Wa Aroma 2:1-29
2 Ee-no akala we unotonga atu enango mo-obala ira uli ani, kuna mwasa ovweya odhiona ira unoira vyongo vyapama. Voi watonganga atu enango, unokala udhitonganga wekhene namwasa oi we thitho unoirecha vyevyo.
2 Nitoidhiwa ira Nlungu atonganga ira atu anoirana vyevi talangiwe, unotonga movwelana na imbarimbari.
3 We watonganga atu anoirecha vyongo vinoirecha we, n’nga unothuulela ira unodha vithala ira wa-atongiwe na Nlungu?
4 N’nga kunaidhiwa ira Nlungu unaauoni-a riya rimawee ulukhulu, a-thakaleliwa mombaranya noleva rimawee naifunelo yoi uchinyuwe?
5 Mbwenye namwasa oi kunofuna chinja nooni-a ira utochinyuwa, Nlungu unodha ulanga vadambo linofuna liye dhatonga molongomana.
6 Liye unodha tonga mutu uliwethene movwelana na vyoira vyee.
7 Atu anodhilimbi-edha fwanya titimi-o, lemezo, ingumi yo-onongeya nodhowanave irana vyongo vyapama, liye unodha ava-a ingumi yo-omala.
8 Nlungu unodha athakaleliwana atu anodhiveliwana kangana, o-o-arela imbarimbari na anoira vyongo vyo-olongomana.
9 Mutu uliwethene unoirana vyongo vyothakala, masiki akale Muyuda venango Giriki, unodha gumanana nyarwa na vyongo vyopha.
10 Mbwenye uliwethene unoirana vyongo vyapama unodha wachela titimi-o, lemezo na rendele, yoroma Muyuda amala Giriki.
11 Namwasa oi Nlungu kana sakulo.
12 Atu othene adawile ta-anaidhiwe ilamulo, anodhakwa ta-anaidhiwe ilamulo. Mbwenye atu othene adawile tangaidhi ilamulo, anodha tongiwa movwelana na ilamulo.
13 Voi atu ovwa ilamulo baa-i, Nlungu kanoaona kala olongomana mbwenye anoi-arela ilamuloyo mbanofuna dhaoniwa ira mbolongomana.
14 Atu amaziza enango tairanga vilembiwile muilamulo ya Nlungu angalive ira aliwa katiidhi ilamulo, anothonyi-edha ira ilamuloyo ili mirimani mwiwa.
15 Atu enala anothonyi-edha ira makhundo amuilamulo atoolembiwa mirimani mwiwa thitho ithuulela rimaiwa inoairela umboni thitho mathuulelwiwa anoaruni-a venango arumeli-a akala vinoira aliwavyo pyapama venango pyothakala.
16 Vyevi vinodha oneya vadambo linofuna Nlungu dhatonga dhela mwa Kristu Yesu vyongo vyasegeredo vinoira atu nothuulela. Vyevi vinodha ireya movwelana na milanyu yapama inolaleela miyo.
17 Enango a nyo munodhiromola ira muli Ayuda, munonyindela ilamulo thitho munogaya ira muli vauxamwali na Nlungu.
18 Munoidhiwa vinofuna Nlungu thitho munosangalala na vyongo vyapama namwasa oi mwatoofunji-iwa Ilamulo.
19 Munororomela ira munooda sogolela atu o-oona nomoneela atu ali isini.
20 Munothuulela ira munooda kami-a atu o-okaana zelu nofunji-a a-ima namwasa oi munovwechecha imbarimbari inofwanyeya mu Ilamulo.
21 N’nga we unofunji-a atu enango, mwasiwa ngwan’ni kunodhifunji-a wekhene? Unolaleela atu enango ira, “Kamube,” n’nga mwasiwa ngwan’ni we thitho unoba?
22 We unoongecha ira, “Kamuraruwe,” n’nga mwasiwa ngwan’ni unoraruwecha? We unoongecha ira unothakaleliwana mafwano, n’nga mwasiwa ngwan’ni unobecha vyongo vya kachisini?
23 We unogaecha namwasa oidhiwa ilamulo, n’nga mwasiwa ngwan’ni unom’mwirela Nlungu vyaiburutu vopwanya thitho Ilamulo?
24 Ninga mwaongele malemba, “dhina la Nlungu linaanyoziwa vari vaatu amaziza enango namwasa wa nyo.”
25 Ineliwa kwapama akala we uno-arela ilamulo. Mbwenye akala unopwanya ilamulo, ineliwawaa ko-okaana basa.
26 Ee-no akala mutu o-oineliwa uno-arela makhundo olongomana Amuilamulo, angalive ira liye kaineliwile, unodha oniwa ninga mutu oineliwa.
27 Mutu oi ngo-oineliwa a-arelanga Ilamulo, unodha utonga namwasa oi angalive ira utoineliwa thitho utokaana malamulo olembiwa, we kunoavwela.
28 Namwasa oi mutu uli Muyuda undhe baa-i kai Muyuda, thitho ineliwa wamanungo baa-i, kai ineliwa.
29 Kala Muyuda waimbarimbari unokhumela rimani thitho ineliwawee unokala wa rimani oiriwa na zimu, a-kala na malamulo oira lembiwa. Titimi-iwa wa mutu wenuo unokhumela wa Nlungu a-kala waatu.
