HPU HK’AW BEˆ MAˍ LAˇ TAˍ VE: “Nawˬ hui hkʼa gʼa kaˇ ve teˇ hpaˍ htaꞈ shaˍ tiꞈ taˍ-oꞈ.”—Luˉkaꞈ 8:18.

Nyi ma sha ve awˬ yanˇ hk’aw yaˇ geh tawˇ yaw daꞈ ve: Teˇ pawˆ pawˆ k’o awˬ pa awˬ e yaˇ geh mui taˍ leh tawˇ hehˉ lehˬ yaw piˇ htaˇ, yaˇ teꞈ chiˉ maˇ k’oˆ tawˆ la.

“Ngaˬ kaˇ g’aꞈ chehˇ htaˇ yaˇ geh tawˇ yaw daꞈ ve yoˬ. Awˬ lawn k’o, ngaˬ hui kaˇ hk’aw mui chehˇ htaˇ tawˇ yaw daꞈ ve lehˬ, teˇ g’aˇ leh teˇ g’aˇ mehˆ hpfuhˇ htaꞈ maˇ nyi daꞈ. Hk’e te leh ngaˬ hui tawˇ yaw daꞈ sha ve yoˬ.”—Niˆhko.

Awˍ teˇ geh caˇ htaˇ kaꞈ yaˇ geh nyi ma sha ve hk’aw tawˇ yaw daꞈ tuˬ awˬ yanˇ cawˬ ve yoˬ.

“Mvuhˇ hpeuꞈ awˍ teˇ geh caˇ htaˇ, oˇ ve teˇ nyi hk’aw daꞈ ve awˬ lawn leh maˇ daꞈ ve awˬ lawn g’a hpuˇ ve k’oˆ maˍ daꞈ ve yoˬ. Chi ngaˬ hui htaꞈ meuˆ daꞈ maˇ la tuˬ te laˇ ve yoˬ. Leh chi ngaˬ hui ve yehˬ k’a hk’aw shoꞈ shaꞈ ve awˬ lawn g’a hpuˇ htaˇ, ga daꞈ g’a ve yoˬ.”—Ro˗bi.

LIꞈ HPU HK’AW BEˆ MAˍ LAˇ TAˍ VE: “Shu tawˇ yaw ve htaꞈ hkʼa dehꞈ na sheˍ. Tawˇ haˆ haˆ taˇ yaw.”—Yaˍkoˆ 1:19.