Wa Aebere 4:1-16
4 Ee-no voi yolanyedha yovolowa mulimburo lovuma itokalavove, muire polepole ovela ira mutu mwinango wa nyo unooda imwanana kwakwaneli-edha vinofuneya ira amavolowe mulimburo lovumalo.
2 Milanyu yapama yatoolaleeliwa wa i-yo, ninga mwemo thitho mwalaleeliwile aliwa wa anamabali-u. Mbwenye madhu avwide aliwao kataakami-idhe namwasa oi aliwa katana iroromelo yofwanafwana na yaatu tavwele madhwao.
3 I-yo oi ninaathonyi-edha iroromelo ninaavolowa mulimburo lovumalo. Voonga vya limburo lovumali liye aongile ira: “Ee-no ndatoolumbela ndingathakaleliwile ira, ‘Katinodha volowa mulimburo langa lovuma,’” angalive ira ali angamari-idhe basalee vahora yakaathi-iwile ilambo.
4 Voonga vya dambo la 7, ikhundu inango ya malemba inoonga ira: “Thitho Nlungu atoovuma vamabasee othene vadambo la 7.”
5 Vano thitho unoonga ira: “Katinodha volowa mulimburo langa lovuma.”
6 Ee-no voi ngari yovolowa mulimburo lovumalo itokalavove, thitho atu taromile uvwa milanyu yapamayo kataodile volowamo namwasa o-ovwela,
7 vangavirile hora, Nlungu atoonga musalimo la Davide ninga mwemo mwaongile i-yo wale mukartali ira: “Penene mwavwa madhu a Nlungu, kamuumi-e miriminyu.” Ee-no utosakula dambo linoromola liye ira “Penene.”
8 Namwasa oi aakale ira Yoswa atoavolowana mulimburo lovuma, Nlungu kaonge thitho vasogolovee vya dambo n’nango.
9 Ee-no limburo lovuma la sabudu litokalavove waatu a Nlungu.
10 Mutu uvolowile mulimburo lovuma la Nlungu, kuongela ira utovuma thitho va mabasee, ninga mwemo Nlungu mwavumile liye va mabasee.
11 Ee-no, dhoweni niireni vilivyothene vinaode i-yo ira nivolowe mulimburo lovumalo, naifunelo yoi mutu mwinango a-akale o-ovwela ninga vyate anamabali-uao.
12 Namwasa oi madhu a Nlungu mbaingumi thitho akopolo, moi mboirwa kwaranya sarasada lililothene loirwa wu na wu. Anolatha mutu rimani fiyedhela i-yani-a ingumi na zimu thitho makhuva na makhura a makhuva. Madhu a Nlungu anooda thitho zindiyela vinothuulela mutu na vinofuna rimee.
13 Kavali yopanduchiwa iliyothene yoi Nlungu kanooda iona. Namwasa oi wa liye vyongo vyothene vili vooneela thitho unooda viona pama moi i-yo ninodhawakula wa Nlunguo va vyoira vi-u.
14 Ee-no, voi nitokaana ndimuwa wa asembe wa vadhulu Yesu Mwana Nlungu, oi atoodhowa dhulu, dhoweni nidhowenave laleela vyoi ninom’roromela.
15 Namwasa oi ndimuwa wa asembe una i-yo ula, kai ndimuwa wa asembe oi kanonivwela tangaranga va vyofooka vi-u. Mbwenye ndi ndimuwa wa asembe oi atoowesedhiwa muvyongo vyothene ninga i-yo, thitho atookalave o-odawa.
16 Ee-no dhoweni nifiyengani wu pando wa umwene wa Nlungu thitho nilobelengani na ufulu oonga ira anivwele tangaranga nonithonyi-edha riya rima ulukhulu vahora yofwanelela.