Ngaˬ yaˇ ehˉ htaˇ kaꞈ suhˆ cehˬ hawˆ cehˬ htaꞈ dawˇ cawˇ jaˇ. Ngaˬ ve yehˬ k’a Fiˬlanˬ mvuhˇ miˬ hk’aw Yu-vehˆhkeuꞈ venˇ lo heh puiˉ hk’aw lo daꞈ ve awˬ ceuˬ htaꞈ nyi tuˬ leh laˇ tsuhˇ laˇ shaˆ g’uiˬ lo guiˇ-e ve kaꞈ dawˇ cawˇ ve yoˬ. Ngaˬ to nuˇ to shaˆ htaꞈ haꞈ jaˇ. Ngaˬ yaˇ ehˉ htaˇ mehˉ nyi leh hpuiˇ teˇ hk’eh le le mawˬ ve htaꞈ kuˉ gaˇ ve yoˬ. Ngaˬ uiˍ la-oˬ htaˇ, awˬ nu ve chaw to nuˇ to shaˆ htaꞈ naˬ htaweh te ve htaꞈ ngaˬ maˇ dawˇ cawˇ. Peuˬ leh to nuˇ to shaˆ nyi haꞈ shaˉ ve hpawˇ awˬ moˍ hk’aw ngaˬ chehˇ leh dawˇ hk’aˇ hk’a shuˍ ve laiˉ g’aˇ htaꞈ mawˬ daꞈ ve yoˬ.

To nuˇ to shaˆ htaꞈ naˬ htaweh maˇ g’a te tuˬ ve awˬ liˇ teh tuˬ ngaˬ hui a hkaw-anˬ lawˬ ve yoˬ. To nuˇ to shaˆ ve awˬ mvuh aˉ poꞈ te hawˇ ve sainˍ leh teˇ ceuˬ ceuˬ shiˍ gaˇ leh to nuˇ to shaˆ htaꞈ lawˇ nyi piˇ kuiˬ pawehˇ htaꞈ kaꞈ ngaˬ hui liꞈ ca piˇ leh chi teˇ hpaˍ htaꞈ tawˍ daꞈ ve yoˬ. To nuˇ to shaˆ htaꞈ haꞈ shaˉ tuˬ awˬ moˍ ngaˬ hui hk’aˇ ngaˬ hui teh ve yoˬ. Yaꞈ hk’aˇ, ngaˬ hui tawˍ piˇ htaˇ, hehnˇ jaˇ ve awˬ hk’aˇ htaꞈ yehˇ ve pa taw, mvuhˇ miˬ kanˉ te paˍ htaꞈ awˬ lawn cawˬ daꞈ hkʼeh ve yoˬ. Ngaˬ kaꞈ shu yuˬ k’ai leh shaˉ nanˉ hkʼaw suhˉ laiˉ pawˆ jehˬ laˇ jaw ve yoˬ.

Ngaˬ to nuˇ to shaˆ htaꞈ dawˇ haˍ ve awˬ hk’oˆ kaꞈ, miˬ guiˬ hk’oˆ lo shoꞈ shaꞈ ve laiˉ ceuˬ htaꞈ ngaˬ g’a mawˬ htaˇ, nyi ma naˬ jaˇ. Awˬ leh meuˇ htaˇ awˬ nu ve kanˉ hk’aˇ laiˉ moˍ hk’aw ngaˬ chehˇ ve yoˬ. Awˬ moˍ chi teˇ hpaˍ htaꞈ awˬ g’aˇ piˇ tuˬ ngaˬ ve awˬ g’aˇ awˬ shaˉ kaꞈ yuˬ tanˇ jaˇ. Haˍ ve g’awˇ ve chaw, meuꞈ ve kaˆ ve chaw, leh shu hk’e leˇ maˇ g’a ve chaw, chi ve teˇ hpaˍ hteˇ ve cawˇ ve gʼa tuˬ a hkaw-anˬ ngaˬ coˇ caˇ leh ca lawˬ˗e ve yoˬ.

Awˬ leh meuˇ htaˇ, miˬ guiˬ hkʼoˆ lo chaw yaˇ te chehˇ ve awˬ ceuˬ htaꞈ ngaˬ pa piˇ maˇ g’a ve tehꞈ shiˍ ve yoˬ. Kanˉ hk’aˇ awˬ moˍ chi ve teˇ hpaˍ shoꞈ shaꞈ ve a ciˉ ceh tiˉ gu piˇ g’a ve yoˬ. Yaꞈ hk’aˇ, shoꞈ shaꞈ ve awˬ ceuˬ g’aˇ hteꞈ k’awꞈ cawˬ maˇ ve yoˬ. Nyi˗a kʼo, haiˬ ve kanˇ paˆ miˬ guiˬ chi hk’oˆ uˉ peunˍ chehˇ leh hk’aˬ hk’e hpehꞈ la chehˇ ve htaꞈ teˇ g’aˇ-ehꞈ kaꞈ a yeˇ maˇ yuˬ ve yoˬ. Ngaˬ teꞈ chiˉ ga piˇ maˇ g’a tehꞈ dawˇ ve yoˬ.

Ngaˬ teꞈ chiˉ te maˇ g’a ve pa taw nyi ma luˬ jaˇ. Ngaˬ lehˬ G’uiˬ sha leh Liꞈ hpu hk’aw cawˬ ve awˬ lawn htaꞈ tanˬ dawˇ nyi ve yoˬ. Chi awˬ g’uˇ suhˍ htaˇ, ngaˬ Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ jaw ve yoˬ. Shaˉhkiˆhkanˍ ve chaw lehˬ shiˍ puiˉ leh ngaˬ awˬ pon dawˇ haˍ laˇ ve htaꞈ shiˍ ve htawˇ, oˇ ve teˇ yanˇ ngaˬ ve dawˇ hk’aˇ pa tuˬ maˇ dawˇ nyi sheˍ. Yaꞈ hk’aˇ, chi teˇ hkui laiˉ ceuˬ maˇ shuˍ daꞈ-o.

Ngaˬ Liꞈ hpu htaꞈ yuˬ leh tanˬ g’aw nyi ve yoˬ. Liꞈ hpu lehˬ nyi ma sha tuˬ te laˇ ve naˆ tsuhˇ htaꞈ shuˍ ve yoˬ. Liꞈ hpu laiˉ tawn hk’aw to nuˇ to shaˆ htaꞈ ha k’aˉ ve hk’aw te piˇ tuˬ maˍ laˇ ve htaꞈ ngaˬ g’a mawˬ ve yoˬ. Tawˇ pa haˉ te k’o, Tawˇ naˉ ve liꞈ 12:10 hk’aw k’oˆ ve, “daꞈ ve chaw lehˬ a shu yawˇ ve ceˇ htaꞈ haꞈ shaˉ puiˉ ve yoˬ.” Miˬ guiˬ chi hk’oˆ lo shoꞈ shaꞈ ve g’a hpuˇ ve lehˬ G’uiˬ sha te laˇ ve maˇ heˆ tehꞈ ngaˬ g’a shiˍ ve yoˬ. Maˇ-awˍ ve chaw G’uiˬ sha beˆ maˍ laˇ ve tawˇ hkawˇ htaꞈ maˇ g’aꞈ te ve pa taw, shoꞈ shaꞈ ve g’aˇ hteꞈ maˇ la ve yoˬ. Yaˬhoˉvaˬ lehˬ ha k’aˉ puiˉ leh yeunˇ hkanˍ puiˉ jaˇ ve htaꞈ ngaˬ g’a henˇ htaˇ, dawˇ cawˇ jaˇ.—Chiˇ mvuh ve 103:8-14.

Oˇ ve teˇ yanˇ Liꞈ hpu awˬ hkʼaw lo awˬ tehˬ awˬ na aˬ htoꞈ ma maˍ ve le? k’oˆ ve liꞈ k’oˆ htaꞈ ngaˬ g’a mawˬ ve yoˬ. Liꞈ hpu henˇ tuˬ awˬ tcuhˆ puiˍ lo ngaˬ liꞈ bvuhꞈ k’ai ve yoˬ. Peuˬ hkʼawꞈ nawˉ maˇ maw, Shaˉhkiˆhkanˍ ve chaw teˇ ca ngaˬ aˉ hk’aw lo laˬ leh Liꞈ hpu henˇ tuˬ jehˬ laˇ ve yoˬ. Ngaˬ henˇ-a k’oˆ piˇ leh G’uiˬ sha ve mvuhˇ miˬ hpawnˬ daꞈ kuiˬ yehˬ lo ngaˬ tanˬ hpawnˬ daꞈ˗e ve yoˬ. Ngaˬ awˬ bon g’a ve lehˬ, Liꞈ hpu hk’aw awˬ tehˬ ve ngaˬ ve nyi ma hk’aw gaˬ ve yoˬ.

Liꞈ hpu lehˬ ngaˬ aꞈ shaꞈ teꞈ hk’aˇ hk’aw laiˉ ceuˬ pa tuˬ ga laˇ ve yoˬ. Ngaˬ shuˉ leh tsuhˬ kaꞈ maˇ dawˬ-o. Ngaˬ veuꞈ k’aˇ veuꞈ ve, oˉ k’oˍ mvuh nuˆ ve, leh tawˇ yaw ve awˬ hk’aˇ kaꞈ k’awꞈ pa ve yoˬ. Ngaˬ mvuhˇ miˬ uˉ peunˍ paˍ htaꞈ kaꞈ yawˆ yan la ve yoˬ. (Roˉmaꞈ 13:1) Chi hk’oˆ kaꞈ, oˇ htaˇ k’o ngaˬ haiˬ jaˇ leh laiˉ ceuˬ te ve htawˇ, chi teˇ hkui maˇ te-o.

Pa tuˬ haˍ jaˇ ve teˇ ceuˬ lehˬ, kanˉ hk’aˇ awˬ moˍ chi ve hk’aw te hk’aˇ dawˇ hk’aˇ teˇ haˉ tiˉ pa tuˬ te maˇ g’a. Awˉ lawˉ htaˇ, ngaˬ awˬ moˍ chi ve hk’aw lawˬ tawˆ-e ve k’o, hpfuhˆ paˍ hpehꞈ ve tehꞈ dawˇ ve yoˬ. Yaꞈ hk’aˇ, G’uiˬ sha ve mvuhˇ miˬ ceh tiˉ ngaˬ hui awˬ pon dawˇ law kuiˬ cawˬ ve tehꞈ, ngaˬ na g’a la ve yoˬ. Ngaˬ ve awˬ g’aˇ awˬ shaˉ hk’a peu-eˬ G’uiˬ sha ve mvuhˇ miˬ hpawˇ ga piˇ leh shu awˬ lawn chi htaꞈ henˇ la tuˬ, ga piˇ tuˬ ngaˬ dawˇ cheˆ ve yoˬ.—Maꞈhtehˍ 6:33.

Chaw yaˇ awˬ pon hteˇ ve cawˇ ve g’a tuˬ ngaˬ tawˍ daꞈ htaˇ, chaw yaˇ lehˬ daꞈ ve leh maˇ daꞈ ve 2 hk’aˇ ceh tiˉ cawˬ ve tehꞈ ngaˬ dawˇ ve yoˬ. A shu teˇ g’aˇ haiˬ ve k’o, ngaˬ laꞈ haˉ k’awꞈ te hk’awꞈ piˇ ve yoˬ. Yaꞈ hk’aˇ, ngaˬ Liꞈ hpu g’a henˇ htaˇ, awˬ nu ve chaw htaꞈ maˇ nyi bawˬ-oˬ leh Hkriꞈ yaˇ haꞈ pehnˇ ve cawˬ ve hk’e, ngaˬ cawˬ tuˬ te ve yoˬ. (Maꞈhtehˍ 5:44) Haꞈ pehnˇ ve ngaˬ cawˬ ve teˇ hk’aˇ lehˬ, shu htaꞈ G’uiˬ sha ve mvuhˇ miˬ daꞈ ve awˬ lawn sha tanˇ hto maˍ piˇ ve yoˬ. Chaw yaˇ dawˇ sha gawˬ lehˍ ve, ha lehˬ ve, awˬ tehˬ dawˇ law kuiˬ cawˬ tuˬ ngaˬ g’a ga piˇ ve ha lehˬ jaˇ.

Shoꞈ shaꞈ ve leh dawˇ haˍ dawˇ hkiˉ ve teˇ ceuˬ le le ngaˬ Yaˬhoˉvaˬ htaꞈ chiˇ aꞈ piˇ htaˇ, ngaˬ nyi ma sha la ve yoˬ. Ngaˬ hui ve hpanˍ shehˍ hpaˇ lehˬ to nuˇ to shaˆ leh chaw yaˇ htaꞈ hk’aˬ htaˆ kaꞈ naˬ taweh maˇ te tcuh tehꞈ ngaˬ yonˍ g’a ve yoˬ. Miˬ guiˬ chi daꞈ jaˇ ve htaꞈ kaꞈ maˇ te luˬ tcuh. Maˇ maw ve awˬ yanˇ G’uiˬ sha yawˇ ve mvuhˇ miˬ htaꞈ cuˇ leh teˇ ceuˬ le le awˉ lawˉ htaˇ hk’e leˇ k’awꞈ gu te tuˬ yoˬ. (Iˉsaˍyaˆ 11:1-9) Awˬ tehˬ ve chi hk’e ve ngaˬ ve htaꞈ g’a shiˍ ve ha lehˬ jaˇ leh awˬ nu ve chaw ngaˬ hk’e leˇ yonˍ la tuˬ g’a ga piˇ ve kaꞈ ha lehˬ jaˇ. Miˬ guiˬ htaꞈ pa piˇ g’a tuˬ ngaˬ maˇ dawˇ-o.