1. Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw Hkriꞈ yaˇ awˬ moˍ hkʼaw awˬ hpfuhˇ hkʼaˬ hkʼe cawˬ ve le?

 Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw, nawˬ Hkriꞈ yaˇ awˬ moˍ hkʼaw awˬ hpfuhˇ hkʼaˆ jaˇ. Nawˬ awˬ gʼaˇ awˬ shaˉ daꞈ leh Hkriꞈ yaˇ awˬ moˍ hkʼaw awˬ viˉ awˬ nyi laiˉ gʼaˇ htaꞈ ga gʼa ve yoˬ. (Tawˇ naˉ ve 20:29) Nawˬ ga piˇ shehˍ hpaˇ te gaˇ ve yoˬ hehˉ. Yaꞈ hkʼaˇ, nawˬ dawˇ ve nawˬ a shaꞈ i sheˍ leh a yeˇ uiˍ ve awˬ vuiˬ htaꞈ te maˇ gʼa taˍ hehˉ tehꞈ shu dawˇ ve yoˬ hehˉ. Yaꞈ hkʼaˇ, nawˬ a shaꞈ i sheˍ ve htawˇ, te gʼa ve laiˉ ceuˬ cawˬ ve yoˬ. Nawˬ yonˍ gʼa leh gʼaˇ va gʼa ve tehꞈ awˬ nu ve chaw htaꞈ mawˬ tcuh gʼa ve yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Awˬ lawn chi ve hkʼaw jawˇ mawˇ Daˍviˆ ve awˬ lawn htaꞈ teˇ geh henˇ tuˬ yoˬ. Yuˇdaꞈ ve jawˇ mawˇ 2 gʼaˇ Aˍsaˍ leh Yawˇshaˍhpaˆ ve a shaꞈ teꞈ hkʼaˇ teˇ tcuhˉ teˇ yanˇ ve htaꞈ teˇ geh nyi sheˍ. Yawˇ hui 3 gʼaˇ shoꞈ shaꞈ ve aˬ htoꞈ ma gʼa hpuˇ ve teˇ geh nyi sheˍ. Leh yawˇ hui hkʼaˬ hkʼe te ve le? Leh awˬ viˉ awˬ nyi hawˉ hkʼaˆ yaˇ nehˬ yawˇ hui htaꞈ hkʼaˬ hkʼe henˇ yuˬ gʼa ve kaꞈ teˇ geh nyi tuˬ yoˬ.

3. Yaˇ nehˬ Hkriꞈ yaˇ awˬ moˍ hkʼaw ve chaw mawˇ htaꞈ hkʼaˬ hkʼe ga piˇ gʼa tuˬ le?

³ Daˍviˆ yaˇ nehˬ htaˇ, shu awˬ pon awˬ bon cawˬ tuˬ te ve yoˬ. Yawˇ Yaˬhoˉvaˬ geh meuˆ daꞈ jaˇ ve tehꞈ ngaˬ hui shiˍ ve yoˬ. Leh yawˇ tinˍ hteˆ cheuˬ tuˬ te jawˬ ve yoˬ. Yaꞈ hkʼaˇ, chi hkʼe ceh maˇ heˆ. Yawˇ puiˉ ve hpehꞈ ve hkʼe Gʼuiˬ sha leuˆ yuˬ taˍ ve jawˇ mawˇ Sawˉluꞈ htaꞈ ga piˇ ve yoˬ. (1 Saˍmo˗eˍlaˆ 16:16, 23) Awˬ viˉ awˬ nyi yaˇ nehˬ hpehꞈ ve chaw˗oˬ, nawˬ puiˉ ve hpehꞈ ve hkʼe Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ ga piˇ˗aw laˇ? Ga piˇ gaˇ ve tehꞈ ngaˬ hui yonˍ gʼa ve  yoˬ. Tawˇ pa haˉ te kʼo, Hkriꞈ yaˇ awˬ moˍ hkʼaw ve chaw mawˇ Htehˆ leꞈ maˇ heˆ leh awˬ hkʼeun teˇ hpaˍ yehˇ cheuˬ gaˇ ve chaw htaꞈ nawˬ chaˬ nyi˗oˬ laˇ? Shu maˍ laˇ htaˇ yawˇ ha lehˬ jaˇ. Nawˬ awˬ hkʼeun chi ve teˇ hpaˍ yehˇ tuˬ awˬ hkʼaˇ shiˍ˗aw laˇ? Nawˬ awˬ hkʼaˇ shiˍ ve kʼo, awˬ viˉ awˬ nyi chi ve teˇ hpaˍ a shu yawˇ hkʼaˇ yawˇ Liꞈ hpu henˇ tuˬ, hpawnˬ daꞈ ve hkʼa dehꞈ gu gʼa tuˬ ga piˇ gʼa ve yoˬ.

4. Yaˇ nehˬ henˇ yuˬ tuˬ Daˍviˆ te hkʼaˇ dawˇ hkʼaˇ aˬ htoꞈ ma cawˬ ve le? (Awˬ htaꞈ hpawˇ ve awˬ han htaꞈ nyi sheˍ.)

⁴ Teˇ nyi le le Daˍviˆ awˬ vuiˬ htaꞈ a yeˇ yuˬ leh gʼaˇ va gʼa ve tehꞈ hpeuꞈ maw laˇ ve yoˬ. Yawˇ awˬ pa ve yawˬ htaꞈ hkʼa dehꞈ nyi haꞈ shaˉ gaˇ ve yoˬ. Yawˇ chi hkʼe te ve kawˆ tuˬ cawˬ ve yoˬ. Peuˬ hkʼawꞈ nawˉ yawˇ Sawˉluꞈ htaꞈ kʼoˆ maˍ piˇ ve, “jawˇmawˇ˗oˬ, ngaˬ lehˬ ngaˬ pa ve yawˬ teˇ hpaˍ htaꞈ hawˉ chehˇ ve yoˬ. Laˇ caˬ shiˉ, maˇ heˆ kʼo, yehˬ miˉ tawˍ teˇ hkeh yawˬ htaꞈ ca cheꞈ la ve teˇ yanˇ, ngaˬ awˬ hkʼaˇ suh gʼaꞈ yuˬ leh yawˬ oˇ ve htaꞈ htaiˍ hkʼawꞈ piˇ ve yoˬ.” (1 Saˍmo˗eˍlaˆ 17:34, 35) Daˍviˆ yawˇ awˬ pa ve yawˬ htaꞈ nyi haꞈ shaˉ ve lehˬ, awˬ vuiˬ hpehꞈ ve tehꞈ yawˇ shiˍ ve yoˬ. Yawˇ yawˬ htaꞈ haꞈ shaˉ piˇ tuˬ haꞈ hanˉ ve hkʼaw yehˬ miˉ tawˍ htaꞈ behˇ daꞈ ve yoˬ. Awˬ viˉ awˬ nyi hawˉ hkʼaˆ yaˇ nehˬ kaꞈ Daˍviˆ htaꞈ henˇ yuˬ leh a shu yawˇ gʼa ve awˬ vuiˬ htaꞈ kaiˬ ve hkʼaw te gʼa ve yoˬ.

5. Chiˇ mvuh ve liꞈ 25:14 hkʼaw kʼoˆ taˍ ve hkʼe, awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw a yeˇ uiˍ jaˇ ve aˬ htoꞈ ma te cawˇ ve le?

⁵ Daˍviˆ a shaꞈ i sheˍ htaˇ yawˇ Yaˬhoˉvaˬ geh meuˆ daꞈ tuˬ te ve yoˬ. Daˍviˆ haꞈ hanˉ ve chaw hpehꞈ leh tinˍ hteˆ ve cheuˬ jaˇ ve htawˇ, a yeˇ uiˍ jaˇ ve lehˬ yawˇ Yaˬhoˉvaˬ geh awˬ chawˇ te ve yoˬ. Yaˬhoˉvaˬ lehˬ Daˍviˆ ve Gʼuiˬ sha ceh hpehꞈ ve maˇ heˆ. Yaꞈ hkʼaˇ, Daˍviˆ ve awˬ chawˇ meuˆ daꞈ jaˇ ve kaꞈ hpehꞈ ve yoˬ. (Chiˇ mvuh ve 25:14 gʼaw sheˍ.) Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw˗oˬ, nawˬ te gʼa ve a yeˇ uiˍ jaˇ ve lehˬ Yaˬhoˉvaˬ geh meuˆ daꞈ tuˬ te sheˍ. Chi nawˬ daꞈ jaˇ ve awˬ vuiˬ gʼa tuˬ kaꞈ hpehꞈ gʼa ve yoˬ hehˉ.

6. Chaw teˇ hpaˍ Daˍviˆ htaꞈ hkʼaˬ hkʼe dawˇ ve le?

⁶ Daˍviˆ gʼa hpuˇ ve shoꞈ shaꞈ ve teˇ ceuˬ lehˬ, Daˍviˆ yaˇ nehˬ hpehꞈ leh teꞈ chiˉ maˇ shiˍ tehꞈ chaw teˇ hpaˍ dawˇ ve yoˬ. Tawˇ pa haˉ te kʼo, Daˍviˆ Gawˇliˇyaꞈ htaꞈ bawˆ daꞈ˗e tuˬ kʼoˆ htaˇ, Sawˉluꞈ kʼoˆ ve, “nawˬ yawˇ htaꞈ hkʼaˬ hkʼe te bawˆ tuˬ le? Nawˬ lehˬ yaˇ paˍ ehˉ ceh tiˉ hpehꞈ” ve yoˬ. (1 Saˍmo˗eˍlaˆ 17:31-33) Chi awˬ gʼuˇ suhˍ htaˇ Daˍviˆ ve awˬ viˉ paˍ kaꞈ kʼoˆ ve, yawˇ awˬ vuiˬ htaꞈ maˇ haꞈ shaˉ. (1 Saˍmo˗eˍlaˆ 17:26-30) Yaꞈ hkʼaˇ, Yaˬhoˉvaˬ Daˍviˆ htaꞈ yaˇ ehˉ ceh hpehꞈ leh awˬ vuiˬ htaꞈ maˇ haꞈ shaˉ ve maˇ heˆ tehꞈ Yaˬhoˉvaˬ shiˍ ve yoˬ. Daˍviˆ yawˇ ve awˬ chawˇ Yaˬhoˉvaˬ geh awˬ  gʼaˇ gʼa tuˬ lawˬ htaˇ, yawˇ Gawˇliˇyaꞈ htaꞈ gʼaˇ ve yoˬ.—1 Saˍmo˗eˍlaˆ 17:45, 48-51.

7. Nawˬ Daˍviˆ ve awˬ lawn htaꞈ hkʼaˬ hkʼe henˇ yuˬ gʼa ve le?

⁷ Nawˬ Daˍviˆ ve awˬ lawn htaꞈ hkʼaˬ hkʼe henˇ yuˬ gʼa ve le? Nawˬ gʼa yeunˇ hkanˍ ve yoˬ. Chaw teˇ hpaˍ nawˬ yaˇ ehˉ htaˇ kaꞈ mawˬ leh awˬ yanˇ ponˬ kʼai maw jaˇ˗oˬ ve htawˇ, nawˬ yaˇ ehˉ hpehꞈ sheˍ ve tehꞈ dawˇ ve yoˬ. Nawˬ chaw mawˇ hpehꞈ˗oˬ ve tehꞈ yawˇ hui dawˇ tuˬ awˬ yanˇ gʼa yehˇ ve yoˬ. Yaꞈ hkʼaˇ, Yaˬhoˉvaˬ nawˬ htaꞈ awˬ htaꞈ hpawˇ ceh nyi ve maˇ heˆ tehꞈ nawˬ yonˍ gʼa ve yoˬ. Nawˬ hkʼaˬ hkʼe ve chaw hpehꞈ leh hkʼaˬ hkʼe taw te gʼa ve yawˇ shiˍ ve yoˬ. (1 Saˍmo˗eˍlaˆ 16:7) A yeˇ uiˍ jaˇ ve lehˬ nawˬ Yaˬhoˉvaˬ geh gʼa meuˆ daꞈ ve yoˬ. Daˍviˆ chi hkʼe te ve lehˬ, Gʼuiˬ sha hpanˍ taˍ ve awˬ ceuˬ teˇ hpaˍ htaꞈ chaˬ nyi leh Gʼuiˬ sha htaꞈ caˉ daꞈ ve awˬ ceuˬ aˬ htoꞈ ma maˍ laˇ ve htaꞈ dawˇ nyi ve yoˬ. (Chiˇ mvuh ve 8:3, 4; 139:14; Roˉmaꞈ 1:20) Peuˬ leh nawˬ Yaˬhoˉvaˬ geh awˬ gʼaˇ lawˬ gʼa ve yoˬ. Tawˇ pa haˉ te kʼo, nawˬ Shaˉhkiˆhkanˍ ve chaw hpehꞈ leh liꞈ henˇ yehˬ lo awˬ chawˇ kʼoˆ guiˇ gʼuiˬ guiˇ laˇ˗aw laˇ? Nawˬ chi hkʼe gʼa hpuˇ ve kʼo, yeunˇ hkanˍ gʼaˇ tuˬ Yaˬhoˉvaˬ geh bon lawˬ sheˍ. Liꞈ hpu, Liꞈ kʼoˆ, VDO, Gʼuiˬ sha ve kanˉ hkʼaˇ hkʼaw beˆ maˍ laˇ ve teˇ hpaˍ htaꞈ gʼaꞈ te sheˍ. Yaˬhoˉvaˬ nawˬ htaꞈ ga laˇ ve teˇ pawˆ le le nawˬ mawˬ htaˇ, nawˬ aˬ htoꞈ ma gʼa hpuˇ ve htawˇ maˇ kʼoˆ, yawˇ hkʼaˬ htaˆ kaꞈ ga laˇ chehˇ ve tehꞈ nawˬ yonˍ gʼa ve yoˬ. Nawˬ Yaˬhoˉvaˬ htaꞈ gʼaˇ va ve awˬ nu ve chaw mawˬ htaˇ, yawˇ hui kaꞈ nawˬ htaꞈ yonˍ gʼa ve yoˬ.

8-9. Daˍviˆ jawˇ mawˇ te tuˬ law htaˇ, yawˇ yeunˇ hkanˍ gʼaˇ tuˬ aˬ htoꞈ ma ga piˇ ve le? Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw Daˍviˆ ve awˬ lawn htaꞈ hkʼaˬ hkʼe henˇ yuˬ gʼa ve le?

⁸ Daˍviˆ shoꞈ shaꞈ ve gʼa hpuˇ ve teˇ ceuˬ htaꞈ dawˇ nyi sheˍ. Yawˇ jawˇ mawˇ te tuˬ leuˆ yuˬ piˇ htaˇ, Yuˇdaꞈ chaw ve jawˇ mawˇ hpehꞈ tuˬ laiˉ hkʼawꞈ gʼa law sheˍ ve yoˬ. (1 Saˍmo˗eˍlaˆ 16:13; 2 Saˍmo˗eˍlaˆ 2:3, 4) Awˬ yanˇ oˇ ve hkʼaw yawˇ yeunˇ hkanˍ leh law gʼa tuˬ aˬ htoꞈ ma ga piˇ ve le? Awˬ gʼaˇ nuˇ leh aˬ htoꞈ ma te jawˇ mawˇ maˇ gʼa hpehꞈ sheˍ ve le, dawˇ nyi ve aꞈ kehˉ yawˇ te gʼa ve awˬ ceuˬ htaꞈ dawˇ nyi ve yoˬ. Tawˇ pa haˉ te kʼo, yawˇ Hpiˇliˇpiˆ mvuhˇ miˬ lo hpaw˗e htaˇ, yawˇ taꞈ iˉ chehˇ taˍ ve aꞈ kehˉ Iˉsaˍreˍlaˆ chaw hui ve canˇ paˍ htaꞈ bawˆ daꞈ ve yoˬ. Bawˆ daꞈ ve chi teˇ pawˆ lehˬ Daˍviˆ Yuˇdaꞈ chaw ve miˬ tcuhˉ htaꞈ haꞈ shaˉ tuˬ awˬ pon yoˬ.—1 Saˍmo˗eˍlaˆ 27:1-12.

⁹ Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw˗oˬ, Daˍviˆ ve awˬ lawn htaꞈ aˬ htoꞈ ma henˇ yuˬ gʼa ve le? Awˬ viˉ awˬ nyi htaꞈ ga piˇ tuˬ nawˬ mawˬ htaˇ, haˆ ga piˇ loˬ. Awˬ viˉ awˬ nyi Reˍhkanˍdoˍ ve awˬ lawn htaꞈ dawˇ nyi sheˍ. * Yawˇ a shaꞈ 10 hkʼawꞈ htaˇ hkʼaˬ htaˆ kaꞈ gʼuˇ suhˍ peuˍ ve te gaˇ ve yoˬ. Yaꞈ hkʼaˇ, nyi haꞈ shaˉ paˍ kʼoˆ ve nawˬ te maˇ gʼa sheˍ. Yawˇ beuꞈ leh maˇ te˗oˬ ve aꞈ kehˉ Gʼuiˬ sha ve kanˉ maˇ maˇ te ve yoˬ. Yawˇ kʼoˆ ve, “peuˬ taˉ ve htaꞈ kʼawꞈ dawˇ nyi htaˇ, co ha hpawˇ gʼaˇ hteꞈ uiˍ la mvuh la cawˇ ve tehꞈ ngaˬ dawˇ ve yoˬ. Hkʼaˬ htaˆ kaꞈ gʼuˇ suhˍ peuˍ ve maˇ te sheˍ htaˇ, ngaˬ awˬ to htaꞈ te jaw ve daꞈ jaˇ tehꞈ dawˇ ve yoˬ. Nyi ma pfuhˇ ve chaw teˇ gʼaˇ le le geh ngaˬ ca kʼawꞈ guiˇ˗e leh yawˇ hui geh maˇ kʼai sheˍ htaˇ, ngaˬ awˉ lawˉ hkʼa dehꞈ gu ve yoˬ. Ngaˬ chaw teˇ gʼaˇ htaꞈ Liꞈ hpu gʼa maˍ piˇ ve yoˬ. Ngaˬ Gʼuiˬ sha ve kanˉ maˇ maˇ te leh ngaˬ awˬ to htaꞈ kaꞈ yonˍ maˇ la ve yoˬ.” Chi teˇ hkui Reˍhkanˍdoˍ hkʼaˬ htaˆ kaꞈ gʼuˇ suhˍ peuˍ ve leh ga piˇ shehˍ hpaˇ kaꞈ te ve yoˬ.

10. Daˍviˆ a yeˇ uiˍ ve awˬ lawn htaꞈ maˇ dawˇ cheˆ sheˍ htaˇ aˬ htoꞈ ma te ve le?

¹⁰ Daˍviˆ a shaꞈ teꞈ kuiˬ hkʼaw gʼa hpuˇ ve teˇ ceuˬ htaꞈ kʼawꞈ dawˇ nyi sheˍ. Yawˇ Hpiˇliˇpiˆ mvuhˇ miˬ lo chehˇ htaˇ, yawˇ leh yawˇ ve chaw canˇ paˍ teˇ moˍ htaꞈ gʼa ca bawˆ daꞈ˗e ve yoˬ. Yaꞈ hkʼaˇ, yawˇ hui aˉ hkʼaw lo kʼawꞈ la htaˇ, canˇ paˍ teˇ moˍ yawˇ hui ve awˬ miˇ awˬ yaˇ htaꞈ yuˬ kʼai peuˬ˗oˬ. Daˍviˆ lehˬ maꞈ bawˆ cheuˬ jaˇ ve htawˇ, yawˇ awˬ hkʼaˇ hkʼa dehꞈ gu teh ve kʼo, teˇ yehˬ kʼa le le htaꞈ ga piˇ gʼa tuˬ yoˬ tehꞈ dawˇ ve yoˬ. Yaꞈ hkʼaˇ, Daˍviˆ yawˇ awˬ to htaꞈ gʼaˇ maˇ va. Yaˬhoˉvaˬ beˆ maˍ laˇ  tuˬ lawˬ ve yoˬ. Daˍviˆ paw hkuˇ Aˍbyaˍtaˍ htaꞈ daꞈ kehˬ ve ta kʼoˍ yuˬ veu laˇ˗oˆ tehꞈ kʼoˆ piˇ ve yoˬ. Leh yawˇ Yaˬhoˉvaˬ htaꞈ kʼawꞈ na nyi ve, “ngaˬ canˇ paˍ oˇ ve teˇ hpaˍ hkʼaˇ suh gʼa gʼaꞈ yuˬ tuˬ ve laˇ?” Yaˬhoˉvaˬ Daˍviˆ htaꞈ kʼoˆ piˇ ve yawˇ hui hkʼaˇ suh gʼaꞈ yuˬ kʼai loˬ. Leh Daˍviˆ teˇ ceuˬ le le kʼawꞈ gʼa hkʼawꞈ tuˬ yoˬ. (1 Saˍmo˗eˍlaˆ 30:7-10) Awˬ lawn chi nawˬ htaꞈ hkʼaˬ hkʼe maˍ laˇ ve le?

11. Nawˬ maˇ dawˇ cheˆ sheˍ htaˇ aˬ htoꞈ ma te cawˇ ve le?

¹¹ Nawˬ maˇ dawˇ cheˆ sheˍ htaˇ, awˬ nu ve chaw ga laˇ tuˬ lawˬ sheˍ. Nawˬ ve awˬ pa awˬ e, Hkriꞈ yaˇ awˬ moˍ hkʼaw nyi haꞈ shaˉ paˍ, yawˇ hui geh yaw daꞈ nyi sheˍ. Daꞈ ve beˆ maˍ laˇ hkawˇ cawˬ tuˬ yoˬ. Nyi haꞈ shaˉ paˍ lehˬ, Hkriꞈ yaˇ awˬ moˍ htaꞈ piˇ taˍ ve “laꞈ shawnˍ hpehꞈ ve” tehꞈ Yaˬhoˉvaˬ shawˍ ve yoˬ. Yaˬhoˉvaˬ yawˇ hui htaꞈ yonˍ gʼa ve leh nawˬ kaꞈ yonˍ cawˇ ve yoˬ. (Eˇfeˇsuꞈ 4:8) Nawˬ yawˇ hui ve yonˍ hkʼaˇ htaꞈ henˇ yuˬ leh beˆ maˍ laˇ ve htaꞈ gʼaꞈ te ve kʼo, awˬ bon gʼa jaˇ tuˬ yoˬ. Jawˇmawˇ Aˍsaˍ ve awˬ lawn htaꞈ hkʼaˬ hkʼe henˇ yuˬ gʼa ve teˇ geh nyi sheˍ.

12. Jawˇmawˇ Aˍsaˍ yawˇ tanˬ uˉ peunˍ htaˇ te hkʼaˇ dawˇ hkʼaˇ hkʼaˬ hkʼe cawˬ ve le?

¹² Jawˇmawˇ Aˍsaˍ yaˇ nehˬ htaˇ, haꞈ hanˉ leh nyi ma nuˇ nehˬ ve yoˬ. Tawˇ pa haˉ te kʼo, yawˇ awˬ pa Aˍbiˇyaˆ ve jawˇ mawˇ awˬ tan te htaˇ, mvuhˇ miˬ hkʼaw shaˉ hoꞈ teˇ hpaˍ htaꞈ hkʼa peu˗eˬ te luˬ ve yoˬ. ‘Yawˇ hui ve awˬ pu awˬ pi hui ve Gʼuiˬ sha Yaˬhoˉvaˬ ve kanˉ te leh Gʼuiˬ sha ve tawˇ hkawˇ leh awˬ liˇ awˬ hkʼaˇ htaꞈ gʼaꞈ te tuˬ kʼoˆ piˇ ve yoˬ’ (2 Raˍsaˍvanˍ 14:1-7) Zeˍlaˆ tehꞈ kʼoˆ ve Suˍdanˍ chaw teˇ gʼaˇ maꞈ yaˇ teˇ lanˬ gʼaˇ htaꞈ shiˍ veu laˇ leh Yuˇdaꞈ chaw htaꞈ ca bawˆ la htaˇ, jawˇ mawˇ Aˍsaˍ cuˇ yiˍ cawˬ ve hkʼaw te ve yoˬ. Aˍsaˍ Yaˬhoˉvaˬ geh bon lawˬ leh kʼoˆ ve, “Gʼuiˬ sha˗oˬ, nawˬ lehˬ awˬ gʼaˇ nuˇ ve maꞈ moˍ htaꞈ awˬ gʼaˇ uiˍ la tuˬ te gʼa ve yoˬ. Ngaˬ hui ve Jawˇmawˇ Gʼuiˬ sha˗oˬ, chi beuꞈ ngaˬ hui htaꞈ a ciˉ ga laˇ˗oˆ. Ngaˬ hui lehˬ, nawˬ htaꞈ gʼaˇ va chehˇ ve yoˬ.” Aˍsaˍ ve tawˇ hkawˇ htaꞈ nyi kʼo, yawˇ leh yawˇ ve chaw htaꞈ Yaˬhoˉvaˬ ga laˇ gʼa ve tehꞈ yonˍ ve ngaˬ hui mawˬ ve yoˬ. Aˍsaˍ mvuhˇ naw ma hkʼoˆ yawˇ ve Awˬ pa htaꞈ gʼaˇ va ve pa taw, “Gʼuiˬ sha lehˬ Suˍdanˍ chaw teˇ hpaˍ htaꞈ shonˇ kʼai piˇ lawˬ ve yoˬ.”—2 Raˍsaˍvanˍ 14:8-12.

13. Jawˇmawˇ Aˍsaˍ htaꞈ aˬ htoꞈ ma hpehꞈ la ve le? Leh aˬ htoꞈ ma pa taw le?

¹³ Aˍsaˍ htaꞈ Ehˇtaˍyoˇpiˆ chaw maꞈ yaˇ teˇ lanˬ gʼaˇ ca bawˆ la htaˇ, yawˇ awˬ pon dawˇ haˍ jaˇ ve yoˬ. Yawˇ Yaˬhoˉvaˬ htaꞈ gʼaˇ va ve pa taw ponˬ gʼa ve yoˬ. Iˉsaˍreˍlaˆ chaw jawˇ mawˇ Baˍshaˍ haiˬ jaˇ ve Aˍsaˍ htaꞈ ca bawˆ la htaˇ, yawˇ Yaˬhoˉvaˬ htaꞈ gʼaˇ va cawˇ ve htawˇ, Suˇriˆ ve jawˇ mawˇ htaꞈ gʼaˇ va ve  yoˬ. Chi lehˬ dawˇ cheˆ ve yaꞈ jaˇ. Yaˬhoˉvaˬ tcuh kaˍ paˍ Haˍnaˍniˆ htaꞈ cuˇ leh Aˍsaˍ htaꞈ kʼoˆ piˇ tcuh ve, “nawˬ lehˬ Gʼuiˬ sha htaꞈ maˇ gʼaˇ va Suˇriˆ jawˇ mawˇ htaꞈ gʼaˇ va ve pa taw, Iˉsaˍreˍlaˆ jawˇ mawˇ nawˬ ve laꞈ sheh hkʼaw pon tawˆ˗e ve yoˬ.” Oˇ ve teˇ yanˇ tanˬ leh Aˍsaˍ hkʼaˬ htaˆ kaꞈ maꞈ gʼa bawˆ daꞈ ve yoˬ. (2 Raˍsaˍvanˍ 16:7, 9; 1 Jawˇmawˇ 15:32) Ngaˬ hui htaꞈ aˬ htoꞈ ma maˍ laˇ ve le?

14. Nawˬ Yaˬhoˉvaˬ htaꞈ hkʼaˬ hkʼe te gʼaˇ va gʼa tuˬ le? Leh 1 Tiˆmoˉseˍ liꞈ 4:12 hkʼaw kʼoˆ taˍ ve hkʼe, nawˬ oˇ hkʼe te ve kʼo hkʼaˬ hkʼe hpehꞈ tuˬ le?

¹⁴ Nawˬ hkʼaˬ htaˆ kaꞈ nyi ma nuˇ nehˬ leh Yaˬhoˉvaˬ htaꞈ gʼaˇ gʼa va ve yoˬ. Nawˬ Baˆtiˆsaˬ haꞈ yuˬ htaˇ, nawˬ Yaˬhoˉvaˬ htaꞈ yonˍ leh gʼaˇ va ve tehꞈ mawˬ tcuh ve yoˬ. Nawˬ yawˇ ve yehˬ kʼa hkʼaw chehˇ la ve yawˇ ha lehˬ jaˇ ve yoˬ. Yaꞈ hkʼaˇ, a yeˇ uiˍ jaˇ ve lehˬ nawˬ Yaˬhoˉvaˬ htaꞈ caˉ leh gʼaˇ gʼa va ve yoˬ. A yeˇ uiˍ ve awˬ lawn dawˇ cheˆ htaˇ, nawˬ Yaˬhoˉvaˬ htaꞈ gʼaˇ va˗oˬ ve yoˬ. Yaꞈ hkʼaˇ, awˬ nu ve awˬ lawn kʼo, nawˬ hkʼaˬ hkʼe te tuˬ le? Nawˬ aˬ htoꞈ ma awˬ lawn dawˇ cheˆ ve htawˇ maˇ kʼoˆ, Yaˬhoˉvaˬ htaꞈ gʼaˇ va ve lehˬ a yeˇ uiˍ jaˇ. Awˬ han nyi ve, liꞈ hkawˇ na ve, leˍ guiˇ ve, kanˉ te tuˬ leuˆ ve maˇ heˆ leh, a shaꞈ teꞈ kuiˬ hkʼaw aˬ htoꞈ ma te tuˬ dawˇ teh htaˇ, a shu yawˇ awˬ to htaꞈ gʼaˇ va leh dawˇ cheˆ gʼa ve tehꞈ taˇ dawˇ. Yaꞈ hkʼaˇ, nawˬ dawˇ cheˆ gʼa tuˬ Liꞈ hpu hkʼaw ve awˬ liˇ awˬ hkʼaˇ ga laˇ tcuh sheˍ. (Tawˇ naˉ ve 3:5, 6) Nawˬ chi hkʼe te ve kʼo, Yaˬhoˉ vaˬ ha lehˬ jaˇ tuˬ te piˇ ve yoˬ. Leh Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ nawˬ htaꞈ yawˆ yan tuˬ yoˬ.—1 Tiˆmoˉseˍ 4:12 gʼaw sheˍ.

15. 2 Raˍsaˍvanˍ 18:1-3; 19:2 hkʼaw kʼoˆ taˍ ve hkʼe, jawˇ mawˇ Yawˇshaˍhpaˆ aˬ htoꞈ ma te yaꞈ ve le?

¹⁵ Ngaˬ hui teˇ gʼaˇ le le maˇ biˇ ve chaw hpehꞈ ve pa taw, te yaꞈ puiˉ ve yoˬ. Yaꞈ hkʼaˇ, awˬ lawn chi ve Yaˬhoˉvaˬ ve kanˉ hkʼa dehꞈ maˇ te gʼa tuˬ taˇ te laˇ tcuh. Jawˇmawˇ Yawˇshaˍhpaˆ ve awˬ lawn htaꞈ dawˇ nyi sheˍ. Yawˇ daꞈ ve te hkʼaˇ dawˇ hkʼaˇ laiˉ ceuˬ cawˬ ve yoˬ. Yawˇshaˍhpaˆ jawˇ mawˇ tanˬ te htaˇ, “Gʼuiˬ sha htaꞈ ceh tiˉ oˉ kʼoˍ pui leh yawˇ ve awˬ liˇ tawˇ hkawˇ teˇ hpaˍ htaꞈ na yuˬ chehˇ ve yoˬ.” Chi hkʼoˆ kaꞈ, Yuˇdaꞈ mvuhˇ miˬ hkʼaw teˇ kaˬ le le jawˇ mawˇ teˇ hpaˍ Yaˬhoˉvaˬ ve awˬ lawn ca maˍ tuˬ kʼai tcuh ve yoˬ. (2 Raˍsaˍvanˍ 17:4, 7) Yaꞈ hkʼaˇ, teˇ pawˆ pawˆ yawˇ dawˇ cheˆ ve yaꞈ jaˇ. Teˇ pawˆ htaˇ, Yaˬhoˉvaˬ ve awˬ tan te shehˍ hpaˇ yawˇ htaꞈ deˇ piˇ ve yoˬ. (2 Raˍsaˍvanˍ 18:1-3; 19:2 gʼaw sheˍ.) Awˬ lawn chi nawˬ htaꞈ aˬ htoꞈ ma maˍ laˇ ve le?

16. Raˍjiˆ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁶ Nawˬ htaꞈ beˆ maˍ laˇ htaˇ, haꞈ yuˬ leh gʼaꞈ te sheˍ. Yaˇ nehˬ laiˉ gʼaˇ hkʼa shuˍ a shaꞈ teꞈ kuiˬ hkʼaw a yeˇ uiˍ ve htaꞈ awˉ lawˉ shawˍ teh tuˬ haˍ leh Gʼuiˬ sha ve kanˉ htaꞈ a yeˇ uiˍ jaˇ tehꞈ dawˇ tuˬ haˍ jaˇ. Yaꞈ hkʼaˇ, awˬ gʼaˇ taˇ nuˇ. Raˍjiˆ ve  awˬ lawn htaꞈ teˇ geh nyi sheˍ. Yawˇ yaˇ nehˬ htaˇ ve awˬ lawn htaꞈ kʼoˆ maˍ laˇ ve, “uiˍ la˗oˬ htaˇ ngaˬ aˬ htoꞈ ma te tuˬ oˇ ve teˇ yanˇ maˇ shiˍ ve yoˬ. Ngaˬ kaꞈ awˬ nu ve yaˇ nehˬ laiˉ gʼaˇ htaꞈ shuˍ ve yoˬ. Hto toˇ˗e ve, hpawnˬ daꞈ˗e ve, aꞈ kehˉ awˬ gʼaˇ caw ve leh pyawˍ ve awˬ ceuˬ htaꞈ ngaˬ kaꞈ te gaˇ ve yoˬ.” Yaꞈ hkʼaˇ, yawˇ htaꞈ dawˇ haˍ ve nyi haꞈ shaˉ paˍ lehˬ beˆ maˍ piˇ ve chi yawˇ htaꞈ ga piˇ gʼa jaˇ. Raˍjiˆ kʼoˆ ve, “1 Tiˆmoˉseˍ liꞈ 4:8 hkʼaw ve awˬ liˇ awˬ hkʼaˇ htaꞈ ngaˬ dawˇ nyi tuˬ yawˇ ga laˇ ve yoˬ.” “Beˆ maˍ laˇ hkawˇ chi htaꞈ Raˍjiˆ nyi ma nuˇ nehˬ ve hkʼaw haꞈ yuˬ leh gʼaꞈ te ve yoˬ. Yawˇ a shaꞈ teꞈ kuiˬ hkʼaw aˬ htoꞈ ma a yeˇ uiˍ jaˇ ve htaꞈ shiˍ la ve yoˬ.” Yawˇ kʼoˆ ve, “Yaˬhoˉvaˬ ve kanˉ ngaˬ a shaꞈ teꞈ kuiˬ hkʼaw a yeˇ uiˍ jaˇ ve tehꞈ shawˍ tuˬ ngaˬ dawˇ cheˆ gʼa˗oˬ.” Awˬ bon hkʼaˬ hkʼe gʼa ve le? Raˍjiˆ kʼawꞈ kʼoˆ ve, “nyi haꞈ shaˉ paˍ oˇ ve beˆ maˍ laˇ ve hkʼaˬ nyiˇ hkʼawꞈ maˇ gaˬ sheˍ htaˇ, ngaˬ ga piˇ shehˍ hpaˇ gʼa hpehꞈ ve yoˬ.”

17. Awˬ viˉ awˬ nyi hawˉ hkʼaˆ yaˇ nehˬ Yaˬhoˉvaˬ ve kanˉ te ve htaꞈ Hkriꞈ yaˇ awˬ moˍ hkʼaw ve chaw mawˇ hkʼaˬ hkʼe dawˇ ve le?

¹⁷ Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw˗oˬ, nawˬ geh teˇ geh Gʼuiˬ sha htaꞈ ‘oˉ kʼoˍ gʼa pui ve’ Hkriꞈ yaˇ awˬ moˍ hkʼaw ve chaw mawˇ awˬ hpfuhˇ shiˍ leh ha lehˬ ve yoˬ. (Zeˍhpaˍniˆ 3:9) Nawˬ awˬ gʼaˇ cawˬ ve, kaiˬ ve, leh awˬ vuiˬ gʼa ve htaꞈ nyi ma pfuhˇ ve hkʼaw te ve, yawˇ hui dawˇ cawˇ ve yoˬ. Yawˇ hui nawˬ htaꞈ haꞈ jaˇ.—1 Yoˇhanˬ 2:14.

18. Tawˇ naˉ ve liꞈ 27:11 hkʼaw kʼoˆ taˍ ve hkʼe, awˬ viˉ awˬ nyi hawˉ hkʼaˆ yaˇ nehˬ Yaˬhoˉvaˬ ve kanˉ te ve chaw htaꞈ yawˇ hkʼaˬ hkʼe dawˇ tuˬ le?

¹⁸ Awˬ viˉ awˬ nyi hawˉ hkʼaˆ yaˇ nehˬ hpehꞈ ve chaw˗oˬ, Yaˬhoˉvaˬ nawˬ htaꞈ haꞈ leh yonˍ gʼa ve tehꞈ tawnˇ taˍ sheˍ. Gʼuiˬ sha awˬ gʼuˇ suhˍ htaˇ kaꞈ kʼoˆ taˍ ve, awˬ leh meuˇ ve awˬ yanˇ hkʼaw yaˇ nehˬ yawˇ ve kanˉ ha lehˬ ha kʼa ve hkʼaw te tuˬ yoˬ. (Chiˇ mvuh ve 110:1-3) Nawˬ Gʼuiˬ sha htaꞈ haꞈ leh yawˇ ve kanˉ te gʼa ve hkʼe, hkʼa dehꞈ te gaˇ ve tehꞈ yawˇ shiˍ ve yoˬ. Chi htaꞈ pa taw, nawˬ awˬ nu ve chaw htaꞈ yeunˇ hkanˍ leh nawˬ awˬ to htaꞈ kaꞈ yeunˇ hkanˍ sheˍ. Nawˬ te yaꞈ htaˇ, maˍ laˇ ve htaꞈ haꞈ yuˬ leh beˆ maˍ laˇ hkawˇ chi Yaˬhoˉvaˬ geh laˬ ve tehꞈ shawˍ sheˍ. (Heˍbrehˇ 12:6) Nawˬ gʼa ve awˬ vuiˬ teˇ ceuˬ le le htaꞈ kaiˬ ve hkʼaw te sheˍ. Leh a yeˇ uiˍ jaˇ ve lehˬ, Awˬ pa Gʼuiˬ sha nyi hkʼaˇ suh tuˬ teˇ ceuˬ le le te sheˍ.—Tawˇ naˉ ve 27:11 gʼaw sheˍ.