1. Maꞈhtehˍ liꞈ 24:9 hkʼaw kʼoˆ taˍ ve hkʼe, shu ngaˬ hui htaꞈ canˇ ve aˬ htoꞈ ma te anˇ tuˬ maˇ loˍ ve le?

 Yaˬhoˉvaˬ ngaˬ hui htaꞈ hpanˍ taˍ laˇ ve lehˬ, awˬ nu ve chaw htaꞈ haꞈ ve leh shu haꞈ laˇ tuˬ kaꞈ hpanˍ taˍ laˇ ve yoˬ. Shu ngaˬ hui htaꞈ nyi bawˬ laˇ ve pa taw, nyi ma naˬ leh kawˆ ve yoˬ hehˉ. Tawˇ pa haˉ te kʼo, Uˉyawˉpaˆ miˬ guiˬ lo ve Cawn˗cen˗naˆ kʼoˆ ve, “ngaˬ a shaꞈ 14 hkʼawꞈ htaˇ Yaˬhoˉvaˬ ve kanˉ te ve pa taw, ngaˬ e ngaˬ htaꞈ nyi bawˬ jaˇ.” * Da˗nyi˗lo kʼoˆ ve, “maꞈ yaˇ Shaˉhkiˆhkanˍ ve chaw hpehꞈ ve htaꞈ deˇ laˇ ve, ngaˬ kawˆ ve, nyi cha laˇ ve, chi ve teˇ hpaˍ gʼa hpuˇ htaˇ yaꞈ tawˍ jaˇ.” Shu ngaˬ hui htaꞈ nyi bawˬ laˇ htaˇ, nyi ma naˬ jaˇ. Ngaˬ hui shu nyi bawˬ laˇ ve gʼa hpuˇ tuˬ yoˬ tehꞈ Yeˍsuˆ kʼoˆ taˍ laˇ peuˬ ve pa taw ngaˬ hui anˇ tuˬ maˇ loˍ.—Maꞈhtehˍ liꞈ 24:9 gʼaw sheˍ.

2-3. Aˬ htoꞈ ma te Yeˍsuˆ ve awˬ laꞈ gʼawˇ shu nyi bawˬ piˇ ve htaꞈ gʼa hpuˇ ve le?

² Miˬ guiˬ hkʼoˆ lo ve chaw Yeˍsuˆ ve awˬ laꞈ gʼawˇ htaꞈ nyi bawˬ ve yoˬ. Aˬ htoꞈ ma pa taw le? Yeˍsuˆ “miˬ guiˬ htaꞈ maˇ caˉ daꞈ ve” pa taw ngaˬ hui kaꞈ yawˇ hkʼa shuˍ te ve yoˬ. (Yoˇhanˬ 15:17-19) Ngaˬ hui mvuhˇ miˬ kanˉ te paˍ htaꞈ yawˆ yan ve htawˇ, ngaˬ hui yawˇ hui htaꞈ oˉ kʼoˍ maˇ pui leh, chaw yaˇ uˉ peunˍ ve htaꞈ caˉ daꞈ ve awˬ heˆ hkʼa peu˗eˬ htaꞈ ngaˬ hui maˇ te. Ngaˬ hui Yaˬhoˉvaˬ htaꞈ ceh tiˉ oˉ kʼoˍ gʼa pui ve yoˬ. Gʼuiˬ sha chaw yaˇ htaꞈ uˉ peunˍ tuˬ a hkaw˗anˬ cawˬ ve yoˬ. Saˍtanˍ leh yawˇ ve “awˬ yaˇ awˬ duˬ” Gʼuiˬ sha uˉ peunˍ tuˬ a hkaw˗anˬ maˇ cawˬ tehꞈ kʼoˆ ve yoˬ. (Awˬ hkuiˉ puiˍ 3:1-5, 15) Gʼuiˬ sha ve mvuhˇ miˬ ceh tiˉ chaw yaˇ ve dawˇ law kuiˬ hpehꞈ ve tehꞈ ngaˬ hui hto toˇ ve yoˬ. Gʼuiˬ sha ve mvuhˇ miˬ htaꞈ tawˍ ve chaw teˇ gʼaˇ le le htaꞈ te luˬ piˇ tuˬ yoˬ. (Daˍyeˍlaˆ 2:44; Hpeuꞈ maˍ ve 19:19-21) Awˬ lawn chi nyi ma nuˇ nehˬ ve chaw awˬ pon daꞈ ve awˬ lawn hpehꞈ ve yoˬ. Yaꞈ hkʼaˇ, haiˬ ve chaw awˬ pon kʼo maˇ daꞈ ve awˬ lawn hpehꞈ ve yoˬ.—Chiˇ mvuh ve 37:10, 11.

 ³ Chi hkʼoˆ kaꞈ, ngaˬ hui Gʼuiˬ sha ve awˬ liˇ awˬ hkʼaˇ htaꞈ gʼaꞈ te leh miˬ guiˬ hkʼoˆ lo ve awˬ liˇ awˬ hkʼaˇ htaꞈ maˇ shuˍ ve pa taw, nga hui htaꞈ shu nyi bawˬ ve yoˬ. Tawˇ pa haˉ te kʼo, Sawˉdonˍ leh Gawˇmawˇraꞈ venˇ chaw yawˇ hui haˉ chawˇ haˉ paˆ te ve pa taw te luˬ piˇ ve yoˬ. Yaꞈ hkʼaˇ, chi beuꞈ teˇ co˗e ve chaw kaꞈ awˬ lawn oˇ hkʼe leˇ ve htaꞈ a hkʼe leˇ tehꞈ dawˇ leh haꞈ yuˬ gaˇ ve yoˬ. (Yuˇdaꞈ 7) Ngaˬ hui awˬ liˇ awˬ hkʼaˇ chi teˇ hpaˍ htaꞈ caˉ daꞈ ve Liꞈ hpu hkʼaw gʼaꞈ te ve pa taw, laiˉ gʼaˇ ngaˬ hui htaꞈ kʼoˆ guiˇ gʼuiˬ guiˇ laˇ leh shu htaꞈ maˇ haꞈ puiˉ tehꞈ kʼoˆ laˇ ve yoˬ.—1 Peˍtruˆ 4:3, 4.

4. Shu ngaˬ hui htaꞈ nyi bawˬ laˇ htaˇ yeunˇ hkanˍ gʼaˇ tuˬ aˬ htoꞈ ma ga laˇ ve le?

⁴ Shu nga hui htaꞈ nyi bawˬ laˇ leh deˇ laˇ htaˇ, ngaˬ hui yeunˇ hkanˍ gʼaˇ tuˬ aˬ htoꞈ ma ga laˇ ve le? Yonˍ ve teˇ ceuˬ yoˬ. Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ gʼa yonˍ ve yoˬ. “Haiˬ ve awˬ shehˍ hpaˇ teˇ gʼaˇ bawˆ laˇ ve aˬ miˍ toꞈ chehˇ ve hkaˆ ce teˇ hpaˍ htaꞈ tiˇ pehˍ gʼa tuˬ,” yonˍ ve lehˬ htanˬ tuˬ htaꞈ shuˍ ve yoˬ. (Eˇfeˇsuꞈ 6:16) Yaꞈ hkʼaˇ, yonˍ ve ceh maˇ lawꞈ. Ngaˬ hui haꞈ pehnˇ ve kaꞈ gʼa cawˬ ve yoˬ. Haꞈ pehnˇ ve lehˬ “nyi ma maˇ zuhˆ puiˉ.” Yaꞈ hkʼaˇ, haꞈ pehnˇ ve lehˬ teˇ ceuˬ le le htaꞈ yeunˇ hkanˍ leh nyi ma luˬ tuˬ te laˇ ve teˇ ceuˬ le le htaꞈ yeunˇ hkanˍ gʼaˇ tuˬ ga laˇ ve yoˬ. (1 Kawˇrenˍhtuˆ 13:4-7, 13) Yaˬhoˉvaˬ htaꞈ haꞈ ve, awˬ viˉ awˬ nyi htaꞈ haꞈ ve, leh canˇ paˍ htaꞈ haꞈ ve, nyi bawˬ laˇ ve htaꞈ ngaˬ hui yeunˇ hkanˍ gʼaˇ tuˬ hkʼaˬ hkʼe ga laˇ gʼa ve teˇ geh nyi sheˍ.

5. Yeˍsuˆ yawˇ ve Awˬ pa htaꞈ haꞈ ve yawˇ aˬ htoꞈ ma te gaˇ tuˬ ga piˇ ve le?

⁵ Canˇ paˍ Yeˍsuˆ htaꞈ maˇ tiˇ pehˍ sheˍ teˇ haˉ htaˇ, yawˇ ve awˬ laꞈ gʼawˇ ka tiꞈ yeˬ ve htaꞈ kʼoˆ piˇ ve, “Awˬ pa htaꞈ ngaˬ haꞈ ve yoˬ tehꞈ, miˬ guiˬ yaˇ hui gʼa shiˍ tuˬ, Awˬ pa ngaˬ htaꞈ tawˇ peꞈ laˇ ve hkʼe ngaˬ te ve yoˬ.” (Yoˇhanˬ 14:31) Yeˍsuˆ Yaˬhoˉvaˬ htaꞈ haꞈ ve pa taw, yawˇ shoꞈ shaꞈ ve leh tuꞈ ve hkanˍ ve htaꞈ yeunˇ hkanˍ gʼaˇ ve yoˬ. Ngaˬ hui Yaˬhoˉvaˬ htaꞈ haꞈ ve kʼo, chi hkʼa shuˍ te gʼa ve yoˬ.

6. Roˉmaꞈ liꞈ 5:3-5 hkʼaw kʼoˆ taˍ ve hkʼe, miˬ guiˬ yaˇ nyi bawˬ laˇ htaˇ, Yaˬhoˉvaˬ ve chaw hkʼaˬ hkʼe dawˇ ve le?

⁶ Yaˬhoˉvaˬ ve chaw fawˉ mehˍ ve htaꞈ gʼa hpuˇ htaˇ yawˇ hui yawˇ htaꞈ haꞈ ve pa taw hkʼaˬ htaˆ kaꞈ yeunˇ hkanˍ gʼaˇ tuˬ ga piˇ ve yoˬ. Oˇ ve teˇ yanˇ, Yuˇdaꞈ shaˉ nanˉ lonˉ kanˇ paˆ uiˍ jaˇ leh tcuh yaˇ hui htaꞈ bon maˇ maˍ toˇ tcuh htaˇ, yawˇ hui Gʼuiˬ sha htaꞈ haꞈ ve pa taw “chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ” htaꞈ na tuˬ Gʼuiˬ sha ga piˇ ve yoˬ. (Tcuh yaˇ 5:29; 1 Yoˇhanˬ 5:3) Chi beuꞈ teˇ co˗e awˬ viˉ awˬ nyi kaꞈ hkʼa shuˍ shuˍ, mvuhˇ miˬ uˉ peunˍ paˍ haiˬ jaˇ ve yawˇ hui htaꞈ fawˉ mehˍ piˇ ve htawˇ, yawˇ hui Gʼuiˬ sha htaꞈ haꞈ ve pa taw yawˇ hui caˉ leh ka tiꞈ yeˬ gʼa tuˬ Gʼuiˬ sha ga piˇ ve yoˬ. Miˬ guiˬ yaˇ ngaˬ hui htaꞈ nyi bawˬ ve htawˇ, ngaˬ hui awˬ gʼaˇ maˇ nuˇ. Ngaˬ hui ha lehˬ leh chi lehˬ daꞈ ve awˬ vuiˬ hpehꞈ ve tehꞈ shawˍ ve yoˬ.—Tcuh yaˇ 5:41; Roˉmaꞈ liꞈ 5:3-5 gʼaw sheˍ.

7. Yehˬ kʼa hkʼaw ve chaw leh awˬ viˉ awˬ nyi ngaˬ hui htaꞈ tawˍ laˇ ve kʼo hkʼaˬ hkʼe te cawˇ ve le?

⁷ Fawˉ mehˍ laˇ ve haꞈ yuˬ haˍ jaˇ ve teˇ ceuˬ lehˬ, yehˬ kʼa hkʼaw ve chaw maˇ heˆ leh awˬ viˉ awˬ nyi fawˉ mehˍ laˇ ve yoˬ. Ngaˬ hui awˬ tehˬ ve tanˬ henˇ htaˇ ngaˬ hui htaꞈ shu heˍ ve maˇ heˆ leh gʼuˇ˗oˬ ve tehꞈ yawˇ hui dawˇ ve yoˬ. (Maˍkuˆ 3:21 htaꞈ tehˆ daꞈ sheˍ.) Yawˇ ngaˬ hui htaꞈ deˇ laˇ hehnˇ jaˇ ve maˇ heˆ leh dawˆ laˇ ve yoˬ hehˉ. Yaꞈ hkʼaˇ, ngaˬ hui chi hkʼe gʼa hpuˇ ve anˇ tuˬ maˇ loˍ. Awˬ lawn kʼo, Yeˍsuˆ kʼoˆ ve, “a shu yawˇ ve canˇ paˍ lehˬ a shu yawˇ ve yehˬ yaˇ kʼa yaˇ teˇ hpaˍ hpehꞈ tuˬ yoˬ.” (Maꞈhtehˍ 10:36) Yehˬ kʼa hkʼaw ve chaw maˇ heˆ leh awˬ viˉ awˬ nyi ngaˬ hui htaꞈ hkʼaˬ hkʼe dawˇ ve htawˇ maˇ kʼoˆ, ngaˬ hui yawˇ hui htaꞈ maˇ nyi bawˬ leh, yawˇ hui canˇ paˍ hpehꞈ ve tehꞈ maˇ shawˍ. Awˬ tehˬ kʼo, ngaˬ hui Yaˬhoˉvaˬ htaꞈ gʼaˇ hteꞈ haꞈ ve kʼo, awˬ nu ve chaw htaꞈ kaꞈ gʼaˇ hteꞈ haꞈ tuˬ yoˬ. (Maꞈhtehˍ 22:37-39) Ngaˬ hui shu nyi ma cawˇ tuˬ te gaˇ ve pa taw, Gʼuiˬ sha ve awˬ liˇ tawˇ hkawˇ leh, Liꞈ hpu hkʼaw ve awˬ liˇ awˬ hkʼaˇ htaꞈ ngaˬ hui maˇ na ve maˇ te.

8-9. Awˬ viˉ awˬ nyi yaˇ miˇ teˇ gʼaˇ tawˍ piˇ ve htaꞈ yeunˇ hkanˍ gʼaˇ tuˬ aˬ htoꞈ ma ga piˇ ve le?

⁸ Chi awˬ gʼuˇ suhˍ htaˇ kʼoˆ kʼai peuˬ ve, Cawn˗cen˗naˆ awˬ e tawˍ piˇ jaˇ ve yoˬ. Yaꞈ hkʼaˇ, yawˇ  ka tiꞈ yeˬ gʼa sheˍ ve yoˬ. Yawˇ kʼoˆ ve, “ngaˬ e ngaˬ huiˉ maˬ Shaˉhkiˆhkanˍ ve chaw geh Liꞈ hpu teˇ geh tanˬ henˇ ve yoˬ. Henˇ ve 6 ha pa peuˬ hkʼawꞈ nawˉ ngaˬ hpawnˬ daꞈ˗e gaˇ ve yoˬ. Yaꞈ hkʼaˇ, ngaˬ e dawˇ hkʼaˇ kʼawꞈ pa ve yoˬ. Ngaˬ e Gʼuiˬ sha htaꞈ hpfuhˆ ve chaw htaꞈ caˉ daꞈ ve pa taw, yawˇ hui yaw ve tawˇ hkʼe ngaˬ e ngaˬ htaꞈ yaw laˇ ve tehꞈ hkʼawꞈ nawˉ htaˇ ngaˬ shiˍ la ve yoˬ. Ngaˬ e ngaˬ htaꞈ deˇ laˇ ve, oˉ kʼoˍ mvuh tcuhˆ suhˉ laˇ ve, kʼawˍ peˍ nyiˉ laˇ ve, leh ngaˬ ve liꞈ kʼoˆ gʼawˆ baˬ laˇ ve yoˬ. Ngaˬ 15 hkʼawꞈ gaˬ htaˇ Baˆtiˆshaˬ haꞈ yuˬ ve yoˬ. Ngaˬ Yaˬhoˉvaˬ ve kanˉ maˇ te tuˬ ngaˬ e tawˍ laˇ ve yoˬ. Hkʼe te leh, chaw hkawˇ maˇ na ve yaˇ chehˇ kuiˬ yehˬ lo ngaˬ e ngaˬ htaꞈ chehˇ tcuh laˇ ve yoˬ. Oˇ kaˬ lo chehˇ ve yaˇ laiˉ gʼaˇ lehˬ, awˬ liˇ awˬ hkʼaˇ maˇ daꞈ ve yoˬ. Teˇ hpaˍ kʼo, naˆ tsuhˇ yeꞈ caˆ ve, teˇ hpaˍ kʼo mvuhˇ miˬ awˬ liˇ htaꞈ te yaꞈ ve yoˬ. Ngaˬ hui htaꞈ haꞈ laˇ ve ngaˬ hui htaꞈ nyi haꞈ shaˉ laˇ ve chaw tawˍ laˇ ve kʼo, haꞈ yuˬ gʼa tuˬ haˍ jaˇ tehꞈ ngaˬ dawˇ ve yoˬ.”

⁹ Cawn˗cen˗naˆ hkʼaˬ hkʼe te yeunˇ hkanˍ gʼaˇ ve le? Yawˇ kʼoˆ ve, “ngaˬ e ngaˬ htaꞈ tawˍ laˇ ve teˇ nyi htaˇ ngaˬ Liꞈ hpu teˇ kʼoˆ hkʼa peu˗eˬ gʼaw peuˬ ve awˬ nyi htaꞈ cawˇ daꞈ ve yoˬ. Oˇ ve teˇ yanˇ, ngaˬ henˇ ve awˬ ceuˬ awˬ tehˬ hpehꞈ ve tehꞈ yonˍ gʼa ve yoˬ. Ngaˬ Yaˬhoˉvaˬ geh meuˆ daꞈ jaˇ. Ngaˬ Yaˬhoˉvaˬ geh hkʼaˬ htaˆ kaꞈ bon lawˬ leh yawˇ kaꞈ ngaˬ ve hkawˇ na laˇ ve yoˬ. Yaˇ chaw hkawˇ maˇ na ve yehˬ lo ngaˬ chehˇ htaˇ, awˬ viˉ awˬ nyi yaˇ miˇ teˇ gʼaˇ ngaˬ yawˇ aˉ hkʼaw lo kʼai tuˬ jehˬ laˇ ve yoˬ. Ngaˬ huiˉ maˬ Liꞈ hpu teˇ geh henˇ ve yoˬ. Oˇ ve teˇ yanˇ, awˬ viˉ awˬ nyi geh awˬ gʼaˇ gʼa jaˇ. Ngaˬ yawˇ hui ve yehˬ kʼa hkʼaw ve chaw teˇ gʼaˇ hpehꞈ ve tehꞈ dawˇ tuˬ te laˇ ve yoˬ. Ngaˬ hui htaꞈ tawˍ laˇ ve chaw aꞈ kehˉ, Yaˬhoˉvaˬ kanˇ paˆ uiˍ jaˇ ve tehꞈ ngaˬ mawˬ ve yoˬ.”

10. Yaˬhoˉvaˬ Gʼuiˬ sha htaꞈ caˉ daꞈ ve ngaˬ hui aˬ htoꞈ ma yonˍ gʼa ve le?

¹⁰ Tcuh yaˇ Pawˇluꞈ kʼoˆ ve, ‘ngaˬ hui Jawˇmawˇ Yeˍsuˆ Hkriꞈ htaꞈ pa taw, Gʼuiˬ sha ve haꞈ pehnˇ ve awˬ hkʼaw lo teˇ ceuˬ˗ehˬ kaꞈ ngaˬ hui htaꞈ yuˬ hpaˆ laˇ maˇ hpehꞈ.’ (Roˉmaꞈ 8:38, 39) Ngaˬ hui teˇ tcuhˉ teˇ yanˇ tuꞈ ve hkanˍ ve gʼa hpuˇ ve htawˇ, Yaˬhoˉvaˬ ngaˬ hui awˬ paˇ lo chehˇ ve yoˬ. Yawˇ ngaˬ hui htaꞈ awˬ gʼaˇ peꞈ laˇ leh yonˍ yeˬ tuˬ ga laˇ ve yoˬ. Chi hkʼoˆ kaꞈ Cawn˗cen˗naˆ ve awˬ lawn ngaˬ hui gʼa mawˬ ve hkʼa shuˍ awˬ viˉ awˬ nyi ngaˬ hui htaꞈ ga laˇ tuˬ Yaˬhoˉvaˬ yehˇ ve yoˬ.

11. Yoˇhanˬ liꞈ 15:12, 13 hkʼaw Yeˍsuˆ kʼoˆ ve haꞈ pehnˇ ve lehˬ awˬ laꞈ gʼawˇ htaꞈ hkʼaˬ hkʼe ga piˇ ve le? Tawˇ pa haˉ kʼoˆ maˍ laˇ sheˍ.

¹¹ Yeˍsuˆ maˇ suh sheˍ ve teˇ haˉ htaˇ, awˬ laꞈ gʼawˇ teˇ gʼaˇ leh teˇ gʼaˇ haꞈ daꞈ tuˬ kʼoˆ piˇ ve yoˬ. (Yoˇhanˬ 15:12, 13 gʼaw sheˍ.) Haꞈ pehnˇ ve chi hkʼe ve lehˬ, yawˇ hui teˇ moˍ tiˉ hpehꞈ tuˬ ga piˇ leh nyi bawˬ daꞈ ve htaꞈ yeunˇ hkanˍ gʼaˇ tuˬ kaꞈ ga piˇ  ve yoˬ. Hteˇsaˍlawˇniˆ venˇ hkʼaw ve Hkriꞈ yaˇ awˬ moˍ hkʼaw ve awˬ lawn htaꞈ teˇ geh nyi sheˍ. Oˇ kaˬ lo ve awˬ viˉ awˬ nyi lehˬ, Hkriꞈ yaˇ awˬ moˍ tanˬ htaˇ kaꞈ fawˉ mehˍ ve gʼa hpuˇ ve yoˬ. Yaꞈ hkʼaˇ yawˇ hui haꞈ daꞈ ve leh, ka tiꞈ yeˬ ve daꞈ ve henˇ yuˬ tuˬ hpehꞈ ve yoˬ. (1 Hteˇsaˍlawˇniˆ 1:3, 6, 7) Yaꞈ hkʼaˇ, yawˇ hui ‘haꞈ daꞈ ve maˇ la tuˬ’ Pawˇluꞈ kʼoˆ piˇ ve yoˬ. (1 Hteˇsaˍlawˇniˆ 4:9, 10) Haꞈ pehnˇ ve lehˬ awˬ gʼaˇ nuˇ ve chaw htaꞈ awˬ gʼaˇ piˇ tuˬ ga piˇ ve yoˬ. (1 Hteˇsaˍlawˇniˆ 5:14) Yawˇ hui Pawˇluꞈ beˆ maˍ piˇ ve htaꞈ gʼaꞈ te ve tehꞈ ngaˬ hui mawˬ ve yoˬ. Peuˬ hkʼawꞈ nawˉ teˇ hkʼawꞈ, Pawˇluꞈ yawˇ hui htaꞈ liꞈ nyiˇ kʼoˆ teˇ kʼoˆ bvuhꞈ piˇ htaˇ, ‘nawˬ hui haꞈ daꞈ ve teˇ ceuˬ maˇ la chehˇ ve pa taw,’ Pawˇluꞈ yawˇ hui htaꞈ chiˇ mvuh piˇ ve yoˬ. (2 Hteˇsaˍlawˇniˆ 1:3-5) Haꞈ pehnˇ ve lehˬ, yawˇ hui tuꞈ ve hkanˍ ve htaꞈ yeunˇ hkanˍ gʼaˇ leh fawˉ mehˍ ve htaꞈ yeunˇ hkanˍ gʼaˇ tuˬ ga piˇ ve yoˬ.

12. Mvuhˇ miˬ teˇ mvuhˇ miˬ hkʼaw maꞈ bawˆ daꞈ ve cawˬ htaˇ, awˬ viˉ awˬ nyi haꞈ pehnˇ ve hkʼaˬ hkʼe hpeuꞈ maw piˇ daꞈ ve le?

¹² Da˗nyi˗lo leh yawˇ ve awˬ miˇ ma chi awˬ gʼuˇ suhˍ htaˇ kʼoˆ kʼai peuˬ ve htaꞈ teˇ geh nyi sheˍ. Yawˇ hui ve venˇ lo maꞈ bawˆ daꞈ ve cawˬ la htaˇ, yawˇ hui hpawnˬ daꞈ ve maˇ haˆ leh hto toˇ ve kaꞈ te gʼa ve hkʼe te ve yoˬ. Leh yawˇ hui cawˬ taˍ ve caˇ tuˬ kaꞈ awˬ nu ve awˬ viˉ awˬ nyi htaꞈ pehˬ piˇ ve yoˬ. Teˇ nyi htaˇ maꞈ yaˇ laꞈ caˉ hkʼa biˇ cawˬ ve Da˗nyi˗lo ve aˉ hkʼaw lo laˬ ve yoˬ. Da˗nyi˗lo kʼoˆ ve, “yawˇ hui ngaˬ Shaˉhkiˆhkanˍ ve chaw taˇ te kʼoˆ laˇ ve yoˬ. Yaꞈ hkʼaˇ, ngaˬ yawˇ hui hkawˇ maˇ na. Yawˇ hui ngaˬ htaꞈ dawˆ laˇ ve, ngaˬ htaꞈ bawˆ pehˍ tuˬ yoˬ tehꞈ kʼawꞈ kʼoˆ laˇ ve, ngaˬ oˉ kʼoˍ hkʼoˆ lo ceh bawˆ heuˬ˗e ve yoˬ. Yawˇ hui maˇ kʼai sheˍ htaˇ teˇ pawˆ kʼawꞈ laˬ leh ngaˬ ve awˬ miˇ ma htaꞈ nyiˉ behˇ tuˬ yoˬ tehꞈ kʼawꞈ kʼoˆ laˇ ve yoˬ. Chi ve awˬ viˉ awˬ nyi shiˍ htaˇ, awˬ nu ve teˇ venˇ lo kʼai tuˬ aˬ miˍ lawˬ ciˇ leh haˆ shiˍ kʼai laˇ ve yoˬ. Yawˇ hui haꞈ laˇ ve maˇ leunˇ jaw. Ngaˬ hui oˇ kaˬ lo gaˬ htaˇ, awˬ viˉ awˬ nyi caˇ tuˬ yuˬ veuˬ laˇ ve, yehˬ ca laˇ ve, kanˉ ca laˇ ve yoˬ. Hkʼe te leh, maꞈ bawˆ daꞈ leh hpaw chehˇ ve awˬ viˉ awˬ nyi htaꞈ ngaˬ hui kaꞈ ga piˇ gʼa ve yoˬ.” Teˇ gʼaˇ leh teˇ gʼaˇ haꞈ daꞈ ve pa taw, nyi bawˬ daꞈ ve htaꞈ yeunˇ hkanˍ gʼaˇ tuˬ awˬ lawn chi ga laˇ ve yoˬ.

13. Shu ngaˬ hui htaꞈ nyi bawˆ laˇ ve htawˇ yeunˇ hkanˍ leh Yaˬhoˉvaˬ ve kanˉ caˉ leh te gʼa tuˬ daꞈ kehˬ ve awˬ ha hpu ngaˬ hui htaꞈ hkʼaˬ hkʼe ga laˇ ve le?

¹³ Yeˍsuˆ awˬ laꞈ gʼawˇ htaꞈ kʼoˆ piˇ ve canˇ paˍ htaꞈ haꞈ˗oꞈ. (Maꞈhtehˍ 5:44, 45) Chi hkʼe te ve lehˬ sha ve maˇ heˆ. Yaꞈ hkʼaˇ, daꞈ kehˬ awˬ ha hpu ngaˬ hui htaꞈ ga laˇ leh te gʼa tuˬ yoˬ. Gʼuiˬ sha ve awˬ ha hpu ve awˬ shiˍ nawꞈ ve teˇ hpaˍ lehˬ, haꞈ pehnˇ ve, dawˇ zuhˬ gaˇ zuhˬ ve, ha kʼaˉ ve, nyi ma nuˇ nehˬ ve, a shu yawˇ awˬ to htaꞈ gʼaˇ puiˉ ve, chi teˇ hpaˍ ngaˬ hui cawˬ tuˬ ga laˇ ve yoˬ. (Gaˍlaˍtiˆ 5:22, 23) Te  hkʼaˇ dawˇ hkʼaˇ chi ve teˇ hpaˍ lehˬ, shu nyi bawˬ laˇ ve htaꞈ ngaˬ hui yeunˇ hkanˍ gʼaˇ tuˬ ga laˇ ve yoˬ. Awˬ hpawˇ, awˬ miˇ ma, yaˇ, leh awˬ chawˇ awˬ paˆ, te hkʼaˇ dawˇ hkʼaˇ chi ve teˇ hpaˍ htaꞈ mawˬ ve pa taw maˇ tawˍ˗o. Ngaˬ hui htaꞈ tawˍ laˇ ve laiˉ gʼaˇ kaꞈ awˬ viˉ awˬ nyi kʼawꞈ hpehꞈ la ve yoˬ. Nawˬ Yaˬhoˉvaˬ ve kanˉ te ve pa taw, shu nawˬ htaꞈ nyi bawˬ laˇ ve htawˇ nawˬ yawˇ htaꞈ haꞈ tuˬ haˍ jaˇ ve htawˇ, daꞈ kehˬ ve awˬ ha hpu nawˬ htaꞈ ga laˇ tuˬ bon lawˬ cawˇ ve yoˬ. (Luˉkaꞈ 11:13) Yaˬhoˉvaˬ hkawˇ na yuˬ ve lehˬ hkʼaˬ htaˆ kaꞈ daꞈ jaˇ ve awˬ ceuˬ hpehꞈ ve tehꞈ nawˬ yonˍ gʼa ve yoˬ.—Tawˇ naˉ ve 3:5-7.

14-15. Yeh˗miˆ awˬ hpawˇ htaꞈ haꞈ ve pa taw yawˇ htaꞈ tawˍ piˇ ve htawˇ, Roˉmaꞈ liꞈ 12:17-21 hkʼaw ve yawˇ htaꞈ hkʼaˬ hkʼe ga piˇ ve le?

¹⁴ Yeh˗miˆ ve awˬ lawn htaꞈ teˇ geh nyi sheˍ. Yawˇ Shaˉhkiˆhkanˍ ve chaw hpehꞈ la htaˇ, shu heˍ piˇ ve tehꞈ awˬ hpawˇ dawˇ ve yoˬ. Yawˇ Yaˬhoˉvaˬ ve kanˉ maˇ te tuˬ awˬ hpawˇ coˇ caˇ leh te piˇ ve yoˬ. Yawˇ awˬ miˇ ma htaꞈ deˇ leh, awˬ viˉ awˬ nyi leh bon awˬ hoˉ htaꞈ kaꞈ kʼoˆ piˇ leh, mawˇ paˍ htaꞈ kaꞈ kawˆ hoˉ tcuh ve yoˬ. Nawˬ yehˬ kʼa hkʼaw maˇ cawˇ maˇ hawˍ daꞈ tuˬ te ve tehꞈ kʼoˆ piˇ ve yoˬ. Awˬ viˉ awˬ nyi hpawnˬ daꞈ chehˇ htaˇ, awˬ hpawˇ kuˬ deˇ piˇ ve yoˬ. Yeh˗miˆ maˇ daꞈ ve awˬ lawn chi hkʼe ve gʼa hpuˇ ve pa taw yawˇ hawˬ ve yoˬ.

¹⁵ Yawˇ hpawnˬ daꞈ˗e htaˇ awˬ viˉ awˬ nyi yawˇ htaꞈ awˬ gʼaˇ piˇ ve yoˬ. Roˉmaꞈ liꞈ 12:17-21 hkʼaw ve yawˇ gʼaꞈ te tuˬ nyi haꞈ shaˉ paˍ kʼoˆ piˇ ve yoˬ. (gʼaw sheˍ) Yeh˗miˆ kʼoˆ ve, “chi ve htaꞈ gʼaꞈ te tuˬ haˍ jaˇ. Yaꞈ hkʼaˇ, Yaˬhoˉvaˬ ga laˇ tuˬ ngaˬ law leh ngaˬ kaꞈ Liꞈ hpu hkʼaw kʼoˆ taˍ ve htaꞈ coˇ caˇ leh gʼaꞈ te ve yoˬ. Ngaˬ hpawˇ awˬ chiˇ te kuiˬ yehˬ hkʼaw jeꞈ baˬ keu laˇ htaˇ, ngaˬ daꞈ kehˬ tuˬ te ve yoˬ. Yawˇ ngaˬ htaꞈ deˇ laˇ htaˇ, ngaˬ yawˇ htaꞈ tawˇ daꞈ daꞈ yaw piˇ ve yoˬ. Yawˇ naˬ htaˇ kaꞈ ngaˬ nyi haꞈ shaˉ piˇ ve yoˬ.”

16-17. Yeh˗miˆ ve awˬ lawn nawˬ htaꞈ hkʼaˬ hkʼe maˍ laˇ ve le?

¹⁶ Yeh˗miˆ yawˇ awˬ hpawˇ htaꞈ haꞈ ve te tawˆ la htaˇ awˬ bon gʼa jaˇ. Yawˇ kʼoˆ ve, “ngaˬ maˇ heˍ ve tehꞈ ngaˬ hpawˇ shiˍ htaˇ, yawˇ ngaˬ htaꞈ yonˍ la ve yoˬ. Ngaˬ hui bon awˬ lawn yaw daꞈ htaˇ, yawˇ ngaˬ hkawˇ na leh yawˆ yan laˇ ve yoˬ. Ngaˬ hpawnˬ daꞈ˗e lo kaꞈ yawˇ kʼoˆ laˇ ve yoˬ. Ngaˬ hui yehˬ kʼa hkʼaw ha lehˬ ve cawˬ tuˬ ga daꞈ tuˬ yoˬ tehꞈ kʼoˆ daꞈ ve yoˬ. Ngaˬ hui ve yehˬ kʼa ha lehˬ jaˇ. Ngaˬ hui oˇ htaˇ hkʼe leˇ maˇ deˇ daꞈ˗o. Ngaˬ hpawˇ teˇ nyi kʼo awˬ tehˬ ve htaꞈ dawˇ cawˇ leh ngaˬ geh teˇ geh Yaˬhoˉvaˬ ve kanˉ te la tuˬ yoˬ tehꞈ ngaˬ dawˇ law ve yoˬ.”

¹⁷ ‘Haꞈ pehnˇ ve lehˬ hkʼa peu˗eˬ htaꞈ hkanˍ puiˉ ve, hkʼa peu˗eˬ htaꞈ dawˇ law puiˉ ve, leh hkʼa peu˗eˬ htaꞈ yeunˇ hkanˍ puiˉ ve,’ Yeh˗miˆ ve awˬ lawn ngaˬ hui mawˬ tuˬ te laˇ ve yoˬ. (1 Kawˇrenˍhtuˆ 13:4, 7) Nyi bawˬ ve lehˬ ngaˬ hui nyi ma naˬ jaˇ tuˬ te laˇ ve htawˇ, haꞈ pehnˇ ve lehˬ kanˇ paˆ cawˬ jaˇ. Haꞈ pehnˇ ve lehˬ chaw yaˇ ve nyi ma htaꞈ pa piˇ gʼa ve yoˬ. Ngaˬ hui haꞈ pehnˇ ve caˉ leh cawˬ ve kʼo, Yaˬhoˉvaˬ ha lehˬ  tuˬ te piˇ ve yoˬ. Ngaˬ hui htaꞈ tawˍ laˇ ve chaw ngaˬ hui htaꞈ nyi bawˬ sheˍ ve htawˇ, ngaˬ hui ha lehˬ gʼa ve yoˬ. Hkʼaˬ hkʼe te hpehꞈ kʼai gʼa ve le?

18. Shu nyi bawˬ laˇ ve htawˇ aˬ htoꞈ ma te ngaˬ hui ha lehˬ gʼa ve le?

¹⁸ Yeˍsuˆ kʼoˆ ve, ‘shu nawˬ hui htaꞈ canˇ laˇ ve htawˇ awˬ bon uiˍ ve yoˬ.’ (Luˉkaꞈ 6:22) Shu ngaˬ hui htaꞈ maˇ nyi bawˬ tcuh gaˇ leh yonˍ ve htaꞈ pa taw, fawˉ mehˍ laˇ ve htaꞈ kaꞈ ngaˬ hui maˇ dawˇ cawˇ. Hkʼe kʼo, shu nyi bawˬ laˇ ve htawˇ, aˬ htoꞈ ma te ngaˬ hui ha lehˬ gʼa sheˍ ve le? 3 hkʼaˇ htaꞈ teˇ geh nyi sheˍ. (1) Ngaˬ hui yeunˇ hkanˍ ve kʼo, Yaˬhoˉvaˬ nyi hkʼaˇ suh tuˬ te piˇ ve. (1 Peˍtruˆ 4:13, 14) (2) Ngaˬ hui ve yonˍ hkʼaˇ uiˍ la mvuh la ve. (1 Peˍtruˆ 1:7) Leh, (3) ngaˬ hui laꞈ shawnˍ gʼa tuˬ ve lehˬ co co taiˍ taiˍ ve a shaꞈ yoˬ.—Roˉmaꞈ 2:6, 7.

19. Tcuh yaˇ hui shu jawꞈ piˇ ve htawˇ aˬ htoꞈ ma te ha lehˬ gʼa ve le?

¹⁹ Yeˍsuˆ kʼawꞈ teꞈ tuˬ la ve maˇ maw sheˍ htaˇ, Yeˍsuˆ kʼoˆ ve, ha lehˬ ve tcuhˉ kuiˬ aˬ htoꞈ ma htaꞈ kʼoˆ gaˇ ve yawˇ hui na gʼa la ve yoˬ. Yawˇ hui htaꞈ jawꞈ piˇ leh bon maˇ maˍ toˇ tcuh ve yoˬ. Yaꞈ hkʼaˇ, yawˇ hui ha lehˬ gʼa sheˍ. Aˬ htoꞈ ma te chi hkʼe hpehꞈ ve le? ‘Tcuh yaˇ hui lehˬ Yeˍsuˆ ve awˬ meh htaꞈ pa taw maˇ shawˍ maˇ caˆ te piˇ ve htaꞈ gʼa hkanˍ ve yoˬ.’ (Tcuh yaˇ 5:40-42) Yawˇ hui canˇ paˍ nyi bawˬ laˇ ve htaꞈ kawˆ ve aꞈ kehˉ Yeˍsuˆ htaꞈ haꞈ jaˇ. Yawˇ hui haꞈ pehnˇ ve chi htaꞈ pa taw, teˇ nyi le le bon maˍ ve maˇ jehˇ jaw. Chi beuꞈ teˇ co˗e ngaˬ hui ve awˬ viˉ awˬ nyi laiˉ gʼaˇ tuꞈ ve hkanˍ ve gʼa hpuˇ ve htawˇ, yawˇ hui ka tiꞈ yeˬ ve hkʼaw Gʼuiˬ sha ve kanˉ caˉ leh te ve yoˬ. Yawˇ hui Yaˬhoˉvaˬ ve kanˉ te ve leh, yawˇ ve awˬ meh htaꞈ haꞈ ve yawˇ maˇ leunˇ laˇ tehꞈ shiˍ ve yoˬ.—Heˍbrehˇ 6:10.

20. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁰ Miˬ guiˬ awˬ yanˇ maˇ leh sheˍ ve ceh ceh miˬ guiˬ yaˇ ngaˬ hui htaꞈ canˇ tuˬ yoˬ. (Yoˇhanˬ 15:19) Yaꞈ hkʼaˇ, ngaˬ hui taˇ kawˆ. Yaˬhoˉvaˬ yawˇ ve kanˉ te ve ka tiꞈ yeˬ ve chaw htaꞈ awˬ gʼaˇ piˇ leh ponˬ piˇ tuˬ yoˬ tehꞈ gʼuˇ suhˍ teˇ lawn hkʼaw ngaˬ hui henˇ tuˬ yoˬ. (2 Hteˇsaˍlawˇniˆ 3:3) Ngaˬ hui Yaˬhoˉvaˬ htaꞈ haꞈ ve, awˬ viˉ awˬ nyi htaꞈ haꞈ ve, leh canˇ paˍ htaꞈ caˉ leh haꞈ sheˍ. Beˆ maˍ laˇ hkawˇ chi htaꞈ ngaˬ hui gʼaꞈ te ve kʼo, ngaˬ hui teˇ moˍ tiˉ hpehꞈ leh yonˍ hkʼaˇ yonˍ yeˬ tuˬ yoˬ. Yaˬhoˉvaˬ awˬ meꞈ awˬ hponˇ gʼa tuˬ ngaˬ hui te piˇ tuˬ yoˬ. Haꞈ pehnˇ ve lehˬ nyi bawˬ ve aꞈ kehˉ kanˇ paˆ cawˬ jaˇ tehꞈ ngaˬ hui hpeuꞈ maw piˇ tuˬ yoˬ.