Loroma Lodhowa wa Akoritiyo 1:1-31
1 Miyo Paulo, wosakuliwa kala rumiwi wa Kristu Yesu movwelana na ifunelo ya Nlungu vambo-i na bali-u Sostene,
2 ndinolembela nyo a pingo wa Nlungu wu Koritiyo, mucheni-iwile mwa Kristu Yesu, nyo muitaniwile ira mukale ochena, vambo-i na atu othene ali wu limburo nlilothene anoitana vadhina la Mbwii-u Yesu Kristu, liye ndi Mbwiiwa na Mbwii-u.
3 Nlungu Babi-u na Mbwii-u Yesu Kristu tauva-eni riya rima ulukhulu na rendele.
4 Hora dhothene ndinom’simba Nlungwanga, voona riya rima ulukhulu wauthonyi-edheleni liye dhela mwa Kristu Yesu.
5 Namwasa ovwelana naliye, muli ofuma muvyongo vyothene, thitho utoukami-ani kaana dodoliso loonga noidhiwa vyongo vyothene,
6 voi umboni* oonga vya Kristu utokaatheya vari vinyu.
7 Mutokaana yotuva yokwakwanela vanodedi-edhela nyo mwa ifunelo ona oneela wa Mbwii-u Yesu Kristu.
8 Thitho Nlungu unodha ulimbi-ani fiyedha khomoni, ira mwa-akaena myasa younukhedhani vadambo la Mbwii-u Yesu Kristu.
9 Nlungu auitaneni ira mukale ovwelana na Mwanee Yesu Kristu Mbwii-u, ngororomeleya.
10 Va-eni ninousembezelani abali, mu dhina la Mbwii-u Yesu Kristu, ira mwethene muongenga movwelana thitho vari vinyu kavakale gaaneya, mbwenye mukale ovwelana maningi vokaana rima umbo-ive na mathuulelo mambo-ive.
11 Namwasa oi atu enango a banja la Kulowe atondiwandela vya nyo abalanga, ira vari vinyu vatokala gaaneya.
12 Ndinothapulela ira, atu enango mwa nyo anoonga ira: “Miyo ndili wa Paulo,” enango anoonga ira, “Miyo ndili wa Apolo,” enango thitho anoonga ira, “Miyo ndili wa Kefa,” voi enango thitho anoonga ira, “Miyo ndili wa Kristu.”
13 N’nga Kristu ngogaaneya? N’nga Paulo atoothomeiwa vaimurini yoonelavo nyarwa* ira nyo muvulumuchiwe? N’nga venango mwabadiziwile mudhina la Paulo?
14 Ndinosimba Nlungu ira kandabadizile mutu uliwethene wa nyo khumi-avo Kirisipo na Gayo,
15 moi kavali mwinango unofuna onga ira mwabadiziwile mudhina langa.
16 Pyaimbarimbari ira ndatoobadiza thitho atu a vanyumba ya Sitefana. Mbwenye vya atu enangwao, kandinoidhiwa akala ndatoobadizavo mutu uliwethene waaliwa.
17 Kristu kandirumile ira ndibadizenga atu, mbwenye ira ndilaleelenga milanyu yapama, a-kala mwadodoliso loonga,* ovela ira imuri yoonelavo nyarwa* ya Kristu inokala yo-okaana basa.
18 Mwasa okhuza imuri yoonelavo nyarwa, ndiyongo yopupwa waatu anofuna dhowa manongiwa, mbwenye wa i-yo anovulumuchiwa, yen’na ndi kopolo ya Nlungu.
19 Namwasa oi Malemba anoonga ira: “Ndinodha mali-a zelu dha atu azelu thitho ndinodha konda wenjela waatu azelu.”
20 N’nga wazelu uli wani? N’nga mulembi uli wani? N’nga oidhiwa runi-a wahora ino* uli wani? N’nga Nlungu kairi-idhe ira zelu dha ilamboi dhikale dho-okaana basa?
21 Namwasa onyindela zelu dhiwa atu ailambo katifiile vom’mwidhiwa Nlungu. Malomwee, Nlungu atoona ira pyapama vulumucha atu ororomela dhela mumilanyu inoona atu enango kala yo-okaana basa.
22 Ayuda anofuna ona vizindiyelo thitho Agiriki anosakasaka zelu.
23 Mbwenye i-yo ninolaleela vya Kristu wenuo aphiwile vothomeiwa vaimuri yoonelavo nyarwa. Ayuda anoona ira vyevi pyosukwali-a mbwenye atu amaziza enango anoona ira vyevi pyo-okaana basa.
24 Angalive ira vili e-no, Ayuda na Agiriki aitaniwile anoona ira Kristu ndi kopolo ya Nlungu na zelu dha Nlungu.
25 Namwasa oi yongo ya Nlungu inoona atu ira cho-okaana basa chazelu kwaranya atu, thitho yongo ya Nlungu inoona atu ira chofooka chakopolo kwaranya atu.
26 Abali munooda ona ira aitaniwile vari vinyu kai anjinji anooniwa naatu ira mbazelu, thitho kai anjinji ali akopolo, kai anjinji akhumele mabanja olemezeya.
27 Mbwenye Nlungu atoosakula atu anooniwa na ilambo ira mbo-okaana zelu, ira ava-e manyadho atu azelu, thitho Nlungu atoosakula atu anooniwa kala ofooka ira ava-e manyadho atu akopolo.
28 Nlungu atoosakula vyongo vinooniwa na ilambo ira vyo-okaana basa na vyongo vinopwaza atu, vyongo vyoi kavilivo, ira airi-e vyongo vilivo kala vyo-okaana kopolo.
29 Atooirana vyevi ira va-afwanyeye mutu ogaya vamethoni va Nlungu.
30 Mbwenye nyo muli ovwelana na Kristu Yesu namwasa wa Nlunguo. Yesuo unonithonyi-edha zelu dha Nlungu na longomanolee. Dhela mwa Yesu, atu anooda cheni-iwa, thitho dhela mu yoombolana anooda thathuliwa,
31 ira vivwelane na vinoonga Malemba ira: “Mutu unogaya, agaye mwa Yohova.”*
