Jaˬmaˬniˬ mvuhˇ miˬ Shehˇshaw-ne lo ngaˬ paw ve yoˬ. Ngaˬ hui ve yehˬ k’a gawˬ lehˍ cawˬ leh ha lehˬ jaˇ. Ngaˬ pa ngaˬ e ngaˬ htaꞈ daꞈ ve awˬ liˇ awˬ hk’aˇ cawˬ tuˬ maˍ laˇ ve yoˬ. Ngaˬ chehˇ ve mvuhˇ miˬ lehˬ maꞈ yaˇ uˉ peunˍ ve mvuhˇ miˬ hpehꞈ ve yoˬ. Chi htaꞈ pa taw, Shehˇshaw-ne lo hk’aw maˇ-awˍ ve chaw bon liˇ lehˬ a yeˇ maˇ uiˍ tehꞈ shawˍ ve yoˬ. Ngaˬ kaꞈ Gʼuiˬ sha cawˬ ve tehꞈ maˇ yonˍ. Paw la htaˇ te leh 18 hk’awꞈ hk’a gaˬ maꞈ yaˇ uˉ peunˍ ve leh G’uiˬ sha maˇ cawˬ tehꞈ yonˍ ve ngaˬ ve dawˇ hk’aˇ hk’aw hk’aˬ htaˆ kaꞈ cawˬ ve yoˬ.

Teˇ g’aˇ le le htaꞈ kaꞈ hk’a shuˍ-ehꞈ shawˍ ve pa taw, maꞈ yaˇ uˉ peunˍ ve htaꞈ ngaˬ dawˇ cawˇ ve yoˬ. Hteˇ ve cawˇ ve hk’aw teˇ ceuˬ le le kaꞈ hk’a shuˍ g’a pehˬ daꞈ cawˇ ve tehꞈ ngaˬ yonˍ ve yoˬ. Paw sha ve leh haˍ g’awˇ ve peuˬ k’ai tuˬ te ve yoˬ. Yaˇ nehˬ awˬ moˍ maꞈ yaˇ uˉ peunˍ ve hk’aw chehˇ ve ngaˬ dawˇ cawˇ jaˇ. Ngaˬ 14 hk’awꞈ htaˇ, maˇ-awˍ ve k’o liꞈ k’oˆ awˬ piˍ awˬ suhˉ k’awꞈ te tawˆ kuiˬ lo kanˉ te ve yoˬ. A-veˍ lo ve chaw ngaˬ kanˉ te ve htaꞈ chiˇ mvuh laˇ ve yoˬ. Oˇ kaˬ lo chehˇ ve mvuhˇ miˬ kanˉ te paˍ geh ngaˬ laꞈ shawnˍ g’a ve yoˬ. Ngaˬ yaˇ nehˬ htaˇ kaꞈ, mvuhˇ miˬ uˉ peunˍ ve chaw teˇ hpaˍ htaꞈ shiˍ daꞈ ve yoˬ. Ngaˬ a shaꞈ teꞈ hk’aˇ cawˇ ve htaꞈ leuˆ g’a-oˬ leh awˬ g’uˇ suhˍ hpawˇ daꞈ la tuˬ yoˬ tehꞈ dawˇ ve yoˬ.

1989 hk’awꞈ htaˇ, ngaˬ dawˇ taˍ ve hk’e maˇ hpehꞈ-o. Beuˬrinˍ laˇ venˇ te luˬ piˇ leh maꞈ yaˇ uˉ peunˍ ve kaꞈ luˬ k’ai ve yoˬ. Uˉyawˉpaˆ mvuhˇ nyi tawˆ hpawˇ lo shoꞈ shaꞈ ve oˇ hk’e ceh peuˬ ve maˇ heˆ. Ngaˬ chehˇ ve mvuhˇ miˬ lo maˇ hteˇ maˇ cawˇ ve cawˬ maˇ jaˇ ve ngaˬ shiˍ la ve yoˬ. Maꞈ yaˇ uˉ peunˍ ve htaꞈ maˇ ga ve chaw k’o, htawnˍ hk’aw yuˬ keu piˇ leh awˬ hk’ehꞈ nehˬ jaˇ ve tehꞈ shawˍ piˇ ve yoˬ. Chi ve hk’aˬ hk’e te hpehꞈ k’ai ve le? Aˬ htoꞈ ma te maꞈ yaˇ uˉ peunˍ ve mvuhˇ miˬ yaˇ htaꞈ hk’a shuˍ-ehꞈ maˇ te piˇ ve le? Maꞈ yaˇ uˉ peunˍ ve lehˬ zuhꞈ maˆ hk’e ceh hpehꞈ ve laˇ? Chi ngaˬ dawˇ maˇ jaˇ tuˬ te laˇ ve yoˬ.

Chi htaꞈ pa taw, ngaˬ ve dawˇ hk’aˇ pa leh tinˍ htiˆ ve leh awˬ han shawehˇ ve htaꞈ dawˇ cawˇ la ve yoˬ. Liꞈ tanˇ mvuh jaˇ ve htaꞈ henˇ peuˬ g’a tuˬ, ngaˬ tinˍ htiˆ ve maˍ kuiˬ lo henˇ ve yoˬ. Hk’e te leh ngaˬ awˬ han shawehˇ ve chaw hpehꞈ gaˇ ve yoˬ. Oˇ ve teˇ yanˇ ngaˬ pa ngaˬ e maˍ laˇ ve awˬ liˇ awˬ hk’aˇ htaꞈ a yeˇ maˇ yuˬ-o. Ngaˬ pyawˍ ve awˬ ceuˬ htaꞈ ceh tiˉ a yeˇ yuˬ ve yoˬ. Ngaˬ yaˇ miˇ laiˉ g’aˇ htaꞈ maˆ ve yoˬ. Chi hk’e hpehꞈ ve htawˇ tinˍ htiˆ ve, awˬ han shawehˇ ve, leh ngaˬ dawˇ cawˇ ve htaꞈ te-oˬ ve kaꞈ ngaˬ dawˇ haˍ dawˇ hkiˉ ve kaꞈ cawˬ sheˍ. Ngaˬ awˬ han shawehˇ taˍ ve lehˬ, ngaˬ teˇ ceuˬ ceuˬ htaꞈ kawˆ ve tehꞈ hpeuꞈ maw laˇ ve yoˬ. Awˬ g’uˇ suhˍ hpawˇ hk’aˬ hk’e hpehꞈ tuˬ le? Leh ngaˬ hui aˬ htoꞈ ma te paw la ve le?

Awˬ leh meuˇ htaˇ ngaˬ ca maw jaˇ-oˬ ve na hkawˇ htaꞈ ca g’a ve yoˬ. Hk’awꞈ laˇ hkawˇ chi ngaˬ anˇ jaˇ. Teˇ nyi mvuhˇ hpeuꞈ la htaˇ, tinˍ htiˆ ve maˍ kuiˬ lo ngaˬ chehˇ htaˇ, ngaˬ geh henˇ ve awˬ chawˇ htaꞈ awˬ g’uˇ suhˍ hpawˇ ve awˬ lawn yaw daꞈ ve yoˬ. Yaˬhoˉvaˬ ve Shaˉhkiˆhkanˍ ve chaw liꞈ henˇ yaˇ Meh-diˇ a meh ve ngaˬ hk’aˬ hk’e te cawˇ ve k’oˆ laˇ ve yoˬ. Yawˇ k’oˆ ve, “Ehˬdiˇ-oˬ, a shaꞈ leh awˬ g’uˇ hpawˇ ve awˬ lawn shiˍ gaˇ ve k’o, Liꞈ hpu hk’aw nyi-a nyi sheˍ.”

Ngaˬ laꞈ haˉ maˇ yonˍ ve htawˇ, Liꞈ hpu hk’aw aˬ htoꞈ ma k’oˆ ve htaꞈ shiˍ gaˇ ve yoˬ. Meh-diˇ ngaˬ htaꞈ Daˍyeˍlaˆ kaˇ nanˉ uiˍ 2 hpeuꞈ maˍ laˇ ve yoˬ. Mvuhˇ miˬ hk’oˆ ve kanˇ paˆ lonˉ tcuh kaˍ paˍ ve tawˇ hkawˇ k’oˆ taˍ ve hk’e hpehꞈ la ve ngaˬ g’a g’aw htaˇ anˇ jaˇ. Chi lehˬ oˇ htaˇ kaꞈ tanˬ leh chi beuꞈ hk’a gaˬ mvuhˇ miˬ teˇ hpaˍ kanˇ paˆ cawˬ ve htaꞈ k’oˆ gaˇ ve yoˬ. Meh-diˇ ngaˬ htaꞈ awˬ g’uˇ suhˍ hpawˇ ve awˬ lawn Liꞈ hpu hk’aw kaꞈ nyi tcuh laˇ sheˍ. Awˬ leh meuˇ htaˇ ngaˬ shiˍ gaˇ ve na hkawˇ htaꞈ ca mawˬ ve yoˬ! Yaꞈ hk’aˇ, tcuh kaˍ paˍ ve tawˇ hkawˇ chi teˇ hpaˍ htaꞈ bvuhꞈ ve a shu le? Awˬ g’uˇ suhˍ hpawˇ k’oˆ taˍ ve htaꞈ cawˇ ve, a shu k’oˆ g’a ve le? Maˇ heˆ leh awˬ tehˬ ve G’uiˬ sha cawˬ ve laˇ?

Ngaˬ Heu leh Eh-ce-li-kaˇ htaꞈ shiˍ daꞈ tuˬ Meh-diˇ k’oˆ laˇ ve yoˬ. Yaˬhoˉvaˬ ve Shaˉhkiˆhkanˍ ve chaw hpehꞈ ve awˬ hpawˇ awˬ miˇ ma chi teˇ ca ngaˬ Liꞈ hpu hk’aw hk’a dehꞈ shiˍ tuˬ yawˇ hui ga laˇ ve yoˬ. G’uiˬ sha ve awˬ meh htaꞈ a yeˇ uiˍ jaˇ tehꞈ shawˍ ve Yaˬhoˉvaˬ ve Shaˉhkiˆhkanˍ ve chaw teˇ moˍ tiˉ cawˬ leh yawˇ hui G’uiˬ sha ve awˬ meh htaꞈ hk’aˬ htaˆ kaꞈ yehˇ ve tehꞈ ngaˬ na g’a la ve yoˬ. (Chiˇ mvuh ve 83:18; Maꞈhtehˍ 6:9) Chaw yaˇ co co taiˍ taiˍ a shaꞈ g’a tuˬ Yaˬhoˉvaˬ awˬ yanˇ piˇ sheˍ leh Paˍraˍdiˇsuˆ hko hk’aw g’a chehˇ tuˬ tehꞈ ngaˬ na g’a la ve yoˬ. Chiˇ mvuh ve liꞈ 37:9 hk’aw k’oˆ ve, “G’uiˬ sha htaꞈ g’aˇ va ve chaw hui lehˬ, mvuhˇ miˬ hk’aw g’a chehˇ tuˬ yoˬ.” Awˬ lawn chi ngaˬ htaꞈ nyi ma pfuhˇ tuˬ te laˇ jaˇ. Liꞈ hpu hk’aw k’oˆ taˍ ve hk’e, G’uiˬ sha ve awˬ liˇ awˬ hk’aˇ htaꞈ g’aꞈ te ve chaw teˇ g’aˇ le le G’uiˬ sha ve mvuhˇ miˬ hk’aw g’a chehˇ tuˬ yoˬ.

Yaꞈ hk’aˇ, ngaˬ awˬ pon k’o, Liꞈ hpu hk’aw k’oˆ taˍ ve hk’e g’aꞈ te tuˬ haˍ jaˇ. Ngaˬ liꞈ hkawˇ ka paˍ hpehꞈ leh uiˍ muiˬ caˆ muiˬ ve cawˬ ve pa taw, nyi ma nuˇ nehˬ ve chaw hpehꞈ tuˬ g’a te jaw ve yoˬ. Chi hk’oˆ kaꞈ, maˇ daꞈ ve awˬ liˇ awˬ hk’aˇ htaꞈ maˇ te tuˬ kaꞈ haˍ ve yoˬ. Ngaˬ dawˇ hk’aˇ pa leh Liꞈ hpu hk’aw maˍ laˇ ve htaꞈ g’aꞈ te tuˬ, Yaˬhoˉvaˬ ngaˬ htaꞈ yeunˇ hkanˍ laˇ ve, ha k’aˉ laˇ ve, na g’a laˇ ve, awˬ bon uiˍ jaˇ!

Oˇ htaˇ tanˬ leh Liꞈ hpu ngaˬ ve a shaꞈ htaꞈ pa laˇ ve yoˬ. Maꞈ yaˇ leh G’uiˬ sha maˇ cawˬ tehꞈ yonˍ ve chaw ngaˬ htaꞈ 18 hk’awꞈ hk’a gaˬ heˍ laˇ ve yoˬ. Ngaˬ g’a henˇ ve awˬ ceuˬ awˬ g’uˇ suhˍ hpawˇ ve awˬ lawn htaꞈ maˇ dawˇ haˍ jaˇ tuˬ ga laˇ leh ngaˬ hui aˬ htoꞈ ma te paw la ve le tehꞈ shiˍ tuˬ ga laˇ ve yoˬ. 1993 hk’awꞈ htaˇ ngaˬ Baˆtiˆsaˬ haꞈ yuˬ leh Yaˬhoˉvaˬ ve Shaˉhkiˆhkanˍ ve chaw hpehꞈ la ve yoˬ. Leh Hta-bi-tanˇ shu Liꞈ hpu hk’aw shiˍ tuˬ ga piˇ ve nyi ma pfuhˇ ve chaw teˇ g’aˇ hpehꞈ leh 2000 hk’awꞈ htaˇ, ngaˬ yawˇ htaꞈ heuˆ daꞈ ve yoˬ. Maꞈ yaˇ leh G’uiˬ sha maˇ cawˬ tehꞈ yonˍ ve chaw heˍ piˇ ve chaw laiˉ g’aˇ htaꞈ ngaˬ hui mawˬ daꞈ ve yoˬ. Yawˇ hui Yaˬhoˉvaˬ htaꞈ shiˍ la tuˬ ngaˬ g’a ga piˇ ve ha lehˬ jaˇ.

Yaˬhoˉvaˬ ve Shaˉhkiˆhkanˍ ve chaw htaꞈ ngaˬ shiˍ daꞈ leh Liꞈ hpu tanˬ henˇ htaˇ, ngaˬ pa ngaˬ e dawˇ haˍ jaˇ. Peuˬ leh ngaˬ daꞈ ve hpawˇ te ve htaꞈ yawˇ hui g’a mawˬ ve yoˬ. Yawˇ hui Liꞈ hpu g’aw leh Yaˬhoˉvaˬ ve Shaˉhkiˆhkanˍ ve chaw geh hpawnˬ daꞈ-e htaˇ ngaˬ ha lehˬ jaˇ.

Ngaˬ leh Hta-bi-tanˇ Liꞈ hpu hk’aw awˬ ca htaꞈ caˉ daꞈ ve awˬ liˇ awˬ hk’aˇ htaꞈ coˇ caˇ leh g’aꞈ te ve pa taw, ngaˬ huiˉ maˬ ha lehˬ jaˇ. Tawˇ pa haˉ te k’o, teˇ g’aˇ leh teˇ g’aˇ ka tiꞈ yeˬ daꞈ tuˬ beˆ maˍ laˇ ve htaꞈ g’aꞈ te ve pa taw, ngaˬ huiˉ maˬ hk’aˬ htaˆ kaꞈ haꞈ daꞈ ve yoˬ.​—Heˍbrehˇ 13:4.

Awˬ g’uˇ suhˍ hpawˇ ve awˬ lawn htaꞈ ngaˬ maˇ kawˆ leh maˇ dawˇ haˍ-o. Miˬ guiˬ chi hk’oˆ lo yonˍ hk’aˇ hk’a shuˍ ve yehˬ k’a hk’aw ngaˬ kaꞈ teˇ g’aˇ g’a chehˇ ve ha lehˬ jaˇ. Ngaˬ hui awˬ tehˬ ha lehˬ ve cawˬ leh teˇ moˍ tiˉ hpehꞈ ve yoˬ. Teˇ g’aˇ le le hk’a shuˍ-ehꞈ yawˆ yan daꞈ ve yoˬ. Chi lehˬ ngaˬ dawˇ lawˬ taˍ ve maw jaˇ-oˬ ve awˬ ceuˬ hpehꞈ ve yoˬ.