Yaˬhoˉvaˬ ve Shaˉhkiˆhkanˍ ve chaw nawˬ htaꞈ Liꞈ hpu henˇ ve jehˬ laˇ gaˇ ve yoˬ. Liꞈ hpu henˇ ve lehˬ nawˬ awˬ bon laiˉ ceuˬ g’a tuˬ yoˬ. Tawˇ pa haˉ te k’o,

•   Nawˬ a shaꞈ teꞈ kuiˬ hk’aw ha lehˬ g’a ve

•   Nawˬ G’uiˬ sha htaꞈ awˬ chawˇ g’a te ve

•   Awˬ g’uˇ suhˍ hpawˇ G’uiˬ sha ka tiꞈ te taˍ laˇ ve htaꞈ nawˬ g’a shiˍ ve

Awˬ lawn chi ve hk’aw awˬ hawˉ lo ve awˬ lawn htaꞈ nawˬ g’a henˇ tuˬ yoˬ.

•  Ngaˬ hui Liꞈ hpu hk’aˬ hk’e te henˇ ve le?

•  Henˇ ve hpu peuˬ-aw laˇ?

•  Hk’aˬ hk’e maw g’a henˇ ve le?

•  Henˇ gaˇ k’o hk’aˬ hk’e g’a te ve le?

•  Teˇ lawn lawn ceh henˇ nyi sheˍ ve hpehꞈ-aw laˇ?

•  Ngaˬ Liꞈ hpu henˇ-oˬ ve k’o, Shaˉhkiˆhkanˍ ve chaw g’a hpehꞈ ve laˇ?

•  Ngaˬ ve Liꞈ hpu yehˇ hpehꞈ-aw laˇ?

•  Ngaˬ awˬ nu ve chaw htaꞈ jehˬ piˇ leh teˇ geh henˇ hpehꞈ-aw laˇ?

•  Ngaˬ Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ jaw ve k’o, teˇ pawˆ k’awꞈ henˇ hpehꞈ-aw laˇ?

•  Maˍ laˇ ve chaw maˇ cawˬ leh ngaˬ hk’aˇ ngaˬ Liꞈ hpu henˇ gaˇ ve k’o hpehꞈ-aw laˇ?

 Liꞈ hpu maˍ ve chaw lehˬ, Nawˬ ve a shaꞈ co co taiˍ taiˍ ha lehˬ g’a ve! liꞈ k’oˆ yehˇ leh nawˬ htaꞈ teˇ lawn peuˬ teˇ lawn maˍ laˇ tuˬ yoˬ. Liꞈ hpu hk’aw aˬ htoꞈ ma maˍ laˇ taˍ ve le? Liꞈ hpu hk’aw nawˬ awˬ bon aˬ htoꞈ ma g’a ve le? Nawˬ g’a shiˍ tuˬ yoˬ. Chi aꞈ kehˉ k’awꞈ shiˍ gaˇ ve k’o VDO chi nyi sheˍ.

 Maˇ peuˬ. Yeˍsuˆ awˬ laꞈ g’awˇ htaꞈ k’oˆ piˇ ve, “nawˬ hui hkʼe leˇ gʼa ve hkʼa shuˍ shuˍ, shu htaꞈ hkʼe leˇ kʼawꞈ piˇ-oˆ” tehꞈ, Yaˬhoˉvaˬ ve Shaˉhkiˆhkanˍ ve chaw lehˬ Yeˍsuˆ ve hkawˇ htaꞈ na yuˬ leh g’aꞈ te ve yoˬ. (Maꞈhtehˍ 10:8) Chi hk’oˆ kaꞈ, Liꞈ hpu henˇ tuˬ awˬ pon liꞈ k’oˆ kaꞈ maˇ g’a vuiˬ. Nawˬ ve a shaꞈ co co taiˍ taiˍ ha lehˬ g’a ve! liꞈ k’oˆ hk’e leˇ lawˬ g’a ve yoˬ.

 Henˇ tuˬ ve awˬ lawn hk’a peu-eˬ 60 lawnˬ cawˬ ve yoˬ. Nawˬ hk’aˬ hk’e taw henˇ tuˬ leuˆ yuˬ g’a ve yoˬ. Maˇ-awˍ ve chaw k’o, teˇ shinˉ ve hk’aw 1 lawn hk’a peu-eˬ henˇ ve dawˇ cawˇ ve yoˬ. Maˇ heˆ leh, teˇ hpaˍ k’o teˇ shinˉ ve hk’aw laiˉ lawn henˇ ve dawˇ cawˇ ve yoˬ.

1.  1. Nawˬ ve awˬ lawn awˬ tanˇ awn-laiˉ hk’aw bvuhꞈ keu sheˍ. Nawˬ bvuhꞈ keu taˍ ve awˬ lawn awˬ tanˇ nawˬ htaꞈ caˉ daꞈ tuˬ ceh tiˉ ngaˬ hui yehˇ tuˬ yoˬ.

2.  2. Maˍ laˇ ve chaw nawˬ htaꞈ caˉ daꞈ tuˬ yoˬ. Liꞈ hpu hk’aˬ hk’e te henˇ ve maˍ laˇ ve chaw nawˬ htaꞈ k’oˆ maˍ laˇ tuˬ yoˬ. Nawˬ htawˇ dawˇ nawˬ dawˇ cawˬ ve na hkawˇ htaꞈ kaꞈ yawˇ hk’awꞈ laˇ tuˬ yoˬ.

3.  3. Nawˬ henˇ gaˇ ve awˬ yanˇ tinˍ piˇ g’a ve yoˬ. Nawˬ teˇ g’aˇ tawˬ teˇ g’aˇ, tawˇ yaw tuˬ awˬ hk’eun hk’aw, In-teu-neꞈ hk’aw, liꞈ bvuhꞈ feu daꞈ ve maˇ heˆ leh I-me hk’aw henˇ kaꞈ g’a ve yoˬ. Teˇ pawˆ leh teˇ pawˆ henˇ ve awˬ yanˇ 1 naˍ riˍ yehˇ ve yoˬ. Yaꞈ hk’aˇ, nawˬ awˬ yanˇ maˇ cawˬ ve maˇ heˆ leh chi aꞈ kehˉ k’awꞈ henˇ gaˇ ve k’o, awˬ yanˇ pa g’a ve yoˬ.

 Hpehꞈ ve yoˬ. Nawˬ awn-laiˉ hk’aw awˬ lawn awˬ tanˇ bvuhꞈ keu peuˬ hk’awꞈ nawˉ, maˍ laˇ ve chaw nawˬ htaꞈ caˉ daꞈ la tuˬ yoˬ. Nawˬ henˇ ve dawˇ cawˇ maˇ dawˇ cawˇ ve chi suhˉ-ehˍ henˇ nyi shaˍ tehꞈ, maˍ laˇ ve chaw htaꞈ k’oˆ piˇ g’a ve yoˬ. Maˍ laˇ ve chaw lehˬ, Nawˬ ve a shaꞈ co co taiˍ taiˍ ha lehˬ g’a ve!—Liꞈ hpu htaꞈ henˇ nyi sheˍ liꞈ k’oˆ ehˉ chi yehˇ leh maˍ laˇ tuˬ yoˬ. Liꞈ k’oˆ chi ve lehˬ 3 lawn ceh tiˉ cawˬ ve yoˬ. Nawˬ Liꞈ hpu henˇ ve dawˇ cawˇ maˇ dawˇ cawˇ ve shiˍ tuˬ, liꞈ k’oˆ chi ve ga laˇ tuˬ yoˬ.

 Maˇ heˆ. Liꞈ hpu hk’aw aˬ htoꞈ ma maˍ laˇ ve Yaˬhoˉvaˬ ve Shaˉhkiˆhkanˍ ve chaw awˬ nu ve chaw htaꞈ k’oˆ piˇ gaˇ ve yoˬ. Nawˬ bon liˇ pa tuˬ ngaˬ hui maˇ nyiˉ laˇ. Liꞈ hpu hk’aw k’oˆ ve hk’e ngaˬ hui g’aꞈ te ve yoˬ. Awˬ nu ve chaw aˬ htoꞈ ma ve bon liˇ yonˍ ve htawˇ yawˇ hui dawˇ cheˆ ve htaꞈ ngaˬ hui yawˆ yan ve yoˬ.—1 Peˍtruˆ 3:15.

 Hpehꞈ ve yoˬ. Nawˬ Liꞈ hpu hk’aˬ ve teˇ k’oˆ yehˇ kaꞈ hpehꞈ ve yoˬ. Yaˬhoˉvaˬ ve Shaˉhkiˆhkanˍ ve chaw lehˬ, Miˬ guiˬ awˬ suhˉ yuˬ tawˆ ve Liꞈ hpu yehˇ ve yoˬ. Liꞈ hpu chi teˇ k’oˆ lehˬ, tcuhˉ kuiˬ cawˇ ve leh na g’a sha ve yoˬ. Yaꞈ hk’aˇ, nawˬ yehˇ jaw ve Liꞈ hpu htaꞈ yehˇ kaꞈ g’a ve yoˬ.

 Hpehꞈ ve yoˬ. Nawˬ ve awˬ chawˇ maˇ heˆ leh yehˬ k’a hk’aw ve chaw htaꞈ jehˬ piˇ leh teˇ geh henˇ ve kaꞈ hpehꞈ ve yoˬ.

 Hpehꞈ ve yoˬ. Oˇ htaˇ aꞈ kehˉ kaꞈ chi teˇ pawˆ henˇ ve htaꞈ nawˬ pyawˍ tuˬ yoˬ. Awˬ lawn k’o, awˬ tcuhˉ awˬ yanˇ htaꞈ hawˍ daꞈ ve henˇ tuˬ ve laꞈ caˉ kaꞈ pa ve yoˬ. Liꞈ k’oˆ chi teˇ maˬ hk’aw VDO cawˬ leh henˇ htaˇ kaꞈ pyawˍ tuˬ yoˬ.

 Hpehꞈ ve yoˬ. Laiˉ g’aˇ Liꞈ hpu henˇ htaˇ awˬ nu ve chaw k’oˆ maˍ laˇ tcuh ve pa taw awˬ bon g’a jaˇ. Yaꞈ hk’aˇ, chaw teˇ hpaˍ k’o yawˇ hk’aˇ yawˇ henˇ nyi gaˇ ve yoˬ. Ngaˬ hui Liꞈ hpu henˇ tuˬ ve laꞈ caˉ cawˬ ve yoˬ. Nawˬ Liꞈ hpu henˇ g’a tuˬ chi teˇ tawn hk’aw hpfuhˆ nyi tuˬ ve laꞈ caˉ laiˉ ceuˬ cawˬ ve yoˬ. Nawˬ awˬ hawˉ lo cawˬ ve laꞈ caˉ teˇ hpaˍ htaꞈ yehˇ g’a ve yoˬ.

•   Liꞈ hpu maˍ ve awˬ tawn. Chi ve teˇ tawn hk’aw, ngaˬ hui a shaꞈ teꞈ kuiˬ hk’aw yuˬ yehˇ g’a ve Liꞈ hpu hk’aw ve awˬ liˇ awˬ hk’aˇ k’oˆ maˍ laˇ taˍ ve laiˉ lawn cawˬ ve yoˬ. Tawˇ pa haˉ te k’o, dawˇ haˍ dawˇ hkiˉ ve htaꞈ gu ve awˬ hk’aˇ, yaˇ htaꞈ maˍ ve awˬ hk’aˇ, kanˉ te ve hpu maˇ g’a maˇ ve k’o hk’aˬ hk’e te tuˬ le?

•   VDO Liꞈ hpu henˇ tuˬ ve awˬ pon. Liꞈ hpu htaꞈ k’oˆ maˍ laˇ tuˬ chi suhˉ-ehˍ ve VDO laiˉ maˬ cawˬ ve yoˬ.

•   Liꞈ hpu hk’aw hk’awꞈ laˇ hkawˇ. Liꞈ hpu htaꞈ caˉ daꞈ ve na hkawˇ teˇ hpaˍ hk’awꞈ laˇ hkawˇ cawˬ ve yoˬ.

•   Liꞈ hpu awˬ tawn k’oˆ maˍ laˇ taˍ ve. Liꞈ hpu awˬ tawn ve tcuhˉ kuiˬ leh tawˇ hkawˇ teˇ hpaˍ ve tcuhˉ kuiˬ htaꞈ k’oˆ maˍ laˇ ve yoˬ.