1. Yaˬhoˉvaˬ ve chaw shoꞈ shaꞈ ve aˬ htoꞈ ma gʼa hpuˇ ve le?

 Nawˬ shoꞈ shaꞈ ve gʼa hpuˇ chehˇ˗aw laˇ? Awˬ viˉ awˬ nyi teˇ hpaˍ nawˬ nyi ma luˬ tuˬ te laˇ ve yoˬ hehˉ. (Yaˍkoˆ 3:2) Nawˬ Shaˉhkiˆhkanˍ ve chaw hpehꞈ ve pa taw liꞈ henˇ kuiˬ, kanˉ te kuiˬ lo ve awˬ chawˇ, nawˬ htaꞈ kʼoˆ guiˇ gʼuiˬ guiˇ laˇ ve yoˬ. (1 Peˍtruˆ 4:3, 4) Nawˬ maˇ gʼa hpawnˬ daꞈ˗e tuˬ yehˬ kʼa hkʼaw ve chaw tawˍ laˇ ve, maˇ heˆ leh nawˬ ve yonˍ hkʼaˇ maˇ gʼa kʼoˆ tuˬ tawˍ laˇ ve yoˬ. (Maꞈhtehˍ 10:35, 36) Nawˬ shoꞈ shaꞈ ve gʼa hpuˇ chehˇ ve kʼo, awˬ gʼaˇ nuˇ leh Yaˬhoˉvaˬ ve kanˉ maˇ te gaˇ˗oˬ ve yoˬ. Yaꞈ hkʼaˇ, nawˬ shoꞈ shaꞈ ve aˬ htoꞈ ma gʼa hpuˇ ve htawˇ maˇ kʼoˆ, nawˬ shoꞈ shaꞈ ve htaꞈ gu gʼa tuˬ Yaˬhoˉvaˬ cuˇ yiˍ peꞈ laˇ leh nawˬ yeunˇ hkanˍ gʼaˇ tuˬ awˬ gʼaˇ peꞈ laˇ tuˬ yoˬ.

2. Roˉmaꞈ liꞈ 15:4 hkʼaw kʼoˆ taˍ ve hkʼe, Liꞈ hpu gʼaw ve ngaˬ hui htaꞈ hkʼaˬ hkʼe ga laˇ gʼa ve le?

² Yaˬhoˉvaˬ Pawˇluꞈ htaꞈ Roˉmaꞈ liꞈ 15:4 bvuhꞈ tcuh taˍ ve yoˬ. (Gʼaw sheˍ.) Chi teˇ tawn ngaˬ hui shiˍ tuˬ, aˬ htoꞈ ma te Yaˬhoˉvaˬ maˇ biˇ ve chaw yaˇ shoꞈ shaꞈ ve gʼa hpuˇ jaˇ ve Liꞈ hpu hkʼaw cawˬ tcuh ve le? Yawˇ chi hkʼe te ve lehˬ, ngaˬ hui yawˇ hui htaꞈ henˇ yuˬ tuˬ awˬ pon yoˬ. Awˬ lawn chi ve teˇ hpaˍ ngaˬ hui awˬ gʼaˇ gʼa leh dawˇ law kuiˬ cawˬ tuˬ ga laˇ ve yoˬ. Yaꞈ hkʼaˇ, Liꞈ hpu gʼaw ve ceh maˇ lawꞈ. Gʼaw taˍ ve awˬ ceuˬ ngaˬ hui nyi ma hkʼaw gaˬ leh te hkʼaˇ dawˇ hkʼaˇ pa tuˬ gʼa te cawˇ ve yoˬ. Ngaˬ hui gʼa hpuˇ chehˇ ve shoꞈ shaꞈ ve htaꞈ yeunˇ hkanˍ gʼaˇ tuˬ beˆ maˍ laˇ ve htaꞈ gʼa gaˇ ve yoˬ. Ngaˬ hui hkʼaˬ hkʼe te gʼa tuˬ le? 4 hkʼaˇ htaꞈ teˇ geh nyi sheˍ. (1) Bon lawˬ ve, (2) dawˇ mawˬ ve, (3) hkʼa dehꞈ dawˇ nyi ve leh (4) yuˬ yehˇ ve, chi ve teˇ hpaˍ ngaˬ hui teˇ hkʼaˇ leh teˇ hkʼaˇ hkʼaˬ hkʼe te gʼa ve teˇ geh nyi sheˍ. * Peuˬ leh jawˇ mawˇ Daˍviˆ leh tcuh  yaˇ Pawˇluꞈ ve awˬ lawn ngaˬ hui henˇ htaˇ awˬ hkʼaˇ 4 hkʼaˇ chi htaꞈ ngaˬ hui yuˬ yehˇ tuˬ yoˬ.

3. Liꞈ hpu maˇ gʼaw sheˍ htaˇ nawˬ aˬ htoꞈ ma te cawˇ ve le? Leh aˬ htoꞈ ma pa taw le?

³ (1) Bon lawˬ ve. Nawˬ Liꞈ hpu maˇ gʼaw sheˍ htaˇ, nawˬ gʼaw ve awˬ ceuˬ htaꞈ awˬ bon gʼa tuˬ nawˬ hkʼaˬ hkʼe gʼa te cawˇ ve Yaˬhoˉvaˬ ga laˇ tuˬ lawˬ sheˍ. Tawˇ pa haˉ te kʼo, nawˬ shoꞈ shaꞈ ve htaꞈ gu gʼa tuˬ beˆ maˍ laˇ hkawˇ gʼa gaˇ ve kʼo, awˬ lawn oˇ ve htaꞈ nawˬ cawˇ ve hkʼaw dawˇ cheˆ gʼa tuˬ, Liꞈ hpu hkʼaw ve awˬ liˇ awˬ hkʼaˇ htaꞈ mawˬ tuˬ, Yaˬhoˉvaˬ ga laˇ tuˬ lawˬ sheˍ.—Hpiˇliˇpiˆ 4:6, 7; Yaˍkoˆ 1:5.

4. Liꞈ hpu gʼaw ve htaꞈ nawˬ awˬ bon gʼa tuˬ hkʼaˬ hkʼe gʼa te cawˇ ve le?

⁴ (2) Dawˇ mawˬ ve. Ngaˬ hui dawˇ mawˬ ve cawˬ tuˬ Yaˬhoˉvaˬ peꞈ laˇ ve yoˬ. Chi ve lehˬ daꞈ jaˇ ve awˬ ceuˬ hpehꞈ ve yoˬ. Chi htaꞈ pa taw, Liꞈ hpu hkʼaw chaw teˇ gʼaˇ htaꞈ caˉ daꞈ ve awˬ lawn nawˬ gʼaw htaˇ nawˬ yawˇ hpehꞈ ve tehꞈ dawˇ mawˬ nyi sheˍ. Nawˬ awˬ paˇ awˬ kui aˬ htoꞈ ma cawˬ ve, nawˬ aˬ htoꞈ ma mawˬ ve leh hkʼaˬ hkʼe dawˇ ve htaꞈ dawˇ nyi sheˍ. Nawˬ chi hkʼe te ve kʼo, nawˬ Liꞈ hpu gʼaw ve htaꞈ awˬ bon maˇ maˇ gʼa tuˬ yoˬ.

5. Hkʼa dehꞈ dawˇ nyi ve aˬ htoꞈ ma htaꞈ kʼoˆ gaˇ ve le? Leh chi ve nawˬ hkʼaˬ hkʼe te gʼa tuˬ le?

⁵ (3) Hkʼa dehꞈ dawˇ nyi ve. Hkʼa dehꞈ dawˇ nyi ve tcuhˉ kuiˬ lehˬ nawˬ gʼaw ve awˬ ceuˬ htaꞈ nyi ma awˬ tawˬ hkʼa gaˬ dawˇ nyi ve yoˬ. Leh awˬ lawn oˇ ve nawˬ htaꞈ hkʼaˬ hkʼe te caˉ daꞈ ve dawˇ nyi ve yoˬ. Hkʼa dehꞈ dawˇ nyi ve lehˬ, laiˉ lawn hkʼaˬ hkʼe te hawˍ daꞈ gʼa ve nawˬ shiˍ tuˬ ga laˇ ve yoˬ. Leh gʼaw ve hkʼa dehꞈ na gʼa tuˬ maˇ dawˇ nyi ve kʼo, hpui lawˇ hkʼoˆ lo Cenˇshawˍ (jigsaw) hpu li pehˉ li te taˍ ve hkʼa shuˍ yoˬ. Yaꞈ hkʼaˇ, nawˬ hkʼa dehꞈ dawˇ nyi ve lehˬ Cenˇshawˍ teˇ maˬ leh teˇ maˬ yuˬ nehˉ daꞈ ve htaꞈ shuˍ ve yoˬ. Leh nawˬ awˬ han hkʼa peu˗eˬ gʼa mawˬ tuˬ yoˬ. ‘Ngaˬ gʼaw chehˇ ve chaw yawˇ shoꞈ shaꞈ ve hkʼaˬ hkʼe gu gʼa ve le? Yaˬhoˉvaˬ yawˇ htaꞈ hkʼaˬ hkʼe ga piˇ ve le? Chi ngaˬ htaꞈ hkʼaˬ hkʼe maˍ laˇ ve le? Chi ngaˬ shoꞈ shaꞈ ve gʼa hpuˇ chehˇ ve htaꞈ gu gʼa tuˬ hkʼaˬ hkʼe ga laˇ ve le?’ Hkʼa dehꞈ dawˇ nyi tuˬ, chi teˇ hpaˍ htaꞈ chaˬ nyi sheˍ.

6. Aˬ htoꞈ ma te ngaˬ hui henˇ taˍ ve awˬ ceuˬ htaꞈ yuˬ yehˇ cawˇ ve le?

⁶ (4) Yuˬ yehˇ ve. Yeˍsuˆ kʼoˆ ve ngaˬ hui henˇ taˍ ve awˬ ceuˬ htaꞈ maˇ yuˬ yehˇ ve kʼo, ngaˬ hui kaꞈ shehˇ shiˍ hkʼoˆ lo yehˬ te ve htaꞈ shuˍ ve yoˬ. Yawˇ kanˉ te hkeuꞈ jaˇ ve htawˇ awˬ bon maˇ cawˬ. Aˬ htoꞈ ma te chi hkʼe hpehꞈ ve le? Yehˬ oˇ ve mvuhˇ yeˬ mvuhˇ haw maˇ heˆ leh iˉ kaˆ htonˍ la htaˇ paˆ˗e tuˬ ve pa taw yoˬ. (Maꞈhtehˍ 7:24-27) Ngaˬ hui bon lawˬ ve, dawˇ mawˬ ve, leh hkʼa dehꞈ dawˇ nyi ve, henˇ taˍ ve awˬ ceuˬ htaꞈ maˇ yuˬ yehˇ ve kʼo, awˬ bon maˇ cawˬ. Tawˍ ve tsuhˇ ve ngaˬ hui gʼa hpuˇ htaˇ, ngaˬ hui ve yonˍ hkʼaˇ kaꞈ maˇ yonˍ yeˬ. Yaꞈ hkʼaˇ, ngaˬ hui henˇ leh yuˬ yehˇ ve kʼo, hkʼa dehꞈ dawˇ cheˆ gʼa ve, nyi ma sha ve, leh yonˍ hkʼaˇ kaꞈ yonˍ yeˬ jaˇ tuˬ yoˬ. (Iˉsaˍyaˆ 48:17, 18) Jawˇmawˇ Daˍviˆ ve awˬ lawn htaꞈ henˇ ve lehˬ, ngaˬ hui htaꞈ hkʼaˬ hkʼe maˍ laˇ gʼa ve chi teˇ hkui awˬ hkʼaˇ 4 hkʼaˇ htaꞈ teˇ geh nyi sheˍ.

7. Chi teˇ hkui ngaˬ hui a shu ve awˬ lawn htaꞈ henˇ tuˬ ve le?

⁷ Nawˬ awˬ chawˇ maˇ heˆ leh yehˬ kʼa hkʼaw ve chaw hpfuhˆ laˇ leh nyi ma luˬ jaw˗aw laˇ? Gʼa hpuˇ jaw ve kʼo, Daˍviˆ ve awˬ lawn nawˬ htaꞈ ga laˇ gʼa tuˬ yoˬ. Yawˇ ve yaˇ paˍ Aˍbaˆsaˍlonˍ yawˇ htaꞈ hpfuhˆ leh yawˇ ve aˉ yaˇ veh yuˬ ve yoˬ.—2 Saˍmo˗eˍlaˆ 15:5-14, 31; 18:6-14.

8. Yaˬhoˉvaˬ nawˬ htaꞈ ga laˇ tuˬ nawˬ hkʼaˬ hkʼe gʼa te cawˇ ve le?

⁸ (1) Bon lawˬ ve. Daˍviˆ ve awˬ lawn htaꞈ maˇ gʼaw sheˍ htaˇ, Yaˬhoˉvaˬ geh bon awˉ lawˉ lawˬ sheˍ. Nawˬ htaꞈ hpfuhˆ laˇ ve leh nyi ma luˬ tuˬ te laˇ htaˇ, hkʼaˬ hkʼe dawˇ ve Yaˬhoˉvaˬ htaꞈ kʼoˆ piˇ sheˍ. (Chiˇ mvuh ve 6:6-9) Nawˬ dawˇ ve awˬ ceuˬ hkʼa peu˗eˬ yawˇ htaꞈ kʼoˆ piˇ sheˍ.

9. Daˍviˆ leh Aˍbaˆsaˍlonˍ aˬ htoꞈ ma hpehꞈ la ve le?

⁹ (2) Dawˇ mawˬ ve. Oˇ ve teˇ yanˇ Daˍviˆ hkʼaˬ hkʼe dawˇ ve dawˇ mawˬ nyi sheˍ. Daˍviˆ ve yaˇ  Aˍbaˆsaˍlonˍ mvuhˇ miˬ yaˇ yawˇ htaꞈ dawˇ cawˇ laˇ tuˬ coˇ caˇ leh laiˉ hkʼawꞈ te ve yoˬ. (2 Saˍmo˗eˍlaˆ 15:7) Awˬ yanˇ gaˬ˗oˬ htaˇ, yawˇ ve chaw Iˉsaˍreˍlaˆ mvuhˇ miˬ teˇ kaˬ le le lo kʼai tcuh leh yawˇ jawˇ mawˇ hpehꞈ˗oˬ ve tehꞈ ca kʼoˆ piˇ tcuh ve yoˬ. Chi hkʼe ceh maˇ heˆ. Awˬ pa ve dawˇ hkʼaˇ piˇ paˍ leh awˬ chawˇ meuˆ daꞈ ja ve Aˍhiˆtawˇhpeˍlaˆ htaꞈ awˬ pa htaꞈ hpfuhˆ tuˬ jehˬ piˇ ve yoˬ. Aˍbaˆsaˍlonˍ yawˇ awˬ to jawˇ mawˇ te leh oˇ ve teˇ yanˇ Daˍviˆ naˬ jaˇ ve htawˇ, yawˇ Daˍviˆ htaꞈ tiˇ pehˍ gaˇ ve yoˬ. (Chiˇ mvuh ve 41:1-9) Yawˇ hui gu chehˇ ve awˬ hkʼaˇ htaꞈ Daˍviˆ shiˍ htaˇ, yawˇ Yeˍruˆsaˍlehnˍ venˇ lo laꞈ haˉ hpaw˗e ve yoˬ. Awˬ leh meuˇ htaˇ Aˍbaˆsaˍlonˍ ve maꞈ yaˇ Daˍviˆ ve maꞈ yaˇ htaꞈ ca bawˆ la ve yoˬ. Yaꞈ hkʼaˇ, Aˍbaˆsaˍlonˍ ve maꞈ moˍ maˇ gʼaˇ leh yawˇ kaꞈ maꞈ bawˆ kuiˬ lo suh˗e ve yoˬ.

10. Daˍviˆ hkʼaˬ hkʼe dawˇ ve hehˉ le?

¹⁰ Daˍviˆ awˬ lawn chi ve hkʼa peu˗eˬ gʼa hpuˇ htaˇ, hkʼaˬ hkʼe dawˇ ve chi teˇ hkui nawˬ dawˇ nyi sheˍ. Yawˇ Aˍbaˆsaˍlonˍ htaꞈ haꞈ leh Aˍhiˆtawˇhpeˍlaˆ htaꞈ yonˍ gʼa jaˇ ve htawˇ, yawˇ huiˉ maˬ Daˍviˆ htaꞈ hpfuhˆ leh tiˇ pehˍ gaˇ ve yoˬ. Chi Daˍviˆ nyi ma naˬ jaˇ. Yawˇ chi hkʼe gʼa hpuˇ htaˇ yawˇ ve awˬ chawˇ hkʼa peu˗eˬ Aˍbaˆsaˍlonˍ paˇ lo chehˇ kʼai˗oˬ ve tehꞈ yawˇ dawˇ ve yoˬ. Yawˇ teˇ gʼaˇ htaꞈ kaꞈ kʼawꞈ yonˍ maˇ gʼa˗oˬ. Daˍviˆ yawˇ awˬ pon tiˉ dawˇ nyi leh awˬ nu ve mvuhˇ miˬ lo yawˇ teˇ gʼaˇ tiˉ hpaw˗e gaˇ tuˬ te piˇ ve yoˬ hehˉ. Leh yawˇ teꞈ chiˉ maˇ te gaˇ leh suh˗e gaˇ tuˬ kaꞈ te piˇ ve yoˬ. Yaꞈ hkʼaˇ, Daˍviˆ chi hkʼe maˇ dawˇ. Yawˇ shoꞈ shaꞈ ve htaꞈ tawˍ daꞈ leh gʼaˇ ve yoˬ. Yawˇ chi hkʼe te gʼa tuˬ aˬ htoꞈ ma ga piˇ ve le?

11. Daˍviˆ shoꞈ shaꞈ ve gʼa hpuˇ jaˇ htaˇ hkʼaˬ hkʼe te ve le?

¹¹ (3) Hkʼa dehꞈ dawˇ nyi ve. Awˬ lawn chi nawˬ htaꞈ aˬ htoꞈ ma maˍ laˇ ve le? A shu yawˇ awˬ to htaꞈ na nyi cawˇ ve, “Daˍviˆ shoꞈ shaꞈ ve htaꞈ hkʼaˬ hkʼe gu ve le?” Daˍviˆ cheˆ˗ehꞈ kʼai leh teꞈ chiˉ maˇ te gʼa ve maˇ te leh yawˇ maˇ dawˇ nyi sheˍ htaˇ haˆ dawˇ cheˆ ve maˇ te. Yawˇ kawˆ jaˇ leh, dawˇ haˍ jaˇ leh, teꞈ chiˉ maˇ te gʼa ve maˇ heˆ. Yawˇ Yaˬhoˉvaˬ ga laˇ tuˬ bon lawˬ leh yawˇ ve awˬ chawˇ ga laˇ tuˬ lawˬ ve yoˬ. Leh yawˇ dawˇ cheˆ taˍ ve htaꞈ laꞈ haˉ gʼaꞈ te ve yoˬ. Yawˇ nyi ma luˬ jaˇ ve htawˇ, yawˇ beuꞈ leh awˬ nu ve chaw htaꞈ gʼaˇ maˇ va ve maˇ te. Yawˇ Yaˬhoˉvaˬ leh yawˇ ve awˬ chawˇ htaꞈ gʼaˇ va ve yoˬ.

12. Yaˬhoˉvaˬ Daˍviˆ htaꞈ hkʼaˬ hkʼe ga piˇ ve le?

¹² Yaˬhoˉvaˬ Daˍviˆ htaꞈ hkʼaˬ hkʼe ga piˇ ve le? Nawˬ hpfuhˆ nyi ve kʼo, Yaˬhoˉvaˬ Daˍviˆ htaꞈ awˬ gʼaˇ hkʼaˬ hkʼe piˇ ve le? Shoꞈ shaꞈ ve htaꞈ yeunˇ hkanˍ gʼaˇ ve ga piˇ ve nawˬ mawˬ tuˬ yoˬ. (Chiˇ mvuh ve 3:1-8) Leh Daˍviˆ dawˇ cheˆ ve htaꞈ kaꞈ Yaˬhoˉvaˬ awˬ bon naꞈ piˇ ve yoˬ. Chi hkʼoˆ kaꞈ, Daˍviˆ ve awˬ chawˇ ka tiꞈ yeˬ ve Daˍviˆ htaꞈ haꞈ shaˉ piˇ tuˬ bawˆ daꞈ htaˇ kaꞈ Yaˬhoˉvaˬ yawˇ hui htaꞈ awˬ gʼaˇ piˇ ve yoˬ.

13. Shu nawˬ nyi ma naˬ tuˬ te laˇ htaˇ Daˍviˆ ve awˬ lawn htaꞈ hkʼaˬ hkʼe henˇ yuˬ gʼa ve le? (Maꞈhtehˍ 18:15-17)

¹³ (4) Yuˬ yehˇ ve. A shu yawˇ awˬ to htaꞈ na nyi cawˇ ve, “ngaˬ hkʼaˬ hkʼe te Daˍviˆ htaꞈ henˇ yuˬ gʼa tuˬ le?” Nawˬ shoꞈ shaꞈ ve htaꞈ laꞈ haˉ gʼa gu ve yoˬ. Maꞈhtehˍ liꞈ 18 hkʼaw Yeˍsuˆ beˆ maˍ laˇ ve tawˇ hkawˇ htaꞈ nawˬ dawˇ nawˇ leh gʼaꞈ te tuˬ yoˬ hehˉ. Nawˬ hkʼaˬ hkʼe hpehꞈ chehˇ ve htawˇ, oˇ teˇ tawn hkʼaw ve awˬ liˇ awˬ hkʼaˇ htaꞈ yuˬ yehˇ sheˍ. (Maꞈhtehˍ 18:15-17 gʼaw sheˍ.) Nawˬ ve dawˇ hkʼaˇ htaꞈ yehˇ leh haˆ taˇ dawˇ cheˆ. Nawˬ shoꞈ shaꞈ ve htaꞈ gu gʼa tuˬ nyi ma gawˬ lehˍ cawˬ leh cuˇ yiˍ cawˬ tuˬ nawˬ Yaˬhoˉvaˬ ga laˇ tuˬ bon lawˬ sheˍ. Nawˬ ve awˬ chawˇ htaꞈ maˇ yonˍ gʼa ve taˇ te. Yawˇ hui ga laˇ ve htaꞈ haꞈ yuˬ sheˍ. (Tawˇ naˉ ve 17:17) Liꞈ hpu hkʼaw Yaˬhoˉvaˬ beˆ maˍ laˇ ve a yeˇ uiˍ jaˇ ve htaꞈ nawˬ gʼaꞈ te sheˍ.—Tawˇ naˉ ve 3:5, 6.

14. 2 Tiˆmoˉseˍ liꞈ 1:12-16; 4:6-11, 17-22 hkʼaw ve nawˬ awˬ gʼaˇ gʼa jaˇ ve hkʼaˬ ve teˇ tawn le?

¹⁴ Nawˬ yehˬ kʼa hkʼaw ve chaw tawˍ laˇ ve gʼa hpuˇ˗aw laˇ? Maˇ heˆ leh mvuhˇ miˬ hkʼaw Yaˬhoˉvaˬ ve Shaˉhkiˆhkanˍ ve chaw yawˇ htaꞈ oˉ kʼoˍ maˇ gʼa pui ve maˇ heˆ leh yawˇ ve kanˉ hkʼa dehꞈ te maˇ gʼa ve mvuhˇ miˬ lo nawˬ chehˇ˗aw laˇ? Chi hkʼe hpehꞈ  ve kʼo 2 Tiˆmoˉseˍ 1:12-16; 4:6-11, 17-22  * hkʼaw nawˬ gʼaw htaˇ, nawˬ awˬ gʼaˇ gʼa jaˇ tuˬ yoˬ. Liꞈ hpu awˬ tawn chi ve teˇ hpaˍ Pawˇluꞈ yawˇ htawnˍ hkʼaw lo chehˇ htaˇ bvuhꞈ taˍ ve yoˬ.

15. Yaˬhoˉvaˬ nawˬ htaꞈ ga laˇ tuˬ nawˬ hkʼaˬ hkʼe gʼa te cawˇ ve le?

¹⁵ (1) Bon lawˬ ve. Nawˬ Liꞈ hpu maˇ gʼaw sheˍ htaˇ, nawˬ shoꞈ shaꞈ ve aˬ htoꞈ ma gʼa hpuˇ chehˇ ve le? Nawˬ dawˇ haˍ ve Yaˬhoˉvaˬ htaꞈ kʼoˆ piˇ sheˍ. Nawˬ gʼa hpuˇ chehˇ ve leh nyi ma hkʼaw cawˬ ve Gʼuiˬ sha htaꞈ kʼoˆ piˇ sheˍ. Pawˇluꞈ shoꞈ shaꞈ ve gʼa hpuˇ htaˇ ve awˬ lawn nawˬ mawˬ tuˬ Yaˬhoˉvaˬ ga laˇ tcuh sheˍ. Leh nawˬ shoꞈ shaꞈ ve gʼa hpuˇ ve htaꞈ hkʼaˬ hkʼe te gu gʼa tuˬ awˬ hkʼaˇ shiˍ tuˬ kaꞈ ga laˇ tcuh sheˍ.

16. Pawˇluꞈ aˬ htoꞈ ma gʼa hpuˇ ve le?

¹⁶ (2) Dawˇ mawˬ ve. Pawˇluꞈ Roˉmaꞈ ve htawnˍ hkʼaw lo chehˇ leh sho caˆ keu taˍ ve htaꞈ nawˬ Pawˇluꞈ hpehꞈ ve tehꞈ dawˇ nyi sheˍ. Yawˇ htawnˍ hkʼaw lo laiˉ pawˆ gʼa chehˇ leh chi teˇ pawˆ lehˬ yawˇ htaꞈ tiˇ pehˍ laˇ tuˬ yoˬ tehꞈ shiˍ ve yoˬ. Yaꞈ hkʼaˇ, chi hkʼe ceh maˇ heˆ. Yawˇ ve awˬ chawˇ teˇ hpaˍ yawˇ htaꞈ baˬ taˉ piˇ ve yoˬ. Chi teˇ hkui yawˇ teꞈ chiˉ kaꞈ maˇ leuˉ˗o.—2 Tiˆmoˉseˍ 1:15.

17. Pawˇluꞈ hkʼaˬ hkʼe dawˇ ve le?

¹⁷ Pawˇluꞈ gʼa hpuˇ ve awˬ lawn lehˬ, yawˇ oˇ htaˇ ve htaꞈ dawˇ nawˇ tuˬ te piˇ ve yoˬ hehˉ. Yawˇ Hkriꞈ yaˇ maˇ hpehꞈ la ve kʼo, chi hkʼe maˇ gʼa hpuˇ taˍ tehꞈ dawˇ puiˉ ve yoˬ. Aˍshaˆ miˬ guiˬ lo ve yawˇ htaꞈ baˬ taˉ piˇ ve lehˬ, beuꞈ tuˬ leh nyi ma luˬ tuˬ te piˇ ve yoˬ. Awˬ chawˇ htaꞈ kaꞈ gʼaˇ maˇ va gʼa tuˬ te piˇ ve yoˬ. Yaꞈ hkʼaˇ, Pawˇluꞈ chi hkʼe maˇ te. Pawˇluꞈ yawˇ ve awˬ chawˇ yawˇ htaꞈ ka tiꞈ yeˬ sheˍ leh Yaˬhoˉvaˬ yawˇ htaꞈ awˬ bon naꞈ piˇ ve tehꞈ yonˍ gʼa ve yoˬ. Aˬ htoꞈ ma te yawˇ chi hkʼe yonˍ gʼa ve le?

18. Pawˇluꞈ shoꞈ shaꞈ ve htaꞈ hkʼaˬ hkʼe gu ve le?

¹⁸ (3) Hkʼa dehꞈ dawˇ nyi ve. A shu yawˇ awˬ to htaꞈ na nyi cawˇ ve, “Pawˇluꞈ shoꞈ shaꞈ ve htaꞈ hkʼaˬ hkʼe gu ve le?” Maˇ maw ve awˬ yanˇ yawˇ gʼa suh tuˬ yoˬ tehꞈ Pawˇluꞈ shiˍ ve htawˇ, yawˇ awˬ pon a yeˇ uiˍ jaˇ ve lehˬ Yaˬhoˉvaˬ awˬ meꞈ awˬ hponˇ gʼa tuˬ te ve yoˬ. Awˬ hkʼoˆ kaꞈ, yawˇ awˬ nu ve chaw htaꞈ awˬ gʼaˇ piˇ tuˬ ve kaꞈ dawˇ nyi ve yoˬ. Yawˇ hkʼaˬ htaˆ kaꞈ Yaˬhoˉvaˬ geh bon lawˬ leh gʼaˇ va ve yoˬ. (2 Tiˆmoˉseˍ 1:3) Awˬ viˉ awˬ nyi oˇ ve teˇ hpaˍ yawˇ htaꞈ baˬ taˉ laˇ ve htaꞈ dawˇ nyi ve aꞈ kehˉ, awˬ chawˇ teˇ hpaˍ yawˇ htaꞈ ka tiꞈ yeˬ sheˍ leh ga laˇ chehˇ sheˍ ve htaꞈ awˬ bon uiˍ jaˇ tehꞈ kʼoˆ piˇ ve yoˬ. Chi hkʼe ceh maˇ heˆ. Pawˇluꞈ hkʼaˬ htaˆ kaꞈ Liꞈ hpu henˇ ve yoˬ. (2 Tiˆmoˉseˍ 3:16, 17; 4:13) A yeˇ uiˍ jaˇ ve lehˬ Yaˬhoˉvaˬ leh Yeˍsuˆ yawˇ htaꞈ haꞈ leh baˬ taˉ laˇ tuˬ ve awˬ nyi maˇ cawˬ tehꞈ yonˍ gʼa ve yoˬ. Yawˇ ka tiꞈ yeˬ ve hkʼaw Gʼuiˬ sha ve kanˉ te ve htaꞈ awˬ bon naꞈ piˇ ve yoˬ.

19. Yaˬhoˉvaˬ Pawˇluꞈ htaꞈ hkʼaˬ hkʼe ga piˇ ve le?

¹⁹ Pawˇluꞈ Hkriꞈ yaˇ hpehꞈ ve htaꞈ pa taw, fawˉ mehˍ ve htaꞈ gʼa hpuˇ tuˬ yoˬ tehꞈ Yaˬhoˉvaˬ kʼoˆ piˇ˗oˬ ve yoˬ. (Tcuh yaˇ 21:11-13) Leh Yaˬhoˉvaˬ Pawˇluꞈ htaꞈ hkʼaˬ hkʼe ga piˇ ve le? Gʼuiˬ sha Pawˇluꞈ ve bon lawˬ hkawˇ htaꞈ hkʼawꞈ piˇ leh yawˇ htaꞈ laiˉ pawˆ awˬ gʼaˇ piˇ ve yoˬ. (2 Tiˆmoˉseˍ 4:17) Yawˇ Gʼuiˬ sha ve kanˉ kaiˬ ve hkʼaw te ve htaꞈ pa taw, laꞈ shawnˍ gʼa tuˬ yoˬ tehꞈ Gʼuiˬ sha htawˆ hkanˍ piˇ taˍ ve yoˬ. Pawˇluꞈ ve awˬ chawˇ ka tiꞈ yeˬ ve Pawˇluꞈ htaꞈ ga piˇ tuˬ kaꞈ Yaˬhoˉvaˬ yehˇ ve yoˬ.

20. Roˉmaꞈ liꞈ 8:38, 39 hkʼaw kʼoˆ taˍ ve hkʼe, Pawˇluꞈ ve yonˍ hkʼaˇ htaꞈ ngaˬ hui hkʼaˬ hkʼe te henˇ yuˬ gʼa tuˬ le?

²⁰ (4) Yuˬ yehˇ ve. A shu yawˇ awˬ to htaꞈ na nyi cawˇ ve, “ngaˬ Pawˇluꞈ htaꞈ hkʼaˬ hkʼe te henˇ yuˬ gʼa tuˬ le?” Ngaˬ hui Yaˬhoˉvaˬ ve kanˉ te ve htaꞈ pa taw, Pawˇluꞈ hkʼa shuˍ fawˉ ve mehˍ ve gʼa hpuˇ tuˬ yoˬ tehꞈ dawˇ teh taˍ gʼa ve yoˬ. (Maˍkuˆ 10:29, 30) Ngaˬ hui shoꞈ shaꞈ ve maˇ heˆ leh fawˉ mehˍ ve gʼa hpuˇ htaˇ ngaˬ hui ka tiꞈ yeˬ gʼa tuˬ bon lawˬ ve hkʼaw Yaˬhoˉvaˬ htaꞈ gʼaˇ va leh hkʼaˬ htaˆ kaꞈ a shu yawˇ hkʼaˇ yawˇ Liꞈ hpu henˇ ve yoˬ. Ngaˬ hui te gʼa ve a yeˇ uiˍ jaˇ ve teˇ ceuˬ lehˬ Yaˬhoˉvaˬ awˬ meꞈ awˬ hponˇ cawˬ tuˬ te gʼa ve tehꞈ ngaˬ hui tawnˇ taˍ cawˇ ve yoˬ. Yaˬhoˉvaˬ ngaˬ hui htaꞈ baˬ taˉ laˇ tuˬ ve, awˬ nyi maˇ cawˬ tehꞈ ngaˬ hui yonˍ  gʼa ve yoˬ. Gʼuiˬ sha ngaˬ hui htaꞈ maˇ haꞈ laˇ gʼa tuˬ teˇ gʼaˇ˗ehˬ kaꞈ tawˍ piˇ maˇ gʼa.—Roˉmaꞈ 8:38, 39 gʼaw sheˍ; Heˍbrehˇ 13:5, 6.

21. A˗ya leh Heh˗taw shoꞈ shaꞈ ve htaꞈ gu gʼa tuˬ aˬ htoꞈ ma ga piˇ ve le?

²¹ Ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ, Liꞈ hpu hkʼaw ve awˬ lawn ngaˬ hui htaꞈ ga laˇ gʼa ve yoˬ. Jaˍpanˍ mvuhˇ miˬ lo gʼuˇ suhˍ peuˍ ve chaw A˗ya, chaw guiˇ kuiˬ lo hto toˇ tuˬ ve htaꞈ kawˆ jaˇ. Yaꞈ hkʼaˇ, yawˇ kʼoˆ ve, Yoˇnaˆ ve awˬ lawn yawˇ kawˆ ve htaꞈ gʼaˇ tuˬ ga laˇ ve yoˬ. In˗do˗neh˗si˗a mvuhˇ miˬ hkʼaw ve Heh˗taw Ruˉhtaˆ ve awˬ lawn htaꞈ awˬ gʼaˇ gʼa jaˇ. Yawˇ ve awˬ pa awˬ e Shaˉhkiˆhkanˍ ve chaw maˇ hpehꞈ ve htawˇ, Ruˉhtaˆ ve awˬ lawn yawˇ Yaˬhoˉvaˬ htaꞈ shiˍ leh kanˉ te gʼa tuˬ te laˇ ve yoˬ.

22. Liꞈ hpu hkʼaw ve awˬ han leh laiˉ tawn cawˬ ve “yawˇ hui yonˍ ve htaꞈ henˇ yuˬ sheˍ” chi ve teˇ hpaˍ htaꞈ nawˬ awˬ bon gʼa gaˇ ve kʼo, hkʼaˬ hkʼe gʼa te cawˇ ve le?

²² Liꞈ hpu hkʼaw ve awˬ lawn nawˬ awˬ gʼaˇ gʼa gaˇ ve kʼo, ngaˬ hui hkʼaˬ kaˬ lo ca gʼa tuˬ le? VDO, Liꞈ hpu gʼaw ve awˬ hkawˇ tawˆ ve awˬ han, “Yawˇ hui yonˍ ve htaꞈ henˇ yuˬ sheˍ” laiˉ tawn cawˬ ve htaꞈ gʼaw sheˍ. * Chi ve teˇ hpaˍ maˇ te sheˍ htaˇ, nawˬ a shaꞈ teꞈ kuiˬ hkʼaw yuˬ yehˇ tuˬ ve awˬ lawn teˇ hpaˍ htaꞈ mawˬ tuˬ, Yaˬhoˉvaˬ ga laˇ tuˬ bon lawˬ sheˍ. Liꞈ hpu hkʼaw chaw oˇ teˇ gʼaˇ nawˬ hpehꞈ ve tehꞈ dawˇ mawˬ nyi sheˍ. Gʼuiˬ sha ve kanˉ ka tiꞈ yeˬ ve hkʼaw te ve chaw aˬ htoꞈ ma te ve leh Yaˬhoˉvaˬ yawˇ hui htaꞈ hkʼaˬ hkʼe ga piˇ ve hkʼa dehꞈ dawˇ nyi sheˍ. Leh chi ve teˇ hpaˍ nawˬ yuˬ yehˇ leh chaw chi teˇ hpaˍ htaꞈ Yaˬhoˉvaˬ ga piˇ ve awˬ bon uiˍ jaˇ tehꞈ kʼoˆ piˇ sheˍ. Chi hkʼoˆ kaꞈ, nawˬ shu htaꞈ awˬ hpfuhˇ shiˍ ve tehꞈ hpeuꞈ maw piˇ sheˍ.

23. Iˉsaˍyaˆ liꞈ 41:10, 13 hkʼaw Yaˬhoˉvaˬ aˬ htoꞈ ma te tuˬ ka tiꞈ te taˍ laˇ ve le?

²³ Saˍtanˍ uˉ peunˍ ve miˬ guiˬ hkʼoˆ a shaꞈ teꞈ chehˇ ve sha ve maˇ heˆ. Leh teˇ pawˆ pawˆ ngaˬ hui hkʼaˬ hkʼe dawˇ cheˆ tuˬ naˍ kaꞈ maˇ shiˍ. (2 Tiˆmoˉseˍ 3:1) Yaꞈ hkʼaˇ, ngaˬ hui maˇ kawˆ leh maˇ dawˇ haˍ cawˇ. Ngaˬ hui aˬ htoꞈ ma gʼa hpuˇ ve Yaˬhoˉvaˬ shiˍ ve yoˬ. Nawˬ hui paiˍ ve kʼo, Gʼuiˬ sha yawˇ ve laꞈ sheh laꞈ sha paˉ htaꞈ yehˇ leh nawˬ hui htaꞈ gʼawˬ tu laˇ tuˬ yoˬ tehꞈ yawˇ ka tiꞈ te taˍ laˇ ve yoˬ. (Iˉsaˍyaˆ 41:10, 13 gʼaw sheˍ.) Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ yonˍ gʼa ve yoˬ. Ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve hkʼaˬ hkʼe ve htawˇ maˇ kʼoˆ, Liꞈ hpu hkʼaw ve awˬ lawn ngaˬ hui htaꞈ awˬ gʼaˇ peꞈ laˇ ve yoˬ.