TCUH KAˍ PAˍ TAWˇ HKAWˇ 5. MIˬ GUIˬ HTAꞈ TE LUˬ VE

‘Miˬ guiˬ htaꞈ te luˬ ve chaw teˇ hpaˍ htaꞈ G’uiˬ sha te luˬ piˇ tuˬ yoˬ.’—HPEUꞈ MAˍ VE 11:18.

● Fen lehˬ Nai˗jeˇriˇ˗aˇ mvuhˇ miˬ Kaˬpon hk’aˆ lo chehˇ ve yoˬ. Tawˉ kaw veˆ htaꞈ shawˆ leh dawˬ tuˬ te ve yoˬ. Nai˗jeˇriˇ˗aˇ mvuhˇ miˬ iˉ kaˆ lawˬ lo naˍ manˇ pawˬ˗e leh loꞈ la maˇ jaˇ ve pa taw, yawˇ ve kanˉ htaꞈ heuˆ la kuiˬ cawˬ ve yoˬ. Yawˇ k’oˆ ve, “naˍ manˇ chi htaꞈ pa taw, ngaˇ suh˗e ve, ngaˬ hui maˇ chehˇ sha tuˬ te laˇ ve, leh iˉ kaˆ lawˬ luˬ k’ai tuˬ kaꞈ te laˇ ve yoˬ. Ngaˬ aˬ htoꞈ ma k’awꞈ te caˇ tuˬ naˍ kaꞈ maˇ shiˍ˗o.”

AWˬ TEHˬ VE Aˬ HTOꞈ MA LE? Cuˇ yiˍ cawˬ paˍ teˇ hpaˍ k’oˆ ve, laˇ tsuhˇ laˉ shaˆ g’uiˬ hk’aw teˇ hk’awꞈ le le maˇ daꞈ ve mawˇ 6.5 hinˉ lanˬ kiˇ loˇ g’awˆ baˬ keu ve yoˬ. Maˇ daꞈ ve mawˇ baˬ taˍ ve chi teˇ hpaˍ 50 peu she k’o, baiˇlaˇshiˍtiˆ hpehꞈ leh baˬ taˍ ve chi teˇ hpaˍ lehˬ laiˉ ha hk’awꞈ gaˬ˗oˬ htaˇ hehꞈ hpeuˇ˗e ve yoˬ. Chaw yaˇ miˬ guiˬ htaꞈ te luˬ ve awˬ hk’oˆ kaꞈ, suhˆ jehˬ hawˆ jehˬ teˇ hpaˍ htaꞈ kaꞈ te luˬ ve yoˬ. Chaˬ nyi tehˆ nyi mawˬ ve hk’aw k’oˆ ve, miˬ guiˬ hk’oˆ lo ve suhˆ jehˬ hawˆ jehˬ 1 hk’awꞈ ve awˬ yanˇ hk’aw luˬ k’ai taˍ ve teˇ hpaˍ awˉ lawˉ htaˇ hk’e hpehꞈ la tuˬ awˬ yanˇ 1 hk’awꞈ leh 5 ha pa g’a yehˇ ve yoˬ. Awˆsaˍteˇriˇaˇ mvuhˇ miˬ liꞈ sha tanˇ teˇ kʼoˆ hkʼaw kʼoˆ ve, “chaw yaˇ g’aˇ hteꞈ maˇ la leh suhˆ jehˬ hawˆ jehˬ htaꞈ leuˉ leh te luˬ ve k’o, 2035 hk’awꞈ gaˬ k’o miˬ guiˬ 2 peˆ cawˬ tuˬ loˍ ve yoˬ.”

MAˇ˗AWˍ VE CHAW HK’Aˬ HK’E K’Oˆ VE LE? Chaw yaˇ cuˇ yiˍ cawˬ leh suhˆ teˇ hpaˍ htaꞈ yuˬ yehˇ leh laiˉ ceuˬ te gʼa ve yoˬ. Ngaˬ hui miˬ guiˬ chi daꞈ la tuˬ k’awꞈ gu g’a leh haꞈ shaˉ g’a ve yoˬ.

CHI HK’E K’Oˆ VE AWˬ HK’Aˇ CA˗AW LAˇ? Chaw maˇ maˇ leh awˬ moˍ teˇ hpaˍ suhˆ jehˬ hawˉ jehˬ teˇ hpaˍ htaꞈ haꞈ shaˉ leh a yeˇ yuˬ tuˬ awˬ g’aˇ piˇ ve yoˬ. Yaꞈ hk’aˇ, miˬ guiˬ htaꞈ chaw maˇ maˇ te luˬ chehˇ sheˍ ve yoˬ.

NAWˬ HK’Aˬ HK’E DAWˇ VE LE? Ngaˬ hui chehˇ ve miˬ guiˬ htaꞈ G’uiˬ sha dawˇ taˍ ve hk’e maˇ g’a te luˬ tuˬ leh haꞈ shaˉ laˇ tuˬ nawˬ dawˇ k’o loˍ-aw laˇ?

Tcuh kaˍ paˍ ve tawˇ hkawˇ 5 hkawˇ k’oˆ k’ai peuˬ˗oˬ ve awˬ hk’oˆ kaꞈ, Liꞈ hpu hk’aw awˬ g’uˇ suhˍ htaˇ kaꞈ k’oˆ laˇ taˍ ve, awˬ leh meuˇ ve awˬ yanˇ hk’aw ha lehˬ ve awˬ ceuˬ kaꞈ cawˬ la tuˬ yoˬ. Tcuh kaˍ paˍ ve tawˇ hkawˇ 6 hkawˇ teˇ hkawˇ htaꞈ k’awꞈ chaˬ nyi sheˍ.

[Awˇ ceˍ awˇ fa]

“Ngaˬ daꞈ jaˇ miˬ guiˬ awˬ shehˍ hpaˇ hpehꞈ jaw ve htawˇ, chi teˇ hkui mawˇ maˇ daꞈ ve g’awˆ baˬ kuiˬ awˬ shehˍ hpaˇ hpehꞈ ve tehꞈ ngaˬ dawˇ ve yoˬ.”—E-LE HTEH-BEU, AˍMEˬRIˆKAꞈ MVUHˇ MIˬ LAˇ TSUHˇ G’UIˬ PFUHˍ LO CHEHˇ LEH 2010 HK’AWꞈ HTAˇ, YAWˇ CHEHˇ KUIˬ TEˇ TAWN LO LAˇ TSUHˇ G’UIˬ LO NANˍ MAˇ SHEˆ LOˍ LA VE HEUˆ LA KUIˬ CAWˬ VE HTAꞈ K’Oˆ VE YOˬ.

[Awˇ ceˍ awˇ fa]

G’uiˬ sha tuꞈ ve hkanˍ ve cawˬ tcuh laˇ ve laˇ?

Liꞈ hpu hk’aw G’uiˬ sha k’oˆ taˍ ve, chi teˇ hkui ngaˬ hui mawˬ chehˇ ve hk’a shuˍ haiˬ ve awˬ ceuˬ g’aˇ hteꞈ cawˬ tuˬ yoˬ. K’oˆ gaˇ ve lehˬ G’uiˬ sha ngaˬ hui htaꞈ tuꞈ ve hkanˍ ve hpuˇ tcuh laˇ ve laˇ? Yaˬhoˉvaˬ ve Shaˉhkiˆhkanˍ ve chaw yanˍ tawˆ taˍ ve Liꞈ hpu awˬ hkʼaw lo awˬ tehˬ awˬ na aˬ htoꞈ ma maˍ ve le? awˬ lawn 11 hk’aw hk’awꞈ laˇ hkawˇ htaꞈ ca g’a tuˬ yoˬ.

[Awˬ han yuˬ laˬ kuiˬ]

U.S. Coast Guard photo