Loroma wa Timoteo 5:1-25
5 Khusumulule mwauwali lombwana oulula, mbwenye um’mongengana moriya rima ninga babaa. Azombwe uaongengana ninga abalaa
2 thitho a-iyana oulula uaonengana ninga m’maa. Asikana uaongengana ninga arongolaa thitho voirana vyevi kukaengana mathuulelo aliothene odaweya.
3 Uthuulelenga a-iyana amakwele oi mbaamakweledi.*
4 Mbwenye akala ira i-yana wamakwele utokaana a-ima venango adhuulu, aliwa takale oroma samalela atu avabanjani viwa vothonyi-edha ira mbodhivelela wa Nlungu. Aliwa tanofwanela weleli-edha anamabaliwa na ambwiiwa vyongo vyofuneeleya namwasa oi vyevi vinosangalali-a Nlungu.
5 I-yana oi ngwamakweledi, oi unorambulela mutu om’samalela, unonyindela Nlungu thitho unodhowanave lobela mosembezela nathana nama-iyu.
6 Mbwenye mutu unoirana vyongo mo-arela naluveluvee, ngokwa angalive ira ngwaingumi.
7 Udhowenave ava-a malangi-o* enala ira ta-akaena mwasa oanukhedhela.
8 Mwaimbarimbari, akala mutu kanosamalela atu oi ndi izoyee asamalela, simbwasimbwa avabanjanivee, utokonda iroromelo thitho ngothakala kwaranya mutu o-ororomela.
9 Vathandha wa a-iyana amakwele, valembiwenga i-yana wamakwele okwaranya vyawa 60. Akale thitho oi ali ororomeleya wa man’nee,*
10 oidhiweya ira anoolaba mabasa apama, atoulukhuli-a a-imee pama, anoowachela alendo, atoo-uwa manyalo aatu ochena, atookami-a atu oi tali vanyarwani thitho anoolaba modhivelela basa nlilothene lapama.
11 Mbwenye vathandha wen’na khu-elevo asikana amakwele, namwasa oi akaana naluveluve ofuna lombwana malo molabela Kristu, tanosakula theliwa.
12 Vyaira e-no, tanofwanyeya odawa namwasa oi katikwakwaneli-edhe vyalanyedhile aliwa.
13 Mbwenye malo molaba aliwa tanokalela wendawendanga mavandhe mwaafiwa. Wenjedhela vevo tanokalela thitho onga mafyeda, volowela myasa yaatu enango noonganga vyongo vyo-ofwanelela vionga.
14 Ee-no ndingadhiveliwile ira asikana amakwele tatheliwenga, nobala a-ima thitho samalelenga mabanjiwa naifunelo yoi atu oruni-a ta-anifwanyele mwasa.
15 Thitho enango atomala dimeli-iwa wale moi atoroma a-rela Satana.
16 Akala i-yana uliwethene ororomela utokaana abalee oi mbaa-iyana amakwele, liye unofwanela akami-anga, ira a-iyana amakwelao ta-anyemeli-enga pingo. Vyaira e-no pinguo unooda kami-a a-iyana oi mbaamakweledi.*
17 Andimuwa avapingoni anosogolela pama talemeziwenga maningi simbwasimbwa oi tanokaana thindhi voonga madhu a Nlungu nofunji-a.
18 Namwasa oi madhu a Nlungu anoonga ira: “Khumange ng’ombe lomo vahora inoputa aliwa mbeu.” Thitho anoonga ira: “Namalaba unofwanela tambili-iwa.”
19 Khurumele selu onukhedhiwa wa ndimuwa wa vapingoni, i-yavo akala vatokala umboni waatu ambili venango araru.
20 Atu ana ilemeelo yodawa, uasumululenga ira atu enangwao taove.*
21 Ndinouwandela mwakopolo, vamethoni va Nlungu na Kristu Yesu na va angelo oira sakuliwa, ira u-arelenga malangi-o enala mo-osakula.
22 Khumbaranye e-la mutu uliwethene vaizo, venango gaana naatu enango vyodawa viwa. Udhowenave kaana kalelo lochena
23 Khumwengave ma-inje baa-i, mbwenye umwenga vinyu vang’ono, namwasa wa yoruchayaa ya mbani thitho namwasa oi unobulelecha wiliwili.
24 Vyodawa vyaatu enango vinoidhiweya waatu, thitho anotongiwa hora yeniyene. Mbwenye vyodawa vyaatu enango vinooneela vavira hora.
25 Naaliwene thitho mabasa apama anoidhiweya waatu, thitho vyongo vyo-oidhiweya kavinalokoteye modhowa nodhowa.
Madhu achindo
^ Venango: “a-iyana amakwele oi tanorambulela vyongo.” Thapulela ira katina mutu oasamalela.
^ Venango: “malamulo.”
^ Mundhila inango: “i-yana walombwana m’mbo-i baa-i.”
^ Venango: “a-iyana amakwele oi tanorambulela vyongo.” Thapulela ira katina mutu oasamalela.
^ Mundhila inango: “tawenjeli-iwe.”