TCUH KAˍ PAˍ TAWˇ HKAWˇ 6. MIˬ GUIˬ CHI HKʼOˆ TEˇ KAˬ LE LE LO HA LEHˬ VE BON HKAWˇ HTO TOˇ VE
TCUH KAˍ PAˍ TAWˇ HKAWˇ 6. MIˬ GUIˬ CHI HKʼOˆ TEˇ KAˬ LE LE LO HA LEHˬ VE BON HKAWˇ HTO TOˇ VE
“Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ.”—MAꞈHTEHˍ 24:14.
● Vai˗a-te lehˬ Paˬciˬfeˆ laˇ tsuhˇ laˉ shaˆ gʼuiˬ hk’aw Tu-a˗mo˗to vuiˇ jaˇ kuiˬ teˇ kaˬ lo chehˇ ve yoˬ. Tu-a˗mo˗to conˇ awˬ ti laˇ tsuhˇ laˉ shaˆ gʼuiˬ hkʼaw ve conˇ 80 conˇ laˇ tsuhˇ gʼuiˬ hkʼaw mvuhꞈ hkʼa biˇ cawˬ ve yoˬ. Yaꞈ hk’aˇ, conˇ chi ve hkʼaw chaw yaˇ 16,000 gʼaˇ ceh tiˉ chehˇ ve yoˬ. Chi hkʼe hpehꞈ ve htawˇ, Vai˗a-te leh awˬ chawˇ Shaˉhkiˆhkanˍ ve chaw htaꞈ gʼa mawˬ daꞈ ve yoˬ. Aˬ htoꞈ ma pa taw le? Awˬ lawn kʼo, Shaˉhkiˆhkanˍ ve chaw lehˬ hkʼaˬ kaˬ lo chehˇ ve chaw htaꞈ htawˇ maˇ kʼoˆ G’uiˬ sha ve mvuhˇ miˬ daꞈ ve awˬ lawn sha tanˇ teˇ gʼaˇ le le htaꞈ hto maˍ piˇ gaˇ ve yoˬ.
AWˬ TEHˬ VE Aˬ HTOꞈ MA LE? G’uiˬ sha ve mvuhˇ miˬ daꞈ ve awˬ lawn sha tanˇ miˬ guiˬ hkʼoˆ teˇ kaˬ le le lo ca maˍ piˇ chehˇ ve yoˬ. 2010 hkʼawꞈ htaˇ, Yaˬhoˉvaˬ ve Shaˉhkiˆhkanˍ ve chaw lehˬ 236 mvuhˇ miˬ hkʼaw 1.6 hinˉ lanˬ naˍ riꞈ hto toˇ ve yoˬ. Shaˉhkiˉhkanˍ ve chaw 1 gʼaˇ lehˬ, teˇ nyi ve hkʼaw awˬ yanˇ 30 miꞈ niꞈ hto toˇ ve yoˬ. Ponˬ laˬ ve 10 hkʼawꞈ htaˇ, yawˇ hui Liꞈ hpu henˇ tuˬ ve laꞈ caˉ 2 meunˍ lanˬ kʼoˆ yanˍ tawˆ leh piˇ ve yoˬ.
MAˇ˗AWˍ VE CHAW HKʼAˬ HKʼE K’Oˆ VE LE? Liꞈ hpu hkʼaw ve awˬ lawn sha tanˇ hto toˇ ve laiˉ hkʼawꞈ gaˬ-oˬ ve yoˬ.
CHI HKʼE KʼOˆ VE AWˬ HKʼAˇ CA˗AW LAˇ? Liꞈ hpu hkʼaw ve awˬ lawn chaw maˇ maˇ hto toˇ jaw ve awˬ tehˬ hpehꞈ ve yoˬ. Yaꞈ hk’aˇ, maˇ˗awˍ ve chaw teˇ hkui teˇ yanˇ maˇ heˆ leh teˇ kaˬ kaˬ ceh hto toˇ ve yoˬ. Yaꞈ hk’aˇ, Yaˬhoˉvaˬ ve Shaˉhkiˆhkanˍ ve chaw miˬ guiˬ chi hkʼoˆ lo hto toˇ ve kanˉ hteˇ hteˇ shawˇ shawˇ te leh laiˉ ha lanˬ gʼaˇ gʼa kaˇ ve yoˬ. Yawˇ hui htaꞈ kanˇ paˆ cawˬ ve chaw leh haiˬ jaˇ ve awˬ moˍ fawˉ mehˍ piˇ ve htawˇ hto maˍ piˇ sheˍ ve yoˬ. a (Maˍkuˆ 13:13) Chi hkʼoˆ kaꞈ, Yaˬhoˉvaˬ ve Shaˉhkiˆhkanˍ ve chaw hto toˇ ve lehˬ awˬ hpfuhˇ maˇ gʼa. Yawˇ hui a shu yawˇ ve awˬ yanˇ yuˬ tanˇ leh liꞈ kʼoˆ yanˍ tawˆ taˍ ve awˬ nu ve chaw htaꞈ piˇ ve awˬ hpfuhˇ maˇ heuˆ. Yawˇ hui te ve kanˉ hkʼa peu˗eˬ lehˬ ha lehˬ ha kʼa ve hkʼaw te ve yoˬ.
NAWˬ HKʼAˬ HKʼE DAWˇ VE LE? “Gʼuiˬ sha ve mvuhˇ miˬ ha lehˬ ve bon hkawˇ” teˇ kaˬ le le lo hto toˇ chehˇ˗aw laˇ? Tcuh kaˍ paˍ ve tawˇ hkawˇ chi awˬ tehˬ hpehꞈ ve lehˬ awˬ gʼuˇ suhˍ hpawˇ daꞈ jaˇ ve awˬ ceuˬ gaˬ la chehˇ˗oˬ ve laˇ?
[Awˬ maiˉ]
a Awˬ leuˉ kʼawꞈ shiˍ gaˇ ve kʼo, Yaˬhoˉvaˬ ve Shaˉhkiˆhkanˍ ve chaw te tawˆ taˍ ve VDO hkʼaw “Lawˇ nyi piˇ ve htawˇ ka tiꞈ yeˬ ve” leh “Hpa nyiˉ naˆ˗meuˉ lehˍ ve shehˆ ceˍ shehˆ fa” leh “Naˍziˬ uˉ peunˍ ve fawˉ mehˍ piˇ ve htawˇ Yaˬhoˉvaˬ ve Shaˉhkiˆhkanˍ ve chaw ka tiꞈ yeˬ ve” hkʼaw nyi sheˍ. (Laˇhuˍ hkawˇ maˇ cawˬ.)
[Awˇ ceˍ awˇ fa]
“Yaˬhoˉvaˬ a hkaw˗anˬ peꞈ laˇ sheˍ ve ceh ceh ngaˬ hui Gʼuiˬ sha ve mvuhˇ miˬ daꞈ ve awˬ lawn sha tanˇ kaiˬ ve hkʼaw hto toˇ leh mvuhˇ miˬ yaˇ gʼa kaˇ tuˬ te gʼa ve hk’e teˇ ceuˬ le le te tuˬ yoˬ.”—2010 HKʼAWꞈ YAˬHOˉVAˬ VE SHAˉHKIˆHKANˍ VE CHAW TEˇ HKʼAWꞈ TEˇ PAWˆ TAWˆ VE LIꞈ KʼOˆ.