TCUH KAˍ PAˍ TAWˇ HKAWˇ 2. MEUꞈ VE KAˆ VE

“Meuꞈ ve kaˆ ve htawˇ cawˬ la tuˬ yoˬ.”—MAˍKUˆ 13:8.

● Hawˉ hk’aˆ teˇ g’aˇ Niˇjaˇ mvuhˇ miˬ hk’aˆ teˇ hk’aˆ lo ca chehˇ˗e ve yoˬ. Meuꞈ ve kaˆ ve htaꞈ pa taw, yawˇ ve awˬ viˉ awˬ nyi kaꞈ oˇ kaˬ lo ca chehˇ la ve yoˬ. Yaꞈ hk’aˇ, hawˉ hk’aˆ chi teˇ g’aˇ dawˇ law kuiˬ maˇ cawˬ leh yawˇ teˇ g’aˇ ceh tiˉ zuhꞈ chehˇ taˍ ve yoˬ. Aˬ htoꞈ ma te yawˇ teˇ g’aˇ tiˉ chehˇ taˍ ve le? Hkʼaˆ sheh Sheh˗diˇ k’oˆ ve, “yawˇ yehˬ kʼa hkʼaw ve chaw htaꞈ hu maˇ gʼa leh yawˇ ve awˬ miˇ ma leh yaˇ ve mehˆ hpfuhˇ htaꞈ kaꞈ tawˍ daꞈ maˇ haˆ ve yoˬ.”

AWˬ TEHˬ VE Aˬ HTOꞈ MA LE? Miˬ guiˬ hkʼoˆ lo ve mvuhˇ miˬ yaˇ 7 gʼaˇ hkʼaw ve teˇ gʼaˇ teˇ nyi leh teˇ nyi caˇ tuˬ maˇ lawꞈ ve yoˬ. Aˍfaˍriˆkaˆ miˬ guiˬ Sha˗ha˗la lo shehˇ de teˇ tawn lo mvuhˇ miˬ yaˇ 3 gʼaˇ hkʼaw ve teˇ gʼaˇ lehˬ caˇ tuˬ maˇ gʼa caˇ ve yoˬ. Yehˬ kʼa teˇ yehˬ kʼa awˬ pa awˬ e leh yaˇ ehˉ cawˬ ve htaꞈ dawˇ nyi sheˍ. Caˇ tuˬ 2 gʼaˇ awˬ pon ceh tiˉ cawˬ ve kʼo, a shu teˇ g’aˇ gʼa meuꞈ jehˇ tuˬ le? Awˬ pa laˇ? Awˬ e laˇ? Maˇ heˆ leh yaˇ laˇ? Yehˬ kʼa hkʼaw caˇ tuˬ maˇ cawˬ ve lehˬ a shu teˇ g’aˇ caˇ tuˬ teˇ nyi le le gʼa dawˇ cheˆ ve yoˬ.

MAˇ˗AWˍ VE CHAW HKʼAˬ HKʼE K’Oˆ VE LE? Miˬ guiˬ hkʼoˆ lo caˇ tuˬ maˇ maˇ cawˬ leh chaw yaˇ awˬ pon caˇ lawꞈ dawˬ lawꞈ ve yoˬ. Yaꞈ hk’aˇ, caˇ tuˬ dawˬ tuˬ htaꞈ hkʼa dehꞈ gʼa nyi haꞈ shaˉ ve yoˬ.

CHI HK’E K’Oˆ VE AWˬ HKʼAˇ CA-AW LAˇ? Oˇ htaˇ te gʼa ve aꞈ kehˉ chi teˇ hkui mawˇ ti caˇ ve chaw lehˬ caˇ tuˬ te gʼa maˇ jaˇ leh awˬ nu ve mvuhˇ miˬ lo kaꞈ hawˇ piˇ gʼa ve yoˬ. Mvuhˇ miˬ kanˉ te paˍ lehˬ caˇ tuˬ dawˬ tuˬ hpawˇ awˬ hkʼaˇ gu gʼa leh meuꞈ ve kaˆ ve maˇ cawˬ tuˬ kaꞈ gu gʼa ve yoˬ hehˉ. Mvuhˇ miˬ kanˉ te paˍ hui awˬ hkʼaˇ chi htaꞈ gu laˬ ve laiˉ chi hkʼawꞈ gaˬ˗oˬ ve htawˇ, chi ve htaꞈ gu maˇ gʼa sheˍ.

NAWˬ HKʼAˬ HKʼE DAWˇ VE LE? Maˍkuˆ liꞈ 13:8 hkʼaw tcuh kaˍ paˍ ve tawˇ hkawˇ chi awˬ tehˬ hpehꞈ la chehˇ ve laˇ? Cuˇ yiˍ cawˬ paˍ awˬ hkʼeun teˇ hpaˍ awˬ suhˉ awˬ suhˉ cawˬ maˇ jaˇ ve htawˇ, miˬ guiˬ hkʼoˆ lo caˇ tuˬ dawˬ tuˬ hpawˇ hkʼa dehꞈ maˇ lawꞈ sheˍ.

Miˬ hiˆ leh caˇ tuˬ dawˬ tuˬ maˇ lawꞈ htaˇ, shoꞈ shaꞈ ve laiˉ ceuˬ cawˬ la ve yoˬ. Chi ve teˇ hpaˍ lehˬ awˬ leh meuˇ ve awˬ yanˇ hkʼaw chehˇ taˍ ve awˬ heˆ hpehꞈ ve yoˬ.

[Awˇ ceˍ awˇ fa]

“Awˬ tsuhˇ hpoˆ a naˍ, gʼoˇ peꞈ awˬ nyi te ve, leh awˬ nu ve a naˍ teˇ hpaˍ htaꞈ pa taw g’a suh-e ve yaˇ 3 gʼaˇ hkʼaw ve teˇ gʼaˇ caˇ tuˬ dawˬ tuˬ lawꞈ ve kʼo, ponˬ gʼa tuˬ yoˬ hehˉ.”—EH VE˗NE˗MA, Oˇ HTAˇ MVUHˇ MIˬ AWˬ MOˍ LONˉ YAˇ HPAWˇ NYI HAꞈ SHAˉ VE CHAW.

[Awˬ han yuˬ laˬ kuiˬ]

© Paul Lowe/Panos Pictures