1. Aˬ htoꞈ ma te Yeˍsuˆ yawˇ ve awˬ laꞈ gʼawˇ htaꞈ Yaˬhoˉvaˬ haꞈ shaˉ piˇ tuˬ lawˬ ve le?

 Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ ve awˬ laꞈ gʼawˇ aˬ htoꞈ ma htaꞈ gʼa hpuˇ tuˬ yawˇ dawˇ nyi ve yoˬ. Yawˇ yawˇ ve awˬ laꞈ gʼawˇ htaꞈ haꞈ jaˇ. Hkʼe te leh, “yawˇ hui lehˬ, haiˬ ve awˬ ceuˬ htaꞈ ponˬ piˇ tuˬ” ngaˬ Awˬ pa Yaˬhoˉvaˬ geh lawˬ ve yoˬ. (Yoˇhanˬ 17:14, 15) Yeˍsuˆ lehˬ mvuhˇ naw ma hkʼoˆ taˆ kʼoꞈ˗e peuˬ hkʼawꞈ nawˉ, Saˍtanˍ lehˬ Yaˬhoˉvaˬ ve kanˉ te gaˇ ve chaw teˇ gʼaˇ le le htaꞈ maꞈ te tuˬ yoˬ tehꞈ yawˇ shiˍ ve yoˬ. Yaˬhoˉvaˬ ve chaw haꞈ shaˉ laˇ ve htaꞈ gʼa cawˇ ve yoˬ.

2. Yaˬhoˉvaˬ lehˬ ngaˬ hui ve bon lawˬ hkawˇ htaꞈ hkʼawꞈ laˇ ve tehꞈ ngaˬ hui hkʼaˬ hkʼe te yonˍ gʼa ve le?

² Yaˬhoˉvaˬ Yeˍsuˆ htaꞈ haꞈ ve pa taw, Yeˍsuˆ ve bon lawˬ hkawˇ htaꞈ hkʼawꞈ piˇ ve yoˬ. Yaˬhoˉvaˬ nyi hkʼaˇ suh tuˬ ngaˬ hui coˇ caˇ leh te ve kʼo, yawˇ kaꞈ ngaˬ hui htaꞈ haꞈ tuˬ yoˬ. Gʼuiˬ sha ngaˬ hui htaꞈ ga laˇ leh haꞈ shaˉ laˇ tuˬ bon lawˬ htaˇ, yawˇ ngaˬ hui ve bon lawˬ hkawˇ htaꞈ awˬ tehˬ hkʼawꞈ laˇ tuˬ yoˬ. Yaˬhoˉvaˬ lehˬ yawˇ ve yaˇ htaꞈ haꞈ leh dawˇ haˍ ve Awˬ pa hpehꞈ ve yoˬ. Yawˇ ngaˬ hui htaꞈ maˇ haꞈ shaˉ ve kʼo, awˬ meh luˬ tuˬ yoˬ.

3. Aˬ htoꞈ ma te ngaˬ hui Yaˬhoˉvaˬ haꞈ shaˉ laˇ tcuh gaˇ ve le?

³ Chi teˇ hkui ngaˬ hui Yaˬhoˉvaˬ haꞈ shaˉ laˇ tcuh gaˇ ve yoˬ. Saˍtanˍ miˬ guiˬ hkʼoˆ lo yuˬ baˬ ve teˇ yanˇ “nyi ma zuhˆ jaˇ.” (Hpeuꞈ maˍ ve 12:12) Ngaˬ hui htaꞈ fawˉ mehˍ laˇ ve chaw teˇ hpaˍ dawˇ ve yawˇ chi hkʼe te ve lehˬ, “Gʼuiˬ sha ve kanˉ te peuˬ tehꞈ” Saˍtanˍ dawˇ tcuh ve yoˬ. (Yoˇhanˬ 16:2) Ngaˬ hui miˬ guiˬ yaˇ htaꞈ maˇ shuˍ ve pa taw, Gʼuiˬ sha htaꞈ maˇ yonˍ ve chaw kaꞈ ngaˬ hui htaꞈ fawˉ mehˍ laˇ ve yoˬ. Aˬ htoꞈ ma htaꞈ pa taw shu ngaˬ hui htaꞈ fawˉ mehˍ laˇ ve htawˇ maˇ kawˆ. Aˬ htoꞈ ma pa taw le? Awˬ lawn kʼo, Liꞈ hpu hkʼaw kʼoˆ ve Yaˬhoˉvaˬ Yeˍsuˆ htaꞈ cuˇ leh, “nawˬ hui htaꞈ yeˬ la piˇ  lawˬ leh, haiˬ ve teˇ ceuˬ htaꞈ nawˬ hui gʼa ponˬ tuˬ, yawˇ haꞈ shaˉ laˇ tuˬ yoˬ.” (2 Hteˇsaˍlawˇniˆ 3:3) Yaˬhoˉvaˬ ngaˬ hui htaꞈ hkʼaˬ hkʼe haꞈ shaˉ laˇ ve le? Yawˇ haꞈ shaˉ laˇ ve 2 hkʼaˇ htaꞈ teˇ geh nyi sheˍ.

4. Eˇfeˇsuꞈ liꞈ 6:13-17 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ haꞈ shaˉ laˇ tuˬ aˬ htoꞈ ma peꞈ laˇ ve le?

⁴ Saˍtanˍ ngaˬ hui htaꞈ bawˆ laˇ ve htaꞈ Yaˬhoˉvaˬ ponˬ laˇ tuˬ yawˇ ngaˬ hui htaꞈ laꞈ caˉ hkʼa peu˗eˬ peꞈ laˇ ve yoˬ. (Eˇfeˇsuꞈ 6:13-17 gʼaw sheˍ.) Gʼuiˬ sha ve laꞈ caˉ lehˬ yeˬ leh daꞈ jaˇ. Ngaˬ hui htaꞈ haꞈ shaˉ laˇ gʼa tuˬ laꞈ caˉ hkʼa peu˗eˬ veuꞈ deh leh maˇ gʼa kʼehˆ baˬ. Laꞈ caˉ teˇ maˬ leh teˇ maˬ tcuhˉ kuiˬ hkʼaˬ hkʼe ve htaꞈ kʼoˆ gaˇ ve teˇ geh nyi sheˍ.

5. Haˍ pi aˬ htoꞈ ma htaꞈ kʼoˆ gaˇ ve le? Leh aˬ htoꞈ ma te ngaˬ hui haˍ pi chi tsuhꞈ taˍ cawˇ ve le?

⁵ Haˍ pi tcuhˉ kuiˬ lehˬ, Liꞈ hpu hkʼaw cawˬ ve awˬ tehˬ ve htaꞈ kʼoˆ gaˇ ve yoˬ. Aˬ htoꞈ ma te ngaˬ hui haˍ pi chi tsuhꞈ cawˇ ve le? Awˬ lawn kʼo, Liꞈ hpu hkʼaw awˬ tehˬ ve lehˬ ngaˬ hui htaꞈ Saˍtanˍ maˇ gʼa heˍ laˇ tuˬ ga laˇ ve yoˬ. Yawˇ lehˬ ‘heˍ ve awˬ pa’ hpehꞈ ve yoˬ. (Yoˇhanˬ 8:44) Yawˇ laiˉ hinˉ hkʼawꞈ heˍ laˬ˗oˬ leh, “miˬ guiˬ yaˇ hkʼa peu˗eˬ htaꞈ heˍ shehˍ hpaˇ” hpehꞈ ve yoˬ. (Hpeuꞈ maˍ ve 12:9) Ngaˬ hui haˍ pi chi htaꞈ hkʼaˬ hkʼe te tsuhꞈ gʼa tuˬ le? Tsuhꞈ gʼa tuˬ Yaˬhoˉvaˬ htaꞈ caˉ daꞈ ve awˬ tehˬ ve henˇ ve leh, “yawˇ htaꞈ oˉ kʼoˍ pui ve chaw hui lehˬ, nyi ma awˬ hkʼaw leh hteˇ ve cawˇ ve awˬ hkʼaw lo oˉ kʼoˍ gʼa pui ve” leh teˇ ceuˬ le le ka tiꞈ gʼa yeˬ ve yoˬ.—Yoˇhanˬ 4:24; Eˇfeˇsuꞈ 4:25; Heˍbrehˇ 13:18.

6. Nyi ma pui htanˬ tuˬ tcuhˉ kuiˬ aˬ htoꞈ ma le? Leh aˬ htoꞈ ma te ngaˬ hui nyi ma pui htaꞈ htanˬ tuˬ veuꞈ deh cawˇ ve le?

⁶ Htanˬ tuˬ maꞈ yaˇ nyi ma pui htaꞈ haꞈ shaˉ piˇ tuˬ veuꞈ deh ve hkʼe, Yaˬhoˉvaˬ ve awˬ liˇ awˬ hkʼaˇ hteˇ ve cawˇ ve kaꞈ ngaˬ hui nyi ma htaꞈ haꞈ shaˉ laˇ tuˬ yoˬ. Chi lehˬ miˬ guiˬ hkʼoˆ maˇ daꞈ ve awˬ liˇ awˬ hkʼaˇ ngaˬ hui htaꞈ maˇ gʼa heuˆ la tuˬ yoˬ. (Tawˇ naˉ ve 4:23) Yaˬhoˉvaˬ lehˬ ngaˬ hui yawˇ htaꞈ haꞈ leh nyi ma awˬ tawˬ hkʼa gaˬ yawˇ ve kanˉ te tcuh gaˇ ve yoˬ. (Maꞈhtehˍ 22:36, 37) Hkʼe te leh, Saˍtanˍ lehˬ miˬ guiˬ hkʼoˆ lo Yaˬhoˉvaˬ maˇ dawˇ cawˇ ve awˬ ceuˬ htaꞈ ngaˬ hui haꞈ tcuh gaˇ ve yoˬ. (Yaˍkoˆ 4:4; 1 Yoˇhanˬ 2:15, 16) Saˍtanˍ awˬ hkʼaˇ chi ngaˬ hui htaꞈ yehˇ maˇ gʼa ve kʼo, Saˍtanˍ ngaˬ hui htaꞈ nyiˉ laˇ leh ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te tuˬ fawˉ mehˍ laˇ ve yoˬ.

7. Ngaˬ hui nyi ma pui htaꞈ htanˬ tuˬ hkʼaˬ hkʼe veuꞈ deh gʼa tuˬ le?

⁷ Yaˬhoˉvaˬ ve awˬ liˇ awˬ hkʼaˇ htaꞈ haꞈ yuˬ leh ngaˬ hui awˬ liˇ awˬ hkʼaˇ oˇ ve htaꞈ yuˬ yehˇ tuˬ nyi ma pui htaꞈ htanˬ tuˬ veuꞈ deh ve yoˬ. (Chiˇ mvuh ve 97:10) Chaw teˇ hpaˍ Yaˬhoˉvaˬ ve awˬ liˇ awˬ hkʼaˇ gʼaꞈ te haˍ jaˇ tehꞈ dawˇ ve yoˬ. Ngaˬ hui awˬ liˇ awˬ hkʼaˇ oˇ ve maˇ gʼaꞈ te ve kʼo, maꞈ yaˇ nyi ma pui htaꞈ htanˬ tuˬ hehnˇ jaˇ tehꞈ dawˇ ve pa taw, maꞈ bawˆ htaˇ kʼehˆ baˬ ve hkʼa shuˍ yoˬ. Chi hkʼe te ve lehˬ kʼaˍ jaˇ leˇ? Yaˬhoˉvaˬ htaꞈ haꞈ ve chaw lehˬ yawˇ ve awˬ liˇ awˬ hkʼaˇ awˬ vuiˬ ceh hpehꞈ ve tehꞈ maˇ dawˇ. Yaꞈ hkʼaˇ, yawˇ ve a shaꞈ htaꞈ haꞈ shaˉ laˇ gʼa ve tehꞈ dawˇ ve yoˬ.—1 Yoˇhanˬ 5:3.

8. Cawˇ daꞈ hawˍ daꞈ ve, daꞈ ve awˬ lawn sha tanˇ hto toˇ tuˬ hkuiˉ nuˆ tcuhˉ taˍ ve hkʼe hkʼaˬ hkʼe te tcuhˉ taˍ gʼa tuˬ le?

⁸ Pawˇluꞈ ngaˬ hui htaꞈ kʼoˆ laˇ ve, cawˇ daꞈ hawˍ daꞈ ve daꞈ ve awˬ lawn sha tanˇ hto toˇ tuˬ, hkuiˉ nuˆ tcuhˉ taˍ ve hkʼe tcuhˉ taˍ˗oˆ. Chi kʼoˆ gaˇ ve lehˬ, ngaˬ hui hkʼaˬ htaˆ kaꞈ hto toˇ tuˬ gu hehnˇ taˍ ve yoˬ. Liꞈ hpu hkʼaw ve awˬ lawn ngaˬ hui shu geh yaw daꞈ htaˇ, yonˍ hkʼaˇ kaꞈ yonˍ hehnˇ la ve yoˬ. Miˬ guiˬ chi hkʼoˆ lo Yaˬhoˉvaˬ ve Shaˉhkiˆhkanˍ ve chaw, teˇ yehˬ peuˬ teˇ yehˬ hto toˇ ve, tanˇ kaˬ hkʼaˇ te kuiˬ lo, liꞈ henˇ kuiˬ maˇ heˆ leh kanˉ te kuiˬ lo, mawˇ ca vuiˬ˗e htaˇ, awˬ viˉ awˬ nyi geh guiˇ˗e htaˇ, shiˍ daꞈ ve chaw htaꞈ mawˬ daꞈ htaˇ, aˉ hkʼaw tiˉ chehˇ htaˇ, chi hkʼe te ve htaꞈ ngaˬ hui gʼa mawˬ htaˇ awˬ gʼaˇ gʼa jaˇ. Ngaˬ hui kawˆ leh maˇ hto toˇ ve kʼo, maꞈ yaˇ maꞈ bawˆ chehˇ htaˇ hkuiˉ nuˆ kʼehˆ baˬ ve htaꞈ shuˍ ve yoˬ. Yawˇ ve hkui sheh kaꞈ naˬ la ve yoˬ. Yawˇ ve hkui sheh naˬ htaˇ, shu ca bawˆ la sha jaˇ. Leh awˬ hoˆ kʼoˆ piˇ ve hkʼe, yawˇ gʼaꞈ te maˇ gʼa.

9. Aˬ htoꞈ ma te ngaˬ hui htanˬ tuˬ gʼa ka taˍ cawˇ ve le?

 ⁹ Htanˬ tuˬ tcuhˉ kuiˬ lehˬ, ngaˬ hui Yaˬhoˉvaˬ htaꞈ yonˍ ve kʼoˆ gaˇ ve yoˬ. Gʼuiˬ sha yawˇ ka tiꞈ te taˍ ve hkʼe teˇ ceuˬ le le te tuˬ yoˬ tehꞈ ngaˬ hui yonˍ ve yoˬ. “Haiˬ ve awˬ shehˍ hpaˇ teˇ gʼaˇ bawˆ laˇ ve aˬ miˍ to chehˇ ve hkʼaˆ ce teˇ hpaˍ htaꞈ tiˇ pehˍ gʼa tuˬ” yonˍ ve ngaˬ hui htaꞈ ga laˇ gʼa ve yoˬ. Aˬ htoꞈ ma te ngaˬ hui htanˬ tuˬ chi htaꞈ ka taˍ cawˇ ve le? Gʼuiˬ sha htaꞈ hpfuhˆ ve chaw ve hkawˇ ngaˬ hui maˇ gʼa na leh ngaˬ hui yonˍ ve awˬ ceuˬ htaꞈ shu kʼoˆ guiˇ gʼuiˬ guiˇ laˇ htaˇ, awˬ gʼaˇ maˇ gʼa nuˇ tuˬ chi ga laˇ ve yoˬ. Yaꞈ hkʼaˇ, ngaˬ hui yonˍ ve maˇ cawˬ ve kʼo, ngaˬ hui Yaˬhoˉvaˬ hkawˇ maˇ gʼa na tuˬ shu nyiˉ laˇ htaˇ, yeunˇ hkanˍ maˇ gʼaˇ taˬ. Yaˬhoˉvaˬ maˇ dawˇ cawˇ ve awˬ ceuˬ kanˉ te kuiˬ, maˇ heˆ leh liꞈ henˇ kuiˬ lo ngaˬ hui maˇ te ve teˇ pawˆ le le, ngaˬ hui htanˬ tuˬ htaꞈ ka taˍ ve yoˬ. (1 Peˍtruˆ 3:15) Gʼuiˬ sha htaꞈ oˉ kʼoˍ hkʼa dehꞈ maˇ pui gʼa tuˬ, hpu gʼa maˇ ve kanˉ htaꞈ maˇ te ve teˇ pawˆ le le, ngaˬ hui htanˬ tuˬ htaꞈ ka taˍ ve yoˬ. (Heˍbrehˇ 13:5, 6) Teˇ pawˆ le le ngaˬ hui Yaˬhoˉvaˬ ve kanˉ te htaˇ, tawˍ laˇ ve gʼa hpuˇ ve htawˇ htanˬ tuˬ htaꞈ ka taˍ leh ha shaˉ laˇ gʼa ve yoˬ.—1 Hteˇsaˍlawˇniˆ 2:2.

10. Sho uˉ tcuhˍ aˬ htoꞈ ma htaꞈ kʼoˆ gaˇ ve le? Leh aˬ htoꞈ ma te ngaˬ hui sho uˉ tcuhˍ hkʼawˆ cawˇ ve le?

¹⁰ Sho uˉ tcuhˍ tcuhˉ kuiˬ lehˬ, Yaˬhoˉvaˬ ngaˬ hui htaꞈ dawˇ law kuiˬ peꞈ laˇ ve htaꞈ kʼoˆ gaˇ ve yoˬ. Suh ve htaꞈ ponˬ laˇ gʼa tuˬ Gʼuiˬ sha ngaˬ hui htaꞈ dawˇ law kuiˬ peꞈ laˇ ve yoˬ. Leh Gʼuiˬ sha ve a loˍ htaꞈ  gʼaꞈ te ve chaw kaꞈ laꞈ shawnˍ gʼa tuˬ yoˬ. (1 Hteˇsaˍlawˇniˆ 5:8; 1 Tiˆmoˉseˍ 4:10; Tiˇtuˆ 1:1, 2) Sho uˉ tcuhˍ maꞈ yaˇ ve oˉ kʼoˍ htaꞈ haꞈ shaˉ piˇ gʼa ve hkʼe, ponˬ ve dawˇ law kuiˬ kaꞈ ngaˬ hui ve dawˇ hkʼaˇ htaꞈ haꞈ shaˉ laˇ gʼa ve yoˬ. Chi ngaˬ hui ve dawˇ hkʼaˇ htaꞈ hkʼaˬ hkʼe haꞈ shaˉ laˇ gʼa ve le? Dawˇ law kuiˬ lehˬ, Gʼuiˬ sha ka tiꞈ te taˍ laˇ ve htaꞈ a yeˇ yuˬ tuˬ te laˇ leh ngaˬ hui gʼa hpuˇ chehˇ ve shoꞈ shaꞈ ve htaꞈ mawˬ tuˬ ga laˇ gʼa ve yoˬ. Sho uˉ tcuhˍ chi ngaˬ hui hkʼaˬ hkʼe te hkʼawˆ gʼa tuˬ le? Hkʼawˆ gʼa tuˬ Gʼuiˬ sha dawˇ ve hkʼe dawˇ sheˍ. Tawˇ pa haˉ te kʼo, luˬ puiˉ sheˆ puiˉ ve hpu shi mawˇ jeˬ htaꞈ maˇ gʼa dawˇ law. Yaꞈ hkʼaˇ, Gʼuiˬ sha htaꞈ ceh tiˉ gʼa dawˇ law ve yoˬ.—Chiˇ mvuh ve 26:2; 104:34; 1 Tiˆmoˉseˍ 6:17.

11. Aˉ htaw aˬ htoꞈ ma htaꞈ kʼoˆ gaˇ ve le? Leh aˬ htoꞈ ma te ngaˬ hui aˉ htaw chi htaꞈ yehˇ cawˇ ve le?

¹¹ Awˬ ha hpu ve aˉ htaw tcuhˉ kuiˬ lehˬ Liꞈ hpu hkʼaw Gʼuiˬ sha ve tawˇ hkawˇ htaꞈ kʼoˆ gaˇ ve yoˬ. Aˉ htaw chi ve lehˬ heˍ ve teˇ ceuˬ le le leh, maˇ heˆ heˆ maˍ ve htaꞈ ponˬ laˇ gʼa leh, maˇ daꞈ ve te hkʼaˇ dawˇ hkʼaˇ hkʼa peu˗eˬ htaꞈ hpeuꞈ maw laˇ gʼa ve yoˬ. (2 Kawˇrenˍhtuˆ 10:4, 5; 2 Tiˆmoˉseˍ 3:16, 17; Heˍbrehˇ 4:12) Aˉ htaw chi ve htaꞈ ngaˬ hui cawˇ ve hpawˇ yehˇ gʼa tuˬ a shu yawˇ hkʼaˇ yawˇ Liꞈ hpu henˇ ve, Gʼuiˬ sha ve kanˉ hkʼaˇ hkʼaw laˬ ve htaꞈ henˇ ve yoˬ. (2 Tiˆmoˉseˍ 2:15) Laꞈ caˉ hkʼa peu˗eˬ cawˬ ve awˬ hkʼoˆ kaꞈ, Yaˬhoˉvaˬ ngaˬ hui htaꞈ haꞈ shaˉ laˇ gʼa tuˬ awˬ hkʼaˇ kaꞈ cawˬ sheˍ ve yoˬ. Chi lehˬ aˬ htoꞈ ma le?

12. Ngaˬ hui aˬ htoꞈ ma loˍ sheˍ ve le? Leh aˬ htoꞈ ma pa taw le?

¹² Maꞈ yaˇ te laˬ maw jaˇ˗oˬ ve lehˬ, maꞈ moˍ htaꞈ teˇ gʼaˇ tiˉ maˇ gʼaˇ tehꞈ shiˍ leh awˬ nu ve maꞈ yaˇ htaꞈ gʼa ga laˇ tcuh ve yoˬ. Ngaˬ hui kaꞈ Saˍtanˍ leh Saˍtanˍ hpawˇ chehˇ ve chaw htaꞈ ngaˬ hui teˇ gʼaˇ tiˉ maˇ gʼaˇ tehꞈ shiˍ leh awˬ nu ve chaw htaꞈ gʼa ga laˇ tcuh ve yoˬ. Yaˬhoˉvaˬ ngaˬ hui htaꞈ peꞈ laˇ ve awˬ chawˇ maꞈ yaˇ laiˉ lanˬ gʼaˇ oˇ ve lehˬ, “awˬ viˉ awˬ nyi yoˬ.”—1 Peˍtruˆ 2:17.

13. Heˍbrehˇ liꞈ 10:24, 25 hkʼaw kʼoˆ taˍ ve hkʼe, hpawnˬ daꞈ ve ngaˬ hui htaꞈ hkʼaˬ hkʼe ga laˇ ve le?

¹³ Ngaˬ hui htaꞈ ga laˇ gʼa ve teˇ hkʼaˇ lehˬ, hpawnˬ daꞈ ve yoˬ. (Heˍbrehˇ 10:24, 25 gʼaw sheˍ.) Awˬ gʼaˇ maˇ nuˇ jaw ve a shu cawˬ ve le? Ngaˬ hui awˬ gʼaˇ nuˇ htaˇ, hpawnˬ daꞈ˗e ve ga laˇ gʼa tuˬ yoˬ. Awˬ nu ve awˬ viˉ awˬ nyi hkʼawꞈ ve htaꞈ ngaˬ hui awˬ gʼaˇ gʼa leh, bon maˍ ve leh awˬ nu ve awˬ vuiˬ te maˍ laˇ ve, ngaˬ hui Yaˬhoˉvaˬ ve kanˉ caˉ leh te gaˇ tuˬ te laˇ ve yoˬ. Ngaˬ hui awˬ viˉ awˬ nyi htaꞈ maˇ hpawnˬ daꞈ sheˍ htaˇ, leh hpawnˬ daꞈ peuˬ hkʼawꞈ nawˉ tawˇ yaw daꞈ ve awˬ gʼaˇ gʼa tuˬ yoˬ. (1 Hteˇsaˍlawˇniˆ 5:14) Hpawnˬ daꞈ ve ngaˬ hui awˬ nu ve chaw htaꞈ ga piˇ gʼa tuˬ awˬ hkʼaˇ kaꞈ cawˬ leh ngaˬ hui ha lehˬ tuˬ te laˇ ve yoˬ. (Tcuh yaˇ 20:35; Roˉmaꞈ 1:11, 12) Hpawnˬ daꞈ ve lehˬ ngaˬ hui htaꞈ awˬ nu ve kaꞈ ga laˇ gʼa sheˍ. Ngaˬ hui hpawnˬ daꞈ˗e htaˇ, maꞈ yaˇ maꞈ bawˆ cheuˬ tuˬ te jaw ve hkʼe, ngaˬ hui kaꞈ Gʼuiˬ sha ve kanˉ te cheuˬ la tuˬ maˍ laˇ ve yoˬ. Tawˇ pa haˉ te kʼo, maˍ piˇ tuˬ ve laꞈ caˉ hkʼa dehꞈ yehˇ puiˉ tuˬ hkʼaˬ hkʼe maˍ laˇ ve le? Chi htaꞈ pa taw, maˇ hpawnˬ daꞈ˗e sheˍ htaˇ, nawˬ hkʼa dehꞈ gu sheˍ. Hpawnˬ daꞈ chehˇ htaˇ nawˬ hkʼa dehꞈ na taˍ sheˍ. Leh hpawnˬ daꞈ peuˬ hkʼawꞈ nawˉ gʼa henˇ taˍ ve awˬ ceuˬ htaꞈ yuˬ yehˇ sheˍ. Nawˬ chi hkʼe te ve kʼo, “Yeˍsuˆ ve daꞈ ve maꞈ yaˇ hkʼa shuˍ” hpehꞈ tuˬ yoˬ.—2 Tiˆmoˉseˍ 2:3.

14. Ngaˬ hui htaꞈ a shu ga laˇ gʼa sheˍ ve le?

¹⁴ Mvuhˇ naw ma tcuh yaˇ kanˇ paˆ cawˬ jaˇ ve laiˉ lanˬ gʼaˇ ngaˬ hui htaꞈ ga laˇ gʼa sheˍ ve yoˬ. Mvuhˇ naw ma tcuh yaˇ teˇ gʼaˇ tiˉ ve htawˇ, kanˇ paˆ uiˍ jaˇ leh aˬ htoꞈ ma te gʼa ve nawˬ tawnˇ gʼa sheˍ ve laˇ? (Iˉsaˍyaˆ 37:36) Leh mvuhˇ naw ma tcuh yaˇ awˬ moˍ lonˉ kʼo, hkʼaˬ hkʼe te gʼa tuˬ le? Chaw yaˇ leh neˇ teˇ hpaˍ hkʼaˬ ve teˇ gʼaˇ htawˇ, Yaˬhoˉvaˬ ve maꞈ moˍ htaꞈ maˇ gʼaˇ. Shaˉhkiˆhkanˍ ve ka tiꞈ yeˬ ve teˇ gʼaˇ Yaˬhoˉvaˬ htaꞈ pawnˇ daꞈ ve kʼo, canˇ paˍ hkʼa peu˗eˬ aꞈ kehˉ kanˇ paˆ uiˍ jaˇ tehꞈ kʼoˆ jaw ve yoˬ. (Suhˉ jehˬ ve 6:16) Chi ngaˬ hui yonˍ gʼa ve yoˬ. Nawˬ kanˉ te kuiˬ, liꞈ henˇ kuiˬ awˬ chawˇ, maˇ heˆ leh awˬ viˉ awˬ nyi nawˬ htaꞈ kawˆ tuˬ leh awˬ gʼaˇ nuˇ tuˬ kʼoˆ laˇ htaˇ, awˬ lawn chi htaꞈ nawˬ tawnˇ taˍ sheˍ.  Nawˬ teˇ gʼaˇ tiˉ gʼa tawˍ daꞈ ve maˇ heˆ tehꞈ tawnˇ taˍ sheˍ. Yaˬhoˉvaˬ kʼoˆ laˇ ve tawˇ htaꞈ nawˬ gʼaꞈ te chehˇ ve kʼo, yawˇ nawˬ htaꞈ ga laˇ tuˬ yoˬ.

15. Iˉsaˍyaˆ liꞈ 54:15, 17 hkʼaw kʼoˆ taˍ ve hkʼe, Gʼuiˬ sha ve chaw maˇ gʼa hto toˇ tuˬ aˬ htoꞈ ma pa taw teˇ ceuˬ kaꞈ tawˍ piˇ maˇ gʼa ve le?

¹⁵ Saˍtanˍ ve miˬ guiˬ ngaˬ hui htaꞈ nyi bawˬ ve laiˉ hkʼaˇ cawˬ ve yoˬ. Mvuhˇ miˬ uˉ peunˍ ve htaꞈ ngaˬ hui choˬ paˉ oˉ paˉ maˇ chehˇ leh maꞈ kaꞈ maˇ te. Gʼuiˬ sha ve mvuhˇ miˬ ceh tiˉ chaw yaˇ dawˇ sha gawˬ lehˍ ve te laˇ gʼa ve tehꞈ ngaˬ hui hto toˇ ve yoˬ. Ngaˬ hui Yaˬhoˉvaˬ ve awˬ meh hto toˇ leh yawˇ ve awˬ liˇ awˬ hkʼaˇ hteˇ ve cawˇ ve htaꞈ na yuˬ ve yoˬ. Chi hkʼoˆ kaꞈ, miˬ guiˬ ve uˉ peunˍ shehˍ hpaˇ lehˬ, heˍ puiˉ jaˇ leh tiˇ pehˍ shehˍ hpaˇ hpehꞈ leh maˇ maw ve awˬ yanˇ Saˍtanˍ htaꞈ caˉ daꞈ ve hkʼa peu˗eˬ te luˬ piˇ tuˬ yoˬ tehꞈ, awˬ nu ve chaw htaꞈ kʼoˆ piˇ ve yoˬ. (Yoˇhanˬ 8:44) Saˍtanˍ leh yawˇ ve chaw ngaˬ hui Gʼuiˬ sha ve kanˉ te ve htaꞈ jehˇ tuˬ te laˇ ve htawˇ, yawˇ hui te maˇ gʼa taˬ. Yaˬhoˉvaˬ htaꞈ chiˇ mvuh tuˬ ngaˬ hui te gʼa ve hkʼe te ve yoˬ. Saˍtanˍ kanˇ paˆ cawˬ jaˇ leh daꞈ ve awˬ lawn sha tanˇ hto toˇ ve teˇ kaˬ le le lo maˇ gaˬ tuˬ tawˍ laˇ ve htawˇ, yawˇ maˇ te gʼa jaw. Yaˬhoˉvaˬ ngaˬ hui htaꞈ maˇ haꞈ shaˉ laˇ ve kʼo, chi hpehꞈ kʼai maˇ gʼa.—Iˉsaˍyaˆ liꞈ 54:15, 17 gʼaw sheˍ.

16. Tuꞈ jaˇ hkanˍ jaˇ htaˇ Yaˬhoˉvaˬ yawˇ ve chaw htaꞈ hkʼaˬ hkʼe ga piˇ tuˬ le?

¹⁶ Awˬ gʼuˇ suhˍ hpawˇ aˬ htoꞈ ma hpehꞈ la tuˬ le? Yaˬhoˉvaˬ anˇ lawꞈ lawꞈ ve hkʼaw yawˇ ve chaw htaꞈ 2 hkʼaˇ ga piˇ tuˬ yoˬ. 1 hkʼaˇ lehˬ, miˬ guiˬ hkʼoˆ ve jawˇ mawˇ hkʼa peu˗eˬ Baˍbuˍlonˍ htaꞈ te luˬ leh chi lehˬ maˇ heˆ heˆ ve bon liˇ hkʼa peu˗eˬ htaꞈ kʼoˆ gaˇ ve yoˬ. Oˇ ve teˇ yanˇ, Yaˬhoˉvaˬ yawˇ ve kanˉ te ve ka tiꞈ yeˬ ve chaw htaꞈ ponˬ piˇ tuˬ yoˬ. (Hpeuꞈ maˍ ve 17:16-18; 18:2, 4) Peuˬ hkʼawꞈ nawˉ Saˍtanˍ ve awˬ yanˇ leuˉ taˍ ve htaꞈ Aˍmaˍgeˍdonˍ hkʼaw te luˬ piˇ leh Gʼuiˬ sha yawˇ ve chaw htaꞈ ponˬ piˇ tuˬ yoˬ.—Hpeuꞈ maˍ ve 7:9, 10; 16:14, 16.

17. Ngaˬ hui hkʼaˬ htaˆ kaꞈ Yaˬhoˉvaˬ geh meuˆ daꞈ ve kʼo, aˬ htoꞈ ma awˬ bon gʼa tuˬ ve le?

¹⁷ Ngaˬ hui hkʼaˬ htaˆ kaꞈ Yaˬhoˉvaˬ geh meuˆ daꞈ ve kʼo, Saˍtanˍ ngaˬ hui htaꞈ co co te luˬ laˇ maˇ gʼa. Saˍtanˍ htaꞈ co co te luˬ piˇ tuˬ yoˬ. (Roˉmaꞈ 16:20) Chi htaꞈ pa taw, Gʼuiˬ sha peꞈ laˇ ve laꞈ caˉ hkʼa peu˗eˬ htaꞈ nawˬ hkʼa dehꞈ veuꞈ deh leh hpfuhˇ taˍ˗oꞈ. Nawˬ teˇ gʼaˇ ceh tiˉ taˇ tawˍ daꞈ. Awˬ viˉ awˬ nyi htaꞈ ga laˇ tcuh sheˍ. Leh Yaˬhoˉvaˬ beˆ maˍ laˇ ve htaꞈ gʼaꞈ te sheˍ. Nawˬ chi ve teˇ hpaˍ htaꞈ gʼaꞈ te ve kʼo, nawˬ htaꞈ haꞈ ve Awˬ pa Gʼuiˬ sha nawˬ htaꞈ awˬ gʼaˇ peꞈ laˇ leh haꞈ shaˉ laˇ tuˬ tehꞈ yonˍ gʼa ve yoˬ.—Iˉsaˍyaˆ 41:10.