1-2. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ gʼa tuˬ a shu ga piˇ gʼa ve le?

 Fiˬjiˬ mvuhˇ miˬ lo ve Eh˗miˇ kʼoˆ ve, “ngaˬ gʼa henˇ ve awˬ ceuˬ htaꞈ dawˇ cawˇ jaˇ leh chi lehˬ awˬ tehˬ hpehꞈ ve tehꞈ shiˍ ve yoˬ. Yaꞈ hkʼaˇ, ngaˬ awˬ viˉ awˬ nyi geh awˬ chawˇ te htaˇ, ngaˬ ve dawˇ hkʼaˇ pa gʼa ve yoˬ. Ngaˬ uiˍ la mvuh la leh Baˆtiˆsaˬ haꞈ yuˬ gʼa ve yoˬ.” Eh˗miˇ ve awˬ lawn a yeˇ uiˍ jaˇ ve ngaˬ hui teˇ ceuˬ gʼa henˇ ve lehˬ, awˬ viˉ awˬ nyi Liꞈ hpu henˇ ve chaw htaꞈ ga piˇ ve kʼo, yawˇ uiˍ la mvuh la leh Baˆtiˆsaˬ haꞈ yuˬ gʼa tuˬ yoˬ.

² Awˬ viˉ awˬ nyi teˇ gʼaˇ le le Hkriꞈ yaˇ awˬ moˍ uiˍ la mvuh la tuˬ ga piˇ gʼa ve yoˬ. (Eˇfeˇsuꞈ 4:16) Veˬnuˆa˗tuˬ mvuhˇ miˬ lo gʼuˇ suhˍ peuˍ ve Lin˗la˗ni kʼoˆ ve, “Aˍfaˍriˆkaˆ miˬ guiˬ lo chaw mawˇ hkawˇ cawˬ ve yoˬ. ‘Yaˇ teˇ gʼaˇ uiˍ la htaˇ gaˬ kʼo, teˇ hkʼaˆ hkʼaw ve chaw gʼa ga daꞈ ve yoˬ.’ Chi ve hkʼa shuˍ shuˍ chaw teˇ gʼaˇ awˬ viˉ awˬ nyi hpehꞈ la gʼa tuˬ, Hkriꞈ yaˇ awˬ moˍ hkʼaw ve chaw teˇ gʼaˇ le le gʼa ga daꞈ ve yoˬ.” Awˬ pa awˬ e, awˬ viˉ awˬ nyi, liꞈ maˍ paˍ saˍ laꞈ, leh awˬ nu ve chaw yaˇ teˇ gʼaˇ uiˍ la htaˇ gaˬ kʼo, yawˇ htaꞈ maˍ piˇ leh awˬ gʼaˇ kaꞈ gʼa piˇ ve yoˬ. Hkriꞈ yaˇ awˬ moˍ hkʼaw ve chaw kaꞈ beˆ maˍ piˇ gʼa ve, awˬ gʼaˇ piˇ gʼa ve, Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ gʼa tuˬ awˬ viˉ awˬ nyi te hkʼaˇ dawˇ hkʼaˇ daꞈ ve gʼa te maˍ piˇ ve yoˬ.—Tawˇ naˉ ve 15:22.

3. A˗na, Do˗lin, leh Lin˗la˗ni kʼoˆ ve tawˇ hkawˇ nawˬ htaꞈ aˬ htoꞈ ma maˍ laˇ ve le?

³ Aˬ htoꞈ ma te Liꞈ hpu henˇ ve chaw cawˬ ve chaw lehˬ, awˬ viˉ awˬ nyi htaꞈ ga laˇ tcuh cawˇ ve le? Monˍdoˬvaˬ mvuhˇ miˬ lo tcuh peu ve gʼuˇ suhˍ peuˍ ve A˗na kʼoˆ ve htaꞈ teˇ geh chaˬ nyi sheˍ. Yawˇ kʼoˆ ve, “Liꞈ hpu henˇ ve chaw uiˍ la mvuh la ve lehˬ laiˉ ceuˬ gʼa ga piˇ ve yoˬ. Liꞈ hpu maˍ ve chaw teˇ gʼaˇ tiˉ ga piˇ ve kʼo, heuˬ jaˇ tuˬ yoˬ.” Teˇ  mvuhˇ miˬ hkʼaw tiˉ chehˇ ve tcuh peu ve gʼuˇ suhˍ peuˍ ve te chehˇ ve Do˗lin kʼoˆ ve, “laiˉ pawˆ kʼo, awˬ viˉ awˬ nyi kaꞈ Liꞈ hpu henˇ ve chaw dawˇ cawˇ tuˬ tawˇ yaw piˇ ve yoˬ. Yawˇ hui ngaˬ dawˇ maˇ gaˬ ve awˬ ceuˬ tawˇ yaw piˇ ve yoˬ.” Lin˗la˗ni awˬ nu ve teˇ hkʼaˇ kʼawꞈ kʼoˆ ve, “awˬ viˉ awˬ nyi yawˇ htaꞈ haꞈ laˇ leh dawˇ haˍ laˇ ve tehꞈ Liꞈ hpu henˇ ve chaw gʼa mawˬ ve yoˬ. Ngaˬ hui Yaˬhoˉvaˬ ve chaw hpehꞈ ve tehꞈ chi Liꞈ hpu henˇ ve chaw yonˍ gʼa tuˬ te piˇ ve yoˬ.”—Yoˇhanˬ 13:35.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Nawˬ htawˇ dawˇ nawˬ dawˇ cawˬ ve, ‘ngaˬ Liꞈ hpu maˍ ve chaw maˇ hpehꞈ ve kʼo, Liꞈ hpu henˇ ve chaw htaꞈ hkʼaˬ hkʼe te ga piˇ gʼa tuˬ le?’ Awˬ viˉ awˬ nyi geh teˇ geh ngaˬ hui Liꞈ hpu ca maˍ˗e htaˇ, hkʼaˬ hkʼe te gʼa ve htaꞈ teˇ geh nyi sheˍ. Liꞈ hpu henˇ ve chaw hpawnˬ daꞈ kuiˬ lo laˬ htaˇ, ngaˬ hui hkʼaˬ hkʼe ga piˇ gʼa tuˬ le? Chi hkʼoˆ kaꞈ, nyi haꞈ shaˉ paˍ Liꞈ hpu henˇ ve chaw htaꞈ uiˍ la mvuh la leh Baˆtiˆsaˬ haꞈ yuˬ gʼa tuˬ hkʼaˬ hkʼe ga piˇ gʼa tuˬ teˇ geh henˇ tuˬ yoˬ.

5. Awˬ viˉ awˬ nyi geh teˇ geh nawˬ Liꞈ hpu ca maˍ˗e htaˇ, aˬ htoꞈ ma awˬ vuiˬ cawˬ ve le?

⁵ Liꞈ hpu henˇ ve chaw Liꞈ hpu hkʼaw hkʼa dehꞈ na gʼa tuˬ ga piˇ ve lehˬ, Liꞈ hpu maˍ ve chaw ve awˬ vuiˬ hpehꞈ ve yoˬ. Yaꞈ hkʼaˇ, Liꞈ hpu maˍ ve chaw Liꞈ hpu teˇ geh ca maˍ˗e tuˬ nawˬ htaꞈ jehˬ laˇ ve kʼo, nawˬ kaꞈ yawˇ htaꞈ ga piˇ leh awˬ gʼaˇ piˇ tuˬ awˬ vuiˬ cawˬ ve yoˬ. (Cuˇ yiˍ piˇ ve 4:9, 10) Nawˬ awˬ viˉ awˬ nyi geh teˇ geh Liꞈ hpu ca maˍ˗e htaˇ, hkʼaˬ hkʼe te tuˬ le?

6. Nawˬ awˬ viˉ awˬ nyi geh teˇ geh Liꞈ hpu ca maˍ˗e htaˇ, Tawˇ naˉ ve liꞈ 20:18 hkʼaw ve awˬ liˇ awˬ hkʼaˇ htaꞈ hkʼaˬ hkʼe gʼaꞈ te gʼa tuˬ le?

⁶ Liꞈ hpu maˇ maˍ˗e sheˍ htaˇ gu sheˍ. Liꞈ hpu maˍ ve chaw yawˇ geh Liꞈ hpu henˇ chehˇ ve chaw htaꞈ caˉ daꞈ ve awˬ lawn nawˬ na piˇ sheˍ. (Tawˇ naˉ ve 20:18 gʼaw sheˍ.) Liꞈ hpu henˇ ve chaw htaꞈ caˉ daꞈ ve teˇ hpaˍ yawˇ aˬ htoꞈ ma htaꞈ yonˍ ve, a shaꞈ hkʼaˬ nyiˇ hkʼawꞈ gaˬ ve, yawˇ ve yehˬ kʼa hkʼaˬ hkʼe hpehꞈ ve na piˇ sheˍ. Chi hkʼoˆ kaꞈ, nawˬ Liꞈ hpu maˍ ve chaw htaꞈ na piˇ ve, “chi teˇ hkui aˬ htoꞈ ma ve awˬ lawn henˇ chehˇ ve le? Chi teˇ pawˆ Liꞈ hpu maˍ ve hkʼaˬ ve teˇ tawn htaꞈ a yeˇ yuˬ gaˇ ve le? Shaˍ tiꞈ te cawˇ ve, tawˇ maˇ yaw cawˇ ve aˬ htoꞈ ma cawˬ ve le? Liꞈ hpu henˇ ve chaw uiˍ la mvuh la gʼa tuˬ ngaˬ ga piˇ gʼa ve aˬ htoꞈ ma cawˬ ve le?” Liꞈ hpu henˇ ve chaw ve awˬ lawn maˇ shiˍ keunˍ ve Liꞈ hpu maˍ ve chaw nawˬ htaꞈ maˇ kʼoˆ laˇ ve yoˬ. Yaꞈ hkʼaˇ, yawˇ kʼoˆ laˇ ve awˬ ceuˬ lehˬ awˬ bon cawˬ ve yoˬ. Miˍshenˍnaˍliˍ Con kaꞈ yawˇ teˇ geh Liꞈ hpu ca maˍ˗e tuˬ jehˬ piˇ ve chaw htaꞈ chi hkʼe yaw daꞈ jaw ve yoˬ. Yawˇ kʼoˆ ve, “ngaˬ awˬ viˉ awˬ nyi htaꞈ chi hkʼe yaw daꞈ htaˇ, yawˇ ngaˬ geh Liꞈ hpu henˇ ve chaw htaꞈ ga piˇ gaˇ ve yoˬ. Leh Liꞈ hpu maˍ piˇ htaˇ kaꞈ yawˇ aˬ htoꞈ ma yaw piˇ cawˇ ve shiˍ ve yoˬ.”

7. Nawˬ awˬ viˉ awˬ nyi geh teˇ geh Liꞈ hpu ca maˍ˗e htaˇ aˬ htoꞈ ma te awˉ lawˉ gu cawˇ ve le?

⁷ Awˬ viˉ awˬ nyi nawˬ htaꞈ jehˬ laˇ leh teˇ geh Liꞈ hpu ca maˍ˗e htaˇ, yawˇ geh teˇ geh Liꞈ hpu maˇ maˍ˗e sheˍ htaˇ nawˬ kaꞈ awˉ lawˉ gu cawˇ ve yoˬ. (Eˇzaˍraˆ 7:10) Chi awˬ gʼuˇ suhˍ htaˇ kʼoˆ kʼai peuˬ ve Do˗lin kʼoˆ ve, “ngaˬ geh teˇ geh Liꞈ hpu maˍ˗e ve chaw awˉ lawˉ gu laˬ htaˇ ngaˬ ha lehˬ jaˇ. Yawˇ  tawˇ yaw ve awˬ ceuˬ Liꞈ hpu henˇ ve chaw awˬ pon awˬ bon cawˬ jaˇ.” Chi hkʼoˆ kaꞈ, nawˬ huiˉ maˬ nyiˇ gʼaˇ hkʼa dehꞈ gu ve, Liꞈ hpu henˇ ve chaw chaˬ nyi mawˬ tuˬ yoˬ. Chi yawˇ nawˬ htaꞈ henˇ yuˬ gaˇ tuˬ yoˬ. Nawˬ hkʼa dehꞈ gu tuˬ awˬ yanˇ maˇ cawˬ ve htawˇ, aˬ htoꞈ ma a yeˇ uiˍ ve htaꞈ nawˬ awˉ lawˉ nyi ve kaꞈ daꞈ ve yoˬ.

8. Nawˬ ve bon lawˬ hkawˇ Liꞈ hpu henˇ ve chaw awˬ pon awˬ bon gʼa tuˬ nawˬ aˬ htoꞈ ma te cawˇ ve le?

⁸ Liꞈ hpu maˍ htaˇ awˉ lawˉ bon lawˬ ve lehˬ a yeˇ uiˍ jaˇ. Awˬ viˉ awˬ nyi nawˬ bon lawˬ tuˬ lawˬ laˇ ve kʼo, nawˬ awˉ lawˉ dawˇ nyi˗oˬ ve yoˬ hehˉ. Nawˬ chi hkʼe te ve kʼo, Liꞈ hpu henˇ ve chaw awˬ pon awˬ bon cawˬ jaˇ tuˬ yoˬ. (Chiˇ mvuh ve 141:2) Jaˍpanˍ mvuhˇ miˬ lo chehˇ ve Ha˗na˗e yawˇ geh Liꞈ hpu maˍ laˇ ve chaw geh laˬ ve awˬ viˉ awˬ nyi ve bon lawˬ hkawˇ htaꞈ tawnˇ gʼa sheˍ ve yoˬ. Yawˇ kʼoˆ ve, “yawˇ ve bon lawˬ hkawˇ ngaˬ gʼa kaˇ htaˇ, yawˇ Yaˬhoˉvaˬ geh meuˆ daꞈ jaˇ ve tehꞈ ngaˬ shiˍ ve yoˬ. Leh ngaˬ kaꞈ yawˇ hkʼe hpehꞈ gaˇ ve yoˬ. Yawˇ bon lawˬ htaˇ ngaˬ ve awˬ meh kaꞈ kʼoˆ ve yoˬ. Yawˇ ngaˬ htaꞈ haꞈ jaˇ ve tehꞈ ngaˬ shiˍ tuˬ te laˇ ve yoˬ.”

9. Yaˍkoˆ liꞈ 1:19 hkʼaw kʼoˆ taˍ ve hkʼe, nawˬ Liꞈ hpu maˍ ve chaw htaꞈ hkʼaˬ hkʼe ga piˇ gʼa tuˬ le?

⁹ Liꞈ hpu maˍ ve chaw htaꞈ ga piˇ sheˍ. Nai˗jeˇri˗aˇ mvuhˇ miˬ lo tcuh pui ve gʼuˇ suhˍ peuˍ ve O˗ma˗moˆ˗yo˗viˇ kʼoˆ ve, “Liꞈ hpu maˍ chehˇ htaˇ teˇ geh kʼai ve chaw hkʼa dehꞈ na ve kʼo, ga laˇ gʼa jaˇ. Liꞈ hpu henˇ ve chaw htaꞈ maˍ piˇ ve awˬ vuiˬ lehˬ, Liꞈ hpu maˍ ve chaw hpehꞈ ve tehꞈ yawˇ shiˍ ve yoˬ.” Nawˬ hkʼaˬ hkʼe yaw cawˇ ve, hkʼaˬ htaˆ yaw cawˇ ve, shiˍ gʼa tuˬ ve le? (Tawˇ naˉ ve 25:11) Liꞈ hpu maˍ chehˇ htaˇ nawˬ hkʼa dehꞈ na taˍ sheˍ. Chi hkʼe te ve kʼo, nawˬ tawˇ hkʼaˬ hkʼe htaˇ yaw cawˇ ve shiˍ la tuˬ yoˬ. (Yaˍkoˆ 1:19 gʼaw sheˍ.) Nawˬ tawˇ maˇ yaw sheˍ htaˇ gʼa dawˇ nyi ve yoˬ. Tawˇ pa haˉ te kʼo, nawˬ tawˇ chi ma maˇ yaw, Liꞈ hpu maˍ ve chaw kʼoˆ maˍ piˇ chehˇ htaˇ nawˬ tawˇ maˇ yaw keu, leh awˬ nu ve awˬ lawn yaw daꞈ tuˬ maˇ jehˬ piˇ cawˇ. Yawˇ hui yaw daꞈ chehˇ ve hkʼa dehꞈ na gʼa tuˬ nawˬ tawˇ pa haˉ maˇ heˆ leh na hkawˇ chi suhˉ˗ehˍ na piˇ gʼa ve yoˬ. Liꞈ hpu maˍ chehˇ htaˇ teˇ pawˆ pawˆ kʼo, nawˬ hkʼa dehꞈ ga piˇ maˇ gʼa tehꞈ dawˇ ve yoˬ hehˉ. Liꞈ hpu henˇ ve chaw htaꞈ chiˇ mvuh piˇ leh a yeˇ yuˬ piˇ ve ceh kaꞈ yawˇ uiˍ la mvuh la gʼa tuˬ nawˬ kaꞈ ga piˇ gʼa ve yoˬ.

10. Nawˬ ve awˬ lawn Liꞈ hpu henˇ ve chaw htaꞈ hkʼaˬ hkʼe ga piˇ gʼa tuˬ le?

¹⁰ Nawˬ ve awˬ lawn kʼoˆ maˍ piˇ sheˍ. Nawˬ ve awˬ lawn Liꞈ hpu henˇ ve chaw htaꞈ ga piˇ gʼa tuˬ, nawˬ awˬ tehˬ ve htaꞈ hkʼaˬ hkʼe te ca mawˬ ve yawˇ htaꞈ kʼoˆ maˍ piˇ sheˍ. Nawˬ shoꞈ shaꞈ ve gu gʼa ve, Yaˬhoˉvaˬ nawˬ htaꞈ ga laˇ ve kʼoˆ maˍ piˇ sheˍ. (Chiˇ mvuh ve 78:4, 7) Nawˬ ve awˬ lawn yawˇ gʼa kaˇ cawˇ ve awˬ yanˇ htaꞈ cawˇ daꞈ ve yoˬ hehˉ. Chi yawˇ ve yonˍ hkʼaˇ yonˍ yeˬ tuˬ ga piˇ ve yoˬ. Leh yawˇ awˬ gʼaˇ gʼa leh uiˍ la mvuh la leh Baˆtiˆsaˬ haꞈ yuˬ gʼa tuˬ yoˬ. Maˇ heˆ leh shoꞈ shaꞈ ve yawˇ gʼa hpuˇ chehˇ ve htaꞈ gu gʼa tuˬ ga piˇ ve awˬ yanˇ cawˇ daꞈ ve yoˬ. (1 Peˍtruˆ 5:9) Baˬraˬziˇ mvuhˇ miˬ lo gʼuˇ suhˍ peuˍ ve Kaˍbiˇ tawnˇ gʼa ve, yawˇ Liꞈ hpu henˇ ve chaw hpehꞈ chehˇ htaˇ awˬ viˉ awˬ nyi ve awˬ lawn yawˇ htaꞈ ga laˇ gʼa jaˇ. Yawˇ kʼoˆ ve, “ngaˬ hui shoꞈ shaꞈ ve aˬ htoꞈ ma gʼa hpuˇ ve Yaˬhoˉvaˬ mawˬ  ve tehꞈ awˬ viˉ awˬ nyi ve awˬ lawn ngaˬ htaꞈ ga laˇ gʼa jaˇ. Yawˇ hui shoꞈ shaꞈ ve htaꞈ gu gʼa ve kʼo, ngaˬ kaꞈ gu gʼa ve yoˬ.”

11-12. Liꞈ hpu henˇ ve chaw hpawnˬ daꞈ la htaˇ aˬ htoꞈ ma te ngaˬ hui haꞈ yuˬ piˇ cawˇ ve le?

¹¹ Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ gʼa tuˬ yawˇ hkʼaˬ htaˆ kaꞈ hpawnˬ daꞈ ve gʼa laˬ ve yoˬ. Chi yawˇ htaꞈ ga piˇ gʼa jaˇ. (Heˍbrehˇ 10:24, 25) Maˇ˗awˍ ve kʼo, Liꞈ hpu henˇ ve chaw awˉ lawˉ teˇ pawˆ hpawnˬ daꞈ la tuˬ, Liꞈ hpu maˍ ve chaw jehˬ piˇ ve yoˬ. Yaꞈ hkʼaˇ, yawˇ teˇ pawˆ kʼawꞈ hpawnˬ daꞈ la gaˇ tuˬ ngaˬ hui teˇ gʼaˇ le le jehˬ piˇ gʼa ve yoˬ. Chi ve ngaˬ hui hkʼaˬ hkʼe te gʼa tuˬ le?

¹² Liꞈ hpu henˇ ve chaw htaꞈ haꞈ yuˬ piˇ sheˍ. (Roˉmaꞈ 15:7) Liꞈ hpu henˇ ve chaw hpawnˬ daꞈ la htaˇ haꞈ yuˬ piˇ ve kʼo, yawˇ teˇ pawˆ kʼawꞈ la gaˇ tuˬ yoˬ. Yawˇ htaꞈ haꞈ yuˬ piˇ htaˇ nyi ma maˇ sha tuˬ taˇ te piˇ. Leh awˬ viˉ awˬ nyi htaꞈ kaꞈ shiˍ daꞈ tuˬ kʼoˆ maˍ piˇ leh yawˇ geh yaw daꞈ sheˍ. Liꞈ hpu maˍ ve chaw ga piˇ piˇ tehꞈ taˇ dawˇ. Yawˇ htaꞈ Liꞈ hpu maˍ piˇ ve chaw maˇ laˬ sheˍ ve maˇ heˆ leh hpawnˬ daꞈ kuiˬ hkʼaw awˬ nu ve awˬ vuiˬ htaꞈ te chehˇ ve pa taw yoˬ hehˉ. Yawˇ tawˇ yaw htaˇ hkʼa dehꞈ na taˍ piˇ leh nawˬ yawˇ htaꞈ a yeˇ yuˬ ve tehꞈ mawˬ tcuh sheˍ. Nawˬ Liꞈ hpu henˇ ve chaw htaꞈ chi hkʼe te haꞈ yuˬ piˇ ve kʼo, hkʼaˬ hkʼe hpehꞈ tuˬ le? Awˬ viˉ awˬ nyi Deˍmiˆti Baˆtiˆsaˬ haꞈ yuˬ ve 2-3 hkʼawꞈ gaˬ˗oˬ leh chi teˇ hkui ga piˇ shehˍ hpaˇ te chehˇ ve yawˇ ve awˬ lawn htaꞈ dawˇ nyi sheˍ. Yawˇ awˉ lawˉ teˇ nyi hpawnˬ daꞈ la ve htaꞈ kʼoˆ ve, “oˇ ve teˇ yanˇ ngaˬ hpawnˬ daꞈ kuiˬ gʼuˇ suhˍ lo huˉ taˍ ve yoˬ. Leh hkʼaˬ hkʼe te tuˬ kaꞈ maˇ shiˍ. Awˬ viˉ awˬ nyi teˇ gʼaˇ ngaˬ htaꞈ mawˬ htaˇ yawˇ ngaˬ geh haˆ laˬ leh hpawnˬ daꞈ kuiˬ hkʼaw loꞈ˗e tuˬ jehˬ laˇ ve yoˬ. Leh awˬ nu ve awˬ viˉ awˬ nyi kaꞈ ngaˬ htaꞈ laꞈ sheh caˉ laˇ ve yoˬ. Yawˇ hui ngaˬ htaꞈ chi hkʼe taw taw a yeˇ yuˬ laˇ tuˬ yoˬ tehꞈ ngaˬ maˇ dawˇ nyi jaw. Ngaˬ dawˇ cawˇ jaˇ. Hpawnˬ daꞈ ve chi hkʼe ve teˇ nyi le le cawˬ tcuh gaˇ ve yoˬ. Chi hkʼe ve ngaˬ teˇ kaˬ˗ehˬ kaꞈ maˇ mawˬ jaw sheˍ.”

13. Nawˬ ve daꞈ ve awˬ lawn Liꞈ hpu henˇ ve chaw htaꞈ hkʼaˬ hkʼe ga piˇ gʼa tuˬ le?

¹³ Daꞈ ve henˇ yuˬ tuˬ te sheˍ. Nawˬ ve daꞈ ve awˬ lawn Liꞈ hpu henˇ ve chaw yawˇ gʼa henˇ ve awˬ ceuˬ awˬ tehˬ ve hpehꞈ ve tehꞈ yonˍ gʼa tuˬ ga piˇ ve yoˬ. (Maꞈhtehˍ 5:16) Monˍdoˬvaˬ mvuhˇ miˬ lo ve Iˉtaˍliˍ yawˇ Liꞈ hpu henˇ ve chaw hpehꞈ htaˇ ve htaꞈ kʼoˆ ve, “awˬ viˉ awˬ nyi hkʼaˬ hkʼe dawˇ ve, yawˇ hui aˬ htoꞈ ma te ve, oˇ ve teˇ yanˇ ngaˬ yawˇ hui htaꞈ chaˬ nyi ve yoˬ. Chi Yaˬhoˉvaˬ ve Shaˉhkiˆhkanˍ ve chaw lehˬ awˬ tehˬ ve bon hpehꞈ ve tehꞈ ngaˬ yonˍ gʼa tuˬ te laˇ ve yoˬ.”

14. Nawˬ ve awˬ lawn Liꞈ hpu henˇ ve chaw uiˍ la mvuh la gʼa tuˬ hkʼaˬ hkʼe ga piˇ gʼa ve le?

¹⁴ Liꞈ hpu henˇ ve chaw Baˆtiˆsaˬ haꞈ yuˬ gaˇ ve kʼo, yawˇ henˇ taˍ ve awˬ ceuˬ htaꞈ awˉ lawˉ gʼa yuˬ yehˇ ve yoˬ. Chi hkʼe te ve lehˬ maˇ sha ve yoˬ. Nawˬ Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te ve awˬ bon gʼa ve yawˇ gʼa mawˬ htaˇ yawˇ kaꞈ nawˬ htaꞈ henˇ yuˬ gaˇ ve yoˬ. (1 Kawˇrenˍhtuˆ 11:1) Chi awˬ gʼuˇ suhˍ htaˇ kʼoˆ kʼai peuˬ ve Ha˗na˗e ve awˬ lawn htaꞈ teˇ geh nyi sheˍ. Yawˇ kʼoˆ ve, “ngaˬ liꞈ kʼoˆ hkʼaw ceh gʼa henˇ ve maˇ heˆ. Ngaˬ awˬ viˉ awˬ nyi ve awˬ lawn htaꞈ kaꞈ gʼa henˇ ve yoˬ. Yawˇ hui ve awˬ lawn ngaˬ shu htaꞈ  awˬ gʼaˇ hkʼaˬ hkʼe piˇ tuˬ, venˇ baˆ hpehˇ piˇ tuˬ, leh haꞈ ve hkʼaˬ hkʼe hpeuꞈ maw piˇ tuˬ, yawˇ hui awˬ nu ve chaw htaꞈ caˉ daꞈ ve tawˇ yaw htaˇ, yawˇ hui chaw oˇ teˇ gʼaˇ htaꞈ caˉ daꞈ ve daꞈ ve awˬ lawn tiˉ yaw ve ngaˬ shiˍ tuˬ te laˇ ve yoˬ. Ngaˬ yawˇ hui hkʼe hpehꞈ gaˇ jaˇ.”

15. Tawˇ naˉ ve liꞈ 27:17 hkʼaw ve awˬ liˇ awˬ hkʼaˇ ngaˬ hui Liꞈ hpu henˇ ve chaw geh hkʼaˬ hkʼe yuˬ yehˇ gʼa tuˬ le?

¹⁵ Liꞈ hpu henˇ ve chaw htaꞈ awˬ chawˇ te sheˍ. Liꞈ hpu henˇ ve chaw hkʼaˬ htaˆ kaꞈ hpawnˬ daꞈ la htaˇ nawˬ yawˇ htaꞈ a yeˇ yuˬ ve tehꞈ yawˇ mawˬ tuˬ te sheˍ. (Hpiˇliˇpiˆ 2:4) Yawˇ htaꞈ maˇ maˇ shiˍ daꞈ tuˬ te sheˍ. Yawˇ uiˍ la mvuh la leh te hkʼaˇ dawˇ hkʼaˇ teˇ ceuˬ ceuˬ pa ve nawˬ chiˇ mvuh piˇ sheˍ. Yawˇ Liꞈ hpu hkʼaˬ hkʼe te henˇ ve na nyi piˇ sheˍ. Yawˇ ve yehˬ kʼa leh yawˇ te ve kanˉ htaꞈ kaꞈ na nyi piˇ sheˍ. Yaꞈ hkʼaˇ, yawˇ ve awˬ lawn maˇ na keunˍ maˇ na cawˇ ve taˇ na piˇ. Yawˇ geh meuˆ daꞈ tuˬ ve awˬ lawn tawˇ yaw daꞈ sheˍ. Yaꞈ hkʼaˇ, nawˬ Liꞈ hpu henˇ ve chaw htaꞈ awˬ chawˇ te ve kʼo, nawˬ kaꞈ Liꞈ hpu henˇ ve chaw uiˍ la mvuh la gʼa tuˬ ga piˇ leh Baˆtiˆsaˬ haꞈ yuˬ gʼa tuˬ yoˬ. (Tawˇ naˉ ve 27:17 gʼaw sheˍ.) Hkʼaˬ htaˆ kaꞈ gʼuˇ suhˍ peuˍ ve te ve Ha˗na˗e yawˇ awˉ lawˉ teˇ pawˆ hpawnˬ daꞈ la htaˇ ve htaꞈ tawnˇ gʼa leh kʼoˆ ve, “hpawnˬ daꞈ kuiˬ yehˬ hkʼaw ngaˬ awˬ chawˇ cawˬ htaˇ hpawnˬ daꞈ˗e gaˇ jaˇ. Ngaˬ heuˬ jaˇ ve htawˇ hpawnˬ daꞈ ve maˇ haˇ jaw. Ngaˬ yawˇ hui geh awˬ chawˇ te ve dawˇ cawˇ leh awˬ chawˇ awˬ piˍ ngaˬ yonˍ ve hkʼe maˇ yonˍ ve chaw htaꞈ awˬ chawˇ maˇ te tuˬ ga laˇ ve yoˬ. Ngaˬ Yaˬhoˉvaˬ leh awˬ viˉ awˬ nyi geh meuˆ daꞈ gaˇ jaˇ. Hkʼe te leh ngaˬ Baˆtiˆsaˬ haꞈ yuˬ tuˬ dawˇ cheˆ ve yoˬ.”

16. Liꞈ hpu henˇ ve chaw Hkriꞈ yaˇ awˬ moˍ hkʼaw awˬ viˉ awˬ nyi geh chehˇ htaˇ yawˇ nyi ma sha tuˬ nawˬ hkʼaˬ hkʼe ga piˇ gʼa tuˬ le?

¹⁶ Liꞈ hpu henˇ ve chaw uiˍ la mvuh la leh a shu yawˇ ve dawˇ hkʼaˇ pa htaˇ, yawˇ kaꞈ Hkriꞈ yaˇ awˬ moˍ hkʼaw ve chaw teˇ gʼaˇ hpehꞈ ve tehꞈ dawˇ tuˬ nawˬ kaꞈ ga piˇ sheˍ. Teˇ hkʼaˇ lehˬ hkehˉ chaw teˇ hpaˍ htaꞈ haꞈ yuˬ sheˍ. (Heˍbrehˇ 13) Monˍdoˬvaˬ mvuhˇ miˬ lo Dehˍniˆ yawˇ Liꞈ hpu henˇ ve chaw hpehꞈ htaˇ ve htaꞈ kʼoˆ ve, “awˬ viˉ awˬ nyi ngaˬ awˍ teˇ geh caˇ˗e tuˬ leh teˇ geh guiˇ˗e tuˬ laiˉ pawˆ jehˬ laˇ ve yoˬ. Yaˬhoˉvaˬ yawˇ hui htaꞈ hkʼaˬ hkʼe ga piˇ ve yawˇ hui ve awˬ lawn gʼa kaˇ htaˇ, ngaˬ kaꞈ awˬ gʼaˇ gʼa jaˇ. Awˬ viˉ awˬ nyi geh awˬ chawˇ chi hkʼe te htaˇ, ngaˬ Yaˬhoˉvaˬ ve kanˉ te gaˇ tuˬ te laˇ ve yoˬ. Leh ngaˬ hui ha lehˬ jaˇ tuˬ yoˬ.” Liꞈ hpu henˇ ve chaw hto toˇ ve chaw hpehꞈ˗oˬ htaˇ, nawˬ geh teˇ geh hto toˇ˗e tuˬ jehˬ piˇ gʼa ve yoˬ. Baˬraˬziˇ mvuhˇ miˬ lo chehˇ ve awˬ viˉ awˬ nyi Zeˬehˍkoˇ yawˇ Liꞈ hpu henˇ ve chaw hpehꞈ htaˇ ve htaꞈ kʼoˆ ve, “awˬ viˉ awˬ nyi laiˉ gʼaˇ teˇ geh hto toˇ˗e tuˬ ngaˬ htaꞈ jehˬ laˇ ve yoˬ. Chi ve ngaˬ awˬ pon kʼo, yawˇ hui htaꞈ shiˍ daꞈ tuˬ daꞈ jaˇ ve awˬ hkʼaˇ hpehꞈ ve yoˬ. Ngaˬ yawˇ hui geh laiˉ ceuˬ henˇ yuˬ gʼa leh chi ngaˬ Yaˬhoˉvaˬ leh Yeˍsuˆ htaꞈ hkʼa dehꞈ meuˆ daꞈ tuˬ te laˇ ve yoˬ.”

17. Nyi haꞈ shaˉ paˍ Liꞈ hpu henˇ ve chaw htaꞈ hkʼaˬ hkʼe te ga piˇ gʼa tuˬ le?

¹⁷ Liꞈ hpu henˇ ve chaw htaꞈ awˬ yanˇ piˇ sheˍ. Nawˬ nyi haꞈ shaˉ paˍ hpehꞈ˗aw laˇ? Nawˬ Liꞈ hpu henˇ ve chaw htaꞈ a yeˇ yuˬ leh dawˇ haˍ ve  kʼo, yawˇ uiˍ la mvuh la leh Baˆtiˆsaˬ haꞈ yuˬ gʼa tuˬ nawˬ ga piˇ gʼa ve yoˬ. Liꞈ hpu henˇ ve chaw hpawnˬ daꞈ la htaˇ, nawˬ hkʼaˬ htaˆ kaꞈ yawˇ geh yaw daꞈ sheˍ. Yawˇ hkʼawꞈ tuˬ laꞈ sheh chiˇ htaˇ yawˇ ve awˬ meh htaꞈ tawnˇ taˍ sheˍ. Nawˬ chi hkʼe te ve kʼo, nawˬ yawˇ htaꞈ a yeˇ yuˬ laˇ ve tehꞈ yawˇ shiˍ tuˬ yoˬ. Nawˬ te gʼa ve teˇ ceuˬ lehˬ yawˇ geh Liꞈ hpu maˍ˗e htaˇ, awˬ viˉ awˬ nyi geh kʼai sheˍ. Nawˬ dawˇ taˍ ve aꞈ kehˉ Liꞈ hpu henˇ ve chaw htaꞈ ga piˇ gʼa jaˇ tuˬ yoˬ hehˉ. Nai˗jeˇri˗aˇ mvuhˇ miˬ lo Gʼuˇ suhˍ peuˍ ve Jehꞈkiˇ kʼoˆ ve, “Liꞈ hpu henˇ ve chaw geh teˇ geh Liꞈ hpu ca maˍ˗e tuˬ nyi haꞈ shaˉ paˍ htaꞈ shiˍ kʼai ve yawˇ shiˍ la htaˇ cheˆ˗ehꞈ kʼai ve yoˬ. Liꞈ hpu henˇ ve chaw teˇ gʼaˇ kʼoˆ ve, ‘bon yehˬ hkʼaw ve saˍ laꞈ chi hkʼe te tuˬ awˬ hkʼaˇ maˇ cawˬ. Paw sha ve chaw leh yawˇ htaꞈ hpu piˇ gʼa ve chaw htaꞈ ceh tiˉ ca ve yoˬ.’” Chi teˇ hkui Liꞈ hpu henˇ ve chaw chi teˇ gʼaˇ hpawnˬ daꞈ ve laiˉ pawˆ laˬ˗oˬ.

18. Tcuh yaˇ liꞈ 20:28 hkʼaw ve nyi haꞈ shaˉ paˍ hkʼaˬ hkʼe gʼaꞈ te gʼa tuˬ le?

¹⁸ Awˬ viˉ awˬ nyi Liꞈ hpu maˍ puiˉ tuˬ leh awˬ gʼaˇ piˇ puiˉ tuˬ maˍ piˇ sheˍ. Nyi haꞈ shaˉ paˍ awˬ viˉ awˬ nyi Gʼuiˬ sha ve kanˉ hkʼa dehꞈ te gʼa tuˬ ga piˇ tuˬ awˬ vuiˬ cawˬ ve yoˬ. Chi lehˬ Liꞈ hpu maˍ ve htaꞈ kaꞈ caˉ daꞈ ve yoˬ. (Tcuh yaˇ 20:28 gʼaw sheˍ.) Awˬ viˉ awˬ nyi teˇ geh Liꞈ hpu maˍ˗e tuˬ nawˬ htaꞈ jehˬ laˇ ve kʼo, yawˇ Liꞈ hpu maˍ ve yaꞈ taw ve kʼo, nawˬ yawˇ awˬ tan Liꞈ hpu maˍ kaꞈ gʼa ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve Jehˬkiˇ kʼoˆ ve, “nyi haꞈ shaˉ paˍ Liꞈ hpu henˇ ve chaw htaꞈ caˉ daꞈ ve ngaˬ htaꞈ teˇ hkui teˇ hkui na laˇ ve yoˬ. Ngaˬ shoꞈ shaꞈ ve aˬ htoꞈ ma gʼa hpuˇ ve yawˇ hui shiˍ htaˇ, yawˇ hui ngaˬ htaꞈ beˆ maˍ laˇ ve ga laˇ gʼa jaˇ.” Nyi haꞈ shaˉ paˍ Liꞈ hpu maˍ ve chaw htaꞈ awˬ gʼaˇ piˇ gʼa ve awˬ hkʼoˆ kaꞈ, laiˉ ceuˬ te gʼa sheˍ ve yoˬ. (1 Hteˇsaˍlawˇniˆ 5:11) Jehˬkiˇ kʼoˆ ve, “nyi haꞈ shaˉ paˍ awˬ gʼaˇ peꞈ laˇ ve lehˬ ngaˬ kanˉ te hkeuꞈ ve htaꞈ awˬ bon uiˍ jaˇ kʼoˆ laˇ ve htaꞈ ngaˬ dawˇ cawˇ jaˇ. Haw jaˇ htaˇ iˉ kaˆ gawˬ˗ehˍ gʼa dawˬ leh nyi ma sha jaˇ ve hkʼa shuˍ yoˬ. Yawˇ hui chiˇ mvuh laˇ ve kaꞈ ngaˬ ha lehˬ tuˬ te laˇ leh Liꞈ hpu maˍ gʼa tuˬ hkʼa dehꞈ yonˍ gʼa ve yoˬ.”—Tawˇ naˉ ve 25:25.

19. Ngaˬ hui teˇ gʼaˇ le le ha lehˬ tuˬ aˬ htoꞈ ma te laˇ ve le?

¹⁹ Chi teˇ hkui ngaˬ hui geh Liꞈ hpu henˇ ve chaw maˇ cawˬ ve htawˇ, awˬ viˉ awˬ nyi geh Liꞈ hpu henˇ ve chaw htaꞈ uiˍ la mvuh la leh Baˆtiˆsaˬ haꞈ yuˬ gʼa tuˬ ga piˇ gʼa ve yoˬ. Awˬ viˉ awˬ nyi geh teˇ geh Liꞈ hpu ca maˍ˗e tuˬ awˉ lawˉ hkʼa dehꞈ gu teh leh, Liꞈ hpu maˍ chehˇ ve awˬ yanˇ htaˇ ngaˬ hui kaꞈ awˬ viˉ awˬ nyi htaꞈ ga piˇ gʼa leh, tawˇ chi ma ma taˇ yaw. Liꞈ hpu henˇ ve chaw hpawnˬ daꞈ kuiˬ yehˬ lo laˬ htaˇ, ngaˬ hui yawˇ geh tawˇ yaw daꞈ ve, awˬ chawˇ te piˇ ve, leh yawˇ awˬ pon daꞈ ve henˇ yuˬ tuˬ hpehꞈ piˇ sheˍ. Nyi haꞈ shaˉ paˍ Liꞈ hpu henˇ ve chaw htaꞈ awˬ gʼaˇ piˇ gʼa ve lehˬ, yawˇ htaꞈ tawˇ yaw piˇ ve yoˬ. Nyi haꞈ shaˉ paˍ Liꞈ hpu maˍ ve chaw htaꞈ awˬ gʼaˇ piˇ gʼa ve lehˬ, yawˇ hui htaꞈ maˍ piˇ leh chiˇ mvuh piˇ ve yoˬ. Ngaˬ hui te gʼa ve a ciˉ ceh tiˉ hpehꞈ ve htawˇ, chaw teˇ gʼaˇ Yaˬhoˉvaˬ htaꞈ haꞈ leh Yaˬhoˉvaˬ ve kanˉ te la tuˬ ga piˇ ve chi aꞈ kehˉ ha lehˬ ve teˇ ceuˬ kaꞈ maˇ cawˬ.