Wa Aebere 3:1-19
3 Ee-no abali-u ochena oi muli mu gulu laatu oitaniwa dhulu, muthuulele vya Yesu unom’rumela i-yo, ira ndi rumiwi na ndimuwa wa asembe.
2 Liye ali ororomeleya wa Nlungu am’enle liye kala rumiwi na ndimuwa wa sembe, ninga mwemo thitho mwakalele Mose ororomeleya vanyumbani va Nlungu.
3 Yesu unofwanela titimi-iwa maningi kwaranya Mose, namwasa oi mulimbo manga nyumba unolemeziwa kwaranya nyumbiyo.
4 Pyaimbarimbari ira nyumba iliyothene inomangiwa na mutu mwinangwee, mbwenye apanduchile vyongo vyothene ndi Nlungu.
5 Mose ali rumiwi ororomeleya vanyumbani va Nlungu thitho urumiweuo wali umboni wa vyongo vyafuna dhaongiwa sogolo.
6 Mbwenye Kristu ali mwana thitho anoing’anela nyumba ya Nlungu mororomeleya. I-yo ninokalave nyumba ya Nlunguo nadhowanave kaana ufulu oonga no-indedhela mwakopolo idedi-edho inonyindela i-yo fiyedha khomoni.
7 Ee-no movwelana na vinoonga zimu ochena ira: “Penene mwavwa madhu a Nlungu,
8 kamuumi-e miriminyu ninga vyakalele aliwa na anamabalinyu mwandiiri-idhe aliwa thakaleliwa maningi, ninga mwakalele aliwa vadambo landiwesedhile aliwa kokolani.
9 Kokolanimo, anamabalinyu tatoondiwesedha angalive ira tatoona mabasanga wa vyawa 40.
10 Ngumwasee ndatoothakaleliwana mbumba yeniyo, moi ndaongile ira: ‘Mirimiwa inodimeli-iwa hora dhothene thitho aliwa katiidhi ndhila dhanga.’
11 Ee-no ndatoolumbela ndangathakaleliwile ira: ‘Katinodha volowa mulimburo langa lovuma.’”
12 Muwenjele abali ira vari vinyu, mutu kakhume wa Nlungu waingumi nokaana rima othakala o-okaana iroromelo.
13 Malomwee, mudhowenave limbi-ana dambo na dambo, hora iliyothene inoonga nyo ira “Penene,” ira inyengo yakopolo ya vyodawa ya-aumi-e rima wa mutu uliwethene wa nyo.
14 Ninoira vyairilena Kristu akala vyongo vyanyindenle i-yo voroma ninodhowanave vilabi-edha basa fiyedha khomoni.
15 Voi malemba anoonga ira: “Penene mwavwa madhu a Nlungu, kamuumi-e miriminyu ninga vyakalele aliwa na anamabalinyu mwandiiri-idhe aliwa thakaleliwa maningi.”
16 N’nga mbaani vale avwide mbwenye aliwa m’thakaleliwi-a Nlungu? N’nga kai atu othene akhumile ilambo ya Iguputu mosogoleliwa na Mose?
17 I-yavo vyevyo, n’nga mbaani airi-idhe ira Nlungu athakaleliwe wa vyawa 40? N’nga kai atu adawile nokwela kokolanale?
18 N’nga mbaani aalumbelele liye ira katinodha volowa mulimburolee lovuma? N’nga kai enale akhondile am’vwelale?
19 Ee-no, ndinoona ira kataode volowa mulimburo lovumalo namwasa oi katana iroromelo.
